Innholdsfortegnelse for 5 Januarie 2023 i Landbouweekblad

Anderkant die reënboog Ná die feestyd is ’n mens se tenk hopelik ’n bietjie voller. Tyd met die familie en ’n lekker braai of twee help darem altyd om ’n bietjie perspektief te gee. Eskom gooi ongelukkig ’n redelike skaduwee oor enige optimistiese vooruitsigte wat jy vir 2023 oor die feestyd opgebou het! Laas jaar het Suid-Afrika die ergste beurtkrag nóg ervaar. ’n Verlammende 3 300 uur van geen krag teen gemiddeld fase 2. Akkumulatief is dit 138 dae sonder krag. Jy het met beurtkrag gaan slaap, en daarmee wakker geword. Dit is taai omstandighede om enige besigheid wat enigsins afhanklik is van krag, sinvol te bedryf. Melkerye, pakhuise, vleisverwerking, besproeiing — reg deur die bank tref dit swaar. En die diesel vir kragopwekkers is eenvoudig ook nie ’n volhoubare…

Was die voorspelling oor die toekoms in die kol? In ’n artikel oor landelike vooruitgang in Die Landbouweekblad van 10 Januarie 1923 het DR. J.R. MALAN die ideale toekomstige boer só geskets: ■ Hy spesialiseer meer en let meer op die gehalte van sy produkte. ■ Masjinerie speel ’n groot rol in sy boerdery. ■ Hy is welopgevoed en vooruitstrewend. ■ Hy is ’n koöperasieman en werk mee tot die voordeel van almal. ■ Hy besef wat hy vir die samelewing beteken. ■ Hy het ’n verruimde wêreldsiening. ■ Deur sy wetenskaplike kennis behaal hy doeltreffendheid en verkry hy die ware genot wat daar vir ’n opregte boer is. Malan het ook gewys op die voor- en nadele van die afgesonderde lewe op die platteland vir die boer. Volgens hom…

SWAAR reën vroeg verlede maand het groot skade aan infrastruktuur in die Tankwa-Karoo aangerig, maar was ook welkom vir rooibosboere. Toerisme-ondernemings se deure moes sluit, plase en toegangspaaie is verwoes en talle mense was sonder heenkome. Mense wat langs die Doringrivier bly, is op 12 Desember aangesê om hul plase te ontruim. Volgens mnr. André Vermeulen, eienaar van die Sadawa-wildreservaat in die Tankwa-Karoo en ’n skaapboer, moes voertuie uit die rivier gesleep word. Volgens mnr. Leon Theunissen van die plaas Kareekolk op die Sutherlandpad is die gebied se infrastruktuur erg beskadig. Hy sê die vloed is baie ernstig. “Baie plaasdamme se walle het gebreek en daar is mense wie se huise heeltemal tot op die grond vernietig is.” In die tweede naweek van Desember het hy 95 mm reën op…

1 RWANDA | Wingerdsektor kry Duitse hulp Rwanda gaan met Duitse hulp ’n wyndruiwe- en wynmaakbedryf vestig ná hy in 2019 ’n ooreenkoms met die Rynlandse regering in Duitsland gesluit het. Mnr. Charles Bucagu, ’n adjunkdirekteur-generaal van landbouontwikkeling in die Rwandese regering, sê plaaslike kultivars word tans geïdentifiseer en planne beraam om dit plaaslik te vermeerder, asook die invoer van hoëproduksie-kultivars van elders. Duitsland het hom in die ooreenkoms daartoe verbind om Rwanda te help om tegnologie, navorsing en kundigheid te vestig om wyne vir plaaslike verbruik en uitvoer te produseer. – Farmers Review Africa 2 TANZANIË | Nuwe abattoir mik vir uitvoermark Die Nguru Hills Ranch-abattoir wat onlangs geopen is in Mvomero, sowat 250 km wes van Dar es Salaam, het die kapasiteit om daagliks 100 beeste en 1…

Rubriek Jaarliks is dit die gebruik om ’n siening in die toekoms te waag ten opsigte van die ekonomie en veranderlikes wat belangrik vir die landbou is en wat in ag geneem behoort te word met beplanning. Niemand kan egter presies voorspel wat gaan gebeur nie. Die makro-ekonomiese en geopolitieke omgewing bly onstabiel weens die oorlog tussen Rusland en Oekraïne wat die landbou se inset- en uitsetpryse vir olie, kunsmis en graan regstreeks raak. Daar is ook ander konflikkwessies wat kan opvlam, soos ’n toenemende beweging na die beskerming van eie markte. Dit bemoeilik wêreldhandel en beweeg weg van die benadering van ’n vrye mark en handel. Dit hou risiko’s vir Suid-Afrika se oop ekonomie en landbou in. Onthou, sowat 50% van die landbou-inkomste word met uitvoer verdien. Die ontwrigting…

Die rooivleisbedryf gaan ’n groeifase binne wat die ontwikkeling van nuwe protokolle en stelsels tot voordeel van die bedryf sal beteken. Die bedryf is reg vir herlewing en vernuwing, en daar is geen beter tyd as nou nie, sê MNR. DEWALD OLIVIER, uitvoerende hoof van die rooivleisbedryfsdienste (RMIS), wat in Augustus verlede jaar gestig is. Baie werk is reeds gedoen om vergelykende stelsels te ondersoek wat Suid-Afrika kan help om ’n vleisgraderingstelsel in werking te stel. “Die waarde wat ’n graderingstelsel tot die rooivleisbedryf voeg, kan fenomenaal wees, of maar net effens. Die waarheid is ons weet nog nie. Hoewel ons kan bespiegel, sal dit belangrik wees om êrens te begin.” ’n Graderingstelsel sal ook iets anders vir elke gebruiker daarvan beteken. Dit is belangrik om die waarde per kilogram…

Beesteling KORTOM ■ Die eerste doelwit wat oorweeg moet word, is of die dier wat jy wil teel, bestem is om in ’n maternale teelprogram of as ’n terminale dier vir beesvleis gebruik te word. ■ Elke teelbesluit moet volgens doelwitte, hulpbronne en die omgewing geneem word. Sonder om dié drie faktore in ag te neem, is daar ’n goeie kans om jou teiken te mis. ■ In die geval van terminale diere bly die fundamentele eienskappe noodsaaklik. Dit is die plig van die saadverskaffer om as wetenskaplike op te tree, met die boerdery of plaas as sy laboratorium. Deur die genetiese eienskappe aan te pas by die spesifieke omgewing, hulpbronne en doelwitte waarmee hy te doen het, eksperimenteer, bedink en bewys of weerlê die saadprodusent die genetiese eienskappe. Vir…

Een leser kan 'n Boereplaas Bordspeletjie wen. NEEM SÓ DEEL: Vul die blokraai korrek in en gebruik die letters in die kleurblokke om die antwoord op die vraag op bl. 83 te ontrafel. SMS die woord LBW, gevolg deur jou antwoord, naam, van en dorp/stad na 33677. Deelnemers kan soveel keer SMS as wat hulle wil. Elke SMS kos R1,50. Net mense binne SA grense kan deelnee Die wenners sal die oorspronklike, voltooide blokraai en hul besonderhede moet verskaf. Geen werknemers of h gesinne van Media24 en sy reklamemaatskappye mag deelneem nie. Die sluitingsdatum is 26 Januarie 2023. Geen posstukke word meer as inskrywing aanvaar nie. Geen erkenning van ontvangs word gestuur nie. Sudoku Nr. 101 Deur Gerda Engelbrecht Voltooi die rooster sodat elke ry dwars, elke kolom af en…

GAUTENG CARLETONVILLE BOSCHHOEK (393), 750 ha, aan Mooivallei-boerdery (Edms.) Bpk., van El-Shaddai-boerderytrust, R14 316 625. NIGEL VRISGEWAAG (501), 39 ha, aan Luklyn (Edms.) Bpk., van Y. Makhubela, R1 200 000. PRETORIA DOORNKRAAL (420), 36 ha, aan Pretoria Proteas (Edms.) Bpk., van J.J. en S.D.V. van Staden, R3 200 000. ELANDSFONTEIN (493), 21 ha, aan A.M. en C.N. Maphanga, van J.G. Meiner, R1 600 000. OOG VAN BOEKENHOUTSKLOOF (288), 21 ha, aan C. Smith, van H.J. Blomerus, R2200000. KWAZULU-NATAL BALLITO LOT 69 (917), 30 ha, aan Nony Properties BK, van Charles Lyon Carlyon Reynolds Willtrust, R6 022 400. HARDING LOT 35 DRONK VLEI RESERVE (9438), 24 ha, aan Burnview Trading-trust, van M.A. Gemmell, R3 000 000. NEWCASTLE TWYFELHOEK (3339), 399 ha, aan Thakhu Trading (Edms.) Bpk., van Raaswater Estates (Edms.) Bpk.,…

SKAAPBOERE EERSTE LINIE VAN PLAASVEILIGHEID? WENBRIEF In die begin 1970’s was daar sowat 33 miljoen skape in Suid-Afrika en sowat 22 miljoen mense. Die verbruik per kop van skaapvleis het in 1984-’85 ’n hoogtepunt van sowat 7 kg per jaar bereik. Daar is tans sowat 21miljoen skape, die menslike bevolking is sowat 60 miljoen, en die verbruik per kop beloop slegs 3,1 kg per jaar. Die slagprys van lammers was toe (1971-’72) sowat R1/kg, teenoor die huidige sowat R90/kg (volgens syfers van die staat). Verskeie faktore het bygedrae tot die verandering in bogenoemde syfers, waarvan probleemdiere, veediefstal, klimaatsverandering, deregulering en verbruikersgedrag (wat saamval met ekonomiese faktore en politieke veranderings) die belangrikste is. In LBW van 1 Desember 2022 gee Manie so ’n klein kykie in die “probleemwêreld” van die veeboer…

GROOT moeilikheid wag op Suid-Afrika indien die landbousektor ’n politieke speelbal word en op die altaar van politieke korrektheid geplaas word, waarsku landbouleiers in die aanloop tot die algemene verkiesing in 2024. Verskeie landbouleiers het oor hul verwagtinge en beskouinge van voorrangsake vir die nuwe jaar na die aanloop tot die verkiesing verwys en gesê hulle is bekommerd dat die ANC-regering aan weinig anders as sy eie politieke oorlewing aandag gaan skenk. In hierdie opsig kan die landbou ook in hul visier geplaas word. “Dit is nie grond wat kos produseer nie, dit is kundigheid. Daardie kundigheid moet vertroetel en soos goud opgepas word sodat dit behoue bly vir Suid-Afrika,” waarsku mnr. Christo van der Rheede, uitvoerende direkteur van Agri SA. Mnr. Derek Mathews, voorsitter van Graan SA, meen almal…

Rubriek Die departement van landbou, grondhervorming en landelike ontwikkeling het op 6 Desember 2022 in ’n skrywe aan belanghebbendes in die graan-, oliesaad- en graanproduktesektor verduidelik hoe hy te werk sal gaan om inspeksiedienste teen Augustus 2023 toe te pas. Die skrywe word met gemengde gevoelens begroet. Die datum is in dié stadium ’n teiken en nie ’n streng toepassingsdatum nie. AGTERGROND Die Wet op Landbouprodukstandaarde (Wet 119 van 1990) maak voorsiening dat die departement beheer kan uitoefen oor die verkoop en uitvoer van sekere landbouprodukte, asook beheer oor die verkoop van sekere ingevoerde produkte. Ingevolge die wet word vereis dat grane, oliesade en graanprodukte wat in Suid-Afrika verkoop word, geïnspekteer moet word. Leaf Service is dienooreenkomstig die vereistes van die wet as gevolmagtigde aangestel om namens die departement die…

Griekse en Italiaanse navorsers ontwikkel tans ’n elektroniese toestel wat vrugtevlieë as ’t ware uitsnuffel op grond van hul chemiese spoor. Die mikpunt is om te keer dat vrugtevlieë ongevraag saam met invoervrugte van een land na ’n ander verskeep word. Die e-neus-projek word tans gesamentlik aangepak deur die Benaki- fitopatologiese instituut in Griekeland en die Italiaanse maatskappy PCA Technologies. As ’n eerste stap het die navorsers die chemiese reukprofiele van verskillende soorte vrugtevlieë saamgestel. Daarna is gevorderde rekenaartegnologie gebruik om sensors te leer hoe om dié reuke waar te neem by vrugte wat met vrugtevlieë besmet is. “Ons wil vasstel of ’n mens sodoende kan agterkom wanneer vrugtevlieë in ’n koelhouer is, en selfs watter soort spesie teenwoordig is,” sê prof. Nikos Papadopoulos, professor in toegepaste entomologie aan die…

Suid-Afrika het teen die einde van 2022 op hete kole gewag vir uitsluitsel oor die tariefverhogings waarom Eskom vir 2023-’24 by die nasionale energiereguleerder (Nersa) aansoek gedoen het. Indien dit goedgekeur word, sal ’n styging van 32% in die gemiddelde koste van elektrisiteit op 1 April in werking tree. Volgens mnr. Harold Burgess, besturende direkteur van Dabar Energie, gaan dit vanjaar waarskynlik die grootste faktor in boere se besluitneming oor hernieubare energie wees. Verskeie landbouleiers het reeds hul kommer oor die voorgestelde verhogings uitgespreek met party wat selfs waarsku dat dit voedselproduksie in die gedrang kan bring. Burgess het egter die nuwe tariefstrukture bekyk wat Eskom in sy aansoek voorstel, en sê dit bied ook geleentheid vir boerderye om te bespaar. Die grootste bydraende faktor tot die 32% in die…

KLEIN VELDVOERTUIG IDEAAL VIR PLAASWERK Hy lyk dalk klein, maar die Polaris Ranger XP1000-veldvoertuig skrik nie vir harde werk nie en is ideaal vir wildplase en gebruik by lodges en op plase. Die tweesitplekvoertuig het ’n tweesilinder-vierslag Polaris Prostar-enjin van 1 000 cc. Hy het ’n kantelbak, kan gewig van tot 454 kg dra en kan 1,2 ton sleep. Prys: R390 000. NAVRAE: Mnr. Leon Laing, 083 303 0494. WATERTENK VIR KNAP SPASIES JoJo het ’n oplossing om water in klein ruimtes te kan opvang met sy superslim-watertenk van 1 000 liter. Dit is slegs 400 mm dik en ideaal om in baie smal gedeeltes van persele, soos onder die oorhang van ’n huis se dak, aan te bring. Die tenk is 1,8 m hoog en 2,02 m breed, en…

Vooruitskouing GROENTE Die varsproduktemark het ’n stormagtige tyd agter die rug en produsente gaan in die nuwe jaar veranderlikes beter moet bestuur om winsgewend te bly. Die ongeëwenaarde prysstygings vir brandstof, verpakking, chemiese en bemestingsprodukte, en ander koste, soos arbeid en rentekoerse, noodsaak produsente om nou nóg beter te beplan voordat daar geplant word. Die inflasieknyptang gaan boonop binnekort sy invloed op die produksie van vars produkte begin wys. Mnr. Deon van Zyl, handelshoof van Grow Fresh Produce Agents, verwag dat daar in 2023 oor die hele spektrum van groente, veral aartappels, uie en tamaties, ’n afname in lewerings kan wees wat vars produkte duurder vir die verbruiker gaan maak. “Die huidige situasie word verder gekompliseer deur die onstuimige weerstoestande. Vir markagente gaan dit ’n baie belangrike jaar wees waarin…

Resepte: NIC VAN WYK EIETYDSE SOETSUUR LEWER My ouma het kleintyd altyd vir ons lewerkoekies en soetsuur lewer gemaak. Ek hou deesdae van jag en elke keer as ek ’n bok skiet, maak ek die lewer op my manier gaar in ’n pan oor die kole. Jy kan ook skaap- of beeslewer gebruik. ■ Kanola-olie vir braai ■ 1 groot ui, in dun ringe gesny ■ 400 g lewer, skoongemaak en in skywe gesny ■ 1 knoffelhuisie, fyngekap ■ 100 g bruinsuiker ■ 250 ml bruinasyn ■ 1 pakkie bruinuiesoppoeier ■ Sowat 150 ml warm water ■ 20 ml worcestersous ■ Fyn sout en varsgemaalde swartpeper Verhit die olie in ’n pan op die stoofplaat (of doen dit sommer oor die kole) en braai die ui tot bruin. Voeg die…

Whitey: Sakereus van Shoprite deur Niel Joubert. Uitgegee deur Tafelberg. Prys: R330. Whitey Basson is Suid-Afrika se onbetwiste kleinhandelkoning. Dié biografie, wat met sy toestemming geskryf is, vertel van sy kinderjare as plaaskind op Porterville, hoe hy destyds met Pep Stores se steun agt winkels in die Kaap gekoop het om geleenthede in die voedsel-kleinhandelsektor aan te gryp, hoe hy Shoprite stilweg opgebou het, OK Bazaars vir R1 oorgeneem en binne ’n jaar winsgewend gemaak het, en die uiteindelike sukses van die kleinhandelgroep wat hy tot groot hoogtes gelei het. Whitey se unieke, mensgerigte bestuurstyl en reguit manier om ’n ding te sê, kom in dié inspirerende verhaal na vore. Die voorwoord is deur dr. Johann Rupert geskryf. Rewilding Africa: Restoring the wilderness on a war-ravaged continent deur Grant Fowlds…

5,7 miljoen Die Suid-Afrikaanse sitrusbedryf het die afgelope jaar 5,7 miljoen kartonhouers minder uitgevoer as verwag, al was dit 3,2 miljoen meer as in 2021. Sitrus waarvan die uitvoervolumes gedaal het, is pomelo’s (800 000 kartonhouers minder teen 16,7 miljoen) en valencia-lemoene (1,2 miljoen kartonhouers minder teen 53,8 miljoen). Daar is 3,6 miljoen meer kartonhouers suurlemoene uitgevoer as verlede jaar, wat 2,4 miljoen meer is as verwag. – Fredalette Uys 12,8% Voedselprysinflasie was in November 12,8%, wat 0,5% hoër was as in Oktober. Die inflasiekoers vir olies en vette was 24,8%, wat 1% laer is as in Oktober. Die enigste voedselkategorie waarvan die inflasiekoers laer as die verbruikersprysinflasie van 7,4% was, was vrugte, teen 1,7%. Die koers vir brood en grane was 19,9%, vir melk, eiers en kaas 10,9%, en…

Die vrugtebedryf bevind hom vanjaar waarskynlik weer in onstuimige waters, sê mnr. Wayne Mudge, stigter en uitvoerende hoof van Cape Five, een van die eerste vrugte-uitvoermaatskappye wat ná deregulering gestig is. Lees meer op bl. 48. Vertel van jou gesin. Ek en Susan het in September ons 25ste huweliksherdenking gevier. Ons het drie seuns – Thomas (23), Daniel (20) en Joseph (17). Wat doen jy as jy nie werk nie? Ek is baie lief vir plante, veral fynbos. Ek bring dus graag tyd in die natuur deur, en kweek ook fynbos. Ek hou ook baie daarvan om te kook. Waar hou jy vakansie? Meestal in Suid-Afrika, maar ek is dol daaroor om oorsee te reis en verskillende kulture te ervaar. ’n Deel van die rede waarom ek so lief is…

GRONDBOONTJIEBOERE is versigtig optimisties vir die komende seisoen nadat aanplantings in November begin het. “Die grondboonplantjies wat sover geplant is en opgekom het, se gehalte ten opsigte van groeitempo en gesondheid lyk beslis beter as verlede jaar dié tyd,” sê mnr. Eduard Dreyer, grondboonboer en mede-eienaar van Vienna Ground Nuts, ’n verwerkingsaanleg tussen Bothaville en Kroonstad in die Vrystaat. Mnr. Lourens de Kock, grondboontjieboer van Noordwes wat ook ’n verwerkingsaanleg, Roba Foods, bestuur, stem saam. Hy sê twee faktore speel veral ’n rol. “Ons het tot dusver meer hitte-eenhede gehad as dié tyd verlede jaar. Tóé was dit oorwegend koel en daar was nie eintlik baie warm dae tussenin nie.” Voorts het baie boere vanjaar saad teen aalwurms behandel toe daar geplant is, volgens Dreyer, De Kock en ander produsente…

DIE wenopbrengs in Amerika se nasionale mielieopbrengskompetisie vir 2022 was 394,0485 skepels per akker, oftewel 26,5t/ha. Mnr. Heath Cutrell, ’n boer van Chesapeake in die suide van die Amerikaanse deelstaat Virginia, neem sedert 2015 aan die kompetisie deel en was al by vorige geleenthede ’n kategorie-wenner, maar hierdie was sy beste opbrengs nóg. Hy het aan die nuusdiens DTN gesê hy probeer elke jaar iets nuuts doen met die hoop om telkens ’n bietjie beter te vaar. Hy het sy saad (Dekalb 66-18) vroeg in April in rye van 30 duim teen 38 000 plante per akker geplant. Hy sê vroeg in die seisoen was omstandighede baie gunstig, maar later was daar ’n droër tydperk waarin hy bekommerd begin raak het oor die verwagte opbrengs. “Ek sal nie sê hulle…

DIE eerste private treinoperateur het die eerste hekkie oorkom om goedere op Transnet se spoorlyne te kan vervoer. Transnet Freight Rail het einde November aangekondig dat Traxtion Sheltam die eerste vlak van die evalueringsproses voltooi het om spoorvrag op sy Kaapse korridorroete te kan vervoer. Traxtion is die grootste onafhanklike spoorwegmaatskappy in Afrika. Transnet wil, as deel van sy hervormingsprogram, derdeparty-operateurs toegang gee tot dele van sy netwerk. Volgens Engineering News sal Traxtion drie maal per week sy treine op die roete tussen Kroonstad en Oos-Londen kan gebruik, en na verwagting hoofsaaklik landbouvrag vervoer. Transnet het 16 gebruiksgleuwe vir sy Kaapse vragskiphouerkorridors te koop aangebied, en Traxtion was die enigste suksesvolle bieër. Die maatskappy het dus die eerste fase van die evaluasieproses voltooi, en moet nou die res van die…

Geldbeplanning Sekerlik een van die belangrikste funksies in boedeladministrasie is dié van die eksekuteur. Die eksekuteur is verantwoordelik vir administrasie rakende die afhandeling van die boedel. Dit behels onder meer om beheer te neem van die bates in die bestorwe boedel, die laste en uitgawes in die boedel te betaal, en om die bates in die boedel aan die erfgename en legatarisse in die boedel te verdeel. Dit alles moet ingevolge die bepalings van die oorledene se testament gedoen word. ’n Mens mag enigiemand as eksekuteur in jou testament aanwys. Dit beteken egter nie dat dié persoon outomaties aangestel gaan word nie. Die meester van die hooggeregshof stel die eksekuteur aan en geen persoon mag as eksekuteur optree sonder ’n formele aanstellingsbrief van die meester nie. Hoewel die oorledene dus…

Met ’n geboortedatum in die 1932-oesjaar is Chateau Libertas beslis een van die oupagrootjies van Suid-Afrikaanse rooi versnitte. Om dié mylpaal te vier, het Distell ’n spesiale gedenkbottel met die 2021-oesjaar bekend gestel wat in bottels van 1,5 liter en 750 ml beskikbaar is. Dié Cabernet sauvignongebaseerde versnit vereer wyle Duimpie Bayly, wat lewenslank ’n bydrae tot die wynbedryf gelewer het, en ook ’n groot rol in Chateau Libertas se geskiedenis gespeel het. Hy het geglo Chateau Libertas is ’n goeie vriend wat jou nooit in die steek laat nie. As student het hy gereeld dié vriend ontmoet, maar ná hy die wynbedryf betree het, was hy bykans 60 jaar lank – van vroeg in die 1960’s tot met sy dood in 2021 – by Chateau Libertas betrokke. Ná sy…

Miskien is dit ’n goeie ding om aan die begin van die nuwe jaar net eers weer terug te kyk na wat van die vorige jare se Nuwejaarsvoornemens geword het. Die grootste gros het lankal opgehou om hulle met sulke dinge op te saal. Dit gaan met hulle soos die matrikulant wat nie sy wiskunde-eindeksamen gaan skryf het nie. Toe sy ma wou weet waarom nie, het hy eerlik geantwoord: “Ma, ek weet mos wat die uitslag gaan wees. Hoekom sal ek my net verder in verleentheid stel?” En tog, ten spyte van al die mislukkings, wil ek jou aanmoedig om nog ’n keer ’n stuk selfdissipline te probeer toepas en jouself uit te daag om ten minste één doelwit daar te stel vir die nuwe jaar. Dalk slaag jy…

Daar was grondtransaksies in ál die distrikte in die Vrystaat vanaf Desember 2021 tot verlede November. In die TABEL is ’n opsomming van grondtransaksies groter as 10 ha in dié provinsie in die betrokke tydperk. Altesaam 658 ooreenkomste is in 41 distrikte gesluit. Die proses het 299 678 ha teen R3,817 miljard behels. By Wesselsbron het pryse met 20,8% gestyg en by Lindley het dit met 16,8% gedaal. Ten opsigte van die registrasie van transaksies vir plase van verskillende groottes, lyk dit soos volg (verlede jaar se syfer is tussen hakies): kleiner as 50 ha, 10% (9%); 50-150 ha, 16% (15%); 150-300 ha, 27% (23%); 300-450 ha, 14% (22%); 450-600 ha, 8% (10%); groter as 600 ha, 24% (21%). Altesaam 48% van die distrikte toon ’n gunstige prysneiging. In al…

Landbou-organisasies, boereverenigings, ens., is welkom om die datums van hul byeenkomste aan ons te stuur vir publikasie in die Landboukalender. Stuur die besonderhede aan lbw@landbou.com BOEREDAE 11 FEBRUARIE: Drakensbergerbeestelersgenootskap: Vrystaatstudiegroep. Vrede. 051 410 0974. 22 FEBRUARIE: Charolaisboeredag, Vryburg-skouterrein. June Wiid, 051 410 0953. SKOUE 8-11 FEBRUARIE: Heidelberg (Wes-Kaap). Sarah Koch, 082 725 4091; sarahs.val@gmail.com 10-11 FEBRUARIE: Victoria-Wes. Adri Gerber, 082 940 8231; vicweslandbou@gmail.com 15-19 FEBRUARIE: Riversdal. Cornel Pfaff, 082 412 7033; skou@riversdaler.co.za 23-25 FEBRUARIE: Williston. Klara Steenkamp, 060 580 7480; blomklara@yahoo.com 23-26 FEBRUARIE: Bieliemieliefees, Reitz. Navrae: 083 303 6117 (voorsitter, borge en kunstenaars) of 083 395 2640 (uitstallers, algemene navrae en kampering). 2-4 MAART: Swellendam. Danitsa Badenhorst, 082 093 1780; skou.reception@gmail.com of skouborge@gmail.com 8-11 MAART: Beaufort-Wes. Samantha Smit, 079 396 3531; samanthamegansmit04@gmail.com 13-15 APRIL: Clanwilliam. Wilna Nieuwoudt, 083 685 4356;…