Innholdsfortegnelse for July 2021 i Tuis

Karin Brynard se rubriek oor slaaploosheid (bl. 138) laat my terugdink aan ’n storie uit my onderwysdae. Dis stelwerk-dag, en die gewone kandidate is vol verskonings. Lang stories oor die kort opdrag wat nie voltooi is nie. Die kronkelpad tussen die skoolbanke deur kon netsowel ’n droë rivierloop in die Karoo gewees het: Die ene beloftes dat daar – eendag! – weer water sal vloei, maar nie vandag nie. Vandag is dit droog en stowwerig, nes die verskonings. Behalwe een leerder s’n: Dié lê op sy arms en kreun, die las van ’n onbekende mediese insinking swaar op sy skouers. Die vorige dag is ’n wasige herinnering, vertel hy. Sy sinne is swaar en langsaam; hy kom met temerige moeite tot die punt. Hy was baie siek, loop die storie.…

WIE WOON HIER? Jan Sauer Lambrechts WAAR Richmond, Noord-Kaap GROOTTE 150m² Jan Sauer Lambrechts is nie veel van ’n prater nie; hy’s ’n doener. Hy hou hom eenkant terwyl Tuis se mense sy huis afneem, maar toe hulle ’n ruskans vat, sit hy ’n quiche vars uit die oond voor. Die juweel van ’n huisie wat hy hier op Richmond in die Groot-Karoo opgeknap het, is ’n toonbeeld van sy doenlustigheid. Ook die feit dat hy ’n gastehuis op die dorp bedryf, sowel as ’n steengroef 70km verder op De Aar én nog 40km verder ’n trouvenue buite Britstown. Beslis ’n doener. Sy wortels lê hier, maar Jan Sauer het twee jaar lank ’n Kaapse draai gegooi ná sy studie in stadsbeplanning en argitektoniese ontwerp. Toe roep die Karoo hom…

DIE PROBLEEM Andrea Krige van die Paarl skryf Ek en my man werk sedert die begin van die inperking verlede jaar voltyds van die huis af; ons is gelukkig om ’n tuiskantoor te hê met ’n deur wat ons ná ’n werkdag kan toetrek. Dit is ’n funksionele ruimte, met ’n lessenaar vir elkeen, maar ons kort inspirasie om dit aantrekliker en gemakliker te maak. Daar is ’n kabinet waarin ons van ons kantoorvoorraad kan bêre, maar die drukker staan op die een lessenaar waar dit baie ruimte in beslag neem. Ekstra bêreplek sal welkom wees en ons moet ’n mat kry. Help asseblief! DIE OPLOSSING Dina Venter van my.decorlist antwoord Julle kantoor is netjies, maar dit voel deurmekaar weens “visuele geraas”. Volgens die vloerplan is dit ’n ruim vertrek,…

Inspirasie uit die natuur Manon Potgieter van Gqeberha skryf Ek wil graag meer weet oor hierdie twee kunswerke deur Frederike Stokhuyzen (elke skildery is omtrent 15 x 12 cm groot). Kan julle dalk ook sê wat dit werd is? Kayleen Wrigley van Walker Scott Art Advisory antwoord Frederike Stokhuyzen is bekend vir haar talle stillewes en landskappe; sy put hoofsaaklik inspirasie uit die natuur. Die kunstenaar is van Nederlandse afkoms maar is gebore in Johannesburg, en het haar formele opleiding by Rhodes-Universiteit begin voordat sy in Londen by The Central School of Art gaan studeer het. Daar het sy op gekleurde glas gefokus. Dit is juis haar bedrewenheid in dié medium wat ’n kenmerkende drama aan haar skilderye verleen. Stokhuyzen het al talle groep- en solo-uitstallings in Suid-Afrika en oorsee…

Doodtevrede Bailey maak seker hy lê dié winter naby die kaggel. – Guinevere Ferguson-Williams, Tokai Skuif nader Die sussies Pepsi en Marshmallow hou mekaar warm terwyl dit buite reën. – Melinda Broster, Molteno, Oos-Kaap Uiltjie knip Mnr. Biggelsworth krul solank op waar iemand hom gaan kom warm sit. – Chantelle Bradley, Randburg Ons ‘koel’ maatjie! Benji en Snippie sit trots langs “hulle” skepping op hul eerste sneeu-uitstappie. – Retha Wepener, Sunningdale, Kaapstad >> Snoesig Tarzan weet daar’s niks lekkerder as om in jou kombers toegewikkel te slaap nie. – Lynette Blackie, Centurion Nog net 5 minute … Slaap is ’n wondersoete ding, glo Mollie Muis. – Marelese Marais, Durbanville Warm kopie Maak seker jou vierpootmaat bly aktief in die wintermaande met so ’n stylvolle harnas van Dear Pet Co. (vanaf…

Snoeiwenke Claude Scott van Johannesburg skryf Ek het ’n paar ‘Arianna’-rose wat ek moet snoei. Sover my kennis strek, moet ’n mens rose terugsnoei tot ’n ogie wat na buite wys en ’n skuins snit maak. Is dit reg? Ludwig antwoord Vroeër jare het tuiners hul rose so gesnoei omdat hulle geglo het dit sal die nuwe stele mooi buitentoe laat groei. Maar ons het gevind dat ’n roos groei soos hy wil en by die ogie uitloop wat hy dink die sterkste is. Al wat belangrik is, is dat jy ’n roos wat hoog groei terugsnoei tot 90 cm, ’n mediumhoë struik tot 70 cm en ’n lae roos – soos ‘Arianna’ – tot 50cm. Sny dooie hout of ou stele (met bruin dorings), asook stele wat oorkruis groei,…

DIE EIENAARS Conrad Conradie en Louise Steenkamp WAAR The Wild Bunch-blomplaas, Wellington GROOTTE 5 ha GRONDTIPE Sand en leem Conrad Conradie en Louise Steenkamp hou daarvan om dinge te laat groei. Selfs in ’n kelderwoonstel in die hart van Londen het dié twee plantliefhebbers tuin gemaak. “Ons het vir ’n hele paar jaar deur Europa en Afrika gereis en in ons vroeë dertigs teruggekom na Wellington, Conrad se grootworddorp. Hier het ons teen die hange van die Groenberg grond gehuur en organiese groente begin kweek,” vertel Louise. “Met die produkte het ons groentebokse aan huishoudings en restaurante in die Boland verskaf. Een jaar was daar nie veel aanvraag vir artisjokke nie en dié wat in die grond agtergebly het, het ontpop in die mooiste blomme. Ek onthou nog ek was…

Jy ken mos daardie goor gevoel van iewers in die nanag oppervlak toe dobber uit die slaap. Nie van ’n nagmerrie of ’n geluid of iets nie. Sommer net. Vir ’n oomblik doesel jy nog daar tussen slaap en wakker. Dan blaf daar ’n hond. Of ’n kriek haal sy geroeste viool reg onder jou slaapkamervenster uit. En jy is wakker. Lê daar met ronde oë vir die dak en staar. Dêm, sê jy vir jouself. Hier lê ons weer, uitgetiep op die verlate stasie van Insomnia. En die laaste trein is vort. Dan maar skape tel? Kwit, nee. Te vervelig. Selfhipnose, stel iemand voor, terugtel van tien en elke syfer visualiseer. Werk nie. Mantras opsê? Mediteer? Deesdae is daar hordes apps met “white noise” of branders of eindelose muzak…

WENBRIEF Asemrowend! Arina Meyer van Pretoria skryf Ek het die afgelope paar maande so las van my bors dat ek fluit-fluit deur die dag kom. Dan gebruik ek dié druppels, dan daardie gas ... Toe koop ek die April-uitgawe van Tuis – en dis die einde van die fluit! Dié is nou nie ’n nonsens-storie nie. Hier teen bladsy 40, 41 kom ek agter ek hou my asem op, en toe my brein roep “haal asem!” besef ek dis van verbasing – soos wanneer iets jou asem wegslaan. En hoe verder ek blaai, hoe beter voel ek. My hele lyf gaan in verbaasde skok oor hoe kreatief en met liefde die mense hul huise mooimaak. Ek besef net weer: Gaan doen jou passie-aankope, maar sorg dat jou en jou huis…

• Werk met wat jy het – moenie probeer om die huis iets te maak wat dit nie is nie. • Bestee eerder meer geld op materiaal van goeie gehalte, want ou huise kan deurentyd baie aandag verg. • Los al die probleme aan die huis op, anders gaan dit aanhoudend kop uitsteek. • Hou alle groot items neutraal en eenvoudig sodat dit vir jare lank steeds mooi sal wees. • Geniet die restourasieproses. Dis ’n belewenis om te sien hoe iets ouds voor jou oë weer nuut word.…

Die argitek-ontwerper Jenny Collins van Red Cat Design gee hierdie wenke vir goed ontwerpte oopplanruimtes: • Kry eers die argitektoniese elemente reg voordat jy met die interieurontwerp begin speel. • ’n L-vormige oopplan-leefruimte werk uitstekend, met die kombuis óf die sitkamer in die kort been, afhangend van wat by jou leefstyl pas. • Daar is niks wat ’n ruimte so goed laat voel soos natuurlike lig nie. Omdat dit as ’n skakel met die omgewing dien, help dit om ons te anker. • ’n Gemaklike rusbank is onontbeerlik in ’n leefvertrek. Kies een met ’n vorm wat goed inskakel by die vloei na ander vertrekke. Dit moet die sitdeel afbaken, maar nie inhok nie. Hoekbanke werk goed en moedig middagslapies of fliek-marathons saam met die hele gesin aan. • ’n…

PROJEKGIDS Harde werk 4/10 Vaardigheidsvlak 4/10 Tyd nodig 1-2 dae Doen dit self vir ± R897 (met genoeg verf oor vir toekomstige projekte) Wat jy nodig het INKOPIELYS • 250ml Tjhoko Paint Stéffan • 250ml Tjhoko Paint Godfrey’s Glimpse • 250ml Tjhoko Paint Thinus’s Terracotta • 28ml Tjhoko Paint Fine Lining • 250ml Tjhoko Paint Clear Glaze • Tjhoko Paint Stencil of Paris • Tjhoko Paint Caleidoscope2 Stencil 30-9-14 • 50mm-Tjhoko Paint (Hamilton’s) Ensign Brush • 38mm-Tjhoko Paint (Hamilton’s) Fibre Brush • Tjhoko Paint-kunstenaarskwas #8 GEREEDSKAP • gedrukte prente van jou keuse • maatband • kombuissponsie • handwerkspons • roller • koppie water • verfskraper • maskeerband Só maak jy… 1 Verf die rakke met Stéffan en die res van die raam met Godfrey’s Glimpse; wend twee lae aan en…

DIE EIENAARS Marcus Smit en sy vriende Len en Herman Kruger WAAR Vosburg in die Noord-Kaapse Karoo GROOTTE 155 m² (buitevertrekke ingesluit), erf 2 700 m² Vir Tuis se besoek aan Vosburg gooi Ricks Karoowinkel, dié Karoo-dorpie se enigste restaurant, sy deure wyd oop op ’n koue Dinsdagaand in Julie 2020, spesiaal ’n dag vroeër as die beplande amptelike opening. “Hier was glad nie ’n restaurant nie,” vertel die argitek Marcus Smit, mede-eienaar van die naweekhuisie wat ons kom afneem het. “Ricks sou Woensdag oopmaak, toe sê ek nee, hier kom mense, jy moet Dinsdagaand oopmaak,” lag hy. En dis hoe dit is op Vosburg. “Die dorpie is ver van die hoofpaaie en kry min besoekers. Gevolglik is dit stil hier en bly die dorp netjies omdat dit die normale…

Goeie nagrus Erica Fourie van Stellenbosch skryf Ons het nog altyd klein honde as troeteldiere gehad, maar het onlangs ’n nuweling, ’n Deense hond, verwelkom. Waarna moet ek uitkyk wanneer ek ’n bed vir so ’n groot hond kies? Morné Claassen, bemarkingsbestuurder van Wagworld, antwoord Net soos ons voordeel trek uit ’n goeie matras, is ’n lêplek met goeie ondersteuning ook belangrik vir jou hond se gerief en welstand. Verskillende honderasse se behoeftes verskil inderdaad wanneer dit kom by slaapplek. Neem die volgende in ag: Groter honde Die heel groot honderasse soos Deense honde, Ierse wolfhonde en Labradors sukkel dikwels met heup- en gewrigprobleme, asook elmboog-eelte, wanneer hulle ouer word. Die grootte en gewig van hierdie rasse dra by tot ekstra drukking op hul ledemate en gewrigte. ’n Geskikte bed…

G’n olywe nie? Sara Truter van Somerset-Wes skryf My 10 jaar oue olyfboom groei pragtig, maar sonder enige teken van vrugte. Verlede jaar het ek dit vir ’n roetskimmel behandel en dit het wel verdwyn. Nou sien ek hierdie “gebleikte” kolle op die blare. Kan dit sy vermoë om vrugte te dra, benadeel? Hoe kan ek my olyfboom se gesondheid verbeter? JJ antwoord Olyfbome hoef nie kruisbestuif te word nie, maar sal beter dra wanneer twee of meer kultivars gelyktydig bymekaar blom. Olyfbome verkies alkaliese grond en waardeer veral ’n dosis landboukalk elke paar maande. Voed elke twee of drie maande met 8:1:5-kunsmis om blare, blomme en vrugte aan te moedig. Die vlekke op die blare dui op blaarspringerinsekte (algemeen by olyfbome); behandel dit met Avigard of Malathion. Probeer om…

Artisjok (Cynara scolymus) PLANTGIDS Meerjarig Hoogte 100 tot 150cm Posisie Volson Saai in saadhouers Saaityd Oktober tot Januarie Ontkieming 7 tot 10 dae by 20 tot 26ºC* Plant saailinge 4 tot 6 weke later uit, van November tot Maart Spasiëring 100 cm Blomtyd Somer Kweekwenk Sorg vir goed gedreineerde, komposryke leemgrond. Oeswenke Die nek-gedeelte onder die vrug/blom moet stewig wees voordat jy pluk. Pluk wanneer toe, half-oop of oop. Uieblom (Allium) PLANTGIDS Eenjarig Hoogte 75 tot 100cm Posisie Volson Saai in saadhouers of direk in die grond Saaityd Januarie tot April Ontkieming 10 tot 20 dae by 18 tot 20 ºC* Plant saailinge 8 tot 12 weke later uit (van Maart tot Mei) Spasiëring 15 cm Blomtyd Oktober tot Januarie Kweekwenk Alliums hou…

Wildspastei Tamatiepuree is nie tradisioneel in ’n wildspastei nie, maar ek is mal oor die speserygeure saam met die tamatie in die vleissous. Proe self! Marineer die wildsvleis oornag in karringmelk as jy die wild se smaak wil temper. Maak 2 middelslag-pasteie Voorbereiding: 1 uur Gaarmaaktyd: Lánk, maar die moeite werd Oondtemperatuur: 200°C • 45ml olyfolie • 1 ontbeende springbokboud (sowat 2kg), in blokke gesny • 200g gerookte spek, in blokkies gesny • 5ml fyn koljander • 10 swartpeperkorrels • 2 steranyspeule • 5 naeltjies • 3 lourierblare • 1 blik (410g) tamatiepuree • 125ml blatjang • 125ml room • aartappelmeel of mielieblom • 2 rolle blaardeeg, ontvries • 1 eier, geklits 1 Verhit die olie in ’n kastrol en braai die wildsvleis in sarsies tot oraloor mooi goudbruin en gekaramelliseer. Braai dan die spek. Skep al die vleis terug in die pot en…

SKEP & VERNUWE WIE Paula Dubois WAAR Kaapstad BESIGHEID Paula Dubois Art & Design HAAR WERK Om in aanraking te bly met die natuur – en veral die band tussen die mens en die natuur te vier – is ’n sleutelgedagte in Paula se kuns. Sy soek die skoonheid in die alledaagse en put inspirasie deur elke dag teen Tafelberg te gaan stap en in die see te swem. Paula, wat die agterblad in elke Tuis illustreer, se jongste werk is te sien by “Reflect”, ’n uitstalling wat 1 Julie by Haas Collective (haaskoop.com) in Kaapstad open. Haar kuns is ook beskikbaar in die vorm van gedrukte plakpapier as deel van die Wallpaper Artist-versameling by Orms. Besigtig haar werk byormsprintroom.co.za/product/wallpaper-collection;plakpapierpryse begin by R495/m2 . Rig navrae aan decor@orms.co.za. Volg Paula…

WIE WOON HIER? Terry de Vries WAAR Barrydale, Klein-Karoo GROOTTE Sowat 200 m² (voorstoep uitgesluit), erf 1 115 m² Die helderblou tuinhek sit so half astrant tussen pragtige handgestapelde klipmure by Terry de Vries se huis op Barrydale. Die klip is pure Karoo, maar die kobaltblou hek herinner aan Mexiko. Terry, ’n oudjoernalis en jare lange Stellenbosser, woon sedert Junie 2018 op Barrydale. Sy is ’n bondel energie, maar terselfdertyd ook die ene rustigheid. Hoewel sy ’n B.Sc.-landbougraad het, is sy deesdae ’n transformasie-fasiliteerder en bied sy jogaklasse, labirintstappe en meditatiewe stilwordsessies aan by haar plek, Kamala Retreat House. In 1996, toe Terry reeds twee jaar klas gegee het by Maties se joernalistiek-departement, het haar reismiere erg begin kriewel. Die jaar voor haar seun, Josua (nou 29, ’n filmmaker), graad…

• As jy hoë plafonne het, kan jy met ’n groot skaal werk om die vertrek nog groter te laat lyk. Sit deure en vensters in wat van die vloer tot die plafon strek. Werk met lae: Hang byvoorbeeld bo ’n bed twee rye prente en daarbo nog iets, soos ’n bokkop – alles trek die oog boontoe. • Die regte muurkleur skep die atmosfeer vir die hele vertrek, daarom moet jy genoeg tyd bestee aan die kies van die regte verfkleur of plakpapier. • Elke vertrek het ’n fokuspunt nodig. Dit kan maklik geskep word deur ligte, meubelstukke of plakpapier wat die oog vang. Selfs iets kleins kan ’n groot impak maak as dit reg aangewend word. • Hou jou groot meubelstukke neutraal, dan kan jy die hele gevoel…

Sam Harris van Tuis se binneversierdiens Welkom Tuis stel dié moontlike alternatiewe uitlegte vir elke leefvertrek voor indien die inwoners ’n verandering oorweeg: #1 Sam, ’n interieurargitek, sê jy kan ’n groot impak maak deur net jou meubels te skuif. Sy is egter oortuig die meubelplasing in dié leefvertrek is perfek. #2 ’n L-vormige sofa in plaas van twee aparte banke kan goed werk in die Andrews-egpaar se gesellige sitplek, sê Sam, terwyl twee los gemakstoele aan die oorkant goeie vloei sal bevorder. #3 Omdat Irma Herbst se sonkamer so lank en smal is, is ’n oulike klein kroegie (óf koffiehoekie) ’n slim plan om die sit- en eetdeel te skei. Só skep jy ’n lieflike alles-in-een-onthaalarea. Die eetkamertafel kan dan in die teenoorstaande hoek van die vertrek inpas, met…

In dié jaarlikse kompetisie in vennootskap met Tjhoko Paint kan jy wondere verrig met verf, ’n kwas, roller en stensil. Gee jou verbeelding vrye teuels en gee terselfdertyd nuwe lewe aan iets ouds. Daar’s geen rede om altyd iets nuuts te koop nie, want met Tjhoko Paint kan jy toor en apploustrekkers skep reg deur jou huis. Om nie te praat van die lekker pryse wat jy kan wen nie ... NOU OP INSTAGRAM Vanjaar se kompetisie het ’n paar nuutjies. Die belangrikste is dat al die inskrywings op Instagram gelaai word. Dit beteken jy moet ’n Instagram-rekening hê; as jy nog nie een het nie, laai die app af in die Apple App Store of by Google Play, skep vir jou ’n profiel en laat waai. Stuur gerus ’n…

V: Ek hou so baie van die spieëls op bladsy 54 van Oktober 2019 se Tuis. Waar kan ek so iets koop? – Lisa de Swardt, Stellenbosch A: Die huiseienaars het hierdie twee ’n paar jaar gelede by Mr Price Home (mrphome.co.za) gekoop. Kyk uit vir spieëls in hierdie kapsule-vorm by Iconomy (iconomyonline.com) en Leroy Merlin (leroymerlin.co.za). V: Watter kleur is die mure in Lindie en Erick Senekal se ingangsportaal soos gesien op bladsy 34 van November 2019 se uitgawe? – Janine Johnson, Oos-Londen A: Die mure is met Plascon Snow Goose geverf. V: Waar het Andrew en Carina Johnson die kroegstoele op bladsy 47 van jul April 2021-uitgawe gekoop? – Hannelie Swart, Bredasdorp A: Carina het die stoeltjies in natuurlike dennehout gekoop by Mistry’s Pine Furniture (mistrys.co.za) en dit…

Hoe gemaak as jy ’n erg vervalle huis met so ’n erfenis koop? Werk met wat jy het en behou die eenvoud, is Marcus se raad. Vandag tik ’n eeu oue huis kwalik al die boksies vir gesellige samesyn wat spontaan van oopplan-ruimtes oorspoel na ’n stoep. Marcus is juis ’n gesellige, gasvrye man en boonop lief vir modernistiese argitektuur. Op Vosburg het hy hom egter laat lei deur sy liefde vir die Karoo-landskap, respek vir die huis se geskiedenis, en wat die interieur se oorspronklike uitleg rondom 1900 sou wees. “Dit was maklik om met dié erfenis te werk omdat die huisplan en elke vertrek se funksie eenvoudig en direk is. Die bestaande plan het my gelei om funksies soos kook en slaap weer te benader soos dit in…

Fokus op ficus Pas jou liefde vir tuinmaak ook op jou leefruimtes toe met die geil loof van huisplante. Hierdie vier Ficus- kultivars verskaf warmte en trefkrag in ’n kits: 1 Ficus elastica ‘Black Prince’ Vang die oog met hierdie rubberplant – dis modieus en stylvol met treffende groenswart blare, en geskik vir ’n ruimte wat baie lig kry. 2 Treurvy (Ficus benjamina) is die ideale boom vir ’n binnelandskap, met elegante takke en blink blare. Kyk uit vir boompies met gevlegte stamme. Die plant kan beperkte lig verduur. 3 Vioolblaarvy (Ficus lyrata) Met sy groot vioolvormige blare maak hierdie huisplant ’n dramatiese stelling. Plant dit in ryk kompos en plaas dit op ’n plek met helder indirekte lig. 4 Rubberplant (Ficus elastica) ’n Aantreklike sierplant wat die lug suiwer…

Nuut by die kwekery! Dubbele skoonheid Ranunculus Mâché ‘Lemon Rose Bicolour’ is te kry as potplant of as saailinge in ’n sespak. Danksy dié nuwe kultivar, wat van saad groei, kan jy nou hierdie lenteblomme geniet sonder dat jy bolle hoef te plant. ‘Lemon Rose Bicolour’, ’n nuweling in die Mâchéreeks, sluit enkelkleure soos oranje, pienk, pers, rooi en geel, en mengsels van helder of pastelkleure in. Die plante is sterk groeiers met stewige stele en groot blomme wat mooi afsteek tussen die donkergroen blare. Hulle vaar die beste in volson in vrugbare, komposryke grond wat goed dreineer. Met ’n hoogte van 30-40 cm is dié ranonkels ideaal as vullerplante agter ’n laer rand van gesiggies of viooltjies, asook in vensterbakke en potte op die stoep. KONTAK ballstraathof.co.za VERSKAFFERS @home…

WIE WOON HIER? Charmaine en Martin Haines WAAR Nieu-Bethesda GROOTTE VAN TUIN 600m² GRONDTIPE Klei Die tuin van die Haineskunstenaars is die ene verrassings en kontraste. ’n Mens verwag nie só ’n groen oase hier tussen die loom stofstrate en donkiekarre van Nieu-Bethesda nie. Nog minder die formele Victoriaanse uitleg van reguit gruispaadjies en afgebakende blombeddings. Maar in die leivore (soortgelyk aan dié langs die dorp se strate) vloei water wat onder die Karoogrond uit kom, terwyl die beddings gevul is met geharde plante wat die strawwe ryp van winternagte kan weerstaan. En die kunswerke op ’n mosaïekmuurtjie – die kop van ’n vrou met swart hare, ’n langbeenhaas, potte – is nie jou gewone langs-diepad-kopies nie. Die Uiehuis Nieu-Bethesda is veral bekend om die Uilhuis, ’n museum met die…

Botterskorsie-en-hoendersop Onder R85 • Genoeg vir 6 •Voorbereiding: 20 minute Gaarmaaktyd: 20 minute • 30ml botter • 1 klein ui, fyngekap • 30ml meel • 1 liter hoenderaftreksel • 1kg botterskorsieblokkies, gaar gestoom of gekook • 2 koppies gepluisde gaar hoender • 250ml room • ’n knippie rissievlokkies • 30ml gekapte pietersielie 1 Smelt die botter in ’n kastrol en braai die uie stadig tot glansend. Roer die meel by en braai nog ’n minuut. Klits die aftreksel geleidelik by om te keer dat daar klonte vorm. Roer die botterskorsie by en laat prut sowat 10 minute. Maak fyn met ’n staafmenger. 2 Roer die hoender, room, rissievlokkies en pietersielie by en laat prut tot warm en so dik soos jy daarvan hou. Geur laastens met sout en peper. Wenk Jy kan in plaas van net botterskorsie ook ’n mengsel…

Maak ’n 1-liter-poeding Voorbereiding: 10 minute Gaarmaaktyd: 2 uur, 30 minute • 125g sagte botter • 60ml bruinsuiker • 60ml marmelade*, plus ekstra vir voorsit • 2 ekstragroot eiers • 310ml (1¼ koppie) meel • 7,5ml bakpoeier • ’n knippie sout • 150ml warm melk * As jy nie van marmelade hou nie, kan jy dit met gesmelte appelkooskonfyt of selfs gouestroop vervang vir geurige soetigheid. ’n Knypie gedroogde gemmer is ook heerlik by die beslag. 1 Klits die botter, suiker en marmelade saam tot romerig en goed gemeng. Voeg die eiers by en klits tot gemeng. 2 Sif die meel, bakpoeier en sout oor die beslag en klits by. Voeg laaste die melk by en klits tot net glad. 3 Skep die beslag in ’n gesmeerde jellievorm, glasmengbak of broodpannetjie met ’n inhoudsmaat van 1 liter en…

Skoon en vars Elkeen kort ’n stapeltjie veelsydige sagte Mungo-katoenlappe (vanaf R280 per pak van vier, mungo.co.za) vir kombuistake en ongelukkies – of net oor hulle mooi kleure! DIE ENE VRUGTE Trots Suid-Afrikaanse A1 Fruit Water is vars vonkelwater wat verryk is met ’n skeut egte vrugte vir ’n smaaklike, gesonde bederfie sonder ’n enkele kilojoule. Die natuurlike vrugte-infusie en geure (mandaryn, pomelo en suurlemoen) in dié verfrissende drankie word ontgin as ’n neweproduk tydens die vervaardiging van vrugtekonsentrate. A1 Fruit Water bevat ook geen suiker, versoeters of preserveermiddels nie. Bestel joune by takealot.com of vind jou naaste verskaffer by a1fruitwater.com. OOR ’N KOPPIE TEE… Teeliefhebbers sal dol wees oor dié lieflike hardebandboek, An Invitation to Tea, deur Maranda Engelbrecht (R490, shop.babylonstoren.com). Dit bevat resepte ter viering van die drankie…