Innholdsfortegnelse for 06-Apr-18 i Landbouweekblad

GRONDHERVORMING behoort weliswaar meer landelike mense in staat te stel om ’n behoorlike lewe uit boerdery te maak, skryf die ekonoom dr. Neva Makgetla, maar net ’n derde van die land se bevolking woon vandag in landelike gebiede. Verder weerspieël die gronddebat se eng fokus op wetlike verblyfreg grootliks buitelandse werklikhede en nie dié van Suid-Afrika nie. In Asië en Latyns-Amerika was die doel van grondhervorming om die buitensporige huur wat gevestigde boere moes betaal, uit te skakel. In Suid-Afrika is die doel grootliks om nuwe boere te vestig, of ervare boere op nuwe grond te vestig. Buiten grond het daardie boere egter ook water, infrastruktuur en behuising nodig, asook toerusting, ander produksiemiddele en instellings wat hulle kan bystaan met bemarking, finansiering en tegniese hulp. Om grond eerste te verskaf…

As daar nie iets drasties gedoen word aan die indringerplante nie, sal Suid-Afrika se bewerkbare grond daagliks minder word en ons besproeiingswater sal opdroog. Ek is ’n omgewingaktivis. My grootste bekommernis is dat 79miljoen ha tans onder indringerplante in Suid-Afrika is. Daar kan werk geskep word vir die werkloses deur die indringerbosse af te kap en meganies op te kerf in stukke van sowat 15 mm (die masjiene is beskikbaar). Die staat moet dit na plase vervoer vir die boere om dit byvoorbeeld oor hul mielierye te strooi om die vog in die grond te hou. Ek glo deur die vog te bewaar kan tot 2 ton per hektaar meer geoes word. Die fyngekerfde houtstukke kan ook in vrugteboorde en wingerde om die stamme of op die walle gegooi word…

Mnr. Warwick Barnard, ’n Oos-Kaapse wildboer, is op Wildbedryf SA se jaarlikse galadinee by die luukse Hotel Ranch naby Polokwane aangewys as die Wildboer van die Jaar vir 2018. Barnard is die uitvoerende hoof van Woody Cape Wildlife, wat veral bekend is om sy puik buffelteelmateriaal. Mnr. Johan Bouwer, ook van die Oos-Kaap, het die eerbewys vir biodiversiteit en maatskaplike verantwoordelikheid ontvang. Mnr. Hannes du Preez van Matla Mamba-boerdery in Noordwes en Limpopo het die eerbewys vir groen ekonomie ontvang. Die Wildteler-eerbewys is aan mnr. Martin Schoeman toegeken.…

1 NIGERIË | Rysboere haal nie hul teikens Dit is onwaarskynlik dat die Nigeriese landbou president Muhammadu Buhari se mikpunt gaan haal om teen vanjaar genoeg rys te kweek om selfvoorsienend met dié stapelvoedsel te wees. Dit is nadat die Nigeriese ryskwekersvereniging (Rifan) bekend gemaak het die land het verlede jaar 5,8 miljoen ton rys geproduseer, teenoor die 7,9 miljoen ton wat Nigerië verbruik het. Volgens die Amerikaanse departement van landbou het Nigerië egter net 3,7 miljoen ton rys gekweek — 4% meer as die vorige jaar, terwyl die land se rys-invoer met 19% toegeneem het tot 2,5 miljoen ton. Sedert Buhari se aankondiging het die staat amper $1 miljard se beleggings in rysproduksie en -verwerking aangemoedig, invoertariewe van tot 60% gehef en die Nigeriese sentrale bank aangemoedig om produksielenings…

AMPER 132 miljoen kartonhouers sitrus van 15 kg elk sal na verwagting in die huidige seisoen uit Suider-Afrika uitgevoer word. Dit is ’n verbetering van 7,1% op verlede jaar se uitvoer-oes, aldus die jongste skatting van die sitrusbemarkingsforum. Die verwagte 131,7 miljoen kartonhouers verteenwoordig die volumes uitvoervrugte uit Suid-Afrika, Swaziland en Zimbabwe. Die stewige groei word hoofsaaklik aan ’n toename in aanplantings en herstel ná die droogtetoestande in sommige produksiegebiede toegeskryf. Valencias, wat die grootste deel van die sitrusoes beslaan, se verwagte opbrengs is egter byna onveranderd gelaat op 53,9 miljoen kartonhouers, net minder as verlede jaar se oes. Die afname is hoofsaaklik weens haelskade by Nelspruit. Dit het tot ’n afname van 34% in die streek gelei, sowel as ’n afname van 7% in die Wes-Kaap weens die droogte.…

’N Memorandum van verstandhouding wat voordele vir die landbou en sy werksmag, asook vir die Kommissie vir Versoening, Bemiddeling en Arbitrasie (KVBA) inhou, is onlangs tussen Agri SA en die KVBA onderteken. Van die voordele wat die ooreenkoms vir die landbou en werkers inhou, is dat dit werksekerheid sal bevorder deur alternatiewe vir afleggings te soek. Dit sluit in skemas om personeel se salarisse gedeeltelik te laat subsidieer as ondergang ondernemings in die gesig staar, en skemas om afgelegde werkers op te lei. Vir die KVBA bied die ooreenkoms groter insae in die landboubedryf en sy werking. Me. Jahni de Villiers, hoof van arbeid en ontwikkeling by Agri SA, sê die memorandum het gespruit uit ’n gesprek met die KVBA ’n paar maande gelede. Sy sê uit die gesprek het…

HOEWEL die reële prys per kilogram vir aartappels met meer as inflasie toeneem, is aartappelboere steeds nie beter af nie, want die insetkoste styg vinniger as die prys. Hierdie situasie duur reeds sedert 2010 voort. Volgens mnr. Pieter van Zyl, bedryfsinligtingsbestuurder by Aartappels Suid-Afrika (ASA), is bykans 245 miljoen 10 kg-sakkies aartappels verlede jaar gelewer. Dit is slegs 5 miljoen sakkies minder as in 2015 toe die rekord van 250 miljoen sakkies gelewer is. In 2015 was dit egter ’n groot kwessie, want pryse was teen die vloer, maar verlede jaar het boere ’n aanvaarbare prys verdien. “Reële pryse was verlede jaar 21% hoër as in 2015, met die effek van inflasie uitgehaal,” sê hy. Van Januarie tot November 2015 het die gemiddelde prys vir alle klasse en alle groottes…

AUSTRALIË se wolskeersel vir 2017-’18 sal na verwagting 1,4% tot 345 miljoen kg hoër wees vergeleke met die vorige seisoen, aldus die jongste vooruitskatting van dié land se produksie-vooruitskattingskomitee. Die komitee sê die volume wol van 16,5 mikron en fyner wat in die eerste vyf maande van die seisoen (Julie tot einde November 2017) getoets is, het aanmerklik afgeneem, maar ’n groot toename in wol van 28,5 mikron en sterker is ervaar. Daar was ook ’n afname in die volumes wol van 21 mikron. Die gemiddelde veseldeursnee van die skeersel was 20,8 mikron. Die gemiddelde lengte van die wol wat gelewer is, het met 1,7 mm tot 88,4 mm afgeneem. Dit kan daaraan toegeskryf word dat baie boere vanweë die hoë wolpryse vroeër as gewoonlik geskeer het.…

Die Departement van Landbou, Bosbou en Visserye het middel Maart kernsyfers oor die Suid-Afrikaanse landbouekonomie bekend gestel. Dit toon die oorhoofse bruto inkomste in die landbou het verlede jaar met sowat 7,3% gegroei tot R275 miljard. Die netto inkomste het met 12,3% gegroei tot R101 miljard. Die netto inkomstesyfer word bereken nadat die regstreekse koste van aangekoopte produksiemiddele afgetrek is. Dit is dus eintlik ’n tipe bruto wins-syfer en moet so beoordeel word. Oorhoofse koste moet nog afgetrek word. Dit sluit aspekte in, soos depresiasie en vergoeding aan eie kapitaal. Ongelukkig is nuwe skuldsyfers vir die landbou vir verlede jaar nog nie gepubliseer nie. Die jongste syfers is dié vir Junie verlede jaar. Daardie syfers het landbouskuld geraam op R151,2 miljard en landboubates op R460 miljard (waarvan grond en verbeterings…

Die beste vrylewende mikrobes om jou grondlewe aan die brand te skop, is dié wat reeds in die grond is. Doen eers alles wat nodig is om hierdie organismes te stimuleer en uit hul rustoestand te laat ontwaak voordat jy organismes vanuit ’n vreemde omgewing toedien, sê dr. Ronel Hendriks, mikrobioloog. “Werk eers met wat jy het.” Sy verduidelik dat die vrylewende organismes in grond spesiaal aangepas is om op daardie spesifieke plek en in ’n bepaalde mikrobiese gemeenskap te oorleef en te funksioneer. Hulle is só omgewingspesifiek dat selfs dié in jou buurman se grond van joune kan verskil, het sy op die bewaringslandboukonferensie van Ottosdal se geenbewerkingklub verduidelik. Net 10% van die organismes wat in die grootmaatgrond rondom die risosfeer (die dun sone tussen plantwortels en die omringende…

Hier artikel is die tweede in ’n reeks van vyf artikels oor soönoses — siektes wat deur diere na mense of deur mense na diere oorgedra kan word. Die skrywer, dr. Jan H. du Preez van Pretoria, is ’n veterinêre spesialis in volksgesondheid. Jan en sy broer, dr. Gert P. du Preez, ’n veearts en mediese dokter, het pas ’n boek, Animal Diseases and Man — Zoonoses, gepubliseer. Dit kos R375 (BTW en posgeld ingesluit) en kan by www.zoonoses.co.za of e-pos: info@zoonoses.co.za bestel word. Drie lesers kan elk ’n eksemplaar van die boek wen. ’n Vraag word by by elke artikel gevra. Aan die einde van die reeks kan lesers hul antwoorde SMS na die nommer 34954. Die boodskap moet die volgende bevat: Landbouweekblad, jou naam en die nommer van…

Oorlog word gevoer om grondgedraagde siektes te bekamp wat boere groot skade berokken, het dr. Sandra Lamprecht van die Landbounavorsingsraad (LNR) se Instituut vir Plantgesondheid en -beskerming op ’n ope dag oor plantgesondheid op Stellenbosch gesê. Sy noem dit ’n ondergrondse oorlog omdat siektes wat in die grond voorkom, onder die belangrikste faktore tel wat oeste wêreldwyd beperk. “Siek wortels is immers nie in staat om voedingstowwe en water doeltreffend op te neem nie,” het sy gesê. Die teendeel is ook waar: Met die regte strategie kan grondgedraagde siektes bekamp en gewasse se opbrengspotensiaal beter benut word. Plante toon soms simptome van grondgedraagde siektes, byvoorbeeld wortelvrot by lupiene, Fusarium-verwelksiekte by waatlemoene, verwelksiekte by lusern en Fusarium- kroonvrot by koring. Ander grondgedraagde siektes toon egter geen bogrondse simptome nie. Dit is…

Dit is moeilik om ’n geldwaarde te heg aan verliese weens poeierskurf, maar dit kan enorme skade vir tafelaartappelprodusente veroorsaak, sê mnr. Stef Stephan, eienaar van Stephan en Seun Boerdery van Leipoldtville in die Sandveld. “Die siekte kom sporadies in lande voor en die mate waartoe dit aartappels besmet, verskil van een seisoen tot die volgende,” sê Stef. “Die siekte kan egter enorme skade aanrig. Omdat die patogene organisme baie aggressief is, kan dit tot 80% van jou aartappels besmet wanneer toestande gunstig is. Letsels vermeerder ook hoe langer die aartappels onder die grond lê. In so ’n geval sal van daardie aartappels nie bemarkbaar wees nie en die meeste daarvan sal tweede en derde graad wees, wat jou inkomste minstens sal halveer.” Prof. Jacquie van der Waals van die…

AFGRI word nie net deur vorige geslagte se suksesstories aangevuur om vorentoe te beweeg nie, maar dit is ook die vooruitsig van toekomstige geslagte wat die maatskappyaanspooromaandie voorpuntteblyvanlandbou-ontwikkeling en tegnologie. BLY AAN VOORPUNT AFGRI vier vanjaar sy 95ste bestaansjaar. Die maatskappy het sy oorsprong in 1923 te danke aan 150 boere waarvan 29 op ’n vergadering die Oos-Transvaalse Landboukoöperasie (OTK) gestig het. Hierdie langlewendheid is ’n teken dat dié toonaangewende maatskappy in die landbou hom oor dekades voortdurend kon aanpas by veranderde omstandighede. Dit het hom in staat gestel om aan die voorpunt te bly met voedselproduksie en diensverskaffing aan produsente binne die landbousektor. SÓ HET DIT BEGIN OTK het vinnig gegroei deur opberging en tegniese dienste aan boere in Mpumalanga te bied. In 1963 het die koöperasie ’n ooreenkoms…

Met ’n geskiedenis wat oor meer as 50 jaar strek, is Bonnox se sukses grootliks te danke aan sy gehalteprodukte, getroue personeel en die visie van sy stigter, mnr. Volker Schadewaldt. Vandag bedryf me. Anita Gent dié familie-onderneming nadat sy ’n paar jaar gelede die leisels as besturende direkteur van Bonnox by haar pa oorgeneem het. “My pa het die onderneming in 1962 met ’n klein handelstak in Valhalla, Centurion, begin. Ek het in daardie winkel grootgeword en het van kindsbeen af die besigheidswaardes van my ouers geleer.” Volker is in 1926 in Berlyn, Duitsland, gebore en het saam met sy ma, me. Hertha Schadewaldt, na Suid-Afrika geïmmigreer. Hy en sy vrou, Jean, het in die 1960’s omheiningsprodukte begin verkoop. Vandag vervaardig Bonnox se fabriek duisende kilometer draad per jaar…

Geleenthede soos die Bloemskou is die ideale toonvenster vir die Sussex-beestelersgenootskap. Daarom is die genootskap reeds dekades lank deel van die skou. Vanjaar sal die genootskap van 26 April tot 4 Mei by die skou wees om die Sussex te be-mark. Die Bloemskou bied vanjaar 12 verskillende beesraskampioenskappe aan op die skouterrein in Bloemfontein. Wees ook op die uitkyk vir die wenners van Vleissentraal en SA Stamboek se Elite-bulgroeitoetsklas wat op 30 April om 15:00 bekend gemaak word. Die Bloemskou se bees-interraskampioenskap word op 4 Mei aangebied. KAMPIOENSKAP Die nasionale Sussex-kampioenskap op 1 Mei om 09:00 sal groot aandag trek. Die volgende stoeterye en telers sal hul beste diere teen mekaar in die ring laat meeding: ■ Advocate: Regter Callie Cillié (Bloemfontein). ■ Blema ba Kan: Junior Keyser (Kroonstad). ■…

Cordré Smith van die Erfdeel-boerdery tussen Ceres en Touwsrivier het sowat twee jaar gelede pampoene begin plant nadat hulle die plaas Tiervlakte buite Touwsrivier gekoop het. Die pampoene word aan die uitvoermark gelewer. Hoe pas die pampoenvertakking by jou boerdery in? Ons boer met appels, pere en ’n bietjie skorsies en kool op Ceres, maar op Touwsrivier verbou ons uieplantjies, pampoen en lusern. Die Karoo se warm klimaat is goed vir rankgroente, daarom vaar pampoen goed in daardie omgewing. Met watter soort pampoen boer jy? Botterskorsies en muskaatpampoen. Muskaatpampoen is groen in sy groeityd, maar dit raak heeltemal oranje wanneer dit ryp is. Dis ’n ronde, plat pampoen wat 3 kg tot 5 kg weeg. In Suid-Afrika koop mense eerste boerpampoene, maar die Europeërs is baie lief vir muskaatpampoen. Hoewel…

Christo en Elmie Faasen was beslis nie die enigste paartjie wat deur Opsitkers liefde gevind het nie. Mev. Aletta (Vossie) de Vos, wat al jare lank die rubriek hanteer, weet van amper 30 potte wat op dié manier hul deksels gevind het. “Dis egter moeilik om te skat hoeveel daar regtig was, want ek het net so hier en daar rekord gehou van die huwelike. As ek so bolangs tel, was daar 29 paartjies, maar ek weet dit moet baie meer wees.” By die Opsitkers het die eerste keer op 20 September 1955 in Landbouweekblad verskyn. Die idee vir die rubriek het ontstaan nadat ene Kosie op die brieweblad sy lot bekla het oor die skaarste aan goeie plaasmeisies. ’n Warm debat daaroor het op die brieweblad gevolg, en ’n…

Edward Bulwer-Lytton het gesê: “Geduld is nie passief nie; inteendeel, dis aktief; dis gekonsentreerde krag.” Ons sal nooit ’n man wat ’n hele volk gelei en aandag aan ál hul behoeftes, giere en klagtes vir 40 jaar in ’n ongenaakbare woestyn sonder kos en water gegee het, as swak bestempel nie. Moses is bestempel as een van die sagmoedigste (of nederigste) mans wat die aarde bewandel het (Num. 12:3). Om nederig, sagmoedig of selfs geduldig te wees, beteken nie dat ons swak is nie. Sagmoedigheid beteken “beheerde krag”. Moses se eie broer en suster, Aäron en Miriam, het sy gesag uitgedaag. Moses het geduldig gebly en God het ingetree. Waarheid en geregtigheid kry altyd die oorhand. God het van aangesig tot aangesig met Moses gepraat en Miriam met melaatsheid getref.…

Koolaanplantings het drasties gedaal weens die knellende droogte in veral die Wes-Kaap, maar ook die Oos-Kaap. Geen noemenswaardige tekorte aan dié groentesoort word egter in die provinsies ondervind nie. Dit is omdat produksie in die noorde van Suid-Afrika normaal is en dit na die suidelike markte vervoer word. Mnr. Hugo Burger, tegniese bestuurder van die saadmaatskappy Hygrotech vir die Wes-, Oos- en Noord-Kaap en Namibië, sê selfs groot koolprodusente se oeste is heelwat kleiner weens die watertekort. Die sowat 600 ha wat in nor-male toestande onder kool in die Wes-Kaap was, het drasties gekrimp. Dit is egter moeilik om te bepaal hoeveel hektare tans met kool beplant is. In KwaZulu-Natal en Gauteng is produksie egter normaal. Burger sê twee nuwe koolkultivars is in die laaste paar jaar deur Hygrotech bekend…

Die volgende ontleding van grondverkope in Suid-Afrika is van transaksies in die Oos-Kaap vir die 12 maande tot verlede Desember vir grond wat groter is as 10 ha. In dié tyd is dalende grondpryse in 14 distrikte (40%) aangeteken – ’n duidelike teken van die moeilike boerderytoestande. In die tydperk is 367 ooreenkomste in 35 distrikte gesluit. In totaal is 235 976 ha verhandel teen R2,150 miljard. Daarvan was 56 transaksies van kleur, 15% van die totaal. In die proses is 25 179 ha ter sprake of 10,6% teen R219 miljoen. Twee van die transaksies was vir landboudoeleindes en 47 tussen individue. Sewe transaksies val buite die landbou. Uit die totaal was 93 (25%) transaksies kleiner as 50 ha met die meeste 186 (51%) vir grond groter as 300 ha.…

Die Afrikanerbees het sy markruimte in die veilingskraal herwin. Dié ras se pryse het die afgelope vyf jaar amper verdubbel, sê dr. Pieter de Kock, voorsitter van die Afrikaner-telersgenootskap. Die pryse vir die duurste bulle op die laaste Afrikanerveilings einde verlede jaar was R80 000 tot R100 000. Die genootskap verwag nog goeie pryse op sy nasionale veiling einde Augustus in die Kroon Boma-veilingkompleks buite Kroonstad. Die wiel vir veilingpryse het twee jaar gelede begin draai. Dit was op die veiling wat saam met ’n Afrikanerbees-ekspo in Pretoria aangebied is, sê De Kock. Dít kom nadat die ras vyf tot ses jaar gelede nog bykans geen markaandeel meer gehad het nie, sê hy. Hy skryf die nuwe belangstelling onder meer toe aan ’n groter vraag na inheemse beesrasse namate wildpryse…

$20 000 Amerika, Kanada, die Europese Unie en Japan verskaf jaarliks gemiddeld $20 000 se steun aan individuele boerderye. In Afrika suid van die Sahara is dié tipe steun hoogstens $300. Nywerheidslande se tariewe is die heel hoogste vir landbouprodukte. Ontwikkelende lande se inkomste kan volgens navorsing styg met 14% en hul uitvoer met enigiets van 30% tot 60% as dié ryk lande handelsversperrings uitskakel. - DevDiscourse 20,4% Die Indiese regering het besluit om die tantieme op katoensaad wat Indiese saadmaatskappye aan Monsanto betaal, met 20,4% te verminder. Die regering het in 2016 reeds tantieme met meer as 70% verminder. Volgens ’n Monsanto-woordvoerder beloop die saadtantieme nou minder as 0,5% van die produksiekoste. Die regering het ook die prys van GM katoensaad met 7,5% verminder. Die land het nagenoeg 8…

‘Moenie die oorsaak van so iets wees nie!’ DR. PIETER VERVOORT, voorsitter van die Nasionale Dieregesondheidsforum, oor die risiko vir ’n grootskaalse uitbreking van bek-en-klouseer wat meegebring word deur kortpaaie in siektebeheer by wild. Bl. 18 ‘Gewone mense en selfs polisielede glo die resolusie oor onteiening sonder vergoeding beteken daar is goedkeuring om grond te beset.’ DR. LOURIE BOSMAN, voormalige voorsitter van Agri SA, oor grondbesettings. Bl. 16 ‘Dit kan nie anders nie. Daar moet ’n peulgewas in jou stelsel wees.’ DR. JOHANN STRAUSS, plantwetenskaplike by die Wes-Kaapse Regering, oor hoe om bewaringsboerdery te laat werk. Bl. 21 ‘Dit is onregverdig vir een man om so baie grond te hê, terwyl daar baie mense om hom is wat honger is vir grond.’ MNR. GWEDE MANTASHE, ANC-voorsitter, oor ’n Oos-Kaapse boer…

Phelwane, die olifantbul wat in sy leeftyd ’n legende in die Laeveld geword het en wat onlangs ernstig deur wildstropers gekwes is, moes noodgedwonge deur veldwagters van die Krugerwildtuin van kant gemaak word. Phelwane, een van die grootste ivoordraers in die Laeveld, se tande was onderskeidelik 1,96 m en 2,30 m lank. Hy was 60 jaar oud. (LBW, 1 April 1988) ’n Skaap wat op mnr. Freddie Albertyn se plaas Sunnydale, Colesberg, deur bobbejane gevang en vermink is. Die skaap moes keel afgesny word. Bobbejane het die afgelope anderhalf jaar meer as 200 Merinoskape en Angorabokke op Sunnydale gevang. Baie van die skape is byna heeltemal opgevreet. Die kwaaddoenery het in Julie 1986 begin toe dit baie droog en veldkos vir die bobbejane skaars was. (LBW, 8 April 1988) Die…

DIE verslag wat die resolusies be-vat wat die ANC in Desember op sy 54ste konferensie geneem het, is uiteindelik bekend gemaak. Die resolusies oor grond is in agt punte saamgevat. Die instelling van ’n spesiale belasting op grond, steun vir swart boere en voorkeur by die uitdeel van waterregte en infrastruktuur vir hierdie boere is van die “aktiewe maatreëls” wat ingestel moet word om die herverdeling van grond te bevorder. Dele van die resolusies is reeds ná die kongres bekend gemaak, soos dat grond sonder vergoeding onteien moet word en dat grondhervorming en die program vir landelike ontwikkeling met groter dringendheid aangepak moet word. Dit is ook reeds wyd bekend dat onderneem is dat die meganismes wat onteiening sonder vergoeding moet moontlik maak, nie toekomstige belegging in die ekonomie moet…

DIE Melkprodusente-organisasie (MPO) sê kleinhandelsgroepe se toenemende betrokkendheid by die invoer van suiwelprodukte veroorsaak onsekerheid op die mark. Die organisasie sê die melkverwerkers, wat gewoonlik suiwelprodukte aan die kleinhandel verskaf, sal nie van sulke invoer, asook die hoeveelhede en die tydsberekening daarvan, weet nie. Dié gebrek aan inligting bring risiko’s mee ten opsigte van markbestendigheid en verkeerde prysseine. Luidens die ontleding was Suid-Afrika in Januarie ’n netto invoerder van suiwel op grond van die groot hoeveelhede ingevoerde afgeroomde melkpoeier en kaas. Die MPO sê die internasionale prys vir afgeroomdemelkpoeier is op ’n lae vlak, wat invoer aanmoedig. In melkekwivalent (die hoeveelheid melk wat na raming gebruik word om ’n produk te maak) is 43 miljoen liter se suiwelprodukte in Januarie ingevoer, teenoor 30,2 miljoen liter wat uitgevoer is. ETIKETTE Die…

HY is nie ’n puris as dit by bewaringslandbou kom nie, sê mnr. Jay Fuhrer, bekende grondgesondheidspesialis van Amerika. Fuhrer, van die Amerikaanse departement van landbou se hulpbronbewaringsagentskap in Bismarck, Noord-Dakota, was die genooide spreker op Landbouweekblad se onlangse herlewingslandboukonferensie in die Vrystaat en die Wes-Kaap. Hy het benadruk dat bewaringsen herlewingslandbou soos ’n driepootstoeltjie op drie ewe lang en belangrike pote balanseer – biologies, chemies én struktureel. Volgens hom gaan dit nie net oor die herstel en die herlewing van die biologie nie, maar omdat daar tradisioneel te min aandag aan hierdie komponent geskenk is, is dit tans nodig om besonder hard daaraan te werk. “Dit beteken egter nie jy moet nie steeds van tyd tot tyd byvoorbeeld chemiese regstellings ook doen nie. Maar as jy daarin slaag om…

BEWARINGSBOERDERY verhoog die volhoubaarheid van gewasboerdery, maar boere moet besef die voordele kom nie oornag nie, sê dr. Johann Strauss, wetenskaplike in die direktoraat plantwetenskap van die Wes-Kaapse departement van landbou. “Die grootste voordeel van bewaringsboerdery is die volhoubaarheid en herstelvermoë wat jou boerdery mettertyd kry. Mense sê dikwels hulle het bewaringsboerdery ’n jaar lank probeer en dit werk nie. Dit gaan nie so vinnig werk nie, dit kos vyf jaar om aan die stelsel gewoond te raak. PROEWE “Ons proewe op Langgewens wat in 1996 begin is, wys die vordering is stadig, maar seker omdat bewaringsboerdery grondstruktuur verbeter sodat die grond meer water behou, terwyl grondbedekking die grond koeler hou.” Strauss sê hulle het met baie lae grondkoolstofvlakke begin, maar hulle neem reeds ’n verhoging waar. Strauss het op…

ONBENUT TE grond en mense wat baie grond besit, blyk opnuut in dié stadium in die visier van grondonteiening sonder vergoeding te kan wees. Dit het aan die lig gekom in ’n dialoog oor grondhervorming van die Nasionale Forum vir Dialoog wat deur vooraanstaande beleidsmakers en besluitnemers bygewoon is. Onder die deelnemers was verteenwoordigers van Agri SA, die African Farmers’ Association of South Africa (Afasa), die eenheidsforum vir die landbou (Asuf), Graan SA, groot landbousake-ondernemings, die Land Bank en Absa, Agbiz, Wildbedryf SA (WRSA), die FW de Klerk-stigting, die megaboere Charl Senekal, Rossouw Cillié en Tommie van Zyl, staatsamptenare en politici. Die dialoog is by Tukkies se Gordon Instituut of Business Science (Gibs) in Johannesburg gehou. TLU SA is op die nippertjie genooi en het besluit om nie te gaan…

Landbouers se rol om voedselsekerheid te verseker, neem elke dag wêreldwyd toe. Volgens die Wêreld- Ekonomiese Forum gaan die wêreld se bevolking teen 2050 sowat 9,8 miljard mense beloop. Dit beteken vandag se skoolkinders gaan teen hul 50ste jaar of jonger 70% meer voedsel moet produseer as wat hul pa’s gedoen het om in die groeiende behoeftes te voorsien. Is daar ’n toekoms in die landbou? Ja. Moet ’n mens jouself blind staar teen hedendaagse politiekery en persoonlike landboudrome versaak? Nee. Lê klem op voedselproduksie en hou tred met tegnologiese ontwikkelings. Jou nageslag sal dankbaar wees. Boere se gemiddelde ouderdom is 62 (volgens statistiek oor die georganiseerde landbou). Die Suid-Afrikaanse bevolking se gemiddelde lewensverwagting is 57 jaar en die gemiddelde ouderdom is 26 jaar. En iemand moet die volgende geslag…

DIE huidige goeie vraag na wol word grootliks aangevuur deur die sogenaamde generasie Y (gebore tussen 1980 en 2000) se vraag na volhoubare, omgewingsvriendelike produkte, sê Ercole Botto Poala, uitvoerende hoof van die Italiaanse tekstielverwerker Successori Reda. Dit is een van Italië se oudste verwerkersmaatskappye en ook een van die grootste verbruikers van Merinowol. Volgens Poala is wol die perfekte vesel vir die huidige én die toekomstige verbruiker. “Generasie Y stel nie daarin belang om bloot ’n produk of ’n handelsnaam te koop nie. Hulle wil ’n produk met ’n verhaal en ’n geskiedenis hê wat inpas by hul omgewingsfilosofie en wol val netjies in hierdie kategorie.” Wolpryse het die afgelope tyd die hoogte in geskiet namate die vraag na natuurlike vesels gestyg het. Wol se eienskappe het daartoe gelei…

Grondhervorming is al jare lank deel van Suid-Afrika se politieke landskap. Ná pres. Cyril Ramaphosa se staatsrede het die Parlement onder aanvoering van die EFF ’n komitee aangestel om te kyk na grondonteiening sonder vergoeding. Dít veroorsaak baie onsekerheid. Van al die grondeise wat tot al ingedien is, wou die meeste partye liefs finansiële vergoeding as die grond self hê. Of die voorgestelde nuwe beleid dus ’n oplossing vir die werklike behoefte gaan bied, is moeilik om te sê. Die oorspronklike tydperk om grondeise in te dien het in 1998 verstryk. In dié tyd is 80 000 eise ontvang; 20 jaar later was 6 000 hiervan steeds nie afgehandel nie. Aangesien die ANC se berekeninge gewys het 3,5 miljoen hektaar tot 7,5 miljoen hektaar van swart mense se grond is…

Die betroubaarste manier om die volhoubaarheid van grondwater te verseker, is deur die gedrag en reaksie van die waterdraer tydens onttrekking en heraanvulling te verstaan, sê mnr. Phil Hobbs, senior hidrologie-navorser by die Wetenskaplike en Nywerheidnavorsingsraad (WNNR). Verder moet ’n boorgat bestuur word binne die grense wat onttrekking en heraanvulling stel. Dít vereis gereelde monitering van die diepte van die watertafel, verkieslik maandeliks vir die meeste kleinskaalse gebruike, en nadat die boorgat vir minstens agt uur gerus het. Aantekeninge oor die monitering sal mettertyd stygings of dalings in die watertafel toon. ’n Volgehoue afname is ’n teken van ’n bron wat uitgeput word. Prof. Kobus du Plessis van die departement siviele ingenieurswese aan die Universiteit Stellenbosch sê aangesien grondwater so kompleks is, is goeie bestuur baie belangrik. “Ek dink ons…

Oor die jare heen het aandag aan detail seker die grootste verskil aan sy boerdery gemaak, sê mnr. James Stephen (67), voorheen sakeman en nou heeltydse boer. Sy Sussex-kudde se tussenkalfperiode (TKP) van 390 dae getuig daarvan. James boer sedert 2009, nadat hy sy groentesaadmaatskappy Ferax Saad verkoop het. Toe het hy die plaas Graskop tussen Warden en Vrede gekoop om met Sussex-beeste te boer en geharde veldbulle te teel. Hy het die Sussex-Elitekoei, GA 07/103, in 2011 met haar pasgebore, tweede kalf by die destydse Mampudi Sussex-stoetery van Marquard gekoop. Daarna het sy nóg ses kalwers grootgemaak en is reeds weer met haar negende kalf dragtig. Ses van haar agt kalwers was verse, waarvan vyf in sy stoetery opgeneem is. Wat James die meeste van haar beïndruk, is die…

DIEREVOEDING PHILIP THEUNISSEN KAN ’N VOERKORRELMASJIEN GOED WERK IN ’N SKAAPVOERKRAAL? Is dit die koste werd om R80 000 vir ’n voerkorrelmasjien te betaal om voer vir lammers en skape in korrelvorm te verwerk? Dit is vir 400 ooie en 600 lammers. Ek het reeds die graan en ruvoer op die plaas. Sal dit die lammers se groei verbeter? Jy gaan beslis geld bespaar deur self voerkorrels vir jou skape te maak. As jy jou eie graan en ruvoer kan gebruik, gaan jy nóg meer geld bespaar. Die werklike besparing verskil egter noemenswaardig van wat graan- en voerpryse in enige stadium is. Hoe groter die volume voerkorrels is wat jy vir jouself maak, hoe beter is die skaalvoordele. Die voerkorrelmasjien van R80 000 kan ongeveer 500 kg korrels per uur…

Onlangse studies het dit duidelik gemaak dat alle seewier en seewierprodukte nie dieselfde is nie. Seewier wat verskillend verwerk word, kan eindprodukte met biologiese en fisiologiese verskille tot gevolg hê. Seewierekstrakte word té algemeen deur vervaardigers en gebruikers saam gegroeper sonder om die geografiese oorsprong, die seewiersoort en die verwerkingsproses in ag te neem. Gevolglik is alle seewierprodukte nie identies of ewe doeltreffend nie en dit kan nie dieselfde toegedien word nie. Navorsers aan die Universiteit Stellenbosch het die verskille tussen Kelpak® en soortgelyke produkte ondersoek. Gebruik jou foon om via die QR-kode die navorsing te lees of tik die skakel http:/ /link.springer.com/article/10.1007/s10811-015-0644-z op jou internetlaaier in. Nuwe, wetenskaplike bewyse is gevind met beter verduidelikings hoe Kelpak® in landboutoedienings funksioneer. Die tradisionele verduideliking was dat seewierprodukte natuurlike planthormone, soos ouksiene…

Sedert die Suid-Afrikaanse mark in die 1990’s toenemend wêreldwyd begin sake doen het, het Tal-Tec stadig maar seker meer gevestig geword in die Afrikamark. Deesdae bedien hy klante deur gevestigde, toonaangewende maatskappye in Botswana, Namibië, Zambië en Zimbabwe. Hy word goed verteenwoordig in die Suider-Afrikaanse Ontwikkelingsgemeenskap, maar het ook tevrede klante in Kenia, Uganda, Rwanda, Nigerië en Marokko. Tal-Tec se eerste uitstalling was 46 jaar gelede op die Pretoria-skou, twee jaar voordat die maatskappy in Brits gestig is. Deesdae stel Tal-Tec landwyd produkte op verskeie skoue en boeredae ten toon. In 2010 het Tal-Tec ’n bykomende eiendom van 1 ha aangeskaf en met ’n uitbreidingsprogram begin wat vandag vrugte afwerp. “Ons gaan ons produksieproses verdeel en die grondstowwe en onderdeleverwerking na die nuwe 3 000 m2 -geriewe skuif,” sê mnr.…

Die Vrystaat se jongafslaerskompetisie word op 30 April op die Bloemskou gehou. Die doel van die kompetisie is om jong afslaerstalent te identifiseer en aan hulle blootstelling in die bedryf te gee. Die nasionale jongafslaerskompetisie is die eerste keer in 2013 op die Bloemskou aangebied. Die afgelope paar jaar het die kompetisie gegroei tot vyf streekskompetisies, een nasionale kompetisie en ook een internasionale kompetisie verlede jaar. Die kompetisie word op drie vlakke beoordeel, na gelang van die kategorie, naamlik rostrumbeoordeling, vakbeoordeling en veekundige beoordeling in die geval van die jong en oop kategorie. Die juniors word slegs op hul rostrumprestasie beoordeel. Die wenners van die onderskeie streeksbyeenkomste neem dan aan die nasionale kompetisie by die Alfa-ekspo op Parys deel. Op die Nampo-Oesdag vind die internasionale kompetisie plaas met deelnemers van…

Agt-uur-lamsvleis met pampoenkluitjies Die beste kos vir koue aande. As ek hierdie vleis maak, los ek dit oornag teen ’n baie lae temperatuur in die oond en die volgende oggend skep ek eenvoudig die bene uit. Die vleis is dan só sag dat dit nie eens nodig is om dit te pluis nie, dit val sommer van-self uitmekaar. Lamsblad 2kgstowelamsvleisek hou daarvan om blad- en skenkelvleis te gebruik) Sout en vars gemaalde swartpeper 30 ml olyfolie 15 ml fyn komyn 15 ml fyn koljander 5 ml pimento (wonderpeper) 3 uie, fyn gekap 4 knoffelhuisies, fyn gekap 2 takkies roosmaryn 3 vars lourierblare Paar takkies vars tiemie 250 ml rooiwyn 250 ml sjerrie 250 ml vleisaftreksel 250 ml water Pampoenkluitjies 375mlkoekmeel 10 ml bakpoeier 3 ml sout 100 g…

Benodigdhede ■ 24 tapstokke (6 x 830 mm) ■ 4 kleure spuitverf ■ ’n Verfseil vir spuitwerk ■ Plakkaathouer of -silinder met ’n deksel (2 cm langer as die tapstokke) ■ Sisaltou (30 cm) ■ Potlood en liniaal ■ Els of pons ■ Opsioneel: Plastiektafeldoek en dubbelkantkleefband vir plakkaatsilinder SPUITVERF ■ Verdeel die tapstokke in vier groepe van ses elk. ■ Plaas elke groep op die verfseil en spuitverf elke groep in ’n ander kleur. BÊREPLEK ■ Versier die plakkaathouer met spuitverf of trek dit oor met ’n stuk van die plastiektafeldoek en kleefband. ■ Meet en pons twee gidsmerkies aan die bokant van die silinder, sowat 3 cm van bo af, oorkant mekaar. ■ Maak ’n handvatsel uit tou deur ’n stukkie tou deur die gaatjies te ryg. SÓ…

‘Floppie . . .!” Dis nou ek — jare gelede. “Moos slag ’n bielie van ’n volbek-Merino-gusooi. Sê vir Nôghaka sy moet die afval spierwit skoon krap. “Ek het vir Dik-Drik ene belowe. Ons kan dit sommer môre saamneem as ons Aliwal toe gaan,” beveel Dun-Koot, dis nou my man. Nou verstaan ek die skaapvangery in die stowwerige kraal . . . terwyl ek net eergister ’n slagding vir die huis moes bewerk. Nôghaka sit gehurk langs die stomende driepootpot omring deur Minora-blades, kalk, ’n skuurklip en bolle Merinowol. In my gebrekkige derde taal gaan beduie ek die belangrikheid van die operasie. Ek dra ook koffie, pruimtwak en ys aan as sy die klein byltjie woes swaai. Ek kyk hoe sy die harsings behendig in die kleinpensie toeknoop. Die spierwit…

BOEREDAE 3 APRIL: Oudtshoorn se lugdroogtabakboeredag. Schoemanshoek, NG Kerk. Temas: Aalwurmbeheer, kultivarseleksies en plantteelkunde, grondgesondheid en meer. Janno Koen. Sel 082 703 2470. E-pos: koenj@ulsa.co.za 19 APRIL: Charolais-boeredag om 10:00. Fairbridgeplaas, Maclear. Delwyn Roberts, sel 078 835 7321. 5 MEI: Swartlandse Veteraan-trekker-en-enjinklub se saaidag (afhangend van weer). Bredasdorp. Hennie Richter. E-pos: sekr.wk@telkomsa.net 25-26 MEI: Swartlandse Veteraan-trekker-en-enjinklub se ploegdag. Swartland. Hennie Richter. E-pos: sekr.wk@telkomsa.net 14 JUNIE: Vleisbeesgenomikaboeredag. Irene. E-pos: admin@wagyu-sa.co.za 4 JULIE: Val-boeredag, toerusting en demonstrasies, aangebied deur Waterval-boerevereniging. Buite Standerton. Hardus, sel 083 230 2721; Frederik, sel 072 160 4824; Elizna, sel 082 455 5636. 22 AUGUSTUS: Noord-Vrystaatse SAVM-klub bied ‘n “mega-boeredag” en veiling aan met die samewerking van die boerevereniging van die Rooi Skool in Kroonstad. Kroon-Boma, Kroonstad. Neline Pienaar; sel 082 440 4492; e-pos: Bennieneline@eleo.co.za EKSPO’S EN ANDER…

WANNEER DINGE BEGIN SIN MAAK As jy wil weet hoekom Suid-Afrika gaan werk, of dalk nie gaan werk nie, gaan bring ’n bietjie tyd deur in die Departement van Binnelandse Sake se berugte rye. Dié rye is die rede hoekom die land moontlik nie gaan regkom nie. ’n Mens word wetlik verplig om verskeie dokumente te besit, soos huwelik- en doodsertifikate, en reis- en identiteitsdokumente. Boonop kompliseer ’n onbevoegde politikus (mnr. Malusi Gigaba, Minister van Binnelandse Sake), wat nooit in ’n ry hoef te staan nie, dinge nog verder met sy verregaande aandrang dat alle kinders wat saam met hul ouers reis, volledige geboortesertifikate moet hê. Die stelsel kan glad nie hierdie volumes hanteer nie, maar omdat die staat “die monopolie” besit om dié dokumente uit te reik, moet mense…

DIE Suid-Afrikaanse landbou se skuld het die afgelope drie jaar van R145 miljard tot R170 miljard gegroei, sê dr. John Purchase, uitvoerende hoof van die landbousakekamer Agbiz. Dié toename verteenwoordig ’n normale toename in inflasie, asook ’n afname in winsgewendheid. “Winsgewendheid is toenemend onder druk, veral in die graanbedryf. Daar is egter bedrywe, soos die vrugte- en neutbedryf, wat gunstige groei aanteken,” sê Purchase. Die veebedryf beleef ook goeie groei in die nadraai van die droogte. Talle boere moet weer hul kuddes opbou, wat ’n invloed op vleispryse het. Twee faktore wat veral graanboere se winsgewendheid beïnvloed, is internasionale kommoditeitspryse en die droogte. OPNAMES Agbiz het onlangs met opnames in die winter- en somerreënstreke begin om boere en landboubesighede se posisie te bepaal. Purchase sê hoewel die opnames gemengde resultate…

DIE onkunde op grondvlak oor wat die ANC-regering se besluit oor onteiening sonder vergoeding behels, skep uiters plofbare situasies, soos die onlangse voorval naby Dannhauser in KwaZulu-Natal toe sowat 300 gemeenskapslede ’n kleinhoewe beset en vee gesteel het. Dr. Lourie Bosman, ’n voormalige voorsitter van Agri SA, ’n boer en nou die Vryheidsfront Plus se woordvoerder oor grondsake, het mnr. Leon Ackerman, die grondeienaar, bygestaan nadat 300 mense uit die gemeenskap met kieries en kapmesse op die kleinhoewe opgedaag het om die grond te beset. ’n Plaaslike ANC-raadslid het hulle glo aangehits om dit te doen, terwyl twee plaaslike polisiemanne ook net toegekyk het toe die geboue geplunder en onder meer 51 skape en bokke weggedra is. Daar is glo ook vrugtebome gestroop, hoenders gesteel, gereedskap in ’n werkswinkel gevat…

Mnr. Tebogo Mogashoa is as die eerste swart voorsitter van Wildbedryf SA (WRSA) verkies. Mnr. Wiaan van der Linde, vooraanstaande wildboer en voormalige voorsitter, is as ondervoorsitter aangewys. Mogashoa en Van der Linde sal albei vir twee termyne dien. Mogashoa, ’n ingenieur, is ook die voorsitter van Talis Holdings, ’n maatskappy met belange in verskeie besighede. Hy is die eienaar van Babirwa Game Breeding en is ’n mede-eienaar van die Brandwacht-landgoed by De Doorns in die Wes-Kaap, waar tafeldruiwe verbou word.…

DIE Landbounavorsingsraad (LNR) verwag dat die lang verwagte hartwaterentstof eers teen 2020 aan die plaaslike mark beskikbaar gestel kan word, sê me. Mpho Ramosili, die organisasie se woordvoerder. “Die hele proses hang egter af van die entstofregistrasieproses soos voorgeskryf deur die Wet op Misstowwe, Veevoere, Landboumiddels en Veemiddels (Wet 36 van 1947),” sê sy. Die LNR en vervaardigers moet ’n registrasiedossier met relevante inligting oor die vervaardiging van die entstof en kliniese toetse aan die registrateur voorlê vir goedkeuring. Sy het gesê Onderstepoort Biologiese Produkte (OBP) en die LNR se departement van veterinêre dienste sal parallelle prosesse in werking stel om die grootmaatproduksie van die entstof op kommersiële skaal moontlik te maak. “Daar moet nog entstofproewe gedoen word vir die veiligheid en doeltreffendheid van die produkte wat op kommersiële skaal…

DIE kunsmisvervaaridger Kynoch gaan sy tweede eeu binne as ’n sleutelkomponent in sy nuwe eienaar se plan om sy voetspoor in Afrika te vergroot. Mnr. Mahesh Patel, uitvoerende voorsitter van die multinasionale landbougroep Export Trading Group (ETG), sê die fokus vir toekomstige kosproduksie is op Afrika – nie net in die potensiaal van die grond nie, maar ook in die boere. Om dié rede sien hy ’n blink toekoms met baie potensiaal vir die kunsmisbedryf in Afrika. Kynoch is vier jaar gelede deur ETG gekoop. ETG is in 1967 deur Patel in Kenia gestig. Dié maatskappy, met sy hoofkantoor in Doebai, het vandag ’n teenwoordigheid in 40 lande op vier vastelande en meer as 7 000 werknemers. Die groep is in 26 Afrikalande betrokke by die verskaffing van produksiemiddele, aankope…

AUSTRALIË het ’n groot tekort aan skaapskeerders- en bedryfsleiers probeer deur middel van ’n reeks vergaderings reg oor die land vasstel waarom jong mense nie meer wil skeer nie en wat gedoen kan word om meer nuwe skeerders te lok. Volgens die Australiese Buro vir Statistiek het die aantal skeerders die afgelope vyf jaar met 13% afgeneem. En dít ondanks die feit dat die Australiese bedryfsorganisasie Australian Wool Innovation jaarliks nagenoeg R18,6 miljoen aan skeerderopleiding en die bevordering van die skeerbedryf bestee. Van die voorstelle was dat meer geskoolde immigrante as skeerders gewerf moet word. Jo Hall, bedryfshoof van WoolProducers Australia sê jong mense wil nie skeer nie omdat dit fisiek baie harde werk is en toestande in baie skeerskure nie na wens is nie. Sommige skeerskure is ook onveilig.…

Oos, wes, beesvleis bly die beste. Die bedryfsorganisasie vir die Amerikaanse vleisbedryf, North American Meat Institute (Nami), het ’n sjef gevra om agt resepte vir beesvleis-soesji te ontwikkel. En Amerikaners hou daarvan, wys hul aanlyn-opname. Die nuut ontwerpte biefsji-spyskaart sluit Texas Asade Sushi, Inside Out Wisconsin Maki, ’n New York Deli Roll, ’n Reuben Roll, ’n Hiker’s Roll en Carolina Sushi in. Die resultaat is ’n opwindende samevoeging van fynproewer-bestanddele. In die Texas-weergawe word oondgebakte beesvleisskywe met lemmetjieskil, komyn en knoffel ingevryf, en saam met gekapte koljanderblare, jalapeño-rissie en ui met gekrummelde cotija-kaas, in soesji-rys toegerol. In die New York-biefsji word boeliebief pleks van nori-blare aan die buitekant van die rol gebruik om skyfies vars peperwortel en Switserse kaas in plek te hou, met karwysaad rondom. Die Reuben Roll is…

Die lys van siektes wat die mens deur aanraking met kleinvee kan opdoen, is lank, maar daar is geen rede om vir diere bang te wees of hulle te vermy nie. Groter bewustheid is wel belangrik om jouself teen soönoses te beskerm. Die belangrikste ensoötiese siektes by skape en bokke is hondeblaaswurmsiekte (eginokokkose), chlamydiose, listeriose, slenkdalkoors, Campylobacter-besmetting, salmonellose, sarkoptidose (scabies), brucellose, Q-koors, kriptosporidiose, asook soönotiese water- en voedselverbonde siektes en voedselvergiftiging. Listeriose, wat baie in die nuus is nadat dié siekte reeds talle lewens in Suid-Afrika geëis het, is in die vorige artikel behandel. Meer as ’n miljoen mense wêreldwyd is op enige tydstip met hondeblaaswurmsiekte (eginokokkose of hidatidose) besmet. Ook hierdie siekte wat van dier na mens oorgedra word, kan voorkom en bekamp word met die nodige kundigheid aangaande…

Groter troppe, waar groepsdruk hoog gehou word, is die geheim vir die welslae van die Exteen Ngunistoetery net buite Piketberg. Vir die eienaar, mnr. Hannes Eksteen, bepaal die aantal diere die inkomste, nie die grootte van diere nie en daarvoor is vrugbaarheid en langlewendheid die heel belangrikste eienskappe. “In groter troppe, waar natuurlike groepsdruk vinnig die sterker, meer geharde beeste van die swakker beeste onderskei, kan jy goeie genetiese vordering maak. Omdat ek teel vir vrugbaarheid en langlewendheid, maar my koste so laag moontlik wil hou en dus van die veld af boer, moet ek beeste teel wat deur die moeilike tye steeds presteer.” Ongeag of dit ’n droë of goeie jaar is, beraam hy gedurig planne om die gehardste koeie uit te soek. In groter troppe is dit die…

Volgens mnr. Michael Oosthuizen, ’n vrugtekonsultant van Stellenbosch, is daar beslis op eie bodem belangstelling in appelkooskultivars wat uitgevoer kan word. Die probleem is om die regte kultivars, die regte areas en suksesvolle hanteringspraktyke te vind. Benewens die kultivar Imperial is boere ook optimisties oor die Carmingo-reeks, ’n verskeidenheid Franse appelkooskultivars, wat onder meer in die Koo-vallei verbou word. “Ons het juis middel Maart begin om Farlis te pluk, ’n kultivar wat sowat drie weke later as die ander Carmingo-kultivars ryp is. Tans is daar net toetsboorde, maar ons gaan beslis meer daarvan plant. “Daar is geleenthede vir appelkooskultivars met uitvoerpotensiaal. Appelkose se spitstyd is in Desember, maar ons is stadig maar seker besig om die seisoen te rek sodat ons die supermarkte langer gelukkig kan hou.” Die Carmingo-kultivars hou…

Verskaffers is so deel van die landboubedryf as boere self. Plaaslike kennis en ’n diepe verbintenis tot Suid-Afrika en sy boere beteken dié ondernemings speel ’n belangrike rol om voedselsekerheid en volhoubare boerdery te verseker. In hierdie afdeling kan jy meer lees oor AFGRI, Tal-Tec, Rau Easy Farming, Monotec, Rovic Leers, Radium Engineering en Bonnox. HANDEL EN WANDEL AFGRI is sekerlik een van die beste voorbeelde van ’n landboukoöperasie wat sy kinderskoene uitgeskop het om ’n volwaardige landboumaatskappy te word. Vandag lewer AFGRI dienste, soos graanopberging en -bemarking, finansiering, versekering en elektroniese rekeningbestuur. Die kleinhandelstakke, meganisasiehandelaars en veevoerprodukte gee vir almal – van die boervrou tot die saai- en veeboer – die nodige praktiese ondersteuning. Voeg ook daarby die opleiding en ontwikkelingsprogramme vir boere. VEEBOERE ’n Boer maak ’n plan…

begin sag word. Bind die roosmaryn, lourierblare en tiemie met ’n stukkie kombuistou vas en sit dit bo-op die vleis. Meng die wyn, sjerrie, aftreksel en water en giet dit in die kastrol. Bedek die kastrol dig en sit dit in die oond. Stel die oond op 100 °C en los dit oornag in die oond (of vir agt uur). Wanneer die vleis uit die oond gehaal word, skep die kruiebondel uit en verwyder al die bene. Gebruik twee vurke om die vleis uitmekaar te trek. Meng die vleis met die pansouse (as dit te souserig is, verdik die vleissous effens indien verkies). Sit die kastrol met die fyn vleis op die stoof en verhit stadig tot kookpunt. Terwyl die vleis warm word, maak die kluitjies: Sit die meel, bakpoeier…

“Ek was in 1983 in matriek en in die koshuis by die Hoër Handelskool, Uitenhage. Ons was net twee naweke per kwartaal toegelaat om huis toe te gaan en moes dus die ander naweke in die koshuis bly. “Weens ’n gebrek aan tegnologie, geld en enige ander vermaak, het ek, my vriendin Hanlie Hanekom en my suster Wilma Olivier, besluit om ons name vir Landbouweekb l a d se Opsitkers in te stuur. Dit was die goeie ou dae van briewe skryf. “Dit was groot opwinding toe ons skuilname in Landbouweekblad verskyn en ons talle briewe ontvang – tot groot vermaak van al ons maats. Ons het die briewe gelees en lekker gelag en dan weggegooi. Dit was in Januarie en Februarie 1983. In Oktober dieselfde jaar ontvang ek egter…

Ongeveer 5,6 % méér grondbone is hierdie seisoen geplant, met ’n oesskatting van 1,58 ton/ha, en ’n verwagte oes van 3,5 % minder as die vorige seisoen, aldus die Oesskattingskomitee. Die latere aanplantings en minder reën in Januarie kan egter meebring dat die opbrengs laer gaan wees. Daar is ook ’n groter risiko van vroeë ryp weens die later aanplantings. Mnr. Alfons Visser, uitvoerende hoof van Golden Peanut and Tree Nuts in Suid-Afrika, sê die aanvanklike voorneme om grondbone te plant, was sowat 17% méér as die 2016-’17-aanplanting weens die lae mielieprys. Die 2018-’19-seisoen behoort genoeg van die produk te hê om aan die plaaslike verbruik te voldoen. ’n Nadeel is die oordragvoorraad van 15 000 ton tot 20 000 ton teen April/Mei wat van die vorige oes na die…