Innholdsfortegnelse for May 2018 i Weg!

FRANCOIS MEYER van Centurion skryf: Ek het dié kransduif in die Augrabieswaterval- nasionale park afgeneem. Die duif het saam met ’n klompie ander duiwe op die grond geskrop. Ek het opgelet hoewel die ander duiwe maklik in die volson rondgeskrop het, het dié een in die skaduwee gehou. Is hierdie ’n ware albino of ’n mutasie? As jy die foto vergroot, lyk dit asof daar letsels soortgelyk aan brand- of sonbrandwonde op die pote is. Die voëlkenner LUKAS NIEMAND antwoord: Dankie vir die foto, Francois. Dit lyk asof die kransduif leukisties is, met ander woorde hy het ’n tekort aan melanien as gevolg van ’n genetiese afwyking. Dit verklaar die dominante wit kleur van die voël, asook die bleek snawel. Omdat die iris gelerig lyk, wil dit wel voorkom asof…

RAMKIEKIE-PLAASMARK, WOLSELEY Maak ’n draai by dié mark op die wynplaas Mountain Ridge. Met die maandelikse Ramkiekie-plaasmark wil die organiseerders die beste vars produkte, handgemaakte ware en wyn uit die Breedekloof- en Wolseleyvallei ten toon stel. Stalletjies verkoop alles van gourmet-boereworsrolletjies en roosterkoek, tot sushi, jenewer en handgemaakte leerprodukte. Bring die gesin – hier’s ’n springkasteel, klimraam en springmielies vir die kinders. Een stalletjie is daar om die kleingoed te vermaak met onder meer speelgoed en sandkuns. Hier is elke maand ’n ander aktiwiteit wat saam met die mark val – in Mei kan mense deelneem aan ’n pretloop of -draf van 5 km deur onder meer appel- en peerboorde en ’n blok pinotagewingerd. Hier is ook ’n Pawathon vir mense met honde – die diere moet egter aan ’n…

Gedink jy kan jou verjaardaggeskenk gebruik om ’n lugvideo te neem van die leeu by daai wildtuinwatergat? Vergeet daarvan: Sanparke het besoekers aan nasionale parke vroeër vanjaar herinner geen onbemande lugvoertuie (hommeltuie dus) word in enige nasionale park toegelaat nie – dit maak nie saak vir watter doel dit gebruik word nie. Mense wat hommeltuie vlieg, sal dadelik gearresteer en die toerusting afgeneem word. Speel polisieman Bel een van dié noodnommers as jy ’n hommeltuig in ’n nasionale park sien: 013 735 4064/013 735 0197/076 801 9670…

Hendrik Prins is is al sewe jaar lank die gasvryheidsbestuurder van die park. Hy maak seker dat al die kampplekke en wilderniskampe na omgesien word, of soos hy dit stel: “Dis my job om jou gelukkig te laat voel en jou te laat smile.” Wat is jou gunstelingplek in die park? Kokerboomkloof – dis uniek. Daar is altyd iets wat my verras hier, of dit nou ’n boom is wat omgeval het, of die dag wat jy daar kom en dit reën. Hoe hou jy dit uit in die somer? ’n Mens raak dit gewoond – tussen November en Februarie raak dit gereeld warmer as 40°C. Kokerboomkloof is gemiddeld die warmste plek in die park, maar die hoogste temperatuur wat ons al hier gemeet is, was 62°C by Gannakouriep –…

LESER VERTEL PJ SCHWIKKARD Tuisstad Kaapstad Beroep Professor in publieke reg Die Kgalagadi-oorgrenspark is heeljaar ’n besoek werd, maar as jy teen 40ºC smelt, is ’n kuier in die middel van die somer nie vir jou nie: Daar gaan net ’n klam kol van jou oorbly. Tog het die warm seisoen sy voordele: Jy kry makliker plek en kan skouspelagtige donderstorms sien, want dis ook die reënseisoen. Ons het egter die park in die eerste twee weke van Januarie – voor die reëns – besoek en dit was toe nog kurkdroog. Dié keer het ek en my man, Roy, besluit om die park van Mabuasehube aan die Botswanakant af te benader. Die Botswanakampplekke se geriewe wissel – die mees basiese stanings het slegs ’n naambordjie en daar is dalk ’n…

Het jy al die Namakwalandse blomme of die ooptes van die Richtersveld gadegeslaan? Of die wilde perde van die Namib of Kolmanskop gesien? Het jy al afgetuur in die dieptes van die Visriviercanyon? Reël vandag jou verlof en gaan op reis met Weg se toervennoot! TOERINLIGTING Datums 20-29 Augustus 2018 Hoe lank is die toer? 10 dae, 9 nagte Van waar vertrek die toer? Kamieskroon, Namakwaland Eindpunt? Aussenkehr, Namibië Waar slaap ons? Formele en suite-verblyf Koste R19 845 p.p. (30% bykomend vir enkelbesprekings) WAARVOOR SORG EK? • Enige 4x2 met ’n goeie grondvryhoogte en ewenaarslot (ook brandstof en grenspostariewe) • Drankies en snoepgoed • Kampstoele • Julle paspoorte • Persoonlike toerusting AVONTUURTOERREISPLAN DAG 1 Ons avontuur begin naby Kamieskroon en ons gaan kyk na die daisies in die Skilpaddeel van die Namakwa- nasionale park. Ons…

DWARF’S DAWDLE-ROETE, UMGENIVALLEI-NATUURRESERVAAT Net 25 km noord van Pietermaritzburg, ’n kilometer van Howick af, lê een van KwaZulu-Natal se minder bekende stapjuwele: die Umgenivallei-natuurreservaat. Umgeni huisves die bewaringsorganisasie WESSA se pronkstuk-opleidingsentrum en baie rotsklimmers weet van die uitstekende klimroetes wat die Bergklub van Suid-Afrika hier gradeer en onderhou. Baie min mense weet egter dat hier ook ses puik dagstaproetes vir besoekers is. Dis moeilik om een te kies, maar my stapgroep besluit uiteindelik om die 4 km lange Dwarf’s Dawdleroete te stap. Daar is verskeie redes: Ons soek ’n interessante en uitdagende roete, maar een wat nie té uitdagend of lank is nie. Ons is ook ’n bietjie bekommerd oor die moontlikheid dat dit ’n baie warm en bedompige dag gaan wees, en die skadu van die woud en mosagtige…

Hier být die son Ek steur my nie gewoonlik aan “die beste tyd van die jaar om te gaan”-raad wanneer ek toer nie. Die winter is dalk die beste tyd om wild in die wildtuin te sien, maar dit moet jou nie keer om in die somer te gaan nie. Ek reken daar is altyd iets nuuts en mooi, ongeag wanneer jy gaan. Ons besoek aan die Richtersveld einde verlede jaar het my gedwing om dié teorie te heroorweeg. In een week het ons sommer verskeie seisoene ervaar. Oor die Helskloofpas was dit koud en het dit selfs liggies gereën. In die Kokerboomkloof het die wind só geloei dat die tent se reënseil afgeruk en ek in die veld agter dit moes aanhardloop. Dít kon ons alles baasraak. Maar net…

’n Mens hoef nie ver te ry om verlief te raak op die wonderskone natuur nie. Maar jy moet buite kom. Anders gaan jy nooit sien as sy haar mooiste geheime deel nie. Soos hier: Die Golden Gate Hoogland- nasionale park is op die voorstoep van Bloemfontein, Willem se tuisstad. Willem was hier besig met ’n storie vir die tydskrif toe hy sien hoe die sakkende son en die fynste druppels met ’n reënboog dans. Bekbaai is ’n “voorstad” van Paternoster aan die Weskus. Dis hier duidelik hoekom dit een van Basson van Zyl se gunstelingplekke is om af te neem. Voordat hy dié foto geneem het, het die son agter n wolkbank geskuil. Basson het sy kamera op ’n driepoot gestel, en sy neutrale digtheidsfilter uitgehaal. Dié filter verminder…

Die meeste slange eet gewerweldes soos akkedisse, voëls, paddas en klein soogdiere. Die uitsondering op die reël is die swartkop-honderdpootvreter. Dis eintlik ’n baie algemene slang, maar as gevolg van sy grootte (gemiddeld 20-30 cm lank) en grawegedrag sien ’n mens hom nie gereeld nie. Die kleur wissel van geelbruin tot grysbruin, met ’n kenmerkende swart kop en kraag wat tot onder die “ken” strek. Ander kenmerke soos die silindriese liggaam, geen herkenbare “nek” nie en ’n gepunte kop is alles aanpassings vir sy lewe onder die grond. Honderdpootvreters is graafdiere wat meestal onder die grond – onder rotse, verrotte stompe of ongebruikte termiethope – bly. Daar is soms ’n hele paar van hierdie slange wat in een termiethoop skuiling soek. Sekere slangversamelaars wat glad nie bewaringsgesind is nie, sal…

Daar’s baie wat ’n mens oor batterylewe en hoe dit met herlaaitempo’s verband hou, kan sê. Ter wille van eenvoud: ’n Battery wat erg ontlaai is, moet genoeg tyd gegun word om te herstel. Daar’s ’n gewilde wanopvatting dat ’n battery vinnig en in ’n kort tydjie kan herlaai. Dis eenvoudig nie waar van die meeste batterye nie. Ongelukkig dra baie min batteryvervaardigers en onderdelewinkels hierdie boodskap oor, en overland-reisigers moet die prys betaal. he Hierdie grafiek wys hoeveel bruikbare energie uit ’n 105 Ah-diepsiklusbattery getrek kan word. Die uitgeligte deel wys die veilige bedryfsone en is gelyk aan ’n 70%-ontlaaidiepte. Met ander woorde: Jy kry nie 105 Ah uit ’n 105 Ah-battery nie! In die algemeen kan jy tussen 70 en 75 Ah- bruikbare energie uit die bogenoemde battery…

Dit was vroeg in Februarie 1996 en ek was ’n 19-jarige snuiter. My ma het my gaan aflaai by die destydse Johannesburginternasionale lughawe. Maande lank het ek gedroom van hierdie dag. My eerste reis oorsee. My ma was geen vreemdeling vir reis nie. Sy het in die jare sestig, nadat sy haar graad in die onderwys gevang het, haar reistande as SAL-lugwaardin gesny. Sy het selfs my pa, nou oorlede, op een van haar binnelandse vlugte ontmoet. Daar sit ons toe in haar Nissan Sentra op die N3 noord van Heidelberg, en ons al twee – om verskillende redes – byt hard om die trane terug te hou. Vir my, die hardekoejawel-sportkind, het die bal skielik vreeslik groot geword: Ek was op die punt om op my eie in ’n…

BLY HIER MIDMARDAM-NATUURRESERVAAT Die Midmardam is vir watersportliefhebbers. Hier kan jy seil, visvang, op jou waterponie rits, waterski of kom oefen vir die bekende Midmarmyl. Dis ’n groot oord van meer as 2 000 ha, met Munrobaai naby die seilklub die“hoofstad”: Hier is altesame 47 chalets van verskillende groottes en 31 kampplekke wat oor die dam uitkyk. Die Morgenzon-(176 staanplekke) en Dukuduku-kampterrein (43 staanplekke) is op die oewer van die dam met oorgenoeg skaduwee onder groot bome. Morgenzon lyk die beste van die drie kampplekke, want hier is jou uitsig oor die hele dam terwyl Dukuduku in ’n sloep geleë is. Die chalets lyk asof dit ’n stewige opknap en veral ’n laag verf nodig het... ’n mens huiwer om dit aan te beveel. Geriewe Hier is ’n beperkte aantal…

BENNO KLINCK @bennoklinckphotography Nikon D7200 Nikon 18-140 mm-lens BENNO VERTEL: Dié foto is op Oukersaand 2017 met sonsondergang geneem. Ek en my gesin het vakansie gehou op my ouma se plaas buite Ladysmith in KwaZulu-Natal. Dit was een van my eerste weerligfoto’s wat mooi uitgewerk het. Ek het eers onlangs met fotografie begin en het taamlik gesukkel. Ek het my kamera op ’n driepoot gemonteer en my verstellings was soos volg: ISO 100, f-stop f9 en sluiterspoed 1/10 van ’n sekonde. Ek moes steeds byna 400 foto’s neem voor ek die perfekte een kon kry! TOAST SÊ: Bliksemstraal! Ja, weerligfoto’s is nie grappies nie. (En wees versigtig: Staan verkieslik onderdak terwyl jy weerlig afneem.) Dankie tog vir digitale fotografie sodat jy sonder skroom 400 foto’s kan afvuur – verbeel jou…

Dis welbekend dat die mark vir sportnutsvoertuie omtrent die enigste een in die motorbedryf is wat groei. Dit maak sin dat elke motorvervaardiger deesdae so ’n motor in sy vertoonlokaal wil hê. Het jy dit nie, is dit so goed jy probeer ’n broccoli-smoothie smous by Nampo – jou kans om ’n wins te maak is nul. Die Franse motorvervaardiger Peugeot en die Italiaanse Alfa Romeo is self keelvol vir broccoli- smoothies, vandaar die 3008 en Stelvio. Albei motors is sportnutsvoertuie, maar die Franse het die konsep op een manier vertolk, en die Italianers op ’n ander manier. Franse gekunstelheid Die Peugeot 3008 het verlede jaar omtrent elke Europese motortoekenning gekry wat moontlik uitgedeel kan word, insluitend die grote, die Europese Motor van die Jaar. Dit was die eerste keer…

LET WEL • Hierdie reis is ontwikkel in samewerking met een van ons spesialisgidse Paul Wigley. • Ons reis van Livingstone, Zambië via die Luangwa- nasionale park na die Malawimeer. • Op die terugreis na Livingstone sal jy die Kafue- nasionale park besoek. BHEJANE IS VERANTWOORDELIK VIR • Alle kampgeld. • Alle parktoegangsgeld. • Alle geadverteerde aktiwiteite. • Alle tente, eetgerei en breekgoed. • Drie maaltye per dag. • Koffie en tee terwyl jy in die kamp is. • Professionele toerleiers en gidse. • Tweerigtingradio's JY IS VERANTWOORDELIK VIR • Jou voertuig en brandstof. • Jou eie matras/kampbed en beddegoed. • Opvoustoele. • Drinkgoed en versnaperinge vir tussen maaltye. • Reisversekering en mediese versekering wat voorsiening maak vir noodontruimings. • Grensposgeld en padbelasting. HOE LANK IS DIE TOER? 16 nagte, 17 dae WANNEER? 2-18 Junie 2018 WANNEER? R24 650…

IRENE FARM, CENTURION Moeg vir die lewe in die stad? As jy in Pretoria bly en dié bekende liedjie maal in jou kop, mik vir die Irene Farm. Dié melkplaas in die gelyknamige boomryke buurt is regtig pure plaas. Koeie staan elke middag gedienstig in ’n ry om gemelk te word – kom kyk tussen 3 nm. en 4 nm. hoe dit gedoen word. Kalwers lê op ’n strooimatjie en wag vir kinders om vir hulle te kom kuier. Hoenders skrop waar ook al hulle ’n plekkie kry en kolganse dryf op die plaasdamme rond. Hier is selfs ’n paar swane ook! Sit aan by die Deck-restaurant langs die deli – die hamburgers (R85) en hoenderfrikkadelle met murgpampoentjie en feta (R70) is heerlik – of by die opelug Barn-restaurant –…

Só vreet jy ’n hele bok op jou eentjie op! Ons het in Desember verlede jaar op dié toneel op die H4-1 tussen die Skukuza- en Onder-Sabie-ruskamp in die Krugerwildtuin afgekom. Ons het ongelukkig nie gesien hoe dit gebeur het nie. Toe ons daar aankom, was die luislang reeds besig om die rooibok te verorber. Ons het meer as ’n uur lank gesit en kyk hoe die slang stelselmatig die bok insluk. Ons het gedink die slang sou onmoontlik kon beweeg nadat hy ’n hele bok ingesluk het, maar hy het wraggies later stadig weggeseil. AWIE EN RETHA GROBBELAAR, Riebeeckstad Ons is parkmal! Dit het in 2013 in die Krugerwildtuin begin. Kort daarna het ons die Mapungubwe- nasionale park besoek. Ons het besef dat elke nasionale park ’n spesiale bekoring…

Ken jy vir Corvus? Hierdie tyd van die jaar sit ’n opvallende klein vierkant hoog bo die noordoostelike horison. Dit verteenwoordig Corvus, die Kraai. ’n Wonderlike mitologieverhaal, wat uit 500 v.C. dateer, verbind Corvus met twee nabygeleë konstellasies, Crater (die beker) en Hydra (die waterslang). Die storie lui dat Apollo vir Corvus met die beker gestuur het om te gaan water haal by ’n fontein. Daar gekom, sien hy ’n vyeboom oortrek van vye wat nog net-net te groen is om te eet. Dit laat hom vir ’n paar dae vertoef totdat die vye ryp is waarna hy hom knuppeldik eet. Hy besef skielik dat Apollo teen dié tyd al smoorkwaad sal wees en die kraai kyk rond vir ’n alibi. Hy sien die waterslang wat hy toe opraap en…

Jy ken die paadjie na jou eie huis so goed dat jy dit in jou slaap kan ry. Maar sodra jy in ’n ander land reis, is die straatname (en aanwysings wat ’n mens kry) dikwels so verwarrend dat nie eens Google Maps jou kan help nie. Of dalk het die straatname tuis verander en maak dit jou nou heeltemal deurmekaar, of jy moet afspreek om iemand langs ’n staproete te kry, waar daar beslis nie ’n straatadres is nie, of jy kan nooit onthou waar in die mall se yslike parkeerterrein jy parkeer het nie! Die Britse maatskappy what3words het ’n oplossing gekry om adresse eenvoudiger te maak: adresse wat uit 3 woorde bestaan, sonder enige syfers. Hulle het die hele wêreld in blokkies van 3 m x 3…

Dis harde wêreld hierdie. Die paadjies kronkel deur berge en heuwels. Die op en af van pas op pas word dan en wan deur ’n sandvlakte gebreek. In die somer gaap die akkedisse, en in die winter byt die koue sodra die son agter die bergreeks Vyf Susters verdwyn. Die Oranjerivier sny soos ’n lewensaar deur die heuwels, ’n strook groen wat lafenis bied in ’n dor landskap. Stap jy egter ’n paar meter veld-in weg van die rivier af, kan jy amper nie glo iets kan hier lewe nie. Ja, die Richtersveld is beslis nie dood nie. Inteendeel, die biodiversiteit van Suid-Afrika se enigste bergwoestyn is verstommend. Hier is meer as 4000 verskillende plantsoorte (waarvan bykans die helfte net hier voorkom). Dassies, koedoes en selfs luiperds oorleef tussen die…

DIE BESTE FONE Kom ons wees eerlik: Jy neem waarskynlik die meeste foto’s met jou slimfoon. Gelukkig weet die vervaardigers dit en die jongste slimfone kan ongelooflike foto’s neem. Hier is twee van die bestes. Samsung Galaxy Note 8 Voorheen was die groot ondergang van so te sê alle foonkameras dat hulle nie kon inzoem nie. Jy kon “inzoem”, maar al wat die kamera gedoen het, was om die foto digitaal te vergroot – en dan het jy ’n foto van swakker gehalte. Die Galaxy Note 8 los dié probleem op met twee kameras – ’n 26 mm- ekwivalente wyehoekkamera en ’n 52 mm- ekwivalente telefotokamera. Jy kan op enige fokuslengte tussen dié twee punte skiet en jou foto’s sal topklas wees. Goed, 52 mm is nie só baie zoem…

HOE GLY EK? Cape Canopy Tours is ’n unieke ervaring waar jy die Hottentots-Holland-reservaat uit ’n nuwe perspektief sien. Die toer bestaan uit 11 glykabels, waarvan sommige langer as 300 m is, waarvandaan jy die reservaat uit hoog in die lug kan sien. Elke glykabel eindig op ’n platform wat uitkyk oor die berge en fynbos van die Riviersonderendkloof. Een van die hoogtepunte van die toer is ’n hangbrug oor ’n waterval in ’n smal sandsteenkloof. Die toer is ’n begeleide natuurervaring wat tussen 4 en 5 uur duur. WAAR? Die Hottentots-Holland is ’n CapeNature-reservaat in die omgewing van Elgin en Villiersdorp (sowat 90 km buite Kaapstad). WIE KAN ALMAL GAAN? Dis geskik vir enigeen tussen 5 en 75. HOEVEEL KOS DIT? Die gewone prys is R895, maar Weg-lesers betaal…

LIBERTAS-GASTEPLAAS, HOEKWIL Wanneer jy weer met die Tuinroete langs toer, is Johan en Linda Potgieter se plaasverblyf naby Hoekwil ’n puik oornagopsie. Dis gerieflik naby aan die snelweg (sowat 12 km), maar ver genoeg om ’n mens te laat voel jy’s met vakansie. Die verskeie selfsorghuise is só gesellig ingerig dat dit voel asof jy by iemand aan huis oorbly. Die rusbanke, diep stoele en kombuistafels vra vir lekker kuier en Linda se eie foto’s van plaastonele sorg vir ’n gemaklike atmosfeer. Van hier af kan jy kusdorpies soos Victoriabaai en Sedgefield besoek, en die gebied is besaai met staproetes in die Tuinroete- nasionale park se Wildernisdeel. Hier’s ook soutwatermere vir voëlskyk, roeiplekke, bergfietsroetes en wouduitstappies. Ja-nee, hier kan jy besig bly tot die koeie huis toe kom. Van koeie…

Die dorpie Marquard is op ’n effense bultjie, sowat 160km noordoos van Bloemfontein. Dis asof die vlaktes van die droër, sentrale Vrystaat hier meer reën kry en berge begin groei. Want hier naby Marquard is die mooi Korannaberg en van hier af ooswaarts is die provinsie groener en vol sandsteenkranse. Dis waarom die plaaslike mense sê die Vrystaat begin hier mooi raak. Hulle glo ook Marquard is die vriendelikste dorp in die land. Net voordat jy die dorp inry, kondig ’n sementdamwal langs die pad aan: “Marquard. A dam friendly town.” En dan ’n bord wat vra: “Waai asseblief, jy betree ’n vriendelike gebied.” Jy sien gou dat dit waar is, want bo elke stuurwiel van elke voertuig wat verbykom, steek ’n oop hand uit. Dis ’n dorpie met ’n…

STAAN OOR LANGS DIE TANKWA, 1932 Martha le Roux van Bellville vertel: Ek deel graag dié foto van ’n gesinsvakansie uit 1932. Ek was toe maar vier jaar oud en ons was van ons tuisdorp, Calvinia, af op pad Kleinmond toe vir ons jaarlikse tien dae lange uittog oor Kersfees en Nuwejaar. Toe ons by die Tankwarivier kom, was dit oorstroom en moes ons twee nagte oorbly en wag dat die watervlak daal. Ons kon nie met ons pakkasie (een lorrie en een mouterkar, vol kamptoerusting en kos en ’n hond en ’n kat) deur die rivier nie. Dit was vir my tog te lekker – ek het daarvan gehou om in die veld te stap, klippe van alle kleure en soorte op te tel en klip-klip te speel. Dit…