Innholdsfortegnelse for Januarie 2016 i Rooi Rose

EN HIER IS DIT nou al weer “volgende jaar”! Ek hoor myself al maande lank sinne begin of eindig met daardie frase. Die vorige nuwe jaar voel soos gister, en hier meld die volgende een al aan. ’n Bekende gedig van D.J. Opperman klink in my gedagtes op: “My dae verdwyn in stiltes soos kwartels in lang gras.” Die konteks is nie so meer vars in my geheue nie, maar die frase som my lewe op. (Dalk tog met minder stiltes as wat ek sou wou.) Tussen elke Nuwejaarsdag net 365 dae, en elkeen van hulle ’n “vandag”. Elkeen met ’n sonsopkoms en ’n sonsondergang ... Wat het ek met elkeen gedoen? Dit klink soos ’n cliché om te sê ons moet die beste gebruik maak van elke dag, maar…

KOEKIES VIR MY KLEINSEUN As ek nie op rooi rose ingeteken het en die tydskrif nie gereeld met geesdrif lees nie, sou ek nooit verlede jaar se Teetydtreffer-wedstryd raakgesien het nie. Toe daardie wedstryd afskop en daar is elke maand ’n lekker resep en nuttige pryse op die spel, kom my kleinseun, ’n sjef, eendag by my met ’n resep vir Toskaanse koekies en sê ek moet die resep inskryf. “Ouma sál wen, ek weet dit,” was sy woorde. Ek stuur toe maar daardie resep in en vergeet weer skoon daarvan. Kort daarna, in Julie 2014, is my kleinseun in ’n ernstige motorongeluk oorlede. En in Maart 2015 is die Toskaanse koekieresep toe die wenresep van die maand. En die eienaar van die resep het nie die voorreg gehad om…

Reis Het die reisgogga jou al gebyt? Maak 2016 jou jaar van reis. Ons gee ernstige reisigers se beste reiswenke wat jy deel van jou beplanning kan maak. WEN Wyn vir ’n gesonde LEEFSTYL Wen een van 15 Four Cousins Skinny-geskenkpakke van sowat R500 elk. Gee jou mening en WEN Maak jy lysies met Nuwejaarsvoornemens? Indien wel, wat is joune vir 2016? Gee jou mening en jy kan ’n Canon PowerShot SX410-kamera ter waarde van R2 499 wen. Ons wou weet WAT IS JOU SLEGSTE GEWOONTE? EK EET GEREELD GEMORSKOS 29% EK KOU MY NAELS 26% EK ROOK 23% EK KNERS OP MY TANDE 23% • GEBRUIK JY ELKE DAG SONSKERM? NEE 55% JA 34% SLEGS IN DIE SOMER 12% • HET JY VERSKILLENDE SOORTE PARFUUM VIR DAG EN AAND,…

“Ek het in Augustus vanjaar 37 geword. In ’n mens se twintigs stoei jy met dit wat jy nié is nie. Ek neem heeltyd waar en wonder baie oor ander mense se lewe, kan nogals gefassineerd raak met dinge wat buite my staan en kan sekere aspekte van ander se lewe beny. Dit bly ’n daaglikse keuse om vergenoegd en dankbaar te leef. As ek kyk na briewe wat ek in my vroeë dertigs geskryf het, dink ek stilweg by myself, jô, jy klink nogal wys; jy het baie gehad om te sê en daar is ’n rykheid. Deesdae voel dit soms of ek niks weet nie. Die lewe maak dinge met ’n mens. Maar wat ek wel weet, is dat ’n mens soms vir vrede moet veg en eindeloos…

• Kate is op 5 Oktober 1975 in Reading, Engeland gebore. Sy het twee susters en ’n broer. • Kate het in 2012 ’n CBE van koningin Elizabeth ontvang. • ‘Titanic’ het die meeste geld tot nog toe by die loket verdien - byna drie miljard dollar. Kate is in 2014 weer getroud. Ned Rocknroll, haar derde man (gebore Abel Smith) is ’n neef van die miljardêr Richard Branson. Sy het drie kinders, een uit elke huwelik: Mia Honey Threapleton, Joe Alfie Winslet Mendes en Bear Blaze Winslet. Sy het ’n Oscar, Emmy, drie Golden Globes en ’n Grammy gewen. Gwyneth Paltrow en Claire Danes het die hoofrol in Titanic geweier. Kate en haar agent het regisseur James Cameron oortuig dat sy, ’n onbekende aktrise, ’n oudisie bywoon. Die res is geskiedenis.…

uid-Afrikaners weet wie Derick Hougaard is. Ons onthou nog hoe daardie aantreklike 19-jarige losskakel van die Bulle en sy skopskoen die punte opgestapel en opslae gemaak het. Later was hy die speler vir wie sestigduisend mense Gé Korsten se “Liefling” op Loftus gesing het. Die oud-Springbok het intussen ouer geword, en die afgelope klompie jare was hy gereeld in die nuus. Dié keer nie oor sy rugbyvaardighede nie, maar oor die besering wat die einde van sy rugbyloopbaan beteken het, sy huwelik met die sangeres Karlien van Jaarsveld, hul tweeling, Daniël en Eliah, en toe die aankondiging dat die glanspaartjie se paaie ná sowat twee en ’n half jaar gaan skei. “Gé se ‘Liefling’ eggo nou nog in my ore,” sê Derick. Veral die woorde ‘Kan ons nie maar vergeet…

Ná ’n afwesigheid van vyf jaar gaan Jana Cilliers ons weer wys hoekom sy in haar loopbaan al sowat twintig keer as beste aktrise aangewys is. Wanneer die nuwe kykNET-dramareeks van 13 episodes, Die Boekklub, op 16 Januarie afskop, sal ons week na week die lief en leed van ’n boekklub op ’n stil Karoodorp kan beleef. Die reeks is op Merweville in die Karoo gemaak en Armand Aucamp van Ballade vir ’n Enkeling-faam en June van Merch speel onder meer daarin. Jana skop haar jaar so tussen die boeke af, want sy lewer in Maart by die Woordfees op Stellenbosch ’n bydrae oor Petra Müller onder leiding van Juanita Swanepoel. “Ek bly lief vir die woord en veral vir die digkuns. En Petra Müller is net een van daardie…

urgen Marx-Badenhorst (38) het hope talent – en byna net soveel chutzpah. Dis laasgenoemde karaktertrek, raai ek, wat die DA laat instem het om ’n onbekende fotograaf toe te laat om hul leier, Mmusi Maimane, landswyd te vergesel om sy lewe en loopbaan op film vas te lê. Die resultaat was iets wat Suid-Afrikaners nie aldag sien nie: intieme, eerlike foto’s van ’n politikus wat nie vir die kamera speel nie, maar bloot sy werk doen. “Alles het begin toe ek na die Demokratiese Alliansie se facebook-blad gaan kyk het en gedink het ek kan deur die regte foto’s vir hulle die mag van die media in hul hande gee. Ek het ’n voorlegging aan hulle gaan doen met net twee goeie foto’s, en die besluitnemers oortuig om my toe…

Skryf nou in of hernu jou inskrywing vir 12 maande en jy kry 35% afslag, maar teken jy nou vir 24 maande in, kry ’n volle 50% afslag. Boonop kan jy een van 30 lesers wees wat ’n NIVEA-geskenkpak van R853 wen Nou kan jy ook vir 6 maande inteken teen slegs R125, of R250 vir 12 maande. Wat is nou beter as om aan die einde van ’n lang dag ’n heerlike stortbad te neem met nuwe NIVEA Irresistibly Smooth Shower Cream en dan in satynsagte slaapklere in te glip? NIVEA Irresistibly Smooth Shower Cream is verryk met galambotter, wat bekend is vir sy voedende eienskappe. NIVEA Irresistibly Smooth Shower Cream het ’n romerige tekstuur en ruik lekker sodat jy ’n alomvattende en lieflike sensoriese ervaring kan hê. Bederf,…

1 HELDER Sterk primêre kleure is terug! Op die loopplank is die helder kleure van kop tot toon gedra, maar soos altyd kan jy enige neiging aanpas om jou te pas. Kies een item soos ’n geel of groen moulose jas in sagte linne en dra dit by ’n liggrys denim of wit broek. Of beperk die helder kleure tot bykomstighede. Habits se nuwe Somer/Lente-reeks in helder kleure en sagte linne is gemaklik, prettig, elegant en perfek vir die somer. 2 SYserpe Links: Gucci se Somer/Lente 2015-reeks vier die jare sewentig. Sagte serpe is om die nek geknoop om by die modes van die jare sewentig aan te sluit. Middel: Eksotiese kleure en aanskoulike motiewe is by Just Cavalli se Somer/Lente 2015-reeks gesien. Die reeks is deur die oseaan geïnspireer…

Die beginpunt Op watter dag het jou laaste menstruasie begin? Dit is Dag 1 van jou hormonoskoop. Die patroon vir ’n 28-dag siklus: Pas die kassies op die infogram net so in op jou kalender. Die patroon vir ’n langer of korter siklus: Die laaste 14 dae is vir almal dieselfde, maak nie saak hoe lank of hoe kort jou siklus is nie. Neem as Dag 1 jou eerste dag van menstruasie. Hou jou gemoed fyn dop. Sodra jou gemoed lig, is jy op Dag 4 van die gewone 28-dag kalender. Jou halfvol en hoofletterweke duur dan tot 14 dae voor jou volgende verwagte eerste dag van menstruasie. Byvoorbeeld: as jou siklus 45 dae lank is, kan jou halfvol en hoofletterweke oor 31 dae strek. As jou siklus 25 dae…

Elke selfdood-risikogeval is kompleks met ’n eie dinamiek en individualiteit wat dikwels moeilik verklaarbaar is. Die volgende faktore verhoog die risiko, veral as daar meerdere risikofaktore teenwoordig is. • ’n Familiegeskiedenis of teenwoordigheid van depressie, angs, stres en psigiatriese toestande, en as iemand in die familie reeds selfdood toegepas het. • Vorige selfdoodpogings. • Blootstelling aan ander wat selfdood toegepas het, ook via die media. • Onlangse ervarings van verlies of trauma. • ’n Geskiedenis van trauma, misbruik, mishandeling of huislike probleme. • Die kind sukkel om die eise van sy lewe te hanteer. • Skolastiese/opvoedkundige probleme. • Vrees vir mislukking en/of prestasiedruk: hoë eise wat hulle aan hulself stel, of ervaar ander aan hulle stel. • Sosiale en verhoudingsprobleme, gevoelens van verwerping, sosiale isolasie en alleenheid. Die sosiale media verhoog soms gevoelens van isolasie: Ek het al die…

Charlotte Pretorius Passief-aggresief? Nee wat, ek is ’n rustige mens wat my nie veel oor dinge ontstel nie. Veral met die jare saam en die wysheid wat daarmee gepaardgaan, ontstel ek my nie meer enigsins oor alles nie. Marinel Bouwer Ja, ek doen dit soms selfs. Ek probeer aan my geduld werk en konsentreer baie daarop. Johanien White Ek hanteer dit met ’n glimlag, want almal het negatiewe punte en daar is niks verkeerd daarmee nie.…

In haar boek The First 30 Days skryf Ariane de Bonvoisin dat daar bewese maniere is om enigiemand deur verandering te help. Of dit nou egskeiding, ’n nuwe werk, ’n stryd teen siekte of ’n nuwe baba is, of iets soos om gewig te verloor of op te hou rook. Wat ook al jóú uitdaging, De Bonvoisin meen die eerste dertig dae is die belangrikste fase in enige verandering. “Die eerste paar dae en weke is dikwels die moeilikste, mees emosionele tyd. Dis wanneer ons die meeste vrae, emosies, vertwyfelings en vrese het, en wanneer ons sekere besluite moet neem. Dis ook die tyd waarin ons die meeste rigting, inligting en ondersteuning nodig het.” De Bonvoisin meen suksesvolle verandering is moontlik as ons nege beginsels volg. 1 Ontwikkel ’n positiewe…

GIER VAN DIE MAAND So ’n bek moet JÊM KRY! Konfytkook is weer in! Jy hoef buitendien nie boepensmandjies vol vrugte te hê om jou eie konfyt te kan kook en bottel nie. Dis ewe bevredigend om van daardie blink botteltjies konfyt as geskenk te gee, veral wanneer jy dit ekstra spesiaal laat lyk in Consol se jongste verskeidenheid inmaakflesse. Die mooi, hittebestande bottels met die glasdeksels is in 12 verskillende vorms en groottes by Consol-winkels in Stellenbosch en Woodmead te koop. Bel 011 874 0000 of kyk by www.consol.co.za BOEK VAN DIE MAAND SMULKOS vir elke dag Sunday Times Food Weekly se vierde Hilary Billerkookboek is propvol lekker resepte vir die somer. Ons hou veral van die stokvis met ’n krakerige klapperkors en die geroosterde eiervrugkaaskoek (R179 by…

Optelgoed is mooi goed Met ’n kop vir besigheid en ’n passie vir herwinning tower Lise Kuhle (36) praktiese en pragtige produkte uit die dinge wat ons weggooi. Danksy dié toewyding en kreatiwiteit het sy in 2012 die Suid-Afrikaanse Plastiekherwinningsorganisasie (Sapro) se Herwonne Produkkompetisieprys gewen met die geiserkombers wat sy uit herwonne aartappelskyfiepakkies en buitelugadvertensieborde maak. Sy is ook in 2013 aangewys as een van die Mail & Guardian se top 200 Jong Suid-Afrikaners. Sy het haar onderneming, Eco Smart Group, in 2010 gestig en vervaardig 18 kommersiële produkte vir meer as dertig kleinhandelaars, sowel as unieke items vir maatskappye. Sy is doelgerig om oplossings te kry om dinge slimmer en doeltreffender te doen, maar die produkte moet ook mooi wees. “Dis ’n wen-wen-situasie vir werkverskaffing, die omgewing en die…

OFFERLAM – Chanette Paul (Lapa) Verwerp deur haar man en skoonfamilie, asook deur haar eie familie, het Caz Colijn gesukkel om haar uitsonderlike dogter groot te kry. Maar nou is Lilah ’n suksesvolle, internasionale model en Caz kan uiteindelik haar lewe lei soos sy wil: in afsondering op haar eie lappie Afrika in die Overberg. ’n Oproep van haar vervreemde suster Tieneke draai Caz se rustige lewe op sy kop. Josefien Colijn, Caz se aanneemma, is op sterwe. As Caz wil weet wie haar biologiese ouers is, moet sy by Josefien uitkom. Caz gaan Gent toe. ’n Tonnel na die verlede gaan oop: na haar moeilike jeug onder Josefien; na haar kortstondige huwelik; na die nag waarop Lilah gebore is. Aanvanklik is Caz onbewus van die mense wat elke bewe-…

MIS VOOR DIE SON – LIZANNE BARNARD. DIE BEGAAFDE MUSIKANT WAS TE LANK VAN DIE TONEEL AF. SY WAS DIE EERSTE KUNSTENAAR WAT VAN INGRID JONKER SE WERKE GETOONSET HET. DIT BLY TOT VANDAG TOE DIE TOUCHSTONE VAN TOONSETTINGS. MIS VOOR DIE SON SIT HAAR FASSINASIE MET JONKER VOORT. MELODIEUS EN DEURWEEK MET PASSIE EN MUSIKALITEIT. QUIET HIGHTS – KAREN SOUZA EEN VAN DIÉ ONTDEKKINGS VAN DIE JAAR! AS JY ’N NORAH JONES-AANHANGER IS, IS SOUZA JOU KOS. HAAR WEERGAWE VAN RADIOHEAD SE “CREEP” IS ASEMROWEND. HAAR STEM KLINK SOOS ROOK EN DONKER SJOKOLADE, EFFENS HESERIG EN TROOSTEND. HAAR JAZZY, VOORKAMER-INTERPRETASIES VAN LIEDJIES SOOS “BILLY JEAN” IS SENSASIONEEL. 20TH YEAR ANNIVERSARY DE LUXE – GARBAGE. DIS NOU ’N GELEENTHEID VIR ALMAL WAT NIE DIÉ…

Die drie lesers wat hul menings met ons gedeel het, wen ’n Carraro-beursie van R1 500. Waar was jou lekkerste vakansie tot nog toe? Hannelie Roets (40), superintendent menslike hulpbronne, Witbank. My vakansie ná die matriekeindeksamen in 1993. Ek het ’n wonderlike ou op ’n staptoer ontmoet en is saam met hom en sy ouers Stilbaai toe. Ek was smoorverlief en dit was somer, son, see en liefde. Daardie Desembervakansie was onvergeetlik - selfs 22 jaar later! Lindie Steenkamp (42), tuisbesigheid, Jameson-park. Ek en my man was ’n paar jaar terug bevoorreg om die wonderlikste vakansie by die Pinewood Village Beach Resort in Kenia te kon hê. Ons het op een van die mooiste strande met die skoonste water gebly. Ons het ook ons eie sjef gehad wat elke dag…

Die natuur se goue gawe Vloeibare goud Heuning en bye is groot nuus! Dié wondermiddel van die natuur kry jy nou al meer in kos en skoonheidsprodukte, en selfs die dekorbedryf speel met die heksagonvorms van ’n heuningkoek Deur VICKIE DE BEER Skoonheidsprodukte BYEBOERWA Klim op die wa en hou jou eie bye (en heuning) aan. Al die toerusting wat jy nodig het om met bye te boer is verkrygbaar in Suid-Afrika. Kyk by www.capehoneyfactory.co.za vir meer inligting oor korwe, klere en boeke oor hoe om ’n byeboer te word. Of kyk by www.highveldhoney.co.za of www.beeware.co.za vir toerusting in die noorde. Onthou, aktiewe byekorwe moet minstens 400 m van woonhuise en plekke waar diere aangehou word, geplaas word. BYFEITE • Net in die Wes-Kaap kry jy 22 soorte heuning. •…

Steve Jobs was ’n moeilike man. Hoekom dink jy het Joanna Hoffman, jou karakter, so lank by Apple gebly? Ek het in vele gesprekke met die regte Joanna Hoffman agtergekom hulle was goeie vriende en dat sy baie respek vir hom gehad het. Ek dink sy het by Apple gebly omdat sy geweet het hy het haar nodig, en sy kon dinge in hom uitbring wat niemand anders kon nie. Sy het as ’n filter gedien, maar sy het ook baie van haar werk gehou. In die fliek is sy jare lank in Steve se lewe, maar in werklikheid het sy net vyf jaar vir hom gewerk. Sy is ’n lojale vrou met sterk waardes. Michael Fassbender het gesê jy het hom ’n bietjie geïntimideer toe jy met jou aksent…

Onthou jy die tyd toe sangers soos Laurika Rauch, Jannie du Toit en Clarabelle van Niekerk ons met die Afrikaanse luisterliedjiebeweging bekoor het? Dink mooi voor jy ja sê - jy gee dalk jou ouderdom weg! Clarabelle het destyds twee albums, Roep die engele en Ek sê maar net, uitgereik. Toe verdwyn sy van die plaaslike musiektoneel. Nou is sy terug met Stories, haar eerste album in 24 jaar. En al woon sy sedert 1986 in Amerika is die liedjies almal in Afrikaans. “Afrikaans is die punt van my hart. Suid-Afrika is inderdaad waar ek op my gelukkigste is, tussen my mense wat my lag en my ‘mal’ verstaan. Boeregasvryheid bestaan nie hier in Amerika nie. Die mense nooi mekaar nie oor vir koffie of tee met ’n bord tuisgemaakte…

SAM COWEN ‘DAAR IS NIE BEPERKINGE NIE’ Die meeste mense ken Sam as die bekkige radioomroeper wat 16 jaar lank medeaanbieder op 947 Highveld Stereo se Breakfast Xpress was, en deesdae saam met Africa Melane die Weekend Radio Show op 702 aanbied. Nou is sy ook bekend as een van die sowat vyfhonderd mense wat al die Robbeneiland-swemuitdaging aangedurf het. Hierdie bibbertog van 7,5 km strek van Robbeneiland tot op Bloubergstrand. Buiten Sam se stryd met water-temperature wat tot net 9› C gedaal het – die koudste wat tot nog toe vir ’n nuwe swemmer aangeteken is – is daar haaie, jellievisse en sterk strome. En sy het die 7,5 km in net meer as drie uur in Januarie 2014 voltooi. ’n Prestasie vir enige sportvrou, maar iets buitengewoons vir…

Jana Cilliers was deel van die ontkieming van die plaaslike televisiebedryf en ons het haar leer ken in dramas soos Dokter Dokter, Salome, Arende en die begindae van die sepie Egoli. Sy het haar eerste Artes in 1977 ontvang. Van die hoogtepunte in haar rolprentloopbaan was ’n Plekkie in die Son saam met haar eerste man, Regardt van den Bergh, A Quest for Love saam met Sandra Prinsloo en A Private Life (vir die BBC) en Watercolours. In laasgenoemde twee het sy saam met haar ontslape man, Bill Flynn, gespeel. Haar teaterloopbaan sluit in rolle in Frankie and Johnnie in The Clair De Lune saam met Bill Flynn, Dance of Death saam met John Kani, In Praise of Love saam met Rex Garner en Antony and Cleopatra saam met Sean…

Jurgen is ’n toegewyde gesinsman , en pa van Matteo (6), Zoë (4) en Phoebe (2). “Hulle is my hele wêreld, en hou my op my tone!” En moenie dink hierdie fotograafpa het nie mooi foto’s van sy gesin nie. “Ek sorg dat ons elke jaar behoorlike portrette neem sodat hulle ook eendag genoeg foto’s van hul kinderjare het.” • Hy en sy vrou, Raschika, het mekaar in die kerk ontmoet toe hulle albei betrokke was by hul gemeente se oudiovisuele span . Hulle werk steeds graag saam. Wat bewonder hy van haar? “Ons vul mekaar aan, en ek kry die kans om die dinge te doen waaroor ek mal is saam met die mens vir wie ek die liefste is. Ons baklei selde, maar as ons doen, is dit…

Niks is ooit toevallig nie – veral nie in die sakewêreld nie. Dis nie toeval dat ’n spesifieke kleur skielik hoogmode is, of dat sekere kos (of boustyle/musiek/rolprente/motors) op ’n dag vuurwarm nuus is nie. Kenners noem dit tendense, of neigings. Die amptelike definisie van die woord “tendens” is “die rigting waarin iets beweeg” en daar is kenners wat hierdie bewegings deeglik dophou. Dis belangrik vir maatskappye om vooruit te weet wat hul mark se behoeftes gaan wees as dit by nuwe produkte, dienste of tegnologie kom sodat hulle dit betyds kan ontwikkel. Tendenskenners (of trend watchers) help om maatskappye én verbruikers op die hoogte te hou van alles wat hip, hot en happening in die wêreld is. Dion Chang van Fluxtrends, ’n bekende internasionale tendenskenner en joernalis (eens moderedakteur…

Skitter, moenie skaam wees nie, is die leuse van Dior Addict Lipstick. Die lipstiffie is herformuleer om meer glansend en bevogtigend te wees VEILIG, natuurlik sonbruin Jy hoef nou nie meer tussen kleur en beskerming te kies nie, want VICHY IDÉAL SOLEIL BRONZE SPF 50+ (R295) bied hoë sonbeskerming en danksy die spesiale tegnologie en bestanddele kan jy steeds sonbruin word. En nee, dit het nie selfverbruiningsprodukte in nie. Die room het ’n ligte tekstuur en die sproeibotteltjies maak aanwending maklik. Veerlig As jy nie hou van die gevoel van onderlaag op jou vel nie, sal jy gaande wees oor SMASHBOX BB WATER (R490). Die room voel so lekker lig, gee ligte dekking (jy kan meer aansmeer vir meer dekking) en het ook ’n SBF van 30. Die room bevogtig…

Amanda, ’n werkende ma van twee, het gevoel sy het ’n nuwe voorkoms nodig en “wou weer mooi voel”. Amanda trek korporatiewe klere aan werk toe en ons het vir haar ’n netjiese kerkuitrusting saamgestel. Sy voel selfbewus oor haar boarms en die wit bloes met omkapmoue van COUNTRY ROAD (R999, WOOLWORTHS) is modern en die moue val vleiend oor haar boarms. Sy is kort en fyn gebou, daarom kies ons vir haar ’n patroonbroek van STUDIO W (R499, WOOLWORTHS) wat haar bene langer laat lyk. (Wenk: Regaf broeke skep die illusie van langer bene.) Ons rond die voorkoms af met SWART SANDALE VAN ALDO (R899) wat ook ’n bietjie lengte gee. Amanda kan die voorkoms in ’n gemaklike naweekvoorkoms omskep. ’N NOUPYPDENIM (TRENERY, R899) is ’n beter opsie as…

WEEK 1 • Dag 1 Oftewel die eerste dag dat jy menstrueer: jou estrogeen is op sy laagste vlak, en jy voel moeg, af en dom. Jy voel nie lus vir kuier en gesels nie. Daar is darem goeie nuus ook: jou estrogeen begin nou klim. • Dag 4-7 Jy behoort teen hierdie tyd ’n duidelike opswaai te sien in jou energievlak, bui en breinvermoëns soos konsentrasie, geheue en vlot redenasie en spraak. Jy voel weer sosiaal en is lus vir uitgaan, kuier, gesels en inkopies doen. Jy is ook nie so honger nie en dieet selfs makliker. Party sien dié opswaai al van Dag 2 af. WEEK 2 • Dag 8-14 (of tot op die dag dat jy ovuleer). Jou estrogeen styg steeds en jy raak ooreenstemmend al briljanter…

• Gevoelens van leegheid, hopeloosheid, hulpeloosheid, uitsigloosheid en skuld. • Depressiewe gemoedstoestand, hartseer of angstigheid. • Stel nie meer belang in stokperdjies of sportaktiwiteite nie. • Min energie en lusteloosheid. • Onttrek hulle aan familie en vriende. • Kan nie meer die eise hanteer wat gestel word nie. • Verandering in slaappatrone of slaapsteurnisse. • Verandering in eetpatrone: gewigsverlies of -toename. • Gedagtes aan dood of selfdood, en sê dinge soos: “Die lewe is nie meer die moeite werd nie”, of “Dit sal beter wees as ek dood is”. • Rusteloosheid, prikkelbaarheid, irritasie of woede. • Sukkel om te konsentreer, besluite te neem, geheueprobleme, kla oor verveeldheid. • Skoolwerk gaan agteruit. • Min aandag aan persoonlike netheid en versorging. • Kla oor fisieke simptome soos hoofpyn, maagpyn of naarheid sonder ’n mediese oorsaak, of wat nie op behandeling reageer nie. • Kom disgeoriënteerd voor. • Rebelse…

van passief-aggressiewe mense: • Oënskynlik is hulle vriendelik, gaaf, beheers, ordentlik en samewerkend. • Uitstel of opsetlike ondoeltreffendheid word as passiewe weiering of weerstand in die uitvoer van take gebruik. • Daar is voortdurende verskonings of misverstande vir hul optrede. • Selfbejammering en klagtes dat ander hulle nie verstaan of waardeer nie. • Straf ander met norse stilstuipe, emosionele en fisieke onttrekking. • Gereelde onredelike kritiek teen outoriteit of mense wat eise aan hulle stel. • Wrokkigheid, griewe en jaloesie teenoor ander wat moontlik gelukkiger of welvarender is. • Oordrewe klagtes en persepsie hoe ander bevoordeel en hulle benadeel word. • Moedswillige en selfs vyandige optrede en later berou daaroor.…

• Woede is sosiaal nie aanvaarbaar nie. • Versuikerde vyandige gedrag lyk meer aanvaarbaar. • Passief-aggressiewe gedrag is makliker as selfgelding. • Die persoon word moeilik betrap en uitgewys as die een wat verkeerd optree. • Die wraak is soet . Ander kry nie wat hulle wil h› nie en ek kry wat ek wil h›. • Dis makliker om nie 'n verskil of geveg te hanteer nie. • Dis 'n kragtige manier om jou eie woede deur hul reaksies van frustrasie en woede te kanaliseer, wat jou dan na die slagoûer van hul optrede laat lyk.…

Lindie Steenkamp ’n Paar jaar terug was ek pal moeg, en het begin om ’n produk vir energie te gebruik. Ek het so afhanklik geraak daarvan dat ek nie ’n dag daarsonder kon ingaan nie. Op ’n dag het ek gesê tot hiertoe en nie verder nie. Ek het om bevryding gebid. En die Here het my die krag gegee om daarvan af te sien. Nou is Hy en Hy alleen my bron van energie! Ek glo as jy regtig iets wil verander, hoe groot of hoe klein ook al, jy dit net kan doen as jy regtig wil en deur gebed! Niks is onmoontlik by God nie. Hannelie Roets Ek het begin oefen ná ek ’n lang ruk onaktief was, maar ek hou dit nog vol! Fokus, fokus, fokus…

SOETPATAT-RÖSTI MET BROS GEBRAAIDE SPEK EN GEPOSJEERDE EIERS GENOEG VIR 4 RÖSTI 250 g PnP Soetpatats, geskil en grof gerasper 2 PnP Eiers, geklits 100 g PnP Fetakaas, gekrummel 50 g PnP Botter EIERS 8 PnP Repiesspek 4 PnP Eiers 15 ml PnP Witwynasyn handjie vol jong kruieblare 1 Verhit die oond tot 180 °C. Spuit 'n bakplaat met kleefwerende sproei. 2 Pak die spekrepies op die bakplaat en bak vir 15 min. of tot goudbruin en bros. 3 Meng die soetpatats, 2 eiers en fetakaas. Geur met sout en swartpeper. 4 Verhit die botter in 'n braaipan oor matige hitte. Braai 'n eetlepel van die mengsel vir 5 min. aan elke kant of tot goudkleurig. Herhaal met die oorblywende mengsel. 5 Geposjeerde eier: Verhit water in 'n klein kastrol…

Die telefoon lui net voor agtuur die Saterdagaand drie keer kort ná mekaar in Anton de Waal se studeerkamer in Langverwagt se plaashuis veertig kilometer buite Middelvlei in die Karoo. Wie sal dit tog nou wees? dink hy geïrriteerd, terwyl hy ’n ruim porsie van Lenie, jare lange huishulp en kok op Langverwagt, se wildspastei inskep. Elke tweede Saterdagaand berei sy ’n driegangmaal en dek twee plekke aan die lang geelhouttafel. Daarmee saam gebruik sy sy ouma se damastafeldoek en -servette, silwereetgerei, Royal Doulton-eetservies en sy oupa se kristalglase. Die silwerkandelaar met vyf arms, die silwer sout-en-peper-stel en -wynstaanders wat sy oom ná die Tweede Wêreldoorlog en sy ontslag uit die lugmag uit Engeland gebring het, asook die glasvaas wat Anton as geskenk vir ’n meisie gekoop het, maar nooit…

ALTA CLOETE Alta is die skrywer van sowat vyftig gepubliseerde tydskrifverhale, twaalf romanses en sewe liefdesromans, laasgenoemde bekend as die Geur- en Seisoen - reekse. Sy skryf romans onder haar eie naam en haar romanses (wat by LAPA Uitgewers as deel van die Romanzareeks verskyn) skryf sy onder die naam Marilé Cloete. Vertel ons ’n bietjie meer van jouself? Ek is ’n plaaskind van die Roggeveld wat in die Boland gaan wortelskiet het. Hier deel ek my lewe met my eie held - ’n sagmoedige Duitse herdershond, asook twee eiesinnige gemmerkatte en ’n paar handmak voëls. Ek verlang ook na my twee seuns wat in Noorweë werk. Wat is jou temas? Ek is ’n ongeneeslike romantikus wat onwrikbaar in die liefde glo. Lees is vir my die enigste heilsame vorm…

Verreweg een van die lekkerste musiek-en-buitelug-feeste vind jaarliks by Up The Creek plaas. Dink koel rivier, mengeldrankies, somer en son! Tussen 28 – 31 Januarie is dit weer sulke tyd. Met goeie musiek, natuurlik. Vanjaar se kunstenaars sluit die besonderse folk trio Georgetown in, saam met ander geestige ouens en groot name soos Albert Frost & Robin Auld, The Ballistics, The Vanilla, Stoker, Grassy Spark, Nomadic Orchestra, Al Bairre, Southern Wild, Shortstraw, Crimson House Blues, Hatchetman, The Black Cat Bones, Bark, December Streets en die Jonathan Peyper Trio . Daar is entoesiaste wat die fees al 25 jaar bywoon. Danksy die intimiteit en gehalte van die musiek word die Up The Creek-fees beskou as een van die voorste, indien nie die beste nie, musiekfeeste in SA. Die feesverblyf is vanjaar…

Laat ons oes Die Delheim-landgoed buite Stellenbosch is gereed om op 23 en 24 Januarie met hul gewilde Begin-van-die-Oes-feesviering die 2016-oestyd in te lui. Die Sperling-familie maak hul harte en vate oop vir besoekers om hul jaarlikse “Fees van hul Vrug” by te woon wat ’n druiwetrap-kompetisie en ’n middagete by die “Oestafel” langs die rivier insluit. Die buffet-tafel het plattelandse, tuisgemaakte lekkernye uit die landgoed se kombuis. Bel Wilma by 021 888 4607 of 079 735 3257 of stuur ‘n e-pos na restaurant@delheim.com Anton en Pawpaw Die rolprent, ’n Pawpaw vir my Darling, gegrond op Jeanne Goosen se gelyknamige boek, word op 8 Januarie landwyd bekend gestel. Die Liedjieboer, Anton Goosen , het die temalied geskryf. Die storie gaan oor die Beeslaer-gesin van 24 Frik du Preez Street in…

Helend Healing Earth se gepatenteerde, doeltreffende produkte bevat kragtige ensieme wat intersellulêre kommunikasie tussen die vellae verbeter en produkte in staat stel om die vel dieper binne te dring. Die vel word opgeknap sonder dat die beskermingsfunksie van die vel geraak word. Meer inligting by www.healingearth.co.za. 2 rooi rose-lesers kan elk ’n Healing Earth-geskenkpak ter waarde van R4 100 kry. Sleutelwoord: Earth Gesonde vel Die professionele velsorgreeks Six met sy internasionale formules en ingevoerde aktiewe bestanddele word in Suid-Afrika vermeng en verpak. SIX-velsorg bied bekostigbare produkte vir die moderne vrou en belowe ’n gesonde vel. Dié teenverouderingsreeks kombineer die wetenskap met die beste uit die natuur vir ’n velsorgroetine wat op resultate fokus. Wen een van 12 SIX-vakansievelsorggeskenkpakke wat vier bekroonde produkte bevat: Broad Spectrum SPF 50, 02 Serum, Brightening…

Ek pak nooit direk uit my kas in my koffer nie. Wat ek wil saamneem, word eers stuk-vir-stuk op die bed uitgepak, elke kledingstuk op sy bestemde hopie: onderklere, nagklere, broeke, hemde, T-hemde, rokke, truie, baadjies - elke kategorie het sy eie plekkie. Daar is voorspelbare hopies wat met alle reise min of meer dieselfde is, maar daar is ook hopies wat varieer na gelang van okkasie of seisoen. Behalwe die hopies op die bed, is daar stapeltjies op die vloer, want ’n dubbelbed is nie groter as ’n dubbelbed nie. Die vloer word verdeel: toiletbenodigdhede; grimering en -spieël; medisyne en vita-mine; elektronika en bypassende batterylaaiers; boeke en aantekeninge; skoene en skoene en skoene; haardroër, -tang, kam en borsel; skeermessie en epileerder; reisdokumente; son-, lees- en sonleesbrille; juwele; hande-, lyf-,…

Die skrywer van vandeesmaand se wenbrief ontvang ’n Engelsrufer Angel Whispererhangertjie van R5 000. Die pragtige mandjie-hangertjies van 925-sterlingsilwer is met rodium oorgeblaas. Handgemaak met sorg. Pryse begin by R1 299. Stuur ’n e-pos na engelsrufer@tregerbrands.co.za vir ’n handelaar na aan jou. Volg Engelsrufer Suid-Afrika op facebook. LIEFDADIGHEID BEGIN TUIS My huishulp, Maria, is bekommerd. Haar man, Johannes, word in die Steve Biko-hospitaal geopereer maar hoe gaan sy hom ná die operasie by die huis kry? Hy sal nie twee taxi’s kan neem en nog ’n ent tot by hul huis in Mamelodi kan stap nie. Ek dink aan my eie operasie vroeër vanjaar. Geen vervoerprobleme nie. Tuis is daar ’n sagte bed en koppies tee om my beter te laat voel. Laatmiddag gaan laai ons Johannes weer by die…

Op pad na Erica Wessels sê ’n kennis wat haar al ontmoet het: “Sy is ’n lieflike kind, die soort mens wat ek graag beter sou wou leer ken.” Haar man wat op die agtergrond doenig is, lig summier sy ore op. “Ja, ek hou haar ook al lankal as aktrise dop. Het jy opgelet wat ’n mooi gul mond sy het?” Dis met nie veel meer as hierdie inligting tot my beskikking nie wat ek een weekmiddag voor die huisie met die digte Victoriaanse kantwerk in ’n klein, verslete straatjie in Woodstock stilhou. ’n Man leun teen sy motor oorkant die straat. Toe hy sien dat ek onseker rondkyk, stap hy nader. “Ja, dit ís Erica se huis daai.” Sy kom rietslank uitgestap, haar hare blond gekleur vir ’n…

Kate Winslet speel nooit voorspelbare karakters nie; haar rolle is altyd uitdagend en inspirerend. Dis moeilik om ’n etiket om haar nek te hang. Sy speel altyd sterk vroulike karakters in verwikkelde situasies, en sy lyk formidabel op skerm. In die werklike lewe is sy vrolik en ontspanne, maar ’n raakvatter. Ons ontmoet mekaar in die Mandarin Oriental-hotel in New York om oor haar rol in Steve Jobs te gesels. Sy speel die rol van Joanna Hoffman, bemarkingshoof van Apple, en een van die min mense wat haar man kon staan teen Steve Jobs, die stigter van Apple. Jobs was ’n moeilike man en sy visie was so groot dat dit normale interaksie met mense byna onmoontlik gemaak het. Michael Fassbender speel die rol van Jobs. Steve Jobs begin op…

“Stories is ’n mengelmoes van liedjies wat ek die afgelope dertig jaar geskryf het. Ek het probeer om dit ook vir ’n jonger mark te skryf en nie na Suid-Afrikaanse musiek te luister nie sodat ek ’n vars perspektief na die tafel kon bring. “Roger Bashew, my ongelooflik talentvolle vorige man, het die verwerkings gedoen en ons het saam aan die kore gewerk. My skoondogter, Hilletje Bashew, is ’n fantastiese violis en speel ook daarop. Ons het heelwat instrumente gebruik, selfs ’n tuinslang op ‘Jy bly ver’!” Stories is op CD Baby, iTunes en Amazon beskikbaar.…

Lindie Steenkamp Ek wil graag verder studeer. Ek het al twee jaar Bybelskool agter die rug, maar het vanweë omstandighede ’n ruk nie by die leerwerk uitgekom nie. Maar in 2016 wil ek weer voluit gaan. In 2015 was my droom om ’n canopy- toer te doen (waar jy so tussen die wolke en aarde oor asemrowende plekke sweef) en ek het dit gedoen. In die nuwe jaar wil ek graag ’n reksprong doen. Hannelie Roets Ek wil my kreatiewe talente meer gebruik - meer skryf en die regterkant van my brein gebruik. Ek wil nie te groot doelwitte stel nie, ek wil eerder elke dag geniet en gebruik. Elize Greyling Ja vir seker. Ek oefen tans by ’n Boot Camp en streef daarna om in die nuwe jaar ’n…

Vir elkeen is reis iets anders. Dalk is dit ’n epiese ontdekkingstog wat jy een of twee maal in jou lewe aanpak, of anders die verkenning van ’n nuwe omgewing wat jy jou jaarliks gun. Dan is daar dié wie se tandeborsels en slaapsokkies in hul tasse bly omdat reis vir hulle so natuurlik soos asemhaal is. Theresa Szejwallo, Petro Kotzé en Bertus Louw is gedurig op die pad. As jy ’n afspraak wil maak, moet jy eers vra: “Is jy hier?” Talle tuisblyers wonder hoe dit voel om so te leef. Opwindend? Veeleisend? Glansryk? THERESA SZEJWALLO Selfs ná 32 jaar in die reisbedryf is vars kombinasies van mense en plekke vir Theresa Szejwallo van Johannesburg eenvoudig onweerstaanbaar. Sy is die besturende direkteur van TTC SA wat die bekende reishandelsmerke…

Ná foto’s wat by kyk-NET se Silwerskermfees geneem is die sosiale media getref het, het almal begin gons oor hoe ongelooflik goed aktrise en draaiboekskrywer Sandra Vaughn lyk. Sy het ’n hoop gewig afgeskud en almal wou weet hoe? Sandra en die mense wat haar elke dag sien, het nie agtergekom sy smelt weg nie, maar mense wat haar lank laas gesien het, kon die groot verskil sien. “Ek het wel agtergekom dat van my klere losser sit en kollegas het my begin spot omdat ek heeltyd my broek optrek. Maar omdat ek my nie weeg nie, het die mense se reaksie my verras.” Sy glo ’n traumatiese ervaring, waaroor sy nie wil praat nie, het daartoe gelei dat sy soveel gewig aangesit het. “’n Mens se liggaam gaan in…

Volgens die internasionale marknavorsers en tendensdophouers, Mintel, is daar ’n paar tendense wat die Amerikaanse mark in 2016 gaan beïnvloed. Een daarvan is dat verbruikers meer “connected” wil voel aan die produkte wat hulle koop. Groter is nie meer noodwendig beter nie. Ons wil beter voel oor maatskappye by wie ons koop. Ons wil weet hulle is nie gewetenlose skurke wat kinders in hul fabrieke gebruik of kleinboere vertrap nie. Ons wil ook graag ’n “verhouding” hê met die maatskappy by wie ons koop – daarom dat niswinkels en markte al hoe gewilder word. Vuisvoos verbruikers is ook moeg vir die middelman wat pryse so opjaag (dink hier aan hoe gewild plaasmarkte is). Volgens Mintel wil mense voel ’n produk is hul belegging en lojaliteit werd. Verbruikers wêreldwyd raak ook…

ELEGANT Uitstekende Sweedse ontwerp. Die omruilbare bande is beskikbaar in ’n verskeidenheid kleure. DANIEL WELLINGTONHORLOSIE (R2 999) AMERICAN SWISS. TekkieTYD Dié liggewigtekkie is geskik vir besige en sportiewe vroue. Die binnesool kan verwissel word. MEGAN-TEKKIE (R349) OLYMPIC INTERNATIONAL. LUUKS Dié syrok is ewe geskik vir ’n ontbyt op die strand of aandete in ’n spoggerige restaurant. Luukse materiale en klere wat maklik en gemaklik dra, het die Somer/Lente 2015-reeks van Caslazur gekenmerk. SYROK (R3 765) CASLAZUR. Argitektonies MODERN In die nuwe Bagera Glass-handsakreeks kry jy van modieuse oorgroot-strandsakke tot minimalistiese kleiner sakkies vir die stad. Die handsakke bied ook ’n verskeidenheid meng-en-pas opsies met omruilbare binnesakke.…

Wees nou eerlik: jy glo nie ’n woord van wat jou sterreteken voorspel nie maar jy lees dit nogtans? Jy lag lekker omdat daardie verre reise meestal oor die vakansietye voorspel word. Jy kyk na jou geliefde wat voorspelbaar elke week rugby kyk en skud jou kop oor die misterieuse man waarvan jou voorspelling praat. Oor die advies wonder jy: ís dit dalk tog tyd om die onderneming te begin waarvan jy nog altyd droom? Dit sal regtig help as die sterre in jou guns is wanneer jy en jou baas hierdie week oor jou verhoging gesels. En moet jy dalk weer dink oor daardie duur skoentjies wat jy begeer, aangesien groot voorspoed op pad is? Die sterrevoorspelling laat ons tog soms twee keer dink, al is ons oopkop genoeg…

• Moenie hul optrede persoonlik opneem nie. Herken die patroon en waarskuwingstekens vir wat dit is: Hulle gedrag gaan oor hul kwessies, persepsies en probleme en nie oor jou nie. • Bly kalm, moenie oorreageer, jou vererg en ontsteld raak nie. Dan speel jy hul speletjie. Hulle kry beheer en put genot daaruit as jy kwaad word. Kalmte ontsenu hulle. Hou jou taal, stemtoon en nieverbale kommunikasie neutraal en vriendelik, maar reguit en duidelik. • Leer jou eie woede hanteer en konstruktief kanaliseer. Woede is olie vir hul passief-aggressiewe vuur. • Moenie op hulle vertrou nie en vermy hulle as dit moontlik is. • Stel versoeke, jou verwagtinge en behoeftes duidelik: Wat, wanneer, waar en hoe. Stel dit in werksituasies op skrif, en stuur afskrifte vir almal wat betrokke is.…

SOMERNAGEREG Maak 8 - 10 porsies •Voorbereidingstyd› 30 minute VRUGTEMENGSEL 1 blikkie KOO-appelkose, gedreineer en middeldeur gesny 1 blikkie KOO-vrugteslaai, gedreineer 1 koppie vars mango, in dun skyfies gesny ½ koppie grenadellapulp 1/3 koppie vars pynappel, in blokkies gesny ½ koppie vars aarbeie, in kwarte gesny ROOM-BOLAAG 1 pakkie volroomroomkaas, glad en ongegeur 2 t suurlemoensap ½ k versiersuiker 2 k dubbeldik- ongegeurde jogurt 2 t vanieljegeursel 1 k taai melassesuiker 1 Meng al die vrugtebestanddele in ’n glasopdienbak. 2 Klits die versiersuiker, suurlemoensap en roomkaas saam. Voeg die vanieljegeursel en jogurt by en meng goed. 3 Sprinkel die suiker oor, bedek met kleefplastiek en sit vir minstens 5 min.in die yskas voor opdiening. Die suiker sal dan smelt en 'n dun lagie vorm.…

Klein brokkies brood en ewe klein slukkies wyn wat deur statige, stilswyende manne met deftige swart swaelstertpakke op swaar silwerborde en in blinkgepoetste glase voorgesit is … Ek praat nie nou van ’n driester-Michelin-restaurant in Parys of New York nie. Of ’n Eat Out-wenner in Suid-Afrika nie. Deftige uiteet het ek met Nagmaal in Kakamas se Nederduits-Gereformeerde Kerk leer ken. Eers was dié heilige maal ons kleingoed nie beskore nie en moes ons sit en kyk hoedat die grootmense dit nuttig. Ek het my aan die deftigheid verwonder. ’n Happie en ’n slukkie - en die ete was klaar. Nagmaal was iets heel anders as etenstyd by die huis. Dit was iets goddeliks met heilige kos. Dit het in kerke en katedrale gehoort. By gebrek aan restaurants op ons dorpie…

VIR JONGER KINDERS • Maak spaar visueel. Kry twee of meer spaarbussies – in een spaar hulle vir ’n begeerde item en die geld in die ander een kan dadelik gebruik word. Kinders kan selfs ’n prentjie teken van die item waarvoor hulle spaar en op die bussie plak. • Maak ’n doelwitkaart met blokkies wat aantoon hoeveel hulle elke week moet spaar. Dui die vordering met plakkers aan. (Ja, dis moeite vir besige ouers, maar die voordele is vir ewig.) • Leer hulle die waarde van ervarings bo besittings. Navorsing bewys dit is op die lange duur meer bevredigend. • Praat gereeld met kinders oor geld, soos hoeveel jy vir inkopies betaal het. Laat hulle saam met jou kleingeld tel en verduidelik hoe ’n kredietkaart werk. • Leer kinders van kleins af om 10%…

As whodunnits jou ding is, hoef Afrikaanse lesers lankal nie meer net Deon Meyer te lees nie. Daar is ’n hele klomp Afrikaanse skrywers, soos Peet Venter, Rudie van Rensburg en die bekroonde Martin Steyn wie se werk by dié van die beste internasionale misdaadskrywers kan kers vashou. En soos die werk van hierdie drie skrywers bewys, staan die vroue lankal nie meer ’n tree terug nie. Irma Venter (39) joernalis Irma woon in Centurion en werk as joernalis by twee spesialistydskrifte: Engineering News en Mining Weekly. Haar 2012-debuut, Skoenlapper, is met ’n ATKV Woordveertjie vir spanningsverhale bekroon. Skarlaken, die jongste in ’n reeks van vier boeke, het onlangs by Human & Rousseau verskyn. Hoekom het jy so laat eers publiseer? “Want die tyd is nou eers reg, die boek…

Vandeesmaand is “skrywer” ons tema om aan te sluit by Alta se boek. As jou boekklub al die vrae reg beantwoord, kry julle met die komplimente van Graffiti al die boeke wat in hierdie uitgawe op “Rooiwarm” verskyn. Stuur jul antwoorde na roneln@caxton.co.za met “Januarie-boeke” in die onderwerpreël of na www.rooirose.co.za Klik op “boeke” en volg die aanwysings. Stuur jou boekklub se naam; posadres en selnommer! Moeilik? Google dit … Vrae 1 Wie het die meeste boeke in die Bybel geskryf? Hoeveel? 2 Watter enkele boek het die meeste tot nog toe verkoop? Skrywer? 3 Hoeveel boeke het die SA skrywer Mary Faulkner geskryf? 4 Naastenby hoeveel nuwe woorde het Shakespeare geskep? 5 Wat was JK Rowling se ander skrywersnaam? Desember-antwoorde 1 Wat was Eugène Marais se middelnaam? Nielen 2…

Jy is veral bekend as gospelsanger en vir jou werk met Kleuterzone en Tienerzone vir die TV. Hoe het dit alles begin? Ek het van kleins af ’n liefde vir televisie gehad. Ek was ’n groot kykNET-aanhanger en het altyd daarvan gedroom om my eie reeks te vervaardig. Ná die Supersterre-reeks (2007 – ek was toe die jongste deelnemer) het ek besef hoe hard veral laerskoolleerders werk om ’n konsert op die planke te bring. Daarna kry hulle een of twee keer die kans om dit op te voer. Met die Solis vir Christus-konsep het ons dié konserte ’n paar kerwe opgestoot deur dit nasionaal te beeldsend. Ons vergeet soms hoe die lewe deur die oë van kleuters lyk en met Kleuterzone…

Baie mense ken waarskynlik vandag nog die naam Shirley Temple, en weet sy was ’n kinderster. Maar in die dertigerjare van die vorige eeu was sy een van die gewildste sterre en vier jaar agtereenvolgens (1935 – 1938) was haar prente die grootste lokettreffers in Hollywood. Toe Amerika in die Depressiejare in mismoedigheid vasgevang was, het die krulkopengeltjie die Amerikaners bemoedig. En die hele wêreld was betower deur die kind wat met oorgawe gesing, gedans en gelag het. Shirley se rolprentloopbaan het in 1932 op die ouderdom van drie begin. Twee jaar later het sy internasionaal bekend geword in die rolprent Bright Eyes wat spesiaal geskep is om haar talente te vertoon. Nou word dié kinderster deur Internet Movie database (IMDb) as die agtste grootste kinderster van alle tye beskryf.…