Weg! Ry & Sleep Oct/Nov 2025

Ek is nog altyd versot op hierdie tyd van die jaar. Die lente het nou al ’n klompie weke gehad om die winter behoorlik die deur te wys en ons is sterk op pad na die einde van die jaar. Dis asof daar iets magies in die lug is wat ’n mens nuut laat asemhaal. Die sagte geur van bloeisels, die warmte van die sonstrale en die belofte van langer dae wat vra vir avontuur. Ná ’n lang, stil winter is dit asof die wêreld self weer lewe kry, en dít beteken nét een ding: Dit is tyd om weer in te pak, in die pad te val en die natuur binne te vaar. Vir mense soos ons is hierdie maande meer as net ’n seisoensverandering. Dit is ook die…

Met ons aftrede vanjaar besluit ek en my vrou, Verna, om met 2024 se Weg Namibië in die hand te gaan toer in Namibië, Zambië en Botswana. Ons vertrek einde April 2025 en besluit om sover moontlik met ons driemantent te kamp. Die Suzuki Vitara draf voor met die 5 voet-sleepwa agterna, gelaai met toerusting en ’n matras op die deksel. Ons trek eerste in by die Augrabieswaterval ná ’n draai op Keimoes en Kakamas. Ons loer ook in by die Pienk Padstal en gaan kyk by Kanoneiland na die brug oor die Oranjerivier. Dis ’n belewenis om die waterval in volle vloed te sien, maar die badkamers in die kampplek is teleurstellend. Die volgende dag ry ons Namibië by Onseepkans binne en besoek Karasburg, ’n plek waar jy ál…

Ter voorbereiding van ons eerste Botswana-avontuur probeer ons alles lees en kyk – van YouTube-video’s tot artikels en kampstories. Ons lees van Jacques Greeff se raad in die Junie-Julie 2025-uitgawe om vooraf vleis in Palapye te bestel. So gesê, so gedaan. Die filet en wors is van goeie gehalte, maar die skaaptjops nie heeltemal nie. Laat ons maar erken: ons is vleissnobs. Ons is deur die Stockpoort-grenspos en kan dit aanbeveel: Dinge loop vinnig en maklik, en dis nie oorvol nie. Die grondpad tot by Mahalapye is heel aanvaarbaar. Die dorp het ook ’n moderne winkelkompleks en ’n indrukwekkende slaghuis wat ons van die pad af kan sien. Kubu-eiland by Xhumaga is pragtig. In Maun is dit eers weer vleistyd. Ons ontdek ’n juweel van ’n plek: Delta Meat Deli.…

’N LANG PAD MET LANG STORIES Die R355 tussen Calvinia en Ceres is die langste ononderbroke grondpad in Suid-Afrika en ’n berugte bandvreter. Ons lesers deel hulle ervarings ná ’n foto van @noel_cloete wat op ons Facebookblad geplaas is. Heinrick Strauss Goeie kinderdae-herinneringe op hierdie pad. Toe my pa nog geleef het, het ons die pad twee of drie keer ’n jaar gery om familie in die Noord-Kaap te besoek. Dis waar ek en my broer leer bestuur het. Geen rede vir ’n 4x4 óf ’n spesiale voertuig nie, net ’n doodgewone een met die regte bande: 13 duim of 14 duim, en ’n wandhoogte van 60, 65, 70 of 75. Geen laeprofielbande nie. Pa het ons geleer hoe om met ’n gewone voertuig op sandpaaie te ry en die…

Ek het Cyril Klopper se artikel “Die geheim van die Oos-Kaapse Karoo” – oor die roete met die tien poorte en een nek – in die Junie-Julie 2025-uitgawe gelees en wil ook die roete ry. Ek het net een probleem: Ek kry dit nie uitgestippel op Google Maps nie, en ook nie op my Tracks4Africa-kaartboek nie. Ons is gek daaroor om grondpadpasse en deur poorte te ry, en terselfdertyd klein plekke en nedersettings te besoek. Ons het ’n klompie jaar gelede van Klipplaat af oor Swanepoelspoort deur Willowmore gery tot by die Prins Alfredpas tussen Uniondale en Knysna. Die tien poorte lyk na ’n lekker roete op pad Addo toe. Die vraag is watter kaarte Cyril gebruik om sy roetes te beplan? Hy verwys na die P1852-plaaspad; watter kaarte toon…

Net 20 km anderkant Montagu kan jy nou rus en vrede gaan opsoek by die Oubergreservaat. Dis 900 ha se skone Klein-Karoo-natuur waar jy jou kan tuismaak op een van vyf splinternuwe staanplekke. By Ouberg se nuwe kampplek kry jy ’n blaaskans diep in die berge waar selfs geen selfoonsein jou kan bykom nie. (Jy is darem nie heeltemal van die buitewêreld afgesny nie, want hier is gratis wifi beskikbaar op jou staanplek.) Elk van die staanplekke is op ’n skoongemaakte kol in die veld met ’n klein braaiplek (met ’n rooster) en ’n kraan waaruit jy boorgatwater kan tap. Elke staanplek het ’n rietskuiling op vier pale waarvan twee kante toegemaak is. Verder is die eienaars, Richard en Susan Gie, besig om ’n plonspoel vir kampeerders te bou. Die…