Innholdsfortegnelse for February - March 2021 i Weg! Ry & Sleep

Die siel van die mier “Ek het hierdie klompie miere afgeneem by ’n vakansieplek naby die Krugerwildtuin. Saam met die bietjies pienk het die besige miere ’n mooi foto gemaak. Ek het ook die raampie om die foto ’n bietjie nader getrek.” Hierdie foto laat dit voel of jy in ’n pak lekkergoed afkyk. Hier is nie een enkele fokuspunt wat jou aandag trek nie, maar eerder ’n paar – die geel groeisels op die plante. Dit is ongewoon en ’n mens verkyk jou aan hierdie aardige mondjieagtige dele van die plant. Dan eers sien jy die klomp miere, en almal van hulle is ook doenig rondom die geel en groen mondjies, wat aan die foto lewe gee. Buiten die geel sorg die teenstellende kleure – pienk en die groen…

• In Ry & Sleep se 40ste uitgawe sê ons die Land Rover Defender P400 het vier silinders, maar hy het eintlik ’n sessilinder-enjin. • In dieselfde uitgawe gee ons Namibia Wildlife Resorts & Namibia National Parks se tariewe per staanplek, terwyl dit per persoon is. • In ons Woonwa-Koopgids 2021 lys ons verkeerdelik die Gecko Xtreme onder grondpadwaens. Die Gecko Xtreme is in der waarheid net so tuis in taai veldrytoestande en is ’n volwaardige boswoonwa. Ons vra om verskoning vir hierdie foute.…

Die Amarok het sedert sy plaaslike bekendstelling in 2010 ’n allemintige 37 000 eenhede verkoop – dit is net 10% van die Toyota Hilux se verkope oor dieselfde tydperk, maar nietemin goed vir ’n nismark-bakkie. Deesdae is die Amarok in twee enjinkeuses beskikbaar: die 2 ℓ wat tien jaar gelede snedige aanmerkings moes verduur maar deesdae met respek bejeën word, en die opgeknapte 3.0 V6. Wat het ons hier? Laasjaar nog het die 3.0 V6 TDi 165 kW en 550 Nm uitgeskop, maar vanjaar se weergawe maak 25 ekstra perde (altesame 190 kW) en 580 Nm wringkrag. Die vorige 3 ℓ-Amarok het binne ’n indrukwekkende 8 s van 0-100 km/h versnel, maar danksy die opgradering kon Volkswagen daarin slaag om 0,4 s af te skaaf tot 7,6 s. Dis omtrent…

Kampplekke teen die KwaZulu-Natalse kus – en veral die Suidkus – lê ingeryg soos sardyne. Dis eenvoudig ’n seevakansie op sy beste. Tog is die provinsie se Drakensberg-oorde ewe gesog, net soos die iSimangaliso-vleilandpark met sy oerwoude wat soos ’n 170 km lange wurm tot teen die Mosambiekse grens strek. Maar wat kampplekke betref, is hier meer as net strande, berge en oerwoude in dié provinsie. Mense sal jou waarskynlik skeef aankyk as jy in Durban wil kamp, boonop ver van die see af. Ook as jy na die oënskynlike vaal Middelland mik wat wes van Durban in ’n breë strook tot teen die Vrystaatse grens loop. Die Queensburgh-woonwapark lê mooi in die Durbanse metropoolgebied, tussen die woongebiede, maar verder “weg” van die stad sal jy nie kry nie. Pak…

As ons eerlik moet wees, sal ons ruiterlik erken verlede jaar se Ry & Sleep Bull Run was tot hier in die middel van die jaar nog erg in die weegskaal. Ons was midde-in ’n nasionale inperking en daar was groot onduidelikheid oor wat ons mag en nié mag doen nie. ’n Byeenkoms met die skaal van die Bull Run vereis dat baie logistieke faktore in ag geneem moet word, soos die hoeveelheid mense wat op een slag bymekaar mag wees, die beskikbaarheid van handreinigers en hoe om al die deelnemers veilig te hou. Toe die provinsiale grense weer oopgestel word en die nasionale inperkingsmaatreëls in so ’n mate verslap dat ons ’n sekere aantal mense bymekaar mag kry, het ’n kleiner Bull Run die groen lig gekry. En hoewel…

Doringlaagte is ’n gewilde vakansieoord sowat twee uur se ry oos van die Kaap, met meer as genoeg om te doen vir die hele gesin. As jy jou wa met jou 4x4-voertuig sleep – of sommer net op soek is na ’n nuwe veldry-uitdaging – het die mense hier nou ’n klompie nuwe 4x4-roetes uitgelê. Die roetes bring jou tot by plekke met pragtige uitsigte oor die omgewing en sal jou tuis laat voel in die natuur. Hier kan jy vir ’n rukkie wegbreek van die gewoel van die kampterrein. Hier is drie verskillende roetes wat jy kan kombineer om een lang roete te ry, óf jy kan die drie afsonderlike roetes op hulle eie aandurf. Almal saam behoort jou sowat drie uur agter die stuur besig te hou, waarna…

Toe Jan se gesin begin groei, het hy besef die tyd het aangebreek om van sy Toyota RunX ontslae te raak en ’n ander voertuig te soek. Gelukkig was sy broer bereid om die RunX te koop, terwyl sy pa se Condor presies was waarna hy op soek was. Hy kon sy pa oortuig om hom vir sowat R70 000 van die hand te sit – volgens Jan is dit baie na aan die kar se inruilwaarde vyf jaar gelede. “Dit is ’n 2000-model Toyota Condor 3 l-RV-4x4 (diesel), en hy het sowat 230 000 km op die klok gehad toe ek hom by my pa gekoop het. Dit is nogal ’n skaars model, want die meeste wat jy nog op die pad sien, is óf die Estate óf die…

VISVANGOORD UDOLPHO-RIVIERPLAAS KOM VANG ’N GELE As jy van Sasolburg se kant af Parys toe ry, is daar net voor Parys ’n hele paar kampplekke teen die Vaalrivier ingeryg, met die nuutste toevoeging die Udolpho-rivierplaas se woonwapark. Nadat jy van die teerpad afgedraai het, is dit 2,9 km grondpad tot by die plaashek, en dan nog ongeveer 650 m tot by die kantoor. Die rivier is nog 500 m verder, en dis hier waar die staanplekke langs die rivier uitgelê is. Die swembad is ook digby die kantoor, asook die minigholfbaan – laasgenoemde kos R10 per spel en jy betaal ’n R20-deposito vir die stokke. Die kettiebaan is ook hier en dit kos ook R10 om ’n kettie te huur. Hiervoor is geen deposito nodig nie, en jy kry 10…

In die jare sewentig was daar in Amerika heelwat keuses van woonwaens, waaronder die Shadow, wat in Missouri deur Harmon Industries gebou is. Hulle het met die innoverende idee vorendag gekom om die wa aan die dak van die voertuig te koppel. Die sogenaamde vyfdewielkoppeling was egter niks nuuts nie en die konsep is toe al dekades lank gebruik, hoewel dit hoofsaaklik iets was wat aan ’n bakkie se laaibak gekoppel is… nié ’n motor se dak nie. Die Shadow was gemik op mense met ’n luikrug- of sedanvoertuig en die gedagte was om ’n staalplaat op die dak vas te maak waaraan die Shadow gehaak het. Daar was drie modelle om van te kies – 18 vt., 23 vt. en 27 vt. – jy kon die grootte kies wat…

Quantum Leisure, wat hom toe-spits op vastedakpadwoonwaens, het nou sy sewende model, die Comfort Deluxe, bekend gestel. En sedert dié nuwe sikspens se koms rondom Oktober laasjaar het hy sommer ook die kollig by sy broers gesteel. Tans is dit die gewildste model, sê die eienaar, Jurie Pienaar. ’n Mens kan die goue resep in ’n paar woorde opsom: ’n luukse, liggewig enkelaspadwoonwa met ’n volledige badkamer. Wat is anders? Quantum het dus nou drie variante van sy Comfort-model. Al drie is in wese ewe groot en die eilandbed staan dwars aan die neuskant. Die standaardmodel het een stapelbed agterin en die Family-model kry ’n bykomende een. In die Deluxe maak dié beddens plek vir die badkamer. As jy die drie modelle se linkersy vergelyk, is die deur van die…

Oaksrest is een van daardie kampplekke wat ’n tweestryd by jou ontketen: Jy wil graag vir die wêreld daarvan vertel, maar jy hoop ook diep binne jou dit kan ’n geheim bly. Want jy weet: As jy vir iemand van die juweel vertel, gaan jy kort voor lank nie meer plek kry nie. Gelukkig sal Oaksrest se drumpel nie deurgetrap word nie, want dis effens uit die pad, tussen Oudtshoorn en Laingsburg. As jy dus hier ’n draai wil maak, is dit omdat jy spesifiek hierheen kom –die pad loop min of meer dood by Oaksrest. Maar sorg dat jy bespreek, want hier is net vyf staanplekke waarvoor mense moet armdruk. DIE KLEIN-KAROO is nie bekend vir sy groen grasvelde nie; dis eerder ’n verskroeide stuk aarde waar water en…

Die GWM Poer is in 2019 by die Shanghaise motorskou bekend gestel, en in Oktober 2020 is aangekondig dat die Poer ook na Suid-Afrika kom. Haval Suid-Afrika het vermoedelik hulle moedermaatskappy in China gewaarsku dat Suid-Afrikaners, en veral Afrikaanssprekendes, hulle ’n papie gaan lag as hy hier as die Poer bemark sou word, en die bakkie is gevolglik tot die meer sinlike P Series herdoop. Wat het ons hier? Die GWM PSeries-bakkie is beskikbaar in ’n enkel- en dubbelkajuitweergawe met agterwielaandrywing of viertrek. Jy’t ’n keuse van ses bakverfkleure en vier afwerkingsvlakke: die basismodel-SX, gevolg deur die DLX, LS en LT-vlagskipmodelle. In Suid-Afrika is daar slegs een enjinkeuse: ’n viersilinder-turbodieselenjin, maar ’n petrolmodel is wel in ander lande beskikbaar. Die model soos wat ons getoets het, die P Series LT…

Ons is almal vinnig by om te skep, maar heelwat skugterder wanneer dit tyd is om met die skottelgoed te help, veral as jy trommeldik geëet is aan die potjie wat oom Sarel gemaak het. Die potjie wat ons vir dié artikel gebruik het, was in só ’n slegte toestand dat ons eerder die deksel teruggesit en besluit het om daarvan te vergeet. Schalk het ook sy gehawende steakpan beskikbaar gestel vir die artikel. ’n Laag roes het op die pan gevorm, en ondanks sy pogings om dit skoon te kry was daar steeds oranje vlekke. As jy mooi daarna omsien en dit nie verniel nie – soos om koue water in warm kookware te gooi of dit gereeld te laat val – behoort jou gietysterprodukte vir jou leeftyd én…

Ons almal weet hoe belangrik dit is om toegang te hê tot ’n ordentlike stort wanneer jy kamp, veral as die wind, stof of reën moleste gemaak het en jy tot op die been vuil voel. En dan is daar diegene onder ons wat nogal ’n voorkeur het vir ’n troon met ’n uitsig. Ons hurk nie oor ’n gat in die grond wanneer ons by die huis is nie, en daar is geen rede hoekom jy dit moet doen wanneer jy kamp nie. Hier is ’n klompie produkte waarmee jy jou eie bobaas badkamer in die boendoes aanmekaar kan slaan. ALVA- DRAAGBARE GASVERWARMER Warm water in ’n boks Hy werk met ’n Alva-gaskannetjie (Cadac s’n werk ook) en jy koppel hom aan jou waterbron – ’n direkte pyp, swaartekragsak…

Die nuutste kampplek in die Dinokeng-reservaat is die Njala-boskamp, ’n omheinde lappie aarde van 20 ha binne dié Groot Vyf-reservaat wat gemik is op kampeerders wat selfversorgend is. Die eienaar, Charl Pretorius, sê die gedagte is om ’n veilige kampplek in die bos te bied sonder wilde diere. Tog is dit ’n boskamp in die ware sin van die woord, want tans is daar geen elektrisiteit of water nie. Charl-hulle beplan wel om water aan te lê sodat kampeerders lopende water by hulle staanplek het, plus dan ’n gasgeiser en spoeltoilet. Intussen moet kampeerders vir hulle eie water sorg en hier is ’n kompostoilet en ’n bosstort wat jy self moet vul. Die terrein is meer as 10 jaar al olifantvry danksy die heining, wat beteken die bos is lieflik…

“Ek en my vrou, Antoinette, het die afgelope Kersfees ons wa se hoekstutte by Weltevrede buite Parys uitgedraai en vir ’n klompie dae kom uitspan. Ons was seker al ’n goeie vyf keer hier en sal aanhou terugkom. Dit is ’n agtermekaar oord op die Fochvillepad en die eienaar hou streng by sy reëls en hou die plek netjies. Die laaste 3 km ofso tot by die oord is ’n goeie grondpad wat glad nie pla wanneer jy sleep nie. HOE LYK DIE KAMPTERREIN? Hier is meer as 30 staanplekke langs die Vaalrivier uitgelê en almal van hulle is onder dak en op plaveisel. Elke staanplek het ook sy eie braaiplek. In die voorste ry staanplekke is nagenoeg 10 staanplekke sowat 50-60 m van die water af. Jy kan amper…

Die eerste skoolvakansie van 2020 lê voor die deur, en Piet en sy vrou, Chandré, en hulle kinders, Piet (13), Nicolaas (12) en Mieke (10), is gereed vir die Sentraal-Kalahari. Dis ’n kort besoek, want hulle het vir die Junie-vakansie reeds ander plek bespreek in Botswana. Teen dié tyd het ’n mens al begin hoor van die Covid-19-pandemie. ’n Paar dae vroeër sluit die regering die skole en Piet-hulle besluit om vroeër in die pad te val –dalk kan hulle meer van die Sentraal-Kalahari te sien kry. Hulle ry Botswana digby Gaborone binne waar hulle laaste voorrade kry. Hulle 2009 Land Cruiser VX 200 se brandstoftenk is vol en die 2019 Mobi Lodge se kaste het alles wat nodig is. Piet vertel. “Omdat die Sentraal-Kalahari so afgesonder is, neem ek…

Die mark vir grondpadwoonwaens is ’n nissegment in Suid-Afrika –uit die raps meer as 40 woonwavervaardigers in die land is daar net ’n hand vol wat sulke modelle maak. Dit sluit in die vier modelle van Stealth, waarvan die Bush Lodge bo-aan die leer staan. Bloot die voorkoms van die Stealth Bush Lodge is anders as dié van die ander Stealth-produkte. Die wit, grys en blou maak plek vir wit met ’n swart viniellaag onderlangs. Anders as die stylvolle skoon ontwerp van eersgenoemde lyk dit omtrent of daar oor die Bush Lodge geskryf staan “moenie met my sukkel nie”. Oor albei sypanele is ’n vet modderspoor “geverf”. Hierdie anderste motief word aan die binnekant herhaal, en dit sorg vir ’n aardse gevoel op ’n stylvolle manier. Sê ‘aaa’ Die neuskasdeur…

Ek ry in ’n Mercedes-Benz 280E met ’n gat in die uitlaatstelsel en ’n bedenklike koppelaar. Die kar klink soos ’n effens befoeterde sportmotor. Die spoedmeter werk al lankal nie meer nie en die temperatuurmeter skiet op en af. Ek ry dus op gevoel, klank en genade –en probeer so min as moontlik van ratte verwissel. Ten minste loop hy. Ná ’n week van Bull Run-werk sien ek uit na die huis, maar die mense by die bakkie langs die pad het ons hulp nodig. Agter my is Thys en Daniel de Jager in ’n Hilux en ’n Mercedes-Benz (wat ook eens op ’n tyd ’n 280E was, maar nou het hy ’n Ford 351-enjin). Ons is, net soos die manne van die Isuzu, op pad huis toe ná die…