Innholdsfortegnelse for May 2020 i Tuis

Hoe vinnig kan die lewe nie verander nie. Net verlede maand kla ek nog oor Eskom, en kyk waar sit ons nou. Soos ons een medewerker, Maryke, my per WhatsApp laat weet: “Hoe wens ek dat die beurtkrag waaroor jy in jou April-brief skryf maar al was waaroor ons nou moet worry …” Dis inderdaad vreemde tye. Ongekend, en onvoorspelbaar. Daarom gaan ek liefs nie in hierdie brief skryf oor die koronavirus nie – dit voel vir my na moeilikheid soek. Bid jou aan teen volgende maand is daar iets nog ergers wat ons lewens ontwrig! Die Tuis-span is ’n klein groepie mense wat elke maand jou gunsteling-tydskrif aanmekaarsit. Party dae is ons letterlik ’n handjie vol op kantoor, want Marian en Francois skiet huise, die advertensiemense sien kliënte, Johané…

Op sy eentjie Minder kan soms meer wees wanneer dit kom by teksture byvoeg en afwerkings kies. Langs dié lieflike ingang staan ’n enkele dekoratiewe teël pragtig uit teen die sagte terracotta agtergrond, asook die vintage-deur omraam met klompie-stene. Dié speelse element het ons beslis twee keer laat kyk! Moenie teleurgesteld wees as jy net ’n paar teëls in jou gunsteling-ontwerp of selfs een met defekte kry nie. Gee sulke spesiale vondste die ereplek – iewers waar dit iemand gaan verras. Puik skuif! Tydens die opknap van hul huis in Vishoek, Kaapstad, het Kelly en Jonathan Croeser die kombuis in die hoofslaapkamer verander. Pleks van die kragboks en koopkragmeter te skuif, het hulle ’n pasgemaakte “skuifkopstuk” gemaak van ’n eenvoudige reghoekige houtraam en ’n standaardskuifdeurmeganisme. Kelly het die hout met…

# 1 Blou om te onthou Blou is die gewildste kleur in die wêreld. Dis ook een van Stefan Blom en Albie du Toit se gunstelingkleure, daarom was dit ’n voor die hand liggende keuse vir ’n gastekamer in hul huis in Groenpunt. “Blou kom oral in die natuur voor; dink net aan hoe blou die lug lyk wanneer jy op jou rug in die gras lê, of terwyl jy in koel blou water swem … Blou is bekend en vertroostend,” sê Stefan, ’n sielkundige. “Dit voel asof dié kamer jou omhels, en ons gaste is mal daaroor.” Stefan en Albie het blou oral in die kamer gebruik – die mure, vloer, kas, beddegoed én gordyne is alles blou. Vir ’n rustige atmosfeer het hulle drie verskillende skakerings herhaal, maar…

WIE WOON HIER? Angelo en Emmy Frasco en hul dogter Juliet WAAR Crofters Valley, Noordhoek GROOTTE 0,4 ha Toe die broers Angelo en Alex Frasco met twee susters, Emmy en Elizabeth Schofield, trou, het hulle waarskynlik nooit gedink dat hulle eendag ook saam sou woon nie. Maar sowat drie jaar gelede het die twee gesinne – en ’n ouma aan weerskante van die stamboom – besluit om saam ’n eiendom te koop sodat hulle hul hulpbronne kon saamvoeg en as ’n klein gemeenskap kon leef, met genoeg speelplek vir hul drie kinders. “Party mense het gedink ons is gek, maar ons het geweet dit kan werk. Ons verstaan mekaar se behoeftes en beperkings goed, wat dit maklik maak om so saam te bly,” sê Angelo. Hulle het agt jaar gelede…

Tydvir’n teeparty! Wie sou dink dat 19de-eeuse partytjies aan boord seilbote te midde van die roesemoes van die dokke in Sjanghai en Londen enigiets met plante te doen kon hê? Maar dit was op dié skepe en in dié hawens dat handelaars ’n fortuin kon maak óf verloor – alles gegrond op tee, destyds gemaak van die blare van die kamille-struik. Dit was die era van teehandel, toe Chinese seilskepe moes meeding in ’n dolle wedvaart verby die punt van Afrika om die eerste vrag van die seisoen te lewer. Wanneer etlike skepe tegelyk by hul bestemming aangekom het, het die teeprys drasties gedaal; dan was ’n drankie wat net vir die rykes beskore was, skielik vir Jan Alleman toeganklik. Londen se koffiehuise het in teekamers verander waar bekende digters…

Steak-en-peperpasteitjies met bier, patat en ertjies Die pasteivulsel se ryk vleissous is vol helder ertjies en happies soet patat. Die twee-bestanddeel-deeg het ’n sensasie op Instagram veroorsaak, met verskillende mense wat alles van pizza, naanbrood tot kaneelrolletjies daarmee maak. Ons het roosmaryn bygevoeg vir die maklikste pasteideeg. Genoeg vir 4 • Bereidingstyd: 50 minute Gaarmaaktyd: 3 uur • Oondtemperatuur: 180˚C • 650g biefblokkies (dikrib of ghoelasj werk goed) • 350g biefskenkelvleis, in blokkies gesny • 100ml meel • 5ml elk koljander, komyn en paprika • 10ml droë gemengde kruie • sowat 30ml olie • 1 ui, gekap • 1 wortel, fyngekap • 2 stingels seldery, fyngekap • 2 knoffelhuisies, gekap • 15ml tamatiepasta • 5ml heel reënboogpeperkorrels • 340ml (1 botteltjie) bier • 250ml vleisaftreksel • 125ml bevrore ertjies • 1 mediumgroot patat, in skyfies gesny en gaar gerooster* KORS • 500ml bruismeel • 375ml jogurt • ’n takkie roosmaryn, blaartjies…

Ek was nét besig om ’n nuwe voorraad van Ouma se inkontinensiebroekies in haar kas te pak toe ek ’n benoude geworstel agter my hoor. Met die omkyk sien ek sy sit met een van hulle oor haar kop getrek. Erger nog: Hy’t afgesak tot onder haar neus en aan ’n oorbel vasgehaak. Hoe die broek in die eerste plek daar beland het, is ’n lang storie. Ma is op die fyndraai na 95 en haar gedagtes is deesdae bitter kort en bitter min. Die tyd het die meeste van die kronkels in haar statige, wit kop al byna volledig platgevee. Sy het weer die onskuld van ’n kind. Al om die ander dag is ek by haar in die aftree-oord om te kuier en ’n nuwe voorraad “oepsie”-broekies en…

WIE WOON HIER? Adrian Lombard WAAR Pringlebaai, Wes-Kaap GROOTTE 344m² (stoepe ingesluit) Ruimtes word gevul met mense, daarom moet die klem op die mense, eerder as op die voorwerpe daarin, val. – Adrian Adrian Lombard maak nie net graag ander mense se blyplekke mooi nie, hy herskep ook sy eie huise in smaakvolle fokuspunte – soos dié houthuis op Pringlebaai wat hy en sy suster, Monica Soer, die afgelope twee jaar opgeknap het. Tydens sulke projekte werk hy so ver moontlik met klein, plaaslike bouspanne en entrepreneurs, terwyl Monica kreatiewe insette lewer. “Monica is goed met kleur en komposisie; sy’t ’n oog vir detail,” sê hy. “Ek noem myself ’n reeks-entrepreneur, want ek het ’n ingenieursen tegniese agtergrond, wat ’n goeie grondslag is vir my loopbaan as skeppende direkteur, handelsmerkstrateeg…

Die binne-ontwerper Salomé Gunter gee dié wenke vir enigeen wat met ’n wit palet werk en ’n minimalistiese voorkoms wil skep: • Werk laag op laag – dis die sleutel tot trefkrag in ’n wit palet. Bring opvallende artikels in as fokuspunte, soos ’n kleurvolle kunswerk, ’n interessante meubelstuk of ’n lamp wat die oog vang. Subtiele elemente soos ’n eenvoudige streep geverf op ’n andersins “kaal” muur sal ook ’n stelling maak sonder om te oorweldig. • Skep ’n gesellige atmosfeer in ’n minimalistiese ruimte met behulp van tekstuur – gebruik lap met verskillende teksture saam, byvoorbeeld linne en fluweel, en sluit natuurlike elemente en besadigde patrone in. • Moenie al wat ’n oppervlak is kaal los nie. Groepe van eenvoudige voorwerpe soos kerse in glashouers op ’n skinkbord…

Wat jy nodig het INKOPIELYS • ou houtbankie of koffietafel se raam • 50m seilband in twee kleure • oorskietverf (ons het Annie Sloan in die kleur Scandinavian Pink gebruik) • verseëlaar soos Sabre Paints Stoneseal (of gebruik was) • as jy nie krytverf gebruik nie, beveel ons ’n waterbasis-emaljeverf aan; verf dan eers met ’n onderlaag (soos Dulux Supergrip) GEREEDSKAP • skuurpapier • kwas • skêr • aansteker • kramgeweer PROJEKGIDS Harde werk 2/10 Vaardigheidsvlak 2/10 Tyd nodig 1 dag (die verf se droogtyd ingesluit) Doen dit self vir R400 (bankie gekoop op Gumtree R150; seilband R250 Só maak jy... 1 Dis nie nodig om die bankie te skuur as jy krytverf gebruik nie, tensy die raam ’n hoëglansafwerking het – dan moet jy liggies skuur. Indien jy ’n…

Om rande saam te gooi vir groter koopkrag is ’n slim plan wat beter moontlikhede ontsluit, maar as jy en ’n derde of vierde party saam in eiendom wil belê, hou dit ook uitdagings in. Doen jou huiswerk en gaan ooreenkomste aan wat al die partye sal beskerm. Stephan Osborne van Thomson Wilks het die volgende raad: 1 ’n Trust, soos die een wat die Frasco’s opgestel het, is een manier om ’n eiendom vir gemeenskaplike gebruik te koop. Die trust is die eienaar en die eiendom word geregistreer in die naam van die trust, waarvan die individuele mede-eienaars die trustees is. Laat ’n prokureur die trust opstel en die koopakte sorgvuldig formuleer, want dit reguleer die regte en bevoegdhede van al die partye, asook die prosedure by dood of…

WAAR Durbanville GRONDTIPE Leem Daar is een groot nadeel en een groot voordeel daaraan om ’n nuwe tuin vir ’n huis wat verhuur word, te ontwerp. Die nadeel is dat jy nie weet vir wie jy die tuin moet inrig nie. Sal daar byvoorbeeld kinders wees, want dan moet daar speelplek wees? Sal die huurders genoeg belangstel in tuinmaak om die tuin in stand te hou en te versorg? Die voordeel – en dit blyk baie groter as die nadeel te wees – is dat ’n goed ontwerpte tuin ’n huurhuis se waarde soveel kan opstoot dat dit in ’n hoër prysklas verhuur kan word. Wouter Kruidenier, ’n tuinontwerper van Durbanville buite Kaapstad, moes ’n ruk gelede dié uitdaging te bowe kom. “Die tuin van dié huis in die noordelike…

As jy nie ’n vars kokosneut in die hande kan kry nie, gebruik gerus gedroogde klapper. Ek het ’n resep uit S is for Sri Lankan van Quadrille Publishing as vertrekpunt gebruik en van die bestanddele se verhoudings aangepas. Meng ½ ui, baie fyn gekap, 5ml gedroogde brandrissievlokkies, 10 ml vissous, 5ml sout en die sap van 1 lemmetjie tot ’n pasta. Voeg 1 oorvol koppie varsgerasperde klapper by en meng deur. So maklik soos dit. ’n Strooisel vars koljander is glad nie tradisioneel nie, maar vir my heerlik hierby.…

SKEP EN INNOVEER! WIE Riana Mostert WAAR Durbanville BESIGHEID Riana Mostert Designs HAAR WERK Ná agt jaar as binneontwerper het Riana Mostert uit haar werk bedank om ’n tuisbly-ma te wees. Sy het haar heel eerste ononderbroke lyntekening as ’n geskenk vir iemand gemaak – en gou was dit ’n besigheid. “Die idee agter so ’n lyntekening is dat jy op een punt begin en die skets voltooi sonder om jou hand op te lig,” verduidelik Riana. “Dit gee jou ’n abstrakte tekening.” Riana het haar reeks illustrasies uitgebrei, en dit pryk nou op dekorbykomstighede soos strooikussings, lopers, planthouers en keramiekbekers. Sien meer by rianamostert.com. Iets vir elke smaak Verfris jou huis met ’n nuwe helder kleur: John’s Joy van Tjhoko Paint. Blaas nuwe lewe in jou leefruimtes met een…

• Werk met ’n 80/20-verhouding: Gebruik 80% van jou tyd vir beplanning en strategie, en 20% vir die uitvoering daarvan. Die meeste mense bestee te veel tyd aan uitvoering, wat jou duur te staan kan kom. • Hergebruik wat jy kan. Spandeer geld op dit wat reeds daar is of wat jy het, eerder as om net voor die voet nuut aan te koop. Herstilering en herskepping is uiters bevredigend. • Gee genoeg aandag aan vloei deur jou daaglikse bewegings en rituele in ag te neem. ’n Woning is nie ’n blote nutsruimte nie, dis ’n ruimte mét mense – mense met bepaalde persoonlikhede en gebruike. As ek ruimtes ontwerp of herontwerp, dink ek altyd hoe daardie ruimte sal lyk met mense wat daarbinne beweeg. • Gun jouself genoeg tyd.…

WIE WOON HIER? Lochie en Hermann Wessels en hul kinders, Armin (12) en Ziya (16) WAAR Stellenbosch GROOTTE 590m² In ’n boomryke woonbuurt op Stellenbosch staan een van die juwele in die kroon van die beroemde Bauhaus-argitek Pius Pahl. Die huis, nes ’n aantal ander op die dorp wat ook Pahl se breinkinders is, dra talle van die kenmerke van sy ontwerpe – groot houtraamvensters met identiese proporsies, leiklipvloere, kleiteëls, houtpanele en -plafonne, en die praktiese oop leefruimtes van die na-oorlogse modernisme. Toe Lochie en Hermann Wessels in 2011 die huis gekoop het, het dié geskiedenis hulle bekoor. “Ek het baie simpatie met die progressiewe Duitsers van die dertigerjare wat as’t ware moes vlug,” vertel hy. “Bauhaus as beweging was nog altyd vir my baie interessant. Dis te danke aan…

PROJEKGIDS  Harde werk 3/10 Vaardigheidsvlak 4/10 Tyd nodig 1½ uur Maak dit vir ± R1000: Hout R900, skroewe R10, Alcolin Fast Set Glue R30, skuurpapier R10, houtvuller R30 PROJEKNOTAS • Onthou om twee keer te meet, want dan koop jy net een keer. • Skuur jou planke vooraf. • Onthou om gidsgaatjies te boor. • Pas jou rak aan volgens jou behoeftes en beskikbare spasie. Wat jy nodig het INKOPIELYS • 18mm-laaghout, soos volg gesaag: een 1 400 x 650 mm en een 1 800 x 650 mm (rugkante) een 700 x 100mm en een 900 x 100mm (kort rakke) twee 1 400 x 70 mm en twee 1 764 x 70 mm (stutte) twee 1 420 x 100 mm en twee 1 700 x 100 mm (lang rakke) •…

Goudstandaard Retha van der Kolff van Gordonsbaai skryf Ons het dié eetservies met sy goue afwerking geërf. Dis sowat 20 jaar oud en skaars gebruik. Het dit enige waarde? Ainsley Taylor van Stephan Welz & Co. antwoord Dié sesstukstel word as ’n kontemporêre servies beskou. Die 18 kt.-goud om die rand dra ongelukkig nie by tot die waarde nie. OUDERDOM Circa laat 20ste eeu WAARDE R5 000–R7 000 Silwer randjie Michelle Klerck van Jeffreysbaai skryf Kan julle my meer vertel van dié kraffie? Is dit silwer en hoeveel is dit werd? Anton Welz van Stephan Welz & Co. antwoord Ek vermoed dit is ’n parfuumbottel wat in 1909 deur William Devenport in Birmingham gemaak is. Die silwermerke (die anker) vertel ons waar dit vervaardig is; die letters WD verwys na…

Gewaardeerde huismaats! Warm kopie Benji + Moon se keramiek-kosbakke vir honde en katte (11cm D; vanaf R299, benjiandmoon.co.za en woolworths.co.za) is ’n mooi alternatief vir plastiek. Dié handgemaakte produkte ondersteun plaaslike vakmanne en maak etenstyd ’n fênsie affêre! WEN!  Die eienaars van die diere op dié foto’s wen ’n groot K9 Castle vir honde of ’n Cuddle Cave vir katte van Wagworld (wagworld.co.za; ook te kry by veearts- en troeteldierwinkels). Die K9 Castle se sye is van sterk, waterbestande seil vir maklik afvee of met die tuinslang skoonspuit, terwyl jy die verwyderbare kussingoortreksel met koraalvlies aan die een kant en polikatoen aan die ander kant sommer in die wasmasjien kan gooi. Die weelderige Cuddle Cave van koraalvlies is perfek vir wegkruip en opkrul; of rits dit op warmer dae oop…

Plante wat in die tuin was; sommige is verplant: • Maartblomme (Amaryllis belladonna) • Narcissus • varklelies (Zantedeschia aethiopica) • kapelpypies (Chasmanthe) • boslelies (Clivia miniata) • verskillende mondograsse (Ophiopogon-spesies) • bastersaffraan (Cassine peragua) • sneeuvlokkies (Leucojum aestivum) • Virginia-klimop (Parthenocissus quinquefolia) • sterjasmyn (Trachelospermum jasminoides) • Australiese waterbessie (Syzygium paniculatum) Plante wat gekoop is: • gespikkelde muishondblaar (Plectranthus ciliatus) • Alternanthera ‘Purple Knight’ • verbleikblom (Brunfelsia pauciflora) • Viburnum tinus ‘Compactum’ • kraanvoëlblom (Strelitzia reginae) • heilige bamboes (Nandina domestica) • Ruscus hypoglossum – dit groei in son én skadu • Plectranthus ‘Mona Lavender’ • al die kruie Plante uit ander tuine of van steggies: • Duranta ‘Sheena’s Gold’ vaar goed in halfskadu • gewone outydse wit malvas in die sonnigste deel • ruigte-spoorsalie (Plectranthus madagascariensis ‘Variegata’) • spekboom…

Maak 2 kranse • 20g kitsgis • 625ml louwarm water • 125ml heuning • 125ml olyfolie • 15ml sout • 2 eiers • 5ml fyn kaneel • 150g donkersjokolade, gekap • 60ml sultanas • 1kg broodmeel, plus 250 ml AFRONDING • 1 eier, geklits • 30ml sesamsaad Het jy geweet? Challah (die woord is Bybels van oorsprong) is ’n spesiale brood in die Joodse kookkuns. Dit word gewoonlik gevleg en tipies geëet tydens seremoniële geleenthede soos die Sabbat en belangrike Joodse vakansiedae. Bron Wikipedia Maak die deeg 1 Giet die water in ’n groot bak en roer die gis by. Klits die heuning, olie, sout, eiers, kaneel, sjokolade en sultanas by tot goed deurgemeng. 2 Voeg die meel een koppie op ’n slag by; klits ná elke byvoeging en begin knie met jou hande wanneer die deeg begin stywer word. 3 Knie…

Penne met maalvleis en sampioene Onder R130 • Genoeg vir 4 porsies Bereidingstyd: 20 minute • Gaarmaaktyd: 15 minute • 15ml elk botter en olyfolie • 250g dwergsampioene, dungesny • 350g maalvleis • ’n knippie paprika • 2 knoffelhuisies, fyngekap • 15ml meel • 250ml hoenderaftreksel • ’n groot hand vol babaspinasie • 15ml Dijonmosterd • 125ml suurroom • 300g penne, gekook tot al dente • 125ml gerasperde parmesaan 1 Smelt die botter en olie saam in ’n pan en braai die sampioene stadig tot mooi bruin. Moenie onnodig roer nie, die pan sal te veel hitte verloor en die sampioene sal stoom pleks van bruin braai. Geur met sout en peper en voeg die maalvleis en paprika by. 2 Braai nou totdat die maalvleis ook mooi bruin en geurig is. Breek die maalvleis deurgaans op met ’n spaan sodat dit korrelrig is en…

GOED VIR MOEDERAARDE If You Care-bakpapier (R79, yuppiechef.com) is gemaak van 100% natuurlike, ongebleikte en chloorvrye perkament-waspapier wat geen geneties gemodifiseerde organismes of allergene bevat nie; dis geskik vir kos toedraai, bak, oondrooster of opwarm. DIE REGTE GEREEDSKAP Dek ’n stylvolle tafel met die New York Flatware-reeks van Hertex Haus (hertexhaus.co.za). Die 16-stuk-stel het ’n mat silwer afwerking en die hewwe is in óf swart óf koper versier. Kry dit teen R1 700. Klein maar getryn! Le Micro Magimix, die voedselverwerker wat ontwerp is om min plek in beslag te neem sonder om doeltreffendheid in te boet (R1899, yuppiechef.com), is die perfekte assistent vir huiskokke. Sy inhoudsmaat van 800ml maak dit ideaal vir kap, meng en verwerk in klein maat. OP REIS MET JOU PROE-KNOPPIES! Die talentvolle fotograwe en selferkende…