Innholdsfortegnelse for July 2020 i Tuis

I emand verwys nou eendag na daardie gevoel van “ops” en “afs” wat ’n mens tydens die Covid-19-pandemie ervaar as ’n “coronacoaster” – na aanleiding van rollercoaster, daai wipwaentjie in ’n pretpark. Behalwe dat die realiteit g’n pretpark is nie. Alles behalwe. Maar, soos in ’n wipwaentjie, klou mens maar verbete vas, want jy wil beslis nie uitval nie. En jy troos jouself dat dié op-en-af-rit wel iewers tot stilstand sal kom. Intussen werk baie van ons steeds by die huis – deesdae ’n kokon van veiligheid waarin ons ’n telefoonvergadering kan bywoon so tussen skottelgoed was of onkruid uittrek deur. (Jy moet net nie jou vinger met die snoeiskêr raaksny nie, dit lei jou én jou kollegas se aandag van die gesprek af…) Videovergaderings is natuurlik ’n gans ander…

Van meet af ’n Kreatiewe uitstalling van kosbare maatkoppies en -lepels gee tonne sjarme en persoonlikheid aan Manuel en Jenny Cernades se nuwe kombuis in Linden, Johannesburg (sien die hele kombuis op bladsy 40). “Van dié lepels het ek by my oumas geërf, en ander het ek oor meer as 30 jaar bymekaargemaak,” sê Jenny. Sy het die uitstalbord gemaak van ’n deel van ’n ou tafelblad. Elke lepel of koppie hang aan sy eie spyker op sy plek, altyd gereed vir gebruik. Panele in verskillende kleure op die oorspronklike hout maak dit ’n interessante fokuspunt in die andersins monochroom kombuis. Die versameling het nou ’n ereplek tussen twee vensterrame van herwinde Oregondennehout. Vensterrame van Orejen Het jy geweet? Nadine het ons Rookie Stylist- kompetisie in 2019 gewen! Het jy…

VERSKAFFERS Hadeda 011 788 5774, hadeda-tiles.com Italtile 0861 555 109, italtile.co.za Pudlo 021 448 0607, pudlo.co.za Stiles 021 510 8310, stiles.co.za WOMAG 021 447 6161, womag.co.za…

’n Lagie verf Liezel-Joy Williams van Weltevredenpark in Roodepoort skryf Jenna en Eugene Theron het die dennehoutplafon en die kaggel in hul sitkamer (in die April 2020-uitgawe) so mooi geverf. Hoe moet dié oppervlakke voorberei word, en watter soort verf het hulle gebruik? Jenna Theron antwoord Begin deur die verniste houtplafon liggies met fyn skuurpapier te skuur om dit skoon te kry en die onderlaag te help klou. Volg dan dié stappe: Vir die plafon  1 Wend een laag meerdoelige onderlaag aan; ons het Rust-Oleum Zinsser Bulls Eye 1-2-3 Water-Base Primer gebruik. 2 Verf dan met twee lae gewone plafonverf; as jy ’n hoëglansafwerking (soos dié van vloerlyste) verkies, gebruik ’n hoëglans- drupvrye emaljeverf. Dis wel baie duurder en meer arbeidsintensief. Vir die kaggel  1 Berei ’n floddermengsel van bindvloeistof…

Goue oue Gail Rigele van Midrand skryf Ek het dié erdebeker, wat my ouma ná die Tweede Wêreldoorlog van Egipte af gebring het, geërf. Kan julle my enigiets daaroor vertel, en hoeveel dit werd is? Ainsley Taylor van Stephan Welz & Co. antwoord Dié lieflike beker is ’n voorbeeld van Gouda-pottebakkersware wat, soos die naam aandui, uit die Nederlandse munisipaliteit Gouda kom. Die gebied is nie net bekend vir sy kaasprodukte nie, dit was ook eeue lank ’n groot produksiesentrum van keramiekware. Gouda-pottebakkersware is ’n generiese term vir alle Nederlandse pottebakkersware (buiten die bekender Delftware) en het ’n besonderse sjarme. ’n Firma genaamd Plateelbakkerij Zuid-Holland, of PZH, het die pioniers van pottebakkersware in dié styl geword nadat ’n nuwe proses omstreeks 1910 ontwikkel is om aan Goudapottebakkersware hul kenmerkende matglasuur-karakter te…

Baljaar buite! Pa se skaduwee Gatsby gaan oral saam, selfs gholfbaan toe! – Tayla-Jade Southby, Port Elizabeth Warm kopie As jou hond traanvlekke kry weens ’n oogafskeiding, sal Vet’s Best Clean Eye Round Pads met strelende Aloe vera (R75, shingavet.co.za) dit help verwyder met gereelde gebruik. Daar, bietjie links! Mieke wys vir Willem presies waar die aksie is. – Christine Schoeman, Oudtshoorn Fyn voetwerk Staan opsy Lionel Messi, hier kom Molly! – Tamsyn Wiggill, Kaapstad Op pad! Kitty is slaggereed vir ’n woonwavakansie. – Mariette Swart, Brackenfell Koebaai koue Taz groet Switserland se sneeu voor die trek na Suid-Afrika. – Stephanie Hayman, Eston, KZN Hoog in sy skik Charlie geniet die uitsig van bo af. – Ryno Schoombee, Pretoria WEN!  Die eienaars van die diere wie se foto’s hier verskyn,…

WIE WOON HIER? Mercia Kruger WAAR Paarl GROOTTE 270 m² GRONDTIPE Leem Mercia Kruger van die Paarl hou daarvan om prentjies in haar tuin te maak – maar sy koop feitlik nooit iets nuuts om dit te doen nie. “Daar is altyd een of ander bouery in die buurt aan die gang. Dit is ongelooflik hoeveel goed mense weggooi wat dan op ’n hoop bourommel beland: halwe baksteentjies, ’n gekraakte plaveisteen, ’n mooi stomp of ’n pot met ’n bars,” verduidelik sy. “Ek maak alles bymekaar want daar’s altyd nut daarvoor in my tuin. Toe my man, Riaan, nog geleef het, het hy gereeld gevra: ‘Waar tel jy nou weer al daai goed op en waar gaan jy dit bêre?’ Maar ek kry altyd iewers plek daarvoor in een van die…

#1 Dusty Miller Jacobaea maritima sin. Senecio cineraria Dié silwergrys plant lyk deur die jaar mooi en dra onopsigtelike roomkleurige tot geel madeliefieagtige blomme. Baie tuiniers sny die blomme af en gebruik die plant net vir sy blaarkleur en -tekstuur; só kry die plant ook ’n meer bosagtige voorkoms. Dusty Miller hou van komposryke grond wat goed dreineer. Dit is maklik om te kweek, redelik plaagvry en droogtebestand. Wanneer die plant ouer en onnet raak, kan dit teruggesny of met nuwe plante vervang word. Maak self nuwe plante deur dit te verdeel of steggies te maak. Die sagte grys blare lyk mooi in ’n gemengde bedding en het ’n versagtende uitwerking op beddings met andersins baie helder blomme. Dit lyk ook mooi voorlangs teen die rand…

Romerige mossel-en-mieliesop Onder R200 • Genoeg vir 4 porsies Bereidingstyd: 15 minute • Gaarmaaktyd: 30 minute • 2 eetlepels knoffelbotter • 125ml witwyn • 1kg halfskulpmossels, ontvries • 15ml olyfolie • 1 brandrissie, ontpit en fyngekap • 1 rooi soetrissie, gekap • 5ml meel • 250g bevrore mieliepitte • sowat 500ml goeie aftreksel • 250ml room • 60ml vars koljander of pietersielie 1 Verhit die knoffelbotter en wyn saam tot kookpunt in ’n kastrol met ’n digsluitende deksel. Voeg die mossels by, sit die deksel op en draai die hitte af. Laat stoom vir 5 minute. 2 Verhit die olie in ’n tweede pot en soteer die brand- en soetrissie saam vir ’n paar minute. Roer die meel en die mieliepitte by, gevolg deur die aftreksel, en kook vir 5 minute. 3 Draai die hitte effens af en voeg nou die gestoomde mossels…

Skryf aan ons by Tuis/Ons lesers sê, Posbus 1802, Kaapstad 8000 of stuur e-pos na redakteur@tuis.co.za. Gesels saam by tuis.co.za of facebook.com/tuistydskrif, of volg ons op Instagram by @TuisHomeMag. Verstrek asseblief jou naam en van, asook die naam van jou dorp, wanneer jy aan ons skryf. WENBRIEF Vrieskas-avonture Saartjie Muller van Pretoria skryf Na aanleiding van Wicus se vrieskas-storie in die Februarie-uitgawe moes ek net myne deel: Dis 1994, ek en my skoolliefde is pas getroud, so arm soos kerkmuise met ja-a-are se studieskuld, en ons woon in ’n ateljeewoonstel in Johannesburg. Ons het ’n Kelvinator-yskas met ’n vrieshokkie so groot soos ’n skoenboks. So kom my wederhelfte een somermiddag in sy noppies met ’n yslike waatlemoen by die huis aan. Die supermark had ’n spesiale aanbieding en hy kon…

WIE WOON HIER? Mariëtte en Peter Bouwer, en oor naweke hul seun Martin (22) WAAR Bosplasie, Onrus GROOTTE 430m² Aan die oewer van die Onrusrivier digby die see staan ’n leiklipgrys huis gevul met die wondermooiheid wat net baldadige kunssinnigheid kan skep. Hier gaan jy saam met die huismense, die kunstenaar Mariëtte Bouwer en haar man, Peter, op reis – nie net na verre lande en die res van Suid-Afrika waar hulle kleurvolle memento’s versamel het nie, jy loop ook terug na vervloë tye tussen oudhede en erfstukke, heelparty in ’n helder nuwe baadjie. Dis ’n skouspel waarin jy jou met hart en siel kan verlustig. Geen wonder dat Mariëtte sê sy’s ’n dromer nie. “Ek sou graag ’n reisiger van beroep wou wees ...” Maar dan voeg sy gou…

• Geniet die proses. Wees opgewonde, maar ook geduldig. • Bestee jou geld op afwerkings wat jy elke dag gaan geniet, maar hou by jou begroting. As jy iets dolgraag wil hê en dis te duur, gaan soek op die internet; daar is altyd ’n goedkoper opsie. Of sny koste op ’n ander plek. Dit kan gedoen word! • Dis die uitgawe werd om ’n projekbestuurder aan te stel. Die uitdagings en frustrasies was minimaal en daar was geen rampe of groot misverstande tussen ons en die bouers nie. Eugene Theron het al die kontrakteurs bestuur en selfs vir my mooi op my plek gehou. Sonder hom as ons koelkop-projekbestuurder (wat intussen ’n goeie vriend geword het) glo ek nie die bouery sou so glad verloop het nie. Danksy hom…

PROJEKNOTAS • As jy geld wil spaar, kan jy ’n bokkie koop en ’n ou deur of afvalplank gebruik as werkblad – dan hoef jy net die twee kassies te maak. • Meet twee keer, dan saag jy net een keer. • Skuur jou planke vooraf. • Onthou om gidsgaatjies te boor. PROJEKGIDS  Harde werk 4/10 Vaardigheidsvlak 4/10 Tyd nodig 1 tot 2 uur Maak dit vir ± R1 300: Hout R1 170, skroewe R20, gom R30, skuurpapier R10, houtvuller R30, skarniere R20 Wat jy nodig het INKOPIELYS • 22 x 95mm- geskaafde dennehout, gesaag in: vier 765mm-lengtes (bokkiepote) vier 600mm-lengtes (bokkie se dwarsstutte) • 18mm-laaghout in die volgende groottes: een 400 x 400mm (bokkie-rak) vier 680 x 300mm (kassie-sye) vier 300 x 300mm (kassies se bodem en -bokant) twee…

Die probleem Karien van den Berg van Potchefstroom skryf Ons huis uit die 1980’s het ’n ingangsportaal met ’n ekstrahoë plafon; die mure het heelwat tekstuur (grofgepleister, sowel as rou bakstene wat gesaksmeer is). Danksy hoë vensters is daar ’n oorvloed natuurlike lig wat my plante laat floreer. Daar is ook ’n ingeboude plantbak waarop ’n boekrak tans rus. Dis prakties, maar nie juis iets vir die oog nie. Die plante bo-op die rak staan hier omdat dit eintlik al plek is waar dit floreer. Die natuurlike lig het hier ’n geel toon en die muurlig bo die boekrak verskaf die enigste kunsmatige lig. Tans weerspieël dié hoekie nie ons persoonlike styl nie. Hoe kan ek dit inrig in ’n moderne, praktiese ruimte met karakter? Die oplossing Shelly Bergh, ’n…

WIE WOON HIER? Sarah en Richard Mattheyse WAAR Protea-Hoogte, Brackenfell GROOTTE 9m² Toe Sarah en Richard Mattheyse in Desember 2012 by hul nuwe huis intrek, was hulle alte bly oor die tuin met genoeg speelplek vir hul hond, en dat dit destyds nader aan albei se werkplek was. Maar die kombuis – eintlik net twee mure regoor mekaar en ’n agterdeur – was ongemaklik en heeltemal onprakties. “Ons sou die uitleg moes verander om die klein ruimte beter te benut,” sê Sarah, wat van die begin af in haar kop en op papier aan die ontwerp en uitleg beplan en verander het. Uiteindelik, in 2017, het die paartjie die opknap aangepak. Omdat hulle alles self wou doen en net saans en oor naweke kon werk, het die projek hulle sowat…

Mary Nichols van Johannesburg skryf Ek het gelees dat troeteldiere positief getoets het vir Covid-19. Is dit iets waaroor ons as troeteldiereienaars bekommerd moet wees? Gert Steyn, besturende direkteur van die Suid-Afrikaanse Veterinêre Vereniging, antwoord Koronavirusse is ’n groot familie virusse, en party besmet mense en sekere diere soos beeste, katte, honde, vlermuise en kamele. Hond- en kat-koronavirusse besmet net diere, nie mense nie. Van die koronavirusse wat by diere voorkom, soos MERS Cov by kamele, kan wel mense besmet – maar dit gebeur selde. Hoewel ’n hond in Hongkong “swak positief” getoets het vir Covid-19, het dit geen simptome getoon nie. Dit is nog nie bevestig of die “swak positiewe” uitslag dui op die teenwoordigheid van die virus self, of dat die hond die siekte opgedoen het nie, aangesien…

Met skakerings van grys en silwer skep jy ’n gevoel van rustigheid en koel elegansie in jou tuin. Dit sorg ook vir kontras en lyk mooi saam met feitlik enige ander kleur blom of plant. Petro Jacobs van Petro Landscaping in die Wes-Kaap is ’n groot voorstander van grys in ’n tuin. “Ek kan glad nie tuinmaak sonder om grys op een of ander manier te gebruik nie, hetsy met die keuse van plante of met harde elemente soos ’n bankie, potte, plaveiblokke of waterelemente,” sê sy. “My kleurpalet sal altyd neig na skakerings van diep en sagte groen, sagte gryse en silwergrys. Die subtiele kontras van grys met dié groene en ook ander kleure skep ’n gevoel van diepte in beddings en bring rustigheid in ’n tuin.” Sy glo…

Daar is vyf Cotyledon orbiculatas wat in verskillende habitatte oor die hele Suid-Afrika voorkom – sommige met groter, gryser of groener blare, ander se blare is weer kleiner of het interessante vorms. Van die kultivars wat beskikbaar is, is C. orbiculata var. oblonga ‘Takbok’, waarvan die grys blare die vorm van ’n takbok se horings het en C. orbiculata ‘Firesticks’, met blare wat soos vingers lyk. Blomtyd wissel van laatsomer tot herfs en ook in die winter. Plant ’n verskeidenheid vir ’n interessante voorkoms in jou waterwys bedding! KONTAK EN VERSKAFFERS Petro Landscaping 021 913 7924, petrolandscaping.co.za Benchmark Wood Classics 021 761 7656, chelseagardenandhome.co.za Hope Garden Furniture 066 225 3895, hopegf.com Old World Concretes oldworld.co.za Bronne Maak tuin saam met Keith Kirsten deur Keith Kirsten; Reader’s Digest A South African Garden for All Seasons…

SKIL ’N VITAMIEN C-HUPSTOOT ClemenGold-nartjies is sappig, maklik om te skil, so te sê pitloos en die perfekte peuselhappie dié winter. Sien clemengold.com. Groot geeste Spookfontein, ’n boetiek-wynlandgoed in die Bo-Hemel-en-Aarde-vallei, is bekend vir hul robuuste wyne. Probeer die Spookfontein Phantom 2017 (kelderprys R145), ’n versnit in die Bordeaux-styl oorheers deur merlot met ryk bessiegeure, en Spookfontein Pinot Noir 2017 (R195), ’n ligter kultivar waarvoor die streek welbekend is. Wat kan dan nou beter wees langs ’n knetterende vuur? Bestel by spookfontein.co.za. Pst! terwyl jy nou aanlyn is, bespreek sommer ook verblyf in een van hul luukse kothuise vir ná grendeltyd... ALLES-IN-EEN All Sorts of One-Dish Wonders deur Chantal Lascaris (R240, penguinrandomhouse.co.za) wys hoe opwindend eenpotgeregte kan wees met resepte vir meer as net jou alledaagse staatmakerbredie vir ’n weeksaand.…

SKEP EN INNOVEER WIE Zelda van der Walt WAAR Newcastle, KwaZulu-Natal BESIGHEID Blokk HAAR WERK Wat vir Zelda as ’n stokperdjie begin het, het twee jaar gelede ’n besigheid geword nadat al hoe meer vriende en familie gevra het vir haar handgemaakte houtteëls. “Dié kamma-teëls is versier met ’n verskeidenheid materiale, soos beton en verf, asook oordragmotiewe. Elke teël is met die hand gemaak en het ’n mat afwerking, wat die teëls ’n vintage-gevoel gee,” verduidelik sy. Die ontwerpe verander heeltyd en die versamelings word gereeld bygewerk; jy kan een teël (vanaf R95) koop, of ’n hele paar meng en pas vir ’n besonderse kunswerk. Blokk, wat by kuns- en kunsvlyt-feeste begin handel dryf het, het nou ook ’n aanlynwinkel, wat beteken jy kan dié handgemaakte mooigoed enige plek in…

WIE WOON HIER? Duan Wanty en Reg Hart en hul kat, Harley WAAR Victory Park, Johannesburg GROOTTE Woonstel 60 m² en ’n stoep van 24m² By Duan Wanty en Reg Hart se tuinwoonstel voel jy met die instrapslag tuis, nog voor hulle jou ’n koppie koffie of ’n glas wyn aanbied. Die rede? Jou oog val eerste op die vrolike geel muur naby die voordeur – groot en helder, gelaai met kunswerke, afdrukke, handwerk en aandenkings, ’n fokuspunt wat jou dadelik iets van die gashere vertel. Dié sitkamermuur vorm die kern van hul woonplek, vertel hulle. Dit versinnebeeld wie hulle is en ook hul lewensuitkyk. En die gevoel van déjà vu wat jy ervaar, is nie onbedoeld nie. Daardie kassie of daai lamp, ornament of handwerk … jy’s oortuig jy…

PROJEKGIDS  Harde werk 1/10 Vaardigheidsvlak 2/10 Tyd nodig 1 uur Doen dit self vir R272: Papier R60, stireenvelle R62, passtuk vir plafon R130, LUD-gloeilamp R20 Wat jy nodig het INKOPIELYS • 3 velle dik A3-papier (160 gsm)• A4-vel stireen• passtuk vir plafon• splitpen• alkantkleefband• LUD-gloeilamp (dit bly veilig koel) GEREEDSKAP • staalliniaal• snymat• nutsmes of bosseleerpen• potlood• krammasjien• skêr• pons Só maak jy ... 1 Sit die eerste vel papier dwars op die snymat neer. Gebruik die liniaal en nutsmes en diepmerk ’n vertikale lyn 1cm van die regterkantse sy af (moenie deursny nie). Dié strook vorm ’n lippie vir die plakslag in stap 5. 2 Meet en diepmerk sewe vertikale lyne ewe ver uit mekaar om die res van die papier in agt gelyke dele te deel. Vou die…

V: Ek sien daar is ’n beskermende plaat onder die kaggel in die Sondagskloof-ekohuis op bladsy 46 van die September 2019-uitgawe. Wat is dit en waar kan ek so iets kry? – Mariaan Blattes, via Facebook A: Dis ’n glas-vloerplaat van Premier Fires (premierfires.co.za). V: Ek is dol oor die kleur van die kas op bladsy 54 van Oktober 2017 se uitgawe. Kan julle my help om ’n soortgelyke skakering op te spoor? – M.R. Prinsloo, Piet Retief A: Probeer Dulux Dramatic Sea of Dulux Marine Blue (dulux.co.za).…

Metroteëls, wat in 1904 spesifiek vir New York se eerste moltreinstasie ontwerp is, bly ’n tydlose keuse. “Meer as ’n eeu later is die metroteël (‘subway tile’) se klassieke skoonheid, duursaamheid en persoonlikheid steeds ’n groot gunsteling,” sê Nicole Russell van Italtile. “Met ’n paar ontwerpevolusies hier en daar bly dit ’n moderne keuse met ’n tikkie nostalgie. Nicole deel ’n paar wenke hoe om dié teëls in die kombuis te gebruik: • Die metroteël met afgeskuinste rande is ’n moderner weergawe van die oorspronklike plat teël; dis ideaal vir ’n ruimte waar jy ’n tikkie trefkrag wil verleen, soos by ’n eenvoudige spatpaneel. Die afgeskuinste teël het ook ’n effens meer elegante gevoel as die plat teël. Albei kan in verskeie patrone gelê word, maar die afgeskuinste teël verleen…

HOEKOM SNOEI ONS PLANTE? Plante word gesnoei sodat hulle ’n mooi vorm kan hê en gesond kan wees, asook om blom- of vruggehalte te verbeter. Snoei in matige wintertuine in die tweede helfte van Julie, maar wag in kouer streke liefs tot die begin van Augustus sodat die nuwe groei teen ryp beskerm is. Stap saam In die antieke tye het smal, kronkelende paadjies teen heuwels op en in valleie af gelei, deur grasvelde, fluisterende woude en langs slingerende strome – uitgetrap deur diere op soek na kos en water en deur die voete van vroeë mense terwyl hulle gejag en hout bymekaargemaak het. Tuinpaadjies Paadjies deur ons tuine kan beskou word as ontdekkingsroetes, net soos elkeen van ons se lewenspad. Dit lei besoekers van een deel na ’n volgende,…

Dit is vir Petro moeilik om te kies, maar dié grys plante lê haar na aan die hart: Witolienhout (Buddleja saligna) en die pambatieboom (Anastrabe integerrima) is ook goeie keuses vir hoë heinings of skermplante met ’n grys voorkoms. Vir vormsnoei, lae tot mediumhoë heinings en ook in natuurlike tuine met ’n minder formele struktuur kies Petro graag kooigoed (Helichrysum petiolare), soutbos (Rhagodia hastata) en Australiese roosmaryn (Westringia fruticosa). Kruieplante met ’n grys blaarkleur wat Petro graag gebruik, sluit kruiproosmaryn (Salvia rosmarinus ‘Prostratus’ sin. Rosmarinus officinalis), grysblaarsalie (Salvia officinalis), kerrieplant (Helichrysum italicum) en laventelsoorte soos Lavandula angustifolia, L. stoechas en L. dentata in. [ BAIE SON, MIN WATER! ] Baie plante met grys blare is afkomstig van warmer wêrelddele en is goed aangepas vir ’n sonnige klimaat.  Heelparty is ook…

Gnocchi met sampioene en pekanneute Tuisgemaakte gnocchi is vinniger om te maak as wat jy dink. Ná ’n paar keer se oefen kan jy vars gnocchi binne ’n uur op die tafel hê – maar kies gerus kortpad met ’n klaar gekoopte pakkie as jou tyd (of selfvertroue) min is. Genoeg vir 4 Bereidingstyd: 50 minute Gaarmaaktyd: 30 minute • 6 groot aartappels (sowat 800g) • 1 eiergeel • sout, peper en neutmuskaat • sowat 250ml meel, twee keer gesif (sien wenk) • semolina vir rol SOUS • 45ml olyfolie • 250g dwergsampioene, in dik skyfies gesny • 125ml pekanneute, fyngekap • 1 knoffelhuisie, fyngekap • 5ml tamatiepasta • 80g (1 pakkie) platblaarpietersielie, fyngekap 1 Sit die aartappels heel in soutwater en kook tot sag (sowat 20 minute, afhangend van hoe groot hulle is). 2 Maak die sous Braai die sampioene…

Sê nou maar daar was ’n kombuispolisie, dink ek een aand toe ek die lig afsit om bed toe te gaan. Dit was teen die einde van ons tweede maand van inperking en ek het pas op TV aanskou hoe die minister met die bokbaardjie dreig om mense in vangwaens te laai as hulle somerplakkies koop. Dus geen vergesogte vraag as ’n mens ’n laaste blik oor jou deurmekaar kombuis gooi nie. Dit was ’n kiemparadys. Wat sou die swaarste sonde wees, het ek gewonder? ’n Vuil kombuisvloer? Of vuil skottelgoed? Volgens my wen vuil skottelgoed loshande. ’n Vuil kombuisvloer is minder gevaarlik, tog? Tensy jou masker op die vloer val, natuurlik. Daai kan dodelik wees. Aan die ander kant: As jy hom binne vyf sekondes opraap, is hy prakties…