Innholdsfortegnelse for 26-Feb-16 i Landbouweekblad

Gemeenskapswerkers in Khayelitsha, Kaapstad, sê groentetuine by skole is ’n uitstekende manier om kosprysinflasie en droogte te beveg. Mnr. Xolisa Bangani, stigter van die Ikhaya-groentetuin by die Laerskool Isikhokele in Site C, sê die groentetuin is ’n voedselbron vir kinders van arm huishoudings wat nie kos kan bekostig nie. Dit het al meer as 50 mense in Site C aangemoedig om hul eie groentetuine te begin en ’n ander skool in die omgewing het ook ’n groentetuin gevestig. “Ons deel die kos met die skool en gee ook kos aan die kinders wat in die tuin werk as ’n blyk van waardering. En hulle kan dan ook by die huis kos op die tafel sit.” Hy sê die tuin leer stadskinders hoekom ’n groen omgewing belangrik is. Dit het ook…

ARTIKELS & RUBRIEKE ■ Klimaat het laaste sê oor opbrengs ■ Hou aan beweeg in droogtetyd ■ Sukses met Bonsmaras tussen die duine ■ Keer só dat steenvrugbome vrek ■ Piet Karsten soos pa vir sy werkers ■ Piet Tamma: Sewentig oeste en dis nog het einde niet! ■ Boereplan: Erdwurmtee kry grondlewe aan die gang GESIN ■ Boerekos: Tert te kies en keur MEGABOER In’n megaboerdery kan dit gebeur dat personeel in groot getalle bedank. Maar nie by mnr. Piet Karsten, Boer van die Jaar metsy hoofkwartier op Kanoneiland indieNoord-Kaap,nie.Danksydie menswaardigebehandeling van sy werkers beskou hulle hom eerder as ’npa, ’noupa en’noom as ’n werkgewer…

WET OOR GRONDPLAFONNE STOOM VOORT Wetgewing oor die instel van grondplafonne is reeds ver gevorder, het pres. Jacob Zuma in sy staatsrede gesê. Hieronder is van die kommentaar op die berig op Landbou.com: GIELIE DE KOCK skryf: Veronderstel hierdie wet dat alle plase groter as 1 000 ha is? Vertel asseblief vir die President dat daar iets soos ’n ekonomiese eenheid is en dat dit verskil van die tipe boerdery sowel as die streek. Op dié beginsel geskoei, sal daar sukses wees, maar op hektare alleen net ’n totale gemors. STOWWERIGE BOER skryf: Ek wonder net hoe die ANC die stelsel gaan bestuur? Dis duidelik dat ANC-beheerde munisipaliteite sukkel om rioolplase, strate, elektrisiteits-en watervoorsiening, skuldinvordering, ensovoorts te bestuur. Hoe gaan hulle eerstens weet wie die eienaar van ’n stuk grond…

Agri SA se droogte-rampfonds Die rampfonds word ondersteun deur Landbouweekblad en etlike ander Media24-publikasies. Besoek www.droogterampfonds.co.za. VEEBOERE wat deur die droogte gedwing word om vee te verkoop, kan tydelik die betaling van belasting op die opbrengs daarvan vryspring indien hulle die geld in ’n spesifieke skema by die Land Bank belê. Die skema bestaan al sedert 1983 en staan amptelik bekend as “die veeverminderingskema weens droogte”. Die Land Bank hanteer dit namens die staat. Slegs geld wat uit die verkoop van vee bekom is, mag belê word, en dit moet binne 90 dae ná die verkoop plaasvind. Die maksimum beleggingstermyn is ses jaar. Met die skryf van die berig was die rentekoers vir die belegging 5,5% per jaar, maar die koers is aan die prima-uitleenkoers gekoppel en sal dus saam…

’N WETSBEPALING wat ooreenkomste tussen groot vakbonde en ondernemings afdwing op kleiner ondernemings en kontrakteurs wat geen deel aan die onderhandelinge gehad het nie, word vandeesweek in die hof betwis. Die Vryemarkstigting betwis die grondwetlikheid van dié bepaling in die Wet op Arbeidsverhoudinge. Die saak sloer al bykans drie jaar lank. Artikel 32 van die wet verplig die Minister van Arbeid om ooreenkomste wat deur bedingingsrade aangegaan word, na ’n hele arbeidsektor uit te brei, al is ondernemings nie lede van die bedingingsraad nie. Mnr. Leon Louw, uitvoerende direkteur van die Vryemarkstigting, sê hierdie artikel het ’n regstreekse invloed op werkloosheid, werkskepping en sake-ontwikkeling. Die stigting wil hê die woord “moet” in die artikel moet na “mag” verander word. Dit sal die minister in staat stel om eers die breër…

Mnr. Ernst Janovsky (foto), hoof van Absa se agribesigheid, het by die NoordKaapse Wolkwekersvereniging op VictoriaWes sy breë indrukke oor die droogte en ekonomie gegee. Wisselkoers SuidAfrikaners moenie verwag dat die rand binne drie jaar weer gaan kop optel nie, maar die swak wisselkoers bring veral vir uitvoerboere goeie geleenthede wat reg bestuur moet word. “Koop jou produksiemiddele so vroeg moontlik, gebruik dit om produkte te lewer en lewer jou produk wanneer die rand nog swakker is,” was Janovsky se raad aan wolboere op VictoriaWes. Hy voorspel die rand kan oor drie jaar so min as R20 teenoor die Amerikaanse dollar werd wees, maar meen dít is vir boere “net ’n geleentheid om geld te maak”. Rentekoers Hy verwag die rentekoers gaan in die volgende twee jaar nóg 2% styg.…

1 ZIMBABWE |Fees te midde van ramp Terwyl reëlings vir ’n partytjie teen ’n beweerde koste van $800 000 (R12,5 miljoen) vir pres. Robert Mugabe se 92ste verjaardag aan die gang was, het die land by internasionale skenkers om voedselhulp gepleit. Met die afkondiging van die land as ’n rampdroogtegebied het die regering erken dat bykans 2,5 miljoen mense voedselhulp benodig. Mnr. Saviour Kasukuwere, minister van openbare werke, het gesê sowat 26% van die bevolking ly honger en duisende stuks vee het reeds gevrek. In die lig daarvan het die Verenigde Nasies (VN) se Wêreldvoedselprogram (WVP) begin met voorbereidings om meer voedsel daar te versprei. Die VN eis egter dat die Mugaberegering in besproeiing moet belê om die voortdurende voedseltekorte te voorkom. Mnr. Chimimba Phiri, WVPkoördineerder in SuiderAfrika, sê Zimbabwe…

IN die Staatsrede is nie voldoende inisiatiewe aangedui om Suid-Afrika se ekonomiese probleme voor Junie te takel nie. Die hoop is nou op die begrotingstoespraak. ’n Mens hoop net die Minister van Finansies het genoeg vryheid om dapper besluite te neem pleks van besluite wat vir populiste aanvaarbaar is. ’n Mens hoop graderingsagentskappe sal nie die land se beleggingstatus in Junie verder afgradeer en dat die rand vinniger sal verswak nie. ’n Mens hoop produksiekoste gaan nie drasties verhoog nie. ’n Mens hoop ook dit gaan nie vir verskaffers van produksiemiddele nodig wees om voor einde Februarie rond te skarrel om meer as die gewone belastingaankope te doen nie. SWAK RAND Suid-Afrika voer jaarliks die meeste van sy produksiemiddele in. Daarom bepaal die rand se waarde in ’n groot mate…

Dit is welbekend dat die Suid-Afrikaanse ekonomie in die moeilikheid is. Dit is deels weens eksterne faktore, waar van die wêreld se ekonomiese veranderinge begin deurwerk, asook ’n groot deel selfgemaakte moeilikheid weens pres. Jacob Zuma en sy meelopers se beperkte insig in ’n moderne ekonomiese stelsel. Gelukkig is daar tekens dat die werklikheid begin deurwerk. Dit is ’n bedekte seën dat Zuma in Desember sy flaters – ’n baie duur fout vir die ekonomie – met die Ministers van Finansies gemaak het. Skynbaar is die steun vir Zuma stadig maar seker besig om te verkrummel en die moderner ANCleiers begin beheer kry. Dit is bemoedigend dat mnr. Pravin Gordhan, Minister van Finansies, verskeie gesprekke met die land se groot sakeleiers gevoer het. Die uitsprake dat die Regering en die…

Amerikaanse boere sal in die komende produksiejaar uiteindelik ’n langverwagte nuwe GM sojaboonkultivar kan plant nadat die Chinese regering invoer van dié kultivar goedgekeur het. China is die wêreld se grootste sojabooninvoerder. Roundup Ready 2 Xtend-sojabone is teen die onkruiddoders dikamba en glifosaat bestand. Die saadmaatskappy Monsanto het dit oor die afgelope dekade ontwikkel te midde van toenemende tekens van onkruidweerstand teen glifosaat. Monsanto het onlangs aangekondig dat hy die saad nou in Amerika en Kanada gaan begin verkoop, berig die nuusdiens Reuters. Dit vorm deel van ’n komende nuwe geslag GM gewasse wat nie meer net teen glifosaat nie, maar ook teen onderskeidelik dikamba en 2,4-D bestand is. Die enigste haakplek vir Amerikaanse boere is dat goedkeuring vir die gebruik van dikamba deur hul amptelike omgewingsagentskap, die Environmental Protection…

Die huidige droogte beklemtoon die kwesbaarheid van die landbou as dit kom by klimaatuiterstes, en daar word verwag dat klimaatsverandering toenemend moeilike toestande vir boere sal skep. Dit vergroot die behoefte om boere en landboubesighede in die Wes-Kaap te ondersteun ten einde meer klimaatbestand te wees. Hoewel boere daaraan gewoond is om op klimaatsveranderlikheid te reageer, sal daar in die toekoms meer en meer vernuwende oplossings gevind moet word om langtermynveranderings die hoof te bied. Die sektor moet saamstaan en gekoördineerd optree om te keer dat klimaatsverandering die landbou en voedselsekerheid destabiliseer en ekonomiese en landelike ontwikkeling ondermyn. In ’n eerste gesamentlike poging het ’n konsortium bestaande uit die Wes-Kaapse departement van landbou en die departement van omgewingsake en ontwikkelingsbeplanning die SmartAgri-projek (SmartAgriculture for Climate Resilience) in Augustus 2014 van…

Leke sou dalk dink daar is net sand, skerpioene en gemsbokke in die Kalahari, maar moenie glo nie. In daardie sand is alles wat nodig is vir ’n eersteklas boerdery, solank die boer hom net by die toestande aanpas. En diegene wat ook verkeerdelik sou dink presisieboerdery is nie uitgeknip vir Stampriet in die dorre Hardap-streek van Namibië met sy skamele 180 mm tot 220 mm reën per jaar nie, moet óók nog ’n slag dink, want dit is presies wat vir dr. Joggie Briedenhann se sukses verantwoordelik is. Hy het op Grootfontein in Namibië grootgeword, waar die familie met Brahman-Simmentaler-kruisbeeste geboer het. Ná skool is hy Suid-Afrika toe vir ’n B.Ch.D.-graad in tandheelkunde aan die Universiteit van Pretoria en ’n M.Ch.D.-spesialisgraad in ortodonsie aan die Universiteit van die Witwatersrand.…

MNR. CASPER LABUSCHAGNE HOE GAAN DIT MET WOLBOERE MIDDE-IN DIE KNELLENDE DROOGTE? In Desember was die meeste boere maar benoud, maar met die reën wat teen middel Januarie geval het, glimlag ons weer. WAT HET VERANDER? Waar ons in die somer nog winterlek moes koop, skaf ons nou brandstof en ploegskare aan. HOE STAAN DIT MET DIE BOERE EN DIE POLITIEK? IS DIE BOERE BEKOMMERD? Dit is ’n munisipale verkiesingsjaar en uit alle oorde is daar politieke uitsprake wat nie lekker op die oor val nie. Ek dink ons moenie té bekommerd wees nie. Die Regering sal met die droogte besef hoe belangrik kommersiële boere is. WIE WAS JOU MENTOR? My pa, Boshoff, met wie ek ’n rukkie saamgeboer het. WAT WIL JY NOG BEREIK IN JOU BOERDERY? Teen die…

GELDSAKE PHILIP THEUNISSEN Ons het ’n plaas met vee gekoop. Ons was nie vir BTW geregistreer nie en moes dus BTW op die koopsom betaal omdat die eienaar vir BTW geregistreer is. Ons wil nou registreer, maar weet nie wat ons kan terugeis nie. Kapitaaluitgawes kan glo geëis word. Is dit dus byvoorbeeld pompe wat ons gekoop het? Wat van uitgawes ten opsigte van die prokureurs vir die transaksies waarop BTW gehef was? As ons van die vee gaan verkoop, gebeur dit teen die 14%- of 0%-koers? Jy kan op alle uitgawes (produksie én kapitaal) “ter voortbrenging van inkomste” BTW eis mits dit nie uitdruklik uitgesluit is nie, soos op dubbelkajuitbakkies. Verder is sommige produksiemiddele (saad, kunsmis, veevoer) teen ’n nulkoers vir boerderydoeleindes belasbaar mits jy wél by die Suid-Afrikaanse…

LIGGING Lategansvallei, Oudtshoorn Kassie, die haan, kraai koning en skrop rond op die werf waar hy saam met Kallie die kalkoen by me. Estelle Sinclair se padstal Bella de Karoo rondloop. Hierdie padstal met sy heerlike plaasgevoel is soos ’n magneet vir reisigers op die R62 tussen Oudtshoorn en Calitzdorp. Dit was voorheen bekend as Smitswinkel R62. Daaglikse brood. Estelle-hulle bak daagliks vars roosterkoek en plaasbrood, wat die basis vorm vir die meeste geregte op die spyskaart (wat pure plaas in emaljeborde of -skotteltjies opgedien word). Hulle sit ook hartlike plaasontbyte en ietsie vir soettande voor. Benewens ’n vars treksel koffie en die gewone dorslessers, is daar ook bier en wyn op die spyskaart. Op Sondae sit die padstal gepak met mense uit Oudtshoorn of Calitzdorp wat kom aansit vir…

Die landbou se bydrae tot die bruto nasionale produk (BNP) van Namibië het van 8,4% in 1980 tot 3,2% in 2013 afgeneem. Dit is waarskynlik tans op dieselfde vlak. In vergelyking daarmee het die vervaardigingsektor se bydrae tot die BNP dienooreenkomstig van 8,4% tot 12,1% gestyg, wat in ooreenstemming met die regering se Visie 2030 is om Namibië ’n geïndustrialiseerde land te maak. Die landbou se onregstreekse bydrae tot die BNP word op tussen 12% en 14% geskat, luidens inligting van die Namibiese landbou-unie (NLU). Sowat 70% van die Namibiese bevolking is regstreeks of onregstreeks vir hul voortbestaan van die landbou afhanklik, terwyl die landbou ongeveer 200 000 mense in diens het wat 28% van die nasionale werksmag verteenwoordig, volgens die NLU. Die landbou se jaarlikse produksie beloop na raming…

AFRIKA se uitblinker-lande is dié wie se regerings nie bang is om polities moeilike maatreëls te implementeer nie. En Suid-Afrika is nie een van hulle nie, het mnr. Sim Tshabalala, mede- uitvoerende hoof van Standard Bank, op Frontier Advisory Deloitte se jaarlikse Afrika-vooruitskouing gesê. Hy was vol lof vir lande uit Oos-Afrika wat strukturele hervorming implementeer, terwyl die “middelgroeplande”, soos Suid-Afrika en Nigerië, “dryf en rondkarring”. Hy meen die slegste reaksie van enige staat op die huidige ekonomiese klimaat sou wees om te bly bestee soos voorheen, waarvan daar gelukkig geen teken is nie. Die opkomende sterre kom veral uit Oos-Afrika, maar sluit ook die Demokratiese Republiek van die Kongo, Mosambiek, die Ivoorkus en die Kaap-Verde in. Benewens strukturele hervorming en omsigtige fiskale en monetêre beleid, het dié lande hul…

Internasionaal: Die prys van mielies het met 2,5%, oftewel $3,61/t (R57,36/t), gedaal tot $142,45/t (R2 264/t). Op ’n jaargrondslag is dit 6,4%, oftewel $9,78/t (R155,40/t), laer. Verwagte pryse: Maart – $142,67/t (R2 267/t), Mei – $144,32/t (R2 293/t), Julie – $146,29/t (R2 325/t), September – $148,18/t (R2 355/t). Plaaslik: Die Safex-prys vir wit mielies het met 0,5%, oftewel R25/t, gedaal tot R4 930/t. Die prys van geel mielies het met 3,8%, oftewel R148/t, gedaal tot R3 797/t. Op ’n jaargrondslag is dit 79,1%, oftewel R2 177/t, hoër vir wit mielies, terwyl geel mielies 59,5%, oftewel R1 417/t, hoër is as in die ooreenstemmende tyd verlede jaar. Internasionaal: Die gemiddelde prys van koring het met 3,4%, oftewel $5,91/t (R93,91/t), gedaal tot $169,15/t (R2 688/t). Op ’n jaargrondslag is dit 12,5%, oftewel…

GAUTENG NIGEL DRIEFONTEIN (87), 15 ha, aan Centurion Gold Holdings (Edms.) Bpk., van Witwatersrand Gold Mining Realisationtrust, R2 500 000. (R166 666/ha) PRETORIA ROOIKOPJES (483), 21 ha, aan Tuscan Mood 80 (Edms.) Bpk., van Autumn Star Indoor Air Quality & Duct Cleaning BK, R705 000. KWAZULU-NATAL UTRECHT ZANDSPRUIT (2), 156 ha, aan G. van der Merwe, van P.G. van der Merwe, R1 000 000. LIMPOPO THABAZIMBI PLAAS 350, 16 ha, aan J.P. en M.S. Janse van Rensburg, van H. Brits, R650 000. (R40 625/ha) MPUMALANGA ACORNHOEK GUERNSEY (81), 21 ha, aan H.E. Barnes, van Crystal Pier Trading 159 BK, R900 000. (R42 857/ha) BETHAL PLAAS 526, 187 ha, aan F. en J.J.P. Swart, van H.C.N. en P. Joubert, R1 025 718. MIDDELBURG MAPOCHSGRONDE (966), 61 ha, aan die Republiek van…

SA BOERBOK VRAAG BLY STERK NIEdiedroogteofhoëprysewat virwolenbokhaarbetaalword, hettotdusverenigeongunstige impakopdieBoerbokbedryfgehadnie, sêmnr.StephanusMalan, voorsittervandieSABoerboktelersgenootskap. MalansêopdieOudeMeester-veilingverledemaandop Kroonstadwasdiegemiddelde prysvirstoetooieR11000stuken rammeisteengemiddeldR7500 stukverkoop.OpdieOos-Kaapse veldramklubveilingopGraaff-Reinetisdieaanbodvan42ramme teengemiddeldR7700stukuitverkoop. Opdienasionaleveiling inBloemfonteinverledejaaris ’nrekordprysvanR106000betaalvir’nramvanmnr. Leonard duRaanvanDouglas.Mnr.Kobus LöttervanWillowmorehetdie naashoogsteprysvanR80000 behaal.Diegemiddeldeprys virstoetrammeopdiéveiling wasR22000stukenstoetooie R8500stuk. Daaristanssowat380geregistreerdetelersen’ngenepoel vandigbydie2miljoenSABoerbokkeindieland.’ nKopervandie VerenigdeArabieseEmiratehet onlangstienstoetrammeteen R2miljoenvanSuid-Afrikaingevoer. CRADOCK / DOHNE-MERINO / R27 000 Op die jaarlikse Dohne-Merinoveiling op Cradock is dié ram teen die hoogste prys van R27 000 verkoop. Agter, van links, is mnre. André van Zyl, afslaer, Hugh Collett en Philippie Marais, verkopers, van Cradock en Tiaan Naudé, koper, ook van Cradock. Voor, van links, is mnre. Albert Nortjé van CMW en Japie Marais, verkoper. Altesame 70 ramme is teen ’n puik gemiddelde prys van R8 614 stuk verkoop. CMW het die veiling aangebied. LOERIESFONTEIN /1 BOERBOK / R21 0001 Die duurste Boerbokram op die Wes-Kaapse Boerbokklub se veiling op…

1 GW Suid-Afrika het sy windenergie-kapasiteit verlede jaar tot meer as 1 gigawatt (GW) opgestoot. Dit maak Suid-Afrika die grootste opwekker van windenergie in Afrika, gevolg deur Marokko met ’n vermoë van 787 MW. Die plaaslike groei is te danke aan die regeringsprogram om hernubare energie van onafhanklike produsente aan te koop. Die koste het al afgekom van R1,42/kWh in 2011 tot 65c/kWh verlede jaar. - Alan Harman R1 MILJOEN Absa is bekommerd oor die invloed van die droogte en die bedreiging wat dit vir voedselsekerheid inhou. Daarom het Absa, as ’n lid van Barclays Africa, R1 miljoen bygedra tot Agri SA se pogings om droogtegeteisterde boere en gemeenskappe by te staan, sê me. Sazini Mojapelo, hoof van burgerskap by Barclays Africa. Sy sê waterskenkings is ’n ander manier waarop…

‘Watter selfrespekterende land misluk om kos te produseer, terwyl hy genoeg bewerkbare grond het?’ Mnr. Julius Malema, leier van die EFF, in sy repliek op pres. Jacob Zuma se staatsrede. Bl. 15 ‘Geluk! Wanneer antwoord jy op die uitdaging om Horison en Grootbaas saam in dieselfde kamp te sit? Mnr. Johann Rupert op Twitter aan die wildteler Piet du Toit. Rupert meen sý buffel, Grootbaas, is meer viriel as Du Toit s’n. Bl. 14 ‘Wat help dit ons loop hierdie pad saam met julle? Hoe weet ons die volgende eienaars gaan julle mooi beloftes gestand doen?’ Me. Hillary Knight, ’n boer in die Nyl-vloedvlakte, oor die maatskappy Sylvana Platinum se voorneme om die myn te verkoop. Bl. 19 ‘Ons studie beklemtoon vroeëre bevindinge dat wildboerdery ’n vooruitstrewende bedryf in die…

DROOGTE WYS BOERE IS NODIG WENBRIEF Die droogte in Suid-Afrika grens aan ’n nasionale ramp wat almal raak. Die boere is sekerlik dié wat die swaarste getref word. Sommige boere gaan die droogte nie finansieel oorleef nie. Dit is ’n hartseer saak. Waar sal hulle weer ’n heenkome en bestaan vind? Nog boere sal oorleef, maar dit sal jare duur om weer op die been te kom. Dan is daar die boere wat met die nodige voorsorg en vernuwende boerderypraktyke die droogte redelik goed deurstaan het en ten spyte van verliese steeds finansieel sterk genoeg is om van krag tot krag te gaan. Dit was weer die klein en swak boer wat die swaarste getref is. In die laaste week of wat van Januarie het welkome reën in groot dele…

MODEL-KOÖPERASIE SONDER BESTUURDER Boere self is die beste mense om hul eie sake te bestuur, soos die Clocolan-koöperasie, ’n model-boereorganisasie op die Oos-Vrystaatse dorp Clocolan, bewys. Die koöperasie is sonder ’n bestuurder en die leuse is: ’n Koöperasie wat op sy winste roem, het sy siel verloor. Die gewildheid en sukses van die Clocolan-koöperasie, waarskynlik die kleinste graankoöperasie in die land, blyk daaruit dat meer as 99% van Clocolan se net meer as 300 boere lid daarvan is. Die vyf direksielede, almal boere, behartig die bestuur van die koöperasie. Hulle dra saam met ’n sekretaris as hoof- uitvoerende beampte volle verantwoordelikheid daarvoor. Met dié vorm van bestuur en die bedrywighede wat tot Clocolan en omgewing beperk is, word administrasiekoste laag gehou en kredietverskaffing beter beheer, terwyl die direksielede nouer in…

DIE sakeman dr. Johann Rupert, eienaar van Grootbaas, voorheen die duurste buffelbul in Suid-Afrika, het die wildboer mnr. Piet du Toit op Twitter uitgedaag om Horison en Grootbaas saam in ’n kamp met koeie te sit en te sien wie vaar die beste. Rupert het ’n foto van Grootbaas getwiet met die inskrywing: “#pietdutoit16 Grootbaas veldbul op Horison se ouderdom, baklei vir koeie, sien kans vir Horison.” Toe Landbouweekblad vir Du Toit vra of Horison vir die uitdaging kans sal sien, het hy geskerts: “Ons is bereid om dit ’n go te gee, maar ek dink dit gaan net ’n opwarmingsgeveg vir Horison wees. Daarna sal Johann iets sterkers moet stuur! “Horison kan sommer ná die geveg ’n paar koeie in Grootbaas se kamp help dek! Dit gaan beslis nie…

MNR. Mmusi Maimane, leier van die DA, meen pres. Zuma is ver verwyder van die werklikheid waarmee Suid-Afrikaners daagliks moet leef. Hy sê “wanneer die DA regeer”, sal die droogte as ’n nasionale ramp verklaar word sodat die land se voedselsekerheid beskerm word, want die party “verstaan dat om die boerderygemeenskappe te help baie belangriker is as om nuwe motors vir tradisionele leiers te koop of om ministers se kantore oor te doen”. Hy sal ook ’n ekstra R10 miljard begroot om grondhervorming te bespoedig, opleiding en ondersteuning aan opkomende boere gee en seker maak dat aandeleskemas aan plaaswerkers toegestaan word wat hulle eienaarskap sal gee vir die grond wat hulle bewerk. Die toestaan van titelaktes sal ook bespoedig word.…

Mnr. Frank Teixeira, die motiveringspreker wat met ’n stortvloed briewe, telefoonoproepe en ultimatums dit reggekry het om die hoë diensgelde op SMS-skenkings aan Agri SA se droogterampfonds opgehef te kry, glo dié oorwinning beteken niks as alle Suid-Afrikaners nie saamstaan om boere te ondersteun nie. “Dit pla my baie dat die selfoonmaatskappye, noudat hulle die heffings geskrap het, niks meer doen nie. Hulle behoort dié fonds te bemark en op ’n manier die erns van die situasie aan alle Suid-Afrikaners oor te dra. “Ek het self eers die erns van die saak besef nadat ek met ’n boer gepraat het. In die stad het jy nooit interaksie met boere nie. Jy vra jouself nie af waar die wortels of die blaarslaai wat jy in die winkel koop, vandaan kom nie.…

DIE Nyl-aksiegroep sê Sylvania Platinum weerhou opsetlik inligting oor die beoogde Grass Valley-chroommyn se invloed op die omgewing se grondwater. Die groep verteenwoordig boere en belanghebbendes in die stryd om Sylvania Platinum te verhoed om in die Nylvloedvlakte en omliggende persele suid van Mokopane te myn. Op ’n onlangse openbare deelname-vergadering op Mokopane het ’n konsultant van Geo Pollution Technologies – wat die hidrologiese studie moes doen – erken hul opdrag was om net die impak op die water by die verwerking van ou mynhope op die perseel te bestudeer. Sylvania doen egter aansoek om ’n lisensie vir ’n oopgroefmyn, asook ’n ondergrondse myn op die perseel van die ou Grass Valley-chroommyn. ’MISVERSTAND’ Mnr. Albert Jordaan van Sylvania Platinum sê dit is ’n misverstand en verduidelik die aansoek om ’n…

DIE Nasionale Oesskattingskomitee het te midde van ’n ernstige droogte en hittegolwe uitstekende werk in die skatting van die afgelope bemarkingsjaar se mielie-oes gedoen. Die finale syfers wys dat 2015 se nasionale oes 9,96 miljoen ton was. Dit is net 3% meer as die komitee se eerste produksieskatting van daardie oes in Februarie verlede jaar. Dié afwyking van 3% is gemaklik binne die internasionale voorskrif dat ’n betroubare oesskatting binne 5% van die uiteindelike werklike syfer moet wees. Mnr. Nico Hawkins, hoof van die SA Graaninligtingdiens, sê dit was die komitee se akkuraatste skatting nóg. Die Oesskattingskomitee het die afgelope tyd taamlik onder kritiek deurgeloop oor ’n vervroegde eerste produksieskatting in Januarie, wat daarop gemik was om groter marksekerheid te midde van die voortslepende droogte te bewerkstellig. Die meeste ontleders…

VEEBOERDERY is nie meer so winsgewend as wat mense dink nie. Dít is die bevinding van ’n studie wat onder leiding van prof. Johan Willemse deur die Universiteit van die Vrystaat onderneem is. Daar is ook geen ruimte vir verdere verhogings in produksiekoste of selfs belasting nie. Dit sal ongetwyfeld tot ’n styging in produsentepryse lei. Veeboerdery het oor die afgelope paar jaar moeiliker geraak weens die feit dat boere prysnemers is en relatief min beheer oor produsentepryse of produksiekoste het. Boere is aan die genade van makro- en mikro-ekonomiese faktore, asook politieke invloede oorgelaat. Aangesien die meeste vleis in ekstensiewe toestande geproduseer word, moet boere hulself by die beskikbare natuurlike toestande aanpas. Dit beteken daar is dele in Suid-Afrika waar slegs spesifieke produksiestelsels kan werk en daar is ’n…

Dit is ’n onding om van “my trust” te praat, want ’n trust behoort aan niemand. ’n Trust is beding ten behoewe van ’n derde party. Dit is ’n spesiale soort kontrak wat tussen die oprigter en die trustees aangegaan word, waar die oprigter bates aan die trustees toevertrou om dit tot voordeel van ’n derde party, die kapitaal en die inkomste-begunstigdes te bestuur. ’n Trust is ’n nuttige boedelbeplanningsinstrument mits dit vir die regte redes opgerig is. Boedelbeplanning moenie ’n ondeurdagte proses wees waarin die beplanner bloot boedelbelasting wil bespaar nie. Dit is meer as dit. Dit gaan oor opvolgbeplanning, die beskerming van bates en veral om erfgename teen hulself te beskerm. Ongelukkig rig baie mense trusts op sonder om dit te bestuur. Kliënte tree soms op asof die…

Optredes wat op feitlik alle soorte boerderye van toepassing is, sluit in: ■ Stel boerderypraktyke in werking wat die grond beskerm. Meer boere moet bewaringslandboupraktyke aanneem (dit kan aangepas word vir vee- en vrugteproduksie) en aktief probeer om grondgesondheid te verbeter. Bewaringslandbou veroorsaak ook ’n toename in die grond se vermoë om water te behou en in die grond se organiese koolstofinhoud en biodiversiteit. Dit is ook belangrik om doeltreffende gronderosiemaatreëls in te stel. ■ Die verbeterde bestuur van oppervlak- en grondwaterhulpbronne om waterverbruik so doeltreffend moontlik te maak, waterverliese binne die stelsel te beperk en watergehalte te behou. Hou te alle tye ’n organiese grondlaag in stand en verwyder indringerplante wat baie water gebruik. Waterinfrastruktuur moet in stand gehou word om verliese en krisisse tydens droogtes te vermy. Opvangsgebiede…

DR. JOGGIE BRIEDENHANN WAT IS DIE BESTE BOERDERYBESLUIT WAT JY AL GENEEM HET? Om grond te koop waar goeie, sterk water beskikbaar is. WAT IS DIE BESTE RAAD WAT JY OOIT GEKRY HET? My ouditeur, mnr. Johan Visser wat hier grootgeword het, sê gesonde sakebeginsels is van nóg groter belang in besighede met marginale wins, soos veeboerdery. Die veeboerdery, akkerbou, wildboerdery en jagtery word in komponente opgebreek en ons probeer op elke komponent produksiekoste bespaar en wins optimaliseer. ’n Goeie balans word gehandhaaf om nie suinig met die sente en rojaal met die rande te wees nie. WAT IS DIE GROOTSTE FOUT WAT JY IN JOU BOERDERY GEMAAK HET? Om nie vroeër presisieboerdery in alle fasette van die boerdery toe te pas nie. WIE WAS JOU MENTOR? Ek word deurgaans…

Mnr. Lood Bester is besturende direkteur van Wildswinkel, ’n handelspos wat wild regstreeks by boere koop en weer van die “rak” af verkoop. Dié besigheid is in 2014 in die lewe geroep en het nou ook ’n veilingshuis, Wildswinkel Veilings, gestig. Wildswinkel se hoof-aandeelhouers is Lood en mnr. Arnold Neethling, wat saam Botlierskop Stud Game besit, mnr. Jan Morgan, ontwikkelaar van die Zwartskloof-natuurreservaat, mnr. Louis van der Watt van die Atterbury Groep en Meletse Game Breeders, saam met mnr. Wiaan van der Linde van Wintershoek Safaris, ’n bekende Noord-Kaapse wildteler en jaguitruster. Wildswinkel is begin om die koop en verkoop van skaars wild maklik, eerlik en regstreeks te maak in ’n mark waar daar baie slaggate is vir mense wat nie op veilings wil handel dryf nie. Lesers kan uitsien…

KOORDLOOS GEEN GESUKKEL MET PLASTIEK Indien jy ’n Jo-Jo-tenk, jou plastiekkajak of die enjinskerm van ’n motorfiets wil herstel, is die koordlose Portasol-plastieksweisstel die ideale stuk gereedskap. Dit word deur Christensen Tools versprei. Die Portasol-sweisstok se punt word met ’n versteekte gasvlam verhit. Dit verseker dat onbeheerde hitte nie versprei vanaf die voorwerp wat herstel moet word nie. Sweiswerk kan dus reg langs hittesensitiewe materiale, soos kabels en spons, uitgevoer word. Die sweisstel sluit vier verskillende soorte plastieksweisstawe in, onder meer poliëtileen en polistireen. Roosters van vlekvrye staal wat by die stel ingesluit is, maak die herstel van groter gate en krake baie doeltreffend. Voor jy vanjaar nuut koop, maak eerder reg! PRYS: R2 499 (BTW uitgesluit). NAVRAE: Christensen Tools, tel. 011 618 3200, faks 086 503 2105, webwerf: www.christensen.co.za…

Aspoester-pampoen Ek hou van aansit by lang tafels met groot skottels kos wat kreun van allerhande geure. Dié pampoen kan ’n mooi fokuspunt vir jou tafel maak. Ek het dié gereg onlangs vir Moedersdag gemaak en die hele familie was gaande daaroor. – Carmen Pampoen ■ 1 kleinerige heel pampoen, die kop afgesny en ontpit (behou die kop as deksel) ■ Sout en swartpeper na smaak Vulsel ■ Olyfolie vir braai ■ 2 uie, rooi indien verkies, in stukkies gesny ■ 3 knoffelhuisies, fyngedruk ■ 1 groen soetrissie, in klein blokkies gesny ■ 5-7 ml elk fyn komyn, kaneel en koljander ■ 60 ml fyngekapte pietersielie ■ 30 ml fyngekapte kruisement ■ 60 g gekapte kasjoeneute of geroosterde amandels ■ 50 g geroosterde pampoensaad ■ ’n Groot hand vol sultanas…

LIGGING Williston,Noord-Kaap Sy het met tuisgemaakte botter grootgeword en het die kuns by haar ma geleer, vertel mev. Gretha van der Colff van die Gannabos-boerdery naby Williston in die Karoo. Sy sit nie net die tradisie voort nie – met Gannabos se bokbotter het sy ’n trotse Karooproduk geskep wat deesdae ook buite die Noord-Kaap se grense bekend is. “Ons het beeste gehad en my ma het altyd botter van beesmelk gemaak. Toe ek destyds met Izak trou, wou almal weet of ek nou bokbotter gaan maak.” Haar man, Izak, boer onder meer met 150 Saanen- en Toggenburg-melkbokke, waarvan 60 tot 80 gemelk word. Voorheen is die melk gebruik om varke mee groot te maak. Gretha het gehou van die idee om iets te maak uit die plaas se produkte,…

Toe ek onlangs vir die soveelste keer Paulus se brief aan Titus lees, was ek opnuut dankbaar dat ek nie so jonk so ’n moeilike opdrag moes uitvoer nie. Titus was ’n jong man wat uit die Griekse heidendom tot bekering gekom het. Paulus was sy leermeester en het hom gou by die diepkant ingegooi toe hy hom in Kreta agtergelaat het. Dinge daar was deurmekaar en hy moes orde gaan skep. Titus het dadelik besef dat hy nie tot bekering gekom het om voortydig die ewige rus in te gaan nie. Nee, die koninkryk van Christus vra diens, ongeag die moeilike omstandighede wat hom in die gesig gestaar het. In sy brief skets Paulus die soort mens waarmee hy te doen sou kry – tugteloos, onsinpraters, vuil winsbejagters, leuenaars,…

Namibië se handjie vol melkboere lewer jaarliks meer as 25 miljoen liter melk. Dit is egter nie genoeg om selfvoorsienend te wees nie en vereis invoer. Mnr. Japie Engelbrecht, voorsitter van die Namibiese melkprodusentevereniging, sê Namibia Dairies se 15 produsente lewer sowat 24 miljoen liter melk ter waarde van R133 miljoen per jaar. Daarvan lewer intensiewe melkprodusente 80% en ekstensiewe produsente 20%. Ander melkboere lewer saam sowat 1,4 miljoen liter melk van R8 miljoen per jaar. Kommersiële produsente lewer dus elke jaar sowat 25,4 miljoen liter melk van R140 miljoen. Die melk word dan in die vorm van vars melk (8 miljoen liter), langlewemelk (8,5 miljoen liter) en produkte soos jogurt en room (8,9 miljoen liter) verkoop. Die Namibiërs koop elke jaar sowat 30 miljoen liter vars en langlewemelk. Gevolglik…

RENOSTERBOERE is stomgeslaan dat me. Edna Molewa, Minister van Omgewingsake, nou gaan appelleer teen regter Francis Legodi se opheffing van die moratorium op die handel in renosterhoring. Die moontlikheid is tans op die tafel dat haar departement later vanjaar by ’n vergadering van die konvensie oor internasionale handel in bedreigde spesies (Cites) sal vra dat die internasionale verbod op die handel in renosterhoring opgehef word. Sy het onlangs ’n paneel aangestel om dié kwessie te ondersoek. Die paneel se besluit sou dan Suid-Afrika se standpunt by Cites bepaal. “Dit maak nie sin nie,” sê mnr. Pelham Jones, voorsitter van die Suid-Afrikaanse Renostereienaarsvereniging. “Ons hoop die [Molewa se] departement sal later vanjaar op die Cites-vergadering vra dat die internasionale verbod op die handel in renosterhoring opgehef word. Tog baklei hulle hand…

DIE grootste koste in die vervaardiging van nastergalkonfyt is arbeid. Mev. Marie de Jager van die omgewing van Amersfoort in Mpumalanga sê in pluktyd is sowat 150 werkers nodig om dié swartpers bessies te pluk. Pluktyd begin gewoonlik middel Februarie en duur tot in Maart. De Jager en haar gesin het 16 jaar gelede die konfytonderneming Zuidvaal Exotic Jams op hul plaas Schuilplaas begin. De Jager se man, Kobus, plant die plantjies en versorg dit en in kooktyd help die hele gesin. Die nastergal word op die plaas self gekook omdat die bessies nie vervoer kan word nie. “Wanneer dit gepluk word, moet dit so vinnig moontlik na ’n koelkamer gebring word omdat die bessies delikaat en sag is,” sê De Jager. Hulle verkoop die konfyt aan padstalle en winkels…

ALGEMEEN 1 SEPTEMBER 2015-29 FEBRUARIE: Gabriëlskloof se kosblik-ervaring. Gabriëlskloof-landgoed, Botrivier. Tel. 028 284 9865 of e-pos: restaurant@gabrielskloof.co.za. 2 MAART: Broodsnyersplaasboerevereniging se Groendag. Plaas Roodepoort van Sancorboerdery. 10:00. R50 hekgeld ten bate van Agri SA-Rampfonds. Sel 082 490 8912, e-pos: jannie schoeman.sancor@gmail.com. 16 MAART: Bonsmara-genootskap SA se Rooi Geleentheid. Afridome, Parys. Tel. 051 448 6084; e-pos: marketing@bonsmara.co.za. 18-19 MAART: Plaaskultuurfees, demonstrasies van antieke landboutoerusting, bees- en skaapstoetery-uitstalling. Clocolan. Valencia, sel 082 775 1675, e-pos: vpieterse@vodamail.co.za. 30 APRIL-2 MEI: Agri-Expo Kaasfees, Sandringham, Porchia Adams, tel. 021 975 4440, sel 082 441 2510. Agri-Expo, tel. 021 975 4440; e-pos: admin@agriexpo.co.za; Yolandi de Wet, sel 082 772 7519. Web: www.cheesefestival.co.za. BOEREDAE 8 MAART: MPO Wes-Kaap. George, Tramonto. Chanelle Steenekamp; sel 076 774 1284; faks 086 607 4800; e-pos: chanelle@mpo.co.za. 9 MAART: MPO Wes-Kaap. Swellendam,…

2016 FEBRUARIE DE AAR 25-27, Sentrale Karoo, (SA Saalperd, Hackney), Marius Pienaar, tel. 053 631 7175, sel 083 282 3582, S.O. Vermeulen, sel 083 308 4250. (Veld-Merino), Bennie Steyn, sel 082 772 4548, Reinard Kock, sel 082 373 5546, Craig Ferreira, sel 083 378 8009. (Dorper), Kobus Rust, sel 082 923 7364. Kraampies en vermaak, Roelof van Zyl, sel 082 788 6163, Adriaan Bergh, sel 082 299 0756, Piet Marais, sel 082 589 2432, Steward Ferreira, sel 083 759 5344. Western Mounted Games-perdevertoning, gimkana, verskeie kunstenaars, Jan Braaikompetisie. Charl Marais, sel 082 416 4717. WILLISTON 25-27, Williston-skou. (Perde; Dorper/Wit Dorper; Melkbok; plaaspluimvee en sierduif.) Veldskou: Dohne-Merino, Afrino, Afrikaner en vleisbok. Jeugskou. Keith Coetzee, sel 082 825 3889, of Belinda Els, sel 082 613 3137. E-pos: willistonskou3@gmail.com. MAART CARNARVON 3-5, Carnarvon-landbouskou,…

Dis ongelooflike statistiek. In 2014 het die staat R900 miljard aan belasting ingevorder. Daarvan was R246 miljard persoonlike inkomstebelasting — van net 9% van die totale bevolking. En daardie klein groepie gaan heel moontlik nog meer betaal ná minister Pravin Gordhan se begrotingsrede. Soos ons verstaan, sien die manne in die duur pakke wat onlangs met pres. Zuma en Kie. vergader het, verhoogde persoonlike inkomstebelasting as ’n uitgemaakte saak. ’n Hoër BTW-koers is ook heel moontlik. Die algemene gevoel was dat alle Suid-Afrikaners ’n bietjie pyn sal moet verduur om die ekonomie weer op die been te kry. Dít terwyl daar miljoene mense is wat kwalik die verhoogde belasting kan bekostig. Onderwysers, verpleegsters, die eienaars van klein sake-ondernemings. Gewone mense. Gaan kyk maar na lande soos Brasilië om te sien…

DR. JOGGIE BRIEDENHANN boer met Bonsmaras en wild in die Kalahari in Namibië, en verbou ook voer en mielies. Hy het met wetenskaplike boerderybeginsels en sonkrag ’n groen oase in dié dorre streek ontwikkel. Lees die artikel op bl. 40. VERTEL ONS VAN JOU GESIN. Ek en my vrou, Eugenie, het drie kinders. Jonay is ’n student in die regte aan die Universiteit van Namibië, Byron is ’n rekenmeester en Christine studeer B. Rek. aan die Universiteit Stellenbosch. WAAR HET JY GESTUDEER? Ek het B.Ch.D. (tandheelkunde) aan die Universiteit van Pretoria en M.Ch.D. (ortodonsie) aan die Universiteit van die Witwatersrand gestudeer. HET JY ’N STOKPERDJIE? Ek bestee my vrye tyd om die teling van winsgewender vleisbeeste te ondersoek. WAAR HOU JULLE VAKANSIE? Ons geniet die plaas en Swakopmund. Elke tweede…

PRES. Jacob Zuma se opmerkings oor die landbou in die Staatsrede was grootliks ’n herhaling van wat hy die vorige jaar gesê het. Boere sal dus moet wag vir mnr. Pravin Gordhan se begrotingstoespraak om te sien watter droogtehulp hulle van die Regering te wagte kan wees. Hy het weer verwys na die staat se negepuntplan vir die ekonomie, wat onder meer oplossings wil vind vir die land se energieprobleme, landbouproduk-verwerking en die bevordering van klein- tot middelvlakondernemings (SMME’s). Hy het herhaal dat landbouparke die landbou sal versterk en aangekondig dat bouwerk reeds by vyf sulke parke begin het. Zuma het beklemtoon dat die ANC nie gaan afsien van sy voorstelle vir grondhervorming nie. Wetgewing vir die instel van grondplafonne en die verbod op buitelandse grondbesit, wat in die wetsontwerp…

DIE wolprys kan danksy wol se status as nisproduk en die verswakkende rand teen volgende jaar R180/kg beloop. Dít was die mening van mnr. Ernst Janovsky, hoof van Absa se agribesigheid, op die kongres van die NoordKaap se Wolkwekersvereniging (NKWKV) op VictoriaWes. Verlede jaar het die wolmark ’n vlak van R110/kg gehandhaaf. Tans is die prys sowat R155/kg. Volgens mnr. Gerrit du Toit, uittredende voorsitter van die NKWKV, is die wolbedryf tans ’n goeie bedryf vir boere om hulself in te bevind. Die vleismark is ook gunstig. “Ons verdien ons geld in buitelandse valuta en die verswakkende rand help ons. Die vraag uit China en Europa laat ook die wolprys verhoog.” NISPRODUK Janovsky sê wol lewer ’n klein bydrae tot die totale veselmark, wat deur katoen en poliëster (kunsvesel) oorheers…

DIE Suid-Afrikaanse Boerboeltelersvereniging onderhandel tans met ’n wêreld-erkende plaaslike laboratorium om ’n ondersoek te doen wat sal bepaal of die swart Boerboel wetenskaplik en geneties deel is van die historiese Boerboel-kleure. Dit kom nadat die Departement van Landbou, Bosbou en Visserye ingevolge die Wet op Diereverbetering (Wet 62 van 1998) verklaar het dat die swart Boerboel nie as ’n rasegte Boerboel erken word nie. Telers van swart honde mag dus nie tans die diere as Boerboele verkoop, keur of laat skou nie. Die departement het ook ’n verbod geplaas op die uitvoer van swart Boerboele totdat die kleur amptelik as deel van die historiese Boerboel-kleure bewys word. Die telersvereniging het gesê telers kan steeds voortgaan om op eie risiko sulke honde te teel en klein hondjies vir geboorteregistrasie te laat…

HOEWEL speenkalwers teen dieselfde prys as in Desember verhandel, is daar groter belangstelling as in die eerste drie weke van verlede maand, sê mnr. Chris Troskie, hoof van lewende hawe by CMW. Landbouweekblad verneem dat daar verlede week tot R24/kg (lewend) betaal is, na gelang van hoe ver die verkopers van die voerkrale geleë is. Die prys van stoorlammers het egter in die afgelope twee weke van R26/kg tot meer as R33/kg gestyg, en die prys van slaglammers het met R10/kg verbeter tot R68/kg (geslag). Hy skryf dit toe aan die skaarste weens die droogte. Troskie sê die hoë mielieprys en die dalende koopkrag van verbruikers skep onsekerheid. Dit is waarom speenkalfpryse in dié stadium sywaarts beweeg. “Die feit dat daar groter belangstelling is, word egter as ’n sein gesien…

DIE droogte in Suid-Afrika was een van die belangrikste sake wat op die pas afgelope vergadering van die nasionale Rooivleisprodusente-organisase se uitvoerende raad bespreek is. Die uitvoerende raad het op die vergadering besluit om met behulp van die Universiteit van die Vrystaat ’n dringende opname te maak oor die droogte se impak op die rooivleisbedryf. Dit volg nadat daar ’n groot behoefte by landboubesighede, bedryfsorganisasies en die georganiseerde landbou geïdentifiseer is om die droogte se impak te bepaal. Die opname sal by wyse van ’n telefoniese vraelys geskied en lede word versoek om hul samewerking te gee as hulle geskakel word. HIERDIE BLAD IS DEUR DIE ROOIVLEISPRODUSENTE-ORGANISASIE GEBORG. BERIGTE IS DEUR DIE RPO GESKRYF EN VERSKAF. RIG NAVRAE AAN DIE RPO BY 012 349 1102. E-POS: rpo@lantic.net. WEBWERF: www.rpo.co.za.…

Klimaatmodelleringstudies dui aan dat die gemiddelde jaarlikse temperatuur verder sal styg met 1,5 °C tot 3 °C teen die middel van die 21ste eeu vergeleke met die gemiddelde jaarlikse temperatuur wat van 1976 tot 2005 ondervind is. Die grootste toenames sal waarskynlik in die binneland plaasvind en die kleinstes langs die kus danksy die matigende uitwerking van die Indiese en die Atlantiese Oseaan. Dit beteken die Wes-Kaap kan hoër minimum- en maksimumtemperature verwag, terwyl die getal koue dae en nagte sal daal en die getal baie warm dae en nagte sal styg. Die aantal koue-eenhede sal beduidend daal. Dit raak veral vrugteboere. Die studies toon ook met ’n hoë vlak van sekerheid dat die provinsie se westelike dele teen die middel van die eeu en daarna ’n afname in winterreën…

MNR. PIET WARREN WATTER PLAASBESTUURSINSETTE HET OOR DIE JARE DIE GROOTSTE IMPAK OP JUL SUKSES GEHAD? ’n Optimistiese benadering tot die boerdery, asook dissipline. DINK JY DAAR IS NOG PLEK VIR MIDDELSLAG-FAMILIEBOERDERYE IN DIE LANDBOU? Ongetwyfeld, en danksy die moderne tegnologie en die vraag na voedsel sal daar altyd ruimte vir jong boere wees. HOE HET DIE PLAASLIKE EN DIE UITVOERMARK VIR LANDBOUPRODUKTE OOR DIE JARE VERANDER? Vanweë die rand se verswakking sal daar nog baie groot geleenthede vir uitvoer ontwikkel, sowel as vir produkte wat ingevoer moet word. IS JY GEMAKLIK DAARMEE OM IN DIE HUIDIGE POLITIEKE KLIMAAT GROND BY TE KOOP? Ja, ek het verlede jaar 3 000 ha bygekoop. Suksesvolle boere koop grond. Die reusestyging in grondpryse bewys dit. HOE BESTUUR JULLE DIE HUIDIGE DROOGTE? Dit is…

PLAASINLIGTING LIGGING: Jamestown, Oos-Kaap NAAM:Killarney GROOTTE:1600ha REËNVAL:Gemiddeld 550mmperjaar HOOGTE BO SEESPIEËL:1650m VERTAKKINGS:Merino-ooieen Drakensbergerbeeste Mnr. Casper Labuschagne (43) van die plaas Killarney, Jamestown, raak nie maklik van ou werktuie en skroot op die plaaswerf ontslae nie. In die 16 jaar wat hy boer, kon hy al meermale ’n nuttige gebruik daarvoor vind. Dit was ook die geval toe hy verlede jaar ’n splinternuwe Solis 90 Landini-trekker aangeskaf het. In sy noppies met die werkverrigting daarvan, het hy egter tot sy ontsteltenis agtergekom die bandkatrol waarmee die Staalmeester-hamermeul aangedryf word, pas nie op die nuwe trekker nie. Hy het nie kans gesien om ten duurste ’n nuwe hamermeul aan te skaf nie. Toe onthou hy dat sy pa ’n waterpomp met ’n groot vliegwiel gehad het wat regstreeks vanaf die trekker se…

VOER ULRICH MÜLLER EET SKAPE LEMOENSKILLE? Mag nat, uitgedrukte nartjie-, lemoen- en suurlemoenskille vir skape gevoer word? Indien wel, hoeveel en wanneer? Hulle kry tans een keer per dag lusern en een keer per dag Voermolkorrels, en loop verder heeldag op natuurlike weiding. Lemoenskille kan nie net so gevoer word nie. Skille kan dalk in die dier se slukderm vassit en opblaas veroorsaak, wat dodelik mag wees. Dit is ’n probleem by beeste, maar nie noodwendig by skape nie – hulle vreet nie so gulsig nie. Verder het vars lemoenskille ’n hoë voginhoud (70% tot 80%), wat die inname by veral skape beperk. Vars lemoenskille het sowat driekwart die energiewaarde van mielies, op ’n droëmateriaalgrondslag. Teen hierdie agtergrond stel ek voor 50 kg mieliemeel word met hoogstens 250 kg vars…

dit was in die laat negentigs, een Desember-reëndag by die see. Vir ons ouers was die strand een van die lekkertes van ’n seevakansie, maar die eintlike prys was die legio voëlkykplekke, uitkykpunte, bergpasse of wandelpaaie wat die Tuinroete bied. Dit het in ons vroeë tienerjare ’n taamlike toutrekkery afgegee as die ouers so wou rondry en die jonges net op die strand wou rondlê of saans tussen die strandpartytjies drentel. Hopelik kon ’n mens ’n bondel bruingebrande tienerhormone raakkuier vir ’n vakansieromanse terwyl die vakansie se hoofsnaar sy passievolle covers van Nirvana, Tom Petty, Blink182 en Pearl Jam op ’n geroeste kitaar uittokkel. Op reëndae was dit makliker om ons in ’n kar te bondel, en as ons eers so ver was en ons coolgeit op die strand agtergelaat…

Agra Beperk is ’n openbare, ongenoteerde maatskappy wat oral in Namibië produkte en dienste aan die landbou verskaf. Die maatskappy bied lewendehawedienste en ’n diverse reeks groothandelprodukte wat aan kleinhandelaars beskikbaar is. Die maatskappy is een van die steunpilare van die landbougemeenskap in Namibië. Sedert Agra se ontstaan in 1980 het dit gegroei tot die grootste landbou-onderneming in die land met meer as 4 200 Namibiese aandeelhouers, 750 werknemers en ’n jaarlikse omset van meer as N$2 miljard. Agra wil welvaart skep en lewensgehalte verbeter. DIENSTE Handelstakke: Agra se 19 handelstakke lewer puik diens met ’n uitgebreide reeks produkte – van omheiningsmateriaal, dieremedisyne, voere en lekke tot veeartseny- en troeteldierprodukte, akkerboubenodigdhede, boumateriaal, hardeware, watertoerusting en brandstof. Wapens, ammunisie en buitelug: Safari Den is die voorkeurwinkel vir alle jag-, kampeer- en…

“ONS is bly om te sien dat die regstelsel funksioneer en dat gewone mense se regte nog daardeur beskerm word, al draai die wiele van geregtigheid hóé stadig,” sê dr. Peter Oberem. Oberem is een van 14 boere van Alma wat meer as sewe jaar gelede miljoene rande se skade gely het in ’n brand wat op die polisie se opleidingsplaas Verdrag ontstaan het. ’n Landbouwerker is dood en ’n boer ernstig beseer in dié veldbrand in Augustus 2008. Hoewel die Hooggeregshof bevind het dat die brand nie ontstaan het weens die polisie se nalatigheid nie, is daar wel bevind dat dit weens nalatigheid versprei het omdat die polisie nie opgeleide personeel op die perseel gehad het wat die brand kon bestry nie. Die polisie het ook nie brandpaaie gemaak…

MEER HOENDER INGEVOER BAIE meer bevrore hoenderstukke aan die been is verlede jaar ingevoer. Van Januarie tot November is 173 431 ton ingevoer, vergeleke met 157 118 ton in die hele 2014, 144 773 ton in 2013 en 161 177 ton in 2012, lui ’n verslag van die Suid-Afrikaanse Pluimveevereniging (SAPV). ’n Groot hoeveelheid van dié hoender kom uit die Europese Unie (EU) met wie Suid-Afrika ’n vryehandelsooreenkoms het. In die eerste elf maande van verlede jaar was dit 138 233 ton, in 2014 was dit 145 499 ton en in 2013 was dit 117 116 ton. Syfers oor die invoer van alle hoenderprodukte wys dat 414 931 ton van Januarie tot November verlede jaar ingevoer is, vergeleke met 368 804 ton van Januarie tot Desember 2014. Altesame 163 503…

Die beskikbaarheid van dieregesondheidsmiddels vir plaasdiere is volgens dr. Gerhard Verdoorn, konsultant van die Suid-Afrikaanse Dieregesondheidsvereniging (SAAHA), nie ’n bekommernis nie. “Daar is gesonde plaaslike en multinasionale maatskappye in Suid-Afrika wat ’n wye reeks uitstekende produkte voorsien. “Op die platteland is verspreiding ’n probleem en dit noop dié maatskappye om hul produkte by kleinhandelaars op die rak te versprei pleks van deur veeartse. Die beskikbaarheid van hierdie produkte is egter nie te betwyfel nie,” meen Verdoorn. Die beskikbaarheid van Onderstepoort Biologiese Produkte (OBP) se produkte is wel ’n probleem en dit is ’n toffie wat al deur talle rolspelers in die landboubedryf gekou is. “Die oplossing berus by kundigheid en gesonde bestuur. Die produkte wat OBP verskaf, is uitstekend en dis bloot te duur vir private maatskappye om hierdie produkte…