Innholdsfortegnelse for 31 August 2018 i Vrouekeur

En toe ons weer sien, is dit die 31 Augustus-uitgawe – net so voor lentenaweek. Lekker! Wat ons nog meer opgewonde oor die nuwe seisoen maak, is die lieflike foto’s wat ons redakteur Eldaleen Hugo (in somersklere!) vir ons vanuit Griekeland stuur. Dit laat mens sommer lus voel om jou winterklere weg te pak en laat jou drome droom oor soel aande op ’n stoep. Die wonderlike ding van die lente is dit wat dit simboliseer. ’n Nuwe begin. ’n Verwagting. ’n Tyd van groei. Dit bring ons weer in aksie, laat ons ons lui litte roer en gee ons kans om dinge te verander. By die kantoor beplan ons wat ons hierdie seisoen vir jou in die tydskrif gaan bring en terwyl ons aan ’n vars begin en nuwe…

BEPLAN VIR DIE ERGSTE Aanvaar dat jy kan skei of voortydig ’n weduwee kan word. Gesels met ’n finansiële beplanner oor planne vir bogenoemde gebeurtenisse. Dit mag behels dat jy meer moet begin spaar sodat jy kapitaal beskikbaar het wanneer enige van bogenoemde gebeurtenisse plaasvind. Dit mag ook beteken dat jy dalk jou eggenoot se lewe moet verseker om sodoende geld beskikbaar te hê sou hy afsterwe. WEES INGELIG Onderrig jouself in finansies. Lees meer oor finansies, beleggings, finansiële produkte, ensovoorts. Die inligting en kennis sal jou met tyd bemagtig om finansieel onafhanklik te funksioneer. ’n Finansiële Geletterdheidsopname (S & P Global FinLit Survey) het bevind dat twee derdes van volwassenes wêreldwyd nie finansieel geletterd is nie. Boonop is daar ’n wye gaping tussen mans en vroue se finansiële geletterdheid,…

BLOEISELFEES Die jaarlikse Calitzdorp Bloeiselfees op 1 en 2 September bied weer ’n magdom heerlike aktiwiteite. Verwag onder meer ’n plaasmark, lewendige musiek, ’n vonkelontbyt, pretdraf (of -stap) en natuurlik wynproeë. Bel 044 213 3314 of stuur ’n e-pos na dekrans@mweb.co.za LENTEMARK Gabriëlskloof se eerste Little Spring Market vind op 1 en 2 September op hul landgoed buite Botrivier in die lieflike Over-berg plaas. Dit vorm deel van die jaarlikse Botrivier-lentenaweek. Daar sal allerlei produkte wees en natuurlik heerlike kos en musiek. Die Botrivier-lentenaweek bied ’n reeks aktiwiteite by elke deelnemende plaas met onder meer ’n skattejag, joga, ponieritte en ander pret vir kinders en natuurlik kos en wyn te kies en te keur. Vir meer inligting, stuur ’n e-pos na Melissa@genevievemcc.co.za DRAF DEUR DIE WINGERDE…

Die Uber-bestuurder wat ons Ponte-toring toe neem, lyk ongemaklik. Later erken hy dat as besigheid nie so stil was nie, hy ons nie vir ons Berea/Hillbrowbestemming sou opgelaai het nie. “Die tsotsi’s daar is soos honger leeus, hulle wág,” sê hy. Nou is ek ook benoud en ek maak seker die deure is gesluit. Drie blokke weg van ons bestemming sê die bestuurder: “My toep sê Ponte is toe, daar is protesoptredes.” “Maar dan moet ons omdraai,” sê my vriende van die agtersitplek af. Ek sê: “Ry net tot om hierdie hoek, dan kyk ons eers hoe lyk dit.” Hy giggel. “Ek maak net ’n grap.” My vriende se laggies klink maar hol. Ponte is ’n ikoniese gebou, die bekendste in Johannesburg, dalk in die hele Suid-Afrika. Almal weet dat…

Skoonmaaktyd Hier is ’n aftiklysie vir die groot lenteskoonmaak: • Organiseer alle kaste en skenk en gee weg. • Stof goed af, veral in hoeke. • Maak ligte en gloeilampe skoon. • Was gordyne, vensters, mure en vensterbanke. Maak blindings skoon. • Stofsuig en was die matte. • Was teëlvloere en maak die voegbry skoon. • Maak deure, kosyne en kroonlyste skoon. • Stof meubels af en politoer waar nodig. • Maak alle oppervlaktes skoon. • Was linne. • Sorg dat stukkende goed in die huis reggemaak word of gooi dit weg. • Kry iets nuuts vir die huis wat jou weer nuwe lus vir die lewe gee. Kry ook ’n 30-dae-skoonmaakkalender op www.vrouekeur.co.za WASPAPIER IS ’N WENNER Nadat jy krane skoongemaak het, vryf waspapier daaroor om dit…

A gt jaar gelede het ons tussen Dargle en Lions River in die KwaZulu-Natalse Middellande langs ’n klein streekpad gestaan en na die afgeleefde muurtjie en monument gekyk waar Nelson Mandela in 1962 gevange geneem is. Ons was teleurgesteld. So ’n beroemde man se lewe het op hierdie presiese plek onherroeplik verander en die monument was niks om oor huis toe te skryf nie. Dis natuurlik toe met groot vreugde dat ons hoor dat daar intussen ’n nuwe monument en museum opgerig is. Ons pak ’n reis na die Middellande juis in sy verjaardagmaand aan, 100 jaar ná sy geboorte. Ons road trip van 18 dae skop in Dargle se omgewing af. Die advertensieborde buite ’n algemene handelaar buite Howick lui dat hulle van bloedwurms, poncho’s, windbrekers en tentpenne tot…

ROLPRENTE HOTEL TRANSYLVANIA 3: SUMMER VACATION 7/10 Met die stemme van Adam Sandler en Fran Drescher Regisseur Genndy Tartakovsky ANIMASIE-KOMEDIE So! Jy voel uitgestres van al die nare koerantnuus en jy wil iewers gaan tjil? Oppas om die Gremlin-vliegtuig te haal waar goggonoppertjies die lugwaardinne en vlieëniers is. En as jy al ooit verveeld geraak het met lugwaardinne wat vir die soveelste keer veiligheidsmaatreëls verduidelik – dit kry ’n nuwe donker, komiese gesig in hierdie animasie. Daarna wil jy dalk op ’n swierige plesierbootrit gaan. Wat jy daar gaan teëkom, gaan jou nog meer traumatiseer, maar op ’n komiese manier. Terwyl almal tans so swaar trek aan die ekonomie, moet ’n mens jou flieks versigtig kies, maar jy kan met ’n breë glimlag vir hierdie een bespreek – nie net…

SPOGTYD Die voorblad van 13 Julie met Eloise en Dawie was so kleurryk. En toe pryk die voorblad boonop die Saterdagoggend nog op Ontbytsake op kykNET. Ek het op Ontbytsake se Facebook vir hulle ’n boodskap van gelukwense met die voorblad geskryf, en is toe sommer stomgeslaan toe Dawie my boodskap uitlees en my daarvoor bedank. Maar ek het gedink Vrouekeur moet gekomplimenteer word. Die tydskrif is meer as net ’n tydskrif, dis amper soos ’n brief van ’n vriendin. Sy is daar wanneer ek raad nodig het, wanneer ek nie weet wat om aan te trek of wat om te kook nie. Sy is ’n kontak met Suid-Afrika, my mense en my taal. Ek kan nie sonder haar klaarkom nie. Ek sal my middagete-geld gebruik en honger ly, maar…

Katinka Steyn se hekelliefde het groter uitgekring as wat sy ooit kon dink. “Ek was nog maar altyd iemand wat handwerk gedoen het en wou, soos baie ma’s, my twee dogters ook leer,” vertel Katinka. In 2013 het sy haar dogters, Anja en Marike, geleer hekel en hulle het vir inspirasie onder meer by ’n Facebook-groep “Ons Hekel” aangesluit. Teen die einde van 2013 besluit hulle drie om elkeen ’n sogenaamde “mood blanket” te hekel, oorspronklik ’n inisiatief van ’n buitelandse hekelgroep. “Daarvoor kon ons die kleure en patroon kies wat ons week se gemoedstoestand as ‘t ware opsom.” Anja is met ’n toestand gebore wat as Pelvic Congestive Syndrome bekend staan. “Sy het dit in ’n baie ernstige graad gehad en het twee stents in haar lies gekry om…

“Stap stadiger Boet, jy blur my foto!” Wat maak hierdie sin vir ’n Kaapse gesin uiters kosbaar? Die feit dat dié Boet op 21 vir die eerste keer in sy lewe gesond gevoel het, want toe Cobus Bisschoff ná sy hartoorplanting herstel, was daar geen keer aan hom nie: Hy wou begin léwe. Reeds voor sy geboorte het dokters sy ma gewaarsku: Die baba se biologiese pasaangeër het nie gewerk nie. Hy moes met ’n keisersnee gebore word en het op vyf jaar sy eerste pasaangeër ontvang. Cobus was sewe toe die gesin Nederland toe verhuis het. “Soos hy groei, het die pasaangeër se draadjie soms te kort geraak en gebreek. As ek hom ná skool stokflou en asvaal aantref, moes ons weer dokters toe jaag. Hy moes nog ses…

Voortdurende rusies kan selfs paartjies se familie- en vriendskapskringe verdeel of selfs van mekaar vervreem. “Met sulke gereelde rusies sal vriende en familie later kant kies,” sê Lise. “Verhoudingsmaats moenie hul vriende of familie by argumente betrek nie. Vriende hoor net een persoon se kant van die storie en as jy die hele tyd die negatiewe hoor, gaan jy glo alles in die verhouding is negatief. Mense kan hul probleme met ander deel – ons het almal ondersteuning nodig – maar ons moet seker maak dat vriende en familie ook van die positiewe weet.” Volgens Louis gebeur dit noodwendig dat mense kant kies. “Dit gebeur uit lojaliteit of ondersteuning en word nie noodwendig negatief bedoel nie. Dit sal goed wees as verhoudingsmaats die besonderhede van hul probleme vir hulself hou…

MOENIES MOENIE JOU VELSORGPRODUKTEREEKS VERANDER NIE Jy kan ekstra produkte byvoeg wat jou vel ’n hupstoot gee of spesifieke probleme teiken, maar moet dit nie heeltemal verander nie. As jou produktereeks nie vir jou werk nie, moet jy dit minstens drie maande voor die tyd verander. MOENIE MET JOU HORMONE SUKKEL NIE Moenie nou van voorbehoedpille (of ander medikasie wat hormone beïnvloed) verander nie. Jy kan pigmentasie veroorsaak wat nie binne ’n maand opgelos kan word nie. MOENIE MET NUWE VELSORGBEHANDELINGS BEGIN NIE ’n Maand voor die troue is ’n goeie tyd om ’n laaste behandeling te doen wat jou vel woema gee of liggies afskilfer, maar as jy nie aan die bestanddele gewoond is nie, kan jou vel negatief reageer. MOETS VIR ’N PUISIE-UITSLAG Hou ’n spot treatment- produk byderhand.…

Enigiemand kan ’n sake-onderneming begin. Wees geduldig. In die verlede is geglo dit neem sowat drie jaar om ’n onderneming op sy voete te kry. Nou neem dit so vyf jaar. ’n Onderneming moet stelselmatig groei. Hou geld in die bank. ’n Paar jaar gelede is mense afgeraai om hul geld in die bank te hou. Daar is op en af tye. As jy nie vir die moeilike tye voorsiening maak nie, gaan jy in groot moeilikheid beland. Wees mededingend. Ek hou nie van verloor nie. As ek wel verloor, pla dit my vir ’n rukkie en dan beweeg ek aan. Leer en kry ondervinding. Mense word vertel entrepreneurs is mense wat vir hulself wil werk en hul eie baas wil wees. Mense glo dit kan onmiddellik gebeur. My benadering…

APPELDRIEHOEKE Maak 8 4 middelslag Granny Smith-appels 15 ml (1 e) suurlemoensap 15 ml (1 e) gesmelte botter 125 ml (105 g) bruinsuiker 125 ml (105 g) suiker 1,25 ml (¼ t) neutmuskaat 10 ml (2 t) kaneel 30 ml (2 e) mielieblom knippie sout 1 pak skilferkorsdeeg 1 eier GLASUURSEL 125 ml (66 g) versiersuiker 5 ml (1 t) suurlemoensap 10 ml (2 t) kookwater Voorverhit oond tot 200 °C en voer ’n bakplaat met waspapier uit. 1 Skil appels en sny in netjiese blokkies. 2 Gooi suurlemoensap, botter, suiker, speserye, mielieblom en sout by appelblokkies en meng goed. 3 Sny skilferkorsdeeg in agt vierkante. Skep appelmengsel in elke vierkant en vou toe in driehoek. Seël rand van driehoek deur met vurk te druk. 4 Klits eier. Plaas driehoeke…

Annelien Pienaar se Boerekos met ’n twist (Human & Rousseau) is propvol resepte vir heerlike huiskos met ’n kinkel. Daar is 140 familieresepte vir enigiets van soppe, souse, groente-, vleis- en nageregte tot gebak en spenstreffers. Als is deeglik getoets en sit die “resep-met-’n-les”-konsep voort wat Annelien Pienaar se gelyknamige blog en Facebook-blad so ’n sukses maak. Besoek www.humanrousseau.com RIANA VAN SCHALKWYK VAN PRETORIA IS ONS WENNER VANDEESWEEK: • Gebruik tandepasta en ’n ou tandeborsel om aanpaksels aan juwele en ringe skoon te borsel. • Mense met ’n suurlemoenboom het soms te veel suurlemoene. Om dit nuttig te gebruik, druk sap in ysbakkies uit en vries dit. Die suurlemoenysies kan later in water gebruik word. • Mens se kleuterskoolkinders bring so baie prente huis toe en jy kan…

• Dargle en Lions River val binne een van die vyf subroetes van die Midlands Meander, 033 330 8195, stuur ’n e-pos na info@midlandsmeander.co.za of besoek www.midlandsmeander.co.za • Vir meer oor die plek waar Nelson Mandela in 1962 gevange geneem is, besoek www.thecapturesite.co.za • Highgate-wynlandgoed bied vier wyne te proe aan, met of sonder kaas- of vleisborde, wat deur die restaurant, MENU, langs die proelokaal gemaak word. Daar in die lieflike proelokaal met sy herwonne bakstene, houtwerk en blokkiesvloere, sien jy ook die klein kelder en wynvate waarin die wyn verouder word. Besoek www.highgate.co.za…

Met verbeelding en harde werk het Douwleen Bredenhann ’n oulike gastekothuis agter op hul erf in die Strand ingerig. Die kothuis se bont Afrika-patrone en -kleure is gewild onder gaste van oorsee, sowel as Suid-Afrikaners, wat die afwisseling van steriele wit verfrissend vind. Douwleen, ’n skrywer, kunstenaar en fotograaf, en haar man, Steph, woon al 15 jaar in ’n gevestigde woonbuurt in die Strand buite Kaapstad. Die kothuis was voorheen ’n tradisionele oumawoonstel waarin hul dogters in hul studentedae en jong getroude lewens gewoon het. Toe die kinders uit die huis is, het die plek leeggestaan en Airbnb was ’n nuwe gonswoord wat sy begin ondersoek het. “Uiteindelik het die besef dat ek dit as ’n selfsorgeenheid kan inrig en nie etes hoef te verskaf nie, die deurslag gegee.” GASTEPLEK…

Vroeër is groente in hul eie klein tuine gekweek, agter in die erf, waar die reguit rye uit die oog was. Gelukkig het dinge verander en vandag is groente tuiniers se trots en dit word beslis nie meer weggesteek nie. Mense plant groente nou waar daar ook al genoeg son is om gesonde groente, kruie en vrugte te kweek. Tuinontwerp verander ook en tuiniers kweek oeste in houers, vertikaal teen mure of in beddings wat gelig is. Daar is ook nou so baie groente wat nie net lekker proe nie, maar ook goed lyk en meer en meer mense begin hul groente tussen blomme plant, soos blaarbeet langs krisante, ertjies saam met petunias en blaarslaai langs lupienes. Blaarslaai en klein kooltjies lyk veral mooi as randplante in tuine terwyl oreganum…

As laerskoolkind was ek en ’n paar vriende baie erg oor Die Uile-boeke. Dit was ’n reeks jeugverhale oor vyf vriende in ’n skoolkoshuis, op die denkbeeldige dorpie Kranskop, wat hulself Die Uile genoem het. In sommige van die boeke het hulle vir die vakansie saam na ’n plaas of ander afgesonderde plek gegaan, waar hulle dan telkens groot avonture beleef het – gewoonlik het hulle ’n misdaad oopgevlek en die skuldiges aan die pen laat ry. Die onwaarskynlikheid dat ’n klompie skoolseuns geharde misdadigers sal vastrek, het ons nie gepla nie. Ons kon met die lede van Die Uile identifiseer – van hul sterk leier, Philip, tot die klein tenger Jorsie met sy bril, die hakkelende Hennie en die groot sterk Vaatjie. Die genot wat ons uit hierdie boeke…

BEKOMMERD OOR SUSTER SOU EK TREK Ek (26) bly by my suster nadat ek van Sasolburg na Pretoria verhuis het. Ek werk by ’n maatskappy wat my baie sleg behandel. Ek weet ek kan ’n ander werk kry, maar ek is bekommerd oor hoe my suster gaan reageer as ek uittrek. Sy is alleen en hou baie daarvan dat ek by haar woon. Sy het geen vriende nie en dit voel vir my dat sou ek uittrek, sy haar enigste vriendin gaan verloor. Hoe hanteer ek dit? – Jammer Wat betref jou ongelukkigheid by die werk, is dit van groot belang dat jy in ’n omgewing werk waar jy voel jy word gerespekteer, na waarde geskat en dat daar groeimoontlikhede is. Dit kom voor of jou suster ’n sterk afhanklikheid…

Om ander op hul uiterlike voorkoms te oordeel, is dwaas. Die volgende verhaal illustreer dit duidelik. ’n Biskop met die naam Potter was aan boord van ’n groot skip wat van Europa af gevaar het. Toe hy aan boord gaan, ontdek hy dat ’n ander passasier ’n kajuit met hom sou deel. Nadat hy na die akkommodasie gaan kyk het, het hy na die ontvangs gegaan om te hoor of hy sy goue horlosie en ander waardevolle artikels in die kluis kon toesluit. Hy het verduidelik dat hy onder normale omstandighede dit nie sou doen nie, maar hy het na sy kajuit toe gegaan en die man ontmoet wat die kajuit met hom moes deel. Geoordeel op sy voorkoms het hy gereken dat hy dalk nie so ’n betroubare persoon…

Augustus is ons stilste gastehuismaand wanneer almal ekonomies swaar trek. Dan kom kuier-inkommers, wat ons “randakkerbesoekers” noem. Dis gewoonlik rondreisende verkoopsmanne en toeriste wat buite skoolvakansies reis en teen donker hier betrap word op pad Kaap toe met Beaufort-Wes nog ’n uur se ry ver. My gastehuis is by die ingang van die dorp – daarom word ek eerste besoek, wat veroorsaak dat Blikkantien dikwels vol is terwyl die ander gastehuise leeg staan. Dit ontketen ligte jaloesie, ’n gefluister in die kerk en spanning op die dorp. Ek hou sommer dadelik van Willie, ’n flambojante, frisgeboude verkoopsman met blink oë en ’n vriendelikheid wat aansteeklik is. Mens wil hom sommer ’n drukkie gee as hy met sy mooi ontwerper-stoppels en regopgejelde swart hare oor die toonbank leun. Hy kyk waarderend…

Weens die verskil wat ’n nuwe hart in Cobus se lewe gebring het, is Corlie tans ’n kampvegter daarvoor om meer mense te oortuig om as ’n orgaanskenker te registreer. “Gesels daaroor met jul families; neem vandag die besluit om ’n verskil in iemand anders se lewe te maak as jy dalk sou sterf. Jou organe kan tog nie saamgaan hemel toe nie. Maar jou organe kan tot sewe mense se lewens red. “Die ideaal is om ’n orgaanskenkingsplakkertjie in jou beursie of op jou ID-kaart te dra,” sê Corlie. Kontak die orgaanskenkingsvereniging vir meer inligting by www.odf.org.za  of bel 0800 22 66 11…

Soos enige ander paartjie het Anerien en Henk Smit op hul troudag sterre in hul oë gehad. Min het hulle geweet watter beproewings vir hulle sou voorlê en hoe dit hul lewe sou verander. Vir Anerien en Henk was dit liefde met die eerste oogopslag en op 28 Februarie 2015 is hulle in Brakpan getroud. Hul geluk was ongelukkig van korte duur toe Anerien drie maande later met Hodgkinsiekte (limfklierkanker) gediagnoseer is. “Vyf dae later het ons gehoor dat ek swanger was. Dit was ’n verskriklike tyd, want die dokters het gewaarsku dat die baba abnormaal kon wees as gevolg van die narkose en bestraling van die CTskandering.” Desondanks het Anerien en Henk moed gehou dat daar geen abnormaliteite by hul ongebore baba sou wees nie. Anerien het op 12…

Ilka van Schalkwyk (32), ’n bekroonde kunstenaar van Midrand, Johannesburg, beleef sekere dae as blou. Sy hou van mense wat geel of oranje lyk, haar broer is groen en die letter P met sy helderpienk voorkoms, is vir haar baie mooi. Ilka, wat pas haar meestersgraad in visuele kunste aan die Universiteit van Johannesburg verwerf het, het beslis nie hallusinasies nie – sy is met ’n unieke fenomeen genaamd grafeem-kleur-sinestesie gebore, wat beteken dat sy letters, syfers, dae van die week en mense in kleure kan waarneem. Die begrip “sinestesie” is afkomstig van die twee antieke Griekse woorde “syn” wat “saam” beteken en “aesthesis” of “sensasie” – ’n neurologiese toestand waar verskillende sensoriese ervarings gelyktydig in die serebrale korteks van die brein plaasvind. Enige van die vyf sintuie – gehoor,…

TAMATIE-SEEKOSBREDIE 4 porsies 15 ml (1 e) olyfolie 1 ui, gekap 10 ml (2 t) fyn knoffel 1 ml ( 1/5 t) rooirissievlokkies 250 ml (1 k) witwyn 420 g (1 blikkie) Italiaansgegeurde gekapte tamaties sout en peper 600 g seekosmengsel 30 ml (2 e) varsgekapte pietersielie vars brood vir opdiening 1 Verhit olie en braai ui en knoffel daarin tot sag. 2 Gooi rooirissievlokkies en wyn by. Kook wyn tot helfte verdamp het. 3 Gooi tamaties by en bring tot kookpunt. Geur met sout en peper. 4 Roer seekos by en laat prut vir omtrent 10 minute of tot vis gaar is. 5 Garneer met pietersielie en sit saam met brood of focaccia voor. FOCACCIA MET CAPRESE-SLAAI 4 porsies FOCACCIA 1 kg gekoopte brooddeeg 30 ml (2 e) olyfolie…

VARS ASEM Ervaar varsheid in jou mond soos nog nooit tevore nie! BE YOU-tandepasta beskerm jou tande, verminder sensitiwiteit, versterk jou tandemalje en verfris jou asem. Kies uit ses geure. Dit kom ongelukkig teen die aansienlike bedrag van R249, www.shop.curaprox.co.za en www.takealot.com FYN IN ’N BLITS NutriBullet is vyf jaar gelede in Suid-Afrika bekendgestel en het ’n huishoudelike naam geword. Met hierdie oulike stukkie kombuistoerusting kan jy van wortels en neute tot ys in ’n japtrap fynmaak. Ideaal om smoothies mee te maak. Dis ook maklik om skoon te maak, ongeveer R1 995. SKOON GASSTOOF Dis altyd ’n gedoente om vuiligheid op ’n gasstoof in die moeilik bereikbare plekkies skoon te maak. Met Plush Supreme Gas Cook-top Cleaner is die geswoeg verby. Spuit dié kragtige middel direk op die vetkolle…

Die Joburg Art Fair (JAF) wat as die grootste en vernaamste kunsmark op die vasteland van Afrika beskou word, word vanjaar vir die 11de keer in die Sandtonse Konvensiesentrum aangebied. Vanjaar neem meer as 34 galerye van 14 lande in Afrika, Europa en die VSA aan die JAF deel. Onder die uitstallers wat vanjaar vir die eerste keer deelneem, is die Namibiese kunstenaarskollektief NJE, die Arte de Gema-galery van Maputo in Mosambiek en This Is Not A Whitecube, die derde Luandagalery wat Angola verteenwoordig. Die afgelope paar jaar word die werk van ’n enkele kunstenaar op die JAF uitgesonder en staan dié kunstenaar as die featured artist bekend. Vanjaar se kunstenaar in die kollig is die 45-jarige Billie Zangewa, wat in Malawië gebore is. “Nadat JAF die afgelope paar jaar…

Behalwe as ’n frats die Suid-Afrikaanse musiekbedryf tref, is dit redelik veilig om te beweer geen ander sangeres in haar leeftyd die welslae gaan behaal wat Juanita du Plessis in twee dekades met verkope van oor die 2,5 miljoen albums verwerf het nie. En dit het niks met talent – ’n oorvloed daarvan of ’n tekort daaraan – uit te waai nie; musiekliefhebbers se manier van musiek verkry, geniet en waardeer, is vinnig aan ‘t verander; ook danksy en/of te wyte aan ’n sukkelende ekonomie. Oppinoot ondersteun nie die aanklag van ’n stortvloed nuwelinge in ’n oorversadigde mark nie. As jy iets het – wat verkieslik anders as die res is – om te bied, doen dit; al verkoop jy omtrent nie ’n enkele CD nie. Gun jouself jou droom!…

• Konstante vogtigheid is nodig vir saadjies om te ontkiem – net klamheid, nie deurdrenkte grond nie. • Beskerm die saad teen sterk wind, reën of direkte sonskyn. • Jou grond moet fyn en krummelrig wees om gesonde wortels aan te moedig. • Sodra dit ontkiem het, moet saailinge genoeg lig en vogtigheid kry om tot volwassewording te groei (maar nie direkte sonlig of te veel water nie). • Plant elke week ’n paar saadjies om ’n konstante oes te verseker.…

MOEILIKHEIDSGRAAD: * WAT HET JY NODIG? 2 balle Kartopu Bebe Pastel (100 g) (kleur 3201) 5,5 mm- en 6,5 mm-naalde 5 knope AFKORTINGS  aw – aweregs; ks – koussteek; r – regs; r2tes – regs 2 steke tesame; rs – reksteek GROOTTE Lengte 60 cm; breedte 30 cm SPANNING 13 ste en 18 ste = 10 cm oor ks met 6,5 mmnaalde AANWYSINGS Met 5,5 mm-naalde stel 82 steke op en werk 16 ste in 2x2-rif. Met 6,5 mm-naalde gaan voort in ks tot werk 60 cm lank is. Heg af. KNOOPBAND Met 5,5 mm-naalde stel 6 ste op en gaan voort in rs tot band oor voorste rand pas tot onder rifgedeelte as dit effens gestrek word. Werk oor een rand van sakkie vas. Merk plek vir 5 knope…