Innholdsfortegnelse for 27 March 2020 i Vrouekeur

Die koronavirus het baie mense heeltemal op hol. Menige mens is bang. Bang waarvoor, weet ek nie regtig nie, want paniek het die geneigdheid om nugtere denke te oorskadu en massahisterie is gewoonlik nie rasioneel nie. As jy nugter oor ’n situasie dink, kyk jy na die feite. As jy meer wil weet oor dié virus, lees jy betroubare inligting wat deur kenners geskryf is. Dan kom jy agter die paniek wat tans onder sommige mense wêreldwyd heers, ontstaan soortgelyk aan ’n skinderstorie. Soos wat die storie oorvertel word, word daar ’n stertjie aangelas en voor jy jou oë uitvee, is die storie en die waarheid wêrelde uitmekaar. Jy lees nie elke Jan Rap en sy maat se kommentaar op sosiale media nie … as jy dit doen, kan jy…

Om Hannon dop te hou terwyl hy voor die voorbladfotograaf se lens poseer, voel ’n bietjie of jy na towerkuns kyk. Dis nie sigbaar of tasbaar nie, maar dis duidelik die Glam Guru skakel iets aan. Hier in die ateljee is hy ooglopend op sy gemak. Hy weet presies hoe om te glimlag, wanneer om ’n perfek gevormde wenkbrou te lig of sy breë skouers teen nét die regte hoek te draai. Hannon is vriendelik en professioneel op stel en met elke kameraflits verskyn die ooreenstemmende beeld op ’n rekenaarskerm – en elke liewe foto lyk sommer rééds reg vir publikasie. “Sickeningly photogenic!” bestempel die fotograaf hom spottenderwys. Dié beskrywing is in die kol. Tog erken Hannon hy is “hiperkrities” op homself. En wanneer jy met hom oor sy (steeds…

Die droogte wat Suid-Afrika in ’n knelgreep het, raak ons almal, maar die mense wat intens daardeur geraak word, is ons land se boere en hul werkers. Chrisma van der Merwe, ’n boervrou van Murraysburg en die skepper van Fat Sheep, kon nie maar net sit en toekyk hoe die droogte stelselmatig alles tot niet maak waarvoor hulle gewerk het nie. Sy het geweet sy sou iets moes doen om ’n inkomste te verdien. “My man, Dirk, boer met angoras en merino’s,” vertel sy. “Ons het ook ’n paar melkbeeste, maar weens die droogte melk ons nie meer nie.” Sy sê hulle het die eerste knou van die droogte begin ervaar toe die rivier drie jaar gelede opgedroog het en Dirk nie meer ’n inkomste uit lusern kon genereer nie.…

HOE LANK MOET JY HANDE WAS? Jy moet jou hande glo so lank was as wat dit vat om Happy Birthday twee keer deur te sing. Maar moenie jou hande langer as 20 sekondes was nie en ook nie met kookwarm water nie, want dit kan jou vel uitdroog en jou vatbaarder vir kieme maak. En die goeie nuus is dat “gewone” seep goed genoeg is. SLIM PLEISTERS Navorsers het ’n pleister ontwikkel wat van kleur verander as daar infeksie in ’n wond ontstaan. Dan verander die kleur van die pleister van groen na geel en skei ook ’n antibiotikum af. Die kleur verander na rooi as die bakterieë teen antibiotika weerstandig is. SLANGGIF TOT DIE REDDING Navorsers aan die Coloradouniversiteit in die VSA bestudeer gif van verskeie slange op…

VERF OP KLERE Maak die verfkol met water nat. Smeer nou medisinale alkohol (rubbing alcohol) op die vlek en skrop die verf af. ’n Harde borseltjie is die beste. Wend weer aan indien nodig en was dit daarna in die wasmasjien. KURE MET KREMETART ▶ Gooi kremetart oor die plekke waar miere bymekaarkom om hulle weg te kry.▶ Meng kremetart en ’n klein bietjie suurlemoensap tot ’n pasta en wend dit aan vlekke op klere of matte. Los dit vir ’n rukkie en klad of was dit in die masjien.▶ ’n Pasta van kremetart en ’n bietjie asyn is ook ’n lekker skoonmaakmiddel in die kombuis. Gebruik dit om van muf ontslae te raak en potte, wasbakke en oonde mee skoon te maak.▶ Verwyder vlekke aan krae deur dit eers…

#bakliefde Mareli HAWERMOUTKOEKIES MET SJOKOLADEVULSEL 15 groot koekies BESTANDDELE 190 ml (180 g) sagte botter130 ml (110 g) bruinsuiker1 groot eier40 ml (55 g) gouestroop560 ml (300 g) koekmeel10 ml (2 t) bakpoeier160 ml (60 g) fyn klapper160 ml (60 g) hawermout SJOKOLADEVULSEL 1 plak (80 g) donkersjokolade75 ml (80 g) sagte botter125 ml (65 g) versiersuiker METODE Voorverhit oond tot 160 °C en spuit twee bakplate met kleefwerende sproei. 1 Klop botter en suiker tot lig en donsig.2 Voeg eier en stroop by en klop goed.3 Sif meel en bakpoeier. Gooi klapper en hawermout by.4 Meng meelmengsel by beslag totdat sagte deeg vorm. Moenie oormeng nie.5 Maak 15 deegballetjies van 22,5 ml (1½ e) en pak op bakplaat. Druk met vurk plat.6 Bak vir 16 tot 18 minute tot…

Sommige mense sal wil weet waarom die werk van ’n wêreldberoemde Amerikaanse skrywer in Afrikaans vertaal word? Afrikaanssprekende lesers kan immers Engels lees en sal daarom eerder die boek in sy oorspronklike vorm wil lees? Daar is eintlik sommer ’n hele paar redes waarom ’n vertaling van ´n boek deur Jodi Picoult in weerwil van die skeptiese vrae belangrik is. Die eerste, voor die hand liggende rede is dat daar wel baie lesers is wat verkies om in Afrikaans te lees. By hulle sal die werk van iemand soos Picoult gewoon verbygaan as dit nie vertaal word nie. Picoult het sedert haar debuutroman in 1992 verskyn het, byna 30 romans geskryf wat in 34 tale vertaal is en waarvan meer as 14 miljoen eksemplare wêreldwyd verkoop is. As enkele romans…

Ek is ’n groot voorstander van hersikleer om die omgewing te help bewaar. Dis nie nodig om als ten duurste en splinternuut aan te skaf nie. Hierdie boekrak het gewis deur die jare sy doel gedien, maar het aandag nodig gehad om plek te maak vir glase wat daagliks in gebruik is en maklik bereikbaar moet wees. Dit het ook sommer plek gemaak vir ander houers en ornamente wat ’n staanplek gesoek het. 1 Die ou verf en vernis op die boekrak is afgeskuur en daarna eers goed met spiritus en toe met ’n klam lap skoongemaak. 2 Die agterkant was oop en ek het hardebord laat sny om presies op die agterkant te pas en dit met paneelspykers vasgesit. 3 Alle verfprodukte is van Granny B’s Old Fashioned Paint…

MOEILIKHEIDSGRAAD: ★ BENODIGDHEDE ELLE PURE GOLD (100 g) Seunserp 1 bal elk DK in Stonewash, Sage, Bark klein stukkie wit 4 mm-sirkelnaalde 4 mm-hekelnaald Meisieserp 2 balle Chunky in Lily 6 mm-naalde onderskeidelik 5.5 mm-hekelnaald GROOTTE Seunserp: 160 cm X 22 cm Meisieserp: 160 cm x 20 cm AFKORTINGS aw = aweregs ms = mossteek (Ry 1: *r1, aw1, herh van * tot einde. Ry 2: aw die r-ste en r die aw-ste) r = regs PATRONE SEUNSERP Met 4 mm-naalde en Sage stel 280 ste op. 1ste ry (RK): ms22, aw1 (voulyn), ms tot laaste 23 ste, aw1 (voulyn), ms22. 2de ry: ms22, r1, ms tot laaste 23 ste, r1, ms22. Herh laaste 2 rye nog 3 keer. Ry 9: met Bark, aw23, r tot laaste 23 ste, aw23.…

VERSKIL TUSSEN NARSIS, PSIGOPAAT EN SOSIOPAAT Ek dink ek is ’n sosiale mens en ’n ekstrovert. Van my vriende word egter deur ander as verdag beskou. Ek word teen hulle gewaarsku, maar hulle het my nog geen kwaad aangedoen nie. Ek skat dis omdat ek heeltyd vir hulle geld leen. Hoe onderskei mens tussen ’n narsis, ’n psigopaat en ’n sosiopaat sodat ek net gewaarsku is? Jou identiteit gaan bepaal word deur by wie jy gemaklik, veilig of verward voel. ’n Sielkundige kan jou help om jou eie identiteit uit te klaar. ’n Narsis beskou hom/haarself as belangrik. ’n Sosiopaat en psigopaat is tipiese regsterme verwysend na persoonlikheidsteurnisse wat in sielkunde deel van “anti-sosiale persoonlikheidsversteurings” uitmaak. Wanneer jy ’n sielkundige konsulteer, kan jy gerus meer oor die onderskeie persoonlikheidsteurnisse uitvra.…

Die fliek Flatland wat binnekort uitgereik word, gaan oor Natalie (Nicole Fortuin) wat haweloos is nadat haar ma gesterf het. Die klein Karoodorpie waar hulle woon, het nie veel geleenthede nie en sy trou met die polisieman Bakkies Bezuidenhout (De Klerk Oelofse), wat haar ’n beter lewe beloof. Haar huweliksnag is egter rampspoedig en loop op ’n onbeplande moord uit. Natalie vlug en gaan klop by haar hoogswanger skoolvriendin, Poppie (Izel Bezuidenhout), aan en saam kies hulle twee te perd koers oor die vlaktes. Johannesburg wink, want Poppie se kind se pa is daar en hulle glo alles sal regkom as hulle hom opspoor. Hul pad kruis egter met kaptein Beauty Cuba (Faith Baloyi) wat wil bewys dat haar voormalige verloofde nie skuldig is aan die moord wat Natalie gepleeg…

“Die weer lyk mooi en ek wil buite staan en die wolke dophou. Ek het lanklaas sulke mooi wolke gesien – ek moet gaan kyk! Miskien kom die reën amper.” Dis die versugting van Louise Visser, ’n jong boervrou wat voor haar troue met Jacques nie goed bekend met die Kalahari en sy uiterstes was nie. “Ek kon nog die droogte verdra toe ons almal gehoop het dit gaan dalk oor ’n week reën, maar toe mense sê dit gaan dalk vir ’n jáár nie reën nie, of dit gaan nog lank droog bly, het dit my getref! “Mens vertel jouself heeltyd die wind kan enige tyd begin reg waai, dit kan enige tyd beter word. Miskien staan ek môre op en daar is wolke.” Sy, Jacques en haar skoonouers…

HANNON BOTHMA, oftewel SA se eie Glam Guru, beantwoord tien vrae oor haarsorg. HOE GEREELD MOET JY HARE WAS? Fyn, reguit hare – verkieslik elke dag, maar met ’n soutvrye sjampoe. Lang hare – een of twee maal per week. Baie dik hare – een maal per week. Krullerige hare – een maal per week. Porieuse krulhare, soos etniese haartipes – slegs een maal per maand. IS DIT WAAR DAT PUNTE GEREELD GESNY MOET WORD SODAT HARE VINNIGER KAN GROEI? Dis ’n ouvroustorie dat jou hare vinniger groei wanneer jy die punte sny – jou hare begin by jou kopvel uitgroei en die punte het absoluut niks met die spoed van haargroei te doen nie. Jou hare kan egter gesonder lyk en voel nadat jy die punte gesny het. Ek…

’N WANKELVRYE VERKYKER Mens kan maklik dink ’n verkyker bly ’n verkyker en nie veel kan verander nie, maar met hul nuwe kompakte Techno-Stabi het Fujifilm ander planne. Dit kom met ’n batterygedrewe stabiliseerder, wat met die druk van ’n knoppie van daai ongevraagde geskud as jy lank deur ’n verkyker kyk, ontslae raak. Dit werk soos ’n bom en ek kan maklik sien hoe die Techno-Stabi ’n goeie metgesel vir die wildtuin kan wees. Die Fujifilm Techno-Stabi 12x28-verkyker kos sowat R11 000, wat dit nie die goedkoopste keuse maak nie. Net toe ons begin moeg raak vir slimfone wat almal dieselfde lyk, kom voubare skerms en verander als. Samsung se nuwe Galaxy Z Flip lyk soos ’n geheimsinnige vierkantige blokkie totdat dit na ’n 6,7”-volgrootte-slimfoon oopvou. Maak hom toe…

HEERLIK VIR HONDE Karoo, deel van Montego Pet Nutrition, is nou in ’n nuwe verpakking beskikbaar. Dis wetenskaplik geformuleer om net die beste voedingswaarde vir jou babahondjie, volwasse hond of senior hond te gee. Dit bevat vitamiene, minerale en hoë vlakke van antioksidante en sal in elke hond se smaak val, vanaf R80. www.montego.co.za/products/ *Pryse onderhewig aan verandering Veilige oefenklere Drawwers en fietsryers kan nou hul uitrustings aanvul met Falke se Arm Protectors wat jou arms teen UV-strale beskerm. Dit word ook deur die Kankervereniging van SA goedgekeur. Dit reguleer temperatuur en hou jou arms droog. Dis beskikbaar in ses kleure, meestal neon met weerkaatsende materiaal op die elmboë sodat drawwers of fietsryers maklik op die pad raakgesien kan word. Beskikbaar in verskillende groottes teen ongeveer R270. www.falke.co.za VASGEKNYP Hou…

In die jare tagtig was engele in die mode. Hulle was in boeke, tydskrifte en rolprente. Oral was daar stories oor engele. Voor hulle was dit dinosourusse, daarna was dit vampiere en toe zombies. Nugter weet wat volgende, maar ek voorspel engele gaan terugkeer. As hulle ooit weg was. Jy kan self besluit wat ’n engel vir jou is: ’n wese wat boodskappe tussen die hemel en die aarde dra, ’n onbepaalde entiteit wat jou beskerm, of ’n doodgewone mens wat op die regte tyd daar is wanneer jy nood het. Toe my neef ons verlede jaar in Griekeland besoek, was dit ’n blye weersiens en ’n uitbundige aanganery. Ek het ’n broertjie dood aan daardie sêding van die ou mense wanneer dit plesierig gaan: Van lag kom huil. Toe…

Drie dekades gelede het Johannes Kerkorrel (Ralph Rabie) en die Gereformeerde Blues Band se satiriese Eet kreef die alternatiewe musiekbeweging Voëlvry met ’n meesterlike album gestu. In 1989 het ’n aantal liedjieskrywers protesmusiek geskep wat die establishment in sy spoeg laat verstik en die land laat gons het. Die liedjie op die Eet kreef-album is egter deur die Suid-Afrikaanse Uitsaaikorporasie verbied, maar dit het deur middel van konserte kultusaanhang verwerf. Daardie ikoniese liedjies weerklink nou weer met amper skrikwekkende relevansie in 2020 op die digitale album Eet kreef herleef. Laudo Liebenberg (van aKING) span met van die vaardigste rockmusikante saam vir ’n herinterpretasie van daardie album. Die groeplede wat saam met Laudo op die album speel, is Frank Freeman (kitaar en sang), Schalk van der Merwe (baskitaar), Etienne van Rooyen…

Sommige tuiniers verkies om hul blomplantjies as saailinge in plantkissies by die kwekery te koop eerder as om self jaarplante te saai. Daar is nie fout daarmee nie, maar dit is duur om só tuin te maak. Een klein pakkie blomsaad kos tussen R18 en R24, en na gelang van die tipe saad (groot of baie klein) kan jy tot 600 sade per pakkie kry, soos in die geval van Namakwalandse madeliefies. Tweedens sal jy ook ’n groot verskeidenheid plante misloop. Baie winter- en lenteblommende jaarplante kan net direk gesaai word omdat hulle nie raklewe in ’n bakkie het of oorplant goed oorleef nie. Mooi blomgesiggies soos vergeet-mynietjies, strandviooltjies, Namakwalandse madeliefies, bokbaaivygies, Shirley-papawers, skeefblomme, Kaliforniese papawers, koringblomme, duiwel-in-die-bos (nigella), nemesias, weeskindertjies en godetias is voorbeelde hiervan. RIGLYNE OM DIREK TE…

Randse Skou Dis weer amper tyd vir die gewilde Randse Skou. Besoekers kan talle stalletjies sowel as kinderaktiwiteite, kos en vermaak verwag. Die skou word vanjaar van 8 tot 13 April by die Johannesburgse Eksposentrum, Nasrec, gehou. Kaartjies kos R150 per volwassene en R80 per kind. Goedkoper kaartjies is voor 31 Maart aanlyn beskikbaar. Besoek www.randshow.co.za FLIEKTYD BY NEDERBURG Die Nederburg-landgoed in die Paarl bied weer op Saterdag 4 April ’n opelugfliek aan. Die fliek La La Land gaan op die groot skerm in die landgoed se lieflike tuin wys. Jy kan heerlike kos en drank daar koop. Hekke open om 17:00. Koop kaartjies via www.thegalileo.co.za Manne-aand Die CVO-skool Dankbaar in Bloemfontein hou op 3 April ’n Manne-aand. Die bekende kunstenaar Thys die Bosveldklong tree daar op en potjiekos is…

Teiken Hoeveel woorde van vier (4) of meer letters kan jy uit die gegewe letters saamstel? Elke letter in die rooster mag net een keer in ’n woord voorkom. Elke woord moet die letter in die ingekleurde blokkie bevat en daar moet minstens een woord met nege letters wees. Meervoude, verkleinwoorde, eiename, woorde met koppeltekens en uitheemse woorde tel nie. (Die stamwoord vir elke woord is in die Verklarende Afrikaanse Woordeboek, HAT en/of WAT). TEIKEN: 16 woorde, goed 20 woorde, baie goed 26 woorde of meer, uitstekend OPLOSSING: Aartappel, apteraal, apetaal, prelaat, trappel, altaar, lapper, palrat, tappel, lepra, palet, papel, parel, plaat, plaer, praal, ratel, reaal, laer, lapa, paal, palp, plat, plet, real, taal Koderaai Elke syfer verteenwoordig ’n letter van die alfabet. Om mee weg te spring, is 3…

How to Raise a Man is moderne ma’s se gids oor hoe om ’n tienerseun groot te maak. Dis deur ’n ouerskapkenner geskryf wat jou met hierdie praktiese gids sal help om jou seun groot te maak om ’n goeie man te word. www.penguinbooks.co.za 3 lesers kan die boek wen. SMS RAI SE gevolg deur jou naam, van en adres voor 1 April 2020 na 48410. SMS’e kos R1,50 en is net vir mense in SA. Geld word vir foutiewe sleutelwoorde gehef en gratis SMS’e geld nie. Bepalings en voorwaardes: Deur vir hierdie kompetisie in te skryf, gee jy Caxton-tydskrifte die reg om ander Caxton-tydskrifaanbiedinge aan jou te bied.…

Doen jouself ’n guns en google die naam “Ewan Strydom”. Mamma Mia, is al wat dié tannie kan sê. Mooi was inderdaad nog nooit lelik nie. Ek terg hom en sê ons moes liewer die onderhoud op Kampsbaai se strand gedoen het. “Ons kon, ja,” antwoord hy met ’n knipoog, “ek sou selfs my Faf-broekie aangetrek het.” Die laaste ding wat jy verwag is dat Ewan Strydom ’n plat-op-die-aarde-ou is. Hy’t immers genoeg rede om lekker windgat te wees, maar nie meneer Strydom nie, hy’s selfs vroeg vir ons afspraak. By tye spot hy met homself, praat openhartig oor hoe skugter hy as kind was en wonder steeds wat hy gedoen het om soveel seëninge te verdien. Eerste op die agenda is sy werk as radio-omroeper. “Ek is ’n nuweling…

BASIESE VELOUTE BESTANDDELE 30 ml (2 e) botter30 ml (2 e) koekmeel375 ml (1½ k) hoenderaftreksel METODE 1 Smelt botter in groot kastrol.2 Roer koekmeel by en laat stadig oor matige hitte verbruin.3 Giet warm aftreksel bietjie vir bietjie by koekmeelmengsel en roer goed ná elke byvoeging.4 Bring tot kookpunt en geur met sout en peper. HOENDERPASTA 4 porsies BESTANDDELE 500 g penne-pasta4 hoenderborsies, in repies gesny15 ml (1 e) hoenderspeserye1 ui, gekap5 ml (1 t) fyn knoffel750 ml (3 k) veloutesous5 00 ml (2 k) cheddarkaas, gerasper250 g (1 pakkie) ertjies METODE Stel oond op 180 °C. 1 Kook pasta in borrelende water met sout.2 Geur hoender met speserye en braai in bietjie olie tot goudbruin. Hou eenkant.3 Braai ui en knoffel tot sag. Roer veloute en 250 ml…

In die ruie tuine stap ons oor houtbruggies, verby slapendes in houtvillas met lae grasdakke en groot stoepe. Ons is flou. Die bagasie is gelukkig reeds in ons kamer. Die hotelklerk wil nog verduidelik van die TV en WiFi, maar ons stel in niks anders as die bed belang nie. Die hitte, vlugte en lang sit en wag op die lughawe het ons uitgemergel. Niks kon ons op die gesig die volgende oggend voorberei nie: Uit ons kamer is daar trappies na die lang swembad wat tussen al die villas deur kronkel. Links van ons stoepie staan twee dekstoele met geel en wit handdoeke op ons eie privaat tuintjie met die meer as skilderdoek voor ons. In die verte is twee ou ooms besig om hul nette reg te maak,…

Londen se Serpentine-galery in Hyde Park is in 1970 geopen met die spesifieke oogmerk om ’n ruimte te bied vir interdissiplinêre en samewerkingsprojekte wat dissiplines buite die visuele kunste insluit – soos argitektuur, ontwerp, mode- en ook digitale ontwerp. Dié galery is in die tee-paviljoen (iets soos ’n kiosk) ingerig wat James Grey West ontwerp het en in 1933/4 opgerig is. In 2000 het die galery met die kreatiewe krag van die Sri Lankaans-Britse argitek Cecil Balmond ’n projek begin wat op argitektuur in die vorm van tydelike paviljoene fokus. Elke jaar word ’n vooraanstaande internasionale argitek of ontwerpgroep wat nog nie voorheen ’n gebou in Engeland opgerig het nie, genooi om ’n tydelike somerpaviljoen op te rig. Die paviljoen moet binne ses maande op die grasperk buite die galery…

ROL PRENTE ADOPT A DADDY 7/10 Met Franck Gastambide en Melisa Sözen Regisseur Xavier de Choudens KOMEDIE Die titel klink dalk verdag. Die oorspronklike Franse titel is Damien veut changer le monde, ’n Franse komedie met romantiese ondertone en onderskrifte. Maar moenie dat daardie titel jou afsit nie. Dit kan nie as ’n kunsrolprent bestempel word bloot omdat dit Frans is nie, hoewel dit vermoedelik by Cinema Nouveau gaan wys. Dit gaan oor ’n gespierde, aantreklike losloper (die sexy kaalkop Franck Gastambide) met ’n persoonlikheid so groot dat hy nie net uit sy T-hemde nie, maar ook uit die skerm bars. Sy tydsberekening is fyn en sy karakterisering raak, want hy vertolk die rol van ’n vrygesel wie se pad met ’n onwettige immigrant en haar kind kruis. Hy trou…

“Afrikaans is ’n lewende kultuur wat gedurig aanpas en verander. Dis ’n kultuur met soveel fasette en ’n taal wat eintlik jonk is en steeds ontwikkel en groei. Dit is lewend in soveel mense se monde en is ’n vrye taal. Ek dink net nie mens moet laer trek om Afrikaans nie, dis ’n taal wat saam met al die ander wonderlike tale van Suid-Afrika moet leef,” meen Hugo Theart, die artistieke direkteur van Kunste Onbeperk. “Mense kan met oorgawe kom fees en dit hoef nie hul bankbalans te breek nie! Ons bied soveel gratis vermaak en inhoud aan dat almal werklik aan die fees kan deelneem. Ons hou ook ons kaartjiepryse billik. Ons wil die beste tyd moontlik aan feesgangers gee met iets vir ’n ieder en ’n elk.…

Om met Daan Botha te trou of nie? Hy is nie onaansienlik vir ’n man van 70 nie en is ryklik met aardse goed geseën. Maar tog … As sy net nie daardie dekselse boodskap op hul hoërskool se WhatsApp-groep gelees het nie: Gilbert Cronjé het twee jaar gelede al, ná sy vrou se dood, sy mediese praktyk verkoop en hy trek nou terug Bloemfontein toe. Op die koop toe is dit vandag 14 November, haar verjaardag, en Mark Phillips en prinses Anne se troudagherdenking. Sou Gilbert nog hul belofte aan mekaar onthou? “Hoe lank wil Ma nou nog dink? Oom Daan gaan nie vir ewig wag nie, julle is nie meer vandag se kinders nie.” Haar skoondogter kyk haar met kwalik bedekte ongeduld aan. Esti wil haar vererg, maar…

Veronderstel die volgende: In jou hand hou jy ’n bruinpapiersakkie. Binne-in die sakkie is die lewe van iemand anders. Jy het vandag die kans om jou lewe met dié van daardie persoon wat jy nog altyd beny het, bewonder het en heimlik op jaloers is, te ruil. Daardie persoon het die mooi huis, die spoggerige motor, die hoë pos, die mooi vrou, die romantiese man, die voorbeeldige kinders, die mooi lyf, die baie vriende of die vakansiehuis waarna jy smag. Jy kan dié lewe kry! O, ek het vergeet om te sê dat as jy die pakkie vat, dan vat jy die héle pakkie. Saam met die pakkie kom die man wat sy vrou verbaal afkraak, daar waar niemand hoor nie; saam met die pakkie kom die vrou wat belangstelling…