Innholdsfortegnelse for 15-dic-17 i Vrouekeur

Verlede jaar hierdie tyd was ek oor ’n paar inskrywings in my dagboek opgewonde. Eerstens was dit bykans Desembervakansie en het ons die laaste uitgawes drukkers toe gestuur. In die tweede plek was ’n skryfkursus op ’n Griekse eiland in groot letters in April 2017 in my dagboek vir die nuwe jaar geskryf, en in September my dogter en haar geliefde se troue. Als het so ver in die toekoms gevoel. En hier is ek nou ’n jaar later en ek is weer opgewonde oor dit bykans Desembervakansie is en ons is druk besig om die laaste uitgawes drukkers toe te stuur. April in Griekeland het gekom en gegaan en ek en my geliefde het wonderlike herinneringe en nuwe planne om terug te gaan. Die troue op 23 September wat…

GUNSTELINGAKTEURS Meryl Streep, want sy is ’n voorbeeld van iemand wat nooit ophou leer nie. Sy gaan vandag nog vir dramaklasse. En Leonardo DiCaprio. Hy neem sy werk baie ernstig op en is ’n ou sonder issues. SKOOL Ek het in 2008 aan die Hoërskool Vaalpark gematrikuleer (deesdae Vaal Articon). UITDAGING Om nie my karakter huis toe te vat nie. Baie van die stories raak my baie diep; ek sal soms huis toe gaan en steeds in daardie gat wees. INSPIRASIE Enige uitdaging gee vir my energie en is my inspirasie om my beste te gee. Dit maak my opgewonde. MODELWERK Ek is ’n opgeleide model en was 16 toe ek twee maande vir modelwerk Italië toe is. Dít was ook my eerste oorsese besoek. BLOMME My gunstelingblomme is sintjosefslelies.…

Dit gaan nie vir my oor getalle nie, maar eerder oor die opgewonde gesiggies as hulle hul beertjies kry en ook die herinneringe Dis lekker om iets te maak en sommer net weg te gee. Dis die beste terapie Toe Charlene van der Westhuizen van Upington gedurende Desember 2015 ’n teddiebeer saam met ’n vriendin, Hanni Coffee vir dié se kleinkind wou maak, het hulle ’n patroon van die internet afgelaai en dit met die hand aanmekaargesit. “Dit was ’n groot gelag en ons gesinne het dit baie snaaks gevind om ons te sien naaldwerk doen.” Die teddiebeer het maar krom en skeef uitgekom. “Ons het die bene verkeerdom aanmekaargewerk, die boude was die voete!” Maar Adrian Archer het steeds sy verkeerdom-teddie, vertel Charlene. As gevolg van ekonomiese druk moes…

SJOKOLADEPAWLOWA MET VANIELJEVULSEL 8 groot of 12 klein 4 groot eierwitte knypie kremetart 250 ml (230 g) strooisuiker 5 ml (1 t) vanieljegeursel 1 5 ml (1 e) mielieblom (maizena) 30 ml (2 e) kakao VULSEL 1 boks vanieljekitspoeding 250 ml (1 k) melk 125 ml (½ k) room 5 ml (1 t) vanielje aarbeie sjokoladeganache Voorverhit oond tot 190 °C en voer twee bakplate met waspapier uit. 1 Klits eierwitte en kremetart tot sagtepuntstadium. 2 Gooi strooisuiker stadig by en klits tot styf. 3 Voeg vanieljegeursel by en klits deur. 4 Sif mielieblom by beslag en vou in. 5 Skep lepels vol van beslag op bakplate en maak effens gelyk met lepel. 6 Sif kakao bo-oor en maak sirkelbewegings om sjokoladestrepe te kry. 7 Bak vir vyf minute, stel…

Dit is deesdae wêreldwyd ’n ten-dens om enkelsnitte op sosialemedianetwerke soos iTunes uit te reik, eerder as om volledige albums op CD bekend te stel. Dit gebeur wel af en toe nog, maar dikwels is daar maar min snitte op sulke CD’s en voel die luisteraar effens ingeloop. ’n Ander nuutjie is om geld by weldoeners op sosiale media te bedel om ’n album te finansier en om daardie skenkings te gebruik om ’n album onafhanklik te vervaardig en daardeur te verseker jy hoef nie artistieke vryheid in te boet nie en kan doen net wat jy wil ... KAREN ZOID DEEL OOMBLIKKE Die aanbieder van kykNET se musikale kletsreeks Die Republiek van Zoid Afrika se jongste album – haar eerste Afrikaanse solo-album in ses jaar – volg die kort…

Cecilia Rangwanasha, ’n sopraan in Kaapstad Opera se Studio-opleidingsprogram, is in September as die wenner van die sewende ATKV Muziqanto-prys aangewys. Boonop is die naaswenner, die sopraan Frances du Plessis, sowel as die bariton Owen Metsileng wat derde geëindig het, ook aan Kaapstad Opera se Studio verbonde. Die Studio-program strek oor twee jaar en is daarop ingestel om gegradueerde sangers se tegniek en verhoogvaardighede te slyp voordat hulle ’n professionele loopbaan begin. Die ATKV Muziqanto-kompetisie vir Suid-Afrikaanse sangers tussen 18 en 32 word jaarliks aangebied en die algehele wenner kry R50 000. Vanjaar het die beoordelaars die Suid-Afrikaanse sopraan Sibongile Mngoma, die Suid-Afrikaanse bariton Fikile Mvinjelwa en die Amerikaans gebore sopraan Eugenie Chopin, wat jare lank al in Suid-Afrika woon, ingesluit. Aspekte wat by die beoordeling ter sprake kom, sluit…

Die lawwe dog donker komediedrama Liewe Kersfeesvader: Alles gaan okay wees , is nou in rolprentteaters te sien. Dis die storie van ’n tienerskoonheidskoningin wat tot oornag-volwassenheid gedryf word wanneer haar pa ’n nuwe identiteit aanneem ... as Kersvader. Die Blignaut-gesin bestaan uit pa Herman, ma Marta, dogter Nonnie en kleptomaniese seun, Hugo, en vir dié Karoo-gesin begin die feestyd op ’n lae noot. Ma se Kersgeskenk aan die gesin is ’n egskeiding. Die “goeie nuus” is dat sy die gesin gaan verlaat om haar by ’n reisende sirkus aan te sluit. Wanneer Herman weens sy vrou se skielike afwesigheid toenemend paniekerig en depressief raak, moet Nonnie noodgedwonge na Hugo begin omsien en ’n mate van orde in die huis probeer handhaaf. En net wanneer Nonnie haar…

MOEILIKHEIDSGRAAD: BENODIGDHEDE M oYa 100% Cotton DK (50 g-balle): 1 bal Natural 3 mm-hekelpen Stomppuntnaald met groot oog 4 x 34 cm-stokkies Tou of dieselfde draad GROOTTE Blok is ongeveer 23 cm x 23 cm AFKORTINGS EN STEEKVERDUIDELIKINGS beg = begin, dies = dieselfde, dr = draai, dsl = dubbelslagsteek, driesl = drieslagsteek, gs = glipsteek, h/a = heg af, herh = herhaal,kb = kortbeen, ks = kettingsteek, lb = langbeen, rdte = rondte, sp = spasie, st = steek, tr = trossie, vlg = volgende. Drieslagsteek: 1 Slaan die draad drie maal oor die pen. 2 Steek die pen in die volgende steek. 3 Slaan die draad oor die pen en trek die pen deur die eerste lus sodat daar vyf lusse op die pen is. 4 Slaan die…

Kom saam na Indië en beleef dié kleurryke, interessante land in al sy glorie. Jy kan onder meer uitsien na die Taj Mahal, Jaipur en sy fort, ’n riksjarit deur Ou Delhi se mark, die suide van Indië met Kochie en die Backwaters van Kerala. Heerlike kos en fantastiese inkopies wag! WAT KOS DIT? Die landreëlings van die toer kos 2 335* dollar en 520* dollar vir binnelandse vlugte in Indië per persoon wat deel (bereken op ’n minimum van 15 toerlede), met ’n bykomende tarief van 1 085 dollar* vir ’n enkelkamer, plus ’n vliegkaartjie van R3 290* per persoon. INGESLUIT • Retoervliegkaartjies in ekonomiese klas • Binnelandse vlugte in Indië in ekonomiese klas • Verblyf in luukse hotelle • Twee etes per dag, middagete uitgesluit • Luukse busvervoer…

VIR MEKAAR GELEEN As ma van vyf dogters en ouma van drie kleinkinders is dit vir my ’n wonderlike voorreg om ook bedags na die kleingoed te kyk terwyl hul mammas werk. Dat kleinkinders dieper in ’n mens se hart kom kruip, is beslis waar. My kinders het so vinnig grootgeword en nou geniet ek die kleingoed behoorlik. Die beste medisyne in die wêreld is ’n kleinkind se sagte soentjie op ouma se wang. Elkeen het sy/haar eie identiteit en hierdie ouma weet dis alles net genade uit God se hand. Maak vir julle skatte in die hemel bymekaar en leef elke dag voluit. Ons word ook net aan mekaar geleen. Dankie vir ’n puik, bekostigbare tydskrif waarmee ek elke week begin. Suzette van der Berg, Bloemfontein NOG ’N VOORBLADOPSIE…

‘ONS HET ’N GESIN GEWORD WAT VIR MEKAAR BOEKE VIR KERSFEES GEE’ Laas Kersfees het elkeen in ons huis minstens een boek present gekry en een boek present gegee. Ek het vir my tienerdogter wat kort voor Kersfees ’n passie vir filosofie ontdek het, daardie bekende beginnersroman vir ontluikende filosowe geskenk: Sophie’s World wat ’n kwarteeu gelede deur die Noorweegse Jostein Gaarder geskryf is. (Mia was so mal daaroor dat sy intussen twee van Gaarder se ander romans ook gelees het.) Haar ouer broer Hugo het vir my ’n roman gegee wat ek nie vir myself sou gekies het nie omdat ek gedog het dis te “rof” vir my middeljarige smaak –A Decent Ride deur die Skotse Irvine Welsh van Trainspotting-faam – en toe verras ek myself deur tog te…

*Pryse onderhewig aan verandering…

DESEMBER-WENBOEK 50 hoendergeregte bevat 50 veelsydige hoenderresepte wat maaltydinspirasie gedurende moeilike ekonomiese omstandighede bied. Oondgerooster, oor die kole, as deel van bredies, sop of pasteie – hoender is maklik om voor te berei en ’n ekonomiese keuse vir elke gesin. Die resepte bestaan uit treffers soos: blatjanghoender, Oroshoender, hoenderbobotie, romerige hoenderstroganoff, hoender-en-lensie-sop, pynappelhoender, hoender-en-broccoli, hoendersamoesas en ’n appelkoos-enhoender-potjie. Die boek is by toonaangewende winkels en by www.lapa.co.za  beskikbaar MAGDEL FOURIE VAN BLOEMFONTEIN DEEL HIERDIE WENK: As jy wors braai, doop dit eers in melk en daarna in meel. Dit is dan heerlik bros en proe lekkerder as die gewone. MET HAARSPROEI Spuit haarsproei op ’n lappie. Vee die lappie oor klere of meubels om van dierehare en pluis ontslae te raak. MAAK ’N WASBAK SKOON Herstel ’n porseleinwasbak…

ROLPRENTE VUIL WASGOED 8/10 Met Bennie Fourie en Bouwer Bosch Regisseur Morné du Toit DONKER KOMEDIE Al kry die uitbundige, loslit-komedie 8/10 sonder enige wasgoedversagmiddel daarin, moet lesers besef: Die humor vol vlekke sal nie noodwendig in almal se smaak val nie. Onthou, mense praat soos hulle praat, daarom: As jy nie van reguit praat en gekruide dialoog hou nie, mag jy soms bloos. In die komedie wat jou wasmasjien sal skud, en wat op ’n kortrolprent gegrond is, bedryf twee broers ’n wassery. Maar wat gebeur wanneer hulle ’n afgesnyde vinger in ’n baadjie ontdek? Toemaar, dis darem nie The Godfather nie, hoewel die mafia dalk ’n draai in die rolprent sal maak. Daar is ’n cool komiese ritme wat hoofsaaklik uit Quinn Lubbe se flink redigering kom, want…

Dié rakkie pla my nou al jare, want dit doen niks vir my huis se dekor nie. Ek is tans in ’n bui vir son, see en sjampanje en het ’n spesifieke blou wat my aan Griekeland laat dink vir dié projek in gedagte gehad. Ek het ’n hele paar van Granny B’s Old Fashioned Paint gebruik en gemeng tot ek die regte kleur blou gekry het en ek noem dit Kalimera-blou – hoe dan nou anders? Meng die ses kleure eers in gelyke hoeveelhede en toets die kleur. Voeg nou bietjies-bietjies nog van die die kleure by (toets voortdurend) om die Kalimera-blou te kry. Die geheim lê in die byvoeging van Purple Reign. Die ses Granny B-kleure wat ek gemeng het, is: 1 Bubble-gum Milkshake 2 Blueberry Pie 3…

Queen of the Free State het my aangenaam verras. Dit is besonder vermaaklike, prettige, droewige, meesleurende herinneringe oor Jennifer Friedman se grootwordjare in die 1950’s en 1960’s op ’n klein Vrystaatse dorpie. Memoires word gewoonlik beskryf as ’n versameling persoonlike herinneringe wat iemand oor sy of haar eie lewe neerskryf. Hoewel die vorm van memoires ook soms in romans aangewend word, word van hulle verwag dat die herinneringe oor feitelike gebeurtenisse gaan, nie fiksie nie. Memoires verskil van ’n outobiografie in dié sin dat ’n outobiografie gewoonlik ’n hele lewensverhaal aanbied, terwyl memoires net sekere gebeurtenisse uit ’n lewe bevat; sommige herinneringe aan belangrike gebeurtenisse wat vir die skrywer van deurslaggewende betekenis in sy of haar lewe was. Memoires het oor die afgelope paar dekades nogal in gewildheid toegeneem.…

Dis ’n tyd om met liefde en omgee na ander uit te reik, juis omdat God met soveel liefde en omgee na ons as sondaars uitgereik het. Hoe verduidelik ’n mens in net ’n paar woorde wat Kersfees beteken? Die beste manier wat ek ken, is: “God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie, maar die ewige lewe sal hê.” Johannes 3:16. Niemand kan dit wat God klaar gedoen het, ongedaan maak nie en niemand kan ’n groter geskenk gee as wat God reeds gegee het nie. Kersfees beteken ’n klomp verskillende dinge vir ’n klomp verskillende mense. Vir sommige is dit ’n tyd om te koop, ’n tyd van drink en partytjies,…

Haar oe-la-la-effek kring uit soos rimpelings op die water. Dis die mense om my in die restaurant waar ek op Anlia sit en wag, wat maak dat ek opkyk toe sy instap. Die koppe draai. Alle oë rus ’n oomblik op dié mooi vrou met die swart tosseloorbelle. Dit is dus glad nie onverwags toe ’n gryskopaanhanger ’n vinnige draai gooi met “hallo, Sasha!” nie. Ons kuier so te sê op die oewer van die Vaalrivier, ’n klipgooi van Anlia se “grootworddorp”, Sasolburg, waar sy die oggend haar paspoort laat hernieu het, “net vir ingeval” ’n geleentheid opduik en sy oor landsgrense heen moet reis. Wie weet, eerder gereed as laat! “Ek is so ’n bietjie obsessief oor geleenthede,” bieg sy. Sy vertel dat dit vir haar erg is wanneer…

KIKKER JOU G&T OP! Geniet jou G&T met ’n unieke smaak van Inverroche. Geen ander jenewer proe so nie. Dis ’n elegante, handgemaakte jenewer wat met fynbos gedistilleer word. Dié fynbos word naby die distilleerdery in Stilbaai met die hand geoes. Die olies en aromas van die blomme, bessies, plantwortels en sitrus word vasgevang. Dit smaak eksoties, met geure van groen jenewer, sitrus en roosblare met ’n verfrissende, droë smaak. Inverroche Gin Classic is by uitgesoekte handelaars en by die distilleerdery in Stilbaai teen sowat R330 per bottel beskikbaar. www.inverroche.co.za ALLESVERLOREN SE EERSTE WIT Allesverloren, die oudste wynprodusent in die Swartland, het pas hul eerste witwyn bekendgestel – die Chenin Blanc 2017. Hierdie wyn volg in die voetspore van hul gesogte rooiwyne – dis ’n ryk, volronde wyn met ’n…

Jy sien hulle op Facebook of dalk woon hulle op jou dorp: die glimlaggende paartjie wat byna altyd diep in mekaar se oë kyk of hande vashou, terwyl die vrou spog dat haar man (al weer) vir haar blomme gebring het of haar met ’n romantiese naweek weg bederf het. Daar is foto’s van hulle wat saam rugby kyk, kunsklasse bywoon, kook of fietsry. Hul lewe en verhouding lyk net perfek in pas, asof hulle nooit baklei nie, nooit van mekaar verskil nie – twee sielsgenote. Vergelyk jy dit met jou eie huwelik, kan jy nie help om te wonder waar het dinge vir jou so verkeerd geloop nie. Wat is die kans dat jou man ’n kunsklas saam met jou sal bywoon? Blomme uit sy hand is skaarser as…

UIE-BLOM 4 porsies 1 groot ui 250 ml (1 k) meel 2 eiers, geklits 45 ml (3 e) melk 375 ml (1½ k) growwe broodkrummels sout en peper 2,5 ml (½ t) fyn komyn knypie rooirissievlokkies 2,5 ml (½ t) paprika olie vir diepbraai SOUS 125 ml (½ k) mayonnaise 60 ml (¼ k) tamatiesous 30 ml (2 e) brandrissiesous 1 Sny bo-punt van ui af en trek eerste vel af. 2 Sny ui vertikaal in kwarte, maar nie heeltemal deur nie. 3 Hou aan elke kwart sny totdat jy 16 “blaartjies” het. 4 Doop ui in meel. 5 Meng eiers en melk en doop ui daarin. 6 Meng broodkrummels met speserye en doop ui daarin. 7 Doop ui weer in eiermengsel en dan weer in krummels. 8 Plaas ui…

Hoe is dit dat ’n mens nooit die plekke naaste aan jou verken nie? Ek wonder dit keer op keer as ek deur ’n gebied ry wat naby ons is, maar waaroor ek eintlik niks weet as vriende van die noorde vra nie. Dit het alles met daardie glasie yskoue Meerendal MCC by die proe begin, maar dis toe iemand anders op Facebook foto’s van hul heerlike kuier by Groot Phesantekraal plaas dat ek besluit dis tyd vir ’n naweek weg. ’n Mens kan nie glo jy sit die een oomblik nog op die besige N1 met motoriste wie se gesigte soos onwelkome onweer op ’n Maandagoggend lyk en die volgende oomblik ontvou die heuwels en valleie van Durbanville jou nie. Die pad kronkel verby horingoue plase se hekke en…

Sy opleiding as glasslyper het Lothar Böttcher aan die Duitse Glasfachschule Hadamar naby Frankfurt onder leiding van die meesters Josef Welzel en Willi Pistor gekry. Dié opleiding het op tradi sionele tegnieke gefokus – onder meer om koud (sonder enige hitte) glas met die hand te slyp en poleer. Dié studie in die buiteland het gekom ná sy kunsstudie aan die Tshwane-Universiteit van Tegnologie waar hy die eerste keer met glas as medium kennis gemaak het toe dié universiteit ’n departement vir glaswerk geopen het. Die moontlikhede wat dié agtergrond inhou, sou hom in ’n rigting kon stuur om glas vir kommersiële gebruik te slyp; soos vir die slyp van lense onder meer vir die mediese wetenskap. Maar Böttcher (44) het met sy kwalifikasies en ervaring ’n ánder koers ingeslaan:…

NUWEJAARSKONSERT ’n Konsert word op 31 Desember om 19:00 by die Kirstenbosch Nasionale Botaniese Tuin gehou. Goldfish en Hot Water sal optree. Bespreek jou plek by www.webtickets.co.za BIER OP HERMANUS Die jaarlikse Hermanus-boetiekbierfees word vanjaar op 22 Desember gehou. Daar sal musiekvermaak en heerlike kos wees en ook ’n speelplek om die kinders besig te hou. Die fees word van 11:00 tot 20:00 by die Hermanus-krieketklub gehou en kaartjiepryse wissel. Bespreek by www.quicket.co.za KERSMARKTE TE KIES EN TE KEUR Gansbaai-Kersmark, 9–23 Desember, Pretoriussaal, Hoofstraat, Gansbaai, “Gansbaai Kersmark” op Facebook Edgemead-Kersmark, 8–23 Desember, Edgemead-gemeenskapsaal, Kaapstad, www.edgemeadmarket.com Weskus-Kersmark, 14–22 Desember, Vredenburg-hoërskool, www.akkerdykkerk.co.za Pinelands Craft & Gift Fair, 4–22 Desember, Kent-saal, Pinelands-hoërskool, 082 661 6080 Ek lief Krismis-Kersmark, 13–23 Desember, Edenplace, Kraaibosch, George, www.ekliefkrismis.co.za Rotariërs se Kersmark, 16–17 Desember,…

Hy is vandag ’n jaar weg. Dis 365 dae sonder haar Louis. Beroof van sy liefde, sy sorg, sy lag en sy blou oë. Hulle het gelyk soos die oseaan op ’n windstil sonskyndag; haar Louis se oë. Blouer as die Karoo-lug in Julie. Maar as hy hom vervies het – wat min gebeur het – was hulle donkergrys en onheilspellend. Nes die water gelyk het ’n jaar gelede. Die dag toe Louis weggegaan het. Verdrink het in die donkerblou waters. Hy en Faan Malgas. Tersia draai weg van die venster en draai die radio harder sodat sy nie die branders kan hoor raas nie. Sy verpes die springgety wanneer die see rowwer as gewoonlik is. Hy koggel haar, skree op haar, daag haar uit om buitentoe te gaan en…

GEVANGENE IN MY EIE VERHOUDING Ná vyf jaar se ongelukkige huwelik gaan dit steeds uitsluitlik net oor my man se behoeftes en sy ego. Hy wil nie kinders hê nie. Voor ander mense is hy baie aangenaam en komplimenteer my, maar wanneer ons alleen is, word ek soos vuilgoed behandel. Hy raak nie eens aan my nie en ons het byna geen intieme lewe nie. Hy maak dit ook onmoontlik vir my om vriendinne te kan hê. Hy het van die begin af geweier dat ek moet werk. Ek wil skei, maar ek het geen weksondervinding of heenkome nie. Ek weet nie eens wat my regte is, sou ons skei nie. Ek voel soos ’n gevangene in my eie verhouding. – Nikswerd Jy beskryf gedragspatrone wat by jou man voorkom…