Innholdsfortegnelse for Tuis Opknap 2025 i Tuis

Hierdie redakteursbrief moet dalk kom met ’n “trigger warning” – veral as jy al jou vingers lelik verbrand het met ’n bouer. En as jy dalk nog jou wonde lek ná brou werk pleks van bou werk, skink gerus vir jou ’n glasie voor jy verder lees. Dis Februarie 2025, en die projek waaroor ek in laas jaar se Tuis Opknap geskryf het, kan uiteindelik begin. Die planne is toe wel ná 14 lange maande goedgekeur. Dis nie my en my projekbestuurder, Adriaan, se eerste dans nie, en ek weet die man is deeglik. Ons het oor die jare vriende geword – iets wat min mense kan sê nadat hulle huisverbeterings laat doen het. Die eerste week van die “minor works”-projek (die Stad Kaapstad se woord) kom met etlike verrassings…

WIE WOON HIER? Werner en Rouxlene MerboldGROOTTE 183,5 m² Almal wil ’n huisie by die see hê, sing Koos Kombuis mos. En sedert die 1920’s was Rose Cottage presies dit vir generasies mense wat jaar na jaar hier in die Suid-Kaap kom uitspan het. Werner en Rouxlene Merbold van Pretoria het as jonggetroudes tydens vakansies by ’n familielid verlief geraak op Klein-Brakrivier, ’n kusdorp tussen Mosselbaai en George. “Dis stil, klein, privaat en vol erfenishuise,” sê Rouxlene. Geen wonder dis waar hulle toe hul eie strandhuis wou koop nie. Deur die jare het Rose Cottage baie veranderings ondergaan en sy eienaars het gekom en gegaan – tot die Merbolds dit in 2013 gekoop het. “Van buite was dit ’n eenvoudige strandhuis met ’n rondawel,” vertel Rouxlene. “Die rondawel is omstreeks…

WIE KUIER HIER? Kevin en Lara McLoughlin, en hul kinders, Harrison (12), Georgia (10) en Archer (8); die honde Mickey, Charlie en Frank; ook Felix die kat GROOTTE 377 m² Dié paartjie van Gqeberha het jare lank gedroom oor ’n vakansiehuis vir die gesin langs die kanale in St. Francisbaai. “Ek hou al sedert my skooldae vakansie hier en ons albei hou van die buurt met sy elegante wit grasdakhuise,” verduidelik Lara. “In 2013 het ons ’n pragtige klein grasdakhuis in die dorp gekoop – in daardie stadium was ons kinders nog te jonk om so naby die water te wees.” Maar toe tref rampspoed hulle: In 2019 is hul huis deur wydverspreide brande in die gebied verwoes. “Ons het die huis herbou en een Kersvakansie daar deurgebring voor ons…

DIE EIENAARS Marilouise en Jacques van der Merwe GROOTTE 60 m² (onder dak 40 m²) Op die gasteplaas Fazenda in die Hermitage-vallei staan ’n glashuis waarvan die meeste mense net kan droom. Dit gryp jou verbeelding aan, en nooi jou na binne – dis hier waar koesterende stilte gaste in ’n andersins gejaagde wêreld laat tuiskom. En waar jy behoorlik kan asemskep. Dié gasteplek is nie nuut nie, en die baasbrein daaragter ook geen vreemdeling vir Tuis se lesers nie. Want Marilouise van der Merwe se mooi projekte – haar eie en vir ander mense – was al telkens op die blaaie van die tydskrif. Dit weet ons nou al van Marilouise – aanhou beweeg en geraas maak is haar forte. Tyd vir stilsit is min. En toe die winter…

Sny ’n lyn By die ingang na Asher en Gina Stoltz se huis in die lowerryke voorstad Orchards in Johannesburg is die voordeur agter ’n pienk wigvormige muur versteek. Dit dien as ’n duidelike dog diskrete rigtingwyser aan besoekers na hul drumpel. Niemand kan die helder kleur miskyk nie, en die driehoek is heeltemal tuis tussen ander geometriese vorms soos halfsirkels, vierkante, diamante en reghoeke in die huis se ontwerp (sien oorkant). Speeltyd! Asher vertel dat toe hy en sy vrou, Gina, besluit het om hul eie huis te bou, hulle gemik het vir iets anders as die gewone. Die geheimsinnige baksteen-“boks” wat hulle op ’n ou tennisbaan aan die onderpunt van ’n lang pypsteel gebou het, is voorwaar ’n kunswerk. Die paartjie en hul argitek, Gregory Katz, het die…

WIE WOON HIER? Henau Marais en Sharon O’Callaghan-Marais GROOTTE 293 m² Nadat Sharon en Henau se indrukwekkende opknapprojek in Mei 2019 op Tuis se voorblad en binneblaaie gepryk het, móés ons eenvoudig teruggaan toe ons hoor dié kreatiewe egpaar het onlangs weer ’n paar veranderinge aangebring. Hoe dan nou anders? As binneversierder en verfkenner is Sharon altyd aan die vernuwe, en vir ons is sy ’n bron van inspirasie. Tien jaar gelede, toe hulle die huis hier op Riebeek-Kasteel gekoop het, het dit ’n algehele gedaantewisseling ondergaan: Mure is uitgebreek, groot vensters en stapeldeure is geïnstalleer, ekstra kaste is ingebou en die kombuis verbeter. Daar was ook aanbouings: Henau en Sharon wou ’n groter spens, motorhuis, stoep en ateljee hê. Maar soos dit mos met gewoonte-opknappers gaan, is hulle gedurig…

# 1 PATROON Patroonteëls is al jare lank gewild – van treffende Marokkaanse ontwerpe wat wil-wil lyk asof alles nie by mekaar pas nie, tot stroke van herhaalde patrone wat ’n indrukwekkende visuele indruk maak. Hoewel Marokkaanse motiewe tydloos is, is meer moderne ontwerpe met eenvoudige vorms soos sirkels, halfsirkels en driehoeke vandag groot nuus – hetsy in simmetriese of onderbroke patrone (sien regs). En as die teëls handgemaak voorkom, nog te beter! In ’n era wat al hoe meer digitaal gerig raak, het rou of tekstuurryke afwerkings gesogte status verwerf. Volgens die kenners kan ’n meer tasbare oppervlak wat ons met ons vingerpunte kan ervaar, as teenvoeter vir te veel skermtyd op selfone dien. Met blou wat steeds ’n gewilde kleur is, en waarskynlik vir altyd sal wees, tel…

WIE WOON HIER? Klara en Daemon McClunan, en hul kinders, Lake (4), India Rose (amper 2) en Grey (3 maande) GROOTTE 428 m² Ofskoon ’n gedempte, neutrale voorkoms nie juis as jou tipiese keuse vir ’n jong gesin met drie kleingoed onder vyf beskou word nie, is die McClunans se huis presies wat hulle nog altyd wou hê. “Dis die eenvoud van wit wat ons aangetrek het. Dit skep ’n vredige, ordelike atmosfeer,” sê Klara. “Wat die kinders betref – laat ons maar sê Scotchgard, en koeksoda en asyn is onontbeerlik in my skoonmaak-arsenaal! Ons het geleer dat wit, saam met die nodige produkte en onderhoud, verbasend goed kan werk in ’n gesinshuis.” Toe die McClunans die eiendom in 2022 gekoop het, was die vernaamste trekpleisters die welige groenigheid en…