Innholdsfortegnelse for 23 May 2024 i Huisgenoot

1 ‘EK IS NOG NIE KLAAR NIE’ Hy gaan op 72 deur ’n rowwe tyd weens rugbeserings, sê Leon Schuster. Maar hy maak grappies deur die pyn – en hy gáán nog sy droomfliek maak My prins, ek love jou en bid vir jou. Wees sterk my ou en beweeg, staan op, beweeg. My liewe grapjas, hou net aan met veg. Bewys daai ding verkeerd. Ek is ook al 71 en ek veg ook. ALIDA Mag jou gees en geloof jou staande hou. Nes daai baksteen onder jou bed op die foto. Jammer, maar ek kon nie help om te glimlag nie, want my bed staan ook op bakstene. Baie sterkte daar, Leon, en mooi bly. CHANTELLE Ai, oom Leon, ek bid dat God jou sal aanraak en genees. Die wêreld…

Hemp ’n Kraaghemp met knope is ’n goeie kopie. Kies effekleure of strepe vir ’n tydlose toevoeging tot jou versameling. Baadjie ’n Baadjie is ’n moet vir die winter – dit laat jou dadelik deftiger lyk. Jas Van klassieke woljasse tot ikoniese soldatejasse, vir ’n laag-op-laag-voorkoms kort jy ’n jas in jou klerekas. Sak & serp Kies iets veelsydigs wat jy kan meng en pas by jou klassieke klere. Jas ’n Goeie jas is ’n belegging. Dra hierdie warm kledingstuk by hemde en chino’s of deftige broeke vir ’n klassieke kollege-afronding. Baadjie Tof jou baadjie op met ’n onderbaadjie of dra dit by ’n T-hemp of oop kraaghemp vir ’n ontspanne voorkoms. Kies noupassende of losser style in kleure soos blou, grys of swart wat maklik by ander skakerings in…

Skryf gerus vir my oor jou sake van die hart of moeilike persoonlike kwessies. Ek beantwoord hier vrae en briewe van lesers en gee graag raad. Ek sal nie jou naam bekendmaak nie en jou identiteit bly vertroulik. Stuur jou e-pos aan Vra vir Irma na vravirirma@gmail.com of SMS Vra vir Irma gevolg deur jou vraag na 36489. HOE HELP EK IEMAND MET DEPRESSIE? V Gee asseblief raad. Hoe gemaak met iemand wat met ernstige depressie worstel en besig is om uit te rafel? A Hierdie belangrike vraag verdien ’n breedvoerige antwoord. Jy kan nie verander wat jy nie erken nie. As hierdie persoon nie besef wat met hulle aangaan nie, gaan hulle nie iets daaraan doen nie. Tekens dat iemand moontlik depressie beleef, kan insluit: ◗ Hulle staak hul gunstelingaktiwiteite. ◗…

1 Wat is dit en het ek dit reeds? Kredietlewensversekering word uitgeneem as jy duur items op krediet of met ’n lening koop. Dit verseker dat die premies op jou lenings vir ’n sekere tyd betaal sal word as jy sterf of jou inkomste verloor. Jou polis sal die dekkingstyd (byvoorbeeld ses maande) en bedrag (die volle maandelikse premie of net ’n deel) bepaal. Dit beskerm die finansierder wanneer jy nie kan betaal nie, en dit beskerm jou (of jou erfgename) omdat dit jou skuld help delg. Dis een van vele stappe in die kredietproses. As jy onseker is, bel die winkel of bank en vra of jy dit het. 2 Hoeveel kos dit? Dit sal afhang van wat jy gekoop het, maar die Nasionale Kredietreguleerder het maksimum maandelikse limiete vir premies…

DUIFELING Deur LIZE ALBERTYN-DU TOIT Human & Rousseau R259* Lize Albertyn-du Toit se tweede roman speel af in die gehuggie Rooiduin in die Noord-Kaap. Die hoofkarakter, Sara Koordom, kom maak haar daar tuis – hoekom weet niemand nie en sy praat ook nie daaroor nie. In ruil vir blyplek by die Boskatte maak sy kos en huis skoon. Piet Boskat is ’n lui man en lief vir die fles, en sy ma, Kaatjie, ook. Kuikentjie is die jongste dogtertjie en vind toevlug en troos by Sara. Sara self vind toevlug by van die ander inwoners van Rooiduin, en by hulle kan sy uiteindelik die waarheid praat. Soos oom Alles Geduld vir haar sê: “Die waarheid is soos ’n koedoehoring, hy draai altyd terug. Hy verdwaal nie.” HEMEL EN AARDE EN…

STEKELRIG Mamma-ystervark aan haar seun: “Glo my, jou pa hou nie daarvan om jou ’n pak slae te gee nie. Dit maak hom net so seer soos vir jou.” L. SAAYMAN HUWELIKSTATUS Jan: “My vrou is ’n engel.” Sarel: “Jy is gelukkig! Myne leef nog.” WOLLIE, PRETORIA TEVREDE KLANTE Ek gesels nou die dag met ’n begrafnisondernemer en vra: “Hoe gaan dit met die besigheid?” Hy antwoord toe: “Dit gaan wonderlik. Ek doen dit nou al 30 jaar en nog geen klant het hul geld teruggevra nie.” WOLLIE, PRETORIA NET VERSIGTIG Wat is die definisie van ’n pessimis? Iemand wat links én regs kyk voor hy die eenrigtingstraat oorsteek. ANTON, BELLVILLE VRYLIK VERTOLK Die dominee praat in die Sondagskoolkas oor die gebod “jy mag nie steel nie”. As voorbeeld vra…

1 In watter reeks verskyn die karakter Elmo? 2 Watter land se vlag het die meeste sterre, en hoeveel is dit? 3 Watter plant word deur pandas geëet? 4 Wat is die bynaam vir die klok van die horlosie by die Paleis van Westminster in Londen? 5 Watter kleur is die kolle op ’n ladybird? Bonusvraag: Wat is ’n ladybird in Afrikaans? ANTWOORDE 1 Sesame Street. 2 Amerika, 50.  3 Bamboes. 4 BigBen. 5 Swart. Dis’ n lieweheersbesie. BRONNE THEGUARDIAN.COM, NETWERK24.COM, UPWORTHY.COM, GOODNEWSNETWORK.ORG, FORBES.COM, NEWYORKTIMES.COM, SPACE.COM, KIDSNEWS.COM.AU…

SELFS die son loer vir oulaas hier oor die Outeniekwaberge om ’n blik op die verliefde paartjie op hul groot dag te kry. ’n Verdwaalde miswolk skuifel agter verby. Voor dans die fynbos en veldgras aan hul voete. Dis hier by Oppie Plaas net buite George in die Suid-Kaap waar MONIQUE STEYN en ROBBIE NEL vroeër vanjaar op ’n windstil dag trou aan mekaar beloof het. “Ons het getrou waar die Here dit die mooiste gemaak het,” sê Monique. “Dit was vir ons baie belangrik om te voel jy is onder God se oë in die natuur en tussen die mense wat jy liefhet.” Altesaam 104 van hul naaste vriende en familie het in Januarie die twee se groot dag hier gevier, maar Monique en Robbie het die nuus eers…

ONLANGS het die opskrifte in die oorsese poniepers dit uitbasuin: “Eksklusief! Die eerste keer in vyf jaar buite gewaar in Malibu”. En: “Voormalige aksieheld byna onherkenbaar!” Die beskrywings in die berigte was onvleiend om die minste te sê: Kyk net sy voller figuur; sy ou, grys sweetpakbroek en verbleikte, pienk blokkieshemp … Onherkenbaar was ietwat van ’n oordrywing. Want al is hy op die ouderdom van 74 deesdae spierwit om die slape, herken jy tog die akteur wat eens met die bekendste mullet op TV gespog het. Ja, dis Richard Dean Anderson – beter bekend as MacGyver, die slim hartebreker wat skurke met wetenskap eerder as wapens uitoorlê het. Van 1985 tot 1992 het hy kykers vasgenael gehou met die slimmighede en toestelle wat hy prakseer het. ’n Switserse sakmes,…

Wat is geluk vir jou? Vryheid. Om vir myself keuses te kan maak. Wanneer en waar was jy op jou gelukkigste? Ek het my 30ste verjaarsdag in Mauritius gevier. Ek is gelukkig wanneer ek kan reis. Dit help ’n mens besef jy is eintlik so klein en moet jouself nie te ernstig opneem nie. Waarmee hou jy jou die graagste besig? Met my motiveringspraatjies. Ek kan daarmee vir ander mense inspirasie bied en iets vir hulle beteken. Wat verveel jou? As mense vir my dieselfde stories vertel wat hulle al vertel het. Waaroor is jy spyt? Dat ek nie beter Engels kon praat toe ek universiteit toe gegaan het nie. Hoe sal die mense wat jou goed ken jou beskryf? As passievol en redelik intens. Wat is jou beste eienskap?…

NOU, op die ouderdom van 30, kan hy eindelik die dinge geniet wat ander mense as vanselfsprekend ervaar. Klein dingetjies soos ’n koel briesie, wat voorheen rede tot kommer was. Alles te danke aan die sterk en gesonde longe in sy borskas wat eens aan iemand anders behoort het. “Dis eienaardig om koud te kry,” sê Andries van der Merwe nadenkend. “Voor die longoorplanting het ek geweet: Sodra ek koud kry, moet ek dadelik ’n baadjie aantrek om infeksie en siektes te vermy. Maar as daar nou ’n koue windjie deurkom, is dit lekker. Ek kán nou koud kry; ek kan in die reën loop sonder dat dit ’n groot ding is.” Sistiese fibrose is by Andries gediagnoseer toe hy net drie jaar oud was, en sy longkapasiteit was net…

MIN dinge in die wêreld kan jou so gou opkikker soos ’n nuwe kapsel. Gelukkig is daar sommer ’n klomp style waaruit jy kan kies. Daar’s netjiese kort style wat kraak van varsheid, en rustige, lang vlegselstyle so kalm soos ’n walm. Die winter is die ideale tyd om die nuutste modes vir ’n spin te vat en te sien waaroor die bohaai gaan. KORT-KORT-KORT Oorweeg jy dit om skoonskip te maak? Min dinge is so bevredigend en bevrydend soos om ontslae te raak van ’n swaar en moeilike boskaas. Gelukkig vir jou is kort hare ook hoog mode. Daar’s iets vir elke soort haar en elke tekstuur. Probeer ’n puntperfekte pixie, of verlustig jou in iets meer boheems, ongebonde en lig. ITALIAANSE BOB As tekstuur en volume jou ding…

DIT het dikwels nie simptome nie, en mense wat dit het, voel ewe goed. Dit kom algemeen voor, en tog is baie mense nie daarvan bewus nie. Dis hoë bloeddruk, oftewel hipertensie, en dis wat jy daarvan moet weet. WAT IS DIT? Bloeddruk word op twee maniere gemeet. Jou sistoliese bloeddruk verwys na die druk in jou are wanneer jou hart klop. Jou diastoliese bloeddruk verwys na die druk tydens jou hart se ruspouse tussen een hartklop en die volgende. Dit is hoekom jou bloeddruk altyd met twee tellings aangedui word: Die eerste telling verwys na jou sistoliese bloeddruk, en die tweede na jou diastoliese bloeddruk. Die normale bloeddruk vir ’n gesonde volwassene is dikwels 120 sistolies en 80 diastolies, oftewel “120/80”. Hoë bloeddruk word gedefinieër as die sistoliese druk…

GROOT BLOKRAAI WEN ’N BOEK VAN HUMAN & ROUSSEAU PLUS KOM IN AANMERKING VIR DIE MAANDELIKSE TREKKING VAN R1 000. NO 2 545 KOMPETISIEVRAAG Watter soort kunstenaar is ter sprake? As jy vashaak, kan jy gerus ander lesers se raad vra op ons Facebookblad met die naam Huisgenoot-Blokraaie. Dié week wen een leser Die Suid-Afrikaanse lugbraaierkookboek 2 deur Louisa Holst (Human & Rousseau, R350). Die topverkoperskrywer Louisa Holst weet wat die lugbraaiermark wil hê en toor weer met plaaslike geure! Haar lekker resepte sluit in snoek-en-appelkoos-filosamoesas, springbokkie-kaaskoek, brandewyn-en-Coke-hoendervlerkies, asook ’n visvinger-gatsby vir honger kinders, wat hulle sommer self kan saamflans. Peri-peri-hoenderpastei, gammon (ja – in die lugbraaier!), gebraaide lam, karringmelkbeskuit, pavlova en selfs mini-vrugtekoeke is nóg ’n paar van die watertandgeregte in die boek. NEEM SO DEEL Vul die…

NADAT Noorweë vier jaar gelede besluit het om fone in laerskole te verbied, was daar ’n duidelike afname in boeliegedrag onder jong meisies. Noorweë het pas die resultate bekend gemaak van navorsing wat in 400 skole gedoen is. Die uitslag wys dat jong meisies minder ondersteuning nodig gehad het vir geestesgesondheid. Dit is bekend dat veral meisies swaar deurloop onder sosiale druk in hierdie digitale era. Groepsdruk het met die koms van sosiale media op fone erg toegeneem. Met die foonverbod het boeliegedrag met 46% afgeneem onder meisies, en met 43% onder seuns. Die meisies in die skole waar fone verbied is, het ook hoër punte gekry en het veel beter gevaar in wiskunde. Hulle het ook minder dokter toe gegaan, vir sielkundige sowel as liggaamlike siektes.…

JOHANNESBURGSE KAPENAAR Hy’s allesbehalwe sy karakter in M-Net se Summertide. “Ek speel ’n entitled en onaangename jong man wat beslis nie goed is met eerste indrukke nie,” vertel die 23-jarige wat Wesley speel. “Maar, soos die storie aangaan, leer ons Wesley ken vir wie hy eintlik is. Hy is ’n glas-halfvol-soort ou met ’n brandende passie om die lewe eenvoudig te hou en net te surf.” Die surfing was nogal ’n uitdaging, want hoewel hy deesdae in die Kaap woon en sy karakter ’n Kapenaar is, is hy van Johannesburg. “As stadsjapie van Joburg was die moeilikste deel om te leer branderplankry. Ek wou regtig die branderryers van Valsbaai akkuraat verteenwoordig deur Wesley.” En soms gee sy Joburg-aksent sy game weg. “Ongelukkig deur die reeks is daar ’n handjie vol oomblikke…

DIE planeet Aarde bestaan ​uit massiewe stukke land en ’n selfs groter aaneenlopende massa water. Die stukke land – Afrika, Europa, Asië, Antarktika, Australië, Noord-en Suid-Amerika – word vastelande genoem. Van die totale oppervlakte van die Aarde bestaan slegs 29% uit land. Die oorblywende 71% bestaan uit ’n wêreldwye oseaan wat volgens streek in vyf spesifieke oseane verdeel is: die Atlantiese, Stille, Indiese, Arktiese en Suidelike (Antarktiese) Oseaan. Elke oseaan is uniek en het ’n groot impak op ons lewe. Hoekom is dit belangrik vir lewe? Oseane bevat 97% van die Aarde se water en maak dus die hoofkomponent van die Aarde se hidrosfeer uit. Die hidrosfeer is ál die water op die Aarde se oppervlak – soos in riviere, mere, seë en oseane. Dit sluit ook water in wat…

Twee prettige seisoene van Die Babbelbende is nou al aanlyn op huisgenoot.com te sien. In dié Afrikaanse kinderreeks ondersoek die vriende Bibi, Ben, Paloeka die leeu en Palawa die kameelperd saam interessante dinge terwyl hulle meer oor ons wonderlike wêreld leer. Besoek huisgenoot.com, kliek op “HG Junior” heel bo en daarna “Die Babbelbende” om al die episodes te kry. Of kyk elke dag aanlyn op jou selfoon, rekenaar of tablet ’n nuwe episode op ons tuisblad. Elke episode is 12 minute lank. Op naweke deel ons ’n omnibus van vyf episodes. Dis nie nodig om ingeteken te wees op Netwerk24 om Die Babbelbende te kyk nie. Besoek media24shop.com om jou eie Paloeka-of Palawa-pop of die Babbelbende se Groot Storieboek te bestel. Kom leer ken Die Babbelbende – en geniet hul…

JAWAAHIER PETERSEN Die aktrise het onlangs vir ’n tweede keer meer as 30 cm van haar donker lokke laat knip om vir liefdadigheid te skenk. Vandag, vertel Jawaahier, onthou sy nog presies die oomblik vier jaar gelede toe sy besluit het om haar hare te skenk. Sy was destyds ’n gas op die kykNET-geselsprogram Tussen ons, en het ná die opname met haar vriendin, die aktrise Crystal-Donna Roberts, gesels wat toe teen borskanker baklei het. Crystal het daardie dag vertel hoe swaar die verlies van haar hare was. “Dit het my verskriklik geroer toe sy dit vertel het,” sê Jawaahier. “Ek het ’n silent promise gemaak om my hare lank genoeg uit te groei om dit te skenk.” RUHAN NEL Toe hy twee jaar terug wonderbaarlik van ’n byna noodlottige…

Uitgeput. Wat ’n perfekte woord. Jy grawe ’n gat en wag dat die ondergrondse water hom opvul. Dan laat sak jy ’n emmer in hom af en trek die water op wat jou en jou gesin, en die troeteldiere en die vee en die blomme op die vensterbank in die kombuis lewendig hou. Jy put jou put tot jy eendag ’n leë emmer optrek. En al wat jy doen, is wag. Die strome onder die aarde eb en gedy. Gougou vloei ’n nuwe stroom onder jou voete en bring vars water. Afrikaans is die volgende 100 jaar lank ’n amptelike taal, maar vir die 300 jaar tevore het sy haar emmertjie hier om die Kaap van Afrika vol gemaak. Eers uit die sterk vloed Nederlands, maar gelyk uit Java, Soematra,…

DIT was ’n reddingstoneel, nou is dit ’n graf. Teen Vrydagaand deel noodpersoneel maskers en Vicks uit. “Dis maar ’n gemeenskaplike Vickspotjie wat ons gebruik. Smeer dit onder jou neus. Dit help so ’n bietjie,” sê ’n vrou. Dit werk nie. “Ek proe die dood in my mond,” sê ’n verkeersbeampte. ’n Halfuur later, amper middernag, vind hulle nog ’n lyk. Saterdagoggend vroeg staan die dodetal op 15. By die hofgebou ’n ent verder speel ’n man trekklavier. “Genade onbeskryflik groot” en toe “Stille nag”. Soete, hemelse rus is nog besig om weg te sterf toe gille op die bouperseel weerklink. ’n Ambulans se sirene loei. “Liewe Here, hulle’t iemand lewendig gevind.” Ná 118 uur onder sement en klip word Gabriel Guambe Saterdagoggend om kwart oor tien lewend onder die…

t – teelepel/s e – eetlepel/s k – koppie/s BLOMKOOLSOP met KEKERERTJIE-CROUTONS BEREIDING EN GAARMAAK: 40 MIN. / GENOEG VIR 4 MENSE SOP ◗ 15 ml (1 e) ekstrasuiwer olyfolie◗ 15 ml (1 e) madraskerriepasta◗ 1 middelslag-ui (150 g), dun gesny◗ 2 knoffelhuisies, fyngedruk◗ 7,5 ml (1½ t) komynsaad◗ 5 ml (1 t) koljandersaad◗ 750 g blomkoolblomme◗ 2 middelslagtamaties (300 g), geskil, saad uitgekrap en fyngesny◗ 625 ml (2½ k) laesoutgroenteaftreksel◗ 375 ml (1½ k) water◗ 1 x 400 g-blik kekerertjies, gedreineer en afgespoel◗ 80 ml (⅓ k) laevetklappermelk  KEKERERTJIE-CROUTONS ◗ 1 x 400 g-blik kekerertjies, gedreineer en afgespoel◗ 5 ml (1 t) ekstrasuiwer olyfolie◗ 2,5 ml (½ t) fyn komyn AFRONDING ◗ 60 ml (¼ k) vars koljanderblare◗ 1 vars lang rooi brandrissie, fyngesny◗ vars gemaalde swartpeper, na smaak◗…

IN die strawwe arenas van beroepsport lê die lewenslesse soos waterbottels gestrooi. Die een wat topatlete optel? ’n Kampioen se kop moet so sterk en fiks soos sy lyf wees. Daaroor kan die bekende Pretoriase kliniese en sportsielkundige dr. Henning Gericke jou boekdele vertel. Menige wenner het al op sy metaforiese rusbank gaan sit om geestelik gebrei te word. Dink maar aan die Wêreldbekerrugbywenspan van 2007, en aan Cameron van der Burgh, wat goud op 2012 se Olimpiese Spele in Londen losgeswem het. Maar Henning is meer as net ’n kopafrigter vir sportsterre; hy is ook ’n trotse pa. Hy en sy vrou, Hennelie, het ’n span van vyf grootgemaak: Stephanie, Joubert, Hybré, Hennelie jr. en Pierre is almal nou opgeskote en gevestig in hul eie lewens. Dis dié dat…

TWEELING 21 MEI – 20 JUNIE Nie net beweeg die liefdesdiva, Venus, op die 23ste in jou teken in wat tot jou voordeel sal wees nie, maar Jupiter, die bringer van geluk en gawes, neem ook sy intrek op die 26ste. Laasgenoemde sal vir ’n hele jaar in jou teken bly, so dis belangrik om introspeksie te doen oor waar jy aan die einde van die tydperk wil wees. Neem besluite met selfvertroue en glo in jouself en jou vermoëns. KREEF 21 JUN – 21 JUL Met jou gejaagde sosiale lewe van die laaste paar weke agter die rug, beklemtoon die volmaan op die 23ste jou behoefte as inherente introvert om soms te onttrek, te rus en jou batterye te herlaai. Dit is noodsaaklik vir selfversorging en jou algemene welstand.…

Orville is mal oor Dolly Parton en droom daaroor om musiek saam met haar te maak. Sy ander countryhelde is Johnny Cash en Emmylou Harris. Die sanger is openlik oor sy seksualiteit as ’n gay man. Hy sê dis vir hom as countrysanger belangrik om stereotipes af te breek, veral in ’n gemeenskap waarin dit voorheen taboe was. Hy was self die produksieleier van sy debuutalbum, het al die liedjies daarop self geskryf en die meeste van die instrumente ook self bespeel. Pony is terloops opgeneem terwyl hy by ’n koffiekroeg gewerk het.…

PODCAST THAT’S JUST WEIRD Beskikbaar op Spotify, Apple Music of enige podcast-app Dis ’n podcast oor al die vreemde dinge wat vandag en destyds gebeur het, wat jou gaan laat sê: Wat de flamink! In elke episode kry jy die nuutste, vreemdste nuus gemeng met wilde historiese dinge wat jou sal laat SMH en OMG. Soos die storie van die ou van New York wat ’n klomp eekhorings rooi geverf het oor hulle verwoesting saai op sy erf. Dan is daar die biblioteek in Massachusetts wat jou boekeskuld afskryf solank jy betaal met ’n katfoto. Honderde laat boeke is teruggekry, en mens kan nooit genoeg katfoto’s hê nie. Dis die soort podcast wat jy heeltyd vir jou vriende en familie gaan wil quote. Wees gewaarsku.…

MET haar Sneeuwitjie-voorkoms – donker hare, spierwit vel, groot oë – het sy in baie harte ingekruip. Sommige aanhangers onthou haar as die fraai jong vrou wat in The Devil Wears Prada so lelik onder ’n boeliebaas deurgeloop het en ’n rolmodel vir ambisieuse jong beroepsvroue geword het. Dan die toneel in Les Misérables waarin sy as die singende, sterwende sekswerker Fantine soveel fliekgangers ’n traan laat pink het. En tog is daar ’n hele subkultuur van mense wat régtig nie van Anne Hathaway hou nie. Hulle sê sy is net te perfek, te skatlik, soos een van daai gewilde meisies op skool wat gedink het sy is beter as al die ander. Dié klipgooiers het selfs ’n naam, die “Hathahaters” – en op die internet kan jy artikels vind…