Innholdsfortegnelse for 21 September 2018 i Vrouekeur

Stop die wêreld, ek wil afklim, skryf ’n vriend onlangs op sy Facebook-blad. Voel ons nie maar almal soms so nie? Ek dink ons almal vra ook soms die vraag: Is dit nou dit? Ek voel só op Maandae. Klokslag. Op Maandae durf ek nie groot besluite neem nie, want op ’n Maandag beleef ek telkens ’n effense eksistensiële krisis en groot besluite moet mens liefs nie in so ’n gemoedstoestand neem nie. As mens boonop drie weke in Griekeland vakansie gehou het, hunker jy met jou terugkeer na die vryheid, die verandering en die veiligheid wat nog vlak in jou geheue lê. Dan is Maandag die dag wat jy ’n buitegewone drang het om jou tas te pak en daar te gaan woon. Daar waar jy vry was van…

Hartsiektes sluit ’n verskeidenheid toestande in wat weer deur ’n verskeidenheid faktore veroorsaak kan word. Party soorte hartsiektes het spesifieke oorsake, soos rumatiese of aangebore hartsiekte, wat deur infeksie of geboortedefekte veroorsaak word. In die meeste gevalle ontwikkel hartsiektes egter weens geleidelike skade aan die hart en are en normaalweg het hartsiektes dan nie een enkele oorsaak nie, maar is daar verskeie faktore wat saamwerk wat die kans vir hartskade en hartsiektes verhoog. Dié faktore veroorsaak nie direk hartsiektes nie, maar dra tot die ontwikkeling van hartsiektes by. Dit word risikofaktore genoem. Hoe meer risikofaktore daar is, en hoe ernstiger dit is, hoe groter is die kanse dat jy hartsiekes kan ontwikkel. Sommige van hierdie risikofaktore is buite jou beheer en jy kan dit nie verander nie. Dit is egter…

Jong volwassenes is net so geneig om geheime te hê as volwassenes, dalk selfs meer. Vyf van die algemeenste redes vir hoekom tieners geheime het, is: 1 Tieners word soms groot in ’n huis waar die hou van geheime die norm is. 2 Tieners is dalk bang dat hulle hul familie en vriende sal teleurstel as hulle van die geheim weet. 3 Tieners het dalk nie ’n behoorlike ondersteuningstelsel soos vriende en familie waarop hulle kan staatmaak nie. 4 Tieners het nie veel ervaring wanneer dit by die oplos van probleme kom nie. 5 Sommige tieners het ’n oorweldigende skuldgevoel en voel dikwels skaam. Lees meer op www.vrouekeur.co.za BRONNE: https://greatist.com/happiness/secret-keepingharmful-young-adults www.lifecoachcapetown.com/…

WYN, VLEIS EN KOEKSISTERS! Stellenbosch Hills se Local-is-Lekker-biltong-en-wynparing is in 2005 van stapel gestuur. Erfenismaand is ’n verlenging van die Suid-Afrikaanse Erfenisdag, wat jaarliks op 24 September gevier word. En net soos biltong, word koe(k)sisters as ’n onlosmaaklike deel van die Suid-Afrikaanse koswoordeskat gereken. Stellenbosch Hills se Erfenismaandaanbod sal die volledige vleis-ervaring met ses wyne insluit en as bonus word die koe(k)sister saam met die Stellenbosch Hills Muscat de Hambourg voorgesit. Hierdie hap-en-proe-ervaring is net gedurende September teen die weggeeprys van R75 per persoon beskikbaar. Besprekings is noodsaaklik by 021 881 3828/9 of e-pos info@stellenbosch-hills.co.za HET JY GEWEET? ▶ Rooiwyn moet in wyer glase as witwyn bedien word om die geur subtiel te ondersteun.▶ Wyn is bekend daarvoor dat dit kos komplementeer. Witwyne gaan gewoonlik goed saam met vis, hoender…

▶ Xinjiang grens aan agt verskillende lande: Mongolië, Rusland, Kasakstan, Kirgistan, Tadjikistan, Afghanistan, Pakistan en Indië.▶ China se tweede grootste woestyn (die Taklamakan) én berg (K2) is albei in Xinjiang geleë.▶ Xinjiang neem een sesde van China se landmassa op, maar huisves slegs 1,5% van die land se bevolking.▶ Skrywer Khaled Hosseini se bekroonde boek, The Kite Runner speel in Afghanistan af, maar die fliek is hoofsaaklik in Kashgar, Xinjiang, verfilm.▶ Die Xinjiang-Tibet-hoofweg staan as die hoogste pad in die wêreld bekend.▶In China is Xinjiang die streek wat die meeste vrugte per capita eet. Sekere Xinjiang-streke is bekend vir die vrugte wat hulle kweek soos Hamispanspek, Korla-pere en Turpandruiwe.▶ Die liggeel Id Kah-moskee in Kashgar is China se grootste. Bron: Xinjiang: A Traveler’s Guide to Far West China deur Josh…

Voorafvervaardigde mure doen wat hulle moet doen, maar is selde regtig mooi. Om egter so ’n muur met ’n baksteenmuur te vervang, gaan jou baie geld kos. Ek was moeg om in ’n lelike muur vas te kyk en het besluit om my eie variasies van ’n vertikale tuin daarteen vas te sit. Siende dat ek ’n ywerige herwinner is, het ek altyd leë gebruikte blikkies en bottels, en ek hou daarvan om ou goeters in ’n nuwe funksie te hergebruik. Hierdie projek het dus nie baie gekos nie en elke oggend as ek voor werk my koffie drink, sien ek my handewerk en dit maak my gelukkig. Só maak jy ■ Potjies wat ek in die huis gehad het, het ek met Granny B’s Old Fashioned Paint geverf en…

“Daar is brood op die tafel en ek wil dit met jou deel. Ek wil vir jou ’n kers brand, vir jou ’n wysie speel …” Só nooi die openingslied Akkerblare (woorde deur Gertie van die Noordkaap) op Petronel Baard se nuwe album. Petronel is een van die vaardigste, talentvolste en kreatiefste kunstenaars in Afrikaanse musiek; ongelukkig dikwels ontken. Amper 20 jaar het verloop sedert Petronel die ATKV se Crescendo in 1999 gewen en haar honneursgraad in sang, kabaret en regie aan die Universiteit Stellenbosch se konserwatorium verwerf het. Haar debuutalbum, Lank al, is vir ’n Sama-toekenning benoem, gevolg deur Déjà vu, Weergaloos, ’n beperkte oplaag van Gallery of Songs en Vonnie, in samewerking met die ikone Min Shaw, Albie Louw en Nico Carstens. Haar jongste album, Die heelal draai(Lang…

Nie net kan jy jou eie groente plant nie, maar kruie floreer net so lekker in ’n tuin. As jy nie baie plek het nie, probeer ’n vertikale tuin. Met die 15 Pocket Hanging Planterkan jy verskillende kruie van jou keuse kies, plant en in disse geniet. Elke sakkie is groot genoeg sodat ’n gesonde wortelstelsel daarin kan groei, R889, www.yuppiechef.com Dis deesdae die in-ding om jou eie groente te plant. Probeer RAW se Cannellini Pole wat lekker rank. Ondersteun die rankproses wat die groeiproduksie sal aanwakker. Die Mardi Gras Blend is heldergeel en pers en smaaklik, R35 elk, www.tanyavisser.com Leer meer oor die kuns van bonsaibome. Hierdie boek bied nuttige wenke, goeie raad en nuwe idees vir selfs kundiges op die gebied, ongeveer R150, www.penguinrandomhouse.co.za Greenworks het pas in…

Teiken Hoeveel woorde van vier (4) of meer letters kan jy uit die gegewe letters saamstel? Elke letter in die rooster mag net een keer in ’n woord voorkom. Elke woord moet die letter in die ingekleurde blokkie bevat en daar moet minstens een woord met nege letters wees. Meervoude, verkleinwoorde, eiename, woorde met koppeltekens en uitheemse woorde tel nie. (Die stamwoord vir elke woord is in die Verklarende Afrikaanse Woordeboek, HAT en/of WAT). TEIKEN: 10 woorde, goed 13 woorde, baie goed 16 woorde of meer, uitstekend OPLOSSING: impulsief, fleim, fluim, fusie, liefs, silfe, sleuf, uself, feil, fels, film, fles, flus, lief, limf, self Woordsoek 33 vanne wat algemeen in Suid-Afrika aangetref word, is in hierdie rooster wegesteek. Hulle kan horisontaal, vertikaal, onderstebo, agterstevoor of diagonal gelees word en val…

WOORDSPELETJIES IS WENNERS Ek wonder of daar ander lesers is wat ook so mal is oor die Woordspel en Woordsoek soos ek. Dis die eerste ding waarna ek kyk wanneer ek my nuwe Vrouekeur koop. Ek hou nie sommer op voor ek nie al die woorde gekry het nie. Ek voel sommer hoe rek my brein van die konsentrasie en gedinkery. Ek vergeet van alles om my. Tussen al die gejaag en stres van elke dag gee die speletjies my soveel plesier. Voorwaar ’n stresontlaaier soos min. Dankie, Vrouekeur, en die opstellers van die pretspeletjies. Henda van der Merwe, per e-pos NOG VOORBLADOPSIES WEN Die RSG-program Die tale wat ons praat beantwoord taalkwessies en die boek is ’n gids ter aanvulling van die radioprogram. Vrae soos wat is die verskil…

Vir Heleen Meyer is daar min dinge so lekker soos om met ’n nuwe resep te eksperimenteer en dan te ervaar hoe die geure wat sy vooraf gevisualiseer het, ’n werklikheid op haar bord word. Daar was nie regtig iets of iemand wat die kosmaakvonkie aan die brand gesteek het nie, maar sy het nog altyd in kosmaak belanggestel. Dit was dus ’n logiese keuse om huishoudkunde aan die Universiteit Stellenbosch te studeer. Uit al die kursusse wat deel van die graad gevorm het – kleding, behuising, interieur en so meer – het voeding loshande vir haar uitgestaan. Haar eerste werk ná haar studies was by ’n vrouetydskrif as assistent vir die kosredakteur. In dié vyf jaar is sy op ’n baie hoë vlak aan interessante bestanddele en kombinasies blootgestel…

WAAR KOOP EK DIT? Charles and Keith www.charleskeith.com Country Road, Trenery, Witchery Woolworths www.woolworths.co.za 0860 022 002 Foschini www.foschini.co.za 021 938 1911 (Hoofkantoor) Mr Price www.mrp.com 0800 212 535…

Tanya sê dis belangrik om ’n veilige ruimte te vind waar jy kan erken dat jy probleme ondervind. “Dit kan beteken dat jy met ’n vertroueling moet gesels of in jou joernaal moet skryf. Dit kan ook nuttig wees om met ’n berader te praat. Maak ’n opname van jou funksionering: hoe jy slaap, eet en ook wat jou gemoedstoestand is. As jy enige veranderinge opmerk, bespreek dit met jou algemene praktisyn of sielkundige. Soms as ’n storm ’n mens tref en jou omvergooi en jy sukkel om kop bo water te hou, kan medikasie ’n lewensredder wees.” Sy sê dit is ook belangrik om vir jouself goed te wees. “Leef gesond, bly positief en vermy middelmisbruik. Probeer om geleidelik aanpassings te maak ten opsigte van die gedrag wat tans…

“Ons moet teen vooroordeel in elke vorm veg! Dít is die wortel van soveel seer en lyding in ons huidige samelewing. Wanneer ons vooroordeel stelselmatig kan verwyder, sal ons die kettings van onregverdige haat kan begin losmaak,” meen Greg Kriek, wat die rol van die soldaat Henk Viljoen in die draaiboekskrywer en regisseur Johannes Ferdinand van Zyl se rolprent The Recce vertolk. Die rolprent vertel die storie van hoe die Suid-Afrikaanse Weermag Henk agter die kaplyn verkeerdelik dood verklaar het en hoe hy letterlik manalleen aan ’n fisieke en sielkundige wedloop teen tyd onderwerp word en alles wat hy weet en geleer het, moet gebruik om met sy gesin herenig te word. “Henk is lojaal, dapper en vasberade, maar beleef ook konflik. Aan die een kant is daar sy pligsbesef…

WENK Vis is gaar as jy die vleis maklik kan vlok of daar melkerige water uitkom HEELGEBRAAIDE MEDITERREENSE VIS 4 porsies 1 ui, in ringetjies gesny5 ml (1 t) fyn knoffel15 ml (1 e) tamatiepestohandvol vars basiliekruid50 g (½ pakkie) groen olywe, ontpit3 skywe suurlemoen1 (700 g) vis, binnegoed uitgehaalolie 1 Braai uie en knoffel tot deurskynend en effe bruin. 2 Sny vis se maag nog effe groter oop vir vulsel. 3 Smeer binnekant met pesto. 4 Pak blare, uiemengsel, olywe en suurlemoenskywe in binnekant van vis. 5 Smeer vis met bietjie olie en geur met sout en peper. 6 Sit in toeknyprooster en braai vir 20–30 minute, of tot vis gaar is. DRIE SOUSE VIR BRAAIVLEIS 4 porsies BLOUKAASSOUS 30 ml (2 e) botter30 ml (2 e) koekmeel250 ml…

Ons September-wenners wen twee romans met die komplimente van LAPA Uitgewers. In Leandra Naudé se Reis deur die hart ontmoet Arriana, ’n maatskaplike werker, ’n biljoenêr-Ier op Mauritius. Maar alles is nie pluis op die eiland nie. Jong meisies raak weg… Cecilia Nortjé is bekend vir die diepte en eg menslike verhoudings in haar romanses. Hierdie omnibus, Nuwe drome, is ’n samestelling van drie vorige Romanzas, Die weddenskap, Toekomsbelofte en Net ’n stukkie papier. Die boeke is by toonaangewende handelaars by www.lapa.co.za beskikbaar Sylvia Engelbrecht van Upington het vir ons hierdie wenke ges tuu r: ▶ As kaas in die yskas muf, skil dit met ’n groenteskiller af. Rasper die res en hou dit in die vrieskas.▶ Hier is ’n getoetste plantkosresep wat ek jare gelede op ’n radioprogram met…

Hoog teen ’n muur in Nel Erasmus se ateljee, net onder die plafon, staan daar in haar vloeiende handskrif dié woorde: “Oser Vouloir Savoir Se taire” (Om te waag, om te wil, om te verstaan, om stil te bly). Rondom, teen die mure en netjies in rakke, staan doeke wat so ver terug dateer as die laat 1940’s, die jare voor haar Franse verblyf van die vroeë 1950’s. Op 27 November word sy 90, ná ’n aktiewe skilderloopbaan van sewe dekades. So onlangs as 2015 het sy ’n versameling nuwe tekeninge op papier van voëls in vlug, Soaring, in die Dawid Ras-galery in Sandton vertoon. Erasmus was 25 toe sy met ’n kunsgraad wat sy aan Wits behaal het, Parys toe is om te gaan au pair. Haar oogmerk was…

Steve Hofmeyr is ongetwyfeld een van die bekendste vermaaklikheidskunstenaars in die Afrikaanse wêreld, en selfs onder ander Suid-Afrikaners. Die ouer garde onthou hom veral van sy rol in Agter elke man, maar sedertdien het hy ook as sanger roem verwerf. Benewens al sy rolle in rolprente en sepies soos Egoli het sy CD-verkope die tweemiljoenmerk oorskry – wat ongelooflik baie vir Suid-Afrika is en daarom het hy ook ’n Sama-toekenning ontvang. Verder lok Hofmeyr ook kort-kort groot reaksie uit met sy menings oor politieke en taalkwessies. Sy menings is baie gewild onder sommige – vir wie hy soos ’n onverskrokke (wit Afrikaanse) leier voorkom – terwyl ander haastig is om hulle vinnig van sy uitsprake te distansieer en wil seker maak dat niemand moet dink dat hy namens hulle, of…

ROLPRENTE JOHNNY ENGLISH 3 6/10 Met Rowan Atkinson en Emma Thompson Regisseur David Kerr SPIOENASIEKOMEDIE Jy weet wat jy gaan kry wanneer jy ’n kaartjie vir hierdie komedie koop. Dit spot luidkeels met James Bond, maar Rowan Atkinson (Mr Bean) sorg daarvoor dat jy jou in ’n ander bloedgroep inlag. Daar is niemand wat sy regterwenkbrou so nonchalant kan lig nie, nog minder ’n akteur wat so guitig met homself kan spot! Ons lag vir Atkinson se vertolking, nie noodwendig die situasies nie. En daardie gesigsuitdrukkings! Die “superspioen” Johnny English wat ten spyte van sy onbekwaamheid sake oplos, het afgetree. Tot sy geliefde Engeland in die moeilikheid is. Maar dié slag kom hy teen ’n gedugte skoonheid te staan. Sal hy heelhuids anderkant uitkom? Die toneel waar Johnny sy neus…

VRIEND VERSTAAN NIE MY PANSEKSUALITEIT NIE Ek (19) is panseksueel en my vriend verstaan dit nie. Hy wil nie eens ’n koppie koffie gaan drink om my die kans te gee om vir hom te verduidelik wat dit beteken nie. Ek het selfs al gedink dat dit dan beter is om die verhouding te verbreek as gevolg van sy reaksie. Daar is niemand anders in wie ek tans belangstel nie. – Anoniem Die woord panseksueel verwys na mense wat ongeag hul geslag die behoefte het om met enigiemand, ongeag húl geslag, ’n romantiese en/of ’n seksuele verhouding te hê. Jy is nog jonk en juis daarom is ek bekommerd dat jy dalk die begrip met ander aspekte verwar. Die feit dat jy ’n verhouding met jou vriend wil hê en…

Vir alle navrae navrae@xword.co.za of 082 346 3431 Besoek www.xword.co.za WEN R1 000! Voltooi die blokraai en gebruik die omkringde letters om die versteekte woord of naam te ontsyfer. Leidraad: Druppelsgewys of met dun straaltjies inkom SMS jou antwoord, voorletters, van en dorp/stad voor of op 10 Oktober 2018 na 48410. SMS’e kos R1,50 en is net vir mense in SA. Geld sal vir foutiewe SMS’e gehef word en gratis SMS’e geld nie.…

Tanya sê: Hou joernaal deur die volgende: ▶ Skryf neer wat gebeur het en wat die gebeurtenis gesneller het.▶ Skryf jou oortuigings neer.▶ Wat is die gevolge van dit wat gebeur het? Hoe het jy gereageer? Skryf dit neer.▶ Was daardie gedagtes logies, waar en konstruktief?▶ Evalueer jou gedagtes en die situasie en vra jouself af hoe en wat jy kan verander. Michelle sê: ▶ Vind ’n kreatiewe uitlaatklep en leer om te speel sonder om oor die resultaat bekommerd te wees.▶ Doen joga, meditasie, ry fiets, dans of stap om van oortollige stres ontslae te raak.▶ Wees gemaklik met jou emosies en as jy sukkel, praat met iemand wat na jou sal luister sonder om jou te veroordeel.▶ Wees dankbaar.▶ Bring tyd in die natuur deur.▶ Vind mense wat…

Knoffel-skeurbrood 1 brood 310 ml (1¼ k) louwarm water1 pakkie (10 g) kitsgis10 ml (2 t) suiker860 ml (465 g) witbroodmeel5 ml (1 t) sout15 ml (1 e) olyfolie VULSEL 5 knoffelhuisies45 ml (3 e) pietersielie45 ml (3 e) sagte botter10 ml (2 t) olyfoliesout en peper250 ml (1 k) gerasperde mozzarellakaas 1 Meng water, gis en suiker tot gis opgelos is. 2 Meng meel en sout. Gooi gismengsel en olie by meel en roer tot deeg vorm. Knie vir vyf minute tot deeg glad en elasties is. 3 Bedek deeg met plastieksak en laat vir 30 minute of tot dubbelgrootte gerys. 4 Voorverhit oond tot 180 °C en berei bakplaat voor deur dit met meel te strooi. 5 Knie deeg af, vorm ’n bal en knyp punte vas. Sny…

BLY SKOON Met Hygenix Touch Body Hygiene Wipes sal jy van kop tot tone skoon wees! Dié alkoholvrye lappies is geformuleer om 99% van kieme wat slegte reuke veroorsaak, te elimineer. Geen water is nodig met gebruik nie, dus is dit perfek vir wanneer water skaars is. Beskikbaar in houers met 40 lappies teen ongeveer R39,99. LEEF GESOND Phyto Pro bied die perfekte voedingswaarde vir mense met ’n besige lewenstyl. Dit is ’n maaltydvervanger wat nou in enkelsakkies beskikbaar is – gooi net water by. Die reeks bevat proteïene met stevia en xylitol as versoeters. Kies uit geure soos African Cocoa, Madagascan Vanilla, Indian Chia en Strawberry. Ongeveer R33 per enkelsakkie by Dis-Chem. Ook in 450 g en 1 125 g beskikbaar. www.phytopro.co.za/stockists MOOI ÉN NUTTIG EasyHeat Poster Heaters is…

Vir middagete bestel ons laghman (van die Chinese woord la mian wat handgemaakte noedels beteken), ’n tradisionele Oeigoerse dis met stukkies beesvleis en groente in ’n lipleklekker soetsuursous. Verskillende variasies van dié dis word regoor sentraal-Asië gemaak, maar dit is veral die Oeigoere wat vir hul weergawe bekend is. Daarna besoek ons die antieke stad van Jiaohe, geleë in die buitewyke van Turpan. Jiaohe lê op die syroete en is ongeveer 2 300 jaar gelede uit klei, grond en modderstene gebou. Die feit dat dit een van die oudste stede ter wêreld is, maak ’n besoek hier geweldig interessant. Strategies gebou op ’n plato tussen twee riviervalleie wat natuurlike beskerming bied, het Jiaohe destyds ’n belangrike militêre rol gespeel en terselfdertyd ekonomiese handel tussen die Ooste en Weste versterk. Gedurende…

Ek raak altyd effens vies vir skrywers wat beweer dat hulle nie ander skrywers se romans lees terwyl hulle aan hul eie roman skryf nie. Ek bedoel nou maar, as selfs ons romanskrywers ophou om romans te lees, hoe op aarde kan ons verwag dat enigiemand anders ons romans moet lees? Maar ek weet ook uit eie ervaring hóé moeilik dit kan raak om tyd te vind om so gulsig soos gewoonlik te lees wanneer jy in jou eie spinnerak van skryfwerk vasgevang word. Ek spin op die oomblik aan ’n nuwe roman waaroor ek voorlopig maar min kan sê, buiten dat dit in ’n ander era en gedeeltelik in ’n ander land afspeel, en dus heelwat navorsing behels. Ek moet noodgedwonge ’n spul niefiksie oor daardie tydperk en daardie…

MOEILIKHEIDSGRAAD: ★★ BENODIGDHEDE Elle Pure Gold (100 g-bolle): 2 balle Vanilla, ’n bietjie Blossom en ’n bietjie Buttercup en oorskietstukkies van verskeie kleure (vir maanhare) 3,5- en 4 mm-hekelpen bietjie stopsel 2 klein swart knopies 1 knoop naald met groot oog AFKORTINGS EN STEEKVERDUIDELIKINGS beg = begin, dies = dieselfde, dr = draai, gs = glipsteek, h/af = heg af, herh = herhaal, kb = kortbeen, ks = kettingsteek, lb = langbeen, rdte = rondte, sp = spasie, st = steek, vlg = volgende AANWYSINGS RUGSAKKIE Met 4 mm-pen en Vanilla, heel 4 ks, gs in 1ste ks om ring te vorm. 1ste rdte: 3 ks (= 1ste lb), 15 lb in ring, gs bo in beg-3 ks = 16 lb. 2de rdte: 1 ks, 1 kb in dies st,…

Bitter min mense is nie in die een of ander verhouding nie. Hetsy in ’n huwelik, met jou kinders, by die werk, by die skool, met vriende – die voorbeelde is legio. Ons behoort eintlik meesters op die gebied van verhoudings te wees omdat ons so baie oefening kry. Tog is verhoudings en die probleme wat dit meebring, seker die grootste oorsaak dat sielkundiges en beraders se spreekkamers vol sit. Wat sou die oorsaak wees dat verhoudings so misluk en soveel teleurstelling en hartseer meebring? Mens sou baie redes kon opnoem, maar ek dink van die grootste oorsake is die volgende: Ek dink selfsug is een van die grootste redes. Ons het ons eie behoeftes wat ons in ’n verhouding bevredig wil hê, ongeag die ander persoon se behoeftes. Ons…