Innholdsfortegnelse for Issue 15 (Jan 2022) i Avontuur Afrika

YouTube is propvol interessante en selfs vreemde goed en so tussen al die gemors en meme versamelings, kom mens soms op ‘n juweeltjie af. Só het ek onlangs ‘n reeks met die titel Essence of Overlanding, saamgestel deur die Suid-Afrikaners Paul en Jo Marsh, raakgeloop (kyk dit op www.essenceofoverlanding.net). In hul vyfde episode het hulle oor gewig gepraat. Gewig, soos enige gesoute landreisiger weet, is natuurlik die vyand. Minder daarvan is altyd meer. Jy hoef nie ‘n derde stel tange, ‘n ekstra kombuiswasbak en nóg ‘n yskas saam te neem nie. Die kinders kan dalk nog oorreed word om hul versameling sagte speelgoed by die huis te los en moet dikwels tussen die skaatsplank en die fiets kies. Moet egter nooit vir vroulief probeer voorsê watter skoonheidsmiddels en skoene sy…

Ford Soos ons verlede maand berig het, is Ford se groot nuus natuurlik die bekendstelling van die volgende generasie Ranger, wat plaaslik by Silverton gebou sal word. Die aandrywingsopsies en presiese bekendstellingstyd moet nog bevestig word, maar te oordeel aan die kommentaar op sosiale media, gaan dié bakkie ‘n opskudding veroorsaak. Tesame met die bekendstelling van die bakkie, is die verwagting dat sy SNV-neef ook ‘n paar veranderinge sal ondergaan. Van wat ons kan aflei, kan ons gedurende die eerste helfte van die jaar ‘n wêreldwye onthulling van die splinternuwe Everest verwag. Hierdie veelsydige voertuig ondergaan tans finale toetsing in verskeie internasionale markte. GWM/HAVAL As ons na die invloedryke Chinese motorvervaardiger se Tank 300 (ontwikkel deur een van sy subhandelsmerke, Wey) kyk, is dit duidelik dat hulle die avontuurmark teiken.…

Die Toyota Hilux is, eenvoudig gestel, ‘n voortreflike voertuig. Dit is presies wat jy nodig het van ‘n landreisvoertuig. Ek twyfel of iemand ooit sal sê dat dit die vinnigste, sterkste of dalk selfs die gemaklikste is, maar ek moet sê dat dit waarskynlik die mees veelsydige bakkie tans op die mark is. Sedert die opgegradeerde 2.8 GDS-enjin met sy 150kW en 500Nm bekendgestel is, het ek selfs meer respek vir hierdie merkwaardige voertuig gekry. Sy vermoë op en van die pad af, is indrukwekkend en die RS-spesifikasie kom met ‘n paar welkome toevoegings wat ‘n elektriese rolluik wat perfek verseël is wanneer dit gesluit is om stof uit die laaibak te hou, insluit. Die bestuurderhulpmiddels gee gemoedsrus op die lang pad wanneer dit moeilik raak om aaneenlopend te konsentreer.…

Ander interessante plekke om te besoek in en om Dullstroom: Wild About Whisky: Hulle spog met die grootste whisky-versameling in die suidelike halfrond en die tweede grootste ter wêreld. ‘n Verskeidenheid van 45 proe sopies word aangebied. KONTAK: +27 13 254 0066 | www.wildaboutwhisky.com The Clock Shop: Met meer as 7 000 verskillende ontwerpe om van te kies, het The Clock Shop die grootste keuse van horlosies in die suidelike halfrond in een winkel en is ‘n besoek werd. KONTAK: +27 72 460 8288 /+27 13 254 0022 | online@theclockshop.co.za | www.theclockshop.co.za Verloren Vallei Natuurreservaat: ‘n Vleilandgebied van internasionale belang aangesien dit een van die min plekke in die land is waar al drie die wêreld se bedreigde kraanvoëls gevind kan word. Dit is ook die tuiste van 55 verskillende…

Landreis word by die dag meer gewild, grootliks te danke aan tegnologie en die groot verskeidenheid toerusting wat dit meer toeganklik maak vir almal. Dit is nou redelik algemeen dat groepe vriende self landreis avonture organiseer of by ‘n professionele toeroperateur aansluit vir ‘n epiese avontuur na afgeleë gebiede. Ry vir dae Daar is ‘n wanopvatting dat landreise meestal gaan oor ry, ry en dan nog ‘n bietjie ry! Ek dink dat as dit jou idee van ‘n landreis avontuur is, mis jy die punt. Dit behoort eerder te gaan oor wat tussen punt A en B gebeur as die hoeveelheid kilometers wat jy dek. In Afrika beteken ‘n kilometer in elk geval minder as niks, aangesien 40km op ‘n kaart jou soms tot twee dae kan neem om af…

Net langs die R763, naby die Magaliesberg Natuurreservaat, sal jy Maanhaarrandpas – ook bekend as Breedt’s Nek pas, – vind. Hierdie pas bied ‘n skakel regoor die Magaliesberg vanaf die nedersetting Maanhaarrand na Buffelspoort en die dorp Mooinooi in die noordooste. Die pad (D568) se toestand wissel van swak tot verskriklik sleg. Verwag gradiënte van 1:10 en diep slote, sowel as klipperige gedeeltes. As jy in ‘n 4x4-voertuig of ‘n voertuig met goeie grondvryhoogte is, is dié pas beslis doenbaar. Moet dit egter nie aanpak as jy haastig is nie – jy kan ’n lang, stadige rit verwag! Om die pas te bereik, ry jy vanaf die dorp, Magaliesburg, in ‘n noordwestelike rigting die dorp uit op die geteerde R24, algemeen bekend as die Rustenburgpad. Bly vir 16km op hierdie…

Die boomslang (Dispholidus typus) het druppel vir druppel die sterkste gif van enige Afrika-slang. Die hoeveelheid gif wat nodig is om ‘n mens dood te maak, is so min dat dit skaars met die blote oog raakgesien kan word. Gelukkig is hierdie slang baie skugter en vermy mense, wat byte baie skaars maak. Die boomslang is hoofsaaklik ‘n bosveld-en grasvlakte (savanne) spesie wat in ‘n wydverspreide habitat vanaf die Suidkus tot in die fynbos van die Wes-Kaap voorkom. Boomslange is lang, dun slange wat gemiddeld 1.5m lank word, maar kan in sommige gevalle 2m oorskry. Mannetjies is gewoonlik heldergroen, soms met swart tussen die skubbe, maar in die Kaap is hulle bo swart met groen of geel sye. Wyfies is olyfbruin tot grys. Die slang se broeisels en jongelinge is…

Die beter 12V kompressor-yskaste wat vandag op die mark beskikbaar is, is uitstekend om koue te behou omdat hulle goeie komponente, doeltreffende ontwerp en dikker isolasie het. Hoe minder gereeld die kompressor en waaiers hoef te loop om ‘n vasgestelde temperatuur te handhaaf, hoe minder krag trek jy uit die battery. ‘n Les wat ek vroeg-vroeg geleer het was om in ‘n gehalte yskas wat gemaak is met die beste materiaal, ‘n goeie waarborg en ‘n bewese rekord vir swaardiens werkverrigting het, te belê. Wanneer jy jouself in die middel van nêrens bevind, wil jy nie sukkel met ‘n stroombaanpaneel wat foutief is of ‘n kompressor wat nie die geskud van die grondpaaie kan hanteer nie. ‘n Yskas kan van ‘n 12V-uitlaat wat van die primêre battery krag trek loop,…

Adrienne Short was onlangs deel van ‘n humanitêre uitreikprojek in Zimbabwe waar oogsorg aan skoolkinders verskaf is. Dit was redelik uitdagend om sommige van die plekke te bereik, aangesien paaie in sommige gebiede eenvoudig nie bestaan nie, maar die Patrol was meer as gereed om elke hindernis in haar pad te oorkom. “In die vyf jaar met die Patrol as my avontuur-vennoot, het ek al oor ‘n wye verskeidenheid terreine gereis. Rivierkruisings, dik modder, graad 5-bergroetes in Lesotho in die aand en alles van sneeu-en ysbedekte berge tot diep sagte sand en die duine van Namibië – noem dit en my Patrol is al daardeur,” sê sy. Die robuuste aard van die voertuig is selfs verder beklemtoon toe Adrienne se beter helfte ‘n reis deur die Okavango Delta voltooi het…

Kry jou in droomland! As jy min pakplek het, maar steeds gemaklik wil slaap wanneer jy kamp, is ‘n slim oplossing vir ‘n goeie nagrus die Bestway Premium Airbed. Hierdie koningingrootte lugmatras pak klein en plat op, maar blaas op tot ‘n gerieflike 46cm, met ‘n oppervlakte van 203cm x 152cm. Dit het ‘n duursame gevlokte slaapoppervlak, ‘n ingeboude kussing en kan 300kg dra. Die pomp, wat ingesluit is, blaas die matras binne vier minute op of af. Die stel sluit ‘n reissak en ‘n swaardiens herstel-pleister in. *Beskikbaar by Camp & Climb teen R1 294: www.campandclimb.co.za Beskerm in styl Die BZT Armor-agterbuffers van Summit 4x4 Accessories is kundig saamgestel om ‘n robuuste voorkoms aan meeste van die top 4x4’s wat in Suid-Afrika verkoop word, te gee. Funksioneel gesproke bied…

Tiere is een van die wreedste varswaterjagters in Afrika. Hul wetenskaplike naam is Hydrocynus – wat waterhonde, of rivierhonde soos baie mense hulle noem, beteken. Om een van dié spesie met hul kenmerkende strepe en oranje vinne te vang, het jy behoorlike toerusting nodig. Ons het die manne by Iron River genader vir raad en met Dexter, die handelsmerkbestuurder van Penn in Suid-Afrika, gesels om ordentlike toerusting aan ons te verskaf. Aangesien jy ‘n ordentlike stok nodig het wat die krag waarmee ‘n tiervis jou lokaas gryp kan hanteer, het ons op die Penn Regiment II 7'0" MH-stok besluit. Hierdie stok het ‘n sagte konstruksie, wat beteken dat dit net bokant die greep begin buig en is ideaal vir tierhengel omdat dit die regte hoeveelheid krag gee om die hoek…

Toe die grondpad avontuur na Dullstroom in die kompakte Suzuki Vitara Brezza tydens ons onlangse redaksionele beplanning aan my geallokeer is, het ek effe ingedoen gevoel. Die manne in die span was op pad Mosambiek toe vir ‘n bos-en strandvakansie en ek moes Dullstroom toe gaan – en dit in ‘n kompakte oorgangsportnutsvoertuig! Hoe is dít nou regverdig? Kom ek begin by die kar. Ek is nie ‘n klein, fyn meisietjie nie en kon nog nooit lig pak nie (veral nie as ek ‘n plek besoek wat bekend is daarvoor dat dit maklik vier seisoene in een dag oplewer nie), so die “kompakte” deel het my bekommer. Ek het besluit om my dogter en haar vriendin saam te neem en het ernstig getwyfel of ons alles in hierdie klein tjorretjie…

Zimbabwe, op die suidelike grens van Suid-Afrika, is ryk aan hulpbronne en skouspelagtige landskappe en dit spog met manjifieke wildparke, wildbestuurgebiede en baie versteekte juwele wat wag om gevind en verken te word. Ondanks politieke woelinge en meer as genoeg negatiewe propaganda, bly dit ‘n bekorende reisbestemming. Ons reis begin by Pafuri River Camp, ‘n afgesonderde boskamp langs die oewer van die Mutalerivier, ‘n sytak van die Limpoporivier. Dié kamp grens aan beide die Nasionale Krugerwildtuin se Pafuri-hek en die Makuya Natuurreservaat. Dit is dus die ideale beginpunt as jy mik om Gonarezhou via Mosambiek te bereik, nadat jy deur die Pafurigrenspos gegaan het. Die alternatiewe roete is deur die Beitbruggrenspos, wat altyd baie besiger is – so vir ons is dit net ‘n opsie as die Limpoporivier in vloed…

Lank reeds voor ons beplande Karoo wegbreek, begin ons kinderlik opgewonde die roete op “Google Maps” beplan… Spring bitter vroeg weg uit die Strand, stop vir koffie en tuisgebakte hoenderpasteie op Riviersonderend se Ou Meul Bakkery en druk dan deur tot by die Karoo Nasionale Park. Vertoef daar vir ‘n paar dae. Pak op en kies koers na ‘n Karooplaas tussen niks en nêrens in ‘n bewaringsgebied wanneer die vlaktes weer roep. Maak die tenk en koelsak vol op Graaff-Reinet, voor die grondpaaie na Nieu-Bethesda roep. Spandeer ‘n paar dae daar om by ‘n vriendin te kuier, fossiele te kyk en stil te word in Helen Martins se Uilhuis, voor die stof en klippe ons pad uitlê vir ‘n agave-proe buite Graaff-Reinet. Vertoef daar vir ‘n wyle, voor ons –…

1. Berg en Bos Slegs ‘n katspoegie vanaf Johannesburg, kan jy heerlik wegbreek na Berg en Bos, omring deur natuurskoon, die ruising van ‘n nabygeleë riviertjie en die roep van die visarend. Die kampeerterrein bied vyf staanplekke, waarvan twee onder ‘n skadunet bymekaar met ‘n privaat ablusieblok is – ideaal vir ‘n groep wat saam wil kamp. Die ander drie staanplekke is omring deur skaduryke bome met krag, water en moderne ablusie fasiliteite. Daar is sowat 700m rivieroewer ideaal om lyn nat te maak en watervoëls is volop. Die 25m-lange sprankelende twee-baan swembad, kleiner plonspoel en gemeenskaplike boma en braai-area sorg vir ure se ontspanning en pret. Elke staanplek het ook sy eie braaigeriewe en die staproetes in die omgewing is heerlik om te verken. NAASTE DORP: Brits (9km) WINKEL:…

Afrika is bekend vir die genadelose versengende hitte en om skadu te vind wanneer jy in plekke soos die Karoo en die Kalahari kamp, kan ‘n groot uitdaging wees. Dit is hiér waar ‘n goeie seilafdak (oftewel awning) hoog op jou inkopielys behoort te wees. Tentco – wat bekend is vir hul betroubare, bekostigbare en hoë gehalte produkte – bied heelparty seilafdak-opsies aan wat in alle kampeerders se behoeftes sal voldoen. Bundu Canopy Tentco het verskeie seilafdak-opsies wat kan vasbout en hul mees bekostigbare opsie is die Bundu Canopy. Alhoewel dit tegnies nie ‘n seilafdak is nie, kan dit steeds dieselfde funksie met net effens minder praktiese en gebruiksgemak verrig. Dit word vasgebout aan en hang teen die kant van jou dakrak en bied ‘n skadu area van 2.5m x…

Engel yskaste, wat plaaslik deur 4x4 Mega World versprei word, beskik oor die eksklusiewe gebruik van die unieke Sawafuji Swing Motor, wat hierdie handelsmerk in ‘n klas van sy eie sit. Hierdie motor is ‘n goeie voorbeel van premium Japanese tegnologie en het slegs een bewegende deel. Anders as baie roterende tipe kompressors, hoef die motor nie ‘n volle lading uit te voer wanneer dit aangeskakel word nie, wat beteken dat dit nie ‘n hoë aanloopstroomtrekking het nie. ‘n Uitstekende keuse van ‘n motor vir Engel yskaste, dus. Die suier is gekoppel aan ‘n elektrodinamiese toestel wat deur magnetiese velde aangedryf word. Met hierdie tegnologie is daar geen behoefte aan laers, slingers of stange nie en minder bewegende dele beteken minder kans op probleme met onderdele wat breek. Met slegs…

Hoe om in te skryf: Stuur eenvoudig ‘n foto – minstens 1MB in grootte – van jou en jou voertuig na info@4x4afrika.com (onderwerp: Vierwiel Vennoot). Sluit die volgende inligting in: • Bestuurderbesonderhede • Voertuigbesonderhede (jaar model en variant) • Voertuig se bynaam (indien relevant) • Aanpassings en wysings tot dusver gemaak (en watter daarvan is die nuttigste) • Gunsteling herinnering of reis met die voertuig • Jou droombestemming • Top wenk vir avonturiers en ontdekkingsreisigers • Hoekom jy mal oor jou ryding is Bepalings en voorwaardes: Die beslissing rakende uitgesoekte inskrywing berus uitsluitlik op die Avontuur Afrika-span en geen korrespondensie omtrent die aangeleentheid sal gevoer word nie. | Sou die prysborgskap deur Tentco onttrek word, behou Avontuur Afrika die reg voor om inskrywings te publiseer sonder om enige pryse toe…

Die idee om ‘n bos-tot-strand visvang avontuur na Mosambiek aan te pak, is ‘n paar maande gelede gebore terwyl ons onsself knuppeldik geëet het aan kreef wat vriende van ons van Moz af gebring het. Ons het dadelik begin planne beraam en na ‘n paar oproepe het ons ‘n Hilux Legend RS en ‘n Fortuner 4x4 VX van Toyota Suid-Afrika vir die avontuur bevestig. Die plan was om ‘n paar tiervisse by die Massingirdam te gaan soek en daarna kuswaarts te reis om hopelik ‘n paar grotes vanaf die rotse uit te trek. Ons was ook gretig om diepseehengel in Xai-Xai te ervaar. Beplanning was natuurlik krities en om die beste roete te bepaal het ons die betroubare kaartboek van Tracks4Africa uitgegrawe, net om binne die eerste paar minute ons…

As eienaars en bestuurders van ‘n toer-en safari-onderneming wat daarna streef om gaste die beste moontlike waarde vir geld te bied, het George en Marlene van Deventer van Trans Africa Self Drive Adventures and Tours uit persoonlike ondervinding geleer van die slaggate en verrassings wat ‘n reis deur Afrika kan inhou. Deur sorgvuldige navorsing en beplanning sal hulle jou droom-avontuur in ‘n goed deurdagte en moeitevrye reisplan omskep. Hulle bied meer as net die gewone toeriste-ervarings en sal avontuurlustiges na plekke neem wat bitttermin toeriste ooit die voorreg sal hê om te aanskou. Hul dienste sluit begeleide selfry toere, besprekings en toerplanne, toegeruste 4x4-voertuig verhuring, pasmaak toere en die huur van kampeertoerusting in. Hoogtepunte op die 2022 Kalender: GONAREZHOU, GREAT RUINS & BVUMBA-BERGE: 27 Januarie – 3 Februarie R9 850…

Spek-en-eier spaghetti (Genoeg vir 4 tot 6 mense) Bestanddele: 200g spaghetti4 groot eiersGrowwe sout en swartpeper250g spek75g gerasperde cheddar kaasPietersielie vir garnering Metode: • Kook die spaghetti tot sag en spoel onder lopende koue water af. • Snipper die spek en braai tot gaar. • Voeg die spaghetti by en verhit stadig tot goed warm. • Klits die eiers en voeg kaas by. Meng dan met die spaghetti. • Verhit stadig totdat die eiers romerig gaar en die kaas gesmelt is. • Geur na smaak, garneer en sit voor. Sunrise Surprise (Enkelporsie per persoon) Bestanddele: 1 eier1 sny brood1 velletjie/sny kaas (opsioneel)1 snytjie ham of gaar repies spek (geblikte ham kan ook gebruik word)2 snytjies tamatie of kersie tamaties (opsioneel) Metode: • Druk ‘n holte in die sny brood met…

Ek het in ‘n huis grootgeword wat behep met motorsport is, veral tydrenne. Soos die meeste seuns wat in die vroeë 2000’s grootgeword het, was daar een motor wat my hart gesteel het: die Subaru Impreza met die geel en blou plakkers wat deur die grootste jaagduiwel van die sport, Colin McRae, bestuur is. Nou kyk, ek weet die Impreza is nie die Outback nie, maar onthou dat Colin vir ‘n kort tydjie in ‘n Legacy gejaag het voordat hy na die bekende Impreza oorgeskuif het. Die Legacy was natuurlik die motor wat die basis geword het vir wat waarskynlik die eerste oorgangsvoertuig ooit, die Subaru Outback, was. Na my mening gee dit die Subaru Outback hope tydren-geloofwaardigheid… Goed, ek vat dit dalk effe ver, maar die erfenis is hier…

Die Koleos het nie ‘n maklike begin in die lewe gehad nie. In 2006 het dit vir die eerste keer soos ‘n lelike eendjie in ‘n splinternuwe dam vol aantreklike oorgangsportnutsvoertuie wat kopers se verbeelding aangegryp het, beland. Op een of ander manier het die gewoonlik talentvolle Franse daarin geslaag om hierdie Renault ongemaklik (die woord “lelik” kom self by my op) laat lyk. Die onaardige gepunte neus het wel beteken dat dit met ‘n redelike naderingshoek gespog het en sy Nissan-afgeleide deeltydse vierwielaandrywingstelsel het aan die Koleos geloofwaardige veldryverrigting gegee. Maar ek en die meeste ander voornemede kopers kon nie verby die eienaardige stillering kyk nie en die groter gros van verkope het na die Qashqai gegaan wat ook hierdie Renault-Nissan C-platform gedeel het. Die opdaterings in 2011 en…

Stuur foto’s van jou en jou ryding na: info@4x4afrika.com Raymond Smit 2019 Ford Raptor 2.0 bi-turbo “Hierdie bakkie is perfek vir daaglikse gebruik, aangesien dit stil op die pad is en goed hanteer. Ek is egter dol daaroor om elke kans wat ek kry uit te gaan om nuwe gebiede te verken en moeilike terreine aan te durf. Hierdie Raptor staan nooit terug vir enige uitdaging wat jy na hom toe gooi nie. Buiten die bakkie se veldrykapasiteit, is dit ‘n baie aantreklike voertuig en die kajuit is uiters gemaklik en ruim.” *Volg Raymond se avonture op YouTube en TikTok: @RaymondRaptor Henk Bogaards 2018 Toyota Fortuner 2.8 GD-6 4x4 MT “Ek het nie ‘n bynaam vir my ryding nie, ek noem dit eenvoudig Fortuner, aangesien dit die legendariese vermoë en…