Innholdsfortegnelse for 6 September 2019 i Vrouekeur

Ons leef in ’n era van “wat is daarin vir my?”. Dit gee my die piep. Dit pas in die neoliberalistiese kultuur waar die sogenaamde bottom line die nuwe evangelie geword het. Profyt is die belangrikste oogmerk vir maatskappye en in die proses word werknemers se welstand dikwels ingeboet. Hier sluit ek mense soos sir Richard Branson uit wat sedert sy klein begin jare gelede nooit uit die oog verloor het dat mense menslik behandel moet word nie. Ek stem saam met sy ingesteldheid: Train people well enough so they can leave, treat them well enough so they don't want to Die beheptheid met profyt word so deel van mens se lewe dat jy maklik perspektief en in die proses ook jou medemenslikheid kan verloor. Dis hoekom vrae soos “wat…

KOOP DIT HIER Forever New www.forevernew.co.za, MrP www.mrp.co.za, Woolworths www.woolworths.co.za, Zara www.zara.com/za…

Maria vertel trots dat sy ook twee vriendinne, Lorraine en Maria Tlama, gehelp het om te begin boer deur vir hulle saad en toerusting vir die eerste jaar te skenk. Vir haar susterskind, Justin Mswele, het sy 8 ha-katoen geplant om mee te begin boer. “Jou geslag maak nie van jou ’n goeie boer nie. Enigeen kan begin boer. Ander vroue het al gesê hulle sien ek geniet die boerdery en dat ek vooruitgaan. Dis egter harde werk. Selfs in die wintermaande moet ons vroegdag op die plaas wees vir pluk, sorteer en verpak.” Het Maria enige voorvereistes vir werkers? “Hulle moet stiptelik en hardwerkend wees en elke dag opdaag.” Sy vertel meer oor ’n paar fynere kunsies van haar boerdery. “Ons pluk die katoen met die hand. Dit word…

Twee jong Kapenaars is nie net beste vriendinne nie, maar het ook die uitsonderlike prestasie behaal dat hulle albei as die beste ter wêreld aangewys is vir ’n vak wat hulle in matriek gedoen het. Albei het verlede jaar aan Reddam House in Durbanville gematrikuleer en albei het vier vakke op die gevorderde AS-vlak in die internasionale Cambridge-eksamen afgelê. In een van hierdie vakke het hulle albei ál die Cambridge-leerders wêreldwyd uitgestof. Die toekenning laat haar voel asof al haar harde werk in matriek beslis die moeite werd was, sê Rizqah Hassiem (18), tans ’n eerstejaarstudent in aktuariële wetenskap aan die Universiteit Stellenbosch (US). Verlede jaar het ’n ander leerder in hul skool hierdie einste toekenning verwerf. Toe hul wiskunde-onderwyser, Rolien van der Merwe, sê iemand in hul klas moet…

HOENDERTOSTADA 4 porsies 2 hoenderborsies, gaar en gevlok125 ml (½ k) mayonnaise8 klein of 4 groot tortillas, liggies gerooster2 avokado’s, geskil en gesnysuurloensap, na smaaksout en peper200 g (1 pakkie) klein tamaties, gekapknypie brandrissievlokkiesknypie fyn komyn100 g (1 pakkie) jongblaarslaaiblaartjies250 ml (1 k) gerasperde cheddarkaasvars koljander vir bo-op 1 Meng gevlokte hoender en mayonnaise.2 Skep hoender op tortilla, gevolg deur avokado met bietjie suurlemoensap bo-oor gesprinkel.3 Meng klein tamaties met geurmiddels en skep ook op hoender.4 Sit blaarslaai, kaas en koljander boop en sit dadelik voor. WENK ’n Tostada is ’n gebraaide of geroosterde tortilla met vulsels bo-op. Hierdie resep is baie maklik en jy kan kreatief raak met die bolaag KAAS-EN-STEAK-BROODJIE 4 porsies 1 ui, gekap300 g steak, in repies gesny7,5 ml (1 ½ t) rooivleissout60 ml (¼ k)…

Homeros, die digter van die Illias en die Odussee, het dié Turkse kusstrook as “’n land van ewige blou” beskryf. Die Grieke het die strook as Ionië geken en vandag praat mense van die Turkooiskus of die Turkse Riviera. Bodrum, in die baai wat die Egeïese See met die Middellandse See vorm, was in die antieke tyd die belangrike hawe en sakesentrum Halikarnassus. Sy beroemdste inwoner was die historikos Herodotus, wat rondom 457 VHJ daar was. Bodrum se inwoners dink aan hul dorp as “die pêrel van die Egeïese See” waarheen vakansiegangers elke somer stroom. Internetfoto’s van Bodrum wys blinkgesmeerde lywe op strandstoele, seekos en hotelle op privaat strande. Dit lyk onbereikbaar luuks, maar met ons datums nog ietwat duskant die seisoen, kry ons ’n hotel op die strand met…

DIÉ PAARTIE IS GROOT Die sanger-liedjieskrywer Deon Laubscher, oftewel die blonde reus Deon Groot, se gelyknamige album (Universal) het reeds twee gewilde treffers, Wyn en Sweer, opgelewer en boer geil op verskeie radiostasies se trefferparades. Dié album verweef vurige romanse en kontreiklanke met smeulende ritmes en snaarkaperjolle. Deon het, hier en daar in samewerking met Louwrens Bezuidenhout, nege van die 11 liedjies op die album geskryf. Dié liedjies spog met daardie kenmerkende Namakwalandse klank, maar met kreunende rockkitare geboender. Die verwerkers, regisseurs en musikante hierop is Jake Odendaal, Thinus Odendaal en Danny Smoke. Deon se hoofdoel is om waardering vir goeie melodieë en eerlike lirieke te skep, om te vermaak, om jou te laat dans en te laat kuier, om jou te laat gesels en peins. Hy slaag knáp daarin.…

Daar word na hom as die “rebel van klassieke musiek”, as “enfant terrible” en selfs as “punk op die podium” verwys. Maar al dié benamings – en ook beskrywings soos “narsisties” en “anargisties” – is water op ’n eend se rug vir Teodor Currentzis, die dirigent wat wyd rocksterroem verwerf. Die 47-jarige Currentzis, wat in Athene, Griekeland, gebore is, was tot onlangs die artistieke direkteur van die staatsopera en balletteater in Perm, sowat 1 200 km oos van Moskou op die grens van Siberië. Kaartjies vir konserte wat hy dirigeer, verkoop soos soetkoek en Wladimir Poetin is een van sy aanhangers. Sy salaristjek in Perm verlede jaar was iets soos R4,2 miljoen. In 2004, hy was toe 32 en nog musiekdirekteur van die Novosibirsk-staatsopera en -orkes, het hy die ensemble…

“Praat, Mevrou,” sê Freek Venter, “en moet om liefdeswil niks uitlaat nie.” “Kom sit almal hier by die tafel, asseblief.” Dis Ben se bedaardheid wat tot die vroue deurdring. Arnold bly styf eenkant staan. Toe sy en Mia by Ben en die speurder gaan sit, sê Fienie: “Ek het eergisteraand iets aan die baba opgemerk wat ek miskien dadelik vir jou moes gesê het, Mia.” “Wat?” fluister-vra Mia. Fienie vou haar beaarde hande op haar skoot inmekaar. Haar grysblou oë is rooierig en oneindig droef. “Wag, ek moet eers bieg. Ek … het destyds vir jou pa gejok. Ek wou hom nie met my probleme belas nie.” “Watse probleme?” Mia voel Freek Venter se speurende blik afwisselend op haar en Fienie. “Ek het hom net van my seun in Londen vertel.…

MOEILIKHEIDSGRAAD: ⋆⋆⋆ SPESIALE NOTAS Weefhekelwerk is tans wêreldwyd baie gewild. Dit staan onder meer as ‘Wacky Weave’, ‘Interlocking Crochet’, ‘Double Filet’, ‘Interweave’ en ‘Intermesh’ bekend. Dis nie dieselfde as ‘Mosaic Crochet’ nie. Vir hulp, of om die tegniek te leer, sluit by ons Facebook-groep Vrouekeur Brei en Hekel aan. BENODIGDHEDE 3,50 mm-hekelpen3,00 mm-hekelpen Colourspun Merino Sock: * 14 balle Natural* 12 balle Grys Alternatief: Elle Gold 4-draad in twee kontrasterende kleure * 7 balle van kleur 1* 6 balle van kleur 2 AFKORTINGS EN STEEKVERDUIDELIKINGS ks – kettingsteek * kb – kortbeen * lb – langbeen * lba – langbeen agter * lbv – langbeen voor * hlb – halflangbeen * st – steek * sxso – slaan x aantal steke oor Fondasie Foto 1 Plaas jou A-traliewerk met die…

Deur XWord Vir navrae navrae@xword.co.za Besoek www.xword.co.za WEN R1 000! Voltooi die blokraai en gebruik die omkringde letters om die versteekte woord of naam te ontsyfer. Leidraad: Bepaalde afstand wat die Israeliete toegelaat was om op die heilige rusdag van een plek na ’n ander gaan SMS jou antwoord, voorletters, van en dorp/stad voor of op 25 September 2019 na 48410. SMS’e kos R1,50 en is net vir mense in SA. Geld sal vir foutiewe antwoorde gehef word en gratis SMS’e geld nie.…

Ek wonder hoe groot Deon Opperman en Janine Neethling se kaggelrak is vir al die Woordtrofeë, Kannas, Fiëstas, Hertzogpryse en ander beeldjies en sertifikate wat hulle oor die jare ingepalm het. Ek onthou hoe ek ’n paar maande terug hul produksie Afrikaan op Stellenbosch gesien het. Janine het aan die linkerkant van die donker verhoog op ’n klein platform met haar klawerbord voor haar gesit. Elke noot in die vertoning was haar geesteskind. Daar was verskeie musikante, sangers, ’n koor en allerhande instrumente wat jou na Afrikanagte onder die sterre meegevoer het. Ons ontmoet mekaar vir koffie en koekies en gesels. Oor Afrikaan, oor die lewe saam, ouerskap, hoop en vrede. Afrikaan was nie hul eerste saamwerkpoging nie. Hul vorige musiekteaterproduksie, Die skepping – ’n Oratorium, waarvoor Deon die libretto…

“Dis so maklik om hoop te verloor. In Oktober 2016 het ek nie meer hoop gehad nie. Nie vir my huwelik, my kinders, my onderneming of vir my land nie,” vertel Burre Burger. Soos hy tereg sê, is droogte nie die maklikste natuurverskynsel om teen terug te baklei nie. “As daar oorstromings is, kan ons met padskrapers en trekkers die paaie regmaak, maar daar waar die droogte sy merk los, maak jy moeilik reg.” Dis hierdie mistroostige omstandighede wat hom swartgallig gemaak het. “Jy lê en bid snags dat die Here jou moet kom haal, want jy is te bang jy pleeg selfdood. Jy smeek Hom vir ’n hartaanval of sommer iets ergers. Jy wil nie meer nie. Alles is swart.” Selfs behandeling op doktersaanbeveling in ’n kliniek vir geestesgesondheid…

In 2017 was Maria, as deel van ’n ontwikkelingsprogram van die departement van landbou, drie maande lank in China om te kyk hoe hulle mieliegewasse verbou. “Dit was die eerste keer dat ek gevlieg het. In daardie tyd het ek baie oor mielies en verskillende gewasse asook geneties aangepaste gewasse geleer. Die Chinese werk hard en ek het daar geleer hoe om plante met plastiekbedekkings kunsmatig te verhit. “Ek het al ’n reuseverlies op grond van 40 ha gely. Tydens die katoenopleiding in China was ek nie op die plaas toe daar geplant is nie en daar was klimaatsveranderinge wat planttyd verskuif het. Verder het diere soos bokke, beeste en ape as gevolg van ’n toesigtekort van die saad geëet. “Een van my grootste prestasies is dat ek my eie…

SEPTEMBER-WENBOEKE September-wenners wen twee Romanzas met die komplimente van LAPA Uitgewers: In Sophia Kapp se Tweede kans op geluk gaan Nanette terug na haar skoonouers se plaas, Geluk, maar dinge is nie hoe sy dit onthou nie. Haar seer en swaarkry is eg, maar is dit net een kant van die storie? Ontstig ontdek sy dat haar swaer, Barry, wat sy maklik kon afmaak as ongevoelig, iemand is wat weet wat die liefde is en hoe diep dit kan reik. Hartsbesit deur Anna van Tonder is ’n SuperRomanza met Minni Minnaar as die hoofkarakter. Sy verloor haar onderneming en haar vriendin nooi haar om op haar ouers se plaas te gaan kuier terwyl sy haar lewe in oënskou neem. Hier ontmoet sy vir Zak Erasmus, ’n aantreklike boer, maar dis…

SOETE SLAAP Vencasa Velfont se matrasbeskermer maak gebruik van gevorderde tegnologie wat die materiaal as ’n buffer teen temperatuurverskille en humiditeit laat dien. Dit absorbeer, stoor en stel hitte vry wat ons liggame uitstraal. Dit sorg dat jy nie té koud of té warm sal kry nie. Dit is ook vir matrasse tot 200 cm lank beskikbaar, R1 599. www.vencasa.co.za MAAK JOU EIE SOUS Maak jou eie souse met Betty Bossi se oulike sousmaker, van mayonnaise tot hollandaisesous. Die unieke ontwerp sorg dat jou sous tot net die regte dikte gemeng word. ’n Resepteboek word ingesluit, R599. www.yuppiechef.com MAAK DIT REG Neem hierdie oulike selfdoenherstelboksie saam met elke fietsrit wat jy aanpak. Die gereedskap sluit allensleutels, gom en vele meer in om van ’n pap band tot ’n fietsketting te…

ROLPRENTE BACK OF THE MOON 9/10 Met Richard Lukunku en Moneoa Moshesh Regisseur Angus Gibson WARE LEWENSDRAMA Op die vooraand van die sloping van Sophiatown in 1958 veg twee misdaadsindikate teen mekaar met ’n sangeres as dobbelsteen in die middel. Die rou werklikheid waarmee Angus Gibson die waarheid oor bendegeweld oopvlek, die rol wat liefde tussen al die onheil en korrupsie speel, die woede oor mense wat uit hul huise gesit word en die pragtige jazz-musiek wat in hierdie tyd gemaak is, kom als voor in hierdie briljante Suid-Afrikaanse drama. Niks word versoet nie. Die waarheid word nie polities korrek opgetert nie. Die manier waarop die platstoot van Sophiatown rampokkers, maar ook die gewone mens, se lewe verander het, word met briljante aanvoeling uitgebeeld. ’n Waarskuwing: Kru taalgebruik, eksplisiete seks,…

Weskusdorpies en stories oor vissers was vir ’n groot deel van die 20ste eeu ’n gewilde agtergrond vir populêre fiksie. Meestal is die bestaan op hierdie dorpies geromantiseer en het die gekrys van seemeeue die agtergrond van ’n liefdesverhaal gevorm. Skooloperettes en radiovervolgverhale het dikwels teen ’n romantiese Weskusagtergrond afgespeel. Meg Vandermerwe se tweede roman, Die vrou van die klippesee, speel ook in ’n Weskusdorpie af. Maar van ’n romantisering van ’n eenvoudige vissersbestaan is daar nie sprake nie. Die lewe is hard. Tik, drankmisbruik, ekologiese kwessies en armoede kry baie aandag. Die taalgebruik is veel realistieser as in ou romantiese Weskusverhale. Hendrik is ’n 45-jarige kreefsmous wat veel ouer lyk weens sy intieme verhouding met goedkoop wyn. Hy het kwaai begin drink nadat sy veel jonger vrou, Rebekkah, sommer…

Hanri van Zyl en haar twee dogtertjies, Mia (6) en Nina (3), bly die afgelope ses maande op Caledon in die Overberg. Hanri het met slim planne ’n enkelmotorhuis en een kamer van haar ouerhuis in ’n knus huis vir dié drietal omskep. “Ek wou ’n gemaklike, kleurryke tuiste vol warmte vir ons skep. Dit was belangrik dat ons elkeen ons unieke plekkie kon hê wat ons eie persoonlikheid weerspieël,” vertel sy. SKOON SKILDERDOEK Hanri sê sy was bevoorreg om met ’n skoon skilderdoek te kon begin. Sy en haar dogtertjies het alles self gekies en stuk-stuk het alles bymekaargekom, tot sy met die uitkoms tevrede was. Haar ouers was van onskatbare waarde en ’n goeie klankbord vir al haar idees. Hulle het saam help beplan en insette gelewer. “Ons…

WIL NIE VAN DOEKE AF NIE My seuntjie word drie, maar wil nog glad nie op die potjie sit nie. Ek is moedeloos. Ek het al alles probeer. Sy tweelingboetie is lankal uit sy doeke. – Moeg vir doeke Oor die algemeen ontwikkel seuntjies bietjie later as dogtertjies. Jou man kan maklik met hulle ’n speletjie speel deur byvoorbeeld die groot boom op die erf te gaan “water gee” en indirek die ander enetjie aanmoedig dat daar vreugde is om dinge uit eie wil saam te doen. Daar is verskeie ander tegnieke waarmee kindersielkundiges kan help. ’n Beloningstelsel is ’n basiese metode, maar dit kan ook wees dat hy daarvan hou dat almal aan sy behoeftes voldoen. BEENHARE LAAT MY GRIL My meisie is beeldskoon, fyn en vroulik, maar weier…

In Kaap, kerrie & koesisters neem die tweelingsusters Fatima en Gadija ons op ’n tradisionele Kaaps-Maleise kosreis. Die susters glo aan lekker huiskos en resepte wat vinnig, maklik en bekostigbaar is. www.nb.co.za 3 lesers kan die boek wen. SMS KERRIE gevolg deur jou naam, van en adres voor 11 September 2019 na 48410. SMS’e kos R1,50 en is net vir mense in SA. Geld word vir foutiewe sleutelwoorde gehef en gratis SMS’e geld nie. Bepalings en voorwaardes: Deur vir hierdie kompetisie in te skryf, gee jy Caxton-tydskrifte die reg om ander Caxton-tydskrifaanbiedinge aan jou te bied.…

Dis ’n wyle sedert ek laas ’n onderhoud met Johan Scholtz gevoer het, daarom is dit seker nie vreemd dat ons allereers by die onderwerp van ouderdom vashaak nie. “Die tyd vlieg so vinnig, dis eintlik ontnugterend,” sug die 58-jarige akteur. “Hulle sê mos 50 is eintlik die oudag van die jeug en die jeug van die oudag, jy weet nie meer waar jy inpas nie. “Toe ons 50 slaan, het ek en Deon (Opperman) gesels. Ons het daaroor gepraat dat van die grootste komponiste en skilders eers ná hul vyftigs hul beste werk gelewer het. Só het ons mekaar maar gemotiveer,” grinnik hy droogweg, “Nou praat ons oor die weer. “Die cliché is tog ‘your greatest wealth is your health’ maar ai, man, dis bitter om te sien hoe…

Die kwessie van moraliteit in ons nuwe wêreld word ook toene mend onder die loep geneem. Ontwikkelaars van kunsmatige intelligensie moet vrae soos die volgende in ag neem: Moet jou bestuurderlose motor ’n hoër premie op jou lewe plaas as op dié van ’n voetganger wanneer ’n ongeluk onafwendbaar is? Mag jou Fitbit-data in ’n hof teen jou gebruik word? Mag ons toelaat dat hommeltuie die nuwe paparazzi word? Mag ’n menslike geen gepatenteer word? Amerika se Carnegie Mellonuniversiteit het onlangs ’n nuwe sentrum wat die etiek van kunsmatige intelligensie bestudeer van stapel gestuur. President Obama het ’n Withuis-studie oor dieselfde onderwerp gepubliseer en tegnologiese reuse soos Facebook en Google het aangekondig dat hulle met die opstel van ’n etiese raamwerk vir die ontwikkeling en gebruik van kunsmatige intelligensie besig…

Navorsing oor die gesondheid van eiers in die dieet al dan nie, hou al jare aan. ’n Onlangse studie wat in die joernaal Circulation gepubliseer is, bevestig vroeëre studies dat daar geen verband tussen eierinname en kardiovaskulêre risiko is nie, en dat dit selfs ’n klein afname bewerkstellig. In die studie deur die Oxford-universiteit, wat die data van 400 000 vroue en mans in Europa oor 12 jaar geanaliseer het, word die risiko vir koronêre hartsiektes verhoog deur die inname van rooi-en geprosesseerde vleis en dat die risiko afgeneem het met die inname van jogurt, kaas en eiers. Eier is baie meer as cholesterol en kan ’n positiewe effek op kardiovaskulêre gesondheid hê. Die effek van fosfolipiede is kompleks en verg meer navorsing, maar die fosfolipiede in eiers kan glo…

As klein dogtertjie in die Rathoke-nedersetting sowat 40 km van Marble Hall, was boerdery waarskynlik een van die laaste beroepe waaraan Maria Swele (38) gedink het. Sy het haar skoolloopbaan hier begin, in 1992 na Matlerekeng verhuis en in 2002 aan die Rephafugile-hoërskool gematrikuleer. Maria, een van vyf kinders, was die jongste en was maar een jaar oud toe haar pa oorlede is. Haar ma, Lettie, het as huiswerker in Marble Hall gewerk. “My broer, Sam Mathlala, het rondom 2004 in boerdery begin belangstel toe hy as direkteur op die plaas van Frans Malela begin werk het. Ek het ook daar van boerdery begin leer en besef dat ek baie lief daarvoor is. Frans het vir my 4 ha se sonneblomme geplant. Met die geld wat ek op dié 4…

BIO-DINAMIESE HERKOMS Waterkloof se Circle of Life White 2016 vertoon beide die sagter hand in die kelder en ’n groener aanslag en is ’n sprekende voorbeeld van die wyne wat ekovriendelike boerderypraktyke kan oplewer. Die grond is chemikalieëvry en word deur plantekstrakte, fungi en bakterieë van die plaas se eie organiese kompos gesond gehou. Om getrou daaraan te bly om wyn so natuurlik as moontlik te maak, word geen byvoegings soos suur of ensieme toegelaat nie. Die versnit bestaan uit 67% sauvignon blanc, 29% chenin blanc en 4% semillon, R160. www.waterkloofwines.co.za VAN WAAR, GEHASI? Sekere streke is bekend vir sekere kultivars. www.winefolly.com VRUGTEGEURE VIR DIE LENTE Boplaas Cape Portuguese White Blend 2018 se druiwe (sauvignon blanc en chardonnay) word vroegoggend met die hand gepluk. Dit word in temperatuur-beheerde vlekvryestaaltenks gefermenteer…

VYFSTERKOEKIES 16 koekies 1 boks (200 g) Nuttikrust-koekies500 ml (200 g) fyn klapper2,5 ml (½ t) kaneel1 blik (385 g) kondensmelk5 ml (1 t) vanieljegeursel1 groot blok (135 g) Aero-sjokolade Voorverhit oond tot 180 °C en spuit vierkantige koekpan van 20 cm met kleefwerende sproei. 1 Kap koekies fyn tot krummels.2 Meng koekies, klapper, kaneel, kondensmelk en vanieljegeursel tot goed gemeng. 3 Skep beslag in koekpan en druk met lepel vas. Bak vir 20 tot 25 minute tot goudbruin en gaar. 4 Kap sjokolade in fyn stukke (sonder om omhulsel te verwyder) 5 Haal koekies uit oond en strooi sjokoladekrummels bo-oor. Laat staan vir vyf minute en smeer sjokolade met paletmes glad. 6 Laat stol koekies vir drie uur by kamertemperatuur en sny in 16 netjiese blokke.…

Vroeër vanjaar kom kuier die bekende kinderboekskrywer Jeff Kinney in Suid Afrika. As jy nog kinders of kleinkinders op laerskool het, behoort jy hom te ken – hy is die outeur van die uiters gewilde Diary of a Wimpy Kid-reeks. Tot trae lesertjies (en seuns!) is gek oor sy boeke. Die geheim tot sy sukses is waarskynlik die skreeusnaakse tekenprente wat elke paar sinne die lang teks opbreek. Jeff Kinney het self aandagafleibaarheidsindroom (ADHD) en erken op skool was ’n lang stuk teks in enige boek vir hom vreesaanjaend. “Ek het altyd gedink: As ek dit net tot by die prentjie kan maak, sal ek orraait wees,” sê hy. Kinders oor die wêreld heen stem klaarblyklik saam. Daar is reeds meer as 200 miljoen boeke in dié reeks verkoop. Daar…

Giorgio da Castelfranco, kortweg net Giorgione, was een van die vernaamste skilders in Venesië tydens die Italiaanse Renaissance. Hy is in die geselskap van Michelangelo, Leonardo en Rafael gereken en Vasari het nie twee keer gedink om hom die noordelike eweknie van Leonardo te noem nie. Op ’n manier was Giorgione iets van ’n meteoriet wat asof uit ’n ander kosmiese bestel die aarde vir ’n kort rukkie binnegedring het. Bitter min is oor Giorgio van Castelfranco, ’n dorp in die Veneto naby Venesië, bekend. Hy was ’n lang man – vandaar sy bynaam, Giorgione, groot Giorgio – en in sy kort lewe (1477/’78–1510) het hy ’n nuwe gedaante aan die skilderkuns gegee én het hy ook die skilderkuns ná hom onherroeplik verander. Nie een van sy skilderye dra sy…

Die wel en wee van ’n aantal kleurryke karakters in kyk-NET se bittersoet komedie Lui maar op, Belinda speel op George in die Suid-Kaap af, waar die noodlot hulle by ’n algemene handelaar saamgebring het. Die klein hoekwinkeltjie, met die naam Ian en Ander, behoort aan Ian Jantjies (Duncan Johnson), ’n middeljarige man wat die gejaag van die groot stad vir die vrede van ’n kleiner dorp verruil het. Maar vrede is daar nie, want die drie “ouer” mense wat vir hom werk, maak hom ook grys. Belinda Swanepoel (Brümilda van Rensburg), ’n eertydse Afrikaanse aktrise, is meer voor haar spieëltjie as voor haar kasregister en Annetjie Nel (Annelisa Weiland), ’n militaristiese en konserwatiewe bakster, bemoei haar meer met die winkel se sake as met die koek van die dag.…

Dis laataand toe Thijs de Vries, direkteur van die Bonnefanten-kunsmuseum in Maastricht, by sy hotelkamer in Kaapstad aankom. Hy trek die gordyne van die dak-tot-vloer-vensters wawyd oop. Met sy hande op sy heupe kyk hy oor die stad se duisende vensters uit, sommige donker en ander deurstraal met lig. Snags lyk stadsvensters vir hom soos klein vistenkies wat opmekaargestapel is. Binnekant swem vreemdelinge heen en weer, hul privaatheid blootgestel vir ander wat kan sien, maar nie kan indring nie. Dit spreek vir hom van ’n onnatuurlike kombinasie van isolasie en blootstelling wat soos ’n digte web ineengeweef is. Vanaand voel hy vasgevang in daardie web. Hy gaan sit op die bed en tik ’n teksboodskap: Kara, ek is in Kaapstad. Ek het van jou werk in Zeitz MOCAA gesien. Dis…

Plant dit nou Kry die vrolike impatiëns vandeesmaand in die grond. Loer na die nuwe Beacon-impatiëns (Impatiens walleriana) wat ’n weerstandigheid teen muf bied. Plant in vrugbare, goed dreinerende grond in skadu of gedeeltelike skadu. Dis ook perfek vir mandjies, vensterbokse en ander houers, maar sal gereeld water benodig. Ek hou van tuinmaak – dis ’n plek waar ek myself vind as ek myself wil verloor– Alice Sebold WAT SAAI EK IN SEPTEMBER? Life is a Garden sê dis nou die tyd om slaaivoorraad vir die somer in die grond te kry. Dink aan blaarslaai, sprietuie en tamatiesaadjies. Blaarslaai kan in ’n sonnige tuinbedding gekweek word. Die meeste variëteite is vinnig en maklik om te kweek en lewer binne ’n maand of twee ’n oes. Die losblaar-variëteit is die praktiesste,…

Ons woon verlede week ’n kursus by waartydens die aanbieder nie een keer nie, maar ’n paar keer sê: “Jy is die gemiddeld van die vyf mense saam met wie jy die meeste van jou tyd deurbring.” Nadat hy dit die derde keer gesê het, begin ek dink: Miskien moet ek ernstig begin kyk na wie die vyf mense is saam met wie ek die meeste van my tyd deurbring. Diegene in wie se geselskap jy die meeste van die tyd is, is baie belangrik, in die sin dat hulle in ’n groot mate jou sukses bepaal. Daarom is dit so belangrik dat ons tyd saam met mense deurbring wat ons energie gee, ons drome ondersteun en ons nie terughou nie. Skryf die vyf name van die mense neer saam…

Deur XWORD.CO.ZA Teiken Hoeveel woorde van vier (4) of meer letters kan jy uit die gegewe letters saamstel? Elke letter in die rooster mag net een keer in ’n woord voorkom. Elke woord moet die letter in die ingekleurde blokkie bevat en daar moet minstens een woord met nege letters wees. Meervoude, verkleinwoorde, eiename, woorde met koppeltekens en uitheemse woorde tel nie. (Die stamwoord vir elke woord is in die Verklarende Afrikaanse Woordeboek, HAT en/of WAT). OPLOSSING: Korrelkop, koelkop, lokroep, ooprek, oorrek, oproer, pokkel, porrel, kopek, koper, kroep, loper, ooplê, oplek, oprol, poker, pokke, polêr, kelp, klep, klop, koop, krop, loep, loop, oper, oplê, perk, plek, poel, polo, pook, pool, proe, roep TEIKEN: 22 woorde, goed 29 woorde, baie goed 35 woorde of meer, uitstekend Woordsoek Daar is 26 insekte…