Innholdsfortegnelse for 8/9/2020 i Rapport

Sy huwelik is op die rotse nog voordat hulle hul bruilof kon vier en toe besluit Matthew Boshoff (foto) om sy klaarbetaalde troue weg te gee. Hy het pas aangekondig hy wil die volle troupakket ter waarde van R40 000 aan ’n ander paartjie skenk. “Tye is moeilik en mense het nie geld nie. Ek kan maar netsowel iets goeds doen vir iemand in hierdie tyd,” het die 26-jarige Boshoff op Jacaranda FM se Scenic Drive with Rian gesê. Hy wag nou vir aansoeke van voornemende troupare. As dit nie vir Covid-19 was nie, het hy en sy Franse verloofde in Maart al getrou. Maar toe ry die inperking hul planne in die wiele. Hulle moes die bruilof met 60 gaste by Makiti Wedding Venues by Muldersdrift uitstel. Soos baie…

Die twis in die NG Kerk oor gayhuwelike het opnuut opgevlam nadat die algemene sinode goedkeuring by die departement van binnelandse sake gekry het vir predikante om selfdegeslagverbintenisse te voltrek. ’n Groep behoudendes wat na hulself as die “opvolg-paneel van die 2020 Spesiale Beraad Moreletapark” verwys, beweer deur sy aansoek het die algemene sinode predikante wat nie selfdegeslagverbintenisse wil bevestig nie doelbewus gekompromitteer. “Die algemene sinode het op ’n baie oneerbare wyse opgetree om namens die NG Kerk in sy geheel aansoek by binnelandse sake te doen vir die aanstelling van predikante as bevestigers van burgerlike verbintenisse,” sê ds. Theo Danzfuss, ’n leidende figuur onder die behoudendes. Danzfuss is die voormalige aktuarius van die Hoëveld-sinode en deel van die sogenaamde opvolg-paneel. “Ons glo dit het ernstige implikasies vir alle predikante…

Zimbabwe se regerende Zanu-PFparty sê Ace Magashule se kritiek op hom ná gewelddadige bot-sings met opposisie-aktiviste is “buite orde” en die ANC begaan ’n fout deur hom te steur aan Zimbabwiese kritici, wat eintlik net “vyande van die staat is”. Zanu-PF het Vrydagmiddag in ’n verklaring gereageer op Magashule, sekretaris-generaal van die ANC, se televisieonderhoud Donderdag met die SAUK waarin hy die situasie in Zimbabwe as “betreurenswaardig” beskryf het. Hy het onder meer daarop gesinspeel dat lede van die ANC deur uitgeworpe Zanu-PF-politici ingelig is van die gewelddadige optrede deur Zimbabwe se regeringsmagte om protesoptogte te onderdruk. Foto’s van Magashule saam met voormalige Zanu-PF-lede soos Saviour Kasukuwere, Walter Mzembi en Robert Zhuwao, ’n susterskind van oudpres. Robert Mugabe, is ook op sosiale media gedeel. Patrick Chinamasa, waarnemende sekretaris van inligting…

Die Suid-Afrikaanse Nasionale Bloeddiens (SANB) is in die moeilikheid. Khensani Mahlangu, woordvoerder van die SANB, sê hulle het weens Covid-19 800 kansellasies gehad by persele soos skole en maatskappy waar hulle gewoonlik skenkings kry. Volgens hom was daar genoeg skenkings tydens vlak 5 en vlak 4 van die inperking, maar toe mense in vlak 3 terug is werk toe, het die skenkings afgeneem. Die bloeddiens moet 3 000 eenhede bloed per dag insamel om ’n voorraadvlak genoeg vir vyf dae te kan handhaaf. Enigiets minder as drie dae se voorraad is rede tot ernstige kommer. Mahlangu sê hulle het vier-en-’n-half dae se voorraad. Marion Vermeulen, biomediese wetenskaplike by die SANB, het Donderdag gesê die diens kry ongeveer 16,5% van sy bloed by skole en 23% word by maatskappye geskenk. “Maar…

Belastingbetalers sal aan plaaslike munisipaliteite ’n reddingsboei van sowat R35 miljard moet gee om te verhoed dat dienslewering heeltemal in duie stort, toon ’n ontleding deur Ratings Afrika. Die groep sê 81 van die 100 grootste munisipaliteite het in die 2019-boekjaar meer geld uitgegee as wat hulle ingekry het en dít het ’n gat van R30 miljard gelaat. Daarbenewens kan hul inkomste vanjaar met nog R4,25 miljard daal weens die impak van die Covid-19-ramp. Sowat 60% van die land se bevolking woon in dié dorpe en hul lewensgehalte en vermoë om sake te doen is volgens Ratings Afrika op die spel. Die volle uitwerking van die pandemie op die volhoubaarheid van munisipaliteite sal egter eers oor ’n jaar of twee duidelik wees, sê Leon Claassen van Ratings Afrika. Die enigste…

Dit is nou die tyd om die winkels in te vaar as jy op soek is na winskopies. Daar is ’n afslag-dolheid in die lug en klere, tuinmeubels, huisware, juweliersware, sportdrag en skoonheidsmiddels word teen afslag van tot 60% verkoop. En verbruikers benut die kans. Hoewel kleinhandelverkope in Mei 12% laer was as in Mei 2019, het die volume klere en skoene wat verkoop is, met 2% gegroei. Johannes Khosa en Nicky Weimar van Nedbank se ekonomiese eenheid sê in ’n nota ondanks swak onderliggende toestande was tekstiele en klere een van die kategorieë wat in Mei sterk herstel het. Die herstel in ekonomiese aktiwiteit in Mei en Junie was sterker as verwag. Khosa en Weimar skryf dit in ’n mate toe aan ’n opgehoopte vraag, wat ’n hupstoot kry…

Terwyl sewesprogramme elders ter wêreld in die gedrang is, keer die Blitsbokke vandeesweek terug na die oefenveld om hul seisoen te begin. Ná etlike maande langs die kantlyn weens die koronavirus-pandemie sal die Springbok-sewesspan van Dinsdag af weer in Stellenbosch as groep saamtrek. Vir die Springbok-seweskaptein, Siviwe Soyizwapi, is net die feit dat hulle weer op die oefenveld kan kom, ’n groot verligting. Engeland se sewesspelers is die afgelope week vol-gens The Telegraph deur die Engelse Rugbyunie ingelig dat hul kontrakte nie hernieu gaan word nie weens die pandemie. Dit is die eerste groot sewesland wat finansieel regstreeks deur die pandemie geraak word. “Ons is net bly dat ons weer terug op die oefenveld kan kom. “Dit maak nie saak dat ons nog nie weer kan speel nie, solank ons…

Die veelsydige Chris Woakes en die paaltjiewagter Jos Buttler was gister in Manchester Engeland se groot helde toe die tuisspan die eerste van drie toetswedstryde teen Pakistan met drie paaltjies gewen het. Engeland, wat 277 lopies vir ’n oorwinning moes aanteken nadat Pakistan gisteroggend vir 169 in sy tweede beurt uitgehaal is, was op 117/5 diep in die moeilikheid nadat die Engelse goed begin het. Maar Woakes met 84* (120 b, 10x4) en Buttler met 75 (101 b, 7x4, 1x6) het met ’n vegters-vennootskap van 139 lopies gesorg dat Engeland (277/7) die toets beklink. Dit was Buttler se hoogste telling sedert September 2018 en dit het straks sy toetsloopbaan gered. Dit was Woakes se vyfde 50-tal in toetse. Yasir Shah het 4/99 platgetrek.…

Kwagga Smith gaan sy rugby vir die volgende twee jaar in Japan bly speel. Hy het besluit om by sy klubspan, Yamaha Júbilo in Iwata, aan te bly. Die Springbok-kantman was voor sy besluit om na Japan terug te keer in gesprekke met die Leeus en Haaie oor die moontlikheid om óf Johannesburg óf Durban sy rugbytuiste te maak. Hy is reeds sedert 2018 by Yamaha Júbilo gekontrakteer. “Wat ’n groot rol in my besluit gespeel het, is dat hulle my toelaat om steeds vir die Springbokke te kan speel,” het die 27-jarige boorling van Lydenburg gesê. “Dis vir my ’n groot voordeel om oorsee te speel en steeds toegelaat te word om vir die Bokke te kan speel. “My volgende doelwit is om volgende jaar teen die Britse en…

Vandag se groot motorren op Silverstone in Engeland heet die 70ste Herdenking-Grand Prix. Die Britse GP het reeds verlede naweek op dieselfde baan plaasgevind. Vandag s’n vier die heel eerste motorren om die wêreldkampioenskap wat in 1950 daar beslis is. Giuseppe Farina het dié ren van 70 rondtes in ’n Alfa Romeo gewen. Dít gaan beslis nie vandag weer gebeur nie. Die twee Alfas wat deelneem, spring heel agter weg. Valtteri Bottas en Lewis Hamilton, die verdedigende kampioen, is weer voor in die koor met hul Mercedes’e, terwyl Nico Hülkenberg derde wegspring in een van Racing Point se “Pienk Mercs” en Max Verstappen (Red Bull) vierde. Hülkenberg neem waar vir Sergio Pérez wat in isolasie is weens Covid-19. Hamilton het gister ná kwalifisering bra bekaf gelyk. Hy is wel voor…

Ná ’n gesloer van nege maande moet Thabang Moroe Donderdag oplaas voor Krieket Suid-Afrika (KSA) se raad verskyn om te verduidelik waarom hy nie as uitvoerende hoof afgedank moet word nie . . . maar hy is nie van plan om dít te doen nie. Raad het botsende belange, sê Thabang se regspan Moroe se regspan, onder lei-ding van Michael Motsoeneng, sê hulle het Vrydagoggend ’n brief aan KSA gestuur waarin hulle die beheerliggaam in kennis gestel het dat hul klient aandring op ’n tugverhoor onder lei-ding van ’n onafhanklike voorsitter. Moroe is in Desember geskors vir beweerde pligsversuim hangende die uitslag van ’n forensiese ondersoek na KSA-bestuurspraktyke. Hy en sy regspan glo hy is vol-gens die brief wat hom op 24 Januarie amptelik van sy skorsing ingelig het, geregtig…

Waarheen is die dae wat ’n mens sommer op ’n vliegtuig kon spring om die wêreld te verken? Covid-19 het dit natuurlik kom steel. Of dit nou ’n vlug na ’n eksotiese internasionale bestemming was, of ’n oranje of ’n groene wat jou na Suid-Afrika se wêreldklasvakansieplekke neem, ons mis dit! Sosialemedia-gebruikers wat smag na die dae van vakansies het ’n plan beraam om steeds “vakansiefoto’s” vir hul volgelinge te kan laai. ’n Paar Weense worsies plus ’n foto van ’n eilandbestemming en siedaar, jy’t sonbruin bene op die strand. ’n Toiletsitplek/koffiebeker/skêr se handvatsel plus ’n prentjie van ’n vliegtuigvlerk/stadskim en jy’t ’n foto van die venstersitplek by jou gunstelinglugdiens op pad na jou liefling-stad. Hier is ’n paar lekker voorbeelde. Stuur jou fopvakansiefoto’s Wees kreatief! Stuur dit na alet@media24.com.…

’NKollega toets positief by die werk. ’n Maatjie by die skool kry Covid-19 of jou drafmaat het simptome . . . Wanneer daardie boodskap op jou slimfoon deurkom, moet jy tussen ’n magdom regeringsriglyne en jou dokter se raad probeer uitpluis wie almal in afsondering moet bly en vir hoe lank. Hier’s die kort van die lank . . . Hoe lank moet ek tuis bly? Daar is ’n belangrike onderskeid tussen die isolasie- en kwarantyntydperk, verduidelik The Scientists Collective (TSC), wat riglyne hieroor saamgestel het. Die TSC is ’n groep van meer as 15 mediese spesialiste, waaronder van die Universiteit van die Witwatersrand (Wits) asook die Universiteite van Kaapstad en KwaZulu-Natal en waarvan talle op die ministeriële advieskomitee (Mak) dien. Met isolasie sowel as kwarantyn moet jy ander mense…

Jan Taks probeer om mense te help tydens Covid-19. Baie, waarskynlik miljoene mense, het die afgelope week SMSboodskappe van die Suid-Afrikaanse Inkomstediens (SAID) gekry. Daarin word genoem dat jy reeds aangeslaan is en jy moet net die uitslag Z of jy geld terugkry of moet inbetaal Z goedkeur of wysig. Ek hoor van heelwat mense wat dink dis ’n bedrogspul. Dit is nie. Dit is bloot ’n vriendelike Jan Taks wat probeer om mense te help gedurende die Covid-19-pandemie, sodat hulle nie in lang toue, te na aan mekaar, by inkomstebelastingkantore hoef te staan om hul opgawes in te dien nie. Die eintlike bedrogspul Dit is egter nie in alle gevalle so eenvoudig nie, soos ek verder aan verduidelik. Maar eers wil ek waarsku: Ek het sommer binne dae ook…

■ Monde Mnyande (63), voorsitter van die Sentrale Energiefonds (SEF), is ná ’n kort siekbed oorlede. Hy is in Oktober 2019 in hierdie pos aangestel. Voorheen was hy die hoofekonoom by die Reserwebank en het hy onder Chris Stals, Tito Mboweni en Gill Marcus gewerk. ■ Marinus Wijnbeek, ’n wetenskaplike, oudjoernalis van die SAUK en televisieaanbieder, het in die ouderdom van 80 in Nederland afgesterwe. In 1979 het hy Die Brandkluis, ’n wetenskapprogram vir kinders, aangebied. ■ Eric Rycroft, die musikus en dirigent bekend as die “vader van die altviool” in Suid-Afrika, is op 28 Julie in sy huis in Pretoria oorlede. Hy was ook in ’n stadium die dirigent vir die groep die Springbok Nude Girls toe hulle ’n simfoniestuk opgeneem het. Hy het beswyk aan komplikasies wat hy…

Die Covid-19-pandemie het denke oor die werkplek gemoderniseer. Die gedagte dat “werk” iets is wat jy doen, eerder as ’n plek waarheen jy gaan, is die grootste kopskuif wat posvat. In sy boek Maverick beskryf Ricardo Semler ’n werkplek waarmee hy in 1993 sy tyd ver vooruit was. Nou, midde-in die Covid-19-pandemie en die Vierde Nywerheidsrevolusie, verstaan ons daardie werkplek. Semler, ’n Brasiliaanse sake-man, het ’n klein familie-vervaardigingsonderneming, Semco, in een van Brasilië se grootste konglomerate omskep danksy ’n onortodokse benadering. Semco het werknemers aangemoedig om waar moontlik van die huis af te werk; het volwaardige fleksietyd sonder enige voorgeskrewe werktye ingestel tot só ’n mate dat selfs produksiespanne hul werksure kon bepaal; jaarlikse verlof van 30 dae was verpligtend om produktiwiteit te verhoog; en fabriekswerkers kon gewysigde produksieteikens instel…

Volksblad, wat Saterdag opgehou het om papierkoerant te wees, is al lank weens faktore buite sy beheer in die visier van ’n garde wat die intrinsieke waarde van ’n koerant meet met die winsmotief as oorheersende dryfveer. Ses jaar gelede is ’n poging van die bestuur van Media24 om hierdie “ikoniese erfenistitel” (ek haal prof. Lizette Rabe van Stellenbosch aan) ’n Vrystaatse buro van die dagblad Beeld te maak, ná ’n verbete stryd afgeweer. In 2020 was advokate soos persleiers wat self deur die koerantmeule gekom het, en invloedryke direkteure met ’n sterk pro-koerant-ingesteldheid, weens hul aftrede nie meer ’n struikelblok nie. Op 7 Julie 2020 het Media24, op die spoor van ander mediahuise, wyd gesnoei. Publikasies is gesluit, frekwensies het verander, en Volksblad, die oudste Afrikaanse koerant, is uit…

Die versoeking is groot om parallelle te wil trek tussen Suid-Afrika se benarde situasie – ’n korrupte regering, ’n bevolking wat verarm, foutlyne wat neergelê is deur ons voorsate – en ander lande wat weens rampspoed die nuushooftrekke haal. Kyk byvoorbeeld na Libanon. Daar het duisende kilogram vlambare ammoniumnitraat ontplof en sodoende ’n groot deel van Beiroet, die middestad, in puin gelê al het kenners vir jare gewaarsku dat die geringste vonk tot ’n ramp sou lei. Ook die middelstand daar is deur jare van wanbestuur gelyk gemaak met die grond. Hier lê, sover ons weet, geen vrag ammoniumnitraat in ’n hawe nie, maar dit verg nie baie verbeelding nie om aan te toon dat ’n maatskaplike ontploffing dreig: Rykes wat nie emigreer nie, word ryker; die middelklas, wat die…

’n Vyfjarige seuntjie is so getraumatiseer nadat hy en sy ma drie nagte in ’n polisiesel aangehou is dat hy begin hakkel het. Ná drie dae in die selle saam met ander verdagtes is hulle vrygelaat sonder enige verduideliking of verskoning. By navraag het die polisieman wat hulle opgesluit het, gesê hy doen net sy werk. Die Gautengse polisiehoof het nou ’n dringende ondersoek gelas na die gebeure en die ma, Angela Hattingh (43), het ’n prokureur aangestel om haar te help om ’n eis teen die polisie in te stel. Ingevolge die Kinderwet mag geen kind onder enige omstandighede in polisieselle aangehou word nie. Hattingh sê sy en haar kêrel het twee weke gelede ’n hewige rusie gehad. Hy is toe weg by sy huis, waar hulle die afgelope…

Die Regterlike Dienstekommissie (RDK) het nie die etiese standaarde vir regters in ag geneem toe hy besluit het om nié die dronkry-regter Nkola Motata uit sy amp te verwyder nie. Só sê die drukgroep Freedom Under Law (FUL) in hofstukke waarin hy vra die hof moet die RDK se besluit verwerp om Motata nie in ’n staat van beskuldiging te plaas nie. Nicole Fritz, uitvoerende direkteur van FUL, het verlede week hofstukke by die hooggeregshof in Johannesburg daaroor ingedien. Die RDK het Motata verlede jaar ’n boete van R1,1 miljoen opgelê eerder as om hom in ’n staat van beskuldiging te plaas. Motata was minder as sewe jaar ’n regter voordat hy vir twee jaar hoofsaaklik as beskuldigde in die hof verskyn het. Daarna was hy nege jaar lank met…

Die personeel van Pretoriase prokureursfirmas het die afgelope week ingespring om self die yslike agterstand by dié stad se hooggeregshof te probeer verlig. Die land se besigste hooggeregshof gaan gebuk onder infrastruktuurprobleme en regslui be-weer die administratiewe personeel steek óf lyf weg óf eis kontant om hul werk te doen. ‘Korrupte amptenare skep verdere probleme.’ Sowat 4 000 dagvaardings en kennisgewings van mosiehofaansoeke is nie uitgereik nie en prokureurs wag al lank vir hofdatums vir meer as 6 000 onbestrede mosiehofaansoeke. Tiaan Joubert, voorsitter van die Pretoriase Prokureursvereniging (PPV), het aan Rapport gesê sedert die vereniging en regsfirmas se personeel Maandag begin help het, is ’n aansienlike hoeveelheid werk ingehaal. Die helfte van die 4 000 dagvaardings en kennisgewings is reeds verwerk. Die PPV, ’n vrywillige organisasie van regslui, bedryf…

Die eienaar van ’n motorhandelaar in Johannesburg wat aangekla word van 25 klagte van bedrog ter waarde van meer as R4 miljoen, is in die landdroshof in Randburg op borgtog van R100 000 vrygelaat. Dit kom nadat Prevashini Pillay (26) haar onderneming se deure gesluit en gedurig rondgetrek het om die klaers te probeer vermy. Pillay het haar Maandag aan die polisie oorgegee nadat ’n groep ontstoke motoreienaars in Junie klagte teen haar gaan indien het. Pillay van Blazing Car Auto Sales in Randburg word daarvan beskuldig dat sy sedert November 2019 motors ingeneem het om te verkoop, maar die verkopers nie ten volle daarvoor betaal het nie. Sommige het glo net ’n deposito en ’n paar paaiemente gekry. Sy het die verkopers genader nadat hulle hul voertuie aanlyn geadverteer…

Gegewe die kalender en aankondigings tot dusver, die kort vakansie van 26 tot 30 Oktober én as mens aanneem daar gaan nie nog sluitings wees nie en die skooljaar eindig, soos beplan, op 15 Desember, gaan die onderskeie grade vanjaar die volgende getal dae by die skool wees: ■ Gr. R, 6 en 11: 137, ■ Gr. 1-4, 9 en 10: 122, ■ Gr. 5 en 8: 117, ■ Gr. 7: 165 en ■ Gr. 12: 170. Die getal skooldae wat kinders in werklikheid gehad het, verskil van skool tot skool, afhangende van hoe vroeg hulle die onderskeie groepe teruggebring het, hoeveel dae per week die grade by die skool was en of aanlyn onderrig plaasgevind het. Alle leerlinge van gr. R tot gr. 12 was veronderstel om vanjaar 204…

Kos vir lae-inkomstegroepe was in Julie 11,6% duurder as ’n jaar gelede, terwyl gewone inflasie in dié tyd 2,2% beloop het. Veral die pryse van stapelvoedsel soos mieliemeel, rys en aartappels het skerp gestyg, toon ’n huishoudelike inflasie-barometer wat die afgelope drie jaar deur ’n nieregeringsorganisasie, die Pietermaritzburgse Economic Justice and Dignity Group (PMBEJD), bygehou word. Mieliemeel was in Julie 18% duurder as ’n jaar gelede, rys het 43% meer gekos, koekmeel 22% meer en suikerbone 14% meer. Wit brood was 11% duurder en bruin brood 8%. ’n Aanduiding van hoe gesinne in dié inkomstegroep sukkel, is dat die pryse van hoenderpote in Julie 63% duurder was as ’n jaar gelede. Afval was 9% duurder. “Mieliemeel is ’n groot gedeelte van die kosmandjie, asook ander stapelvoedsel soos rys, kool en…

Meer as 84 000 staatsamptenare kon tydens die inperking nie voluit werk nie, maar hulle is steeds “voluit” betaal. Dit blyk uit ’n antwoord van Senzo Mchunu, minister van staatsdiens en administrasie, op ’n parlementêre vraag van dr. Leon Schreiber van die DA. Die regering het ook geen plan om staatsamptenare wat weens Covid-19 nie kan werk nie se salarisse te verminder nie, het Mchunu gister gesê. ‘Staatslui wil werk. Hulle vra nie om tuis te sit nie.’ Schreiber sê dit is ’n “skandaal” dat staatsamptenare wat nie werk nie steeds betaal word, terwyl sowat drie miljoen Suid-Afrikaners in die private sektor na raming reeds hul werk en inkomste weens die rampbestuursregulasies verloor het. Hy sê tesourie-syfers wys staatsamptenare verdien gemiddeld R393 000 per jaar, of R32 750 per maand,…

Lewer af asseblief: ’n cappuccino met laevetmelk, 2¾ teelepels xilitol sonder room en met kaneel in die vorm van ’n blaar bo-op gesprinkel. Dít is een van die uiters spesifieke bestellings wat die app Uber Eats die afgelope jaar moes aflewer, blyk uit sy jaarlikse verslag oor Suid-Afrikaners se kosneigings. Tamaties, uie en agurkies is die garnering wat die meeste kitskoseters tog net nie op hul wegneemkos wil hê nie. Hoewel minder verbruikers die afgelope jaar tamaties laat weglaat het, was die algemeenste versoek in meer as 70 000 bestellings dat tamaties nie as garnering gebruik moet word nie. Minstens 3 000 heel uie is gespaar, omdat dit die item is wat die tweede meeste mense nie op hul wegneemkos wil hê nie, sê Uber Eats. Maar dit beteken nie…

■ Santam, verreweg die grootste korttermynversekeraar, sal R1 miljard uitbetaal aan kwalifiserende polishouers wat omvattende dekking vir bedryfsonderbreking het. Die bedrae wat aan individuele polishouers uitbetaal sal word, is 70% van die versekerde bedrag oor ’n tweemaande-tydperk en wissel tussen R25 000 en R1,5 miljoen. ■ Hollard sal ’n maksimum van R200 000 per polis uitbetaal – gebaseer op die versekerde onderneming se omset en nié op die bedrag waarvoor die polishouer verseker was nie. ■ Old Mutual Insure raam dit sal hom ongeveer R650 miljoen kos om eise uit te betaal aan kwalifiserende polishouers wat ’n jaarlikse versekerde bedrag van R5 miljoen of minder het. ’n Versekeringskenner wat verkies om anoniem te bly, het aan Rapport gesê dit wil voorkom of Ou Mutual elke polishouer se verlies individueel en…

Jessica Shuran Yu, ’n voormalige wêreldsierskaatser wat vir Singapoer aan Wêreldbyeenkomste deelgeneem het, sê baie ander huidige skaatsers het na vore gekom oor hul beweerde mishandeling in dié sportsoort, maar dat hulle te bang is om dit openbaar te maak omdat hulle nog deelneem. Yu (20) het vertel hoe sy sedert die ouderdom van 11 jaar deurgeloop het onder afrigters in Beijing, waar sy geoefen het. Sy is onder meer met ’n plastiekskaatsplank geslaan totdat sy gebloei het omdat sy glo te lui was om te oefen. Sy is ook daagliks as “vet,” en “nutteloos” uitgeskel. “Sedert ek na vore gekom het, het baie skaatsers my gekontak.” Volgens haar het sy ook al gesien hoe ’n agtjarige meisie geskop is.…

Wie voer jou hierdie verkeerde inligting? Zelt Marais, president van WP Rugby, het “groot ontsteltenis” in SA Rugby veroorsaak toe hy agter die nasionale liggaam se rug met Nathi Mthethwa, minister van sport, kuns en kultuur, vergader het. Dié vergadering, wat deur ’n ANC-LP, Hisamodien (Ishmam) Mohamed, gereël is, het die minister blykbaar onkant gevang. Marais het hom in dié vergadering uitgevra oor die geld wat aan sportlui beskikbaar gestel is weens die Covid-19-pandemie. Daar is ook oor transformasie in rugby gesels. Die minister het kort daarna vir SA Rugby in kennis gestel van die vergadering. Luidens Rapport se inligting was daar “woede” onder sommige amptenare omdat dit nie die protokol vir sulke vergaderings is nie. Marais het aan Rapport gesê daar was nooit so ’n vergadering nie. “Glad nie.…

Hy hou die rekord vir die meeste drieë deur ’n Springbok in ’n toets. Maar ondanks dié trotse rekord – ses drieë wat al 15 jaar agter sy naam staan – het Tonderai Chavhanga uiteindelik maar net in vier toetse gespeel. Deesdae bedryf dié vriendelike Zimbabwiër sy eie konsultasieagentskap, wat onder meer sy dienste verleen aan S-Group, ’n netwerk-maatskappy wat oor ’n eksklusiewe lidmaatskap van meer as 2 000 sakeleiers en sportmense van oor die wêreld heen beskik. “Die aanpassing wanneer ’n mens se rugbyloopbaan verby is, is nie maklik nie,” erken Chavhanga (36). “Rugby het my geleer dat die voorseisoen die belangrikste aspek van ’n seisoen is. As ’n mens nie al die ure van bloedsweet deurmaak nie, kan jy nie verwag om sukses te behaal en drieë te…

Terwyl hul landgenote aan die anderkant van die Atlantiese Oseaan merendeels klippe gekou het by die Amerikaanse PGA-kampioenskap, het ’n rits Suid-Afrikaners die laaste paar dae stem dik gemaak in Engeland. Brandon Stone (67) en Dean Burmester (69) is ná drie rondes van die Engelse kampioenskap op Hanbury Manor in Hertfordshire op 198 (-15) in die gesamentlike derde plek. Om Suid-Afrikaanse harte verder te verbly, het die 20-jarige Wilco Nienaber sy onverwagse kans om in Hertfordshire te speel met albei hande aangegryp. Hy het gisteraand gaan slaap met ’n aandeel aan die tiende plek, danksy ’n 67 (vier houe minder as syfer) wat ses voëltjies ingesluit het. Nienaber is ter elfder ure op die spelerslys ingesluit nadat die Amerikaner John Catlin en sy joggie die toernooi se bio-borrel verlaat het…

Ondanks interne teenstand het die hoop opgevlam dat die WP Rugbyunie gewillig sal wees om beheer van sy rugbysake aan ’n Amerikaanse belegger af te staan ter wille van ’n R100 miljoen-geldinspuiting. Die unie het Vrydag ’n lang vergadering met Marco Masotti van MVM Holdings gehad, het Rapport verneem. Masotti wou nie kommentaar lewer nie, maar ’n ander bron het bevestig dat “beduidende vordering” gemaak is. Die WP het glo ingestem om beheer van rugbysake aan die belegger oor te gee – “mits daar sekere voorwaardes is”. Dit sluit in dat die WP veto-reg wil hê oor besluite soos die aanstelling van afrigters. Dit is ver van waar die twee partye verlede week was, toe die WP nog teen die belegging geskop het en die amateur-beamptes geweier het om beheer…

Die algemeenste simptome van Covid-19 is hoes, kortasem, koors, hoofpyn, spierpyne, gewrigspyne, ’n seer keel en moegheid, aldus die Nasionale Instituut vir Oordraagbare Siektes (Nios). Dr. Angelique Coetzee, voorsitter van die Suid-Afrikaanse Mediese Vereniging, sê mense moet ’n dokter spreek as die simptome ernstig raak. “Ons praat van kortasem, so dat jy sukkel om te praat, en moegheid, tot so ’n mate dat jy sukkel om van jou kamerdeur tot by jou bed te loop,” sê sy. “Die hoes is nie ’n ligte kuggie nie, maar klink soos kinkhoes.” Die Amerikaanse Centers for Disease Control (CDC) waarsku ook dat verwarring en die onvermoë om wakker te bly ernstige simptome is waarvoor mense dadelik die nooddienste moet kontak. Dit geld ook as die pasiënt blouerig in die gesig of om die…

Midnight Express Met Alan Parker se dood verlede week is daar opnuut belangstelling in sy meesterlike Midnight Express, nou op Netflix. Dis gegrond op die ware verhaal van Billy Hayes (Brad Davis) wat lewenslank in Istanbul tronk toe gestuur is omdat hy met dwelms gesmokkel het. Dit is briljant en met passievolle emosie verfilm met wrede tonele wat jou kan ontstel, maar verdien om veral nou, ná Parker se dood, gesien te word. Die kyker word veral opgesweep as hy sien hoe onmenslik ander mense behandel kan word, maar dit word eksplisiet gewys. Pasop! Crazy Rich Asians Goeie nuus. Hier kan ’n mens soos ’n drein lag sonder om skuldig te voel oor enigiets, en wat ’n plesierigheid is hierdie romantiese fliek sonder om briek aan te draai! Jy hoef…

Facebook is vir ouers, YouTube se video’s langdradig en daai memes op Instagram het mens mos al almal gesien. Dís hoe die jongklomp na sosiale media kyk. Hulle is almal op TikTok, jy weet, daai kitsvideo-netwerk wat pres. Donald Trump dreig om uit Amerika te skop. Hy sê dié Chinese sosialemedianetwerk bedreig Amerika se binnelandse veiligheid. Hy’s nie alleen nie; Indië het dit reeds verbied en Australië dink daaroor. TikTok is vinniger en kreatiewer as Facebook, Instagram en die ander. In ’n videogreep van 15 sekondes moet jy ’n nuwe dans aanleer, leer om te vleg, ’n nuwe resep baasraak . . . Jy hoef ook nie regtig iets te leer nie, jy kan ook net vermaak word deur die inperkingsgrappies van die een of ander komediant. TikTok is in…

Ek wil nie in ’n land woon wat konings het nie, maar dis nou so. Thandisizwe Diko, wat ANC-bande het en vet tenders losslaan, noem homself koning van die amaBhaca, maar die Oos-Kaapse regering sê hokaai, Diko is net hoof van twee dorpies. In Suid-Afrika het ons so baie konings, ons begin nou selfs spesialiseer in vals konings. Dis betekenisvol, liefste laaggebore leser, want in ’n sekere sin is alle konings vals. Hulle ontvang hul mag en geld, hulle verdien dit nie. ’n Kwartmiljard rand van ons belastinggeld word aan tradisionele leiers se salarisse bestee. Dis mos nie reg nie. Verklap die feit dat die mense in beheer wél dink dis reg, nie iets van die monargistiese en tradisionele ingesteldheid van die regering en die ANC self nie? Watter begrip…

Die regering se “nuwe” ekonomiese idees is altyd ’n variasie van meer infrastruktuurontwikkeling, meer regulering, finansiering vir entrepreneurs (wat eindig in korrupsie), werkskeppingsprogramme soos die uitgebreide openbare-werke-program, ensovoorts. Dit moet natuurlik altyd deur die regering self gedoen word. Die privaat sektor word as vennoot genoem, maar in praktyk beteken dit die politici neem die besluite terwyl die privaat sektor die risiko loop. Niemand bevraagteken ooit die demonstreerbare mislukking van die “ontwikkelingstaat” nie, al het hulle nou ook die konsep van die “bekwame staat” by die opposisie geleen. Die aanname is dat Suid-Afrikaners nie vertrou word om hulself te ontwikkel nie; die regering moet besluit watter nywerhede beleggings verdien, en die regering moet “ophef”. Dit mis-ken die mate waartoe arm mense reeds betrokke is by ekonomiese aktiwiteit, wat geweldig uitgebrei kan…

A. Engelbrecht skryf: George Claassen (02.08) weerspreek homself: “Vir ’n teorie om as wetenskap aanvaar te word, moet dit getoets kan word en bekragtigbare voorspellings kan maak.” Die teorie van evolusie voldoen net so min aan die vereiste as die geloof in die skepping. Die Bybel ontken nie die oerknal (big bang) nie. As “die sterre saamgesing het en al die hemelinge gejubel het” (Job 38:7) moes dit ’n “oerknal” gewees het. Die bekragtigbare voorspelling is in Luk. 21:25,26. Mark. 13:24,25 verduidelik: “Die son sal verduister word en die maan sal nie skyn nie. Die sterre sal uit die ruimte val en die kragte van die hemelruim sal ontwrig word.” Kan jy jou ’n groter oerknal voorstel? Ook die verskuiwende kontinente kan verklaar word deur Noag se vloed. Gerhard Stander,…

Johan Visser, Kleinmond, skryf: Volgens Pienkes du Plessis het Basie Bas-son by die Skole-ondersteuningsentrum (SOS) se seminaar beweer die evolusieleer het by die duiwel ontstaan. Dit sou beteken evolusie is vir hulle boos, en kreasionisme Bybels, asof hulle die Bybel as ’n handboek vir natuurwetenskap beskou. Skeppingsverhale het in baie antieke kulture en godsdienste bestaan. In die Bybel is daar twee sulke skeppingsverhale (Gen. 1 en 2). Ek sal my nie op die Bybel verlaat as ek meer wil uitvind oor die ontstaan van alle lewensvorme nie. Ons kan nie die Bybel gebruik soos die Voortrekkers nie. Ons het darem nou al in die 21ste eeu aangekom. Karien Baard, Fairland, skryf: Ek stem volmondig met Pienkes du Plessis (2 Aug.) saam in sy kommentaar oor Basie Basson van die SOS…

Rynhardt van Rensburg skryf: Francois Pienaar, jy het so lekker gekniel vir Black Lives Matter (BLM) maar het jy geweet daar is 165 stukke rassewetgewing teen blankes? Gelukkig het en sal ek nooit ANC-bokke steun nie! Die Afrikaner kon nog nooit regop staan in 121 jaar nie, want hulle buig die knie elke keer vir geld en nogmaals geld. Dis waarom kommunisme vandag in Suid-Afrika heers. In ’n korrupte, bloeddorstige land moet die slagspreuk wees “All lives matter”. Dít bestaan nie vir Pienaar se geliefde ANC nie! Eugene Kruger, Pretoria, skryf: Hier gaan doen julle dit wraggies weer, naamlik om die BLM-beweging voorbladstatus te verleen. Nou het die rugby-ouens nes die krieket-ouens die aas gesluk – hook, line and sinker! Van agter af het die ANC dié gulde geleentheid wat…

Terwyl die R3,8 miljard waarvoor Eskom 12 mense dagvaar in die Guptas se buitelandse bankrekeninge lê, gaan die “klein visse” in Suid-Afrika waarskynlik gelikwideer word as die siviele eis slaag. En een vis wat nog los rondswem, is Duduzane Zuma. Al was ’n maatskappy waarvan hy die helfte besit het ’n aandeelhouer in Tegeta Exploration and Resources, is hy nie ’n verweerder in die eis nie. Die meerderheidsaandeelhouer was die Guptas se Oakbay. Luidens die dagvaarding het Matshela Koko, destyds waarnemende uitvoerende hoof van Eskom, Glencore gedreig om die Optimum-myn aan Oakbay en Tegeta te verkoop. Oakbay het op 25 November 2015 ’n aanbod van R1 miljard vir Optimum en al sy verwante bates aangebied, maar Glencore het dit verwerp. Op 28 en 29 November het Mosebenzi Zwane se departement…

Die dubbele moord op ’n ouerpaar in hul spoghuis naby Pretoria is die eerste ernstige misdaadvoorval in dié landgoed, die Fly Inn, die afgelope 25 jaar. Wayne (57) en Janique Giles (56) is Dinsdagoggend vroeg doodgeskiet en hul dogter, Rachel (20), gewond. Hul seun, Brandon (28), is ongedeerd. “Ons leef in die paradys. Kinders ry met hul fietse in die straat op en af. Ons het nog nooit ’n voorval hier gehad nie,” sê ’n inwoner wat gevra het om anoniem te bly. Die Giles-gesin is voor 06:00 in hul dubbelverdiepinghuis aangeval. Wayne was reeds aangetrek en is in die sitkamer op die onderste verdieping in die bolyf geskiet. Janique was nog in haar slaapklere toe sy aan die bopunt van die trappe deur haar linkerlong, net onder die hart,…

Chris van Beljon van Boere Droogtehulp SA NPC het gister ’n gedenksteen op Kenhardt in die Noord-Kaap onthul ter herinnering aan die vernietigende uitwerking van die agt jaar lange droogte in die provinsie. “Die steen moet die droogte gedenk, maar meer die goeie tye en hoe mense begin saamstaan het,” het hy aan die sowat 30 boere by die geleentheid gesê. Van Beljon sê die gedenksteen huldig die boere wat weens die spanning oor die droogte hul lewens geneem het en ook aan dié wat weens die verliese hul plase moes agterlaat. Baie plase staan nou leeg omdat die boere net nie langer kon aanhou nie. Die steen is ontwerp deur Peet Engelbrecht van Rustenburg. Die onthulling van die gedenksteen was oorspronklik beplan vir 27 Maart, maar dit moes uitgestel…

Van pres. Cyril Ramaphosa se naaste vertrouelinge in die ANC verloor geduld omdat hy nie sterk genoeg optree teen korrupsie nie. “Hy probeer te hard om oor alles eenstemmigheid te kry voordat ernstige besluite geneem word. Dis Cyril se sterk punt, maar terselfdertyd sy swak punt. Dinge kan egter nie so aangaan nie – hy is president van die ANC. Ons het hom gekies om sekere dinge te doen en een of ander tyd sal hy dit moet doen,” het een van twee topbronne in die party by navraag hieroor aan Rapport gesê. “Die party kan daarna skeur, maar as dit moet gebeur, dan is dit so. Dan raak ons ten minste van die gemors in die ANC ontslae,” het een van hulle gesê. Albei bronne sê dis ’n wanopvatting…

Begunstigdes van staatsgesubsidieerde huise mag dit eers ná agt jaar verkoop. As daar dwingende redes is waarom hulle vroeër wil verkoop, moet hulle aansoek doen vir skriftelike toe-stemming van die departement van menslike nedersettings. Die verkopers moet goeie redes verskaf, soos dat die eienaar elders werk gekry het en soontoe moet verhuis of dat hulle moet wegkom van ’n geweldsituasie. Die huis mag ook net aan Suid-Afrikaanse burgers verkoop word wat nie reeds ander eiendom besit nie. Die afgelope drie jaar was daar 2 767 begunstigdes wat hul huise wou verkoop.…

maar teen die einde van daardie jaar weens uitstaande skuld in die hek geduik het. Sy sê dit was juis dié ervaring wat haar na Uprise.Africa met sy innoverende manier van finansiering gebring het. Dit behels dat lede van die publiek via ’n internetplatform kan bydra tot die finansiering van maatskappye, in ruil vir aandele daarin. Volgens Qadir behels die SAX-plan dat beleggers die lugdiens as ’n lopende saak oorneem met al sy bates, maar sonder enige laste. Dít beteken SAX se bedryfslisensies, -regte en -sertifikate bly behoue. As die voorlopige likwidateurs die aanbod aanvaar, hoop sy om teen 20 September ’n prospektus vir voornemende beleggers bekend te stel en met die skarefinansiering te begin. Werknemers van SA Express (SAX) hoop om die lugdiens teen Februarie 2021 weer aan die…

Verskeie bekendes soos die Bokvleuel Bjorn Basson het, of verdien tans, hul salaris in Rusland. Basson het verlede seisoen vir Enisei-STM gespeel. Die voormalige Junior Bok-senter Franco Naudé is nou vir Strela-Agro beskikbaar. Strela-Agro het reeds Suid-Afrikaanse spelers soos die voormalige Cheetah-stut Günther Janse van Vuuren, die gewese King-slot Stephan Greeff, die oudlosvoorspeler van die OP Stephan de Wit, die oud-Vrystaatse flank Stephan Malan en die voormalige Puma-losskakel Kobus Marais gekontrakteer. Die voormalige OP-losskakel Oliver Zono speel sy rugby vir Krasny Yar Krasnoyarsk. Slava Moscow het die name van verskeie Suid-Afrikaanse spelers soos Martin Dreyer, Andrew Kuhn, Wynand Grassmann, Jono Janse van Rensburg, TJ Goddard, Gerhard Nortier, Jordan Holgate en Gene Willemse op hul betaalstate. VVA Saracens het Leighton Eksteen, Freddy Ngoza en Clinton Theron na Rusland gelok. Die gewese…

Die Rose-reeks vir vrouegholfspelers in Engeland is gister afgelas weens ’n hewige brand wat langs en op die Wentworth-baan in Surrey woed. Verskeie spelers het Vrydag asemhalingsprobleme ontwikkel weens al die rook. Dit het die organiseerders gedwing om die toernooi uit te stel. Die nooddienste is Vrydagmiddag ontbied en die nabygeleë Sunningdale-baan is ontruim. Die brand het gister oorgewaai na Wentworth, waar die toernooi gespeel word en Ernie Els ’n huis besit. Spelers wat op die 9de en 10de putjies was, is onder begeleiding na veiligheid gebring. “Ek was op die 9de toe daar baie rook was. Dit is ongelooflik hoe vinnig die vlamme versprei het. Ek het takke hoor kraak en toe die vlamme gesien,” het Cara Gainer gesê.…

Die Cheetahs het aan SA Rugby voorgestel dat die ses voorste spanne in die land ná afloop van vanjaar se Curriebekerreeks voortaan in die Noordelike en Suidelike Halfrond se kompetisies speel. Die Cheetahs glo vanjaar se Premierliga met volsterkte spanne sal belangstelling onder ondersteuners prikkel. Hulle meen die spanne wat in die ses voorste posisies eindig, moet volgende jaar tussen die Pro14- en die Superreeks verdeel word. “Die bedoeling van Vrystaat Rugby is om ’n gesonde balans te kry tussen alle aktiwiteite en om met SA Rugby saam te werk om ’n werkbare oplossing te vind,” het Harold Verster, besturende direkteur van die Cheetahs, gesê. “Vrystaat Rugby se posisie tans is dat daar nog geen veranderinge ten opsigte van Pro-rugby aangekondig is nie en dat ons ’n ooreenkoms tot Mei…

Spanne se vermoëns om mededingend op ’n internasionale verhoog te wees, moet volgens Altmann Allers die uitgangspunt wees wanneer die land se rugby-base einde Augustus op ’n vergadering van SA Rugby se algemene raad stem oor wie vorentoe in ’n internasionale reeks soos die Pro14 of Superrugby speel. “Is minder meer?” het Allers, die man wat die finansiële hartklop van Leeusrugby is, gesê. Sterk sprake bestaan dat die Leeus, Bulle, Stormers en Haaie van volgende jaar af in ’n Pro16-reeks in die Noordelike Halfrond sal speel. So ’n migrasie benodig egter eers ’n meerderheid van 75% stemme van SA Rugby se algemene raad, wat op 28 Augustus vergader. Die algemene raad bestaan uit die 14 unies se uitvoerende hoofde en presidente. Tydens die vergadering sal daar ook oor ’n nuwe…

The Hater met Maciej Musialowski en Vanessa Aleksander. Regisseur: Jan Komasa. Op Netflix. Hoe maklik flankeer skrywers tog nie met daardie liefling-held van moderne films, sosiopate, nie. Hy/sy is net een trappie bokant ’n psigopaat. Daar is enkeles wat ysingwekkend doeltreffend met jou kop smokkel. Nurse Ratched in One Flew Over the Cuckoo’s Nest (1975), die blokkiesmaag Patrick Bateman in American Psycho (2000), fava-boontjies se moses – Hannibal Lecter, Anton Chigurh met die toiletborselkuif in No Country for Old Men (2007), die dansende kaartmannetjie in Joker (2019), en Alex in A Clockwork Orange (1971). Hierdie skapies uit Lucifer se kudde het nou ’n maatjie gekry. Tomasz Giemza (fenomenaal vertolk deur Maciej Musialowski) in Jan Komasa se The Hater. Dit het die internet en sosiale media gekaap tot ’n soort verwronge…

Wêreldwyd is daar ’n onversadigbare behoefte aan die swartblou, soetsuur supervrug bloubessies. Ek weet die klein vruggie is nie goedkoop nie, maar dit is propvol heilsaamheid en dit is iets wat ek gereeld by my dieet insluit. Bevat antioksidante Bloubessies bevat meer antioksidante as ander bessies soos aarbeie, bosbessies of braambessies. Antioksidante is belangrik vir jou gesondheid – dit reinig jou bloedstroom van vrye radikale en bied ook beskerming teen sonskade. Beveg inflammasie Bloubessies kan inflammasie help beveg, wat goeie nuus is vir mense wat sukkel met artritis. Goed vir jou vel Dit bevat vitamien A en C, wat met jou vel se gesondheid verbind word. ’n Dieet ryk aan bloubessies sal dus sorg vir ’n gladder, egaliger vel. Hoera! Bloubessie-en-heuning-een-koppieplaatkoekies Dit is die maklikste plaatkoekies om te maak –…

Die berig in Rapport op 26 Julie deur Johan Eybers (“SOS maak toe aanlyn kykers die duiwel in”) en die artikel verlede Sondag deur George Claassen (“In die land van Noag is skeppers koning”) verwys. Ons reageer met teleurstelling op hierdie snydende, neerhalende en onwetenskaplike berigte. Kinders moet die geleentheid gegun word om self die ander sy van ’n onderwerp volledig te ondersoek en self te besluit wat sin-vol en logies is. Ons wil juis kinders bemagtig om kritiese denkers te wees. Solidariteit se Skole-ondersteuningsentrum (SOS) doen kinders geen onreg aan om vir hulle geleenthede te skep en hulpmiddels te voorsien nie. Hulle is onder geen verpligting om dit te gebruik nie. In skrille kontras word die leerstelling van evolusie eensydig afgedwing in skole vandag. Hoekom? Voel evolusioniste bedreig selfs…