Innholdsfortegnelse for Dec/Jan 2023 i Weg! Ry & Sleep

NUWE KAMPGOED Unipod se AdventurePod-model is gegrond op ’n konvensionele boswoonwa, as jy kyk na sy vorm en die opwipdak. Die nuwe Adventure-Pod XL kry ’n binnebadkamer en die neus is skuinser. Die XL kry dieselfde opligdak as die gewone model, met ’n skarnier by die neus wat aan die agterkant lig. Kies die kaste Die instapdeur is heel regs met al die kaste vir die buitekombuis links hiervan. Die glyraam waarop die ys-vrieskas pas, is agter die kas die naaste aan die disselboom. Die kas en glyraam is groot genoeg vir enige ys-vrieskas op die mark – die glyraam is selfs lank genoeg vir ’n ekstra kas op die punt. Afhangende van watter uitleg jy kies vir die kaste langsaan, is hier byvoorbeeld plek vir die mikrogolfoond en gasstoof…

Nissan is geruime tyd al besig met elektriese voertuie – dink byvoorbeeld aan die Leaf – maar dié voertuigvervaardiger bestee nou hernude energie aan sy geëlektrifiseerde voertuie in die vorm van sy splinternuwe X-Trail, die vierde geslag. Die X-Trail bly een van die wêreld se gewildste gesinsavontuurvoertuie op die mark – sedert sy bekendstelling in 2001 is meer as 7 miljoen eenhede wêreldwyd verkoop. Die nuwe X-Trail is ’n elektriese voertuig wat petrol gebruik, maar dis nie werklik ’n hibriede voertuig nie. Later meer hieroor. Buite en binne Die jongste X-Trail is gegrond op die CMF-C-platform wat deur die Renault-Nissan-Mitsubishi-venootskap gedeel word. Dit beteken hy’s onder sy dop dieselfde as karre soos die Renault Kadjar en Mitsubishi Outlander. Al vier deure, die voorste kwartpanele en enjinkap is alles van aluminium,…

Rondom twee miljoen jaar gelede tref ’n meotoriet die lappie aarde tussen Koppies en Vredefort in die Vrystaat en veroorsaak ’n krater van 301 km2. Volgens Unesco is die Vredefortkoepel die oudste, grootste én diepste komplekse meteoriet-impakstruktuur ter wêreld. Dit is mooi wêreld om te verken as jy in die omgewing kuier. Van Parys af kronkel grondpaaie weerskante van die Vaalrivier suid deur die krater se westelike heuwels. Ons het tent opgeslaan by Tava Lingwelodge, 27 km buite Vredefort op die R95. Ons roete het ons deur die dorpie Venterskroon tot by Parys geneem, en dan weer teerpad langs terug tot by Tava Lingwe. Jou eerste afdraai is tussen Tava Lingwe en Vredefort op die S713 (S27.069091 E27.235926). Die wêreld is hier nog plat en jy ry tussen landerye en…

LESERSTORIE Hy put groot genot daaruit om ou tjorre te restoureer of om die ondenkbare te vermag met rygoed, vertel Willem, die eienaar van ’n druk- en koerierbesigheid in die Jakarandastad. Sy voorliefde hiervoor het begin toe hy maar 13 jaar oud was. Sy ouer suster het ’n Renault 5 besit en probeer om hom van die hand te sit, maar omdat daar soveel probleme met die kar was, het sy moed opgegee en die karretjie vir Willem gegee. Hy vertel hy het so met die tyd saam “begin krap” om die Renault self reg te maak, veral die onderstel waar daar erge roesprobleme was. Uiteindelik was die motor in ’n skaflike toestand... en teen daardie tyd het die gogga reeds gebyt. So met die jare het hy verskeie ander…

Ons het ’n 2 000 km lange draai deur Namakwaland gaan ry waarvan ’n groot deel grondpad was. Die lekker ding van ’n verlengde bakkiekajuit is dat jy jou matrasse, slaapsakke en klere in die kajuit kan laai waar dit skoon en droog bly, terwyl jy ’n tent en kampmeubels agter op die bak vervoer. Daar is ook bêreplek onder die vloer agter die sitplekke. Hoewel ons toetsvoertuig slegs in die agterwiele aangedryf word, kon ons matige 4x4-roetes met hom aanpak – dit is danksy sy ewenaarslot en goeie grondvryhoogte. Hoe ry hy? ’n Isuzu is darem maar ’n lekker ryding op die langpad, hoewel ander bakkies soos die nuwe Toyota Hilux ook deesdae seepglad ry. Die enigste ding waaroor mense soms kla, is dat ’n Isuzu nie bekend is…

NUWE KAMPGOED Die Traveler is Awnings Galore Vaal se eerste kampwaentjie. Die onderneming behoort aan Barney en Nikki van der Merwe en hulle fokus onder meer op kamp- en 4x4-seilafdakke. Hulle kundigheid sluit daktente in, wat beteken die kampwaentjie is ’n natuurlike uitvloeisel. Van die kant Die daktent is 1,3 x 2,2 m groot en het ’n deur regs soos jy agter die Traveler staan. Jy klim met ’n 1,7 m-trapleer tot op die bed. Binne-in is ’n USB-sok ingeval jy in die toekoms ’n kragstelsel oorweeg. Aan dieselfde kant is ’n jerrykanhouer bo-op die modderskerm gemonteer. Die neuskas het plek vir ’n battery, en aan die agterkant slaan ’n groot deur plat. Dit gee jou toegang tot die glyraam en vier ammokiste. Daar is ook oop pakruimte onder die…

Die vakansietyd is op jou en jy weet jy gaan nie nou kampplek in die Kruger kry nie. Dalk is daar tog ’n gaatjie oop iewers... jy kyk na die suidelike kampe wat nie te ver van Gauteng af is nie. Die verste een van dié kampe is die beskeie Maroela-satellietkamp naby die Orpen-hek, maar ook dié is volbespreek. In ons geval oorweeg ons nie Satara of Skukuza nie, want ons was net anderdag daar. Maar daar’s ook nie goeie nuus elders nie. Onder-Sabie is vol, ook Bergen-Dal en Pretoriuskop. Én die gewilde Krokodilbrug-kamp... Maar dan is die geluk aan ons kant: Ons kry sowaar plek in die Malelane-satellietkamp. Dis toevallig die suidelikste kampplek in die Wildtuin en ook die naaste vir die Gautengers. Dit blyk die kampplek is die…

Jou roete begin in die fraai Oos-Kaapse dorpie Rhodes, wat in 1894 gestig is. Die dorp is genoem na die eertydse mynmagnaat en eerste minister Cecil John Rhodes, natuurlik in die hoop dat hy die nedersetting goedgesind sou wees en finansiële bystand lewer met die ontwikkeling daarvan. Maar daarvan sou dadels kom. Ons stel voor jy maak Rhodes jou basis indien jy die omgewing se baie bergpasse en 4x4-roetes wil verken, of ontspan ’n slag en gaan maak jou kunsvliegies nat in die Bellrivier wat deur die dorp kronkel. Buiten die kampterrein is hier ’n hele paar gastehuise én ’n geskiedkundige hotel waar jy kan oorbly. Rhodes het ook talle feeste, waaronder die Oktoberfest (1 Oktober 2023), die Rhodes Run (8 Julie 2023) en die Dirt Road Wild-forelfees (16-20 Maart…

KAMP & KATROL HENGELOORD VISGEREG SEEKOSPIZZA OOR-DIE-KOLE Viva Italia! Bemeester hierdie tegniek en jy gaan heerlike pizza braai! Jy benodig (genoeg vir 4) • 500 g klaargemaakte brooddeeg, in vier gedeel• ’n bietjie olyfolie om te smeer VIR DIE BOLAAG• 4 eetlepels klaargemaakte tamatie-en-basilie-pastasous• 2 hande vol gerasperde mozzarellakaas• 12 pikantrissies (peppadews), in dun skyfies gesny• 12 kersietamaties, middeldeur gesny• 1 koppie gestoomde mossels en steurgarnaalsterte• ’n paar vars basilieblare (opsioneel) Só maak jy 1 Rol die eerste bol deeg lekker dun uit om min of meer ’n ronde pizza te vorm. Smeer die oppervlak liggies met olie om te keer dat die deeg te veel vassit. Jy kan meel ook gebruik as jy verkies, maar olie help vir ’n brosgebraaide pizza wat nie aan die rooster vassit nie. 2…

Twee geesdriftige kampeerders se jare lange droom om ’n woonwapark te besit is uiteindelik bewaarheid. Hendrik en Hermi Groenewald sê die saadjie is verlede jaar geplant nadat hulle 13 km buite Modimolle in die Waterberg ’n lappie grond van 25 ha grond gekoop het. Hulle het dadelik ingespring en besluit om die ontwikkeling in fases aan te pak, met die staanplekke, badkamers en swembad eerste aan die beurt. Sebenza Creek se swembad is teen die voet van ’n koppie, en die water kan met ’n donkie verhit word. Die lang badkamergebou is links van die swembad. Daar’s afsonderlike geriewe vir mans en vroue – elke kant het ’n bad en storte. Die opwasplek vir skottelgoed en klere is in die vertrek tussen die twee, en elektriese geisers sorg vir warm…

Die eerste Lexus UX 300e is in 2019 bekend gestel, maar die opgeknapte 2023-model spog nou met ’n stewiger skulpraam met 20 ekstra sweiskolle en ’n groter battery (72,8 kWh teenoor die vorige 54,3 kWh), wat sy reikafstand met 40% verbeter. Nou kan jy 450 km aflê voordat jy moet herlaai, en jy behoort dus van Kaapstad tot op Beaufort-Wes of van Pretoria af Bloemfontein toe te kan ry. ’n Snellaaier van 50 kW sal dan sowat ’n uur neem om die battery op te top, maar as jy hom by ’n gastehuis se muursok inprop, gaan dit minstens 16 uur neem voor jy weer in die pad kan val. Ons hoop van harte Bloem kry nie beurtkrag as jy daar aanland nie. Toyota en Lexus wed egter op ’n…

4X4-BESTEMMING Antieke wêreldkaarte, soos die Cantino-kaart wat uit 1502 dateer, het nie net fabelagtige kreature soos meerminne uitgebeeld nie, maar ook allerlei fiktiewe plekke. Europeërs het byvoorbeeld geglo daar’s ’n groot rivier aan die westekant van Suider-Afrika wat van noord na suid loop. Dié denkbeeldige rivier het bekend gestaan as die Vigiti Magna – Latyns vir “groot mag” – en hy’t sy naam gekry lánk voordat ’n wit mens ooit die rivier onder oë gehad het. Op die oewer van die Vigiti Magna het ’n mitiese goudstad met dieselfde naam blykbaar gestaan. Die veronderstelling was deels gegrond op stories wat Arabiese handelaars – wat sedert die agste eeu reeds met Afrika handel gedryf het – aan Europeërs vertel het. Laai jou visstok en ry styf teenaan Suider-Afrika se langste rivier,…

Die Jeep Gladiator het in Augustus 2022 uit Toledo, Amerika, in Suid-Afrika aangekom, en tot dusver verkoop hy goed. Elkeen wat van die boot af ry, kry ’n baas en motorjoernaliste staan tou om die Gladiator onder hande te neem. Dit was dus ’n pluimpie toe ons vir langer as ’n week een kon kry om te toetsbestuur. Ons moet uit die staanspoor sê dis ’n lekker bakkie wat beslis die aandag trek. As ons ’n sent kon kry vir elke kop wat draai terwyl ons verbyry, dan het ons amper genoeg geld gehad om die brandstofrekening te betaal... Ons kon met ’n geruste hart enige pad takel, want ons het geweet ons sal hom baasraak – en ons het inderdaad nooit gesukkel in hindernisse nie. Hoe ry hy? Die…

KRY DIE PRODUKTE HIER outdoorwarehouse.co.za capeunionmart.co.za toysrus.co.za agrimark.co.za TOP TRUMPS-KAARTSPELETJIE Myne is die sterkste Top Trumps dateer uit die jare sewentig, en dit bly nou maar een van die beste maniere om die tyd te verwyl op pad wildtuin toe. Daar is honderde weergawes, maar dié een, wat handel oor Afrika se diere (foto bo), is uiteraard gepas vir ons vasteland. Prys R125 by Toys R Us. HUAWEI-BONDEL Luister terwyl jy oefen Hierdie is ’n duur geskenk, maar jy kan dit gee as ’n Kers-en-verjaardaggeskenk. Ousus gaan jou ewig dankbaar wees (goed, dalk nie vir ewig nie) vir hierdie horlosie, fiksheidsmonitor en musiekspeler. Jy kry op die koop toe bluetooth-oorfone. Prys R3 300 by Cape Union Mart. OPINEL NO 8 Franse lem Meskenners gaan aanvoer die beste mes is iets…

Vroeg in die laaste dekade van die vorige millennium bevind ek my in Mbombela. Dit het toe nog Nelspruit geheet en was die tuiste van onder meer ’n sokkerspan genaamd Dangerous Darkies, wat toe nog in die nasionale liga gespeel het. Dit was ook die hoofkwartier van die Kommandement Oos-Transvaal waar ek in daardie stadium diensplig gedoen het. Geografies gesproke was daar net enkele weermagbasisse binne die landsgrense wat verder weg was van my grootwordhuis in die Boland – ook as dit by fauna en flora kom. Waar ek grootgeword het, was die enigste “wild” wat jy in jou daaglikse handel en wandel sou teëkom, moontlik ’n eekhoring in die hoofstraat of ’n dassie op die berg se voetpaadjies. Om op die Krugerwildtuin se drumpel te wees was dus ’n…