Finweek - Afrikaans 8/06/2021

dié uitgawe van finweek sluit die winteruitgawe van Kollektiewe Insig in waarin verskeie medewerkers die toeganklikheid van alternatiewe beleggings vir kleinbeleggers bekyk. Ek wil nie enige van die uitstekende bydraes uitsonder nie, maar ek wil fokus op Chris Hart se grondige argument vir die herinstelling van die artikel 12J-belastingaansporingskema. Die nasionale tesourie het dit einde Junie laat verval. Maar kom ons kyk eers terug. Suid-Afrika se ekonomie benodig ná jare lange onderprestasie, aangevuur deur voortslepende kragonderbrekings, verregaande patronaatskap (wat seldsame hulpbronne vir onproduktiewe, opsigtelike verbruik afskep), korrupsie en ’n oligargiese private sektor, dringend vernuwing van die regering af. Om billik te wees – daar is ’n paar spriete van hervorming: groter steun op private kapitaal vir kragopwekking, die privatisering van die nasionale lugdiens en die finansiering van naskoolse onderrig vir…

al het jy dalk nog nooit van DeFi (dit wil sê gedesentraliseerde finansies) gehoor nie, is dit ’n groot deel van vandag se wêreld. DeFi gebruik nuwe tegnologieë soos blokketting, wat tradisionele finansiële tussengangers soos makelaars, beurse of banke vermy. Verbruikers en klein ondernemings verloor tot 3% van die waarde van ’n transaksie as hulle kredietkaarte gebruik. Remissiekoste kan tot 7% beloop. Dit neem dae om ’n transaksie af te handel. DeFi kan al hierdie ondoeltreffendhede vermy. ’n Nuwe artikel deur ekonome Campbell Harvey, Ashwin Ramachandran en Joey Santoro, “Defi and the Future of Finance”, bied ’n oorsig van DeFi se boustene: blokketting, kriptovaluta, slimkontrakte, “oracles”, “stablecoins” en “dApps”. Hierdie instrumente laat die gebruik van digitale transaksies, verwisselbare en nie-verwisselbare betalingsbewyse (en die gepaardgaande munt en verbranding hiervan), belonings, omruiling…

“MANGO SAL IN SAKEREDDING GEPLAAS WORD.” – Thomas Kgokolo, tussentydse uitvoerende hoof van die Suid-Afrikaanse Lugdiens, het aan eNCA gesê die SAL se filiaal Mango Airlines is op die sakereddingsroete. Volgens hom beraadslaag die lugdiens tans met belanghebbendes oor hoe die proses bestuur kan word. Kgokolo sê sommige van Mango se personeel het nog nie hul salarisse ontvang nie en dat dié kwessie in die komende weke hanteer sal word as deel van ’n reddingspakket van R2,7 miljard vir die SAL se filiale. Die SAL het in April uit sakeredding getree ná ’n lang proses waarin sy werksmag met byna 80% verklein is. “Voldoen ons aan die verwagtinge?” – Oudpresident Kgalema Motlanthe sê die Grondwet, as die hoogste wet van die land, lê sekere waardes neer wat ons moet handhaaf…

DIE GOEIE Pfizer en BioNTech het ooreengekom dat SA se Biovac Institute in 2022 sal begin om meer as 100 miljoen dosisse per jaar van hul Covid-19-entstof vir die Afrika-unie te vervaardig en te versprei. Aspen Pharmacare het op 26 Julie begin om Johnson & Johnson (J&J) se Covid-19-entstof aan die land te voorsien. President Cyril Ramaphosa het aangekondig die regering stel die inentingsprogram op 1 September vir 18-tot 34-jariges oop. SA sal 31 miljoen dosisse van Pfizer en J&J se entstof oor die volgende drie maande ontvang, wat sal verseker die land het genoeg entstof vir die res van die jaar, het hy gesê. DIE SLEGTE Die Pegasus-projek, ’n ondersoek deur ’n konsortium bestaande uit internasionale media- en nieregeringsorganisasies, het onthul hoe die Pegasus-spioenasieware van die Israeliese maatskappy NSO…

Sou jy die keuse gebied word, wat sou jy verkies: ’n vakansie in die suide van Frankryk of ’n nuwe diamant? Terwyl ons in die winter se greep vasgevang is, klink die idee om gerieflik aan ’n Grand Cru Bourgogne in die Mediterreense son te sit en teug beter as die aanloklikheid van yskoue wit juweliersware, ongeag die geleentheid (of selfs die liefde). Volgens ’n verslag van Morgan Stanley, troef die “doen van dinge” die “kry van goed”. Ervaring klop eienaarskap, veral in ’n gemeenskap wat deur Covid-19 geteister word waar die lewe onseker is. Dit is een van die redes waarom die bank meen dat die veel verwagte herstel in die diamantmark beperkte opwaartse potensiaal sal hê. Op die oog af, is die diamantmark besig om terug te stu.…

andeelhouers in Anglo American Platinum (Amplats) het die verklaring van ’n tussentydse dividend van R175 per aandeel – gelykstaande met 100% van die rekordwesensverdienste van R46,4 miljard wat die filiaal van Anglo American verlede week verklaar het – aan rodium te danke. Die metaal se prys was tot $30 000 per ons in die ses maande en het gevolglik 44% van die inkomste verteenwoordig – ’n verstommende bydrae met dié dat Amplats in die huidige boekjaar na verwagting altesame 4,2 miljoen tot 4,4 miljoen onse platinumgroep metale sal produseer. Die vraag is of daar verwag kan word dat rodium teen dié vaart sal voortsnel. Amplats het op ’n voorlegging gesê verlede jaar se rodiumtekort van 72 000 onse sal vanjaar ’n klein oorskot word voordat dit aanstaande jaar na ’n…