Innholdsfortegnelse for August 2014 i Rooi Rose

AS DIE KOUE begin knyp, begin ek vanself in ’n stadiger rat leef, ’n bietjie langsamer. Nie dat Johannesburg se winters besonder koud is nie, en ons huis is ook so geleë dat ons die winterson kan benut wat groot dele van die dag by ons vensters inskyn. Dis net dat die winter my ’n bietjie weemoedig stem, die dae so kort en die nagte so lank. ’n Sagte kombers op die rusbank is my troos teen die koue en terselfdertyd my plan om die elektrisiteitsrekening te help besnoei. My ma kla ook deesdae dat die winter haar tot stilstand dwing. Sy moet werk daaraan om warm te bly omdat die bloed nou dun is en die voete en hande maklik begin pyn as die aanvoelbare temperatuur daal. Tog is…

Wat is vir jou lekker en mooi van Suid-Afrika of die Suid-Afrikaanse kultuur? Wat doen jy om dit te vier? Retha Booyens (22) dieetkundestudent, Potchefstroom Toe ek in Parys op die Eiffeltoring staan, het ’n Suid-Afrikaanse man in my rigting gestap toe hy sien ek staan by die bordjie met die Suid-Afrikaanse vlag en gevra of ek Suid-Afrikaans is. Dit was die vriendelikste mens wat ek in die hele Frankryk teëgekom het. Suid-Afrika het verskriklike vriendelike mense! Boonop het ons ’n ongelooflike pragtige en diverse land. En ek dink nie ons waardeer dit genoeg nie. Lizelle Bright (61), GIS-tegnikus, Malvern, Durban Egte Suid-Afrikaanse eetgoed: pannekoek by die kerkbasaar (my taak vir jare); melktert, koeksisters en biltong; ’n bring-en-braai met heerlike samesyn, resepte uitruil en kompetisie tussen die mans oor wie…

Jy lyk so vars en ongekunsteld in Wish I Was Here . Daar is ’n wonderlike toneel waarin jy jou skoonpa konfronteer. Hoe is jou verhouding met jou skoonouers? In die fliek sien ons wat gebeur as ’n sterk patriarg die fakkel vir sy seun aangee en die probleme wat dit in ’n verhouding kan skep. Wanneer jy ’n verhouding met iemand begin, begin jy ook ’n verhouding met sy gesin. Hy dra allerhande goed saam wat hy as kind by sy ouers en gesin geleer het. Maar ’n mens moet jou eie lewe skep weg van wat jy voorheen geken het. Soms moet jy moeilike besluite neem. Ek is baie gelukkig met my skoonouers. Hulle is liberaal en gemaklik. Maar ek weet mense sukkel dikwels…

Reuse-eikebome, al in hul herfsdrag geklee, waak stil om die ou plaasopstal. Toe ’n ligte windjie opsteek, dwarrel die geel en goue blare grond toe. Tog skyn die son vanoggend helder en warm hier op Sémoér in Noordwes. Die winter is laat vanjaar. Van die stoep se kant af stap doktor PG du Plessis ons tegemoet. “Ek het griep,” keer hy voor ons te na aan hom kom. “Ek hoop ek gee julle griep,” sê hy skertsend terwyl ons na die pragtige klipgebou, sy heiligdom, sy studeerkamer, aanstap. Jy weet van die studeerkamer wat met gekapte kaiingklip gebou is, want hier gesels hy met al wat joernalis is. Jy weet ook dat PG al die houtwerk hier binne gedoen het. Op ’n klavier eenkant teen ’n muur staan verskeie beeldjies,…

AFRICOLOGY Africology gebruik slegs natuurlike bestanddele wat bio-identies aan die mens se biologie is; so bevorder hulle die vel se welstand en voorkom vroeë veroudering. Hulle vermy ook chemikalieë en preserveermiddels in hul produkte. Die topverkoper is AFRICOLOGY SHEA BODY NEROLI BALM (R242). Hulle voer uit na Afrika, Amerika, Turkye, Frankryk, België, Rusland en Swede. BEAUTY FACTORY ’n Bederfreeks met goeie bad-, lyf-, skoonheid- en huisprodukte wat in die Beauty Factory-fabriek in Midrand, Gauteng gemaak word. Die Freshly Made for You is die gewildste en sluit alles in van badmelk en –olie tot stortroom. TISSUE OIL BODY SCRUB (R89) is die een produk wat hulle vir nuwe kopers sou aanbeveel. BIO-OIL BIO-OIL PURCELLIN OIL (R49,99 VIR 60 ML; R74,99 VIR 125 ML; R104,99 VIR 200 ML) is veral bekend vir…

Vier uit elke vyf van ons hét TB – latente TB Passievol oor haar werk as jong dokter in ’n opleidingshospitaal, het dr. Dalene von Delft met liefde haar stetoskoop op haar handpalm warm gevryf voor sy dit op haar pasiëntjies se ruggies geplaas het om na hul longe te luister. Soos dit in die winter in ’n hospitaal gaan, is daar altyd ’n gehoes en geproes en te min hande. Daarom spring dokters, verpleegsters en fisioterapeute in sonder om twee keer te dink aan die gevare vir hulself, soos griep en ernstige akute respiratoriese sindroom. En tuberkulose (TB). Op ’n dag het Dalene ’n kuggie. Een wat nie ophou nie. Sy vermoed TB en laat haar toets. Toe kom die skokdiagnose: sy het MDR-TB. Dié weerstandige TB reageer nie…

Vang die winter jou? In die hartjie van die winter slaan seisoenale affektiewe depressie (SAD) maklik toe – in die Kaap omdat dit vir lang tye bewolk is maar vir die meeste van ons omdat ons donker soggens uit die huis gaan en ná donker saans terugkeer. Werklike winterdepressie slaan in die herfs toe en lig in die lente – jaar op jaar. Hoekom in die winter? Navorsers glo nou dat die vorming van serotonien onder meer afhang van hoeveel sonlig ons kry. Serotonien is ons vernaamste goedvoel-hormoon. Dit laat ons gelukkig, geliefd en kalm voel. Namate die sonlig in die winter verminder, produseer ons brein minder hiervan en daarom slaan gevoelens van depressie toe. Namate die son-ure toeneem, herstel jou serotonienvlakke en voel jy in die somer goed. Koolhidraatkosse…

Sielkundiges verduidelik dat die optimis, net soos die pessimis, die erns van die situasie besef, maar immer glo dat die keerpunt net om die draai is en dat dinge beter móét gaan. Dis hoekom optimisme energie skep en pessimisme mense met hulpeloosheid verlam. 1 PERMANENSIE: Hoe permanent is die probleem? Die optimis sal reken dat hy deur ’n moeilike tydjie gaan, maar dat hy seker is dit sal vinnig verbeter. Die pessimis reken dit sal vir ewig so aangaan en daar is geen kans op verbetering nie. 2 OMVATTENDHEID: Die optimis het ’n slegte dag by die werk, maar kan nie wag om by die huis te kom om lekker saam met haar man en kinders te kuier nie. Die pessimis het ’n slegte dag by die werk en neem…

KONTRAS VRYMOEDIGE KOMBINASIE VAN GESTRUKTUREERDE HEININKIES EN SAGTE, WILDER AANPLANTINGS. RUSPLEK VORMGESNOEIDE BALLE EN SUURLEMOENBOME IN POTTE LEI DIE OOG NA 'N RUSPLEK. EEUE OUD IS DIE KANFERBOME WAT SOOS ENORME BEELDHOUWERKE STAAN EN WAGHOU. BALDADIG BLOM DIE BOUGAINVILLEA AGTER DIE SPUITFONTEIN. Langwerpige WATERSPIEËL WAAR DIE EENDE BALJAAR AS HULLE DIE GERINGSTE KANS KRY. Hierdie hotel, ingerig in ’n historiese plaasopstal, en met ’n wêreldbekende tuin, bied enige besoeker meer as net ’n mooi prentjie,” besing die webwerf van Relais & Châteaux die lof van dié tuin. (Relais & Châteaux is ’n toonaangewende, internasionale vereniging van luukse hotels en restaurante in private besit.) The Cellars-Hohenort met sy drie bekroonde restaurante en wêreldbekende tuin getuig van Liz McGrath, die eienaar van die The Cellars-Hohenort-hotel, asook The Marine op Hermanus en The…

FEITE EN GEITE Bolognese, die bekende sous wat saam met pasta voorgesit word, kom van die stad Bologna. « » Pasta kan verskillende kleure hê. Spinasie maak die pasta groen , tamaties rooi en ‘n inkvis se ink gee swart pasta! Hei, Ma! Gooi ‘n hand vol babaspinasieblare by die bolognese-sous vir meer voedingswaarde! SPAGHETTI BO › LOGNESE Genoeg vir 6 KRY EERS AL DIE BESTANDDELE REG » 30 ml (2 e) olyfolie » 1 ui, fyn gekap » 1 knoffelhuisie, gekneus » 1 selderystok, gerasper » 1 wortel, » 500 g beesmaalvleis » 1 x 410 g-blik heel, geskilde tamaties » 30 ml (2 e) tamatiepuree » 250 ml (1 k) beesvleisaftreksel » 1 murgpampoentjie, gerasper » ‘n hand vol pietersielie, gekap…

Ayanda het aan die begin van haar loopbaan besluit sy gaan eerder die ongebaande weë verken en wil nooit langer as vyf jaar ’n posisie beklee nie. “Almal wou altyd by die hoofkantoor in Johannesburg gaan werk. Ek het besluit ek wil die bedryf op alle vlakke leer ken en het ná my aanvanklike aanstelling ’n pos as finansiële bestuurder by die Tutukakragstasie op Standerton aanvaar. “Ek het voor die aanstelling nie eens geweet waar Standerton is nie! Dit was nie aldag maklik nie. Ek was die eerste vrou in die Tutuka-bestuurspan. Hier het ek gewerk met die mense wat die kragstasie gebou het en al manier om te oorleef was om die ‘spel te speel’ en soos ’n man op te tree en te praat. Ek was vasbeslote om…

O or die jare het rooi rose nie net ’n groter bewustheid van kanker geskep en broodnodige geld ingesamel met ons KANSA-lesersdae nie, maar die lesersdae het ook in statuur en styl gegroei. Danksy die gasvroue wat elkeen volgens ’n gegewe tema ’n teetafel vir tien dek en dan kaartjies aan hul gaste verkoop, is dit ’n swierige en vrolike affêre. SPAR het besluit om vanjaar weer vir die beste SPAR-tafels geskenkbewyse te gee: Eerste prys: R6 000; tweede prys: R3 000 en derde prys: R1 000. Oudergewoonte kuier ons saam by die Saint George-hotel in Pretoria waartydens verskeie sterre die gaste gaan vermaak. SPREKERS Anel Alexander is ’n bekende op ons klein en groot skerms. Sy het in sepies soos 7de Laan en Binnelanders gespeel en is deesdae die…

In Augustus wentel ons tema om “perde” om aan te sluit by die tema van die boeke van ons jeugskrywer. As jou boekklub al die vrae reg beantwoord, kry julle met komplimente van Graffiti die boeke op dié maand se “Rooiwarm” as geskenk. Stuur jul antwoorde na roneln@caxton.co.za met “Junieboeke” in die onderwerpreël of na www.rooirose.co.za Klik op “boeke” en volg die aanwysings. Stuur jou boekklub se naam, posadres en selnommer. Vrae 1 Wat was die naam van die perd van die brawe Boeregeneraal, C. de Wet? 2 Watter lieflike boek deur Anna Sewell word as die eerste “ponie-boek” beskou? 3 En Suid-Afrika se bekendste resiesperd tot nog toe? 4 “I went through the desert on a horse with no name ... ” Groep? 5 Wie sê: “A horse! My…

Blomme by dosyne Die Veldblommeskou (28 Aug. - 5 Sept. in Clanwilliam se Blommekerk). Die dorp is vanjaar 200 jaar oud en die skou is een van die hoogtepunte van die vierings. Dis ’n skouspelagtige uitstalling van meer as 400 soorte inheemse veldblomme - alles vars. 027 482 2024, www.clanwilliamwildflowerfestival.co.za Maak mooi Decorex Joburg bied vanjaar heelwat meer. Roer jou, want die 100% Design South Africa-uitstalling, asook Dion Chang se toonaangewende Design and Trend Forecast, vind ook daar plaas. 6 -10 Augustus, Gallagherkonvensiesentrum. www.decorex.co.za Kansa-tee Bespreek nou al vir September se Kansa Teekuiers. Kaap: 20 Sept., Stellenbosch-stadsaal. Pedro Kruger is die seremoniemeester en Dowwe Dolla die gasspreker. Besprekings en inligting Henley Botha 021 689 5347/082 573 6941 of e-pos hbotha@cansa.org.za Bloemfontein: 13 Sept., Kopano Nokeng, Bloemfontein. Yolanda Maartens (OFM) is die…

@DAVIDMEULEN – DAVID MEULEN. WHOOPIE! ’N SEUN VAN EIE BODEM. PRAGSTEM, SKITTERKITAARWERK, SIELVOL, GELOOFBAAR, ’N ABSOLUTE “BREINBLASER” MET ’N VERRASSENDE, VARS VASVAT OP FOLK-ROCK: IETS TUSSEN AMICII, VERBY JACK JOHNSON EN DAAI MUMFORDS TOT BY DAMIEN RICE OF CAT STEVENS. FYN TROMWERK DEUR BARRY VAN ZIJL SORG DAT DIE METRONOOM FOUTLOOS TIK. DEAR SILENCE THIEVES – DAN PATLANKSY. DAN SE EIE ROCK EN BLUES SONGS IS STEEDS SO ROU EN BLOU SOOS ALTYD – EN EWE GE-POLISH. EEN VAN ONS HÉÉL BESTE KITAARKLAPPERS OP SY BESTE. BOONOP KON PRODUKSIEHOOF THEO CROUS DIE LIVE-ERVARING IN DIE ATELJEE VASVANG. UITEINDELIK HET ONS NET DAN SE EIE WERKE OP EEN ALBUM. WAGTENDE NASIE – EMILE MINNIE. DIS ’N KONSEP-ALBUM, MOEILIK EN UNIEK IN AFRIKAANS. DIE EERSTE SONG…

Waar is die beste plek om op ’n vliegtuig te sit? Die meeste mense wil gewoonlik ’n venstersitplek deps. Ek ook, maar met euwels soos engtevrees, bewegingsiekte en oorvloedige toiletbesoeke aangevuur deur genoemde toestande, moet ek maar die voorreg van ’n ponduitsig op die wolke prysgee. Onlangs bevind ek my weer op ’n KLM-dagvlug van Amsterdam na Kaapstad. Op sulke terugvlugte is daar gewoonlik ’n klomp Suid-Afrikaners aan boord. Reeds op Schiphol-lughawe hoor jy kort-kort die Afrikaans vrylik vloei. As jy weke lank deur hoofsaaklik vreemde tongvalle moes wroeg, is dit heerlik om jou eie taal in ’n wêreldstad te hoor. Dan wonder Stormers en Sharks nie of hulle met Bloubulle en Cheetahs gesprek wil voer nie – op die daad raak mense kollektiewe kudde-Leeus van Afrika en Suid-Afrika en…

Kate Hudson laat jou dink aan die room op jou café latte. Toe sy by die Waldorf Astoria instap om met ons oor haar nuwe fliek, Wish I Was Here, te gesels lyk sy soos ’n droom: roomkleurige RVN-rok, Jen Meyer-juwele en soepel, bruin bene in Louboutin-skoene. Haar hare lyk soos fyn gespinde goud teen haar sonbruin vel. Geen wonder joernaliste vergelyk haar graag met ’n sonstraal nie. Haar gesig het Slawiese trekke en haar hoë wangbene beklemtoon haar fyn neus en mond. Wanneer sy glimlag, verander haar gesig heeltemal. Dis asof die son skielik uitkom en in haar glimlag sien jy dadelik haar ma, die aktrise Goldie Hawn. Kate is gebore om voor mense op te tree. As kind het sy gesing en gedans en kon nie wag om…

Cornél en Daniëlla van Heerden sorg daagliks dat ons weet wat in Suid-Afrika aangaan, sy as veldverslaggewer by e-Nuus en Cornél as fotograaf by Foto 24, wat foto’s lewer vir onder meer Beeld en Rapport. Albei is nuusverslaafdes en al verskeie kere vir hul werk bekroon. “Ons het mekaar in 2010 ontmoet toe ek nog ’n joernalis by Beeld was,” vertel Daniëlla een Vrydagoggend oor ’n vroeë ontbyt in Melville, een van die min tye waarop sy en Cornél ’n oop gaatjie in hul besige dagboeke het. Sy was destyds by die koerant se Johannesburg-kantoor, hy in die Pretoria-kantoor, en hul paaie het nie juis gekruis nie. Tot sy eendag vir hom ’n e-pos gestuur het om hom met een van sy…

Katlego Maboe laat ’n mens onwillekeurig glimlag. Nie net oor die mooi Afrikaans wat hy praat nie, maar ook oor die immer teenwoordige vonkel in sy oog en sy wonderlike sin vir humor. Hy het bekend geword as lid van die a cappella-sanggroep Flip a Coin, maar deesdae is dié geoktrooieerde rekenmeester ’n gewilde televisie-aanbieder en geleentheidspreker. Hy het in Potchefstroom grootgeword, skoolgegaan en aan die Universiteit van Noordwes gestudeer. Sy singery het al begin toe hy deel van die Noordweskinderkoor was. Katlego praat Setswana, Afrikaans en Engels ewe goed en gemaklik. Jy het by jou ouma Ellen en oupa Salthiel in die Ikagengtownship grootgeword. Is dit waar jy jou liefde vir Afrikaans gekry het? “Ek dink my ouma en oupa het my nuuskierigheid vir Afrikaans as taal geprikkel. Hulle…

Versier jou HALSLYN Colette by Colette Hayman is die jongste Suid-Afrikaanse handelsmerk wat bykomstighede regstreeks van die internasionale loopplanke af herinterpreteer en blitsig plaaslik vervaardig. Die voorraad in die winkels word weekliks met die jongste ontwerpe aangevul. Maak jou gereed vir prettige, sprankelende én bekostigbare mooigoed. HALSSNOER (R279) COLETTE BY COLETTE HAYMAN. Georgini se staal-juweliersware is bekostigbaar, kontemporêr en treffend. Goud, roosgoud en silwer word as versiering op dié veelsydige metaal gebruik. ARMBAND (R999) GEORGINI BY SPILHAUS. WARM, RYK KLEURE ’n Handsak bly nie ’n handsak by Furla nie. Jy kan altyd iets nuuts van hulle verwag, maar die gehalte en elegansie bly. Die jongste ontwerpe verras jou met die ryk kleure van die winter. HANDSAK (R10 980) FURLA-BOETIEK, HYDE PARK CORNER. OUD word NUUT Jenna Clifford kan jou ou…

STRELEND Vir die sensitiewe manne in my lewe is EUCERIN SE NUWE ATOCONTROL-REEKS ideaal. Die room help vir atopiese dermatitis vir volwassenes en babas. Met die ACUTE CARE CREAM (R149,99) behandel jy ’n opvlamming. Die room is antibakteries, strelend, herstel die vel en verlig die gejeuk. SUZANNE Voetjie-voetjie Saans voor ek gaan slaap (ek probeer onthou) smeer ek FEET BY OPI CALLUS THERAPY (R315; UITGESOEKTE SALONNE) aan my voete. Dit skilfer dooie velletjies af en maak my voete sag. Soggens gebruik ek blitsig ’n voetvyl en smeer dan DOUBLE COVERAGE (R285) aan. Dit bevogtig en trek vinnig in sodat jou voete nie in jou skoene rondgly nie. SUZANNE SPRANKEL GIVENCHY HYDRA SPARKLING is een van my gunsteling-reekse omdat dit my vel laat sprankel. Die nuwe NIGHT RECOVERY MOISTURIZING MASK/CREAM (R820…

• Latente TB 80% van ons is reeds met die TB-kiem geïnfekteer maar word nie siek nie.• TB die gewone, geneesbare siekte.• MDR TB Multi drug-resistant tuberculosis , wat nie reageer op die twee eerstelyn-TB-medikasies nie. XDR TB Extensively drug-resistant tuberculosis , wat nie reageer op drie tot tien van die TB-medikasies nie, en selfs op niks reageer nie. JY KAN NIE TB AANSTEEK NIE VAN: • Mense met latente TB.• TB-lyers ná voldoende tyd op medikasie. Kontak met mense met gewone TB is ná twee weke op medikasie veilig.• Mense met MDR-TB is veilig ná twee negatiewe laboratoriumtoetsings, gewoonlik ná tien weke as die mens dadelik goed op die medikasie reageer.• Ook mense met XDR-TB is veilig ná twee negatiewe laboratoriumtoetsings, en mits hul simptome duidelik verdwyn het. WAAR TOETS JY? • Toetsing is gratis by alle…

Retha Booyens Ek dink dis net menslik dat die lewe ’n mens soms wil onderkry, sonder die opdraandes is daar nie afdraandes nie. Wanneer die lewe ’n bietjie druk, soek ek na geleenthede en situasies waaruit ek inspirasie en sielskos kan kry. Daarom hou ek daarvan om tyd deur te bring saam met my vriendinne in ons selgroepie, TED Talks op YouTube te kyk, te oefen en na musiek te luister. Lizelle Bright Ek raak soms moedeloos oor al die onregte wat onskuldige mense beleef. Ek het veral bewus geword van homofobie nadat my dierbare oom vermoor is net omdat hy gay is. Dingetjies wat my opbeur, is ’n uitstappie na die strand of ’n natuurreservaat, saamkuier met familie en goeie vriende, ’n besoek aan die teater, of ’n goeie…

TOE MY MA SE GROENBONE MET AARTAPPEL GENOEG VIR 6-8 1 kg groenbone, stingelpunte afgesny 2 groot aartappels, geskil en in kwarte gesny 1 groot ui, grof gekap 30 ml (2 e) botter (sy het dalk ’n bietjie meer gebruik) sout en witpeper na smaak 1 Sit die boontjies, aartappels en ui saam in ’n kastrol. Gooi net genoeg water by om te bedek. Geur met sout. 2 Kook tot die boontjies sag is. 3 Druk die groente met ’n vurk fyn en roer tot goed gemeng. 4 Geur met sout en witpeper na smaak en sit warm voor. NOU MY FRANSE GROENBONE MET GEROOSTERDE TAMATIESLAAI GENOEG VIR 6-8 200 g kersietamaties 30 ml olyfolie 5 ml Maldon-sout 500 g Franse groenbone, stingelpunte afgesny 250 g sagte mozzarella ’n groot…

Baie het verander sedert Adam en Eva se lushof waarin alle soorte vrugte en groente, blomme, bome en plante welig gedy het. Deesdae woon baie van ons in woonstelle waar ons ten beste met pietersielie of basilie in ’n bakkie op ’n vensterbank kan boer. Of dalk die voorstedelikheid verbete afweer met ’n malva in ’n sementtrog aan ’n ysterreling. Maar wat nie verander het nie, is ons mense se behoefte aan ’n tuin. Dit was juis ’n bossie knoetsige geelwortels en ’n skottel opgeskote spinasieblare met ’n paar kappertjies en koejawels as nagedagte wat my vriendin vir my uit haar dorpstuin gesprokkel het, wat my hartstogtelik na alle tuine wat my al in my lewe gevoed het, laat verlang het. Met René Slee se geskenk uit haar en haar…

DRAAI SENTE MET ’N GLIMLAG OM Dit wil voorkom of die meeste van ons ons inkomste oorskat en uitgawes onderskat - ’n goeie resep vir noustrop trek. Sugendhree Reddy, hoof van persoonlike finansies by Standard Bank, sê ’n goeie begroting is meer as net ’n lys van uitgawes. “Dit behoort jou te help om meer uit jou beskikbare hulpbronne te kry en moet ook ’n manier wees om rykdom te bou.” Sien ’n begroting eerder as iets wat jou blootstelling aan skuld verminder en jou help om meer te spaar. En onthou, dis die klein jakkalsies wat die wingerd verniel. Wees realisties oor onnodige uitgawes soos gimkontrakte wat jy nie gebruik nie, hemelhoë selfoonrekeninge, DSTVsubskripsies, klere, duur klaarbereide kos, wegneemetes en selfs die cappuccino elke dag by die werk. Standard…

BOEK VAN DIE MAAND SOLANK VERLANGE DIE SWEEP SWAAI Danie Marais (Human & Rousseau) Marais se derde digbundel is ’n soms prewelende, plek-plek tierende besinning oor die Suid-Afrikaanse middelklas-weergawe van die mens- like toestand. Dit gaan oor die roaring 40’s en die eerste onheilspellende tekens van middeljarigheid, oor egskeiding, enkelvaderskap, ontnugtering, ’n geliefde ma wat by die dood omdraai en die skrikwekkende relevansie van gruwelrolprente en popkultuur. Die geweld van die liefde en die verraderlike lugspieëlings van die digkuns is deurlopende temas. Dis die woorde van iemand wat sy vertroue in die woordkuns verloor het, maar aanhou skryf omdat dit die enigste vorm van psigiese selfverdediging is wat hy min of meer verstaan. Dis die steierende gedagtes van ’n man wat dronkgeslaan word deur sy eie alledaagse stories uit ’n…

Die beroemde Afro-Amerikaanse digter en skrywer Maya Angelou, wat op 28 Mei vanjaar op 86 oorlede is, het as kind rassediskriminasie en armoede geken, maar sy het haar nie hierdeur of deur talle ander terugslae laat onderkry nie. Maya het eers in haar veertigerjare begin skryf en die volgende tien jaar dosyne literêre pryse gewen en meer as dertig eredoktorsgrade verwerf. Voordat sy (op 41) in 1969 bekendheid verwerf het met die memoires I Know Why the Caged Bird Sings was sy onder meer ’n kok, danser, sanger, politieke aktivis, joernalis en selfs ’n prostituut. Nadat sy bekendheid verwerf het, het sy by Amerikaanse universiteite lesings gegee oor Afro-Amerikaanse letterkunde, hoewel sy nooit op universiteit was nie. Selfs in haar tagtigerjare het sy sowat tagtig lesings per jaar gegee. Van…

WEN Wen Dolce & Gabbana-PARFUUM Ruik sensueel met Dolce & Gabbana Light Blue. Wen een van sewe bottels ter waarde van R1 175 elk Wen Melissa Jelly-skoene Stem bloot ja of nee op ons vraag in “Wat dink jy” en jy het ’n kans om ’n paar Melissa Jelly-skoene ter waarde van R1 250 te wen. TYD vir koffie Gaan loer na al die oulike koffiebekers en -potte wat ons opgespoor het. AEROLATTE CAFFEE PORCELLANA (R429) VAN YUPPIECHEF.COM KOMBUISkarnallies Kyk na die video waar ons stap vir stap vir die kleiner kokke verduidelik hoe om spaghetti bolognaise te maak. Agter-die-SKERMS Ons deel agterdie-skerms foto’s van ons beeldskone voorbladvrou, Minki van der Westhuizen. ’n NUWE avontuur vir Milan Murray Milan vertrek binnekort op ’n staptog van 680…

Minki van der Westhuizen en haar man, Ernst Joubert, is op pad terug Suid-Afrika toe. Sak en pak met bababottels, doeksakke en stootwaentjies … én klein Katerien en die nuwe baba wat in Augustus gebore word. Die Jouberts bly op die oomblik in St. Albans, noord van Londen, waar Ernst vir die Engelse klub Saracens rugby speel. As alles goed gaan, gaan hulle hulle in Julie volgende jaar in Stellenbosch vestig waar ’n nuwe toekoms op die gesin wag. Ernst gaan sy stewels wegpak en ’n ander loopbaan aanpak. Hulle is opgewonde oor die nuweling en weet wat die geslag is, maar wil die geheim nie met almal deel nie. Daar moet darem ’n element van verrassing ná die geboorte wees. Een ding is wel seker: die nuwe baba sal…

• Gebore Kate Garry Hudson op 19 April 1979. • Die musikant Bill Hudson is haar biologiese pa, maar Kate beskou Kurt Russell, haar ma, Goldie Hawn, se lewensmaat sedert 1983 as haar regte pa. Kate het twee kinders: Ryder (2004) saam met eks Chris Robinson en Bing (2011) die seun van haar huidige kêrel, sanger Matt Bellamy van die rockgroep Muse. Sy het bekendheid verwerf in Almost Famous (2000) waarvoor sy ’n Golden Globe gewen het. Sy speel ook gereeld in romantiese komedies soos How to Lose a Guy in 10 Days (2003) en You, Me and Dupree (2006).…

Dis duidelik dat André die nuwe fase in sy lewe met oorgawe aangryp. Baie dinge het vir hom verander. Ses maande gelede was hy nog lid van een van ons suksesvolste sanggroepe wat selfs internasionaal begin naam maak het. Nou sit hy aan die ander kant van die mikrofoon, reg met ’n rits vrae vir die gaste op sy program. Tussendeur werk hy aan sy eerste solo-album en ’n paar ander drome. Want, glo dié Vrystater, jy móét droom. Hoekom het Romanz ontbind? Een van die redes is dat ek aan die einde van 2013 ’n probleem met een van my ore ontwikkel het, en die dokter het my verbied om vir ’n paar maande op te tree. Dis waarskynlik ou skade van al die jare se harde klank, maar…

Wat dink jy van die Britse moorde? My eerste reaksie was groot hartseer – vir die vier kinders, vir die ma, die pa en familie wat oorbly. Hoe kan jy ooit weer die stukke optel? Jy kan jou maar net probeer indink hoe alleen, selfs verlate, Tania Clarence moes gevoel het. Dis moeilik genoeg om voltyds kinders te versorg, wat nog te sê as hulle nie gesond is nie. Ek het net simpatie vir haar. Ek oordeel nie, maar is bekommerd dat haar oorblywende dogter sonder ’n ma gaan grootword. Alles wat ek oor die saak te lese kon kry, dui op moord met voorbedagte rade, wat haar saak baie sleg in die hof gaan laat lyk. Hoekom juis ’n boek oor kindermoord? As ’n toegewyde ma kon ek nie…

MA en dogter Die bekende mediapersoonlikhede Kelly en Sharon Osbourne het in samewerking met MAC COSMETICS elk ’n grimeerreeks uitgereik (PRYSE WISSEL VAN R180 TOT R650; BESKIKBAAR AUGUSTUS). Slim SERUM CLINIQUE SMART CUSTOM REPAIR SERUM (R700 VIR 30 ML; R925 VIR 50 ML) is ’n nuwe, alles-ineen serum. Dié “slim-serum” identifiseer en behandel velkwessies soos hiperpigmentasie, donker vlekke en dehidrasie. SUBTIELE dekking As jy van Estée Lauder se Double Wear-onderlaag hou maar meen dis dalk ’n bietjie te swaar vir jou vel, probeer die nuwe DOUBLE WEAR ALL DAY GLOW BB MOISTURE MAKEUP SPF30 (R450) en daarby ’n BRUSH-ON-GLOW BB HIGHLIGHTER (R365). Dié ligreflekterende verbloemer verhelder donker skadu’s op jou gesig. Estée Lauder se wenner-duo beloof van oggend tot aand natuurlike en subtiele dekking. ’n FYNER vel Nuwe LA PRAIRIE…

Teen die einde van die 1800’s het sewe uit elke honderd Amerikaners aan TB gesterf. Vandag is hulle ver onder die WGO se TB-teikens. Omkeer is dus moontlik, glo Dalene. “Praat maak mense bewus van die risiko’s en help om die stigma en vrees te verdryf. Daarom het ons besluit ons gaan openlik daaroor praat en met TB Proof begin, wat studente en kollegas landswyd inlig oor hoe om hulle te beveilig.” Vandag werk Dalene vir die WGO, en beskou haarself as ’n TB-aktivis. Volgens haar sal veral die volgende help om die risiko te verminder: 1 RAAIMEET DIE RISIKO Jou kind – en jy – kan TB net aansteek van iemand met TB. Probeer dus uitwerk of jul kontakte siek is – mense wat twee weke sonder rede hoes,…

2 VAN DIE BESTES ’n Glas KWV Classic-wyn en Lindt-sjokolade is die volmaakte winterbederf. Wees op die uitkyk na KWV en Lindt se proe-stelle by uitgesoekte winkels landwyd. WEN Gaan na rooi rose se Facebook-blad/ rooirose en vertel ons wat jou gunsteling-winteroomblik is. Gebruik #rooirosewinteroomblik en #kwvwine en voeg jou e-posadres by om in aanmerking te kom vir ’n heerlike KWV/Lindt-geskenkpak van R800. Tops! Food &  Home Entertaining het met Top 10 Bakes for 2014 hul eerste app vir tablette bekend gestel. Pragfoto’s met oulike stap vir stap koekresepte en tien unieke koeke is aan die kom. Meer inligting by www.foodandhome.co.za/10bestbakesapp Die app kan by die Google Play Store of die App Store afgelaai word. WEN ’N WEBER Weber is al die afgelope sestig jaar sinoniem met Suid-Afrikaners, braai en…

Daar was altyd baasbaksters; daardie vroue wat kerke en skole gebou en gemeenskappe versorg het met hul slag om sakke suiker, meel en eiers in lekkernye te omtower. En koek is weer groot nuus: pikante kolwyntjies met die allerfraaiste versiersels en stapelkoeke wat aantrekkingskrag uitdaag. Troukoek is nie meer droë vrugtekoeke wat met ’n laag wit versiersuiker gepantser word en agterna in vertoonkaste stof lê en vergaar nie. Nou tower suikerfeë die verstommendste versiersels in reënboogkleure uit suiker en skep kunswerke wat net so mooi as lekker is. Ons het by ’n paar hedendaagse towertantes gaan kuier wat steeds goud uit strooi spin, maar pleks van skoolsale, het hulle baie suksesvolle ondernemings gebou en woeker met hul talente oor internasionale grense heen. CHARLY’S BAKERY - JACQUI BIESS Wanneer jy voor…

En, hoe was dit?” Carine loer oor die skuim van haar cappuccino asof sy my aan die brand wil kyk. “Ag, oukeierig,” antwoord ek vaag. Ek is steeds nie seker hoe die afspraak was nie. “Brei uit! Begin by die einde, wie het betaal?” Ek rol my oë. “Gaan ons koek bestel?” “Zita, praat!” Ek lag. “Werner het betaal.” Carine eet die skuim van die koffie af. Haar oë eis antwoorde. Ek swig. “Jy is te nuuskierig. Maar goed, ons was by daardie nuwe plekkie naby Magnolia. Hy het deure oopgemaak en stoele uitgetrek asof hy ’n butler-kursus geloop én dit ge-cum het.” Sy frons. “So? Hoekom was dit net oukeierig? Wat het jy aangehad?” Ek beduie dat die kelner maar nog ’n cappuccino kan bring. “’n Jean en ’n…

Marga Jonker het aan die Weskus grootgeword en van kleins af perdgery en saam met haar broer die dorp en die mense leer ken. Sy gee twee dae per week Xhosa by die Durbanville Voorbereidingskool en het twee volwasse seuns en nog een op laerskool. Marga is betrokke by ’n organisasie, Equitots, wat perde in terapie en vir die ontwikkeling van liggaamlik gestremde kinders gebruik. Wat was die eerste “ponie-boek” wat jy gelees het? Annette Spence se Vakansie op Groen Heuwels. Die palominoponie in die boek se naam was Mooinooi. Ek het dit oor en oor gelees en daarna elke boek met ’n perd op die omslag. Hoekom hou perde so ’n betowering vir meisies in? Die sprokie van die prins op die perd waarop alle meisies wag, is nog…

Sjoe. Die vrou is besig. Twee boeke, ’n fliek en ’n hele paar pryse, alles in minder as ’n jaar. En nou gaan hulle haar roman When the Bough Breaks in Spaans en Frans ook uitgee. Dié aktrise, skrywer, TV-aanbieder en rolmodel het ’n paar minute afgeknyp om met ons te gesels. Jy is skrywer én akteur – het jy ’n voorkeur? Ek’s sedert kindsbeen in die vermaakbedryf en wou nog altyd toneelspeel – so die kreatiewe denke was maar daar. TV-sepies, advertensies, flieks en DJ op 5FM het gevolg. So, daardie droom is bewaarheid. Maar namate ek ouer geword het, het die aard van kreatiewe uitdrukking verander - skryf het na vore getree. En ek is mal daaroor. Was die “kulturele verskille” in die fliek Konfetti…