Innholdsfortegnelse for 2021 i Weg! Namibië

As daar een plek is waar ek met graagte ’n grendeltyd sou wou deurbring, is dit Namibië. Toe die Covid-19-pandemie die wêreld tref, het ek gedink Namibië is juis ’n plek waar dit eintlik maklik is om sosiale afstand te handhaaf. Dié land se groot, oop vlaktes en min mense maak dit ook ’n puik toerismebestemming nou dat ons weer mag reis. (En Namibië is mooier as ooit ná die afgelope somer se goeie reën.) Terwyl ek aan die gids gewerk het, het ek telkens ’n knop in my keel gekry as ek aan die Namibiërs dink wie ek oor die jare heen ontmoet het, wie se hoofbron van inkomste toerisme is. Hoe moedeloos moet ’n mens voel as daar vir byna ’n halwe jaar net enkele besoekers kom en…

Ek bestudeer ure lank kaarte van die Visriviercanyon. Ek verslind artikels oor die roetes en ek ken die moets en moenies. Maar eers nadat ek die roete die eerste keer probeer stap het. My vriendin Hayley het vir ons plek bespreek, haar kollega Jenny en dié se verloofde, Max. Hoewel ek op my gemak is in die wildernis, was die ander drie nie besonder fiks nie en nie een van hulle het al ’n meerdagstap voltooi nie. In my agterkop het ’n ligte bekommernis gebroei, maar die vooruitsig van ’n avontuur het dit oorskadu. Die volgende twee maande het verbygevlieg sonder enige oefenlopies. Ná ’n laaste draai in die winkels het ons die 1 200 km van Johannesburg af Suid-Namibië toe in ’n Hyundai i20 aangedurf, met ’n oornagstop op…

NOODSAAKLIKE PAPIERE PASPOORT Dit moet vir nog ses maande of langer geldig wees ná jou vertrekdatum uit Namibië en moet minstens twee skoon bladsye hê. SERTIFIKATE Kinders jonger as 18 moet ’n oorspronklike, volledige geboortesertikaat hê behalwe indien hulle ’n nuwe paspoort het wat hulle ouers se name lys. RYBEWYS Jou Suid-Afrikaanse een is geldig in Namibië – hou dit byderhand. VOERTUIGREGISTRASIEDOKUMENTE Dit moet oorspronklike dokumente of gesertifiseerde afdrukke wees. Onthou ook die dokumente vir jou sleep-of woonwa. MAGTIGINGSBRIEF As jy nog aan jou kar afbetaal, moet jy ’n brief van die bank hê wat jou toestemming gee om die kar oor die grens te neem. Indien jy iemand se ryding leen, moet jy ’n getekende toestemmingsbrief van daai persoon kry. Dié brief moet die kar se registrasienommer, die eienaar…

Die oomblik wanneer jy by die agterdeur van die huis op die Kosos-plaas naby Helmeringhausen instap, word jy omring deur plaasdinge: Mariëtte de Klerk en haar dogter Anrie pak dadels op die kombuistoonbank. Bella, hulle jack russell, sit ’n nat tennisbal by jou voete neer terwyl Darren, Anrie se man, vertel van die koedoe wat hy met sy bakkie getref het. Boeta, Mariëtte se man, stap in met ’n tang in die hand. Hy gee jou ’n stywe handdruk en kyk by die agterdeur uit na die wolke in die lug. “Ja nee, die wind draai reg. Lyk asof dit gaan reën. Kom, ry gou saam, ons gaan beeskyk,” sê hy. Ek klou aan die tralies agterop die Cruiser-bakkie terwyl ons deur die veld bons. Later spring ek af om…

1 Vaar tussen dolfyne by Walvisbaai Op ’n oggendvaart (met vonkelwyn en vars oesters) vaar julle verby die vuurtoring en robkolonie by Pelikaanpunt. Jy sien dalk dolfyne, ’n walvis of pelikane wat ’n happie bedel. Mola Mola( mola-namibia.com) se Marine Dolphin Cruise kos R700 p.p. en R420 vir kinders tussen 4-12 jaar oud. Laramon Tours ( laramontours.com) se Dolphin Cruise en Catamaran Charters ( namibiancharters.com) se Dolphin & Seal Cruise kos R950 p.p. (R520 vir kinders jonger as 12). 2 Sien Sossusvlei en Sesriem Bly by die Sesriem-kampterrein (#89) as jy besonderse foto’s wil neem. Die kampterrein is in die Namib-Naukluft-nasionale park; dus mag jy ’n uur vroeër soggens inry en ’n uur later saans terugkeer. Die pad is geteer van Sesriem tot by die Sossusvlei-parkeerterrein. Van hier kan jy…

Twee bleek figure dryf in die middel van ’n spatsel groen omring deur kilometers en kilometers woestyn. Dís wat ’n damarasterretjie wat sowat 50 km noord van Hentiesbaai vlieg uit die blou lugruim sou sien. Dis ek en my meisie, Sam, wat op ons rûe lê in die jenewergroen water. Die son glinster deur die wimpers van my skrefiesoë, die warm strale byt aan my vel. Die koel water is ’n lafenis ná die lang, stowwerige rit deur die woestyn. Dis seker betwyfelbaar of Namibië se Dooiesee – ook bekend as die Soutgat – werklik genesing bring, maar een ding is seker: Die Damaraland waardeur ons in die volgende paar dae sou drywe, is goed vir die siel. Al langs die kuslyn Ek en Sam het vanoggend uit Swakopmund weggetrek…

SESRIEMCANYON ADRI BRUWER, WINDHOEK Ek en my man, Gerhard, is albei in die noorde van Namibië gebore (Otavi en Tsumeb). Die nasionale inperkings het ons heel onkant gevang. In Windhoek woon ons naby die bekende Joe’s Beerhouse en die rivier onder in ons straat het vanjaar ’n hele paar keer met vloedwater afgekom. Groot vragmotors, wat dié straat gebruik om oos-wes deur Windhoek te ry kan dan nie deur die rivier kom nie. Ons weet al: Wanneer jy die vragmotors hoor soos hulle probeer agteruitstoot en draai, loop die rivier weer! Toe ons uiteindelik “losgelaat” word, het dit boonop begin reën met die aanvang van somer, wat dit soveel lekkerder gemaak het om die langpad te vat. Dis die eerste keer in my lewe dat ek ons land só verskriklik…

PARKTARIEWE Daar is al lank sprake dat die Namibiese departement van omgewingsake, bosbou en toerisme parktariewe gaan verhoog. Nuwe tariewe is in Februarie aangekondig: Vir SAOG-lede: R100 p.p., R50 per kind jonger as 16 jaar en vanaf R50 per voertuig in die |Ai|Ais-, Etosha-, Namib-Naukluft-, Dorob-, Waterbergplato- en Skedelkus- nasionale park, Sperrgebiet en die Kaap Kruis-reservaat. Vir die ander parke is die parktarief R70 p.p., R30 per kind en vanaf R50 per voertuig. Onthou dus om ook vir dié bedrae per dag te begroot wanneer julle in ’n nasionale park oornag. KRY ’N KAART! NAMLEISURE-KAART Met ’n NamLeisure-kaart in jou beursie kry jy 25% afslag op Namibia Wildlife Resorts se blyplekke, maaltye en aktiwiteite – ons het die plekke aangedui met “NWR”in die blyplekkegids. Dit sluit kampplekke uit. (Let wel,…

Stapels swanger reënwolke dryf in die lugruim rond wanneer ek uit Windhoek wegtrek. Anderkant ’n polisiekontrolepunt verander die C26 in ’n grondpad en begin geleidelik teen die Kupferbergpas uitklim. Wanneer ek stilhou om ’n foto te neem grom die donderwolke soos ’n skoolkind se maag teen tweede pouse. In die noordweste sleep ’n donkergrys gordyn oor die landskap. Vyf minute later haal dit my in. Groot druppels kletter teen die bakkie se voorruit neer en kort voor lank glinster die veld alkant van die pad. Die Khomas Hochland het die afgelope paar weke goeie reën gehad en dit blyk dié seëning duur voort. ’n Paar bakkies met visstokke op die dak haas verby op pad kus toe, Walvis toe. Ek hou ook van ’n seevakansie, maar ek hou meer daarvan…

Skedelbaai is nie ’n hierjy surf spot nie. Hier is van die skouspelagtigste branders op aarde. Branderplankryers vlieg van so ver as Hawaii en Australië om kragte te meet met dié ellelange soutwatermuur. Op ’n goeie dag is dié brander tot 2 km lank! Trouens, dit vorm ’n perfekte “tonnel” dat ’n branderplankryer van begin tot einde diep in die barrel kan ry. ’n Ervare surfer kan die brander tot drie minute lank ry – dis buitengewoon! Aanvanklik het net Namibiërs van dié baaitjie geweet totdat die Amerikaanse Surfing Magazine dit in 2008 internasionaal in die kollig geplaas het. Dié tydskrif het elke jaar ’n Google Earth-uitdaging gehou om nuwe moontlike branders te identifiseer. Dié jaar het Brian Gable, ’n IT-spesialis van Kalifornië, gewen. Hy en ’n vriend het die…

Twee bontkiewiete daag gewoonlik voor ons by die Onkolo-skuiling op. Ek en my vrou, Di, stel die kameratoerusting op en kry ons sit in die ondergrondse fotoskuiling. Sodra die son hier teen 6.45 vm. opkom, daag die eerste kleurryke voëltjies op: onder meer die gewone, koning- en swartwangsysie, gewone melba, rooirugstreepkoppie en baardmannetjie. Kort op hulle hakke kondig tortelduiwe en groenvlekduiwe hulle teenwoordigheid aan, asook ’n paar luidrugtige tarentale en grys kwêvoëls. Gompoue kom en gaan deurentyd. Hulle drink op ’n koddige manier met hulle pote vorentoe gebuig… Ander wild, insluitend ’n sku duiker, kom groet ook. Namate dit warmer word, daag troppe springbok, sebra, wildebees, rooibok, kameelperd, koedoe en gemsbok op, gevolg deur ’n rooijakkals of twee. Vlakvarke kom rol in die modder terwyl ’n swartkwasmuishond – nog ’n…

My pa het my nie als geleer wat hy moet nie. Maar van ’n paar dinge het hy seker gemaak. Dat ek weet hoe om vuur te maak sonder aanstekers, ons land goed ken en kan reis sonder fieterjasies of fênsie kamptoebehore. Ek was skepties oor sy raad vir verhoudings, maar het by hom ’n liefde vir die veld en haar stiltes gekry. Langs ’n vuur in die veld was my pa vrolik en het hy nie die donker mismoedigheid oor hom gehad soos in die pastoriehuise waar ons gebly het nie. Dan het hy stories vertel oor sy gunstelingdeel van die aarde, Namibië. My pa het ná vier jaar opgehou met sy graad in teologie en gaan swerf. Hy het dikwels in Namibië gaan jag en selfs ’n jaar…

Die Fish River Lodge is met sorg ontwerp om perfek met die dramatiese Namibiese landskap saam te smelt. Van die westelike rand van die manjifieke Visriviercanyon af bied dit ’n ononderbroke uitsig oor die Namibiese oneindigheid – en ook ongeëwenaarde gasvryheid, die strawwe elemente ten spyt. Die verlate skoonheid van Namibië oorweldig die sintuie. Hier heers ’n stille gevoel van eensaamheid; die sin dat ’n mens ’n reisiger is op die rand van ’n nuwe ontdekking in die hart van ’n natuurwonder. Jou gees sink in die eindeloosheid weg en jy raak bewus van die onstuitbare lewe om jou. Kokerbome verrys uit die grond en hou wag al met die rand van die canyon langs. Hier kan besoekers rustige wandelinge onderneem en een met die natuur word. Kyk hoe bergsebras…

1 Soek gammastrale As swart gate, nebulas en pulsars jou opgewonde maak, loer in by die H.E.S.S.- navorsingstasie. Besoeke is gratis op weeksdae in kantoorure, bespreek vooraf. 00 264 81 280 2502 (Toni) thanke@afol.com.na 2 Verken die Melkweg Loer deur ’n teleskoop by die Rooisand Desert Ranch na die Melkweg, planete, bekende konstellasies en nog wat. Sterrekyktoer: R450 p.p. (minimum 2 mense) vir sowat 2 uur. 00 264 81 127 7629 rooisand.com 3 Raak woestynwys Ry ’n draai deur die woestyn saam met een van Bushman’s Desert Camp se mense en leer oor die ontstaan van die Namib, die leefwyse van die Boesmans en hoe mense deesdae hier oorleef. Die toer duur sowat 2 uur en kos R2 100 vir die eerste 7 mense (R300 per ekstra persoon). 00 264…

Drie voertuie kruie in die donker uit die parkeerterrein van die Brandberg Rest Camp op Uis. Ons volg die C35 in die rigting van Hentiesbaai. Uis is die naaste “groot dorp” (dis piepklein) en jou basis as jy Brandberg wil klim. Die bekende Wit Vrou-rotstekening is aan die oostelike punt van die Brandberg. Jy stap net enkele kilometers in ’n klofie op tot by dié tekening. Tog kan dit ’n uitdagende stappie wees, veral as jy onfiks is en die son op volspoed roteer. Ek was al meer as een keer by die Wit Vrou. Tog het ek nog altyd ’n “ding” gehad vir Brandberg. Dalk is dit omdat ek in rotskuns belang stel. Ek het ook, danksy grootwordjare op ’n plaas vol berge, ’n voorliefde vir berge uitklouter. Toe…

G’N TJOPPIES OOR DIE ROOILYN NIE! Die sogenaamde Rooilyn wat oor die breedte van Namibië loop, dateer uit die 1960’s toe die noorde van die land se buffels met bek-en-klouseer besmet was en die siekte ook na ander vee versprei het. Dié veeartsheining is steeds in plek en verhoed dat vleis en ander diereprodukte uit die noorde na die suide en ook plek-plek van wes na oos “gedra” word. Daar’s beheerpunte waar die Rooilyn groot paaie kruis en by só ’n padblokkade sal jy jou Coleman moet oopmaak en soms ook jou motor deur ’n diptrog met ontsmettingsmiddel ry, asook jou skoensole in ’n vlak badjie daarvan doop. Dis wet – moenie met die ouens stry of steaks onder jou noodwiel probeer wegsteek nie.…