Innholdsfortegnelse for November 2019 i Tuis

Te midde van einde-van-diejaar-paniek kom ek nou die aand tuis en begin sommer die yskas regpak. Dit was nie dringend nie, maar op daardie oomblik noodsaaklik. In die ekosisteem van heersende choas is dié wit koelboks op daardie oomblik iets wat ek kan regruk, en raak my dekades oue Defy ’n metafoor van als wat wanhopig dog redbaar is. Die karringmelk vir die beskuit wat ek voor die winter al wou bak, kan ek nie eens meer uit die houertjie skink nie, dis dikvrot agter in die hoekie waar dit tussen die halwe konfytpotjies verlore geraak het; ek smyt dit net so weg. Cheddar met ’n klipharde sool? Sny af wat hard is, rasper die res. Oorryp tamaties? Vrieskas toe, vir bredies. Pap wortels? Kook vir die hond. Kwartbottel “flat”…

Die wenbrief-skrywer kry Herman Lensing se Dit proe soos huis ter waarde van R365! Herman dra sy vierde boek op aan sy ma. Susan Lensing het ieder en elk wat oor haar drumpel gestap het, kosgegee. Haar sêding was: “As ons net aanhou kook, sal ons die wêreld een bord op ’n slag mooier maak.” Terwyl Herman sy ma se staatmakers berei (uit haar handgeskrewe boekies, met ’n kinkel of twee van sy eie), neem hy ons op ’n kosreis van sy kinderdae op Upington tot in sy eie kombuis. Besoek humanrousseau.com.…

Om die hoek In die beroepsfotograwe en selferkende reisslawe Selma en André Ohlsson se kombuis in Durbanville, vang die rak van rou dennehout wat die muur al om die hoeke volg, dadelik jou oog – dis prakties en visueel stimulerend. “Ons het die idee op Pinterest gekry. Aanvanklik wou ons die ruimte vir breekgoed gebruik, maar tydens die opknap kon ons van soveel onnodige goed ontslae raak dat ons hier ’n prettige uitstalling kon skep. Die eintlike ‘kombuiserige goed’ is agter toe deure in die onderkaste,” sê Selma. Lig en helder Die kombuis is ontwerp deur Lee-Ann Vigus van LVstar Photography and Interiors; sy het nou saamgewerk met Nicholas Ripepi van My Style Woodworks en die vertrek omskep in ’n ruimte so reg na die eienaars se hart. Selma en…

WIE WOON HIER? Karel en Olivia Botha en hul kinders, Le Mar (2) en Tre Monne (1) WAAR Swellendam GROOTTE 260m² Olivia Botha het al as kind haar kreatiwiteit ontdek en sedertdien is haar wêreld die ene helder, opgewekte kleure. “Ek het op nege begin verf en teen 11 het ek my kunswerke begin verkoop – en eenvoudig nooit opgehou nie!” sê Olivia, wat Art de Olivia, ’n kunsgalery en -winkel op Parys, saam met haar man, Karel, besit. Olivia is so passievol oor kleur en dekor dat sy op ’n keer ’n strooikussing gekoop het net om dit na ’n verfwinkel te neem sodat hulle verf in presies dieselfde kleur kan meng vir ’n muur by haar huis se ingang. Karel is die selfdoener en praktiese ewewig vir haar…

IsoBoard bied jou ’n isolasie-oplossing vir nuwe én bestaande geboue, en dis een wat jy self kan installeer. Nou kan jou huis enige temperatuurskommelings sonder moeite hanteer en kan jy jou leef- en werkruimtes gemaklik hou vir die volle leeftyd van die gebou. Dié omgewingsvriendelike termiese isolasie is geskik vir al die onderskeie dele van jou huis en is net so veelsydig as wat dit doeltreffend is. Dit hou jou huis se temperatuur konstant, wat beteken jy gebruik minder elektrisiteit vir verwarming en verkoeling. Het jy geweet? 1 IsoBoard kan met waterbasisverf en houtbeits behandel word om by jou kleurskema te pas. 2 Wanneer jy ’n nuwe plafon oorweeg, kan jy die oue behou en IsoBoard eenvoudig direk daaronder installeer – ’n vinnige, permanente oplossing met die minste moeite of…

Ons vierpootkinders en hul maats! Sagte plekkie Kitty wag geduldig dat Scamp ’n slag wakker word sodat hulle kan speel. – Tracey Cotton, Durban Deur dik en dun Zesty die beagle en Karamel die spanjoel is onskeibaar. – Robbie Pretorius, Nelspruit Moeilikheid² Rocky en Jack is allermins engeltjies! – Wena van der Merwe, Porterville Soos kat en hond Die gemmerkat Simson lepellê te lekker met die langhaar-worshond Elvis.– Elsje en Johan Carinus, Stellenbosch Hoog genoeg Ginger en Duke het ’n warm sonkol gekry. – Terry Lane, Durbanville Aangename kennis Coco, Jasper en Zara ontmoet ’n nuwe maat op die plaas. – Anchen Wentzel, Brackenfell Warm kopie Probeer die veeldoelige Silicone Pet Grooming Glove (R79,99, mrphome.com) – dit hou jou troeteldiere gelukkig en jou huis skoon! Gebruik dit met badtyd om…

Ludwig se rooshoekie Selene Smith van Pietermaritzburg skryf Elke keer dat daar ’n knop op my ‘Black Madonna’-rose vorm, verskyn kewers of insekte uit die bloute en suig die voedingstowwe uit; dan gaan daardie knop dood. Ek het al talle spuitmiddels en selfs diatomeëaarde (DE) probeer, maar niks werk nie. Wat stel julle voor? Ludwig antwoord Dit kan ’n stinkbesie wees wat die probleem veroorsaak of ’n verwelkbesie wat onder die knop aan die bloeisteel suig terwyl dit nog sag is. Party insekte verkies spesifieke variëteite om aan te smul. Ek sou dink dat dit kan werk as jy die grond rondom die roos met Koinor deurdrenk. Koinor is vier tot vyf maande lank doeltreffend, so hou dop ingeval dit terugkom, maar hopelik het hulle dan al aanbeweeg. Natasha Wright…

Fairview se tuin word met kombuis- en tenkwater natgelei. “Jy sal verstom wees hoeveel skoon afspoelwater jy kan opvang in ’n plastiekbak in die kombuiswasbak. Dit gaan na die groente- en kruietuin naby die kombuis. Ek het ook vier watertenks met ’n totale inhoudsmaat van 15 000 liter op verskillende plekke in die tuin. By net twee is ’n pompie nodig om water mee te spuit; uit die ander twee kan ons met behulp van gravitasie water lei. Ons het visnet om die tenk naby ons agterstoep gespan waarteen ’n Mexikaanse trompetblom-ranker groei om dit minder opsigtelik te maak.”…

“Ek is ’n plantliefhebber en hoe meer, hoe beter. Dit is vir my moeilik om my te beperk tot tien gunstelinge,” vertel Benk. “Waarskynlik sal ek môre aan nog drie dink wat tot elke prys op my lys moet wees! Ek maak graag steggies en kweek plante van saad, en hou van selfsaaiers soos papawers.” Onder sy groot liefdes is: • Wildeakelei (Aquilegia vulgaris), wat sagtheid aan ’n bedding gee. • Die hibriedteeroos ‘Just Joey’ vir sy heerlike geur; dit is ook ’n sterk groeier. • ‘Albertine’-rankroos is ’n welige groeier met ’n geurige pienk roosknop. • Bosviooltjie (Barleria repens) is ’n goeie heiningplant; dit is inheems en droogtebestand. • Pronkridderspore (Delphinium x elatum) is my eerste keuse vir hoogte en as aksentplant. Maar stokrose (Alcea rosea) het ’n sterk…

Pynappel-rysslaai Onder R75 • Genoeg vir 4 Bereidingstyd: 15 minute • Gaarmaaktyd: 10 minute • 1 klein pynappel, geskil • 8 repe spek, gehalveer • sowat 30ml sesamolie • 1 wortel, gerasper • 1 rooi brandrissie, gekap • ½ rooi en ½ geel soetrissie, gekap • 500ml gaar bruinrys • ’n bossie sprietuie, gekap • vars koljander 1 Sny die pynappel in kwarte en verwyder die kern. Sny elke kwart in vier ewe groot blokke. Draai ’n halwe reep spek om elke blok pynappel en ryg op vier sosatiestokkies. 2 Verhit die sesamolie en braai die stokkies totdat die spek mooi bruin en gaar en die pynappel sappig is en begin sag word. Haal uit die pan en braai die wortel en rissies saam tot glansend. Voeg nog ’n bietjie olie by indien nodig. Roer die rys en sprietuie by en…

Goeie nuus as jy van melkkoffie hou: Nespresso, die leier in afgemete koffie, het pas sy Barista Creations-reeks bekendgestel. Dis ontwerp om met melk geniet te word – kies tussen Chiaro (“lig” in Italiaans), Scuro (“donker”) en Corto (“kort”) wanneer jy ’n melkerige koffie by die huis wil geniet nes jy daarvan hou.Besoek buynespresso.com. Diep beïndruk Dié mooi 12cm-Lilies-bakkie (R49, home.co.za) maak jou kosskepping ‘n kuns! Kom eet saam Pierneef à La Motterestaurant nooi gaste uit om hul maaltye te begin met gedeelde geregte geïnspireer deur ons ryk kulinêre erfenis, soos brood, smere, slaaie en vleis. Voorgeregte kom met staatmakers uit Ouma se spens: gepekelde of ingelegde vrugte en groente, chakalaka of blatjang, kaiings of kluitjies. ’n Gedeelde voorgereg en hoofmaaltyd kos R335 per persoon (nageregte kan as ’n ekstra…

My tandarts is mos so ’n aangename kêrel. Hy groet asof hy werklik bly is om jou daar tussen sy tydskrifte in die ontvangslokaal aan te tref, asof dit ’n heerlike verrassing is. Jy maak sy dag. Die meeste mense sal blommend reageer op so ’n groet. Die laaste knypie benoudheid sal verdwyn en hulle sal heel inskiklik saamstap na die stoel. Almal behalwe ek, dan. Ek reageer soos ’n skaap ter slagting. My bene skop onwillekeurig styf en my hakskene boor halsstarrig die grond in. Die dokter moet my behoorlik uit my stoel kom trek. Vra my nie waar hierdie banggeid vandaan kom nie. Dalk het ek iewers in my verre kleintjietyd ’n bloutjie met die tandmuis geloop. Of dis dalk selfs verborge trauma uit ’n vorige lewe, wie…

OP DIE KASSIE Seisoen twee van Baard, bos en kos, die kosprogram wat jou mond laat water, begin op 8 November op VIA, DStv-kanaal 147. In elke episode neem Meyer Le Roux van Buffelsfontein Baardolie-faam en The Bearded Chef, John Hall, ons na onverwagse bestemmings waar hulle fynproewerkos met ongewone toestelle en tegnieke – en vreemde bestanddele – berei. JAARLIKSE NAPPY RUN 2 November: Johannesburgse dieretuin Neem deel aan dié jaarlikse 5km-pretdraf by die Johannesburgse dieretuin op Internasionale Kinderdag. Draf, stap, drentel of laat wiel ter bewusmaking van kinders met gestremdhede. Koop kaartjies by nappyrun.org.za teen R100 vir volwassenes en R60 vir kinders; die opbrengs sal gebruik word om doeke te koop. Besoek nappyrun.org.za of skakel 011 452 2774. FRANSCHHOEK SE CAP CLASSIQUE-EN-SJAMPANJEFEES 30 November–1 Desember: Hugenotemonument, Franschhoek Begin die…

Almal kan Airbnb! Annalie Honniball van Winterton skryf Jul Home Sharing-konferensie in vennootskap met Airbnb het so interessant gelyk, maar ek kon ongelukkig nie daar wees nie. Het julle ’n DVD van die geleentheid gemaak, is daar ’n verslag oor die verrigtinge of, nog beter, iets aanlyn beskikbaar? Die Tuis-span antwoord Ons heel eerste Home Sharing-konferensie in Kaapstad was inderdaad baie insiggewend. Dit was ’n leersame dag vol pret – vir nuwelinge én ervare Airbnb-gashere. Daar was onder meer paneelbesprekings oor hoe jy jou eiendom kan bestuur, dekorwenke en ’n fotografie-meesterklas. Kenners in die bedryf het vrae van die 200 gaste beantwoord – hier is 15 van die interessantste punte wat gelug is: 1 Airbnb lys nou meer as 6 miljoen blyplekke die wêreld oor. Danksy dié platform kan jy…

Ek is mal oor kuns; dis noodsaaklik in ’n huis en moet ’n storie vertel, selfs in die kombuis. – Juanita WIE WOON HIER? Juanita Lacock en haar kinders, Lily (19) en Adriaan (16) WAAR Worcester GROOTTE 18m² In 2001 het Juanita Lacock, binneontwerper en stilis by Incanda, ’n pragtige ou huis wat in 1953 gebou is in Worcester se middedorp gekoop. Maar destyds het haar begroting net voorsiening gemaak vir oppervlakkige verbeterings in die kombuis, soos om die bestaande kaste te verf. Sestien jaar later het die tyd uiteindelik aangebreek vir ’n volskaalse opknap, insluitend strukturele veranderings. Juanita het nog altyd gedroom van ’n aparte opwaskamer en daarvoor sou sy ’n 9m²-vertrek moes aanbou. Tipies van ouer huise was daar ook nie genoeg natuurlike lig in die kombuis nie;…

Dr. Zarina Motala, ’n veearts by die Tygerberg-dierehospitaal, antwoord Om met diere te teel het voor- én nadele, en verskeie faktore moet oorweeg word. In ’n land met talle agterplaastelers moet troeteldiereienaars hulself afvra hoekom hulle met hul diere wil teel. Verantwoordelike, goed opgevoede telers is van onskatbare waarde. Hulle behandel hul diere soos familie, weet presies wat om te verwag en kan hulle dienooreenkomstig voorberei sodat ons goeie voorbeelde van die verskillende rasse het. Sulke telers soek hul diere sorgvuldig uit met behulp van prosesse soos X-straalgradering van heupe en elmboë. Hulle neem ook eienskappe soos liggaamsvorm of -bou en temperament in ag. Só kan hulle genetiese seleksie doen om gesonde hondjies te bevorder met ’n verlaagde risiko vir rasspesifieke oorerflike probleme – soos heupen elmboog-displasie, wat lamheid en…

Nadat Benk en Philda se kinders uit die huis is, is die grasperk heelwat kleiner gemaak en het hulle met metaalafskortings twee baie definitiewe tuinkamers geskep. Die tuinkamer aan die voorkant van die huis is meer formeel om by die argitektuur van die Kaaps-Georgiaanse huis te pas. Dit is hier waar Benk die formele roostuin aangelê het. Die ander tuinkamer is meer informeel met ’n gemengde bedding wat die formaliteit versag. Die sirkel-roosbedding is ook hier. Teen die metaalafskorting groei onder meer rose soos ‘Albertine’, ‘Cécile Brünner’, ‘New Dawn’, ‘Dorothy Perkins’ en ook klimplante soos bloureën en grenadellas. Die grenadellas groei besonder goed en oor die prieel op die voorstoep groei katôba-druiwe. Van albei maak Philda die heerlikste sap wat sy in die gastehuis bedien.…

1 Inheems en waterwys POUBLOM / UINTJIE ( DIETES BICOLOR ) Die inheemse poublom met sy lintvormige blare blom sonder ophou vir maande aaneen in die lente en somer, en is met baie min water tevrede. Die liggeel blom met drie bruin merkies op die blomblare verskyn op die punte van vertakte stele. En al hou elke blom net vir een dag aan die plant, blom dit so oorvloedig dat dit feitlik altyd kleur verskaf. Die plant is immergroen, meerjarig, ’n vinnige groeier en aard selfs goed in arm grond. Dit groei in volson en gedeeltelike skaduwee met min water, sowel as in klammer dele. In warm binnelandse streke moet dit verkieslik in gedeeltelike skaduwee geplant word. Die poublom het baie min aandag nodig en vermeerder vinnig. Gebruik…

WENBRIEF Daar sal weer ’n hond wees Charlotte Pretorius van Klerksdorp skryf My hondjie is sowat 5 maande gelede dood en my hart is nog baie seer daaroor. Jackie was vir 18 jaar deel van ons lewe voor kanker haar kom wegsteel het. Sy was die laaste paar dae bitter siek, en ons moes haar laat uitsit. Dit was ’n droewige dag en ek sukkel nog om vrede te maak daarmee. Toe sien ek die Lafarge-hondebakke in Augustus se Tuis. Ek het die blad uitgeskeur en in my “projekte-lêer” gebêre. Want wanneer ek weer kans sien vir ’n hondjie wil ek twee by die DBV gaan aanneem en dan vir hulle die bakkies maak. Intussen sien ek uit na die volgende uitgawe van Tuis vir nog mooimaak-planne vir my huis!…

Met inspirasie uit Tokara se lieflike tuin het die fotograaf Theresa Fourie, in samewerking met die Tokara Delicatessen in Stellenbosch, die eksklusiewe Tokara Collection bekendgestel – ’n reeks kussingslope, tafeldoeke en voorskote van suiwer linne bedruk met foto’s van tonele en blomme in die landgoed-tuin. Besoek die Tokara Deli of bestel by sarah@tokara.com. SKEP EN INNOVEER! WIE Talia van der Walt en Justine Darby WAAR Johannesburg BESIGHEID Sewing Room HUL WERK Met ’n gedeelde passie vir pragtige dekor en binneontwerp het Talia en Justine ’n aanlyn-ontwerpdiens op die been gebring wat ’n maklike eenstop-oplossing bied. Met Sewing Room kan jy uit ’n reeks trendy lap kies vir strooikussings, hondekussings, sitsakke, dekens en lampkappe in die grootte van jou keuse. Hulle het ook ’n ontwerpdiens waar jy persoonlike raad kan kry…

WIE WOON HIER? Dewald en Suzanne Coolen en hul seuns, Jonathan (9) en Nicolas (11) WAAR Somerset-Wes GROOTTE 590m² Toe Dewald en Suzanne Coolen in 2015 na die perfekte gesinshuis begin soek, het die 360-grade-uitsigte van ’n huis uit die negentigerjare op die Erinvale Country and Golf Estate in Somerset-Wes hul oog gevang. “Dis aan die punt van ’n doodloopstraat en het asemrowende uitsigte op die Helderberg aan een kant, en die Lourensfordwynlandgoed en Hottentots-Hollandberg tot by Valsbaai aan die ander kant,” verduidelik Suzanne. ’n Opknap was nodig en die paartjie het by ’n argitek en konstruksiemaatskappy gaan aanklop vir raad oor moontlike strukturele veranderinge voordat hulle die eiendom gekoop het. Die Coolens het uiteindelik besluit om eers in die huis te woon voor hulle die opknap aanpak; ’n jaar…

Wat jy nodig het INKOPIELYS • berke-laaghout – so groot soos jou tafelblad gesaag• 14 seshoekige teëls in grys en liggrys• kontakkleefmiddel• Woodoc Water-Borne Floor Matt• teëlgom• liggrys voegbry• helder silikoon GEREEDSKAP • potlood• liniaal• spasieerders (ons het sosatiestokkies gebruik; jy kan regte teël-spasieerders of vuurhoutjies gebruik)• G-klampe• figuursaag• boor met 8mm-houtboorpunt• aanwenders vir kleefmiddel en teëlgom• verfkwas• houer om voegbry in te meng• spons• lap PROJEKGIDS  Harde werk 2/10 Vaardigheidsvlak 4/10 Tyd nodig 5 uur, droogtyd uitgesluit Doen dit self vir R1280: Berke-laaghout R555, teëls R170, kontakkleefmiddel R100, teëlgom R150, voegbry R45, Woodoc Water-Borne Floor R260 Só maak jy... 1 Sit die laaghout op jou tafelblad. Rangskik die teëls in ’n organiese ontwerp op die blad. Ons het ’n paar bymekaar in die middel gepak en ’n paar verder…

Die Tuis- medewerker Shelly Bergh antwoord Maak eerstens seker enige matte in die vertrek het glyvaste rugkante. Indien nie, kan jy ’n glyvaste rugkant koop by ’n ysterwarewinkel soos Builders. As alternatief kan jy ’n egalige laag RustOleum Industrial Choice Anti-Slip Spray op die vloer aanwend. Berei die oppervlak voor deur dit deeglik met seep en water skoon te maak; laat dit dan goed droog word. Maak al die oppervlakke wat jy nie wil behandel nie toe met plastiekvelle en maskeerband. Spuit dan ’n egalige laag van die middel oor die vloer. Laat dit heeltemal droog word voor jy daarop loop. KONTAK shellybergh@gmail.com…

Dit kan intimiderend wees om die regte soort werkvlak vir jou kombuis-opknap te kies. Jou begroting en die voorkoms wat jy wil skep, is waarskynlik die belangrikste faktore wat jou uiteindelike keuse gaan bepaal. Stephanie Forbes, die nasionale bestuurder by The Kitchen Specialists Association of SA (KSA), gee raad: • Die huidige trend is ’n dun, skoon voorkoms soos dié van porselein en ander soliede materiale soos Corian. Selfs vervaardigers van saamgestelde klip het heelwat gevorder om hul blaaie so dun moontlik te maak sonder om integriteit in te boet. • Die marmervoorkoms is weer gewild. Natuurlike marmer is nie ’n goeie opsie vir ’n kombuis nie omdat dit sagter en meer poreus is as graniet, maar baie van die kunsmatig vervaardigde produkte slaag daarin om die kleur en tekstuur…

Metgeselplante Die gebruik van metgeselplante – en wat werk en wat nie – is oor jare van geslag na geslag deur tuiniers oorgedra. Baie daarvan berus op oorlewering, en hoe tuiniers besef het dat sommige plante saam floreer en ander nie. Gou het tuinmakers die wêreld oor besef sommige plante het sekere eienskappe wat ander kan beïnvloed. So het die Romeinse landboukundige Marcus Varro (116–29 v.C.) opgemerk dat niks onder ’n okkerneutboom wou groei nie. Nou is daar ontdek dat die wortels van dié boom ’n natuurlike onkruiddoder vervaardig wat giftig is vir ander plante. Die wortels van afrikaners (Tagetes) bevat ’n middel wat giftig is vir sekere rondewurms in die grond, en dit word dikwels in ’n bedding geplant voordat gewasse daar gekweek word, of tussen rye groente. Die…

• Kies jou groentebedding se plek met sorg. Dit moet sowat ses uur son per dag kry. • As jy wil groente eet, moet jy dit kos gee. Ek het drie komposhope en vul dit aan met hoender- en duiwemis. Met dié kompos, wurmkompos en -tee van ons wurmplaas en Atlantic Fertilisers se Bio Ganic All Purpose kry die groente als wat hulle nodig het. • Met ’n groentetuin naby die kombuisdeur is dit gerieflik om groente te oes én maklik om ’n teesakkie en ’n bietjie koffiemoer by die grond in te werk. In die kombuis het ons verskeie houers vir eierdoppe, groenteskille, koffiemoer en teesakkies. Aan die einde van elke dag word dit op die komposhoop leeggemaak. Die eierdoppe druk ons fyn en dan strooi ons dit rondom…

Benk het sowat twee jaar gelede alles in dié gemengde bedding uitgehaal. Hy was moeg vir heeltyd onkruid uittrek en het besluit om sy werk te verminder met ’n onkruidmat. Dit hou onkruid uit, maar laat water deur. Eers is ’n massa kompos in die bedding ingewerk en toe is die mat daarop neergesit. Daarna is gate in die onkruidmat gesny waarin die een- en meerjariges geplant is; ’n deklaag van houtskaafsels steek die mat weg. Hoewel daar steeds onkruid in die gesnyde gate opkom, is dit nie naastenby so baie soos vroeër nie. Die enigste probleem is dat selfsaaiers soos papawers nie in ’n bedding met onkruidmat kan opkom nie. Die een- en meerjariges in die bedding is 30–40 cm uit mekaar geplant. Hoewel dit aanvanklik effens kaal vertoon, groei…

Murgpampoentjieen-fetamuffins Maak dié maklike soutmuffins in ’n japtrap en geniet dit net so of met botter. Maak 12 muffins Bereidingstyd: 5 minute Baktyd: sowat 20 minute Oondtemperatuur: 180 ºC • 210 g (375 ml) bruismeel • 250ml grofgerasperde murgpampoentjies • 125ml brosgebraaide spekstukkies • 1 wiel romerige fetakaas, gekrummel • 100ml olie • 100ml karringmelk • 1 ekstragroot eier • 30ml sonneblomsaad 1 Voorverhit die oond. Meng die meel met die murgpampoentjies, spek en feta. Klits die olie, karringmelk en eier saam in ’n ander mengbak. Vou dit dan by die meel in tot net gemeng – klonte hier en daar is beter as ’n oorwerkte beslag. 2 Spuit die 12 holtes van ’n standaardmuffinpan met kleefwerende kossproei en verdeel die beslag só dat elke holte twee derdes vol is. Strooi die sonneblomsaadjies oor en bak tot goudbruin…

GESTOPTE VARKLENDE MET KRAKELING Varklende is ’n heerlike snit om met ’n vulsel te verryk en te oondrooster totdat die sooltjie bros en kraaklekker is. Genoeg vir 6–8 • Bereidingstyd: 45 minute • Gaarmaaktyd: sowat 2 uur • 2kg varklendestuk, met vel aan, teen kamertemperatuur • seesout en varsgemaalde swartpeper • 250ml aftreksel VULSEL • 8 skyfies (sowat 100g) Swartwoudham • 2 rolletjies sagte bokkaas gerol in paprika en peper • sowat 8 medjool-dadels, ontpit en oornag geweek in 60ml sjerrie • 16 glanskersies 1 Gebruik ’n skerp nutsmes en maak insnydings in die varkvel, 1cm uit mekaar, sonder om deur die vet in die vleis te sny (of vra jou slagter om dit vir jou te doen). Vryf mildelik in met sout en peper en plaas die vleisstuk met die velkant na onder op ’n skoon werkoppervlak. 2…