Innholdsfortegnelse for July 2020 i Weg! Ry & Sleep

Die Namakwa-4x4-ekoroete strek van Pofadder in die Boesmanland tot bo by Brandkaros in die Richtersveld. As jy elke hoek en draai van die roete verken, gaan hy jou maklik vyf dae besig hou, maar indien jy – soos ons – slegs die hoofaar volg, kan jy die hoogtepunte binne slegs drie dae sien. Jy het ’n volwaardige viertrekvoertuig met veldrybande nodig om hierdie roete baas te raak. Hoewel hy nie hoërgraadveldrytalente vereis nie, moet jy kophou, want hier is ’n paar uitdagende hindernisse wat minagtende besoekers onkant sal betrap. Jy kan ’n boswa sleep, maar ’n lang boswoonwa gaan nie hier deug nie. Daar is ook enkele hindernisse wat ’n groot 4x4-ryhuis sal fnuik. Dit is ’n puik alternatief vir die pylreguit N14 tussen die Augrabies- en Richtersveld- nasionale park,…

VISVANGOORD GASTEPLAAS HARTEBEESFONTEIN JOU EIE KAMPPLASIE Dis nie aldag dat ’n mens ’n hele kampplek net vir jouself en jou mense kan bespreek nie. Hartebeesfontein, net anderkant Mookgophong, is so ’n plek – en dan kamp jy nog teenaan ’n dam. Die Bad se Loop-stroom ontspring op die plaas van 800 ha en die eienaars het ’n hele paar keerwalle in die stroom gebou waar die water opdam. Soos jy aangery kom, kan jy langs een van die heel linkerkantse damme kamp. Dié dam stroomaf is sowat 40 jaar oud en het ’n oppervlakte van 7 ha (afhangend van die watervlak). ’n Mens slaan op die westelike oewer van die dam kamp op. Agter jou is ’n sitrusboord, en tussen die waters en die boord is ’n paar lieflike koeltebome…

Buiten ’n chalet is ’n woonwa sekerlik die gemaklikste manier om te kamp, maar nie die maklikste ding om deur onherbergsame gebiede te sleep nie – selfs ’n boswoonwa of boswa kan sukkel. ’n Tent is dan die logiese keuse, maar dit kan ’n beslommernis raak om elke aand op te slaan en die volgende oggend weer af te slaan as deel van ’n groter reis. En as dit die vorige nag gereën het, moet jy boonop ’n druipnat modderbesmeerde grondtent terug in sy sak stoei. Met ’n daktent kan jy uitdagende 4x4-roetes ry wat jy nié met ’n wa op die haak sou kon baasraak nie. Jy hoef ook nie saans met penne en pale te sukkel nie, want ’n daktent vou in ’n japtrap oop. Alu-Cab se Gen…

Die meeste kampeerders gebruik hulle woonwa net ’n paar keer per jaar, maar wanneer jy gedwing word om afstand te doen van jou kampplanne weens ’n wêreldwye virus, is dit dalk tyd om weer te gesels oor die beste manier om jou wa te berg. Ons het met kenners in die bedryf gesels om te hoor hoe jy te werk moet gaan om jou woonwa behoorlik op te pas. Hier is goeie raad vir beginnerkampeerders én veterane met jare se sleepervaring. Trek ’n jassie aan Dit is voor die handliggend dat dit die heel beste is om jou wa in ’n motorhuis te bêre wanneer jy nie reis nie. Maar nie almal het plek in die motorhuis of onder ’n dak nie, en daar is waarskynlik heelwat waens wat bloot…

Ná 38 jaar in die staatsdiens tree ek uiteindelik einde Januarie vanjaar af. Nou is ek en my vrou, Engela, saam pensioentrekkers. Teen Maart besluit ek om een van my emmerskoplys-items af te tik en ’n veldryvoertuig te koop. Ek besluit teen ’n nuwe een, want ’n mens wil nou nie met ’n halfmiljoenrandse bakkie die bosse invaar nie. Ek koop ’n 2009 Mazda BT-50 wat nog goed opgepas is, en ek is sommer trots op myself. My “trokkie” (soos ek hom noem) het ’n paar krappies, en aangesien my dogter, Angelique, se vriend, Marcel Da Costa, ’n paneelklopperonderneming besit, sal hy vir my die bakkie regsien. Maar die geluk is nie aan my kant nie, want soos ek die bakkie by die paneelklopper in Pretoria aflaai, word die inperkingstyd…

Woonwavervaardigers is hard getref deur die gevolge van die Covid-19-pandemie, maar Philip de Vries van Conqueror meen die plaaslike woonwamark behoort vinnig te herstel. Voordat vlak 3 van die inperking in werking getree het, kon Conqueror net die helfte van sy personeel in die fabriek toelaat om produksie aan die gang te hou. En omdat die aandklok van krag was, kon hy byvoorbeeld nie skofte oorweeg vir hoër produksie nie. Die goeie nuus is dat die oorgrote meerderheid van plaaslike woonwavervaardigers – Conqueror inkluis – daarin kon slaag om al hulle personeel te behou. Sedert die inperking is alle uitvoere gestaak. Dit is ’n groot slag vir ’n vervaardiger soos Conqueror, wat na Australië, Amerika en Europa uitvoer. Tog is die produksie van uitvoerwaens nie gestaak nie. Philip sê hulle…

“My Fortuner word elke 7 500 km gediens teenoor die gewone diensperiodes van 15 000 km wat Toyota voorstel.” 2008 TOYOTA FORTUNER 3.0 D-4D Ludwig ken elke nuk en gril van sy Fortuner, en ná jare se gebruik as ’n sleepvoertuig in die Extreme 4x4-uitdaging – plus ’n paar maande se wik en weeg – het hy uiteindelik besluit om 4x4-katoeters vas te bout. Ek het die Fortuner in 2014 as ’n elkedagse ryding vir my vrou aangeskaf. Hy’s die model vóór die ontrimpeling en is destyds geregistreer as ’n kode 2. Ek het net R116 000 betaal vir die kar, maar ’n verdere R29 000 uitgegee aan herstelwerk en nuwe bakverf. Die Fortuner was aan die begin van 2019 in ’n botsing betrokke en ek het besluit om ’n…

Vis Karp, swartbaars, baber en kurper. Kampplek Plek vir tot 30 mense op 1 groot grasperk met koelte teenaan ’n dam. Ablusiegeriewe ’n Netjiese badkamer, kombuis en grasdaklapa – alles bymekaar. Prys R100 p.p.p.n. (R50 vir laerskoolleerlinge; gratis vir die voorskoolse outjies). Afhangend van die seisoen geld ’n minimumtarief van R400-R1 000 p.n. en ’n minimum van 4-10 mense. Jy moet ook vir minstens 2 nagte bespreek. Aankoms- en vertrektyd Die tye verskil na gelang van die seisoen en hoe besig dit is. Tref reëlings met die plaas se mense. Kontak 073 041 4353 denemuller2@gmail.com Naaste dorp Mookgophong 22 km. Hoe lyk die pad? Die laaste 15 km is grondpad, maar ’n mens kan ’n gewone padwa sleep mits jy dit stadig vat. GPS S24.543154 E28.558207 Ry & Sleep sê…

Jy ken waarskynlik al die breë trekke van die jerrykan se geskiedenis: Dit is die Duitsers wat dié bekende brandstofkan en ou langpadstaatmaker tydens die Tweede Wêreldoorlog uitgevind het, en “jerry” was Britse sleng vir Duitse troepe. Maar die volle verhaal is selfs nóg interessanter... Vroeër jare is olie en brandstof uitsluitlik in vierkantige blikkanne aan die publiek verkoop, iets wat koöperasies en grootmaatsupermarkte vandag nog gebruik vir kookolie en paraffien. Maar met die Spaanse Burgeroorlog in 1936, wat deur Nazi-Duitsland ondersteun is, is ontdek die gesoldeerde nate van dié kanne bars té maklik as dit hardhandig hanteer word. ’n Ander soort metaalkan, een wat soos ’n driehoekige aktetas gelyk het en in 1928 deur Vinzenz Grünvogel ontwerp is vir die Duitse ingenieursfirma Eisenwerk Müller & Co. AG in Schwelm,…

Ek kan nie onthou wanneer ek die eerste keer gaan kamp het nie. Ek kom nie uit ’n familie van kampeerders nie en ons het altyd vakansie gaan hou in die een of ander huurhuis op Kleinmond of Struisbaai, so na as moontlik aan die see. My pa was egter nog altyd ’n stapper, en so nou en dan het hy my, my broer en ’n pêl of twee gevat na ’n oornagroete in die Sederberg. Ek onthou die pakkery: Styf opgerolde klere, ’n piepklein kookstel en gasstofie, die A-raam-tentjie met sy muwwe reuk (as gevolg van baie jare op ’n rak in die motorhuis) en die varkpanne en pikstelle wat my pa om die een of ander rede 20 jaar ná sy weermagdae nog het. Alles moes klein en…

Toe ons vanoggend om 07:00 opstaan, hang daar ’n mistigheid oor Secunda. Nog ’n mistroostige inperkingsdag, dink ek terwyl ek by die venster uitkyk. Dit maak ’n mens sommer nóg meer morbied. Hopelik kom die son vinnig uit. Kort vóór die inperking het ons ’n maand lank by die Dube-reservaat saam met my broer André en suster, Elna Janse van Vuuren, al die pad uit Nederland, gaan kuier. Dit was aangenaam in die reservaat en ’n besonderse ervaring vir Elna. Sy kon nie glo ’n mens kan skaars 10 m van ’n kameelperd af staan nie. Die maand het natuurlik verbygevlieg, en ons was betyds terug by die huis waar Elna inderhaas spesiale reëlings moes tref sodat sy ook betyds by die huis kon uitkom. Ons beplande seevakansie in die…

Ek en my vrou, Cecielia, beplan jaarliks ’n toer, hetsy deur ons land óf na een van ons buurlande. Wanneer ons die beplanning doen, probeer ons om by soveel as moontlik besienswaardighede uit te kom en roetes te ry. Danksy ons versameling Ry & Sleep- en Weg-tydskrifte is dit maklik om die volgende toer deeglik te beplan en seker te maak ons laat nie iets uit nie. Wanneer ons die nuutste uitgawe gelees het, begin ons deur die ou tydskrifte blaai – en wat ’n ervaring. Elkeen is soos nuut. Dankie aan die redakteurs, joernaliste, kunstenaars, medewerkers en al die medelesers wat hulle ervarings en foto’s deel om maandeliks vir ons twee puik tydskrifte saam te stel.…

MOEDVERLOOR SE VLAKTE Sedert 2006 kamp Jannie en Alet Meyer van Alberton minstens een keer per maand. Al sou die koronakamp net oor ’n naweek plaasvind, het ons sommer die woonwa ’n week vóór die tyd al in die tuin staangemaak. Só sal ons ons tuiskampplek opsom: ’n lekker stil plekkie, nie ver van die huis af nie, én dier- en kindervriendelik. Dit was só ’n gawe plek dat selfs die braaihout en limonade verskaf is. Natuurlik was dit nie volmaak nie, want al ons vriende wat gewoonlik saam kamp, was nie hier nie. Om die waarheid te sê was ons só alleen, ons het ons kampplek Moedverloor se Vlakte gedoop. Ons het selfs ’n liedjie hieroor geskryf. Gevolglik het ons vroeër as gewoonlik gaan inkruip, maar het nietemin die…

In hierdie tyd van YouTube, tabletrekenaars en slimfone bied die natuur steeds die beste vermaak, verál vir die jongspan. En wat is beter as ’n kampnaweek ’n hanetree buite die grootstad? ’n Kampnaweek met hordes maats, ’n reusegrasperk én swemplek vir almal. Vir Kapenaars is Altydwater só ’n plek. As jy dus ooit lus word vir een van daai mega-kampnaweke waar álmal wat jy ken, saamgaan – hulle kinders en honde inkluis – kies koers Rawsonville se kant toe vir ’n naweek vol saligheid, samesyn en swem. Reël net vooraf as jy vir Doppies en Wagter wil saambring. Soos die naam verklap, is hier altyd water. Die kampplek is geleë op Groot Eiland, die Smith-familie se wingerdplaas op die walle van die Smalblaarrivier. Dié lappie grond is sowat 3 km…

Die afgelope 15 jaar al gaan kuier Grové en sy vrou, Marguerite, minstens twee of drie keer per jaar in die Kgalagadi om alles te ervaar wat dié besonderse plek bied. Op dié Kalahari-reise bly hulle altyd in Nossob, selfs al neem hulle dikwels vroegoggend die verkeerde besluit wanneer hulle moet kies of hulle noord of suid moet ry. Grové sê dit het al té gereeld gebeur dat die katte in die noorde is wanneer hulle suid ry... en andersom. Gevolglik besluit hulle om vanjaar die Nossob-4x4-ekoroete by hulle reisplan te voeg, want op dié roete kies jy nie ’n rigting om in te slaan nie. Hulle bespreek 11 maande vóór die tyd, toe die besprekings geopen het, en die res van hulle verblyf in die park is rondom die…

Met die plaaslike bekendstelling van die allewielaangedrewe Vitara Allgrip in 2016 het ons die berge rondom Knysna ingevaar om hom te toets. Drie jaar later is die turboaangejaagde Suzuki Vitara hier onthul en ons het ons eerste indrukke in Oktober 2019 gedeel. Die Vitara Allgrip se vermoë op slegte grondpaaie het ons beïndruk, maar ons wou hom geensins voorhou as ’n speelse ryding nie. Die Vitara Turbo was egter prettig om mee te ry, hoewel ons met sy bekendstelling nie kans gekry het om grondpad aan te durf nie. Met die koms van die Vitara Turbo het Suzuki ook sommer van die geleentheid gebruik gemaak om die binneruim op te knap. Die middelkonsole spog sedert 2019 met dieselfde raakskerm wat sy buiging gemaak het in die Suzuki Jimny. Die lugreëling…

“Moenie ry waar jy moeilikheid kan kry nie. – Leonor Gerrits” Die twee dinge wat ons nie in hierdie top 5-lys noem nie, is eintlik die heel belangrikste: kennis en goeie oordeelsvermoë. Goeie oordeel moet jy hê oor waar om nié in te foeter nie, en dan het jy kennis nodig om jou uit te kry as jy wel daar ingefoeter het. Kennis gaan jou meer in die sak bring as enige 4x4-katoeter, en daarom is dit goed om opleiding te kry by ’n 4x4-akademie, of sluit by ’n 4x4-klub of -forum aan sodat ervare lede hulle veldrykennis met jou kan deel. Maar selfs kenners met goeie oordeel gebruik herwinningstoestelle en ons Facebook-vriende het laat hoor watter affêrings hulle inlaai as hulle op ’n 4x4-hindernisbaan gaan speel of die boendoes…

Min dinge is so teleurstellend as wanneer jy met ’n groot stuk biltong in jou kampstoel agteroorsit en dan besef jy het nie jou gunstelingbiltongmes saamgebring om deur die sening te sny nie. Moenie dat dit gebeur nie, want niemand wil daardie geelvetbeesbiltong met een van daai bottermesse in jou kampstel aandurf nie. Hier is vir jou ’n klompie keuses om seker te maak jy het altyd die ware Jakob byderhand. 1 LEATHERMAN SKELETOOL KBX Biltong en bier Tim Leatherman se bekende reeks mesmoertange is ’n huishoudelike naam, en met die Skeletool is alles op jou vingerpunte. Die lem van vlekvrye staal is 66 mm lank en het ’n gladde én getande snykant. Hy het ook ’n verwyderbare knippie waarmee jy hom aan jou gordel kan haak. En o ja,…