Innholdsfortegnelse for March 2020 i Tuis

Die afgelope jaar of wat het jy seker opgelet dat Tuis glad nie meer net ’n tydskrif is nie. Ons het lankal ’n digitale voetspoor ook – daar was ons eerste mobiblad; ons stuur al geruime tyd etlike nuusbriewe uit; jy volg ons dalk op Facebook, Instagram, of ons YouTube-kanaal! Maar met die bekendstelling van Netwerk24, met alles wat Media24 in Afrikaans doen op een digitale plek, het die Tuis-wêreld net nog groter geword. Nog nooit was dit so maklik om al jou gunsteling-leesstof te geniet in die palm van jou hand nie, hetsy in webformaat of PDF. Nou, in 2020, is daar nog nuwighede op die horison. Einde verlede jaar het ons die Tuis-winkel (tuishomeshop.co.za) gebou waar jy krytverf, en binnekort ook ander mooigoed, kan koop. Die Welkom Tuis-ontwerpdiens…

Die skrywer van dié maand se wenbrief kry ’n Linen Drawergeskenkbewys van R1 500. Linen Drawer vervaardig topgehaltebeddegoed van suiwer katoenperkal en linne, asook bad- en tafellinne, en lewer gratis af in SA. Hulle verskaf ook winterlakens, duvets en kussings, komberse en dekens, matrasbeskermers en bedrompe van goeie gehalte – als ontwerp om te verseker dat jy en jou gesin altyd ’n goeie nagrus kry. ’n Nuwe stel beddegoed van Linen Drawer sal jou lewe verander! Sien linendrawer.co.za.…

PROJEKGIDS  Harde werk 5/10 Vaardigheidsvlak 5/10 Tyd nodig 3 uur Maak dit vir ± R795: Hout vir basis en rande R685, skroewe R10, Alcolin Fast Set Glue R30, skuurpapier R10, houtvuller R60 PROJEKNOTAS • Maak die pote uit oorskiethout of koop dit klaar by ’n verskaffer soos Gelmar. • Skuur al die planke vooraf en boor gidsgaatjies waar nodig. Wat jy nodig het MATERIAAL • gelamineerde-dennehoutplank met mate: 960 x 460mm (basis) • 22 x 94mm- geskaafde donker hout soos meranti, gesaag in: twee 1 000 mm- en twee 500mm-planke (tafelrande) • vier pote, sowat 400mm hoog • oorskiethout in ’n ligte kleur, gesaag in: sewe 400 x 22 x 69mm-planke sewe 330 x 22 x 44mm-planke • oorskiethout in ’n donker kleur, gesaag in: sewe 325 x 22 x…

V: Waar het die huiseienaars die gordyne op bladsy 43 van Januarie 2020 se Tuis gekry? – Marna Opperman, Fochville A: Dié bepaalde gordyne is van Biggie Best (biggiebest.co.za); jy kan iets soortgelyks kry by Volpes (volpes.co.za). V: Ek hou so van die muurgemonteerde rak op bladsy 77 van die Desember 2019-uitgawe; waar kan ek dit koop? – Lenard Hall, Langebaan A: Eco Furniture Design (ecofurnituredesign.com) kan vir jou ’n soortgelyke rakeenheid maak. V: Waar kan ek die pragtige mat op bladsy 69 van die Desember 2019-uitgawe kry? – Amy Ackerman, Mosselbaai A: Daardie mat is van Black Fabrics (blackfabrics.co.za). V: Waar het julle die metaalnaamplaatjies gekoop vir die selfdoenprojek op bladsy 68 van Februarie 2020 se uitgawe? Ek soek al eeue na so iets! – Margie Grant, Bathurst A:…

Koelte teen die laatsomer-hitte. Warm kopie WUMA! kom nou in treffende nuwe verpakking as deel van Montego Pet Nutrition se splinternuwe voorkoms. Die reeks wissel van premium (WUMA! Adult and Puppy) tot super-premium (WUMA! PLUS) en is beskikbaar in sakke van 1,5kg, 8 kg en 20 kg. Sien montego.co.za. WEN! Die eienaars van die diere wie se foto’s hier verskyn, wen ’n middelslag-K9 Castle vir honde of ’n Nap Sack vir katte van Wagworld (wagworld.co.za; ook by veearts- en troeteldierwinkels te kry). Die K9 Castle se sye is van sterk, waterbestande seil, wat jy sommer met die tuinslang kan skoonspuit. Die verwyderbare kussingoortreksel het mikrovesel aan die een kant en koel katoen aan die ander kant. Die masjienwasbare Nap Sack kom in vier ontwerpe en is ideaal vir katte of…

Die fraaiste vetplante! Agave attenuata Dié plant se lang, geboë stam en blom is die rede vir sy volksnaam, leeustert. Dis ’n groot, aantreklike meerjarige vetplant, en met sy sagte silwergroen rosette wat soos ’n oop blom lyk, is dit altyd ’n apploustrekker. Omdat die plant, oorspronklik van Mexiko, waterwys, droogtebestand, nie-indringend en maklik is om te kweek, is dit ’n aanwins vir jou tuin. Kweek dit só Plant dié agave in volson of gedeeltelike skadu in grond wat goed dreineer. Gee net af en toe water sodat die grond nie heeltemal uitdroog nie; kunsmis is nie nodig nie. Klonale rosette vorm om die basis van die plant, en as jy dit so los, sal dit ’n bos vorm. Anders kan jy dié plantjies van die moederplant losmaak en uitplant.…

Somerreënstreek Spuit jou rose van die einde van die maand af twee keer ’n maand met Chronos teen swartvlek. Bemes met ’n dubbeldosis Vigorosa om te vergoed vir die voedsel wat die rose uit hul blare begin onttrek; maak dan goed nat. Hou aan om gereeld, minstens twee keer ’n week, water te gee. Plante wat spanning verduur weens te min water is meer vatbaar vir blaaspootjie. Winterreënstreek Gee blommende rankrose soos ‘Cocktail’, ‘Joseph’s Coat’, ‘Wedding Garland’, ‘High Hopes’, ‘Isidingo’ en al die Panarosas ekstra bemesting sodat hulle aanhou blom. Maak agterna goed nat. Wag tot dit begin reën en spuit dan elke maand met ’n kombinasie van Ludwig’s Insect Spray en Chronos teen plae, swartvlek en meeldou. Spuit met Plant Care indien jy las het van blaaspootjie. Hou ook…

Gibson Banda, Aleit se regterhand, en sy buurvrou Antoinette Stockley, help met die onderhoud van die tuin. “Ek het tot onlangs nie eens geweet Antoinette het ’n afstandbeheerder van die hek nie; sy kom en gaan soos sy wil. Sy en Gibson gee die plante kos, sit hand by waar nodig en hou die kruiebokse in stand. Ek het die houtkratte by ’n kerkbasaar gekoop. Ek is gek oor ’n kerkbasaar. Antoinette het die bokse vol geplant en weet wat om te doen om dit so goed te laat groei. Om te keer dat die hout vrot is die bokse met swart plastiek uitgevoer voor die grond ingesit is. Eti kom help wanneer en soos nodig met onderhoud, veral voor ’n groot geleentheid,” sê Aleit. Dan voeg hy laggend by:…

Kruipvy Het jy ’n onooglike muur wat jy wil laat toegroei, of wil jy dalk kontras teen ’n mooi baksteenmuur skep? Dan is ’n kruipvy (Ficus pumila) ’n goeie keuse. Dié klimplant klou self aan feitlik enige oppervlak en het geen ekstra ondersteuning of vasbind nodig nie. Dit groei aanvanklik stadig, maar die klein, jong blaartjies wat styf teen die muur vassit, maak ’n baie mooi vertoning – dit lyk kompleet of die jong takke met hul heldergroen blaartjies in ’n patroon al met die muur langs groei. Met verloop van tyd vorm daar uit die dun hooftak nuwe horisontale takke wat weg van die muur af groei. Dié takke het nie die selfklouvermoë van die aanvanklike jong groei nie en die blare wat daarop vorm, is groter. Indien jy…

OP DIE KASSIE In Open Homes (seisoen 1 begin 16 Maart op The Home Channel, DStv-kanaal 176) vergesel huis- en tuinontwerpers jou deur van die asemrowendste huise wat jy ooit sal sien – van spoggerige vakansievillas tot weggesteekte skatte met wonderlike uitsigte. Sien die voorste dekor-trends en selfs ’n huis wat teen ’n heuwel “hang”. Of jy nou opknap, bou of net die mooi wil sien, Open Homes is vir jou. DIE TOYOTA US WOORDFEES 6–15 Maart: Verskeie venues in en om Stellenbosch Die 2020-Woordfees het iets vir elkeen oor 16 kategorieë – van musiek tot teater, ’n skrywers- en filmfees, selfs landbou. Teaterliefhebbers kan kies uit 60 toneelstukke, waarvan 24 hul debuut by die fees maak. Jy kan ook ’n staptoer deur plaaslike tuine in samewerking met Tuis geniet…

’n Soliede plan Beton-afwerkings ry steeds die dekorgolf – nie net vir badkamer- en kombuisblaaie, teen mure of op vloere nie, maar ook as dit kom by meubels en dekor. “Dis die rou, ongekunstelde voorkoms van sement wat huiseienaars aantrek,” sê Johan Coetzee, die eienaar van World of Decorative Concrete (WODC) wat dié stylvolle stoeptafel met ’n betonblad vir die funksiebeplanner Aleit Swanepoel se huis in Somerset-Wes gemaak het (sien sy tuin op bladsy 92 ). “Beton werk goed saam met glas, metaal, linne en selfs papier,” verduidelik Aleit. “Dis die ideale medium as jy kontras wil skep tussen harde en sagte elemente.” Om dit te illustreer het hy verskillende sementvoorwerpe soos beelde, rame, onderborde – en selfs kerse met ’n sementvoorkoms – op dié lieflike tafel gebruik. Te mooi…

WIE WOON HIER? Warrick en Theodora Raubenheimer, hul kinders, Luke (17) en Tristin (14), en die honde Sky en Gogga WAAR Ongegund Village, Riebeekvallei GROOTTE 350m² Met die ontwerp van sy eie huis het die argitek Warrick Raubenheimer hom telkens vasgeloop: sy planne op papier was net te bekend, ’n herinnering aan iets wat hy al voorheen gesien of ontwerp het – hoewel hy vir hom en sy gesin bitter graag iets nuut en vars wou bou. Dit was eers toe hy en sy vrou, Theodora, begin speel het met die idee van staalraamvensters dat die stukke van die legkaart in mekaar begin pas het. Dié vensters is niks nuuts nie, maar ander ontwerp-elemente soos dik houtbalke en plafonne van rou beton het gevolg. Gou het sy droom begin vorm aanneem,…

Wat jy nodig het INKOPIELYS • ou kas • dennehoutplank (22 x 144 x 1 800 mm) • houtlym • 3 mm x 40 mmspaanderbordskroewe • houtvuller • universele onderlaag • Duram NuGlo in die kleure Orange Kloof en Darling White • rottangmat • wit hegband GEREEDSKAP • koordlose boor • plat skroewedraaier • tang • liniaal • winkelhaak • figuursaag • G-klampe • potlood • verfkwas • lap • skêr • kramgeweer PROJEKGIDS  Harde werk 2/10 Vaardigheidsvlak 2/10 Tyd nodig 1 dag Doen dit self vir ± R1060: rottangmat R660, verf R400 So maak jy... 1 Haal die kas se deure af en verwyder die handvatsels. 2 Ons het die lap van ons kas se deure afgehaal met ’n plat skroewedraaier en ’n tang. 3 Meet die binneste breedte…

Fyn gesny Nadine Parker van Kaapstad skryf My skoonpa se suster is onlangs oorlede en terwyl ons haar huis skoongemaak het, het ons op ’n JH Pierneeflinosneewerk, Fisherman’s Harbour Hermanus, afgekom. Het dit enige waarde en by wie kan ons die egtheid laat verifieer? Ruarc Peffers, besturende direkteur van Aspire Art Auctions, antwoord Die kunswerk is eintlik ’n reproduksie van die oorspronklike JH Pierneef-linosneewerk wat die vissershawe in Hermanus uitbeeld. Omdat historiese rekords beperk is, is dit moeilik om vas te stel wat presies gebeur het, maar ek verstaan dat Pierneef se weduwee, May, die boedel geërf het en ná sy dood gereël het om ’n stel van sy linosneewerke te laat herdruk. Sy het die Pretoriase kunstenaar Zakkie Eloff gevra om die drukproses te bestuur; die destydse vooraanstaande kunspublikasie Lantern…

Seisoen van oorvloed Hoe besonders is die herfs-ewening van die Suidelike Halfrond nie jaar ná jaar nie. Dis tyd vir feestelikheid en dankbaarheid, vir oeste wat ingesamel is, vrugte wat ryp geword het, geelgoue veldgras, fleurige padrande vol pienk en wit kosmos, en tuine wat hul herfsgewaad begin aantrek terwyl die glorie van die somer kwyn. In die herfstuin is daar altyd beweging, danksy ’n briesie wat deur die bome beweeg en blare wat grond toe val en ’n tapyt borduur in geel, oranje en rooi. Virginiese en Bostonse klimop skep ’n vlamrooi en goue mosaïek teen tuinmure, terwyl voëls smul aan ’n fees van bessies in struike en heinings. In randakkers spog rose wat in die somerson verbleik het nou met nuwe kleur, en deel dahlias hul herfsskoonheid net…

Misvormde blare Wendy Davies van Durbanville skryf My melkhoutboom van omtrent 14 jaar het in die afgelope jaar hierdie karbonkels op sy blare begin kry. Wat is dit en hoe raak ek daarvan ontslae? JJ antwoord Die probleem is bladvlooi, ’n insek wat sy eiertjies in die blare lê terwyl die blaartjie ontwikkel. Jy kan die boom spuit met Aphicide of Plant Care, wat vir omtrent drie weke lank sal werk, of jy kan Complete in water oplos en die grond rondom die boom daarmee deurdrenk sodat die wortels dit sistemies kan opneem; dit sal ongeveer ses maande lank werk. Ongelukkig sal die aangetaste blare nie weer regkom nie, maar die nuwe blare sal gesond wees. Lastige molle Malcolm de Roubaix van Bloubergstrand skryf ’n Stuk munisipale sandgrond langs my…

WIE WOON HIER? Aleit Swanepoel en sy dogter, Kateline WAAR Somerset-Wes GROOTTE VAN TUIN 800m² GRONDTIPE Klei Staan jy in Aleit Swanepoel se tuin, voel dit asof jy in ’n woud is, ver van die res van die wêreld. “Ek is gek oor my tuin,” vertel Aleit, voorsitter en stigter van die Aleit-groep wat spesialiseer in funksiebeplanning, en aanbieder van die kykNET-reeks Tyd met Aleit. “Dit is omring met hoë bome en grens aan ’n groen strook. Toe ek die eiendom in Junie 2018 koop, was dit baie verwaarloos. Ek hou van ’n mooi tuin, maar het nie groen vingers nie. Ek sou moes hulp kry. Dit is toe dat ek vir Eti Buys van Kimko Gardens gevra het om my te kom help.” Eti het vir my gesê ons…

Varkfilet met brandewyn-pruimedante Tradisioneel is vark met pruimedante ’n stadig gestoofde eenpangereg, maar as jy filet gebruik, is dié geurige ete in ’n japtrap klaar. Genoeg vir 4 ruim porsies • Bereidingstyd: 20 minute • Gaarmaaktyd: 20 minute • 12 pruimedante, ontpit en gehalveer • 90ml brandewyn • 2 x 800g-varkfilette • 30ml elk botter en olyfolie • 12 klein worteltjies, geskil en gehalveer • 2 selderystingels, gekap • 2 knoffelhuisies, gekap • 2 lourierblare • 2 takkies tiemie • ’n paar salieblare • 5ml meel • 125ml elk aftreksel en room 1 Week die pruimedante oornag in die brandewyn sodat die geure kan intrek en die droëvrugte kan swel. (As die tyd knyp, kook dit ’n paar minute saam.) 2 Sny elke filet in vier stukke. Plaas die vleis met die gesnyde kant na bo op ’n kapplank en slaan effens platter met…

Vir ’n klassieke Franse suurlemoentert klits jy 2 eiers, 100 g suiker, 150 ml room, die gerasperde skil en sap van 2 mediumgroot suurlemoene en 50 g gesmelte botter saam en giet dit in die kors. Bak die tert vir 15 minute by 180 °C, draai die temperatuur af na 160 °C en bak dan nog 20 minute of tot net-net gestol. Laat afkoel. Wenke • Laat die kors altyd afkoel voor jy dit vul. • Voeg ’n strooisel laventelblommetjies by die vulsel vir ekstra geur. • Garneer die tert met meringue as jy wil en skroei dit met ’n blaasvlam.…

DEK ’N TAFEL Sit ’n spogmaal voor op ’n DSA Hibiscustafeldoek van katoen (vanaf R1119 vir 180 x 230cm, yuppiechef.com). Te mooi! Effe droog Robertson-wynkelder het ’n droë opsie by sy gewilde reeks niealkoholiese vonkelwyne gevoeg. Die Dry Sparkling White (R55, robertsonwinery.co.za) is verfrissend sonder oormatige soetheid – perfek om aan te teug langs die swembad of teen sononder op die strand. Kersie op die koek Happy Culture se reeks probiotiese tee het twee nuwe geure bygekry! Die Cherry CBD is die ene heilsame vrugte, met ’n skeut topgehalte-CBDolie. Die Zesty Energy Kombucha bevat weer verfrissende sitrus, asook guarana en ginseng vir ’n energieinspuiting wat die liggaam én verstand verkwik. Besoek happyculture.co.za. Die heel beste Tweebestanddeel-deeg, driebestanddeel-kaaskoek, Steri Stumpie-mousse... Lui dit ’n klokkie? Dan het jy seker al dié Foodies…

WENBRIEF Sy’t ’n hand met ’n plant Lotta Marais van Wellington skryf As ’n mens hou van plante en van tuinmaak, maak jy ’n plan. Tydens die droogte het my huishulp, Rykie, se muurtuin inspirasie en groenigheid aan die vaal Wellingtonse omgewing gegee. Wat ’n plesier om haar daar af te laai en amper elke dag ’n nuwe vetplantjie teen die muur te sien. Rykie hou van groenigheid en lewe om haar. Met haar muurtuin slaan sy twee vlieë met een klap: Sy herwin die vele plastiekbottels wat die omgewing so versuur en maak iets moois daarmee. In ’n vaal omgewing pronk haar tuin en wys sy vir almal wat daar verbykom dat ’n mens iets moois uit niks kan skep. Rykie, jy’s ’n inspirasie vir ons almal! Ideaal vir…

SKEP EN INNOVEER! WIE Lebogang Sadiki WAAR Pretoria BESIGHEID S’Africa Lamp Designs HAAR WERK Lebogang Sadiki, ’n gekwalifiseerde rekenmeester, het ’n uitlaatklep vir haar kreatiwiteit gesoek; toe begin sy kontemporêre wasgedrukte lampkappe ontwerp en maak. Sy het S’Africa Lamp Designs in November 2019 begin, en in haar skeppings gebruik sy die treffende, kleurryke ontwerpe van Suid-Afrika se etniese groepe – van die Ndebele tot die Xitsonga. Haar reeks sluit lampkappe (vanaf R250), asook staanders van hout en keramiek in. Besoek safricalampdesigns.co.za om meer te sien en pasgemaakte ontwerpe aan te vra. Die meubelvervaardiger Coricraft het ’n nuwe reeks lieflike meubels vervaardig saam met Hertex en Home Fabrics. Dit spog met ’n verskeidenheid grafiese motiewe, luukse lap en geblomde borduurwerk. Die ten volle gestoffeerde Stella-stoel in Magnolia Sky-lap van Hertex (R9999)…

WIE WOON HIER? Lize-Marié en Mias van der Westhuyzen en hul kinders, studente Mia en Mieke-Marié, en Willem (15) WAAR Mostertsdrift, Stellenbosch GROOTTE 500m² Ná jare in ’n ou huis met donker houtafwerkings en -vloere het Lize-Marié en Mias van der Westhuyzen gevoel dit is tyd vir ’n verandering. Die huis in Stellenbosch se middedorp het boonop te knap geword vir die gesin van vyf, en rondom hulle is die bure se huise een ná die ander in studentewonings omskep. Toe hulle 14 jaar gelede ’n erf te koop sien reg langs die Jan Marais-natuurreservaat, het hulle geweet – híér kan hulle hul droomhuis oprig. Daar was net ’n klein huisie, “vierkantig soos ’n broodblik”, heel voor teen die straat, vertel Lize-Marié. “Niemand het eintlik geweet hoe groot die erf…

#1 Beste gebruik van ruimte Toe Sachar Pistorius en Anton Krugel in 2018 by ’n kleiner huis in Westdene, Johannesburg, intrek, het hulle besluit om hul pasgemaakte 10-sitplektafel te hou, al is die eetvertrek kleiner as in hul vorige huis. “Om die groot tafel te akkommodeer moes ons die ruimte in ons nuwe huis anders benut; daarom het ons die sit- en eetkamer omgeruil en die ‘funksie’ van dié twee ruimtes verander,” verduidelik Sachar. “As jy in ’n kleiner ruimte woon, laat dit jou nuut dink oor hoe jy jou geriewe ten beste kan benut. Die term ‘eetkamer’ kan gerus verander na ‘gemeenskaplike vertrek’, want ek dink baie huishoudings gebruik dit vir meer as net eet. Ons span dié ruimte in vir kuier, eet, werk en speel, en om dinge…

Swaar dra Paul Vogel van Pretoria skryf Op bladsy 36 van die November 2019-uitgawe het die huiseienaars steierplanke vir hul boekrak gebruik. Kan julle sê hoe hulle dit teen die muur gemonteer het om die boeke se gewig te dra? Tuis se DIY-ghoeroe, Deon de Goede, antwoord Onlangs, toe ek soortgelyke rakke in my eie huis opgesit het, het ek 12mm-gate in die middel van elke steierplank geboor, 10mmmetaalstawe in die gate gekap en só afgesaag sodat daar nog 120mm van die staalstaaf by die hout uitsteek. Hou dan die rak waar jy dit teen die muur wil hê en merk waar jy gate vir die stawe in die muur moet maak. Boor 12mm-gate in die muur, maar teen ’n effens afwaartse hoek. Skuif die stawe in die gate tot die rak…

WIE WOON HIER? Catherine Crawford WAAR Nuweland, Kaapstad GROOTTE 340 m2 Catherine Crawford was nie eintlik op soek na eiendom toe sy ’n ou huis in Nuweland koop nie. Maar nadat sy verneem het dat ’n huis in dié lowerryke buurt binnekort op die mark sou kom, het die idee om naby haar tweelingsuster in Newlands Village te bly, al hoe aantrekliker geraak. Die kothuis in die Kaaps-Georgiaanse styl, gebou in die 1950’s, het klein, donker vertrekke gehad wat uit die ingangsportaal gelei het, met die badkamers in die middel van die huis. Catherine wou die ruimte vernuwe met behulp van oopplan-leefareas en meer natuurlike lig. Haar swaer Yoram Shabat is ’n argitek, en sy het by hom aangeklop om die huis vir haar in ’n funksionele gesinshuis te verander.…

Internasionale Wouddag op 21 Maart beklemtoon hoe belangrik woude is. Diere het woude nodig vir veiligheid en kos, as toevlug weg van mense en vir beskerming teen die elemente. Bosvoëlspesies maak staat op woudhabitatte vir voedsel en skuiling en om in nes te maak. Maar weens ontbossing raak woude al hoe minder. Skep ’n stedelike ekostelsel met ’n miniatuur-woud in ’n deel van jou tuin wat skuiling aan voëls sal bied. Dit het ook ander voordele: Vallende blare verryk en verbeter grondgehalte; boomwortels verstewig die grond, hou afloopwater in toom en verminder water- en winderosie. Koop die sterkste en grootste bome wat jy kan bekostig, want bome neem lank om te vestig. En plant hulle redelik naby mekaar. Bome moenie ’n te digte skaduwee gooi nie en moet dalk liggies…

Jeremy Sykes van Somerset-Wes skryf My tuin het swaar kleigrond en my ‘Peach Melba’- rose sukkel. Help asseblief! Ludwig antwoord Klewerige kleigrond kan nie verbeter word deur net kompos rondom die rose te strooi en liggies in te werk nie. Jy moet die grond belug met growwe, verrykende materiaal soos grondboontjiedoppe, gebreekte appelkoospitte of basstukkies. Werk dit sowat 40cm diep in en moenie bekommerd wees as jy van die wortels in die proses afsny of loswoel nie. Maak dadelik baie goed nat, en gee daarna om en by twee keer ’n week water. Wag tot die roos genoeg nuwe stele en blare het voor jy bemesting toedien. Johan de Vries van Springs skryf Hoekom wil my ‘Ann Wrighton’-rose nie blom nie? Hulle kry genoeg son. Ludwig antwoord Ek het onlangs…

• Olienhout (Olea europaea subsp. africana) • Chinese esdoring (Acer buergerianum) • Witstinkhout (Celtis africana) • Heilige bamboes (Nandina domestica) • Krismisrose (Hydrangea-spesies) • Vingerhoedjies (Digitalis purpurea) • Kattekruid (Nepeta x faassenii) • Australiese viooltjie (Viola hederacea) • Vlaslelie (Dianella tasmanica ‘Variegata’) • Roosmalva (Pelargonium graveolens) • Irisse (Iris-spesies) • Verskillende soorte laventel (Lavandula-spesies) • Spoorsalies (Plectranthus-spesies) • Aronskelke (Zantedeschia aethiopica) • Ment (Mentha) as grondbedekker • Kruipvy (Ficus pumila) • Verskeidenheid kruie in houers…

Sit ’n vadoek onderin die kastrol waarin jy dit kook (dit keer dat die blikke onnodig teen die bodem kap terwyl dit kook). Sit die blik in die kastrol, bedek met water en bring tot kookpunt. Draai die hitte af tot laag sodat dit net-net prut, sit die deksel op (dit keer oormatige verdamping) en laat prut vir sowat 2 uur. Laat die kondensmelk in die water afkoel en moenie oopmaak voordat dit heeltemal koud is nie. Loer af en toe terwyl die blik kook en vul die water aan om seker te maak dit bly bedek, anders kan dit ontplof.…

Hoender met sampioene en tamatie Onder R130 • Genoeg vir 4–6 Bereidingstyd: 20 minute • Gaarmaaktyd: 40 minute • 15ml elk botter en olyfolie • 300g sampioene, gesny • 6 klein uitjies, geskil en gehalveer • 2 knoffelhuisies, gekap • 8 hoenderdyfilette, elk in twee gesny • 15ml meel • 350ml aftreksel • 15ml tamatiepasta • 3 takkies tiemie • rys vir voorsit 1 Smelt die botter en olie saam in ’n pan en braai die sampioene en uie tot mooi bruin. Roer die knoffel by. 2 Rol die hoender in die meel en geur met sout en peper na smaak. Stoot die groente eenkant in die pan en braai die hoender ook in die pan tot oraloor geseël. Voeg die aftreksel, tamatiepasta en tiemie by, bedek en laat prut vir 25 minute of totdat die hoender gaar en die sous geurig…

“Kan iemand help met ’n ‘message’-bed, een met ’n gat waar die gesig kom?” Dié noodkreet was onlangs op my buurt se WhatsAppgroep. Ek, wat net so nu en dan ’n oog gooi oor verrigtinge daar, moes lank gaan stilstaan by dié oproep tot redding. Onnodig lank. Ek wil aangaan met die lewe, maar as ek my weer kom kry, dan wonder ek oor daardie boodskapper-bed. En die gesig wat in die gat kom. Ek ken nie juis veel mense in die buurt nie, wat natuurlik nie help nie. Ek kort konteks, sien. Maar dis ’n woelige groep, so ek hou ook nie goed tred nie. Dit verg klaar buitengewone hoeveelhede naasteliefde om net by te bly met die doen en late van al die hondjies en katjies. Hulle is…