Innholdsfortegnelse for Feb/Mar 2022 i Weg! Ry & Sleep

“Ek het hom saamgevat toe ek die eerste keer daarna gekamp het – en hom só baie op daardie trippie ingespan dat ek hom nooit weer uit my kamp-ammokis gehaal het nie.” Toast Coetzer se ode aan sy geel eenmantent op bl. 120 het my laat dink aan daardie een ding wat ek ook altyd saamvat wanneer ons uitwyk om ’n bietjie tyd in die natuur deur te bring. Iets wat ook ’n ode werd is. Dit is nie ons tent nie, want ons het hom al seker drie keer vervang namate ons behoeftes verander het. Dis ook nie my kampstoel nie, want ek is ’n groot ou en het nogal die gewoonte om ’n stoel deur te sit. Ek moet elke jaar of drie ’n nuwe een aanskaf. Uiteindelik…

Met sy Wonder-, Journey- en Dream-model het Destinationwoonwaens hom gevestig as een van dié bouers van swierige woonwaens in Suid-Afrika. Danksy jare se ervaring het Destination nou ’n woonwa met ’n beproefte uitleg ontwerp waarmee elke mens kan kamp, sê André van Helsdingen, die eienaar. Hy het oor ’n tydperk ’n behoeftebepaling onder sy klante gedoen en dié terugvoer gebruik met die ontwerp van die Nature. Omdat daar geen doelgemaakte veranderinge aan die standaard-Nature gedoen word nie, het dit ’n verdere positiewe nadraai. Die Nature se bouproses is korter, wat ’n standaardproduksielyn tot gevolg het. Dit dra verder by tot hoër gehalte en ’n beter prys. André hou steeds by sy normale boumateriale, wat beteken die Nature se romp bestaan ook uit veselglas met ’n PVC-binnelaag. Waar die ander modelle…

Mikrobussies is nie so gewild soos luikrugmotors, bakkies en sportnutse nie, maar dit is iets wat blykbaar besig is om te verander. Verkoopsyfers van kordater bussies het van 2020 tot 2021 met 55% gegroei en dit lyk of die gewildheid nóg verder gaan toeneem. Hyundai se tydsberekening kon nie beter wees nie, want sy H1-bussie is al lank in die tand en verbruikers is gereed vir iets nuuts. Maar is hulle gereed vir die Staria? Wat het ons hier? Die Hyundai Staria is beskikbaar in drie weergawes: die Executive, Elite en Luxury – en ’n paneelwa en vyfsitplek-“multicab” is op pad. Eersgenoemde drie, die passasiersweergawes, het 2 tot 11 sitplekke, hoewel die 9 sitplek-uitleg om praktiese redes waarskynlik die gewildste gaan wees. Die Executive en Elite fokus op sakemense en…

Laat in die jare sestig het Danie Ochse, ’n boer van die Oos-Kaap, besluit hy het genoeg gehad van Graaff-Reinet se droogte. Hy het sak en pak Wes-Kaap toe verhuis en vir hom ’n lappie aarde langs die water aangeskaf met die hoop dat hy hom nooit weer oor droogte hoef te bekommer nie. Hier, op die oewer van die Bergrivier, het Danie – en toe sy seun George en later kleinseun Chris – mettertyd ’n gesinsoord ontwikkel wat een van die gewildste kampplekke in die omgewing is en elke jaar duisende besoekers lok. As jy na alles kyk wat hierdie oord bied vir die hele gesin, is dit nie moeilik om te sien hoekom die plek uit sy nate bars nie, veral in besige tye. Die kinders sal vir…

Hennie en Emmerentia, wat hulle aftreereis ’n jaar moes uitstel weens die Covid-19-pandemie, het uiteindelik verlede jaar heerlik deur die Krugerwildtuin getoer – plek-plek saam met vriende en ou kennisse. Ons het hulle laasmaand gelos by Marakele waar hulle slaggereed was om Botswana binne te gaan. Hennie vertel verder… “Dis nog pikdonker, maar ons is reg om in die pad te val. Vandag, Donderdag, 3 Junie 2021, gaan ons splinternuwe paspoorte, wat nou al ’n jaar in die kluis lê en wag, nuwe stempels kry. Ons moet die grens by Groblersbrug oorsteek en dan Botswana deur die Martin’s Drift-grenspos binnegaan. Ons kry koers Lephalale toe en draai daar in die rigting van die grens. Ons is vroeër daar as wat ons verwag het, en sien hoe die vragmotors reeds toustaan.…

Na ’n samewerkingsooreenkoms van 14 jaar met Ford het Mazda besluit om weg te breek en hom by Isuzu te skaar. Die jongste BT-50 is gegrond op die komende Isuzu D-Max, wat meer as ’n jaar gelede in Australië aangeland het. Anders as met die samewerking tussen Volkswagen en Ford vir die nuwe Amarok en Ranger, was Mazda glad nie betrokke by die ontwikkeling van die D-Max nie. Mazda kry bloot ’n voltooide bakkie by Isuzu – met ’n Mazda-embleem daarop, ’n paar unieke bakpanele en daardie Mazda-sierrooster. Buite en binne Die groot sierrooster laat ’n mens twee keer kyk, en as jy ’n BT-50 sien aankom, kan jy hom maklik vir ’n CX5 of ander Mazda aansien. Dis lofwaardig wanneer ’n voertuigvervaardiger planmatig te werk gaan en al sy…

Die meeste kampwaens word gebou met die oog op gerief in die kampplek, maar wie het nog nié kopgekrap om plek te maak vir die gesin se fietse nie? En wat van kleinboet se 125 cc-veldfiets... dié word sommer uit die staanspoor by die huis gelos. Een oplossing is die sogenaamde “toy hauler” wat in lande soos Amerika beskikbaar is. Plaaslik het dít nog nie regtig posgevat nie, maar die vervaardiger Unipod het wel ’n klompie modelle beskikbaar. Jy mag Unipod se Bushpod Lite met jou gewone rybewys sleep, en albei die modelle – die Lite en XL – het ’n dravermoë van 720 kg. Vir die toets het ons die XL onder hande geneem. Die fietse (of motorfiets) pas deur die agterdeur. Die opening is amper ’n meter breed,…

Ford het einde verlede jaar sy splinternuwe Ranger aan die wêreld bekend gestel, net mooi tien jaar nadat die vorige model in Suid-Afrika sy verskyning gemaak het. Die jongste model is in samewerking met Volkswagen ontwikkel, maar hy’s ’n tikkie meer Ford as Volkswagen. As hy sterk herinner aan die vorige Ranger, is dit omdat hy inderdaad op dieselfde dog verbeterde T6-platform gebou word met eenderse bakwerkpanele en afmetings. Hoewel die platform behou is, is die bakkie grootliks blinknuut, en slegs enkele dinge is dieselfde as in die uitgaande model. Kom ons bekyk hom van nader. Wat het ons hier? Ons begin by die ding waarna aanhangers die meeste uitsien: Die Ranger kry die 3ℓ-V6-Power Stroke-turbodieselenjin wat uit die Amerikaanse Ford F-150 kom. Dié enjin sal na raming 186 kW…

Kan jy glo Peugeot is 212 jaar oud? Die maatskappy was oorspronklik ’n staalsmeltery op die Franse dorpie Sochaux, en sy eerste ryding dateer uit 1889. Die Peugeot-familie het tot betreklik onlangs toe die sweep geklap, maar vandag is die maatskappy deel van die Stellantisgroep wat onder meer ook Fiat, Jeep, Chrysler en Opel besit. Soos talle motormaatskappye smee Stellantis bande met sy mededingers om vervaardigingskostes laag te hou. Dit is ook die geval met Peugeot se Landtrek. Wat het ons hier? Die Peugeot Landtrek is in samewerking met die Chinese Changan-groep ontwikkel. China kry die Kaicene F70, en Suid-Amerika en Afrika die Peugeot Landtrek. Dis eintlik dieselfde bakkie, net met ’n ander kenteken op die sierrooster. Die Landtrek is beskikbaar in vierwiel- en agterwielaandrywing – onderskeidelik die Allure 4x2-…

HENGELOORD DIE KAIA HUIS WEG VAN DIE HUIS Die Kaia is 6 km buite Somerset-Oos en lê teen die Klein-Visrivier wat in die rigting van Gqeberha afsit na die Indiese Oseaan. Die kampplek behoort aan Festha Erasmus en vorm deel van haar en haar man, Danie, se plaas, Grootplaas. Vyftien jaar gelede was hier niks nie, sê Festha, maar hulle het ’n piekniekplek buite die dorp gesoek waar mense kan ontspan. Die gras het reeds op die rivieroewers gegroei en die lapa met die badkamers was die eerste geboue wat hulle opgerig het. Festha-hulle het die kampplek verder ontwikkel, en as jy vandag aangery kom – met die rivier voor jou – lê die woonwastaanplekke na links en die tentstaanplekke regs. Hier kamp jy altyd naby die water. Die kragpunte…

Die Nissan Navara se eerste weergawe het ’n mens diep beïndruk, maar dit voel tog of die laaste modelle met sy meer beskeie voorkoms effens fut verloor het. Ons het die splinternuwe Navara vir ’n week as toetsvoertuig gehad, en meer as een mens langs die pad het gesê: “Lekker bakkie!” Dit is inderdaad so: Dis asof Nissan met die aggressiewer voorkoms nuwe lewe in die Navara geblaas het. En as sleep en kamp deel van jou lewe is, steek die nuwe Navara sy hand hoog op. Haak aan Die eerste Navara-model wat ons tien jaar gelede getoets het, het ’n 2,5 ℓ-dieselenjin gehad wat 140 kW en 450 Nm lewer. Die volgende geslag het ’n 2,3 ℓ-dieselenjin gekry met presies dieselfde spiere. Nou het die wiel gedraai en die…

Wanneer jy jou bed in die huis tydelik vir jou kampbed verruil, wil ’n mens steeds lekker slaap. Niks keer jou om ook ’n duursame matras in jou woonwa te gebruik as jy nie tevrede is met die standaardmatras waarmee hy uitgekom het nie. Maar as jy met ’n tent kamp, lyk sake heeltemal anders. Pakplek is dan ook ’n groter probleem, want ’n mens het nie die gerief van ekstra pakplek in ’n woonwa nie. Alles moet in die kar pas, en jy kan hoogstens ’n dakrak of bagasiewa inspan. As jy dan jou matras in die spaarkamer wil saamry, is al die pakplek in jou waentjie eensklaps weg. Die antwoord is natuurlik ’n matras wat kan opvou of, selfs beter, een wat kan opblaas. Opvoumatrasse is nie regtig…

In my eerste paar jaar as reisjoernalis het ek nie ’n tent besit nie en ek moes gereeld by ’n vriend een leen. Alles het goedgegaan tot dié tent een slag langs die Pongolapoortdam buite Jozini “verdwyn” het. Ek het gedink hy is gesteel, maar in die daglig die volgende oggend het ek hom sowat 100 m die dam in gesien. Die wind se werk. Dit was tyd vir my eie tent, en ek het geweet presies waarna ek soek: ’n sterk, liggewig tentjie wat klein kan opvou sodat hy in ’n rugsak kan pas as ek gaan stap – selfs in my tas wanneer ek iewers heen moet vlieg. Die invlieg-kampvakansie is nie iets wat geharde kampeerders sommer aandurf nie, want wat de joos maak jy met al jou…

As jy graag saam met familie of vriende kamp, kan jy gerus die naam Sonwyserskop op jou lysie neerskryf. Dié kampplek is geleë op die plaas Keurbosch buite Piketberg en behoort aan Kokkie en Jo-Anni Coetzee. Kokkie-hulle boer met druiwe, sitrus en beeste, en die kampterrein is die jongste toevoeging op die plaas. Aanvanklik was die gedagte om die kampplek in te rig vir die Coetzee-familie sodat hulle ’n groot saamtrek kon hou. Daarna het Kokkie-hulle besluit om die geriewe oop te stel vir die publiek. Op dié deel van die plaas was daar al gevestigde bome soos olienhout- en geelhoutbome, en die 20 staanplekke (met 10 kragpunte, almal die gewone huissok) is hier uitgelê. Die Coetzees het vier gesinsbadkamers gebou plus ’n gesamentlike kuierplek met ’n vuurput in die…

Die eerste mu-X was besonder gewild in Australië, maar General Motors het destyds besluit om hom in Suid-Afrika te bemark as die Chevrolet Trailblazer. Dit was een van GM se minder suksesvolle besluite, want die Trailblazer het nie naastenby so goed hier verkoop as die mu-X in Australië nie. Maar dit is iets van die verlede en Isuzu se jongste sportnuts is hier. Wat het ons hier? Die jongste Isuzu mu-X lyk nie net anders aan die buitekant nie, maar sy kajuit is ook groter as tevore. Dit beteken Isuzu moes die mu-X se romp met 25 mm verleng tot 4 850 mm. Voorlangs is die sierrooster groter en die kolligte in die buffer is laer. Die wielboë is nie meer so prominent nie en die syruite is langer (deur…

So tussen die berge en wingerde is hierdie ’n werklik skilderagtige deel van ons land – trouens, ’n mens voel skoon verbaas dat hier nie ’n groter verskeidenheid van kampplekke in die omgewing is nie. Jy is skaars ’n uur se ry van die Moederstad af, wat beteken vir Kapenaars is dit naby genoeg vir ’n naweekuitstappie, terwyl binnelanders ewe lekker vir langer kan uitspan terwyl hulle die Kaap verken. De Hollandsche Molen en die Franschhoek-kampterrein verskil aansienlik wat die aanbod betref, maar jy hoef nie die een of die ander te kies nie. By albei kamp jy ordentlik. DE HOLLANDSCHE MOLEN Kamp en jolyt Wanneer jy die hordes trampoliens, reuse-swembaddens en al die kinders sien wat op en af in die kampplek fietsry, besef jy sommer gou dié is…

Met sy standaardsleepstang en swaaibeheer is die Isuzu D-Max 300 LX 4x4 (outomaties) gebou om sy staal te wys voor ’n wa. Boonop is die trukamera standaard. Voeg hierby sy sleepvermoë van 3500 kg. Maar soos ons al voorheen uitgewys het, laat wetgewing jou slegs toe om ’n woonwa met ’n brutovoertuigmassa van 2095 kg (die tarragewig van die Isuzu) te sleep. Jy kan dus steeds die meeste van die woonwaens op die mark sleep met die Isuzu. Met ons besoek aan die Franschhoek-kampterrein het ons ’n volledig toegeruste Bush Lapa Miskruier (BVM 1 500 kg) in Brackenfell gehaak en 229 km ver gesleep. Ons roete was heen en weer op die Ou Kaapseweg-pas en Stellenbosch toe oor die Helshoogtepas. Met twee volwassenes en twee kinders in die bakkie was…

Die Paarlvallei is oorspronklik deur die Cochoqua bewoon, ’n welvarende Khoi-stam wat hoofsaaklik met vee geboer her. Die Cochoqua het die berg bo hulle vallei !hom !nãb/s – ofdan Skilpadberg – genoem, en later, in 1657, het ’n fiskaal van die Verenigde Oos-Indiese Kompanjie, ene Abraham Gabbema, die Skilpadberg tot “de Diamondt en de Peerlberg” herdoop omdat die berg se grootste granietkoepels ná ’n reënbui in die middagson geskitter het. Peerl, ou Nederlands vir pêrel, sou later Paarl word. Die granietkoepels wat ou Abraham so beïndruk het, heet vandag Bretagne- (Frans vir Brittanje) en Gordonsklip (genoem na die verkenner Robert Gordon), en ’n derde, kleiner koepel die naaste aan die dorp is die pêrel van die Paarl. Die roete soos ons hom hier ry, begin by die Afrikaanse Taalmonument. Volg…

“Ná ’n rampspoedige toer in 2009 met my Volkswagen Syncro-bus het ek besluit om op te gradeer tot ’n meer konvensionele veldryer. Ek het die donkerblou dak van Knersus – toe was dit nog nie sy naam nie – bo die ander karre sien uitsteek by ’n tweedehandsemotorhandelaar. My maag het ’n draai gegee... en die koeël was deur die kerk. Die Land Cruiser met sy 4,7 l-V8-enjin was al 10 jaar oud met meer as 200 000 km op die klok –volgens my net mooi ingeloop! Hy het ’n paar ekstras gehad: plek vir ’n tweede noodwiel, ’n langafstandbrandstoftenk en die laaistelsel agterin. Dit lyk egter nie of die vorige eienaars hulle juis aan dienste gesteur het nie, en heelwat dinge moes aandag kry. Die hidrouliese vering was gedaan…

2000 CHRYSLER PT CRUISER Die Amerikaner Bryan Nesbitt is versot op die motors van die jare dertig, en toe die nostalgievlaag die motorbedryf tref met modelle soos die Volkswagen Kewer en Mini Cooper, het Nesbitt sy nis gevind. Sy PT Cruiser het bakgat gelyk as ’n konsep, maar iets het verkeerd geloop. Die grootte van die PT Cruiser se laairuim is in advertensies geprys, maar weens daardie bonkige modderskerms is hy binnelangs maar knap. 2010 NISSAN JUKE Die Juke is ’n produk van Nissan se Europese ontwerpateljee in Londen, maar Shiro Nakamura by Nissan Japan het die laaste streep op die blad getrek. Die Juke is in Oktober 2011 in Johannesburg bekend gestel en Suid-Afrikaners het uit die staanspoor getwyfel oor sy voorkoms. Sommige eienaars van ’n Juke herinner ’n…