Innholdsfortegnelse for 08-sep-17 i Vrouekeur

Hoe gebeur dit dat sommige mense kriminele word en ander verantwoordelike burgers? Die antwoord(e) op hierdie vraag verg ’n PhD-tesis, nie ’n kort briefie in ’n tydskrif nie. Dit is natuurlik as daar antwoorde is. Wat presies beteken die woord “natuurlik”? Dis ’n woord wat ons daagliks gebruik en waaroor ons te min nadink. Slaan jy die woord in die HAT na, is daar etlike verduidelikings vir die gebruik van hierdie woord. Onder meer: volgens die natuur; nie kunsmatig nie; aangebore; verklaarbaar; in ooreenstemming met die werklikheid; vanselfsprekend; word as ’n stopwoord gebruik. Hierdie uiteenlopende verduidelikings bewys die punt wat ek wil maak oor wat vir my natuurlik is, maar nie vir ander nie. ’n Wyse akademikus verduidelik dit so: As jy die woord “natuur” wil verstaan, moet jy konteks…

Prestige Wenbriefwenners wen ’n Prestigegeskenkpak van R500. Prestige Housewares is sinoniem met panne. Kies uit verskillendes soos ’n roosterpan, pannekoekpan met resep op die bodem of ’n 14 cm-braaipannetjie. *Stuur ’n straatadres en kontaknommer saam met jou brief. WEN Almal van Menseland sal verheug wees om Haas Das, die geliefde nuusleser van Diereland, en sy assistent, Piet Muis, se manewales weer te geniet in hierdie vrolike leesboek-reeks. www.nb.co.za 3 lesers kan die boek wen. SMS HAAS gevolg deur jou naam, van en adres voor 13 September 2017 na 48410. SMS’e kos R1,50 en is net vir mense in SA. Geld word vir foutiewe sleutelwoorde gehef en gratis SMS’e geld nie. Bepalings en voorwaardes: Deur vir hierdie kompetisie in te skryf, gee jy Caxton-tydskrifte die reg om ander Caxton-tydskrifaanbiedinge aan jou…

Die fyn, afgeronde klank van die mandolien stem die argitek en liedjieskrywersanger Daniel Eeuwrick rustig. “Ek is ’n rustige mens. Ek kan soms só op ’n sekere ding fokus dat ek skoon vergeet van die mense en dinge om my!” erken hy. Danie Eeuwrick Bekker, soos hy gedoop is, woon teen die see in Beachview, net buite Port Elizabeth. Hier geniet hy ook rustigheid: buite, langs sy koidam, waar hy met musiek op die agtergrond ’n sigaret rook en ’n drankie geniet, of in sy ateljee, waar hy afgesonder kan wees en sy musikale kreatiwiteit kan beoefen. Hier het hy sy gehalte-album Op ’n leë paron (wat met ’n Ghoema-toekenning bekroon is) en sy splinternuwe CD, Oulap se pad, geskep. Hy beskryf homself as ’n alleenloper, van kleins af al.…

“There is something about the outside of a horse that is good for the inside of a man.” Hierdie woorde van sir Winston Churchill word daagliks deur Madeleen van Niekerk uitgeleef. Eeue gelede is gewonde soldate op perde getel en het Hippokrates oor die “helende waarde” van die ritmiese beweging van perde geskryf. Madeleen skryf dit aan ’n perd se vele goeie eienskappe toe: die grootsheid, fierheid, trots, krag, liefdevolheid, spelerigheid en lojaliteit. “Dis al hierdie eienskappe wat die perd so uitmuntend tot die heling van die menslike liggaam, siel en gees leen. Terapeutiese perdry maak van die perd en sy omgewing gebruik om sensories-motoriese aktiwiteite te fasiliteer en perdryvaardighede te bemeester. Dis groot pret en terselfdertyd stimulerend!” Haar liefde vir perde en die buitelewe spruit uit haar grootwordjare op…

WENK Vir ’n vanieljekoek, los net die kakao uit die resep SJOKOLADETOWERKOEK 1 koek 4 eiers, geskeia 180 ml (170 g) strooisuiker 5 ml (1 t) vanieljegeursel 120 ml (115 g) botter, gesmelt 180 ml (95 g) koekmeel 60 ml (30 g) kakao 500 ml (2 k) louwarm melk versiersuiker om bo-oor te sif Voorverhit oond tot 160 °C. Smeer ’n 20 cm-koekpan met botter en waspapier en bestrooi dit met kakao. 1 Klits eierwitte styf. 2 Klits eiergele, suiker en vanieljegeursel tot lig en donsig. 3 Gooi gesmelte botter by en klits vir twee minute. Sif koekmeel en kakao by en klits goed. 4 Gooi louwarm melk by beslag en klits. 5 Vou eierwitte by mengsel in. 6 Gooi beslag in pan. 7 Bak vir 60 minute tot gaar.…

Begin voorberei vir ’n warm somer, want die voormalige Supersterrewenner Kobus Muller is terug met ’n splinternuwe album, Summer’s Leaving (Nextereo Records; Hamburg, Duitsland). Wel, hier is dit nog lente, maar die somer wink! Kobus vier vanjaar sy tiende jaar in die musiekbedryf. En nie net in Suid-Afrika nie! Van sy Engelse liedjies, Turn up the Radio en You are like Sunshine in the Night, het op verskeie Europese trefferparades gewoel sedert hy in 2013 ’n kontrak met ’n Duitse maatskappy beklink het. Kobus het ook ’n aantal duette saam met die Duitse kunstenaars Jan Hayston en Ralf Cerne opgeneem. Daardie liedjies is nou ook op die nuwe album, sy vyfde, ingesluit. Hier is geen Afrikaanse liedjies nie, wel werk in Duits, onder meer ’n spesiale vertolking van sy reusetreffer Hei Du.…

“Hoekom is al die ‘letterkundeboeke’ wat vir ons voorgeskryf word so donker en ongelukkig?” wil een van my studente weet. “Hoekom kan ons nie meer positiewe en vrolike boeke lees nie?” Geen eenvoudige antwoord op hierdie vraag is moontlik nie. Miskien kan ’n mens die vraag probeer beantwoord deur na twee begrippe uit die sielkunde van Sigmund Freud te verwys. Freud het aangevoer dat ’n mens deur twee teenoorstaande beginsels gedryf word: die “plesierbeginsel” en die “realiteitsbeginsel”. Die plesierbeginsel is ons instinktiewe soeke na plesier en die vermyding van pyn. Ons wil graag onmiddellik al ons behoeftes bevredig (as ek honger is wil ek eet, as ek dors het, water drink en as ek te warm kry, my warm klere uittrek). Ons ontwikkel egter ook die vermoë om die beperkings…

Enige werkgewer sal in sy noppies wees met personeel wat so stiptelik is soos wat ’n portulak soggens blom. Klokslag op tyd! Portulakke oftewel portulaca kom oorspronklik uit Argentinië, die suide van Brasilië en Uruguay. Die blomme se interessante blomwyse het vir sonderlinge name regoor die wêreld gesorg, soos “Time Fuul” oftewel tydblom in Bangladesj, “Nau Bajiya” of negeuurblommetjie in Indië en ““Hoa muòi giò” of tienuurblom in Viëtnam. Portulaksaailinge is van lente tot regdeur somer by alle goeie tuinsentrums beskikbaar. WAT MOET JY NOG WEET? Hierdie plante kort son, baie daarvan, en verkieslik die hele dag. Gelukkig het die meeste tuiniers daardie kolle in hul tuin wat te veel son kry en waar die grond weens al die versengende strale nie besonder vrugbaar is nie. Dit is die perfekte…

Ds Janine Bevolo-Manders is verbonde aan die Nederduitsch Hervormde Kerk Witfontein in Pretoria-Noord en is al 20 jaar ’n predikant Dr Harold Wolfe, ’n professor by die Cornell-universiteit in New York, het ’n studie gedoen oor die effek van hoop op die menslike liggaam. Hy het 25 000 oorloggevangenes oor ’n lang tydperk bestudeer om te kyk wat die effek van hoop op hulle was. Hy het ontdek dat uit die 25 000 gevangenes, daar ’n groep manne was op wie die feit dat hulle krygsgevangenes was, geen effek gehad het nie. Ten spyte van wreedheid, marteling en allerhande soorte onmenslike behandeling, was daar een groep wat bo alles uitgestyg het. Hulle het geen posttraumatiese stres openbaar nie. Hulle het nie buitengewoon siek geword nie en hulle het nie nare…

Dr Annelize Roux sou nie dood gevang word in ’n pienk kamerjas met wit hartjies nie, veral nie as sy ’n onderhoud moes toestaan nie. Die aktrise Cindy Swanepoel lyk egter toeganklik en gemaklik in die snoesige kamerjas wat sy tussen haar tonele op die stel van Binnelanders dra en buiten vir die reguit donker hare en gestileerde kuif, is daar nie ’n sweempie van haar karakter te bespeur waar ons by Stark Studios gesels nie. Annelize is berekend, presies, kil. Cindy het ’n warmte wat dit maklik maak om met haar te gesels en sy lag maklik. “Ek het nie geweet Annelize gaan in so ’n groot feeks ontaard nie,” vertel Cindy, wat reeds twee jaar dié rol in Binnelanders vertolk. “Sy het aan die begin net so ’n…

“Geduld met ons kinders is ’n keuse,” skryf Freda Martin, ’n psigiater en direkteur van The Hincks- Dellcrest Centre in Toronto. “’n Gebrek hieraan verwoes harmonie in die huis binne ’n oogwink.” Dit is vir seker waar. “Ongeduld en ’n konstante geskree op die kinders,” skryf Lizzie Heiselt van die Babble-blog, “het ’n groter negatiewe effek op ons as wat ons dink. Die geskree veroorsaak vrees by jou kind, verlaag selfvertroue en selfwaarde en het ’n slegte invloed op jul langtermynverhouding.” ’n Onlangse studie het bevind dat om op jou kinders te skree net so sleg vir hulle is as om hulle aanhoudend te slaan. Albei dra tot depressie en asosiale gedrag by. Lizzie sê ’n konstante geskree op kinders is net so sleg vir ons as ouer as vir…

WENBOEK VIR SEPTEMBER 50 Boerekosgeregte is ’n samestelling van resepte uit die kombuise van die Vrouelandbouvereniging van die Noord-Kaap. Hier is resepte vir weeksdagetes, spesiale geleenthede en familiesaamtrekke, met immergroen treffers soos ’n korslose souttert, basaarpoeding, gestolde komkommerslaai, kerrievleisvetkoeke, snoektert, karringmelkroosterkoek en groenboontjiebredie. Die boek is by www.lapa.co.za en by toonaangewende boekwinkels beskikbaar SONJA VAN DER MERWE VAN PORT ELIZABETH DEEL HAAR WENK MET ONS: As jy Brasso of Seagrow of soortgelyke vloeistowwe gebruik, is daar altyd ’n afsaksel wat hard word onderin die houer. Ek sit ’n klippie of albaster daarin en skud dit, dan word alles mooi gemeng en niks gaan verlore nie. KOSBLIKWENK Stukkies appel in ’n kosblik verbruin. Keer die verbruining só: Week die appelstukke vir 5–10 minute in ’n bak met 4 k koue water…

TAMATIES BLY BO ALL GOLD se Italian Style Sliced Tomatoes is ’n veelsydige produk wat in ’n verskeidenheid geregte gebruik kan word. Hoekom voeg jy dit nie volgende keer by jou macaroni-en-kaas nie? Sit ’n lagie gaar macaroni in die oondbak, gevolg deur ALL GOLD-tamaties, witsous en kaas. Herhaal met nog ’n laag, bak tot gaar en geniet. Gaan na www.allgold.co.za vir nog watertandlekker resepte REIS LIG Reis lig met Samsonite se Neopulse- reeks. Dié tasse is versterk om rowwe hantering (op lughawens) te weerstaan. Die Spinner 55 weeg slegs 2,2 kg. Die tasse het dubbelwiele en ’n dubbele trekhandvatsel. Hierdie reeks is in swart, wit asook metaalkleure beskikbaar, vanaf R4 695. www.houseofsamsonite.co.za of 031 266 0620 PERFEK GESNY Sny maklik deur deeg of pizza’s met die Joseph Joseph-pizzasnyer. Die…

Dries, Alana, Mila (4) en Merwen Mellet (2) woon net buite Stellenbosch. Die Mellets het verlede September ingetrek nadat hulle twee maande opknappings en aanbouings gedoen het. Hulle wou ’n huis hê waar die groen van die mooie Boland binne-in hul huis gevoel kon word en hulle die seisoene meer lewendig en intens kon beleef. Dries reis baie en veiligheid was ook ’n sterk oorweging. Alana vertel dat hul keuse op dié huis geval het omdat hulle ’n groter huis vir die gesin wou hê. Alana is swanger met hul derde baba en sy en Dries wou ruimte en speelplek vir die kinders hê. Die kinders se kamers en Alana se studeerkamer is op die boonste vloer, maar verder is alle vertrekke op grondvlak en in ’n lekkerleefuitleg gebou, sodat…

Kom ons gesels oor dit wat die Engelse guilty pleasures noem. Daai stout verleidings wat ons nie kan weerstaan nie, maar tog so ’n bietjie skuldig of verleë oor voel. Een van my grootste plesiere is ’n lekker massering. Die probleem is, in Suid-Afrika is dit heeltemal te duur om gereeld ’n massering te kry. Jy voel so half aardig om vir iemand te sê jy’t pas ’n massering gehad, ingeval hulle jou daai “en jy kla jy’t nie geld nie”-kyk gee. Vir ons is dit ’n luukse, maar in lande soos Indië en veral Thailand is dit so algemeen soos om jou tande te borsel. Die kere toe ek hierdie lande besoek het, het ek elke geleentheid benut om my met ’n massering te bederf. ’n Massering is ’n…

WAT HET JY NODIG? K ARTUPO PUNTO (100 g) of enige breidraad wat jou dieselfde spanning gee 4(5; 6) balle in kleur van jou keuse 9 mm-naalde 9 mm-hekelnaald SPANNING 10 ste = 10 cm AFKORTINGS aw – aweregs r – regs rs – reksteek (elke ry regs) GROOTTE Klein (medium; groot) Pas ongeveer 91(102; 112) cm BREI-INLIGTING Die trui word van die agterpant af in een stuk gebrei. Jy kan die trui vir enige grootte aanpas. Omdat elke steek 1 cm is, is dit maklik om die hoeveelheid steke vir enige grootte te brei. Jy kan die trui se lyfgedeelte langer brei. Jy kan die moue so lank of kort maak as wat jy verkies. AANWYSINGS Begin met agterpant, stel 48(54; 58) ste op en werk in rs vir…

Teiken Hoeveel woorde van vier (4) of meer letters kan jy uit die gegewe letters saamstel? Elke letter in die rooster mag net een keer in ’n woord voorkom. Elke woord moet die letter in die ingekleurde blokkie bevat en daar moet minstens een woord met nege letters wees. Meervoude, verkleinwoorde, eiename, woorde met koppeltekens en uitheemse woorde tel nie. (Die stamwoord vir elke woord is in die Verklarende Afrikaanse Woordeboek, HAT en/of WAT). TEIKEN: 10 woorde, goed 13 woorde, baie goed 17 woorde of meer, uitstekend OPLOSSING: Silwervis, siervis, livrei, siviel, viriel, visier, visser, visie, vleis, vlier, vlies, vries, veil, vers, vier, vies, vlei. Koderaai Elke syfer verteenwoordig ’n letter van die alfabet. Om mee weg te spring, is 3 (drie) letters klaar ingevul. Kyk nou of jy kan…

MA SE SEER Ek is ’n ma wat soos baie ander ouers ook kinders aan die dood moes afstaan. Ek is met drie wonderlike meisies geseën wat ek alleen moes grootmaak omdat hul pa op 39-jarige ouderdom oorlede is. Op 18 November 2004 kom die eerste donker tyding – my middelkind (self ook al ’n ma) het in ’n winkelsentrum inmekaargesak. Ek was te laat. Sy het aan ’n breinaneurisme gesterf wat nooit gediagnoseer was nie. In 2009 sterf my oudste dogter se man ná ’n siekbed van drie maande aan leukemie. In Maart 2013 gaan my jongste dogter vir ’n klein chirurgiese prosedure. Sy sterf op 18 November 2013 – dieselfde dag as haar sussie! Daar bly drie dogtertjies sonder ’n mamma agter. Hoe leef ’n ma daarmee saam…

Marco Spaumer onthou sy eerste dag op die stel van Suidooster soos gister. Nie dat hy enige detail in herinnering kan roep nie, maar dat hy vrek senuweeagtig was, is ’n feit soos ’n koei. “In my eerste toneel moes ek teenoor Marcel van Heerden speel. Ek het só gebewe en het heeltemal oorspeel. Hannes van Wyk, ons box producer het vir my gesê ek moet asseblief net die volume ’n bietjie afdraai.” Vandag, amper twee jaar later, is daar steeds ’n bietjie senuwees, maar dis beheerde senuwees. “Ek kan beslis voel hoe ek as akteur gegroei het en dit gee ’n ou selfvertroue,” sê die 25-jarige Marco. Hy vertolk die rol van Tim du Plooy, ’n jong argitek wat by Suidooster Eiendomme betrokke is. Du Plooy is ’n ambisieuse…

Die een ding waaraan daar nie ’n tekort in Afrikaans is nie, is boeke oor kos. Daar is onlangs ’n boek nét oor melkterte gepubliseer. En een oor deeg. Nog een oor Boerekos met ’n kinkel. As jy allergies is vir melk of koring of ’n spesifieke dieet wil volg, is daar ’n boek wat presies reg vir jou is. En nou – dit móés gebeur – is daar ’n roman ... oor kos! ’n Speurroman, nogal. Of liewer: ’n raaiselroman. Schalk Schoombie se Rooi haring is ’n smullekker leeservaring vol vet, befoeterde sjefs, lekkerbek-fynproewergeregte, eksentrieke karakters en natuurlik: ’n moord. Schalk het aanvanklik as dramaturg bekend geraak. Rooi haring is sy tweede roman. Maar hoekom skryf hy? “Dis al wat ek met ’n redelike graad van selfvertroue kan doen,”…

PANANG-PASTABAKKIE 4 porsies bietjie olie 1 ui, in ringetjies gesny 5 ml (1 t) fyn knoffel 5 ml (1 t) fyn gemmer 45 ml (3 e) rooi kerriepasta 15 ml (1 e) grondboontjiebotter 4 hoenderborsies, in repies gesny 10 ml (2 t) vissous 400 ml (1 blikkie) klappermelk 300 g (1 pakkie) langsteelbroccoli 1 geel soetrissie, in dun repies gesny 1 rooi soetrissie, in dun repies gesny 3 50 g (1 pak) plat eiernoedels handvol gekapte koljanderblare ½ rooikool, fyngekerf 1 Verhit bietjie olie en braai ui tot sag. 2 Roer knoffel, gemmer, kerriepasta en grondboontjiebotter by. 3 Gooi hoender, vissous en klappermelk by. Kook vir 15 minute of tot hoender gaar is. Geur met sout en peper. 4 Gooi broccoli en soetrissies by en kook tot gaar. 5 Kook…

Een woord wat ’n mens deesdae nie meer in die kunswêreld teëkom nie, is “happening”. Performance-kuns is nou dalk die naaste wat ’n mens aan dié verskynsel kan kom wat die 1960’s sy verskyning gemaak en almal aan die praat gehad het. ’n Tipiese happening was ’n geleentheid waartydens iets met ’n spesifieke visuele trefkrag of bekoring oënskynlik onbepland aangebied is – dikwels met ’n geskrewe teks én waarby repetisie betrek is. Soms was ’n narratief betrokke, maar dit was nie ’n voorvereiste nie. Die oogmerk was meestal om te verras, te skok, uit te daag, bang te maak of met afgryse te vul. Die 1960’s was maklik dié dekade van die 20ste eeu wat die meeste vorms van rebellie en opstand gesien het. Daar was die fel kritiek teen…

ONSEKER OOR BEROEPSRIGTING Ek maak die einde van die jaar klaar met skool. Ek het nie ’n idee wat ek wil doen nie. Die beroepsvoorligting wat ek deur die skool gekry het, dui aan dat ek enigiets kan word. Dit maak geen sin nie, want ek is seker dat daar iets meer spesifieks is wat ek met my lewe behoort te doen. Hoe sal ek uitvind wat dit is wat ek moet doen? – Onseker Ongelukkig is die beroepsvoorligting wat deur skole gedoen word, nie altyd die doeltreffendste nie en is dit dikwels nodig om alternatiewe leiding te ontvang. Kontak ’n sielkundige wat met beroepsvoorligting werk sodat ’n volledige assessering gedoen kan word ten einde jou aanleg, belangstelling en persoonlikheid met moontlike beroepsgeleenthede te pas. Dit is onmoontlik om ’n…

Vir alle navrae navrae@xword.co.za of 082 346 3431 Besoek WWW.XWORD.CO.ZA Voltooi die blokraai en gebruik die omkringde letters om die versteekte woord of naam te ontsyfer. Leidraad: Ontsyfer die letters in die sirkels om ’n woord te kry vir ’n versteende voorwerp SMS jou antwoord, voorletters, van en dorp/stad voor of op 27 September 2017 na 48410. SMS’e kos R1,50 en is net vir mense in SA. Geld sal vir foutiewe SMS’e gehef word en gratis SMS’e geld nie. WEN R1 000!…