Innholdsfortegnelse for September 2017 i Rooi Rose

DIS WEER SEPTEMBER en die winter het ons vanjaar byna ongesiens verbygegaan. Is dit weens aardverwarming, of is dit maar net siklies van aard? Dis moeilik om te sê, want dis steeds bitter droog op sommige plekke en ons sal moet bly planne maak om water beter te benut. As ek kyk na ons munisipale rekening en die finansiële nagevolge van ’n doodgewone besoek aan die supermark, pak ’n onrustigheid my beet. Hoe hou ’n mens vandag kop bo water? Ons Afrikaanse mense is mos bekend daarvoor dat ons kan planmaak as dit moeilik gaan. Maar dit voel vir my deesdae asof mense voel hul hande is afgekap en die ramptrein spoed voort op sy onkeerbare pad van erg, na erger, tot ergste ... In ons elkedagse doen en late…

Die drie lesers wat hul menings met ons gedeel het, wen ’n Hedgren Seductionskouersak van R1 895 elk. Het jy ’n life hack, ’n kortpadplannetjie, wat jou alledaagse lewe op een of ander manier makliker maak? Kinnie Jacobs (64), pensioentrekker, Middelburg. Ek maak lysies. Voorin my skryfboek kom my daaglikse lysie van wat gedoen en gekoop moet word; in die middel van die boek skryf ek my korttermynbeplanning (so vir die volgende drie maande) en agter kom my doelwitte vir die jaar. Ek kan dadelik sien wat afgehandel is en dit laat my voel dat ek in beheer is. Sonja Bason (52), administrateur, Klerksdorp Ek verkies dit om die vorige aand reeds twee kledingstukke vir die volgende oggend op standby te hê. Dit maak die wat-moet-ekaantrek- besluit soveel makliker. Madelein…

1 Michelle Pfeiffer as Catwoman in Batman Returns. 2 Gal Gadot in Wonder Woman. Boonop was die Israeliese aktrise vier maande swanger toe sy die aksietonele moes doen. 3 Angelina Jolie as Evelyn Salt in Salt. 4 Uma Thurman as The Bride in die Kill Bill-flieks. 5 Charlize Theron as Imperator Furiosa in Mad Max: Fury Road 6 Linda Hamilton as Sarah Connor in Terminator. 7 Jennifer Lawrence as Raven/Mystique in die X-Men-flieks. 8 Sigourney Weaver as Ellen Ripley in Alien. 9 Jennifer Lawrence as Katniss Everdeen in The Hunger Games-trilogie. 10 Scarlett Johansson as die Black Widow in The Avengers-flieks.…

As beoordelaar by die ATKV-Tienertoneelkompetisie, kry sy te doen met baie jongmense wat van ’n lewe in die kollig droom. Het sy vir hulle (en hul ouers) raad? “Voordat jy drama as loopbaan kies, doen eers jou navorsing. Gaan kyk na soveel moontlik toneelstukke, en maak driedubbeldseker dis wat jy wil doen. Dit lyk dalk na ’n wonderlike, romantiese bestaan, maar ek kan jou verseker dit is nie. Ek wens eintlik daar is meer platforms soos ATKV-Tienertoneel waar tieners aan toneelspel en alles wat daarmee saamgaan – ook agter die verhoog - blootgestel kan word. Jy moet vooraf weet waarvoor jy jou inlaat, en jy moet bereid wees om onder te begin en baie hard te werk.” Sy glo dis belangrik dat ’n mens sag met jouself werk. “Moet jou…

Dis moeilik om te glo dat Sue Pyler ooit iets anders as haar kenmerkende stilettos en modieuse uitrustings gedra het. Die prentjie wat sy skets van haar dae as besige rabbedoe in George se Pacaltsdorp-woonbuurt, is in sterk kontras met die byderwetse Sue wat daagliks vrolik by die RSG-ateljee indwarrel. “Ek het nooit iets anders as ’n sweetpakbroek, gholfhempie en tekkies gedra nie. Tot op universiteit toe nog. Ek was váál – ek het nooit grimering gedra nie, en het veel eerder saam met die seuns buite gespeel, selfs toe ek al ’n tiener was.” Haar kinderdae in een van die mooiste dorpe in die Suid-Kaap klink onbevange, sorgvry. Daar was ook karateklasse, redenaars, blokfluit- en klavierlesse en die dramaklasse wat in graad elf bygekom het. Wat sy toe so…

• In China is ’n baba by geboorte reeds een jaar oud, nie nul soos in die Weste nie. • In dele van Sentraal- en Suid- Amerika is die piñata (’n dier of ander figuur van papierpap) die middelpunt van ’n verjaardagviering. Dit word aan ’n boom of paal opgehang, en die geblinddoekte verjaardagmaat moet dit met ’n stok stukkend slaan om by die lekkergoed en speelgoed binne-in uit te kom. • In Venezuela word jou gesig sommer in die koek gedruk terwyl jy die kersies doodblaas - ook dan die einde van die koek. • In Indië voer jy vir elkeen van jou gaste ’n stukkie koek, en dan voer hulle jóú weer om ’n gelukkige jaar te verseker. Dit kan ’n vrolike gemors tot gevolg hê. • Jy…

susram@ctp-mail.co.za @susra_morkel SUSRA KIES Dink Grieks Die Folli Follie-reeks word al sedert 1892 deur sy Griekse styl gekenmerk, maar dit was toe al ’n reeks met ’n kinkel. Dit het as ’n speelse en bekostigbare luuksheid vir die modebewuste vrou bekend geraak. ARMBAND MET BLOU SIRKONIUMSTEENTJIES (R1 790) FOLLI FOLLIE. Vir jou lewenstyl Eden & Co. Quality Leather Goods is bekend vir sy tydlose leerprodukte. Die nuwe reeks, KLASSIK, fokus op ’n veelsydiger ontwerp wat by jóú lewenstyl pas. LEERHANDSAK/ DOEKSAK (R3 270) EDEN & CO. Prikkelende skoonheid Die nuwe Cactus de Cartier-reeks is die perfekte kombinasie van kuns en die skoonheid wat in die natuur te vinde is. Dié besondere ring is saamgestel uit gerangskikte glansspelde – elkeen versier met ’n diamant. ROOSGOUDRING MET DIAMANTE EN EDELSTENE (PRYS OP…

Ons bly in ’n “nimmereindigende” wêreld, sê Tony Crabble, skrywer van die boek, Busy: How to Thrive in a World of too Much. Daar is altyd nóg e-posboodskappe, nóg vergaderings, meer goed om te lees of idees om op te volg. En die tegnologie stel ons boonop in staat om net al hoe meer “moet doen”-lysies te maak, of dit nou tuis of op vakansie is. Die gevolg is dat ons al hoe meer oorweldig voel en boonop die sosiale druk ervaar om “alles te doen”, verduidelik hy. Die uiteinde is lae energievlakke en moegheid. Die resultate van Mintel se Trends 2025 Beauty and Personal Care-navorsing wys dan ook dat vier uit vyf Britte daardie “geen energie-gevoel” verpes wat deel van hul lewe geword het. Moegheid is ook Amerikaners se…

suzannek@ctp-mail.co.za @suzannekotze CORNÉ KIES ROOS hemel Toe Sisley Black Rose Cream Mask in 2011 bekend gestel is, het die meeste skoonheidsredakteurs dadelik op die produk verlief geraak. Dit gee die wonderlikste glans aan jou vel. Die masker is saam hospitaal toe met albei my kinders se geboorte, ek vlieg nooit daarsonder nie en ek gebruik dit voor elke spesiale geleentheid. Geen wonder die masker was ’n reusesukses nie. Daarna is die Precious Facial Oil bekend gestel en die jongste is die SISLEY BLACK ROSE SKIN INFUSION CREAM (R2 285). Wat ’n lieflike produk! Dit ruik fantasties, die room smelt amper soos ’n jel in jou vel in en dit gee pragtige glans. ’n Fees vir jou sintuie. SUZANNE ’n MÓÉT vir die handsak Die vorm en grootte van die houer…

salomed@ctp-mail.co.za @pretty_healthy GEWONE SEEP IS GOED GENOEG • Is jy een van die sorgsames wat elke produk koop wat ekstra beskerming teen kieme beloof? Die FDA het in September 2016 negentien middels geïdentifiseer wat teen September 2017 nie meer in die VSA in verbruikersitems gebruik mag word nie. Dié antibakteriële middels is niks beter as gewone seep en water nie. Maar die eintlike probleem is dat hulle van kankerwekkers tot hormoonsteurders en omgewingsbesoedelaars insluit. In ons land is daar nie sulke wetgewing nie. Van die verantwoordelike vervaardigers het al aangepas en gebruik nou middels wat (in elk geval op die oomblik) veilig is. Maar ons kan self etikette lees en kies waarop ons ons geld bestee. • As jy “anti-bacterial” of “extra protection” op ’n item sien, vermy enigiets met…

Volgens Linda Germishuizen is hierdie vraelys uit Natural Highs deur Patrick Holford en dr. Hyla Cass ’n goeie manier om sommer jou stresvlakke te meet. Antwoord eerlik op die volgende 15 vrae. Merk elkeen wat op jou van toepassing is. • Sukkel jy om te ontspan? • Voel jy geïrriteerd? • Bekommer jy jou oor alledaagse goedjies en sukkel jy om af te skakel? • Rook of drink jy baie volgens ander mense se standaarde? • Is jy kompeterend en aggressief in wat jy doen? • Sukkel jy om met ander oor die weg te kom? • Is jy ongeduldig met ander? • Eet jy vinnig? • Pak jy te veel goed aan? • Sukkel jy om te delegeer? • Pyn jou ledemate, of sukkel jy gedurig met hoofpyne? •…

Daar is ’n besliste verband tussen aandagafleibaarheid by kinders en hul ma’s se alkoholgebruik tydens swangerskap. Ma’s wat meer drink, sal meer waarskynlik hiper-aktiewe kinders met konsentrasieprobleme hê, toon navorsing deur prof. Philip May van die Universiteit van Noord-Carolina en ’n span Suid-Afrikaanse navorsers onder leiding van prof. Soraya Seedat van die Universiteit van Stellenbosch. Volgens prof. Charles Parry van die Suid-Afrikaanse Mediese Navorsingsraad lei alkohol tydens swangerskap beslis tot swakker verstandelike ontwikkeling. “Hoe meer ’n ma drink, hoe laer is die verbale en nieverbale IK, hoe swakker is die kind se konsentrasie en hoe meer hiperaktief is die kind.” Leana Olivier, hoof van die Foundation for Alcohol Research (FARR) stem saam. “Soms word ADHD by kinders gediagnoseer terwyl hulle eintlik FASS het.” Ongelukkig is daar volgens haar nog te…

Die reuseswart- wit foto skep ’n interessante fokuspunt Hierdie besondere oorgooilappe is in Afrika met die hand geborduur Eksperimenteer gerus met dekoritems in verskeie etniese style…

LEMMETJIEKAASKOEK GENOEG VIR 6 Die kaaskoek is glutenvry en as jy die bolaag weglaat, ook suiwelvry. Matcha is groen tee-poeier wat by gesondheidswinkel te kry is. Die heuning balanseer die bitterheid van die matcha en gee dit ’n lieflike teegeur. Lees meer oor matcha op “Koskas”. BASIS • 2 dadels, ontpit • 40 g fyn klapper • 50 g amandels • 35 g pistasieneute • 30 ml (2 e) klapperolie, gesmelt • 2,5 ml (½ t) kaneel • 2,5 ml (½ t) sout VULSEL • 300 g kasjoeneute, oornag in water geweek • 90 ml klapperroom • 25 ml heuning • 10 ml (2 t) vanieljegeursel • 90 ml klapperolie BOLAAG • 250 g mascarpone • 10 ml (2 t) matchapoeier (opsioneel, dis nogal aan die duur kant, laat dit…

Dis ’n opregte misbaksel! dink ek toe ek die plaatkoek wat ek in die nanagure vir die volgende dag se partytjie gebak het, in blokke sny. Diep rysgate nét onder die gladde oppervlak, het soos sinkgate my geesdrif verswelg. Plek-plek het die rysgate die afmetings van rystonnels aangeneem – ruim genoeg om as ontsnappingsgang vir die uitgeslape Mexikaanse dwelmmisdadiger El Chapo uit gevangeskap te dien. Of as ondergrondse smokkelnetwerk vir sy hele kartel, want soos ’n roetekaart het die rystonnels die hele koek deurkruis. ’n Staatmakerkoek wat ek al male sonder tal met groot welslae gebak het, was dié keer ’n bedremmelde mislukking - ’n misbaksel wat nie sy doel as pronkstuk sou kon dien nie. Soos altyd het die beslag mooi hoog gerys - amper oor die oondpan se…

Terwyl die onregmatig aangestelde Hlaudi Motsoeneng, bedryfshoof van die SABC, die een na die ander hofbevinding teen hom geïgnoreer het, het Phumzile van Damme aanhou veg teen sy korrupte leierskap wat die nasionale uitsaaier miljarde gekos het. Die gevolg was ’n parlementêre kommissie van ondersoek na korrupsie by die SABC, Motsoeneng se afdanking, ’n paar skorsings én die aanstelling van ’n tussentydse raad om korrupsie by die korporasie te takel. Hoekom was dit so moeilik om korrupsie by die SABC oop te vlek? Zuma se staatskaping is al jare in wording. Hy het wetstoepassers geneutraliseer en mense in belangrike posisies beskerm. My voorganger, Gavin Davies, het uitstekende werk gedoen om korrupsie by die SABC oop te vlek, maar die ANC het laer getrek om Motsoeneng en die minister van kommunikasie,…

Een leser wen ’n Spaliciousgeskenkpak van R3 000 Spalicious is ’n wonderlike reeks produkte vir die hande, voete en lyf. Met verskeie lyfrome, afskilfermiddels, maskers, masseerolies en selfs ’n selluliet-“Fix Kit” kan jy jou van kop tot toon met Spalicious pamperlang. spalicious.co.za Om in te skryf Voltooi die blokraai en gebruik die letters in die grys blokkies om die versteekte woord te ontsyfer. SMS jou antwoord vir ons om vir die prys in aanmerking te kom. Leidraad: Republiek in Oos-Afrika. SMS jou antwoord, naam en van, adres en ID-nommer na 48409. SMS’e kos R1,50. Gratis SMS’e geld nie. Bepalings en voorwaardes op bladsy 95.…

Pretoria KANSA-tee in samewerking met SPAR JY KAN WEN! ONS HET WEER EENS VERSKEIE PRYSE OM WEG TE GEE. BRING JOU BEURSIE SAAM VIR DIE GELUKKIGE TREKKINGS WAT ONS OP DIE DAG GAAN HOU. Vanjaar trek ons sowaar al vir die 36ste keer saam om KANSA te ondersteun en die lewe te vier. Danksy ons merkwaardige borge en gasvroue gaan ons elke jaar van krag tot krag en streef ons daarna om al meer geld vir kernbelangrike kankernavorsing in te samel. “Feesviering” is vanjaar se tema en daarmee bring ons hulde aan diegene wat deur kanker geraak is, deur hul lewe op ’n merkwaardige wyse te vier. Dit gaan ’n wonderlike, inspirerende oggend wees wat jy nie moet misloop nie. Die bekende radio- en TV-persoonlikheid Janina Oberholzer is ons eerste…

Maria Kloppers het baie jare gelede reeds beginsels in kinderopvoeding toegepas wat sedertdien as noodsaaklik vir kinderontwikkeling bewys is. Dié sendeling het besef dat die weeskinders “moederliefde” moet ontvang om tot volwaardige mense te ontwikkel, en het ’n groot deel van haar lewe hieraan gewy. Sy was meer as vyftig jaar lank hoof van ’n besondere kinderhawe in Johannesburg. Die Maria Kloppers-kinderhawe word nou die Maria Kloppers-kampus genoem en is deel van die Abraham Kriel-kinderhuise. By dié kampus is vier woonhuise vir personeel, sowel as ’n baba-eenheid waar so vyftig kinders tuisgaan totdat hulle vir aanneming uitgeplaas kan word. Die kampus is op ’n koppie in Observatory in Johannesburg geleë, en waar dit eens in die veld buite die stad was, is dit nou in die hart van die Goudstad.…

‘Ek was van kleins af lief vir sing, en het van die oggend tot die aand in die huis gesing. Nadat ek op my broer se troue gesing het, het almal my aangemoedig om meer op te tree’ Dis minder as 48 uur nadat hy aangewys is as die wenner van M-Net se The Voice, en Craig Lucas (24) lyk steeds effe oorbluf. En hy is ooglopend moeg, want die vorige dag was ’n warrelwind van mediaonderhoude en fotosessies van vroeg tot laat. Dis nog skaars tienuur in die oggend, maar hy moes hom al vanoggend halfses vir nog ’n onderhoud by ’n radiostasie aanmeld. Nie dat hy kla nie - daarvoor is Craig veels te dankbaar. Nie net vir die pryse nie, maar veral vir die kans om veel…

Nuut! Unieke, handgemaakte bykomstighede, juwele, klere, natuurlike skoonheidsprodukte en selfs kuns – hier sal jy iets kry! Nuwe produkte word gereeld bygevoeg rooirosewinkel.co.za…

susram@ctp-mail.co.za @susra_morkel…

SIX Sensational-velsorgprodukte word gemaak van hoogs aktiewe bestanddele wat jou vel beskerm, voed en onderhou. Hierdie topklas-handelsmerk het ’n omvattende reeks produkte wat strek van tonikums, bevogtigers, afskilferaars en maskers tot ’n professionele reeks produkte wat slegs in salonne en spa’s gebruik word. Een van hul unieke reeks produkte, die Vitamin-reeks - met ’n bevogtigende vitamien C-room en vitamien A-serum - sal jou vel ná die winter ’n nodige hupstoot gee en ’n dowwe, moeë vel nuwe lewe gee. Beskerm jou vel ook daagliks teen skadelike UV-strale met die nuwe breëspektrumsonskerm (SBF 50). Saam lewer die produkte merkwaardige resultate sodat jy die lente met ’n gesonde, gloeiende voorkoms kan verwelkom. Elke geskenkpak bevat die volgende: • 8% Glycolic-gesigwasmiddel • Vitamien C-room • Vitamien A-serum • Breëspektrumsonskerm (SBF 50). Om in…

Justine.kroes@outlook.com NAWEEK KERK AAND ‘Wat ’n wonderlike ervaring. Ek het so baie geleer oor mode-opsies en moontlikhede wat ek nie voorheen sou oorweeg nie. Dankie vir die voorreg om mooi te voel en gepamperlang te word’ Stacey het lang bene en ’n kort middellyf, en moet rondspeel met klere wat haar proporsies balanseer. ’n Helderkleurige broek is ’n moet vir iemand met dié lyfvorm, want dit vestig die aandag op haar lang, slanke bene, eerder as om haar kort bolyf te beklemtoon. Die strepieshemp en silwer tekkies gee die uitrusting ’n moderne aanslag maar is steeds prakties genoeg vir Stacey se lewenstyl. HEMP (R179) COTTON ON; ORANJE-ROOI BROEK (R779) TOPSHOP; SILWER TEKKIES (R350) WOOLWORTHS; OORBELLE (R149) ACCESSORIZE. Kombineer hierdie uitrusting met ’N VEELSYDIGE RUGSAK (R999, MIMCO) - ’n moet vir…

Jy ken die gevoel: elke dag is net te kort vir wat jy alles moes doen. Om nie eens te praat van wat jy nog wóú doen nie. Jy het verantwoordelikhede tuis, verpligtinge by die werk/kerk/jou kind se skool, skuldgevoelens oor jou kinders. Voeg daarby die ure wat jy in spitsverkeer sit, jou bekommernis oor die verslegtende ekonomie en hoe stygende pryse jou beursie raak, die politieke situasie in die land, die hoë misdaadvlakke wat dalk al by jou of in jou vriendekring ’n letsel gelaat het ... Die uiteinde? Hoër stresvlakke as waarvoor jou liggaam ontwerp is. Stres het suutjies in ons woordeskat en daaglikse lewe ingekruip. Volgens die Amerikaanse Sielkundevereniging ly 43% van alle volwassenes se gesondheid onder die newe-effekte van stres. ’n Yslike 75% tot 90% van…

anet@marques.co.za SLIM TANDEBORSEL Ja, sowaar as padda manel dra! Die Oral-B Genius Intelligent Toothbrush-stelsel kan met ’n toepassing op jou slimfoon kommunikeer en jou wys of jy korrek borsel, of jou drukking korrek is, en of daar tande is wat jy oorslaan. Saam met die Oral-B Gum and Enamel Repair-tandepasta is dit ’n gedugte teenvoeter teen tandbederf en tandvleisprobleme. GESONDE GEWRIGTE FLEXISEQ is ’n natuurlike smeermiddel wat van nano-tegnologie gebruik maak om pynlike gewrigte weens osteoartritis meer beweeglik te maak. Dit bevat geen farmakologies aktiewe bestanddele nie en dus is daar geen risiko vir interaksie met ander middels nie. Dit kom in twee verskillende sterktes voor. Active kos sowat R199 en Classic sowat R280. TEE VIR JOU? Black Forest-tee is lank reeds bekend vir sy lakseringseienskappe maar dis nou ook…

FAS val binne die breër definisie van fetale alkoholsindroom spektrumstoornisse (FASS). Dit sluit ook toestande soos gedeeltelike fetale alkoholsindroom, alkoholverwante neuro-ontwikkelingstekorte en alkoholverwante geboortedefekte in. Sowat 6 miljoen Suid-Afrikaners word deur FASS geraak. FAS word as die ergste, mees sigbaar identifiseerbare én algemeenste toestand op die FASS-spektrum beskou. Alle FAS-babas het ’n mate van verstandelike, fisieke of sosiale gestremdheid. Alkohol beskadig die sentrale senustelsel van ’n ontwikkelende fetus. Dit lei tot ’n kleiner brein, stadiger ontwikkeling, motoriese probleme en gedragsprobleme soos hiperaktiwiteit, impulsiwiteit, aandagstoornis, konsentrasieprobleme, swak geheue en leerprobleme. (Natuurlik in wisselende grade.) Dis nie net arm, bruin en swart vroue wie se babas met FAS gebore word nie. Wit middelklasvroue se babas loop dieselfde gevaar, selfs al drink hulle nie daagliks of baie tydens hul swangerskap nie. Sowat 259…

DIE BLOMME HOU LANK IN WATER ‘Ericaceae’ is verreweg die grootste genus van die fynboskoninkryk met sowat 760 spesies in Suid-Afrika, waarvan 220 spesies in die berge tussen Worcester en Caledon voorkom Soms is die blomme van ’n erika piepklein, soos dié van Erica hispidula of Erica articularis – perfek vir die wêreld waarin klein wesentjies tuinmaak. Maar sy kan ook pronk en uittroon in Erica patersonia (mielieheide) en Erica nevillei se trompetvormige blomme van so twee sentimeter lank of Erica caffra wat tot ’n boompie van vyf meter kan groei. Ericaceae is verreweg die grootste genus van die fynboskoninkryk met sowat 760 spesies in Suid-Afrika, waarvan 220 spesies in die berge tussen Worcester en Caledon voorkom. Wêreldwyd word die getal op 860 beraam, met verspreiding in Malawi, Noord- en…

vickie@hardrain.co.za @vickiefantastic KOOKBOEK VAN DIE MAAND Deeg deur Theresa de Vries (Human & Rousseau) is een van beste boeke oor deeg wat ek in ’n lang ruk teëgekom het. Nie net beskryf Theresa al die basiese tegnieke meesterlik nie maar die boek is ook propvol nuwe, interessante deegidees. R285 by die meeste boekwinkels. GIER VAN DIE MAAND MATCHA Die ryk, jong blaartjies van matcha-tee word eers gestoom en dan tot ’n poeier gemaal. Die groen tee bevat die kragtige antioksidant catechins, wat kanker en hartsiektes beveg. Dit kan ook jou immuunstelsel versterk, en ná ’n oefensessie herstel bespoedig. Dit is die perfekte drankie wanneer jy moet studeer, want die tee sal jou kalmeer en jou geheue en konsentrasie verbeter. Matcha word veral in nageregte soos makrolletjies en mousse gebruik omdat…

My hart klop by my borskas uit. As Werner Louw dit nie kan hoor nie, is hy waarskynlik doof. Dit is ons tweede date. Ons eet middagete by +27 Café in Hatfield, want dit is tussen sy spreekkamer en ManJfique Designs se kantoor. “Ek verstaan net nie hoe ’n man soos jy nog nooit getroud was nie?” vis ek versigtig uit. Werner Louw trek sy skouers op. “My liefdadigheidswerk en die diere was nog altyd genoeg. En natuurlik my sport. Daar was nie werklik plek vir iemand in my lewe nie.” My selfoon piep en ek kyk ongemerk na die skerm. Vra hom of daar nou plek vir iemand in sy lewe is, laat Barend van hom hoor. Hy en ’n kollega sit ’n paar tafels van ons af. Ek…

• Behandel jou selfoon soos ’n minirekenaar en laai ’n betroubare toepassing op Google-Play of i-Store af wat spioenware en virusse kan opspoor en verwyder. • Kry ook vir jou rekenaar ’n goeie antivirusprogram en brandmuur. • Gebruik ’n doeltreffende wagwoord van minstens agt karakters. Moenie voor die hand liggende inligting vir wagwoorde gebruik nie. • Sorg dat jy op die hoogte van die jongste kubersekuriteit en -slenters bly. • Dink voordat jy op ’n skakel klik en gebruik veilige webtuistes. Maak seker daar verskyn ’n slot op jou webblaaier se statuspaneel en dat die webwerf se adres (URL) met https:// begin. Onveilige webwerwe se adres begin met http:// • Wees versigtig vir verkorte skakels. Twitter-, facebook- en Instagram-gebruikers kort dikwels skakels af met dienste soos is.gd, wat die ware…

Weer hoor ek hom aankom, skuifelend, in Rua Senhora do Crasto. Op en af loop hy, ’n hele voormiddag lank. Soos ’n hond wat die klank van sy baas se voertuig ken, weet ek dis hy wat naderkom, en dan weer verder wegraak tot by die einde van die stukkie teerpad waar die lappie wingerd begin. Vinho dão, die rooi druiwe, waarvan ou ooms met pette soggens om halfnege ’n eerste doppie in die taverne drink. Teen die ouderdom, die siekte ... teen die lewe. Uit my kamervenster op die tweede verdieping van Micaela se huis loer ek na buite. “Bom dia!” Hy antwoord nie. Mý goeiemôre is nie syne nie. Sy oë peil na iets onbekends aan die einde van die straat. Ek voel in die gesig gevat -…

roneln@caxton.co.za BOEK VAN DIE MAAND DIE WÊRELD VAN CHARLIE OENG Etienne van Heerden (Tafelberg) Tian Kilian het sy ouers op die alleraakligste manier verloor: hulle is voor sy oë vermoor, die aand van die vuurwerke op Slootplaas. En sommer met die intrapslag lees jy dit al. Daar is dus geen misverstand oor die misdaad nie, maar vir die volgende 500+ bladsye loop jy saam met die volwasse Tian en probeer uitvind hoe? En hoekom? Wat het daartoe gelei? Die skrywer het selfs na Amsterdam (en die Klein-Karoo) gereis om die Chinese werklikheid daar te gaan ondersoek. “Die pyn van ons voorouers en ouers bly ons altyd by,” het Van Heerden in ’n onderhoud gesê, en hierdie uitdagende en ambisieuse roman is ’n duidelike bewys daarvan. Uitgewersprys R350 rooi rose R315…

Buitelug toe Een van die land se groot reisbuitelug- en-avontuur-skoue, die gewilde Gauteng Getaway Show, is weer in Johannesburg se Ticketpro Dome te sien. Gaan maak van 23 tot 25 September ’n draai by die meer as 400 uitstallings. Russiese ballet Die hoogaangeskrewe St Petersburg Balletteater, tree van 15 September af by die Teatro Montecasino in Johannesburg op. Twee van die mees geliefde ballette, Tsjaikofski se Swanemeer en Die Neutekraker, word om die beurt opgevoer. Die Johannesburgse Feesorkes begelei die geselskap wat uit ’n steierende sestig dansers bestaan. Computicket. Madeliefie-Makietie-fees Stof solank jou feesskoene af vir die immergewilde Madeliefie Makietie wat vanjaar die eerste keer op die bekoorlike Weskus-stranddorp Strandfontein gehou word. Die fees duur van 29 tot 30 September en 15 top-kunstenaars, soos Bobby van Jaarsveld, Willem Botha, Die…

Ek werk aan ’n episode van Terug na Egipte, as ek reg onthou is dit ’n moeilike toneel wat ek maklik kan opbokker. “Ek ovuleer.” En net daar smoor Saarkie die poging om magic op die Paal te laat gebeur. ’n Ander en meer dringende poging om ’n wonderwerk te bewerkstellig, wag op my en my jong vrou. Dit het ook iets met op die paal te doen. Die wonderwerk wil net nie gebeur nie: ek het ou saad, Saarkie koppige eiers. Ons lag daaroor - dis nogal hoe ons is. Ons gaan klop toe maar aan by ’n kliniek waar jy glo onvrugbaar instap en met ’n tweeling uitsteier. Dis ’n hele operasie, en elke operasie kos R50 000. Gelukkig raak Saarkie moeg vir die storie voor ek bankrot…

JY IS DIT WAARDIG As ek op Dwarskersbos is, is daar altyd dinge wat ek om heeltemal onbepaalbare redes nodig het. Soos om met opstaantyd koffie te maak, die voordeur oop te sluit en na die koue, blou lug te staar, die niet in. Dan oor die pad na Bettie en Pik se kafee te stap om ’n koerant te gaan koop. En soms ook iets heeltemal oorbodig. Asof dit ’n behoefte is. Soos ’n tydskrif. Volg jy my nog? By dié soort behoeftes geld besparingsoorwegings mos nie noodwendig nie. Buitendien, as ’n mens spaar, sny jy immers altyd op die dinge wat nie regtig vir jou saak maak nie! Ek het my altyd so verluister aan my ma wat vermakerig kon sê: “O, ek is so bly ek het…

Cintaine Schutte is nie bang vir werk nie. Dit kom jy gou agter wanneer jy gaan kyk na hoe besig sy die afgelope ses jaar was sedert sy haar honneursgraad in drama verwerf het. Daar was rolle in meer as dertig produksies, tien rolprente en kortflieks, RSG-radiodramas en twee TV-reekse, Die Bolandmoorde en meer onlangs in die kykNET-sitkom Phil 101. Nes haar mede-akteurs in die destydse Polony-teaterkollektief (wat name soos Christiaan Olwagen, De Klerk Oelofse, Wessel Pretorius, Hannah Borthwick en Roeline Daneel insluit) deins sy nie terug om te doen wat gedoen moet word om haar passie vir die verhoog uit te leef nie. Sy skryf tekste, doen regie, asook agter-die-skerms werk soos beligting of verhoogbestuur. Hieroor is sy filosofies. “Ons het vroeg al besef ons moet vir onsself werk…

Craig hou van lekker kos, maar vertel dat hy nie juis kan kook nie. “Chinese kos is my gunsteling. Daar is ’n plek naby ons huis in Elsies wat die lekkerste Chinese kos maak. Ek eet omtrent elke tweede dag Chinese kos.” • Voor sy deelname aan The Voice was hy ’n vegetariër, en voor dit ’n jaar lank ’n vegan. “Ek moes gedurende die kompetisie noodwendig vleis eet, maar sal dit nou weer uitsny. Ek voel baie gesonder as ek nie vleis eet nie. Nadat ek Eckhard Tolle se boeke gelees het, het ek ook met ander oë na vleis en diere begin kyk.” • Craig is gek na koffie. “Party mense sal dink ek is verslaaf daaraan,” skerts hy. “Maar ek hou darem van tee ook. Ek drink…

Geel seeanemone Items soos die lospassende swart langbroek en bypassende baadjie met sy rooi madeliefies en geel seeanemone bring welkome vernuwing in ons klerekaste. Op daardie eerste dae van die nuwe seisoen gaan jy niks mooier kry wat jou so ’n hupstoot kan gee soos dié geblomde uitrusting nie. BLOMBAADJIE EN -BROEK (ALBEI R829 ELK; XS-L) ZARA. Woestynkleure Vanjaar se materiale en silhoeëtte is sagter en vloeiender as ooit, danksy die invloed wat die tradisionele kleredrag van die Namibiese Herero’s op die jongste rokmodes gehad het. Die kenmerkende kaktusen bloeiselmotiewe in ’n palet van warm skakerings beklemtoon die woestynkleure van die streek terwyl die kontrasterende blou kolle skaars reëndruppels voorstel. VAN LINKS: KIMBERLY: LANGMOUROK MET KAKTUSMOTIEF (R2 000, OP BESTELLING) SHEILA MADGE. SCARLET: GROEN ROK MET PIENK PATRONE (R2 000,…

susram@ctp-mail.co.za @susra_morkel THEMBI SEETE THEMBI IS ’N VERKLEURMANNETJIE WANNEER DIT BY BEROEPE KOM: KWAITO-STER, AKTEUR, SAKEVROU ... SY HET AANVANKLIK BEKENDHEID VERWERF AS SANGERES IN DIE KWAITO-SUPERGROEP BOOM SHAKA, MAAR HET ONLANGS HAAR TALENTE OP SAKEVLAK BEGIN DEEL EN THEMBI SEETE PRODUCTIONS GESTIG WAT OPKOMENDE KUNSTENAARS WIL BEMAGTIG EN HELP OM HUL DROME TE BEWAARHEID. HAAR STYLVOLLE VOORKOMS IS OPVALLEND EN INSPIREREND. Bypassende onderklere Ek is gaande oor mooi onderklere. Ek koop amper elke week vir my ’n stel. Dis my bydrae tot ’n goedvoel- gemoed. ONDERKLERESTEL MET KANTAFRONDING (R2 050 VIR BRA EN R1 245 VIR BROEKIE) INNER SECRETS. Moet-hê-sakkie ’n Mooi sakkie moet deel van jou uitrusting wees. PALMSAKKIE MET BORDUURWERK (R289,50) COLETTE HAYMAN. Nuwe wit hemp Jy kan ’n wit hemp soos dié heeljaar dra. Die lospassende…

suzannek@ctp-mail.co.za @suzannekotze VOOR SY DIE WÊRELDBEKENDE EN GLANSRYKE COCO CHANEL GEWORD HET, WAS SY GABRIELLE BONHEUR, ’N MEISIETJIE WAT IN ’N KLOOSTERWEESHUIS GROOTGEWORD HET. SY IS LATER PARYS TOE OMDAT SY DAARVAN “HOU OM DEEL TE WEES VAN WAT GEBEUR”. MET TOEWYDING EN HARDE WERK HET SY COCO CHANEL GEWORD, DIE VROU WAT IN 1921 OOK DIE LEGENDARIESE FYNGEUR CHANEL NO.5 GESKEP HET. DIE PARFUUM HET IETS VAN DIE REBELSHEID VAN COCO EN DIE UITDAGENDE GEES VAN GABRIELLE VASGEVANG. VAN TOE AF IS ELKE NUWE CHANEL-PARFUUM DEUR ’N HOOFSTUK UIT CHANEL SE LEWE GEÏNSPIREER. ‘Ek het die mens gekies wat ek wil wees en is’ - GABRIELLE CHANEL Die huidige parfumeur by Chanel, Oliver Polge, het die fyngeur Gabrielle om ’n verbeeldingsblom geskep om note soos ilang-ilang, jasmyn, lemoenbloeisels en…

Linda beklemtoon die noodsaaklikheid van gesonde grense, en meen dis iets waarmee die meeste mense sukkel. Dit veroorsaak dat ons dikwels sukkel om “nee” te sê vir die eise wat ander mense (base, maar ook ons gesinne en vriende) aan ons stel. Dit lei tot ekstra spanning. Sy meen veral vroue sukkel met persoonlike grense omdat ons van kleins af geleer word om die vrede te bewaar en konflik te vermy. Die gevolg? Jy stel jouself laaste, probeer almal om jou red en word ander mense se vloerlap. “’n Mens hoor dikwels ’n vrou in ’n probleemhuwelik sê sy het van haar man se probleme geweet voor hulle getroud is, maar het gedink sy sal hom kan help om te verander.” Linda maan ook teen onnodige skuldgevoelens. “Ek sien dit…

Sy is 21, met die verstandelike vermoëns van ’n sesjarige, en haar bou en gelaatstrekke verklap die diagnose wat haar aanneemouers meer as twintig jaar gelede moes aanhoor: fetale alkoholsindroom. Onomkeerbaar, tragies. En heeltemal voorkombaar, as mense maar net wil luister. Tisha se aanneemouers, Vivien en Peter Lourens van Pinelands, was vir 16 van hul 32 jaar getroude lewe pleegouers vir babas in nood. Hul uitgebreide gesin bestaan uit twee biologiese seuns, Andrew en David, en drie dogters: Leigh-Anne, Carrie en Tisha. Carrie (26) is ook aangeneem, en het ook spesiale behoeftes. “Ek wou nog altyd ’n pleegouer wees,” vertel Vivien. “Ek het ’n agtergrond in kinderversorging, en spesifiek die versorging van kinders met spesiale behoeftes.” Baie van die meer as tagtig babas wat hulle deur die jare versorg het,…

Vivien en Peter onthou goed hoe moedeloos hulle was oor die gebrek aan inligting, en deel daarom graag hul kennis oor FAS. Hulle het in 1996 reeds ’n inligtingsentrum begin, en bedryf FASIC van hul huis in Pinelands af. Vivien het ook ’n handboek* geskryf, gegrond op die kennis wat sy en Peter opgedoen het vanweë hul betrokkenheid by Tisha en ander FAS-babas. In 1999 het sy saam met ’n Amerikaanse en Kanadese vrou die Internasionale Fetale Alkoholsindroomdag, wat op 9 September gevier word, na Suid-Afrika uitgebrei. “Ek het die idee gekry om op presies 9:09 daardie dag klokke te laat lui. Al die 9’s is simbolies van die nege maande van swangerskap. Ek het dit reggekry om te reël dat die klokke by die Kaapse Stadsaal daardie dag gelui…

tuinjong@yahoo.com TUINBESOEKE, -BLOGS EN -BOEKE • As vetplante jou hartsnare roer en jy wil meer oor hulle weet en waar om hulle in die natuur te sien, is die nuwe boek, Field Guide to Succulents in Southern Africa deur Gideon F. Smith, Neil R. Crouch en Estrela Figueiredo (Struik Uitgewers) net vir jou. Ons artikel oor vetplante (rooi rose, Mei 2017) en die meer uitgebreide aanlynartikel was baie gewild. Die aanlynartikel veral, het wye belangstelling uitgelok. As jy dit misgeloop het, kyk by rooirose.co.za • www.facebook.com/StruikNatureClub/ is ’n nuttige skakel vir liefhebbers van die natuur en plante. PLANT- en TUINGOED Boomplantweek is ’n landwye veldtog wat die verskeidenheid van sowat tweeduisend soorte inheemse bome in Suid-Afrika vier en ’n bewustheid van die belangrike rol van bome wil kweek. Vanjaar is…

PIESANG-EN-DADEL-FUDGE Genoeg vir 10 BASIS 200 g amandels, liggies gerooster 4 dadels, ontpit, fyngekap 45 ml (2 e) kakaopoeier 2,5 ml (½ t) sout 60 ml klapperolie VULSEL 250 ml (1 k) amandelbotter 80 ml (¼ k) klapperolie, gesmelt 1 piesang, geskil en fyngemaak 4 dadels, ontpit knypie sout GLAD Baking Paper GLAD Zip Seal-sakkies 1 Voer ’n dieperige 15 cm x 20 cm-pannetjie met GLAD Baking Paper uit. 2 Gooi die amandels in ’n GLAD Zip Seal-sakkie en stamp met ’n deegroller fyn. Meng die fyn amandels met die dadels, kakaopoeier, sout en klapperolie. 3 Druk die mengsel eweredig in die pan uit. Sit eenkant. 4 Meng die amandelbotter, klapperolie, piesang, dadels en sout in ’n voedselverwerker. Gooi die mengsel op die basis. Sit in die vrieskas vir 30…

SPLINTERNUWE SUBSKRIPSIEOPSIE Ons weet jy is dol op rooi rose. En op innovering. Want in vandag se vinnige pas kan dit net jou lewe makliker maak. Dis hoekom ons weet jy gaan baie van die nuwe intekenervaring hou. So waaroor gaan dit alles? Dit gaan veral oor gerief, en kom ons wees maar eerlik, dis iets waarvan elkeen hou. Caxton Magazines en Woolworths het saamgespan om dit makliker as ooit te maak om jou rooi rose elke maand te kry. Hoe? So eenvoudig soos een-twee-drie: Jy hoef slegs aanlyn te registreer vir jou jaarlikse subskripsie, en kry dan elke maand ’n SMS-kode waarmee jy jou tydskrif by jou naaste Wollies kan afhaal. Dis gerieflik en spaar jou tyd, en jy kry boonop al daardie spesiale tydskrifgeskenke wat slegs in die…

Wen kontant Vir rooi rose se blokraaigeesdriftiges gee ons ’n geldprys weg. Drie gelukkige lesers kan elk R500 wen deur Blokraai 17 korrek in te vul en die versteekte woord vir ons te SMS. Om in te skryf Voltooi die blokraai en gebruik die letters in die grys blokkies om die versteekte woord te ontsyfer. SMS jou antwoord vir ons om vir die prys in aanmerking te kom. Leidraad: ’n Vervoermiddel SMS jou antwoord, naam en van, adres en ID-nommer na 48409. SMS’e kos R1,50. Gratis SMS’e tel nie. Bepalings en voorwaardes op bladsy 95.…

GERDA TALJAARD Taljaard is die skrywer van twee romans, asook die kortverhaalbundel Maansiek. Haar jongste boek, Die Laksman se Dogter, het pas verskyn. Hoe beïnvloed jou beroep jou skryfwerk? Ek is ’n deeltydse dosent in Afrikaanse letterkunde aan Unisa, maar ek beskou my eers as skrywer, dan as akademikus. Die verskil tussen kreatiewe en akademiese skryfwerk is nie so groot nie. Of dit nou ’n artikel of ’n roman is waaraan jy werk – albei verg deeglike beplanning, en albei is terselfdertyd bevredigend én uitmergelend! Is van die verhaallyne op werklike gebeure gegrond? Ja én nee. Ek het in die eerste plek Die Laksman se Dogter geskryf om uiting aan my grootste vrees te gee: Sê nou ek het ’n kind gehad en hy/sy is ’n dwelmslaaf? In ’n stadium…

JULLE KINDERS 89% Het ’n spesiale dieet gevolg om te help om swanger te raak. 52% het skoolgaande kinders. 57% doen terug-skool-toe inkopies in Januarie, gevolg deur 30% wat dit in Desember doen. 40% van julle wat kinders het, sê julle bak saam met jul kleingoed, gewoonlik oor naweke. Sowat 70% van julle het nie jul kind se eerste verjaarsdagkoek gebak nie. PULSE IS ’N TYDSKRIFMENINGSOPNAME WAT ONS GESKEP HET OM MET ONS LESERS IN GESPREK TE TREE. LAAT JOU MENING TEL EN WORD DEEL VAN ’N PANEEL VAN MEER AS DUISEND LESERS WAT AL GEREGISTREER HET EN ANTWOORD ELKE WEEK ’N PAAR INTERESSANTE VRAE. JY HET OOK ’N KANS OM ELKE MAAND PRYSE SOOS SPA- OF KOOPBEWYSE TE WEN. JOU MENING MAAK SAAK EN JOU BYDRAE OOR SPESIFIEKE ONDERWERPE,…