Innholdsfortegnelse for January 2016 i Tuis

Dit was drie kroegstoeltjies, oorgetrek met wit leer, wat net nie meer by my huis se dekor gepas het nie. Ek het die foto’s geneem, die beskrywing gelaai, en binne ’n dag was die stoeltjies weg – gekoop deur drie moedelose manne wat einste stoeltjies moes hê vir ’n seiljag-ekspo in die Kaap. Hulle kon nie omgee wat dit kos nie, want die stalletjie moes klaar. Ek kon nie omgee waarvoor hulle dit wou hê nie, want my geduld met die wit stoeltjies was klaar. En so het ’n verslawende koop-en-verkoop-verhouding begin. Met my huisopknap het my aanlynbedrywighede nuwe laagte- en hoogtepunte bereik. Want als wat oud en gedaan was, of net nie meer gepas het nie, is op die web verkwansel: die ou veiligheidshek (hy is uit die kosyn…

Hou dop! BESIGHEID Soil&Co WIE Kara en Mieke Wertschnig WAAR Kaapstad HUL WERK Hier by Tuis hou ons van ’n goeie ou familieonderneming, en Soil&Co is ’n wonderlike voorbeeld van twee susters – ’n grafiese ontwerper en ’n illustreerder – wat mekaar se kreatiwiteit aanvul. Hulle het hul eie ateljee wat fokus op drukwerk, verpakking, handelsmerke en tekstiele. “Ons het ook die voorreg gehad dat ons ma, Lynette Wertschnig, wat al amper haar hele lewe lank in die klerebedryf is, ons gehelp het om ’n klerereeks te ontwerp,” sê Kara. Nou het Soil&Co ook ’n reeks huisware: rusbanke, ottomans en kussings. Kry hulle by die V&A Waterfront, Kaapstad of besoek hul aanlynwinkel, soilandco.co.za. Winkels toe! Kuier jy dié vakansie op die Tuinroete? Gaan loer dan in by Allegaartjie, ’n oulike…

Hulle het destyds baie lekker in Oos-Londen gewoon, maar hul vriendin Rosemary Steward het ander planne gehad... “Die huis het aan vriende van Rosemary behoort, en sy het voorgestel dat ons gaan kyk,” onthou Sharon. “Toe ons hoor die eienaar gaan dit aan ’n agent oorhandig, het ons besluit om tog ’n draai te maak – en toe koop ons die huis! Nie om in te woon nie; ons wou dit in selfsorgeenhede omskep en verhuur.” Min het Sharon geweet dié plek sou diep in haar hart kruip. “Nadat ons sowat drie maande met die opknap besig was, het ek vir Mickey gesê ons moet die huis liewer as gesinshuis vir ons eie behoeftes regruk.” Dit het baie baksteenwerk en stof gekos voor die Turners die afgeleefde eiendom ’n huis…

Rede vir opknap Nadat hulle jare lank op hul pragtige, afgesonderde gasteplaas in die Sederberge gewoon het, het Andrea en haar oorlede man, Moritz, na die sjarmante dorpie Stanford in die Overberg getrek. Hulle het die huis in Januarie 2013 gekoop – die onweerstaanbare knus atmosfeer het die besluit maklik gemaak. “Ons het baie gou nuwe vriende gemaak, maar vinnig besef daar was nie plek om hulle te onthaal nie,” onthou Andrea, wat besluit het sy moes die stoep van 27m2 oor die lengte van die huis langs verleng om ekstra leefruimte te skep. Andrea het met plaaslike bouers en nutsmanne gewerk om haar visie ’n werklikheid te maak; sy kon ook die kennis en ervaring wat sy opgedoen het toe sy gastekothuise op hul plaas gebou het, inspan. “Ek…

PROJEKGIDS Harde werk 3/10 Vaardigheidsvlak 3/10 Tyd nodig ± 1 uur Klaar grootte ± 550 (h) x 640 (b) x 500mm (d) Doen dit self vir onder R740: hout R520, skroewe R10, wiele R120, verf R90 Projeknotas • Onthou om gidsgate te boor. • Laat saag jou planke klaar by jou naaste houthandelaar – dit sal jou taak aansienlik vergemaklik. Inkopielys • twee 610 x 500 mmgelamineerde dennehoutplanke (sye)• veertien 22 x 94 mmdennehoutplanke, gesaag in 500 mm-lengtes (bodem, voor- en agterkant)• 150-grint-skuurpapier• ses en vyftig 6 mm x 40 mmspaanderbordskroewe• sestien 8 mm x 16 mmspaanderbordskroewe• vier 50 mm-rolwiele• Tuis | Home Dirty Hands Chalky Décor-verf Gereedskap • koordlose boor en 3mmboorpunt• potlood• maatband• kwas 1 Meet en merk ’n strook van 22 mm op albei ente van die veertien 500 mm-planke; boor twee gidsgate in elke strook. Wenk Sit…

V: Van watter lap is die blinding op bladsy 47 van jul Oktober 2015-uitgawe gemaak? – Jenny Cruse, Kaapstad A: Die huiseienaar het dit jare gelede by ’n reekseinde-uitverkoping gekoop; probeer Biggie Best (biggiebestwebshop.co.za) vir iets soortgelyks. V: Ek wil graag die bankie op bladsy 33 van jul Augustus 2015-uitgawe bou. Wat is vir die sitgedeelte en die bokant van die rugleuning gebruik? – Maretha Pretorius, Hartbeespoort A: Die huiseienaars het sement-randstene van Décor and Stone (084 505 7700, decorandstone.com) in die kleur Kilimanjaro gebruik. V: Op bladsy 115 van jul Augustus 2015-uitgawe is daar ’n resep vir ’n vinnige pasteikors. Moet die vulsel warm of koud wees wanneer jy die loperige deegmengsel bo-op skep? – Sarie Mostert, Stellenbosch A: Volgens Tuis se kosredakteur, Johané Neilson, hoef jy nie te…

Wat ’n las! Susana Costa van Nigerië skryf Wat kan ek gebruik om ontslae te raak van dié “indringer” wat die plante in my tuin doodmaak? Ek verwyder dit, maar die volgende dag groei dit net terug! JJ antwoord Dis dodder, ’n plantparasiet. Omdat dodder nie blare, en dus nie chlorofil, het nie (dis die stof wat groenigheid verskaf), het gewone onkruiddoders wat juis die chlorofil aanval om ’n plant dood te maak, geen effek daarop nie. Die draadagtige parasiet heg aan blare, stamme of takkies en verloor sy wortels sodra dit vashouplek aan ’n gasheerplant gekry het. Dit plant dan voort met sade of steggies. Sny dit af net onder die plek waar dit aan die plant geheg is en verwyder dit baie versigtig; dodder sal vinnig weer…

Die kundiges • PAUL VONK, handelsbestuurder by die Suid-Afrikaanse tak van Sakata Seed Corporation, die Japanse maatskappy wat MayFord Seed besit. • MARLAEN STRAATHOF, besturende direkteur by Kirchhoffs/Ball Straathof, een van Suid-Afrika se grootste spesialis-saadverskaffers. • JACO VISSER, plaasbestuurder en tuinboukundige op die wynlandgoed La Motte buite Franschhoek. V Moet jy jou grasperk prysgee vir ’n ekovriendelike tuin? A Nie noodwendig nie, sê Marlaen. Gras keer dat water afloop, veral ná swaar reënbuie. In die noordelike dele van die land, waar somerstorms algemeen is, hou dit die grond onder die grasperk koel en bied só ’n veilige hawe vir voordelige insekte. Die groot probleem, glo Marlaen, is dat mense verwag hul grasperk moet heeljaar groen wees. Ontspan eerder en onthou dat gras oral waar dit in die natuur voorkom, nie dwarsdeur die jaar…

Kweek dit só Origanum is immergroen en rypbestand, en floreer in volson en goed gekomposteerde en gedreineerde grond. Dis ’n goeie metgesel vir kool, blomkool, soetrissies en komkommer, aangesien dit plae wat dié groente aanval, weghou. Soorte ‘Hot and Spicy’ se blare het ’n rissiegeur, ‘Greek Oregano’ het baie geurige blare en ligpers blomme wat skoenlappers lok, ‘Golden Upright’ groei 30cm hoog en is ideaal vir houers, ‘Golden Creeping’ is ’n grondbedekker met helder, lemmetjiegroen blare in die lente en herfs, en ‘Country Cream’ het groen-en-room blare. Wenk van die maand Gedroogde origanum het ’n sterker geur as die vars blare. Snoei gereeld, droog die gesnoeide blare en bêre dit in ’n verseëlde houer in ’n koel kas. Gebruik spaarsaam; te veel kan ’n gereg oorweldig. Het jy geweet? ’n…

Vark-en-appelburgers Vark en appel is ’n wenkombinasie. Bly liefs weg van eier in dié vleiskoekie, want dis geneig om die tekstuur hard te maak. Genoeg vir 6 burgers • 600 g varkmaalvleis (vra die slagter om dit vars te maal)• 1 duim gemmer, geskil en fyngerasper• 1 rooi brandrissie, ontpit en fyngekap• ’n hand vol platblaarpietersielie, fyngekap• 1 groot murgpampoentjie, gerasper• 1 klein groen appel, fyngerasper• 60 ml fyngekapte ui• 250 ml hawersemels (“oat bran”) Meng al die bestanddele en geur met sout en peper. Deel in 6 gelyke dele en vorm in vleiskoekies. Verhit 15 ml elk olyfolie en botter in ’n pan en braai die koekies versigtig tot goudbruin alkante. Sit dit in ’n oondbak, bedek met foelie en bak in ’n voorverhitte oond teen 180 °C vir sowat 20 minute of tot deurgaar, maar steeds…

Daar was so te sê elke aand gaste by ons aan tafel – kuiermense of familie van oorsee, besoekende sendelinge, ou familievriende, my pa se kollegas, of jongmense vir wie my ouers onder hul vlerk geneem het. Dikwels was dit net ’n geval van ekstra plekke dek by ’n gesinsete, ander kere was dit partytjies en vieringe. En maak nie saak hoeveel mense genooi is nie, my mense het altyd op groot skaal onthaal en gekuier. Pa en Ma was (en is nog steeds op 76!) ’n gebore gasheer en gasvrou. Hulle was eenvoudig mal daaroor om “mense te kry”. Destyds, sal jy onthou, het mense maklik “ingeloer” net omdat hulle toevallig in die buurt was of die jongste nuus wou verneem: “Ek kom net hoor hoe dit gaan ...”…

WENBRIEF Daardie iets unieks Este de Nysschen van Panama skryf Ek het pas weer in die posbus gaan loer en toe ek besef daar gaan dalk nooit weer ’n Tuis binne-in wag nie, oorval die groot verlange en hartseer my opnuut. Ek kry steeds my Tuis, maar in elektroniese formaat – dis heelwat goedkoper so. My kinders en kleinkinders dink ek is oud, want sien, ek hou van ’n harde kopie in my hand; dis net anders, koesterend soos ’n liefdesverhouding... glad nie soos om op die rekenaar te moet rondblaai nie. Met die tydskrif kan ek mos op die stoep sit met my koppie koffie in die hand. Dis my troos van die huis af, maar dis nou nie ’n lekker koester-boek wat ek sommer teen my hart kan…

1 Noot vir noot Dié kleurvolle hoek in Ryno en Marita Palm se eetkamer is deur die bougainvilleas van hul Kaapse buurt, Observatory, geïnspireer. Marita se pa het ’n duikklop-onderneming en het die ou klavier professioneel gespuitverf. “Ons kinders het van kleins af alles by hom laat verf in ruil vir ’n koeldrank en ’n burger,” sê sy. Die warm pienk (Dulux 32RR 26/413) kontrasteer mooi met die koel turkoois (Dulux 30BG/207) muur. Terloops, hou dié idee maar liewer vir daai ou honkietonk; nie vir ’n kosbare erfstuk nie. 2 Hallo, sonskyn ’n Goudgeel voordeur sê dadelik welkom en lyk prettig, sê die interieur-ontwerper Claudia Fabian van Mer Design, wat die Plascon-kleur Sunkissed (Y3-A1-2) vir die voordeur van Ilana en André Joubert se West Beach-huis gekies het. “Ilana wou ’n…

Kry nóú jou kaartjie vir ’n fees van smaaklike kos, lieflike celebs, lewende V&A-sessies met kenners, wenke & truuks vir dekor en selfdoen uit die binnekring, en die kans vir lekker gesels met die spanne agter jou gunsteling-tydskrifte. En – natuurlik – heerlike vonkelwyn en wyn van Graham Beck! 11 top-celebs • Anele Mdoda• Bobby van Jaarsveld• Karlien van Jaarsveld• Cass Abrahams• Marc Lottering• Pete Goffe Wood• Rebecca Malope• Shaleen Surtie Richards• Suzelle DIY• Tracey Lange• Vuyo Dabula die program • 9 kook-, dekor-&-selfdoendemonstrasies per sessie deur jou gunsteling-kosredakteurs en celebs • Ontmoet die redakteurs en spanne agter jou 12 gunstelingtydskrifte in hul leser-sitkamers • Koop na hartelus by Idees se Trommelskou en 16 ander opwip-winkels • Smul aan fynproewer-kos by een van die 13 kostrokke • Vul jou voorraad LKHV-produkte by die LOSE IT! banting-mark aan • Teug aan ’n…

Stoeplangs Marina-buitemat R1 299, fabhabitat.co.za Bo jou hoof Soho-hanglig met roesvoorkoms (19424) R1400, The Lighting Warehouse Vat dit vloer toe Driepootstaanlamp van hout R1000, MRP Home Tref onderskeid Hout-afskorting R2699, Biggie Best Almal saam Multi-fotoraam R300, Boardmans Van hoek tot hoek Simple Triangle-hanglig deur Noden Bros R249, superbalist.com Sak neer Adam Rocket-stoel R999, @homelivingspace Rus jou voete Talia-stoel R1 295, Coricraft Wat is volgende … Rooi Ampersandkussing deur Creative Core R150, hellopretty.co.za Goeie les Dekoratiewe leer R395, Volpes VERSKAFFERS @homelivingspace 0860 576 576, home.co.za Biggie Best 021 534 8662, biggiebestwebshop.co.za Boardmans 0860 69 22 74, boardmans.co.za Coricraft 021 508 5200, coricraft.co.za MRP Home 0800 212 535, mrphome.com The Lighting Warehouse 0861 5444 8444, lightingwarehouse.co.za Volpes 041 402 6800, volpes.co.za…

PROJEKGIDS  Harde werk 1/10 Vaardigheidsvlak 1/10 Tyd nodig 1 uur Wat jy nodig het GEREEDSKAP • hamer• spyker• tuinhandskoene• tang• draadknipper• grafie INKOPIELYS • ou diefwering• blikke• dreineringsklippe• potgrond• plante• kabelstroppe 1 Gebruik die hamer en spyker om dreineringsgate onderin die blikke te maak. 2 Vul die onderste deel van die blikke met dreineringsklippe. 3 Gooi potgrond in. 4 Sit ’n plant in elke blik en gooi nog potgrond in. Druk dit stewig vas. 5 Maak die blikke met die kabelstroppe aan die diefwering vas; gebruik die tang om dit stywer te trek en knip die ekstra stukkie met die draadknipper af. Shelly sê Bind twee kabelstroppe aan mekaar as een te kort is om om die blikkie te pas.…

Die probleem Yolandie du Preez van Centurion skryf Ons is raadop met ons groot leefvertrek! Dis te klein vir ’n oopplan-sit-en-eetkamer en te groot vir net ’n sitkamer. Ons wil graag iets nuuts doen; hoe kan ons dit laat werk? Die oplossing Renée en Janel van interiorcreators.com  antwoord Kyk krities na die inhoud van die vertrek. Skep dan funksionele ruimtes en vereenvoudig die voorkoms met behulp van ’n tema. Ons stel ’n oop, lugtige voorkoms met ’n neutrale palet voor wat jare lank mooi en in die mode sal bly. Hier’s ’n paar wenke: Skep struktuur 1 Vereenvoudig die ruimte met vouhortjies voor die vensters; dis redelik duur, maar die belegging werd. Veiligheidshortjies dien ’n dubbele doel deur privaatheid en ’n ekstra veiligheidslaag te skep sonder…

Leserfoto’s Beste voetjie voor Sadie vertoon die jongste modes op die strand by Sardiniabaai. – Andrew en Lindsay Osborne, Port Elizabeth Muurblommetjie Poppie hou die speletjies op ’n afstand dop. – Heike Gehring, Grahamstown Poegaai Tuxedo, of sommer net Tux, is dolgelukkig net waar hy is. – Samantha Schroder, Kuilsrivier Haai, jitte! Lilo en Nala se mensma glo aan veiligheid eerste as dit by swem kom. – Tersia Groenewald, Pretoria Ahooi! Rosie en Abby leef vir swem en bootvaarte. – Tracy Timm, Oos-Londen Laat spat Gedink katte haat water? Nie Teddie nie! – Charlene Burger, Citrusdal Nuut! Het jy ’n snaakse video van jou troeteldier se manewales? Deel dit op Facebook of Instagram met die hutswoord #TuisHomePets, of e-pos dit na troeteldiere@tuis.co.za. Die video moenie langer as 30 sekondes wees…

Kiewiet Hugo het ’n seetuin met ’n kinkel. Want, vertel sy, daar is nie net beddings vol plante wat goed by die see aard nie. Geroeste stoele, tafels, woorde en harte het saam met haar plante ’n ereplek hier. Die Hugo’s het in Oktober 2010 van Pretoria af Kaap toe getrek. Hulle het dié duin in Blouberg raakgesien en besluit om te laat bou. “In September 2011 kon ons intrek en het die proses begin om van ’n duin ’n tuin te maak! “Ek het in Pretoria aan die Unieke Tuinkuns-tuinklub behoort en daar geleer hoe ’n mens ’n tuin behoort uit te lê. In Blouberg het ek heel eerste ’n tuinklub gesoek, want ek het besef om by die see tuin te maak, is ’n ander storie. Melkbos se…

Efekto se waterspaar -wenk Voeg Stockosorb by wanneer jy plant. Dié omgewingsvriendelike waterkristal is ontwikkel vir die wortelsone waar dit in ’n jel-agtige spons verander om water te absorbeer en te bewaar sodat die plant ’n vogtige “spens” het om op staat te maak waar en wanneer hy dit nodig kry . Nuwejaarsvoornemens • Help jou tuin deur droogte-tye deur ’n organiese deklaag van growwe kompos, basstukkies, gekerfde bas, dennenaalde, kakaodoppe of grondboontjiedoppe in beddings te strooi – dit sal mettertyd afbreek en die grond voed. • Gebruik waterwys plante wat natuurlik in jou streek voorkom of wat goed aangepas is by plaaslike toestande. • Lok voëls na jou tuin deur vir hulle kos, water, skuiling teen roofdiere en ’n veilige plek te bied waar hulle hul kleintjies kan grootmaak.…

V: Party van my rose, soos ‘Mister Lincoln’, ‘Duet’, ‘Queen Elizabeth’ en ‘Stephanie di Monaco’ is geneig om dun stele te hê, al voed ek die plante gereeld met Vigorosa. Die probleem is óf te veel skadu, óf te min water, of dat die grond aanvanklik nie diep genoeg voorberei is nie. Die variëteite wat jy noem, is kragtige groeiers met sterk stele. Die oorsaak kan ook ’n ligte snoei wees, maar dan het dit gewoonlik dik basale stele wat teruggesnoei moet word wanneer dit omtrent kniehoogte bereik. V: Hoekom is party van my rose se stele en blare klein, hoewel dit andersins gesond is? Dis waarskynlik ’n onkruiddoder wat dié verskynsel veroorsaak het. Dalk het ’n klein hoeveelheid in ’n spuitpomp agtergebly, of het dampe jou rose aangetas toe…

Bobotiefrikkadelle Onder R90 • Genoeg vir 4 • Bereidingstyd: 20 minute Braaityd: sowat 20 minute • 30 ml olyfolie• 1 ui, gekap• 45 ml Mrs Ball’s-blatjang• 30 ml kerriepoeier• 2 vars lourierblare, gekap• 2 snye witbrood, korsies af• 125 ml melk• 500 g maalvleis• 4 hardgekookte eiers• geelrys en tamatieslaai vir voorsit 1 Verhit die olie in ’n pan, braai die ui tot sag en roer die blatjang, kerriepoeier en lourierblare by. Laat afkoel. Week intussen die brood in die melk tot sag. 2 Dreineer die brood en meng dit saam met die uiemengsel deur die maalvleis, geur met sout en peper en rol in happiegroot balletjies. 3 Braai die balletjies versigtig tot bruin en deurgaar (span die oond in as jy bang is die frikkadelle breek in die pan). Sit voor met die eiers (in kwarte gesny), geurige geelrys en…

Heerlik en gesond The Low Carb Solution for Diabetics (R335, Quivertree) deur Vickie de Beer en Kath Megaw is net die ding vir Suid-Afrikaners wat diabetes het. Dit bied ’n kombinasie van wetenskap, praktiese raad en voedsame resepte wat families met diabetes sal help met inkopies, peuselhappies en drankies. Byt vas! Pylones-kombuistang 199,99; happygifts.co.za Vat ’n hap Vars, tuisgemaak en vryloop is nie woorde wat jy gewoonlik met wegneemkos sal assosieer nie, maar Pasta Café se sjef, Martin van der Walt, bedien (soos hy dit stel) “heilsame en eenvoudige kos”. Dié eetplek in Randburg spesialiseer in klassiek Italiaanse pastas en tortillas. Besoek pastacafe.co.za. Meng en pas Met die hoëspoed-Nutribulletvoedselverwerker (vanaf R1849, Yuppiechef.com) kan jy in ’n japtrap smoothies, neutbotter en amandelmelk maak. Beste biltong Lus vir ’n southappie? Laat The…

OP DIE KASSIE Tuis is op die TV! In die dekorprogram Stylstryd op VIA (kanaal 147 op DStv) ding aspirant-stiliste met mekaar mee om vertrekke mooi te maak (met uitdagings uit die tydskrif se “Dekordilemma”- rubriek). Die wenner kry later die kans om sy of haar werk in Tuis te wys. Nuwe episodes word elke Maandag om 17:00 uitgesaai. Skop die nuwe jaar op ’n vars noot af Elke Saterdag: Greenlyn Village Centre, Menlopark, Pretoria Gryp die kleingoed (én Ouma en Oupa!) en kies koers na die lieflike Hazelkosmark in die hartjie van Pretoria-Oos. Hulle het ’n oorvloed plaaslike en internasionale geure, asook vars produkte direk van die plaas – ’n fantastiese idee vir ’n heerlike gesinsuitstappie. Vir besonderhede, skakel 083 554 5636 of besoek hazelfoodmarket.co.za. Trap hom! 23 &…

Maak seker jou plek is bespreek vir Tuis se selfdoen-demonstrasies by ons nuwe leefstyl-ekspo, 30 Dae van Kos + Dekor. En maak jou maar reg vir lekker lag terwyl jy leer, want ons selfdoenkenner, Deon de Goede, snoer kragte saam met die komediant Marc Lottering. Hulle is handig en skreeusnaaks – kom kyk hoe hulle ’n indrukwekkende projek binne net 30 minute voltooi! Lag-lag... Die beste van als? As jy jou kaartjie vir die ekspo gekoop het (dis net R150), is hierdie sessies almal gratis! • Sien hulle daagliks om 10:00 en 15:30. Kom sit agteroor As jou voete seer raak, kom rus in ons sit-area, kuier saam met Tuis se redakteur, Wicus Pretorius, en ontmoet vir Deon. Jy kan selfs ’n foto saam met Marc neem! Terwyl jy ontspan,…

“En inderdaad – van die houtmeubels tot die latte-stoepdakke is wit geverf; ook die stoffeerwerk regdeur die huis is wit. Die huis in die Langezandt-landgoed is nog ’n nuutjie; dis die Patersons se eerste Nuwejaar op die Overbergse kusdorp, sowat 220km van hul Kaapse huis af. En Bernice, ’n fiksheidsinstrukteur, kan nie wag om die sjampanjeproppe te laat klap nie. “Ons het gereeld vakansietye hier by ons vriende Jan en Sandra Burger kom plak,” vertel Bernice. “In Desember 2013 het ons op die ingewing van die oomblik na ’n paar plekke gaan kyk en toe hierdie erf gekoop. Die bouwerk het ’n hele 14 maande geduur, en ons het eers in April 2015 ingetrek. Daardie eerste vakansie het hier al 12 mense geslaap, al was dinge nog halfklaar. Maar dit…

Wat jy nodig het INKOPIELYS • Tuis | Home Dirty Handskrytverf (R90 per 250 mlpotjie, ons het die kleure Scarlet en Metal gebruik)• Woodoc Antique Wax (R70)• bedrukte viniel van Mitat (R1 095 per vel van 1,4 x 1 m) GEREEDSKAP • 220-grint-skuurpapier• sponsroller• klein en groot verfkwas• lappies• maatband• skêr of handwerkmes• kramgeweer So maak jy... 1 Maak seker die kas is mooi skoon (was dit af met suikerseep as jy nie seker is nie). Skuur die oppervlak liggies net om seker te maak al die los verf is verwyder. Stof deeglik af. 2 Wend jou eerste laag verf met ’n sponsroller aan om ’n egalige afwerking te kry. Daarna kan jy ’n kwas gebruik vir die tweede laag. Wag dat elke laag verf goed droog word. 3 Skuur die voorste rande van die vakkies liggies sodat die oorspronklike…

In die skadu Rosemary Mason van Scottburgh skryf Ek is mal oor die bedekte stoep op bladsy 33 en die een op bladsy 117 van Tuis Werf 2015. Ons stoep is bedek met ’n vinnig groeiende Thunbergia-klimplant , maar noudat ek nie meer hulp in die tuin het nie, wil ek dit vervang met latte of iets soortgelyks en dit bedek met deursigtige dakplate. Ek woon by die kus, so ek is ook bekommerd oor die hitte; die stoep is oop en kry smiddae volson. Watter soort skadulap kan ek vir koelte gebruik? Tessa van Wyngaarden van Coolaroo antwoord As jy ’n soliede bedekking soek, is stoepblindings ideaal om hitte uit te hou. Daar is baie verskillende style om van te kies…

Musiekfabriek Marieta Liebenberg van Namibië skryf Ek besit die afgelope 30 jaar ’n Schiedmayer & Soehne Stuttgart-klavier. Agterop is daar ’n datum, 1901, en binne is daar drie verskillende wapens. Daar is ook ’n kaartjie wat aandui dat ene C.J. Pienaar dit op 12/6/1968 gestem het. Ons woon op ’n plaas in die Namibiese Kalahari en my dogter in die Kaap stel belang daarin. Het die 114 jaar oue klavier enige waarde? Hans Heuer van Musikhaus W. Heuer antwoord In gewone spreektaal sal ons sê dié klavier is ’n “goeie ou vooroorlogse Duitse regopklavier”. Wanneer ons so ’n klavier waardeer, neem ons hoofsaaklik twee dinge in ag: Eerstens die waarde wat die klavier as musiekinstrument mag hê wat betref sy speelbaarheid en klank, asook sy algemene strukturele en meganiese…

1 Plantgids Volksnaam Reusepapierblom Botaniese naam Limonium perezii Volson tot halfskaduwee Gemiddelde waterbehoeftes Immergroen Redelik bestand teen ryp Windbestand Goeie snyblom Groei 60cm hoog Reusepapierblom (Limonium perezii) Die reusepapierblom is enige kustuinier se droom. Dié meerjarige is windbestand, op sy gelukkigste naby die see en boonop ’n goeie snyblom wat lank in water hou. Wanneer die reusepapierblom van Junie regdeur die winter tot in die somer blom, is dit op sy mooiste. Plant dit in volson by die see of gedeeltelike skaduwee in die binneland waar dit baie warm is. Die plant hou van goed gedreineerde, selfs sanderige, grond en kan veral by die kus met min water klaarkom. Hoewel die plant droogtebestand is, wil dit in die binneland meer water hê. Sny dooie blomme gereeld af om dit…

1 Skadu in die tuin Moenie skadu sien as ’n probleem nie; beskou dit eerder as beskerming teen die son en ’n geleentheid om skaduliewende plante te kweek. Clivias helder skadukolle op, nie net in die lente wanneer C. miniata blom nie, maar ook in die herfs met C. gardenii en sy hangende blomme. Plectranthus groei in gefiltreerde of volskaduwee, en heelparty blom in die herfs. Sommige groei as struike met wit, pienk of pers blomme (P. fruticosis, P. ecklonii); ander is nuttige grondbedekkers vir klam grond (P. ciliatus, P. oertendahlii). Nog uitstekende grondbedekkers in die skadu is die waterwys Crassula multicava met sy vetplantagtige blare en klein wit-en-pienk blomme, hen-en-kuikens (Chlorophytum comosum) met gestreepte of groen blare en Liriope met sy klossies grasagtige, soms gestreepte loof en ligpers of…

Chipotle-braaisous Gee jou hoendervlerkies (of varktjops of -ribbetjies) nuwe woema met dié brandrissie-braaisous. Weens die hoë suikerinhoud is dit ’n goeie idee om eers die vleis gaar te braai of te kook en dan mildelik met die sous te bedek voor jy dit weer braai of bak tot lekker klewerig. Garneer met ’n sprinkel sesamsaad vir afronding. Genoeg vir 450ml sous • Bereidingstyd: 10 minute • 2 knoffelhuisies, gekap• 1 duim vars gemmer, geskil en gekap• 1 rooi brandrissie, ontpit en fyngekap• 15–45 ml chipotle-rissiepasta (hang af hoe skerp jy dit verkies)• 100 ml sojasous• 100 ml asyn• 125 ml All Goldtamatiesous• 60 ml worcestersous• 125 ml kookwater• 125 ml bruinsuiker• 30 ml heuning• 15 ml mielieblom Roer al die bestanddele behalwe die mielieblom saam in ’n kastrol tot al die suiker opgelos is. Roer genoeg van die sous by die mielieblom…

Paella Genoeg vir 6–8Bereidingstyd: 1 uurGaarmaaktyd: 45 minuteOondtemperatuur: 200°C (virdie hoender) • 125 ml olyfolie• 12 hoenderdytjies of -boudjies• 2 uie, fyngekap• 1 rooi soetrissie, in repies gesny• 4 knoffelhuisies, gekneus• 500 g arborio-rys• 3 tamaties, geskil, ontpit en gekap• 7,5 ml sout• varsgemaalde swartpeper na smaak• 10 ml paprika• ’n knypie saffraan in ’n bietjie kookwater geweek (of gebruik 5 ml borrie)• 3–4 (225 g) chorizoworsies, in skyfies gesny• 150 ml droë witwyn• 1–1,25 liter hoenderaftreksel• 500 g ferm witvis, in groterige blokke gesny• 12 middelslag-steurgarnale in die dop (verwyder die derm, maar hou die kop en stert aan)• 12 mossels, skoongemaak• 125 ml bevrore ertjies• pietersielie, gekap• 2 lemmetjies, in wiggies gesny 1 Voorverhit die oond. Verhit 15ml olyfolie in die paella-pan en braai die hoenderstukke tot goudbruin oraloor. Pak die hoender dan in ’n oondbak, bedek met foelie en oondrooster vir 15 minute. Dit verseker dat die…

Nou onlangs moes ek ’n klerekas in my nuwe huis laat inbou. Toe ek die ontwerper se planne kry, sien ek dat daar ook voorsiening gemaak is vir ’n laai wat so stewig kan sluit soos Fort Knox. Nou ja, die bewakers van Fort Knox beweer sy sekuriteit is ondeurdringbaar, maar ’n mens wonder darem. Selfs die verskriklike Alcatraz was ’n plek waaruit ’n paar roekelose manne kon ontsnap. Maar goed, ’n mens moet realisties wees, dis nié ’n slegte idee om ’n plek te hê waar jy jou waardevolste goed kan wegsluit nie. Toe die laai met sy slot uiteindelik ingebou is, moes ek besluit wát weggesluit moet word teen rower en rampokker. En toe kon ek nie anders as om vir myself te lag nie. Waardevol? My paar…