Landbouweekblad 04 August 2022

DRASTIESE VOORKOMING. ’n Wildboer, wat om veiligheidsredes sy naam en ligging weerhou, het onlangs hulp ingeroep om dié renoster te laat onthoring om dit teen stropers te beskerm. Tydens dié proses word die meeste van die horing afgesny en alle skerp hoeke rond gemaak om onnodige beserings te voorkom. Onder verdowing word DNS-monsters, die horings se mate voor en ná verwydering, bloed-, weefsel- en haarmonsters geneem. ’n Basiese gesondheidsondersoek word ook gedoen, en veeartse dien onder meer ’n vitamienaanvulling toe. Terwyl die renoster onder verdowing is, word hy geblinddoek en sy gehoor met oorpluisies verdoof om spanning te verminder.…

DIE hervatting van graanuitvoer uit Oekraïne sal beduidende verligting bring vir invoerlande, ook in Afrika. Oekraïne het nagenoeg 22 miljoen ton graan, onder meer koring, mielies en sonneblomsaad, in silo’s wat hy sedert die Russiese inval nie kon verskeep nie. Gegewe Oekraïne se groot aandeel in die wêreldwye graan- en oliesademark het die uitvoerblokkade gelei tot ’n beduidende styging in landboukommoditeitspryse sedert die oorlog begin het. Rusland het in die ooreenkoms van 22 Julie onderneem om geen graanskepe in die Swartsee aan te val nie. Minder as 24 uur ná die ooreenkoms bereik is, het Russiese missiele egter die Oekraïnse hawestad Odessa getref. Dié aanval kan die ooreenkoms ondermyn. Verder kan graanhandelaars huiwerig wees om in die gebied sake te doen as hulle dit as te riskant beskou. As Rusland…

‘Dit is baie hartseer dat boere dankbaar was om vanjaar 20% van hul normale waterkwota te kry.’ ME. RIENETTE COLESKY, bestuurder van die Gamtoosbesproeiingsraad, oor die jongste waterbeperkings in dié gebied. Bl. 16 ‘Hoe kan die persoon wat al die appèlle moet oorweeg, reeds die projek se lof besing op ’n bekendstellingsvergadering?’ MNR. CHRISTO RHEEDERS, regsverteenwoordiger van Limpopo-boere, oor die twyfelagtige omstandighede waaronder omgewingsgoedkeuring vir die Musina Makhadospesiale ekonomiese sone toegestaan is. Bl. 14 ‘Sommige dele, veral aan die Weskus en op Nelspoort naby Beaufort-Wes in die Karoo, kan ’n afname van tot 40% in reënval ervaar.’ DR. PETER JOHNSTON, klimaatwetenskaplike aan die Universiteit van Kaapstad, oor van die gevolge van klimaatsverandering in Suid-Afrika. Bl. 19 ‘Suid-Afrikaanse melkboere word tans gemiddeld sowat R1,70 minder betaal as melkboere in die EU,…

SITRUSSKANDE Vraghouers met Suid-Afrikaanse sitrus is glo kort voor druktyd by hul aankoms in die Europese Unie (EU) teruggehou, ná die skielike instel van ’n nuwe reël oor kouebehandeling in Junie wat spesifiek op Suid-Afrikaanse lemoene van toepassing is. Mnr. Justin Chadwick, uitvoerende hoof van die Suider-Afrikaanse Sitruskwekersvereniging (SASKV), sê die SASKV verneem dat vraghouers met sitrusvrugte, nie net lemoene nie, met hul aankoms in die EU teruggehou word. “Dit is hoekom die Wêreldhandelsorganisasie spesifiek ’n proses van ses maande vir die inwerkingtreding van nuwe maatreëls vereis,” sê hy. Die EU-reël is ingestel terwyl vragte plaaslike vrugte ter see was. Lees meer by bit.ly/3PuBKDQ. AUSSIES KRY BEK-EN-KLOU-SKOK Ná virusdeeltjies van bek-enklouseer in twee afsonderlike gevalle in Australië gevind is, het die land sy beskermingsmaatreëls op internasionale lughawens verskerp. ABC berig…

Die lugredery Emirates sê hy het onlangs die wêreld se grootste vertikale hidroponikaplaas naby die Al Maktoum- internasionale lughawe in Doebai geopen. Die plaas van $40 miljoen (R673 miljoen) beslaan 3,065 ha oor drie verdiepings, en kan sowat 1 miljoen kg gewasse per jaar produseer, of meer as 3 ton per dag. Tans produseer die plaas onder meer spinasie, roket en verskillende soorte blaarslaai. Die kweek van vrugte en groente word ook in die vooruitsig gestel. Die plaas is gebou deur ’n gesamentlike onderneming van Emirates se spysenieringsmaatskappy en Crop One, ’n Amerikaanse hidroponikamaatskappy.…

2009 Verbruikersprysinflasie was in Junie die hoogste sedert Mei 2009, teen 7,4%. In Mei 2009 was dit 8%. Prysinflasie vir voedsel en nie-alkoholiese drankies was 8,6%. Vervoerkoste was op ’n jaargrondslag 20% hoër en het 2,7 persentasiepunte bygedra tot die inflasiekoers. Die inflasiekoers vir behuising en nutsdienste was 5,1%, en het 1,2 persentasiepunte bygedra tot die koers. Groot inflasiestygings wêreldwyd het die Reserwebank se hand gesterk in ’n verhoging van 75 basispunte in die repokoers. – Statistieke SA 75 Die verhoging van die rentekoers met nóg 75 basispunte tot 5,5% plaas ’n demper op vooruitsigte vir ’n goeie somergewasseisoen vanweë die La Niña-verskynsel wat voorspel word, sê mnr. Paul Makube, senior landbou-ekonoom van FNB Agribesigheid. Hy sê insetkoste het eksponensieel toegeneem, wat beteken dat meer geld benodig word vir nuwe…