Innholdsfortegnelse for March 2018 i Tuis

Op een van die foto’s – in die Macdonalds se sitkamer – hang drie Bordallo Pinheiroborde in die bekende kool-ontwerp. Kort ná die uitgawe op die rak verskyn, kry ons ’n oproep van ’n mev. Pienaar van Pretoria: Sy het ’n bakkie in dieselfde styl en wil dit graag vir Sue Macdonald skenk. Hoe kan sy haar in die hande kry? Kort storie lank: Sue het met mev. Pienaar gesels en die geskenk met dankbaarheid aanvaar: “That’s so incredibly kind, I am completely blown away by that. Wow!” skryf sy toe ons mev. Pienaar se besonderhede vir haar gee. En later: “Her kindness means so much to me.” Dalk is dit oor ons hier in die Kaap – ook julle in Port Elizabeth en die Karoo – met groeiende paniek…

Wie woon hier? Craig Olckers en sy brakke, Zac en Zoe WAAR Observatory, Kaapstad Ons is dol oor die kombinasie van die Ngunivel en klapperhaarmat vir warmte en tekstuur. Craig Olckers het twee groot liefdes in sy lewe: blomme en binne-ontwerp. Met sy tuisbedryf, die blomboetiek Oolong Blue, kon hy sy liefde vir blomme in ’n suksesvolle loopbaan uitleef. Sy passie vir ontwerp geniet hy in sy “af-tyd” – soos in die tweeslaapkamerhuis in Observatory, Kaapstad wat hy onlangs opgeknap het. Hoewel nie groot nie, is daar niks middelmatigs aan dié huis waar Victoriaanse en moderne elemente in harmonie saamleef nie. Die voordeur maak oop op ’n wit gang versier met hoë, swierig omraamde spieëls wat die oë boontoe lei na dramatiese kandelabers. Die elegante slaapkamers en badkamer is eenvoudig…

Dit kan nogal bedrywig raak met ’n tafel vol Koringbergers, maar dis altyd lekker om hier te kook en te onthaal. – Pippa Met ’n bevolking van net oor die 1 000, warm, droë somers en golwende geel koringlande is Koringberg wêrelde verwyder van die tropiese KwaZulu-Natalse kus. Maar die Durbaniet Pippa Lea Pennington het dadelik haar hart verloor op die rus en stilte toe sy ’n paar jaar gelede dié koringboerderygemeenskap in die Swartland besoek het om by haar vriendin Anna Kemp te kom kuier. “Ek het verlief geraak op die landskap en berge, en die vryheid om by jou voordeur uit te stap en jou binne twee minute in die naaste koringland te bevind,” sê Pippa. “In 2015, met my derde besoek, het ek na dié huis kom…

Harde werk 3/10 Vaardigheidsvlak 3/10 Tyd nodig ± 1 uur Maak dit vir onder R400: hout en skroewe (verf/vernis uitgesluit) Wat jy nodig het INKOPIELYS • 18 mm-laaghout, soos volg gesaag: een 600 x 300 mm (valblad) een 600 x 150 mm (vaste blad) een 600 x 130 mm (rugkant) twee 250 x 130 mm (stutte)• houtlym• een pakkie 6 mm x 40 mmspaanderbordskroewe• een pakkie 6 mm x 16 mmspaanderbordskroewe• vier 75 mm-plaatskarniere• houtvuller• 120-grint-skuurpapier• verf of vernis (opsioneel) GEREEDSKAP • potlood• figuursaag• maatband• koordlose boor en 3mm-boorpunt• verfkwas• skraper Projeknotas • Laat jou houthandelaar die planke saag, dan is jou werk makliker. • Onthou om gidsgaatjies te boor. SO MAAK JY 1 Gebruik die figuursaag en saag die een hoek van al twee 250 x 130 mm-stutte rond.…

Bewaar die grein Marianne Sanders van Claremont, Kaapstad skryf Ek wil my geërfde houtmeubels verf sodat dit by die res van my dekor pas, maar ek is dol oor die voorkoms van ’n natuurlike houtgrein! Is daar ’n produk of tegniek wat julle kan voorstel? Claire Bond, ’n kleurkenner by Plascon, antwoord Plascon se WoodCare Varnish-reeks met ’n waterbasis, wat jy hier op die houtvloer kan sien, kom in ses standaardkleure, asook ’n deursigtige, kleurbare basis wat die reeks uitbrei tot 20 modieuse skakerings. Die produk is só vervaardig dat dit op ’n groot verskeidenheid oppervlakke sal werk – van vloere, deure en hortjies tot vloerlyste en hekke. Dit gee aan natuurlike hout ’n spatsel kleur, maar die grein is steeds sigbaar. Plascon WoodCare is beskikbaar in variante vir binne-…

Baljaar in die son! G-a-a-p! Tiertjie ontwaak ná sy oggendslapie. – Niki van Heerden, Stellenbosch  Komkommerkoel ... Dié stylvolle kalant is reg vir die somer. – Carla Hauman, Bloemfontein Deur die blare Meraai ontspan in die koelte. – Sanet Smit, Nigel Egte waterkind Zara die Weimaraner baljaar alte lekker in die see. – Ansonet Ungerer, Danabaai Gate uit! Die Amerikaanse veghond Zara weet hoe om af te koel op ’n warm dag. – Kim en Steffan Raubenheimer, Port Elizabeth Ervare jagter  Junior jag graag muise in die koringland. – Hendrico Grobler, Bellville Warm kopie Hou jou troeteldier koel met die SnuggleSafe Instant Pet Cooling Pad (vanaf R375, shingavet.co.za) – ideaal vir lang, warm ritte in die motor. Danksy ’n nie-giftige stof genaamd Thermapol raak die kussing outomaties koel wanneer ’n dier…

Met net ’n stokou fynblaar-olm, ’n hibiskus, een rooi rosie en ’n bougainvillea het Annemi van Zyl in 2011 begin tuinmaak. “Die huis het vir meer as ’n jaar leeggestaan voor ek hier ingetrek het, so feitlik alles was dood. Ek het die boom en paar plante wat in my agtertuin oorgebly het, behou en goed gesnoei. Verder was hier net indringers,” vertel Annemi. Haar drie susters, Elmarie, Sita en Nini, is ook almal ywerige tuiniers en het haar aanvanklik baie gehelp. Omdat die huis na agter leef, het Elmarie op haar langwerpige agtertuin gefokus; sy het die uitleg ontwerp en die susters het gehelp om die besproeiing in te sit, die paadjie uit te lê, en te plant. “Die grond was vreeslik dor en arm,” onthou sy. “Ek het…

Groente in die voortuin Die tuin-tot-tafel-benadering is al jare ’n gier vir kranige tuiniers – dit moedig mense aan om hul eie kos te kweek met plante wat ewe mooi as smaaklik en gesond is. Groente is boonop nie meer net bykos nie maar hoofkos, en restaurante probeer vermorsing beperk deur dele van groente wat voorheen weggegooi is, op nuwe maniere voor te sit. So word broccoli-stele in skaafsels gesny en in slaaie bedien, rou murgpampoentjielinte word ’n slaai en blomkoolrys is ’n gewilde laekoolhidraat-opsie wanneer jy stysel wil beperk. Deesdae is daar ’n nuwe gonswoord: “veggimentals”. Dis ’n samesmelting van die tradisionele met die informele: Groente, kruie en blomme word in blokke, trosse, driehoeke en vertikaal gekweek, wat ook beter bestuiwing tot gevolg het. Kontemporêre groentetuine is stylvol, kleurvol,…

Varksteaks met dukkah en mango-salsa Onder R120 • Genoeg vir 4 • Bereidingstyd: 30 minute Gaarmaaktyd: 15 minute • 4 klein riboog-varksteaks• 45 ml olie• 45 ml dukkah• 1 klein komkommer• 1 ryp mango• ½ klein rooi ui, gekap• 1–2 rooi brandrissies, ontpit en gekap• 100 ml gekapte vars koljander• 15 ml suurlemoensap• 5 ml heuning• patattjips om voor te sit 1 Vryf die steaks oraloor met die olie en dukkah. Verhit ’n dikboompan tot lekker warm en braai die vleis tot goudbruin en deurgaar alkant. Laat rus eenkant terwyl jy die salsa maak. 2 Skil die komkommer, ontpit en sny in klein blokkies. Skil en ontpit die mango en sny in klein blokkies. Meng die ui, rissie, koljander, suurlemoensap en heuning by en geur rojaal met sout en…

1 MELK-EN-KOEKIES Laat 2 liter vanieljeroomys effens sag word. Skep twee derdes uit (vries die res weer) en voeg 12 gekrummelde Oreo’s by. Meng en skep in ’n groot metaal- of glasmengbak wat met kleefplastiek uitgevoer is (maak seker die bak pas in jou vrieskas). Smeer dit eweredig teen die kante van die bak uit. Werk vinnig en sit dit dadelik in die vrieskas. 2 PIESANGPLESIER Sny 4 groot, ryp maar nog ferm piesangs in skyfies en pak dit in ’n laag bo-op die koekielaag. Sprinkel ’n hand vol soutgrondboontjies en ’n paar glanskersies oor as jy dekadent voel – dis immers jou skepping! Sodra die roomys sy vorm behou, gaan voort met die volgende laag; indien nie, bevries dit nog ’n rukkie. 3 SJOKOLADE Vir die volgende laag het…

WENBRIEF Kampeer in styl Denése Eloff-Rheeder van Johannesburg skryf Op soek na inspirasie om ons nuwe karavaan met styl te versier, blaai ek deur my Tuis-tydskrifte (ek gooi nie een weg nie). Kolskoot! Net wat ek soek: Marokkaanse styl vir die slaapdeel. Ons eerste kamp met ons nuwe karavaan en nuwe dekor was heerlik. Snags kon ek in my drome na verre Marokko reis en my vergryp aan eksotiese disse. (Tuis verskaf mos ook heerlike resepte wat maklik is om te volg.) Nou kan ek met trots getuig: Daar’s niks mee verkeerd om jou dekor en styl ook op die kampeerterrein uit te leef nie! Tuis is nie net SA se no. 1-huis-en-tuintydskrif nie; julle kan gerus ook maar byvoeg: “die styltydskrif vir karavane”. Gelukkige einde Nicolette Brink van Pretoria…

Agter toe deure Ruim vir jou ’n plek in jou huis in om jou stokperdjies in vrede te beoefen en kreatief te wees – al is dit net ’n kas of lessenaar – en maak tyd om daar te speel. Amori van Jaarsveld van Graaff-Reinet het staalskuifdeure laat aanbring waarmee sy dié vertrek kan toetrek wanneer dinge te deurmekaar raak. Die industriële skuifdeur (oorkant) kontrasteer treffend met die andersins romantiese vertrek. >> Pastelperfek Die kleine Jua van Rensburg (2) se slaapkamer getuig van groot sofistikasie. Danksy ’n sagte kleurskema en tydlose wit meubels sal sy steeds hier kan droom lank nadat sy die veiligheidspanele aan haar kinderbed ontgroei het. Haasstoeltjies van Dovetail Furniture & Décor; soortgelyke tafels te kry by Simply Child Interiors; bedkassie van @home livingspace; bed van The…

Wie woon hier? Cara-Lee Dely WAAR Kylemore Ek noem my huis die kweekhuis omdat dit sulke ongelooflike natuurlike lig kry. Hier kan ’n mens nie laat slaap nie! – Cara-Lee Die reuk van nat verf is een van Cara-Lee Dely se mooiste herinneringe uit haar kinderdae. “Een oggend toe ek wakker word, het my ma ’n groot son en wolke teen my slaapkamermuur geverf,” onthou sy. Dié herinneringe was weer helder in Cara (27) se gedagtes toe sy hier op Kylemore, ’n dorpie langs die Helshoogtepas tussen Franschhoek en Stellenbosch, en naby die Môreson-wynlandgoed waar sy as assistent-wynmaker werk, haar eerste huis kon begin mooimaak. Toe sy einde 2014 dié 42m²-plekkie koop, was dit ’n leë dop – deel van ’n bouval wat ná ’n verwoestende brand in agt eenhede…

Deur Kim Arendse Foto’s Francois Oberholster, Justin Patrick, Elza Cooper, Henrique Wilding en ER Lombard Stilering Marian van Wyk en Amanda van Wyngaardt # 1 Drie in een In 2013 het die modeblogger Sergio Ines van whatmyboyfriendwore.com Gauteng verruil vir ’n piepklein dupleks in Kaapstad se stadskern. Hy het besluit om die plek na sy smaak in te rig, maar dit was geen maklike taak nie. Met net 20m² waarin ’n slaapkamer, kas en badkamer moes pas, moes hy heelwat slim planne vir die ruimte bedink! Sergio het die muur tussen die slaap- en badkamer laat uitbreek en besluit om hout, sement en glas te kombineer. Die glas skep ’n gevoel van ruimte en die gesonke ligte versterk die stylvolle, minimalistiese aanslag in die res…

Ons weet Tuis-lesers hou van mooimaak. As jy dit boonop self en met selfvertroue kan doen, des te beter! Maar is jy nog huiwerig om krytverf te gebruik? Tjhoko Paint, ’n trots Suid-Afrikaanse krytverf, het hande gevat met Tuis en bied ’n Tjhoko-toer aan – drie werksessies in verskillende dele van Suid-Afrika, én een in Namibië! By dié werksessies, aangebied deur die Tjhoko Paint-kenner Nadine Vosloo, kan lesers hul eie tafeldekor maak en al die kunsies leer om na hartelus met dié verf te skep. Dié sessies is ideaal vir enigiemand wat hou van mooi tafeldekor – van raakvatter-bruide tot graad-11’s wat werk aan vanjaar se matriekafskeid. Die sessies Plekke is beperk tot 40 per sessie sodat elkeen individuele aandag kan kry. In elke sessie van sowat drie uur sal…

V: Die muurkleur op bladsy 52 en 53 van die Januarie 2017-uitgawe is vir my pragtig! Wat is dit? – Gwendolyn Phillips, Welkom A: Dis City of Green van Plascon. V: Waar kan ek ’n bed soos die een op bladsy 29 van die April 2010-uitgawe kry? – Vanessa van der Watt, via Facebook A: Die huiseienaar het die bed spesiaal laat maak; jou beste raad is om die foto na ’n skrynwerker te neem en te vra vir iets soortgelyks. V: Waar kan ek daardie oulike kunswerk teen die muur op bladsy 39 van die Oktober 2017-uitgawe kry? – Yvette Loots, Pretoria A: Die kunswerk is deur David Kuijers (davidkuijers.com). Koop sy werk aanlyn by capegallery.co.za, houtbaygallery.co.za of infinart.co.za; al drie versend wêreldwyd.…

Mason van Niekerk van Bellville skryf Ek het geen planne om honde te teel nie en daar is nie ’n teef op my werf nie; hoekom dan my reuns laat regmaak? Dr. Denver Mudie van die Suid-Afrikaanse Veterinêre Vereniging antwoord Elke jaar moet duisende honde en katte uitgesit word weens ongewenste werpsels wat nie huise kry nie. Die goeie nuus is dat diere-eienaars ’n verskil kan maak, want met elke hond of kat wat gesteriliseer word, sal minder ongewenste diere gebore word. Honde en katte bereik volwassenheid tussen ses en nege maande. Wanneer teefhonde op hitte kom, swel hul vagina en kry hulle vir twee tot drie weke ’n bloederige afskeiding. Tewe wat nie gesteriliseer is nie, skei feromone af wat reuns tot 5km ver kan waarneem en agter…

In my klein tuin kan ek aan elke plant aandag gee en sien hoe dit groei. Dit gee my soveel plesier. Selfs onkruid uittrek is vir my lekker! – Arina  Hoe dan nou anders – sy is immers ’n grafiese kunstenaar! Haar 6 x 6m-tuin bestaan uit ’n sirkelvormige grasperk met ’n kleurvolle bedding rondom. In dié bedding groei ’n interessante verskeidenheid plante wat feitlik regdeur die jaar kleur verskaf. En omdat sy daarvan hou om self in haar tuin te werk, het sy die bedding so beplan dat sy steeds elke seisoen nuwe saailinge kan plant – al is dit hoe klein. In Arina Vermeulen se voortuin op Franschhoek is dit kleur, plantkombinasies, interessante vorms en teksture wat tel. “My vorige tuin was groot en ek kon koop…

V: Ek het in Desember tien ‘Tawny Profusion’-struike gekoop en is regtig in my skik met hul vertoning. Ek het gehoor dat ek die dooie blomknoppe moet aanlos, maar wil liewer hê dit moet in oorvloed blom! Wanneer jou rose minder water kry weens waterbeperkings, moet jy maar die blomknoppe aanlos sodat daar soveel blare moontlik op die struik bly. Gelukkig sal ‘Tawny Profusion’ net aanhou blom, of jy dooie blomknoppe afbreek of nie. As die blomblare afval of hul kleur verflou, sny die blom en boonste twee blare af. V: My geurige ‘Bella di Todi’-roos het ’n verstommende aantal perfekte blomme gedra, maar ons het skielik ’n probleem ontwikkel met kewers – hulle het binne ’n week die blomme afgemaai! Tog het hulle my ander geurige rose (‘Double Delight’,…

TORTILLAS MET VARK EN BOONTJIES Genoeg vir 4 • Bereidingstyd: 20 minute Gaarmaaktyd: 10 minute • 15 ml olie• 500 g vark-roerbraairepies• 1 bossie sprietuie, gekap• 1 knoffelhuisie, gekap• 30 ml sesamsaad• 1 blik rooi nierbone, gedreineer• ½ komkommer, geskil en gekap• 200g kersietamaties, gekap• ’n hand vol vars koljander• 4–6 tortillas, gerooster• sriracha-rissiesous en mayonnaise vir voorsit 1 Verhit die olie in ’n pan, voeg die vark by en braai vir ’n paar minute tot dit begin verkleur. Voeg die sprietuie en knoffel by en braai nog ’n paar minute. Sprinkel die sesamsaad oor, voeg sout en peper na smaak by en braai tot goudbruin. Pasop dat jy nie die vleis te lank braai nie; dit sal taai raak. Voeg die boontjies by en laat deurwarm raak. Verwyder van…

Rede vir ’n fees J.C. Le Roux se nuwe, droër Vibrazio-reeks vonkelwyne sluit ’n droë Sauvignon Blanc, ’n semi-droë Demi-Sec en ’n Demi-Sec Rosé in, (landwyd beskikbaar teen R76 per bottel). Probeer gerus dié vonkelwyne in ’n verskeidenheid mengeldrankies of saam met vrugte in stoute yslollies. Besoek jcleroux.co.za  vir nog inligting. Tonne geur Simply Garlic is ’n plaaslike onderneming van Pretoria. Hul gefermenteerde swart knoffel (R24,50, simplygarlic.co.za ) gee ’n heerlike soet-sout geur wat heelwat matiger is as rou knoffel – én dit gee jou nie daai draakasem nie. Lekker! KOFFIE SONDER SORGE Vida e caffè se Constellation of Coffees-reeks koffiekapsules (vanaf R79 vir ’n pak van 10) is ten volle herwinbaar – die firma Trufflex verwerk dit tot nagemaakte houtprodukte. Neem eenvoudig jou leë…

My ma was streng met woorde. Ek het altyd die idee gehad sy kan hulle fisiek sien. Hul onstigtelikheidspotensiaal van ’n myl af inskat om betyds die skansmure op te werp. Reg rondom die huis, het ek my verbeel, was daar onsigbare bordjies op die ogiesdraadheining: Verboten. Net sy en die nare woorde kon dit lees. Die voorhekkie, een van daardie soort wat ’n mens destyds by die koöperasie gekoop het, het ’n spesiale skree aan sy skarniere gehad. In my kinderlike wysheid het ek geglo dis een van Ma se waarskuwingsirenes. Want my ma was immer paraat. Selfs wanneer sy rustig gelyk het – in haar koel werkkamer met haar naaldwerkraam opgestel, tientalle kleure gare rondom haar uitgepak. Soos ’n ou Rembrandt-prent het sy dan gelyk terwyl haar naald…

OP DIE KASSIE Hondehuis, ’n werklikheidsprogram vir diereliefhebbers, begin op 1 Maart op VIA (DStv-kanaal 147). Carmen Bekker wéét wat honde wil hê. In dié program besoek sy diereskuilings en kies dan die perfekte pasmaat vir gesinne wat ’n hondekind soek. Skakel elke Donderdag om 17:30 in vir nuwe episodes (heruitsendings Saterdae om 16:00). Hobby-X Jo’burg 1–4: Ticketpro Dome, Johannesburg Hobby–X bied ’n platform vir almal wat ’n passie vir kunsvlyt het en op soek is na vars idees en nuwe produkte. Hier kan besoekers inspirasie put uit verskeie uitstallings, demonstrasies, aktiwiteite en slypskole. Skakel 011 478 3686 of besoek hobby-x.co.za. Decorex Durban 21–25: Durban-uitstalsentrum Decorex se tema “Rhythm of Life” plaas die kollig op die grootste trends vir 2018 met uitstallings soos die Decorex Trend Haus en Kitchen Trends…

# 1 GROEN EN KALM Catherine Crawford het haar huis in Kaapstad gekoop nadat sy haar hart op die pragtige binnehof verloor het. Die vorige eienaars het reeds ’n klimop teen die meeste van die donkergrys mure opgelei en het ’n pragtige prieel geskep deur ’n ornamentele druif oor ’n raamwerk van dryfhout te laat rank. Kunsgras vra min moeite, en dra by tot die weelderige gevoel. # 2 AL FRESCO- ELEGANSIE Dié ruimte in Allison Graham en Samantha Robinson se huis in Melville was voorheen ’n onooglike ruimte met baksteenplaveisel waar hulle wasgoed opgehang het. Die paartjie onthaal graag en het besluit om dit in ’n intieme buite-eetarea perfek vir lang, luilekker middagetes te omskep. Hulle het ’n Franse tema gekies en ’n afdak in die Provensaalse styl laat…

Wat jy nodig het INKOPIELYS • 25 kg “readymix”- betonmengsel • 1,5 m x 35 mmgordynstok • verf (ons het O’Grady’s Chalk Craft Paint in die kleur Misty Grey gebruik) GEREEDSKAP • maatband • potlood • bankskroef • figuursaag • 20-liter-emmer • latekshandskoene • staalliniaal • waterpas PROJEKGIDS Harde werk 1/10 Vaardigheidsvlak 2/10 Tyd nodig 2 uur (plus 48 uur droogtyd) Doen dit self vir ±R314: betonmengsel R55; gordynstok R92; verf R167 SO MAAK JY 1 Vir die pote, meet drie lengtes van 500mm op die gordynstok. Skroef die stok in die bankskroef vas en saag die lengtes met die figuursaag. Wenk Draai ’n lang skroef haaks deur een punt van elke poot om seker die maak dit kan nie later lostrek uit die beton nie. 2 Vul die emmer…

Lastige plaag Schalk Burger van Klein-Brakrivier skryf Ek het baie las van rooispinnekop. Ons boontjieranke is skaars 1,5 m hoog, dan is dit oortrek met die pes. Waar oorwinter hulle en waarmee kan ek spuit sodat die boontjies nog veilig is om te eet? JJ antwoord Rooispinnekop bly onder die blare van die plante en ook op die grond onder die plante. Sodra dit warm en droog is, floreer en vermenigvuldig hulle geweldig. Dis baie moeilik om daarteen te behandel terwyl die boontjies ryp word. Op jonger plante kan jy Milbeknock spuit; en wanneer die boontjies begin dra, kan jy die hele plant gereeld goed natspuit met water – dit behoort ook die infestasie te strem. Doen dit liefs soggens sodat die blare deur die dag kan uitdroog. Kosbare…

Gee jou vel die liefde en aandag wat dit verdien met die revolusionêre SBR Repair en SBR Lipocream uit die Adcock Ingram-reeks. Dié produkte is medies ontwerp om die beskermingsfunksies van ’n vel wat droogheid ondervind, in drie stadiums te help herstel: • Dit verminder waterverdamping deur die vel; • Dit vervang verlore lipiede in die vel se sigbare buitelaag; • Dit dring deur tot die epidermis om verlore lipiede vir so lank as 24 uur te vervang. SBR Lipocream help om droë vel te behandel, en versterk en herstel die vel se beskermingsfunksies deur twee fisiologiese vellipiede te vervang. Die spesiale samestelling van SBR Repair herstel die vel se beskermlaag, en werk om hersteltyd te verkort deur versperringslipiede identies aan die vel s’n na die epidermis te vervoer, waar…

Wat is nou mooier as ’n malva in ’n pot of ’n hangmandjie, met helderkleurige blomme wat oor die rand tuimel? En danksy die groot verskeidenheid kleure en groeiwyses om van te kies, is daar een vir elke pot en tuin! Malvas, oftewel Pelargoniums, is inheems, het min water nodig wanneer hulle eers gevestig is en is maklik om self te kweek. Boonop is ons pelargoniums die oorsprong van die ornamentele gehibridiseerde malva wat vandag oor die aardbol heen gekweek en geplant word. Van die sowat 270 spesies pelargoniums wêreldwyd kom meer as 200 natuurlik in Suider-Afrika voor – die meeste in die suidelike deel van die land, tussen Nieuwoudtville in die weste en Port-Elizabeth in die ooste. Deur die jare is malvas oor en weer gekruis om die wye…