Innholdsfortegnelse for 27 April 2018 i Vrouekeur

Dit gons op sosiale media omdat Facebook mense se data gelek het. Dié platform het so deel van ons wêreld geword dat dit vir baie ondenkbaar is om nie meer deel daarvan te wees nie. Ek het dit al dikwels oorweeg om my profiel toe te maak omdat daar soveel snert op Facebook is, maar twee redes weerhou my daarvan. My seun en sy vrou woon in ’n verre land en dit is ’n manier om te sien wat in hul lewe gebeur en dis verspot maklik om mekaar met Facebook Messenger te bel. Die ander rede is dat ek al van die wonderlikste stories en artikels via Facebook op die internet raakgelees het. Die mees onlangse een is so inspirerend dat ek dit graag wil deel. Op die webwerf,…

Ek sit en wag vir Pieter-Dirk Uys in die besige Boschendal at Oudebank-koffiewinkel op Stellenbosch. Die 72-jarige veelsydige man is pas klaar met sy laaste vertoning by die US Woordfees. Die jong kelner sê ek moet hom ’n foto wys van die man “vir wie jy so lank wag”. Ek google Pieter-Dirk Uys se foto en wys hom. “Daardie famous man, kom hy hierheen?” vra hy met groot oë en ek moet lag, want famous is hy beslis. Terwyl ek aan my cappuccino teug en wag dat die laaste handeklap van Weerklink van ’n wanklank wegsterf, dink ek terug aan die laaste keer wat ek hom op die verhoog gesien het: 31 Mei 2016, op ’n gestroopte verhoog, op ’n stoeltjie, ’n straal lig om hom, in die Engelse weergawe…

EENDBEKDIER TOT DIE REDDING Australiese navorsers reken die melk van die eendbekdier kan die mens se weerstand teen antibiotika teenwerk. Dié eienaardige soogdier met sy bek soos ’n eend, giftige pote en een van slegs twee soogdiere wat eiers lê, se melk bevat ’n kragtige proteïen wat superkieme beveg. Dit kan tot die ontwikkeling van ’n nuwe soort antibiotika lei. DOOD AAN ’N SEER HART? Ja, mens kan van hartseer doodgaan, sê ’n Australiese hartchirurg. “Die stres wanneer jy iemand aan die dood afstaan of ’n ander stresvolle gebeurtenis in jou lewe gebeur, kan ’n string reaksies in jou liggaam en gemoed tot gevolg hê wat tot siektes en selfs die dood kan lei. Navorsing toon die eerste 30 dae nadat ’n geliefde gesterf het, is die kanse om self…

SKOON OONDGLAS Die glaspaneel in ’n oond kan lelik vuil raak. Meng ¾ k koeksoda met ’n klein bietjie water tot dit ’n pasta vorm. Vee die mengsel oor die glaspaneel en los dit vir so 20 minute aan. Vee dit nou met ’n klam lappie af. MET ’N KNYPIE SOUT • Maak ringe in vase skoon deur dit met growwe sout te skuur en dit daarna skoon te was. • Sit kunsblomme in ’n sak, gooi ¼ k growwe sout daarby en skud om dit skoon te maak. • Maak rottangmeubels skoon deur ’n borsel in warm soutwater te doop en dit dan te skrop. • Rooiwyn op die mat? Gooi eers witwyn oor, maak met ’n spons skoon, klad goed en sprinkel growwe sout oor. Wag vir tien…

SOUFFLÉ 12 bakkies 60 ml (¼ k) broodkrummels 1 pak (170 g) jong spinasie 160 ml ( 2/3 k) melk 30 ml (2 e) koekmeel knippie sout knippie swartpeper knippie neutmuskaat 60 ml (¼ k) parmesaankaas 2 groot eiergele 4 groot eierwitte 1,25 ml (¼ t) kremetart Voorverhit oond tot 220 °C en plaas bakplaat in oond om te verhit. Spuit soufflébakkies met kleefwerende sproei en bedek met broodkrummels. Gooi ekstra krummels uit. 1 Blansjeer spinasie en gooi water af. Druk vloeistof uit spinasie en kerf fyn. 2 Verhit melk, koekmeel, sout, peper en neutmuskaat en klits terwyl dit kook totdat mengsel dik is, sowat twee minute. Laat mengsel vir tien minute afkoel. Meng spinasie, parmesaan en eiergele. 3 Klits eierwitte en kremetart tot styf en meng kwart daarvan by…

Gewoonlik is die onthulling van die portret van ’n Amerikaanse president ’n saai affêre, net nog ’n formele geleentheid wat deur regeringslui bygewoon word en wat eintlik maar in die verbygaan afgehandel word. Dit was allermins die geval toe die amptelike portret van oudpres Barack Obama vroeër vanjaar in Washington onthul is. Onder die menigte wat dié onthulling bygewoon het, was hooggeplaastes in die Demokratiese Party, gesaghebbendes in die kunswêreld, ’n groot perskorps en donateurs van die Smithsonian-instituut se National Portrait Gallery. Soos een kommentator dit beskryf het: Dit gebeur selde dat die debuut van enige kunswerk ’n politieke geleentheid is, wat nog te sê dat ’n portret van ’n president ’n kunsgeleentheid is. Sedert Gilbert Stuart in 1796 sy befaamde portret van George Washington geskilder het, is dit tradisie…

Die wêreld se eerste hartoorplanting is in 1967 in Kaapstad onder leiding van Chris Barnard gedoen. Nou, ’n halfeeu later, word orgaanoorplantings nie meer as omstrede of vreemd beskou nie, maar destyds het dit baie durf geneem om die skeptici onder mediese mense sowel as sommige mense se morele besware te ignoreer en eenvoudig die groot waagstuk aan te gaan om ’n hart oor te plant. Tot vandag toe tel Chris Barnard beslis onder een van die bekendste Suid-Afrikaners oor daardie eerste hartoorplanting. Hy het egter later verkies om onthou te word vir die honderde operasies wat hy sonder vergoeding op kinders gedoen het. Hoewel Barnard as mediese held bekendheid verwerf het, het hy dikwels in omstredenheid beland. Hy was immers nie slegs hartoorplanter nie, maar ook ’n hartebreker en…

ROLPRENTE EARLY MAN 7/10 Met Tom Hiddleston en Maisie Williams Regisseur Nick Park ANIMASIEKOMEDIE Daardie gil wat jy pas gehoor het, was van jou wederhelf wat hande in die hare sit oor wat om met die kinders te doen. Hulle het al elke animasie-DVD gesien wat beskikbaar is en ouers kan nie meer deur een TVherhaling sit nie. Wel, liewe ma, wees gerus, hierdie animasiekaperjolle sal selfs vir jou laat lag, hoewel dit nie die beste animasieprent is wat nog gemaak is nie. Moet dus nie die pryswennende Coco of Ferdinand verwag nie, maar jy kan springmielies en koeldrank saam met die kleinspan se fliekkaartjie koop en hulle met ’n geruste hart by ’n teater laat instap waar hierdie komedie vertoon word. Daar word lekker met prehistoriese mense gespot – ouens…

Su-an Müller-Marais is lief vir katte en hou daarvan om, soos die meeste katte, altyd naby mense te wees, al sit sy nie heeltyd op hul skote nie! Wanneer dit egter by kommunikasie en lekker gesels kom, sal geen kat ooit by Suan kan kers vashou nie. Wanneer sy agter ’n radiomikrofoon of voor die TV-kameras inskuif, kan jy nie anders as om te luister nie. Sy is ’n meester op haar gebied en het reeds twee jaar ná mekaar met ’n ATKV-Mediaveertjie, as beste aanbieder by ’n gemeenskapsradiostasie weggestap. Su-an vertel sy was reeds as jong meisietjie baie verbeeldingryk en het gereeld opvoerings gedoen. Dan het sy “soos Rina Hugo” gesing terwyl haar arme broer, wat net 20 maande ouer as sy is, die begeleiding moes fluit! Hy moes…

Toe ek eendag ná drie weke oorsee terugkom huis toe, betrap ek ’n boel mense as ’n sekstet in my sitkamer. Dit wil sê, ’n hele halwe orkes, met ’n Beethoven-stuk vir ses instrumente aan ’t worstel. “Sitkamer” is ’n mooi woord vir wat jy in ’n skakelhuisie in Observatory in Kaapstad kry. My voordeur het op die straat gesit. Van daar af loop jy deur ’n skemer tonnel met slaapneste weerskant, tot in die holte waar jy sit, eet en wat ook al. Dié huisie was my eerste, in my jong dae gekoop met meer astrante moed as geld in die bank. Overgeset synde, ek het die huis gekoop sonder dat ek dit regtig kon bekostig. Ek het begroot, ek het bespaar, ek het stories aan koerante en tydskrifte…

SILWERSKOON KOMBUIS Almal hou van ’n goeie kok wat ’n slag in die kombuis het, maar elke kosmaaksessie los jou ook met heelwat skoonmaakwerk. Laat jou kombuis skitter met Plush Supreme se vier noodsaaklike produkte: Kitchen Cleaner, Oven Cleaner, Multi-Surface Cleaner en Dishwashing Liquid. www.plush.co.za 5 lesers kan elk ’n Plush Supreme-geskenkpak ter waarde van R500 wen. SMS PLUSH gevolg deur jou naam van en adres voor 2 Mei 2018 na 48410. SMS’e kos R1,50 en is net vir mense in SA. Geld word vir foutiewe sleutelwoorde gehef en gratis SMS’e geld nie. Bepalings en voorwaardes: Deur vir hierdie kompetisie in te skryf, gee jy Caxton-tydskrifte die reg om ander Caxton-tydskrifaanbiedinge aan jou te bied. Verfrissend Xcite Energy Cider is die nuwe standaard vir siders. Dit word…

DIE ARIA 2-SLIMSKAAL VERTEL GEEN LEUENS ’n Skaal is nie noodwendig net bedoel om vies onder die bed ingestoot te word nie. Die Fitbit Aria 2 doen veel meer as om bloot jou gewig te verklap. Dit meet ook jou persentasie liggaamsvet, jou liggaamsmassa-indeks (BMI) en monitor of jy vet verloor en spiere wen. Die wonderlike ding is dat dit die statistieke van jou vordering met verloop van tyd hou deur met WiFi op die Fitbit-slimfoontoep te koppel. Vir dié wat reeds van Fitbit se reeks fiksheidmonitors gebruik maak, is die Aria 2 dalk net die ding. Ongelukkig kan jy, soos met enige ander skaal, nie met hierdie een redeneer nie, wat jy sien, is wat jy is, nou net in meer detail. Dit kos R2 500 in Suid-Afrika. BLAAS…

Duisende harte gaan hierdie vakansie weer saam met die blou branders breek, sê Lila vir Reinet. Hulle lê op hul handdoeke op die strand en staar na die see. Hul universiteitseksamen is ’n vae hersenskim. “Ja,” sug Reinet. “Die arme, arme tieners. Ook maar dom. Ook maar naïef. Gelukkig is ons darem verby daardie stadium. Been there, done that, girlfriend. Got the T-shirt.” Lila en Reinet is boesemvriendinne. Van kleintyd af het hulle al met mekaar gebond. Hul ma’s vertel graag dat hulle nog in stootwaentjies was toe hulle al letterlik na mekaar uitgereik het. Bloedsusters kan nie nader aan mekaar wees nie. Deur hul kleuter-, laer- en hoërskooljare was hulle onafskeidbaar. Byna soos ’n Siamese tweeling, het hul broers gespot. Toe hulle vir hul studies na die Universiteit van…

Ons felle son kan houerplante soms laat les opsê en as jy elke jaar die swakkes moet vervang wat nie die paal gehaal het nie, is dit nie net teenproduktief nie, maar kan dit ook baie duur raak. Dis pret om in houers tuin te maak en daarom het ons ’n klompie tawwe tienies uitgesoek wat maklik groei en ons warm somers en in die meeste gevalle ons winters ook sal geniet. Hul groeiwyses is immer skouspelagtig, en van hulle sal op verskillende tye van die jaar ook blomme dra. Gemeenskaplike karaktertrekke is lae onderhoud en ’n natuurlike weerstand teen siektes en plae. Hier volg ’n plantgalery van tipiese sonliefhebbers. AGAVES Agaves wat hoofsaaklik uit Mexiko en tropiese gebiede van Amerika kom, is ’n uiteenlopende genus wat vorm, loofkleur en…

WAT HET JY NODIG? 1 bal elk DK-breidraad in 3 kleure 4 mm-hekelnaald Wolnaald AFKORTINGS alb – agteromlangbeen: sdop. Steek naald agter rondom balkie van aangeduide steek van vorige ry en trek lus deur, (sdop en trek deur 2 lusse) 2 keer gs – glipsteek ks – kettingsteek ks-sp – kettingsteekspasie lb – langbeen ls(e) – lus(se) sdop – sit draad om pen vlb – vooromlangbeen: sdop, steek naald voor rondom balkie van aangeduide steek in vorige ry en trek lus deur, (sdop en trek deur 2 lusse) 2 keer. AANWYSINGS VIR EEN HANDSKOEN VIERKANT (MAAK 2) Met 1ste kleur maak 5 ks en gs in eerste ks om ring te vorm. 1ste rdte: maak 3 ks (tel as lb), 2 lb in ring, 3 ks, (3 lb, 3 ks)…

Ons almal beland van tyd tot tyd in die moeilikheid omdat ons nie luister nie. Luister is belangrik en onontbeerlik vir ons verhoudings om te werk. Ons almal het die behoefte om na geluister te word. As iemand na jou luister, kommunikeer dit dinge soos: jy is waardevol/geliefd/word gerespekteer. Hoe voel jy as jy jou hele hart teenoor iemand oopmaak, net om te ontdek dat daardie persoon nie luister nie? Jy voel seergemaak en ongelukkig. Luister is belangrik en tog leef ons in ’n dag en tyd waar daar so baie afleidings is wat dit ál moeiliker maak om te luister. Luister is belangrik vir enige verhouding en dit sluit ons verhouding met die Here in. Ek sou wou argumenteer dat om na die God van die heelal en die…

Die sjefs Mari-Louis Guy en Nic van Wyk is veel meer as die beoordelaars van die gewilde Koekedoortjie op kykNET. Jy ken hul gesigte al so goed soos jou niggie van Moorreesburg en jou nefie van Warrenton, wat altyd so lekker bak en lekker kan lag en gesels. Mari-Louis bak vir ’n lewe en sal heel moontlik versiersuiker in jou niggie se oë skop en sy en haar broer, Callie Maritz, het verskeie boeke op hul kerfstok en hul kosateljee, Cakebread, is die sukses agter vele vieringe. Callie is ook ’n bekende gesig en in die kosprogram DIS op VIA. Ek het vergeefs gehoop om in Mari-Louis se kombuis oor tee in fyn porseleinkoppies en iets wat tuisgebak is te gesels: Ons gesels per e-pos, want…

In oorplantingskringe het ’n hoogs ongewone scenario hom onlangs in Kaapstad afgespeel: Drie vroulike oorplantingschirurge het gelyktydig in verskillende teaters die organe van een skenker oorgeplant. Hulle het self eers ná die tyd van die vroulike konneksie verneem, sê dr Susan Vosloo. Sy en prof Elmin Steyn het gelyktydig in die Christaan Barnard-gedenkhospitaal onderskeidelik die hart en een nier van die betrokke skenker oorgeplant, terwyl prof Elmi Muller nie ver daarvandaan nie in die Netcare Private Akademiese Hospitaal, op die perseel van die Groote Schuur-hospitaal, die leweroorplanting behartig het. (Die tweede skenkernier is die volgende oggend by Groote Schuur oorgeplant.) Sy weet nie van enige ander plek in Suid-Afrika waar soveel vroue by spesifiek oorplanting betrokke is nie, sê prof Elmi Muller. Sy is tans hoof van die oorplantingsprogram by…

Adele Hoffman van Vanderbijlpark: My kind kan nie wag om 16 te word en ’n naweek- of vakansiewerk te kry nie. Dan hoef hy nie vir ewig aan sy sakgeld te spaar vir goed wat hy soek nie. Ek dink dit is ’n goeie ding. Dit leer selfstandigheid. Al nadeel is die ma ry op en af. Annalize Trollip van Humansdorp: Ons het vakansietye in ’n restaurant gewerk. Dit was lekker om ons eie geld te verdien en baie lekkerder as om by die huis rond te lê. Ek dink wel dit is elke kind se keuse om te werk of nie. Marlene Kok van Kaapstad: Ek het elke vakansie gewerk. My kinders ook en ons was almal mal daaroor. Dit is wonderlik om jou eie geld te hê om…

BEESROL GEVUL MET LENSIES EN BOTTERSKORSIE 1 ui, gekap 5 ml (1 t) fyn knoffel 125 ml (½ k) lensies 375 ml aftreksel 250 ml (1 k) botterskorsie, fyngekap 2 sirkels fetakaas 1 eier 1 kg beenlose beeslies ( flank ) Stel oond op 180 °C. 1 Braai uie en knoffel in olie tot sag. 2 Kook lensies in aftreksel tot sag. Jy kan nog water bygooi indien nodig. Dreineer en laat afkoel. 3 Kook botterskorsies in water tot sag, dreineer en hou eenkant. 4 Meng uie, lensies en botterskorsies saam in mengbak. Krummel feta by en roer eier by. 5 Gooi bietjie room by indien nodig om mengsel te bind. 6 Versprei vulsel eweredig oor bees-lies. Rol op en bind vas. 7 Geur met sout en peper.…

Dit was George Strait se 2007-liedjie If You can do anything else, waarin hy met daardie southern-geur in sy stem vra of jy in Houston wil woon waarheen die cowboys gaan of dalk na Pensacola waar die son heeljaar skyn. Maar dalk was dit ons agt uur in die motor op die effe siellose I10-snelweg wat die grootste motivering vir ons besoek was. Ons is op ’n baie lang roadtrip van Miami na Houston, maar die dae lê wyd voor ons oop. Ons kan stop, slaap en kuier waar en so lank ons wil. Ons soek op ons slimfone vir bekostigbare verblyf en beland by die Days Inn Pensacola Beach. Dis laatnag toe ons styf uit die motor klim en na ons kamer gaan. Jy hoor die see, maar kan…

Twee doen dinge mos immers altyd beter! Hier is drie albums wat stem en harmonie ontgin. COFFEE SNOBS SE MUSIEK VIR CONNOISSEURS Die kreatiewe musiekpaartjie Vernette en Marius Wessels – oftewel Coffee Snobs – het met hul debuutalbum Aroma (met die pragtreffer Eie land) gehalte aan die Suid-Afrikaanse musiekskat toegevoeg. Hul tweede album, Lig (WOW-musiekverspreiders) weerkaats ’n meer akoestiese en organiese aanslag. Die album bestaan uit sewe Afrikaanse en twee Engelse liedjies; almal oorspronklike nuutskeppings. Die titel van die album weerspieël die tema van lig uit die donker deur trane en lag, die wind, die see en die stilte wat deurlopend in die lirieke voorkom. Dis ’n baie positiewe en bevredigende album wat ’n toekomsboodskap van hoop verkondig. Die duo het weer baie sorg met die komplekse produksie getref om…

• As jy enige ou pot beplant en dit sommer net êrens neerplak, gaan dit beslis nie die voorkoms van jou tuin, stoep of balkon verbeter nie. ’n Mooi houer met net een eksemplaarplant of ’n mooi kombinasie van komplementerende plante vorm egter ’n sterk fokuspunt wat met sorg geplaas moet word. • Groepeer ’n paar potte met dieselfde ontwerp saam. Los eers die potte ’n dag of twee leeg voordat jy besluit wat om daarin te plant sodat jy kan besluit of dit op die regte plek staan vir die maksimum trefkrag sonder om in die pad te wees – as die houer eers beplant is, is dit te swaar om te skuif! • Potte wat in pare of rye met dieselfde plante beplant word, is baie dramaties en…

MEDIKASIE NIE GENOEG OM MY BETER TE LAAT VOEL NIE Is medikasie genoeg om my lae gemoed te verlig? Ek het by my huisdokter gekla dat ek neerslagtig voel en hy het vir my ’n antidepressant gegee. Hoewel ek effens rustiger voel, is my gemoed steeds swaar. Wat kan ek nog doen om beter te voel? – Swaar gemoed Gemoedsteurnisse word dikwels met ’n kombinasie van medikasie en psigoterapie behandel. Om slegs die chemiese basis van jou brein te verander, is onvoldoende om nuwe gedragskomponente en vaardighede aan te leer. Boonop help psigoterapie jou om insig te verkry in die aard en oorsprong van jou gemoedstoestand. Om slegs die simptoom te behandel, is onvoldoende om die uitdaging met wortel en tak uit te roei. Hoewel jy nie aan antidepressante verslaaf…