Innholdsfortegnelse for Dec/Jan 2023/2024 i Weg! Ry & Sleep

REDAKTEURSBRIEF Ek is so ’n bietjie jaloers op Mic nadat ek sy rubriek vir hierdie uitgawe gelees het. Hy’s ouder gewoonte op sy plek agterlangs in die tydskrif en ek stel voor jy gaan lees hom eers en kom dan terug hierheen, want ek wil nie sake vooruitloop nie. En nee, my jaloesie spruit nie uit die feit dat hy heel duidelik ’n stokperdjie as loopbaan het nie. Jy kan seker die Ry & Sleep-span van dieselfde ding beskuldig... en heelwat mense het al. Dis ook nie die feit dat Mic-hulle ’n Suzuki Jimny met al wat ’n 4x4-katoeter is opgedollie en hom op ’n oorlandreis Zambië toe geneem het wat vir my groenerige kleurskakering sorg nie. Terloops, Mic het die Jimny op daardie reis geneem om te kyk of…

NUWE RYGOED Die jongste Triton is in Julie 2023 bekend gestel, en die eerstes is in September in Thailand verkoop waar die bakkie vervaardig word. Mitsubishi Motors Suid-Afrika het laat weet hy verwag sy besending Tritons iewers in die eerste helfte van 2024. Dit voel soos net nou die dag toe die vorige Triton op eie bodem aangeland het, maar dit was ses jaar gelede: Ons het die mediabekendstelling op 23 Januarie 2017 bygewoon, die ontrimpeling was in 2019 en nou word hy vervang met die volgende geslag. Die mense by Mitsubishi is haastig... Die jongste Triton gebruik ’n nuwe leerraamonderstel wat gemaak word van hoëtrekstaal wat volgens Mitsubishi ’n 65% groter deursneegebied het – wat buig- en wringstyfheid met onderskeidelik 40% en 60% verbeter. Ook die 2,4 ℓ-dieselenjin –…

Die wêreld rondom Ceres en Tulbagh in die Wes-Kaap het een ding in gemeen: Berge wat die hemelruim inskiet. En waar daar berge is, wil mense daarteen uit. As jy kans sien om met ’n steil grondpad teen die voet van die Witzenberg uit te ry kan jy gerus die Noah-kampplek naby Wolseley, amper halfpad tussen Ceres en Tulbagh, oorweeg. Buiten die opdraandes is daar ’n paar ander belangrike dinge wat jy moet weet: Hier is geen krag nie, en al jou vullis moet jy saamvat huis toe. Hier geld ook ’n minimumtarief, wat beteken vir groepe is dit die moeite werd. Nooi dus ’n klomp vriende en familie saam. In ruil hiervoor kan jy kies tussen vier private staanplekke met vyfstergeriewe. As bonus kry jy die mooiste uitsig. DIE…

Die Meerendal-familielandgoed het hom die afgelope dekade of wat gevestig as een van die mees gesogte sportbestemmings in die provinsie. Ernstige fietsryers het al hier hul staal gewys in die moordende “prologue” van die Cape Epic-fietsren, maar oor naweke wemel dit van families wat die buitelug kom geniet. Dis dalk die wen-resep . . . die plaas bied stap-, draf- en fietsryroetes in ’n verskeidenheid van moeilikheidsgrade, en agterna kan vriende en familie gesellig by Bossa, La Romantica, die COCOAFAIR-deli-en-chocolatier of die patio van die proelokaal kuier. Fietsroetes Die landgoed is een van die bekendste en gewildste bergfietsterreine in die provinsie. Seksies soos die Sauser Sprint, die Burry Stander, die Dorstbergsirkelroete, die Barti Büchler-draaie, die Esther Süss Berms en die Mynskag vorm saam drie roetes van 5 km (geel), 12…

In die woonwawêreld bevind die Nayela Okapi hom reeds in uitgelese geselskap, maar nou gee die Okapi X die model ’n verdere hupstoot. Die standaardmodel se 15 duim-wiele maak plek vir 16 duim-weergawes, wat beteken hy staan effens hoër: Die dak is 56 mm hoër (2,15 m teenoor 2,094 m) met ’n grondvryhoogte van 305 mm – 55 mm hoër as die standaardmodel. Verder is die gewigte aangepas. Waar die gewone Okapi ’n BVM van 1 750 kg het, is die Okapi X s’n 1 900 kg. Dis hierdie gewig wat die gewig van die sleepvoertuig bepaal, maar die 150 kg-verskil het weinig invloed op jou tipiese sleepvoertuig vir dié soort wa. Neem byvoorbeeld die heel basiese Isuzu mu-X met ’n tarragewig van 1 970 kg, of die goedkoopste Ford…

BRANDO-MANSBEURSIE Noot vir noot Hierdie beursie van egte leer is ’n gawe geskenk vir die man in jou lewe. Hy’s dun sodat hy nie té opvallend lyk in Pa se broeksak nie, en hy’s uitgevoer met kakiemateriaal. Die beursie het agt kaartgleuwe en twee vakkies vir banknote, maar daar’s geen toeknipvakkie vir muntstukke nie, nes dit mansbeursies betaam. Hy het wel ’n venstergleuf vir jou rybewys- of ID-kaart. Die beursie is RFID-bestand, wat beteken niemand kan jou kredietkaart se mikroskyfie skandeer terwyl dit in die beursie is nie. Die beursie se afmetings is 11 x 8,5 x 0,9 cm. R699 by Outdoor Warehouse BUSHNELL POWERVIEW 2-10X25-VERKYKER Kyk, daar’s ’n gompou! Goeie verkykers is nooit goedkoop nie, en hierdie een deur Bushnell is waarskynlik die beste wat jy vir R999 kan…

KAMPBESTEMMING Die kusstrook van Durban tot by die Oos-Kaapse grens strek oor ’n raps meer as 150 km, met kampplekke wat omtrent ingeryg lê soos sardientjies. Oor die jare het ons al by byna 20 van hulle ingeloer. Een van hulle was Prairiepark in Anerley, wat intussen van eienaars verwissel het en nou bekend staan as Anerley Garden Park. Hier kamp jy op ’n hoogte in ’n tropiese tuin en die Blouvlagstrand Southport is net vyf minute se ry weg. Skaars 5 km verder is Lalanathi waar jy jou kamp ’n skamele 100 m van die strand af opslaan. Dit moet een van die stilste strande teen die kus wees. Kom skakel af. ANERLEY GARDEN PARK Op die koppie Anerley Garden Park het twee ingangshekke. As jy die eerste keer…

Sutherland is bekend as Suid-Afrika se koudste dorp. Hoewel die dorp nie die rekord hou vir die koudste temperatuur nóg nie – daardie rekord is -20 °C en dis gemeet op die plaas Buffelsfontein in die Oos-Kaap – daal die kwik op Sutherland gereeld tot onder -15 °C, wat hom die dorp maak met die koudste gemiddelde temperatuur. Sutherland het talle verblyfopsies, van kampplekke tot hotelkamers, want Suid-Afrikaners ruk in groot getalle op na dié Karoodorp om sneeu en sterre te kom kyk. As jy eerder lus is vir rondry, kan jy die volgende sirkelroete aanpak wat jou oor ses hoogtes en bergpasse neem. Kry jou ry in in Sutherland se hoofstraat. Ry noord op die geteerde Willistonpad (R354); ná 9 km kom jy op ’n vurk in die pad…

FORD CAPRI PERANA (1970) Die Capri Perana was bekend vir sy oorheersing in Suid-Afrika se Groep 5-renne, veral gedurende die 1970-seisoen. In daardie jaar het Bobby Olthoff met sy Capri Perana V8 nie minder nie as 13 uit die 14 wedrenne gewen. Die Capri Perana is uniek deurdat dit die enigste fabrieksgoedgekeurde Capri is wat ooit met ’n V8-enjin toegerus is. Hier het die 5.0-liter-“Windsor”-V8 uit ’n Mustang diens gedoen. Jy kon ’n Capri Perana uitken aan sy groter wiele, dubbele uitlaatpype en unieke bakverfkleure: heldergeel of rissierooi. Die Perana het ’n skamele 1 100 kg geweeg en sy 210 kW en 407 Nm het amok gemaak op die renbaan. Dit is om dié rede dat hy so gewild was onder die gewone man op straat. Basil Greenmotors het ongeveer…

Zebra-boskamp Die Zebra-boskamp is geleë in Dinokeng en omtrent straataf van die kampplekke Jabula en Kyleu op die Kaallaagtepad. Die eienaars, Natanya Bushey en haar lewensmaat, Bryan Booyse, het Zebra in 2022 op die been gebring. Die gedagte was reg van die begin af om ’n boskamp met ’n paar staanplekke in te rig, verduidelik Natanya. Hulle het die grond (21 ha) in 2021 gekoop en dit was net bos. Wat in hierdie lappie aarde se guns tel, is dat dit binne die Groot Vyf-gebied van Dinokeng val. Kampeerders het twee keuses: Jy kan kies tussen drie staanplekke in ’n gebied met ’n elektriese heining, of jy kan kamp opslaan buite die afgesperde gebied en die natuur met die wild deel. Die omheinde gebied se toegangspad is 250 m van…

Die 5fm-platejoggie kondig oor massiewe luidsprekers aan almal moet na hulle voertuie beweeg ter voorbereiding van die hoofgeleentheid. Jimny-eienaars, oud en jonk, draf tussen die rye kordate rygoed deur. Hier en daar steek iemand vas en kyk onseker rond na watter Jimny nou weer syne is. Dis nie net die eienaars se ouderdomme wat verskil nie, maar ook die jaarmodelle van die voertuie. Die oudste Jimny – ’n 1973-model LJ20 in militêre bakvorm – staan in die voorste ry. Die jongste een, ’n blinknuwe vyfdeurmodel, staan ’n paar Jimnys weg van sy voorsaat af. Die nommerplate van die massa Suzuki’s wys ál nege provinsies word by die saamtrek verteenwoordig. Kapenaars het moontlik die verste gery, 1 300 km tot hier, maar daar word grootoog vertel dat iemand blykbaar al die…

Vanjaar se Bull Run het opnuut gewys dat daar maar net nie nog só byeenkoms in Suid-Afrika is nie. Oor die laaste naweek van die kort skoolvakansie het meer as 600 deelnemers, toeskouers en baanbeamptes op Vanwyksvlei toegesak om met hulle ou rygoed te spog en in die stof te speel. Ouder gewoonte het die spanne nie teleurgestel met hulle kleurryke temas en uitrustings nie, en elke keer wanneer ’n mens dink “nou het ek alles gesien”, kom die volgende span en oortref dit. Met die aankoms die Donderdag is al die karre behoorlik nagegaan om seker te maak hulle voldoen aan die byeenkoms se vereistes (ouer as 1985-modelle en nie meer as R40 000 werd nie) voordat ou en nuwe vriende bymekaargekom en ’n hond uit ’n bos gekuier…

Dubbelkajuitbakkies is sinoniem met sleep, en hiervoor hou Ford die XLT-reeks van sy Ranger-bakkies op datum met die jongste tegnologie. Jy het ’n keuse tussen vier XLT-modelle wat in twee groepe verdeel word: Die enkelturbo en dubbelturbo. Albei is beskikbaar in 4x2 of 4x4, en ’n sleepstang is deur die bank standaard – dieselfde geld vir die swaaibeheer, ’n sleepwaligtetoets en ’n sleepmodus wat jy kan kies afhangend van die padomstandighede. In die breë is die Ranger beskikbaar in vier verskillende weergawes: ’n basiese model, die XL, XLT en Wildtrak. Ons kry ’n geleentheid met die XLT met ’n dubbelturboenjin en 4x4-aandrywing. Nuwe drumpel Ford het beslis nuwe hoogtes bereik as ’n mens kyk na die Everest Platinum waaroor ons in die vorige uitgawe geskryf het, maar dis ewe waar…

Sedert die oertyd al vertel mense bangmaakstories oor slange, en dit is iets wat vir Johan Marais van die Afrika-slangbytinstituut dwars in die krop steek. Hy sê slange is nié skoorsoekers wat mense soek om seer te maak nie, maar eerder skugter en senuagtige diere wat verkies om te vlug eerder as veg. Bedrywige vakansieoorde is grootliks slangvry juis omdat hierdie diere skugter is, maar as jy in ’n stiller nasionale park kamp, gaan jy moontlik die Bybelse oervyand raakloop. 1 Alle slange is giftig Daar is 176 slangspesies in Suider-Afrika waarvan slegs 20 lewensgevaarlik en 30 relatief gevaarlik is. Dit los ons met 126 spesies waaroor jy jou nie hoef te bekommer nie. 2 Slanggif kan uit ’n bytplek gesuig word Ons pak die skuld vir dié wanopvatting op…